LISAUN ESTUDU 40
‘Ajuda ema barak sai ema laran-loos’
“Sira neʼebé ajuda ema barak atu sai ema laran-loos sei nabilan hanesan fitun sira, tinan ba tinan ba nafatin.”—DAN 12:3.
KNANANUK 151 Jeová sei bolu
IHA LISAUN NEʼE a
1. Buat furak saida mak sei akontese durante Kristu nia Ukun ba Tinan Rihun Ida?
ITA hotu sei kontente tebes bainhira ema komesa hetan moris-hiʼas iha rai durante Kristu nia Ukun ba Tinan Rihun Ida. Ema hotu hakarak tebes atu hasoru fali sira-nia família no belun neʼebé mate ona. Jeová mós hakarak ida-neʼe. (Job 14:15) Imajina toʼok ksolok neʼebé ema hotu sente bainhira hasoru fali sira-nia família no belun sira. Hanesan ita aprende ona, “ema neʼebé hatudu hahalok loos”, sira-nia naran hakerek ona iha livru moris nian no sei “moris hiʼas atu hetan moris rohan-laek”. (Após 24:15; João 5:29) Karik lakleur depois Armagedon, ita-nia família ka belun sei hetan moris-hiʼas. b “Ema neʼebé hatudu hahalok la loos” katak sira neʼebé la iha oportunidade atu koñese Jeová no la serbí Jeová antes sira mate sei “moris hiʼas atu hetan tesi-lia”.
2-3. (a) Tuir Isaias 11:9, 10, saida mak programa hanorin nian neʼebé boot liu iha ema nia istória? (b) Iha lisaun neʼe, ita sei aprende saida?
2 Ema neʼebé hetan moris-hiʼas presiza simu hanorin. (Isa 26:9; 61:11) Tan neʼe ita sei halaʼo programa hanorin nian neʼebé boot liu iha ema nia istória. (Lee Isaias 11:9, 10.) Tanbasá? Razaun ida mak tanba ema neʼebé hatudu hahalok la loos no hetan moris-hiʼas presiza aprende kona-ba Jesus Kristu, Jesus nia sakrifísiu, Maromak nia Ukun, no asuntu neʼebé liga ho Jeová nia naran no ninia direitu atu ukun. Ema neʼebé hatudu hahalok loos no hetan moris-hiʼas mós presiza aprende kona-ba oinsá Jeová fó sai neineik-neineik ninia hakarak kona-ba rai. Jeová nia atan sira-neʼe balu mate tinan barak antes ema hakerek Bíblia kompletu. Klaru katak ema neʼebé hatudu hahalok loos no ema neʼebé hatudu hahalok la loos presiza aprende buat barak.
3 Iha lisaun neʼe, ita sei buka resposta ba pergunta sira tuirmai: Saida deʼit mak ita presiza halo atu halaʼo programa hanorin nian neʼebé boot? Oinsá serbisu importante neʼe ajuda ema atu sira-nia naran bele hakerek permanente iha livru moris nian? Resposta ba pergunta sira-neʼe mak importante. Hanesan ita sei haree, profesia balu neʼebé hakerek iha livru Daniel no Apokalipse sei ajuda ita komprende saida mak sei akontese bainhira ema hetan moris-hiʼas. Ulukliu, mai ita koʼalia kona-ba profesia neʼebé hakerek iha Daniel 12:1, 2.
“EMA BARAK NEʼEBÉ MATE ONA SEI MORIS FALI”
4-5. Daniel 12:1 fó sai saida kona-ba tempu nia rohan?
4 Lee Daniel 12:1. Livru Daniel fó sai akontesimentu tuituir malu neʼebé sei akontese durante tempu nia rohan. Porezemplu, Daniel 12:1 esplika katak Miguel ka Jesus Kristu “hamriik daudaun hodi apoia” Maromak nia povu. Profesia neʼe komesa sai loos iha tinan 1914 bainhira Jesus sai nuʼudar Liurai ba Maromak nia Ukun iha lalehan.
5 Maibé Daniel mós esplika katak Jesus “sei hamriik” durante “tempu susar neʼebé ema seidauk hasoru husi tempu neʼebé harii nasaun sira toʼo tempu neʼe”. “Tempu susar” neʼe mak “terus boot” neʼebé temi iha Mateus 24:21. Jesus sei hamriik atu defende Maromak nia povu iha tempu susar nia rohan, katak iha funu Armagedon. Livru Apokalipse bolu povu neʼe nuʼudar “ema-lubun boot” neʼebé “liu terus boot”.—Apok 7:9, 14.
6. Saida mak sei akontese depois ema-lubun boot liu terus boot? Esplika toʼok. (Haree mós esplikasaun kona-ba moris hiʼas iha rai husi “Pergunta husi lee-naʼin” iha Livru Haklaken neʼe.)
6 Lee Daniel 12:2, nota. Saida mak sei akontese depois ema-lubun boot liu terus boot? Uluk ita dehan katak profesia iha Daniel 12:2 refere ba moris hiʼas iha dalan simbóliku ka iha dalan espirituál durante loron ikus sira. c Maibé agora ita komprende katak profesia neʼe refere ba moris hiʼas neʼebé sei akontese iha mundu foun. Tanbasá? Liafuan “rai-rahun” neʼebé temi iha eskritura neʼe mós temi iha Job 17:16 neʼebé refere ba “rate”. Faktu neʼe hatudu katak Daniel 12:2 refere ba moris hiʼas neʼebé sei akontese depois loron ikus sira no depois funu Armagedon.
7. (a) Oinsá mak ema balu moris hiʼas atu “hetan moris rohan-laek”? (b) Tanbasá ida-neʼe “moris-hiʼas neʼebé diʼak liu”?
7 Liafuan ema balu moris hiʼas atu “hetan moris rohan-laek” iha Daniel 12:2 signifika saida? Neʼe katak, ema neʼebé hetan moris-hiʼas no koñese ka kontinua koñese Jeová no mós halo tuir Jeová no Jesus durante tinan 1.000, ikusmai sei hetan moris rohan-laek. (João 17:3) Neʼe mak “moris-hiʼas neʼebé diʼak liu” duké moris hiʼas seluk neʼebé akontese iha tempu uluk. (Ebr 11:35) Tanbasá? Tanba sira neʼebé uluk hetan moris-hiʼas ikusmai mate fali.
8. Oinsá mak ema balu moris hiʼas atu “hetan moe ba nafatin”?
8 Maibé laʼós ema hotu neʼebé moris hiʼas hakarak atu simu Jeová nia hanorin. Daniel fó sai profesia katak ema balu moris hiʼas atu “hetan moe ba nafatin”. Tanba sira kontra, sira-nia naran sei la hakerek iha livru moris nian. Sira sei “hetan moe ba nafatin” ka lakon ba nafatin. Entaun Daniel 12:2 koʼalia kona-ba buat neʼebé ikusmai sei akontese ba ema hotu neʼebé moris hiʼas no kolen neʼebé sira hetan depende ba sira-nia hahalok depois sira moris fali. d (Apok 20:12) Ema balu sei moris ba nafatin no ema balu sei lakon.
“AJUDA EMA BARAK ATU SAI EMA LARAN-LOOS”
9-10. Saida tan mak sei akontese depois terus boot, no sé mak “sei nabilan hanesan lalehan”?
9 Lee Daniel 12:3. Saida mak sei akontese depois “tempu susar” nian? Daniel 12:3 fó sai informasaun seluk tan kona-ba buat neʼebé akontese depois terus boot.
10 Sé mak “sei nabilan hanesan lalehan”? Ita bele hetan resposta iha Jesus nia liafuan neʼebé hakerek iha Mateus 13:43: “Iha tempu neʼebá ema sira neʼebé laran-loos sei sai nabilan hanesan loro-matan iha sira-nia Aman nia Ukun.” Kontestu husi eskritura neʼe hatudu katak Jesus koʼalia kona-ba “oan sira neʼebé atu tama ba Ukun lalehan nian”, neʼe mak sira neʼebé iha esperansa atu bá lalehan, no sira serbisu hamutuk ho Jesus iha Ukun neʼe. (Mt 13:38) Entaun Daniel 12:3 mós refere ba Kristu nia alin sira no serbisu neʼebé sira halo durante Kristu nia Ukun ba Tinan Rihun Ida.
Ema naʼin-144.000 sei serbisu hamutuk ho Jesus Kristu atu dirije programa hanorin nian neʼebé sei halaʼo durante tinan 1.000 (Haree parágrafu 11)
11-12. Kristu nia alin naʼin-144.000 halo serbisu saida durante tinan 1.000?
11 Oinsá Kristu nia alin sira “ajuda ema barak atu sai ema laran-loos”? Sira sei serbisu hamutuk ho Jesus Kristu atu dirije programa hanorin nian neʼebé sei halaʼo iha rai durante tinan 1.000. Kristu nia alin naʼin-144.000 sei ukun nuʼudar liurai no mós serbí nuʼudar amlulik. (Apok 1:6; 5:10; 20:6) Ho ida-neʼe, sira sei ajuda “kura nasaun sira”, neʼe katak neineik-neineik sira ajuda ema sai perfeitu fali. (Apok 22:1, 2; Eze 47:12) Neʼe lori ksolok boot ba Kristu nia alin sira!
12 Sé mak sai parte ba “ema barak” neʼebé sai ema laran-loos? Neʼe mak ema neʼebé hetan moris-hiʼas, ema neʼebé liu Armagedon no mós labarik hotu neʼebé karik sei moris iha mundu foun. Bainhira tinan 1.000 remata, ema hotu iha rai sei perfeitu. Entaun neʼe katak iha tempu neʼebá, sira-nia naran sei hakerek permanente iha livru moris nian hanesan hakerek ho lapizeira ka lae?
KOKO BA DALA IKUS
13-14. Ema perfeitu hotu iha rai presiza halo saida atu bele hetan moris rohan-laek?
13 Ita tenke hanoin-hetan katak sai ema perfeitu la dehan katak ita sei hetan kedas moris rohan-laek. Hanoin kona-ba Adão no Eva. Maski sira perfeitu, maibé sira tenke hatudu katak sira halo tuir Jeová hodi nuneʼe sira bele hetan moris rohan-laek. No triste mak sira falla.—Rom 5:12.
14 Bainhira tinan 1.000 ida remata, ema hotu nia situasaun mak oinsá? Ema hotu perfeitu ona. Ema sira-neʼe hotu sei apoia Jeová nia ukun ba nafatin ka lae? Ka sira balu sei hatudu hahalok hanesan Adão ho Eva neʼebé la laran-metin ba Jeová maski perfeitu? Oinsá ita bele hetan resposta ba pergunta importante sira-neʼe?
15-16. (a) Bainhira mak ema hotu sei hetan oportunidade atu hatudu katak sira laran-metin ba Maromak? (b) Koko ba dala ikus sei lori rezultadu saida?
15 Jesus sei hatama Satanás ba rai-kuak durante tinan 1.000, no nia labele lohi tan ema. Maibé bainhira tinan 1.000 remata, Satanás sei livre fali. Depois neʼe, nia sei koko atu lohi ema perfeitu sira. Durante koko neʼe, ema perfeitu hotu iha rai hetan oportunidade atu hatudu ho klaru sira respeitu Jeová nia naran no apoia ninia direitu atu ukun ka lae. (Apok 20:7-10) Sira-nia desizaun mak sei determina sira-nia naran bele hakerek ho permanente iha livru moris nian ka lae.
16 Ema balu sei la simu Jeová nia ukun hanesan Adão ho Eva. Saida mak sei akontese ba sira? Apokalipse 20:15 hatete: “Ema sira neʼebé naran la hakerek iha livru moris nian sei soe tiha ba tasi neʼebé iha ahi-lakan.” Sin, kontradór sira-neʼe sei lakon ba nafatin. Maibé ema perfeitu barak sei liu koko ikus neʼe no sira-nia naran sei hakerek permanente iha livru moris nian.
DURANTE “TEMPU NIA ROHAN”
17. Saida mak anju fó-hatene ba Daniel kona-ba ita-nia tempu? (Daniel 12:4, 8-10)
17 Ita kontente tebes atu aprende kona-ba akontesimentu sira iha futuru. Maibé anju mós fó sai informasaun importante balu ba Daniel kona-ba ita-nia tempu, katak “tempu nia rohan”. (Lee Daniel 12:4, 8-10; 2 Tim 3:1-5) Anju hatete ba Daniel: “Koñesimentu neʼebé loos sei sai barak.” Neʼe hatudu katak Maromak nia povu sei komprende ho didiʼak profesia sira iha livru Daniel. Anju mós hatutan tan katak durante tempu neʼe, “ema aat sei hatudu hahalok aat, no la iha ema aat ida mak sei komprende”.
18. Lakleur tan, saida mak sei akontese ba ema aat?
18 Ohin loron, karik ita sente katak ema aat sira la hetan kastigu. (Mal 3:14, 15) Lakleur tan, Jesus sei tesi-lia ba ema sira neʼebé Bíblia bolu nuʼudar bibi-timur no nia sei haketak sira husi bibi-malae. (Mt 25:31-33) Ema aat sira-neʼe sei la moris liu terus boot no sira mós sei la hetan moris-hiʼas iha mundu foun. Sira-nia naran la hakerek iha Maromak nia livru atu “hanoin-hetan” neʼebé temi iha Malaquias 3:16.
19. Agora ita presiza halo saida, no tanbasá? (Malaquias 3:16-18)
19 Agora mak tempu atu hatudu katak ita la hanesan ho ema aat. (Lee Malaquias 3:16-18.) Jeová halibur daudaun ema sira neʼebé nia haree nuʼudar “povu neʼebé espesiál” ka rikusoin neʼebé nia hafolin. Ita hakarak duni atu sai parte ba povu hanesan neʼe.
Ita sei kontente tebes atu hasoru Daniel, ita-nia família, no mós ema barak tan neʼebé “hamriik” hodi simu sira-nia parte iha mundu foun (Haree parágrafu 20)
20. Jeová promete saida ba Daniel, no tanbasá ita hein namanas atu promesa neʼe sai loos?
20 Ita moris iha tempu neʼebé espesiál. Iha buat furak barak neʼebé besik ona atu akontese. Lakleur tan ema aat sei lakon. Tuirmai ita sei haree Jeová kumpre ninia promesa ba Daniel: “Ó sei hamriik atu simu ó-nia parte iha tempu sira-neʼe nia rohan.” (Dan 12:13) Ita hein namanas ba loron neʼebé Daniel no mós ita-nia família sira “hamriik” ka moris fali. Tan neʼe, mai ita hakaʼas an atu laran-metin, no ita-nia naran sei hakerek permanente iha Jeová nia livru moris nian.
KNANANUK 80 “Koko no haree katak Jeová mak diʼak”
a Ita sei aprende esplikasaun foun kona-ba programa hanorin nian neʼebé temi iha Daniel 12:2, 3. Ita sei aprende bainhira mak ida-neʼe hahú no sé-sé deʼit mak envolve an iha programa neʼe. Ita mós sei aprende oinsá programa neʼe sei prepara ema sira iha rai atu hasoru koko ba dala ikus bainhira Kristu nia Ukun ba Tinan Rihun Ida remata.
b Karik Jeová nia atan sira neʼebé laran-metin no mate durante loron ikus sira mak sei moris hiʼas uluk no tuirmai mak ema neʼebé mate antes sira, no neʼe sei akontese tuituir malu husi jerasaun ba jerasaun. Se neʼe mak loos, jerasaun ida-idak sei iha oportunidade atu fó benvindu fali ba ema neʼebé sira rasik koñese. Bíblia esplika katak moris hiʼas ba lalehan sei akontese “tuituir malu ho loloos”, tan neʼe ita bele fiar katak moris hiʼas iha rai mós sei akontese tuituir malu.—1 Kor 14:33; 15:23.
c Esplikasaun neʼe troka informasaun iha livru Perhatikanlah Nubuat Daniel! kapítulu 17, no Menara Pengawal Seri 38, pájina 17-21.
d Ida-neʼe la hanesan ho fraze iha Apóstolu 24:15 neʼebé koʼalia kona-ba “ema neʼebé hatudu hahalok loos” no “ema neʼebé hatudu hahalok la loos” no mós fraze iha João 5:29 neʼebé koʼalia kona-ba “sira neʼebé halo buat diʼak” no “sira neʼebé halo hahalok aat”, tanba eskritura sira-neʼe tau fokus ba ema nia hahalok antes sira mate.
