NDRIMA NYA GIHEVBULO 40
“Vathu nya vangi va reswa gululamani”
“Avo va ndrindrelago nya vangi guya gululamani, va na fanana ni dzinyeledzi kala gupindruga.” — DHAN. 12:3.
NDZIMO 151 A na rana
ESI HI NA SIHEVBULAGO AVBA NYA NDRIMA YEYI *
1. Gi giro muni nya gu tsakise gi na viredwago khu vale va na fumedwago khu Mufumo nya mil myaga?
HI NA tsaka gundzu tepo gu na pheyago guwuswa ga vale va fudego mafuni ndrani nya Mufumo nya mil myaga wa Kristo. Vatshavbo vale va fedwego khu sigodwa sawe va gu dogoreya gu si wona gambe. Jehovha a nuye a ngu dogoreya gu si wona. (Joba 14:15) Dundrugeya khedzi vatshavbo vale va fedwego khu sigodwa sawe va na tsakago khidzo tepo sigodwa sawe si na wuswago khu gufani. Kha nga hi si wonidego avba nya ndrima yi vbindridego, “va nya gululama” vale malina yawe ma lovidwego omu nya libhuku nya womi, va na wuswa gasi “guya guvbanyani.” (Mith. 24:15; Joh. 5:29) Adzina sigodwa sathu si na wuswa hwanenyana na yi gu vbede Harmagedhoni. * Vbavbandze nya isoso, “vale nya ba [lulama]”, a gu vale va nga ba mana lithomo nya guti ni gu thumeya Jehovha khu gu tumbega na va nga si gufi, va na wuswa gasi “vaya [gulamudwatunu.]”
2-3. a) Kha nga si kumbugwago ga Isaya 11:9, 10, khu wevbini thumo nya wukhongolo nya gu hevbudze wu na girwago? b) Ginani hi na bhulago khigyo ava nya ndrima yeyi?
2 Vatshavbo va na wuswago khu gufani gu na vbwetega gu va hevbudzwa. (Isa. 26:9; 61:11) Khu kharato, gu na vbwetega gu wu girwa thumo nya wukhongolo nya gu hevbudze. (Leri Isaya 11:9, 10.) Khu ginani? Gupheya, va yede gu hevbudzwa maningano ni Mufumo va Nungungulu, dzegiso va Kristo, lisima nya lina la Jehovha, nigu khu ginani uye enga a gu na ni fanelo nya gu fume. Ambari ava nya gululame gu na vbwetega gu va hevbudzwa maningano ni edzi Jehovha a hevbudzidego vathu vaye vbadugwana-vbadugwana maningano ni makungo yaye khu mafu. Vathu nyo khaguri nyo tumbege va fude Bhibhiliya na yi nga si vbedzwi gu lowa. Khu karato, ava nya ba lulama ni ava nyo lulame vatshavbo gu na vbwetega gu va hevbudzwa.
3 Avba nya ndrima yeyi, hi na bhula khu siwudziso sesi: Ginani gi na pategago avba nya thumo wowu nya wukhongolo nya gu hevbudze? Edzi vathu va na hakhago khidzo thumo wowu si na khuha kharini avba nya gu malina yawe ma na lowa khu kaneta mwendro ne omu nya libhuku nya womi? Mihlamulo nya siwudziso sesi khya lisima gundzu gwathu ngudzungudzu olu. Kha nga hi na si wonango, siprofeto nyo khaguri si gomogo umo ga libhuku la Dhaniyeli ni Gutuledwa si na hi phasa gu pwisisa gwadi esi si na dugeleyago vale va na wuswago khu gufani. Olu hongoleni hi bhula khu gigiro gimwegyo gi ganedwego omu nya giprofeto gya Dhaniyeli 12:1, 2.
‘VATSHAVBO VALE VA LADEGO AVBA NYA KUDZUDZWANI VA NA WUGA’
4-5. Guya khu Dhaniyeli 12:1 ginani gi na giregago ndrani nya matshigu nya gu hegise?
4 Leri Dhaniyeli 12:1. Libhuku la Dhaniyeli la gu yeyedza sigirigo nyo samadzise si giregago ndrani nya tepo nyo hegise. Khu giyeyedzo, Dhaniyeli 12:1 a gu yeyedza oyu a gu Migeli, a gu Jesu Kristo oyu a “emeyago vathu va [Nungungulu].” Gipandre nya giprofeto gegi gi phede gu tadzisega khu 1914 tepo Jesu a nga emiswa kha nga Pfhumu nya Mufumo va Nungungulu.
5 Khu kharato, Dhaniyeli a embedwe gu pwane Jesu a na “khuga a ema” ndrani nya “gikhati nya gu saniseke nya gu gima gi si manegi gu khugela guhegulani nya mifumo.” “Gikhati nya gu saniseke” ga gu thudwa “tshanisa nya yigongolo” yi khumbugwago omu ga Matewu 24:21. Jesu a na khuga a ema, mwendro gu vikheya vathu va Nungungulu ndrani nya tepo yoyo nya gu tshaniseke avba nya Harmagedhoni. Libhuku la Gutuledwa la gu ganeya khu tshawa wawumowo kha nga “gidzemo nya gikhongolo gitago khu musigaradzoni nya sikhongolo.” — Gutu. 7:9, 14.
6. Ginani gi na giregago hwane nya gu ba gidzemo nya gikhongolo gi vbulugide tshanisa nya yikhongolo? Tshamuseya. (Wona gambe “siwudziso sa valeri” maningano ni gu wuswa gasi gu vbanya mafuni.)
6 Leri Dhaniyeli 12:2. Ginani gi na giregago hwane nya gu ba gidzemo nya gikhongolo gi vbulugide? Gale hi di gu pwisisa gu khethu Dhaniyeli 12:2 a gu ganeya khu gu wuswa gasi guya vbanya ndzadzini mwendro khu gu engedzeya nya thumo hwane nya gu ba thumo nyo tshumeyele wu emisidwe khu vawugeyi khu 1918. * Ganiolu, muhuno hi gu pwisisa gu khethu malito yaya ma gu ganeya khu gu wuswa ga ava va fudego gu na giregago mafuni nya maphya ma nga gu tago. Khu ginani hi ganeya isoso? Lito “kudzudzwani” ilo gambe li gu thumiswa umo ga Joba 17:16 gasi gu thula ‘lithowo.’ Khu kharato, isoso so yeyedza gu khiso Dhaniyeli 12:2 a gu ganeya khu gu wuswa nya lisine gu na giregago hwane nya nyimbi nya Harmagedhoni.
7. a) Ava va na wuswago, ginani va yedego gu gira gasi va hakha “guvbanya nya gupindruge”? b) Khu ginani ogu gu gu guwuga nya gu bele “guvbanyani nya gwadi”?
7 Dhaniyeli 12:2 a gu vbweta gu khuye ginani tepo a gu khuye vambe va na wugeya “guvbanyani nya gupindruge”? Esi sa gu thula gu khiso vale va na wuswago va yede guti mwendro gu simama guti ni gu engisa Jehovha ni Jesu ndrani nya 1000 myaga gasi va hakha guvbanya nya gupindruge. (Joh. 17:3) Ogu guwuswa nya gu bele “guvbanyani nya gwadi” ngudzu guvbindra ogu gu giregidego gale. (Hebh. 11:35) Khu ginani? Kholu vale va wusidwego gale va di bwe vafa gambe.
8. Khu ginani vambe va na wuswago gasi “guya dzitshonini gusanisekani nyamba vbela”?
8 Ga ava va na wuswago, khandri vatshavbo va na dzumeyago gu hevbudzwa khu Jehovha. Giprofeto gya Dhaniyeli gyo ganeya gu khigyo vambe va na wuga guya “dzitshonini nyamba vbela,” kholu ava kha va engisa nigu malina yawe kha ma lowa avba nya libhuku nya womi, nigu ava kha va na nga hakha womi nya gupindruge. Vbavbandze nya isoso, avo va na hakha ‘gusaniseka nya ba vbeya’ mwendro gu fuviswa. Khu karato, libhuku la Dhaniyeli 12:2 la gu ganeya khu satshavbo khu gu hegisa si na giregeyago vatshavbo va na wuswago, guya khu esi va na girago hwane nya gu ba va wusidwe khu gufani. * (Gutu. 20:12) Vambe va na mana guvbanya nya gupindruge; vambe kha va na nga gu mana.
“GURESWA NYA VANGI GULULAMANI”
9-10. Ginani gambe gi na dugeleyago hwane nya tshanisa nya yikhongolo nigu khu vamani va na ‘wenengedzago nga lidambo’?
9 Leri Dhaniyeli 12:3. Ginani gambe gi na dugeleyago hwane nya “tepo nya gu garadze”? Khu gu engedzeya, Dhaniyeli 12:2, 3 a ngu ganeya gilo nyo khaguri gi na dugeleyago hwane nya tshanisa nya yikhongolo.
10 Khu vamani va na ‘wenengedzago nga lidambo’? Matewu 13:43 a ngu hi phasa gu tugula gu khethu khu vamani, tepo a ganeyago gu khuye: “Khu tepo yoyo, va nya gululama va na wenengedza nga lidambo Mufumoni wa Papayi wawe.” Avba nya malito yaya, Jesu a di gu ganeya khu “sanana nya Mufumo” na gu thula vadriyaye va todzidwego ava a na fumago navo Mufumoni wa dzadzini. (Mat. 13:38) Khu karato, Dhaniyeli 12:3 a di gu ganeya khu ava nya gu todzwe ni thumo va na girago ndrani nya Mufumo nya 1000 myaga.
Ava nya 144 000 va na thuma gumogo ni Jesu Kristo gasi gu thangeya thumo nya gu hevbudze wu na girwago ndrani nya 1000 myaga (Wona ndrimana 11)
11-12. Khu wevbini thumo ava nya 144 000 va na wu girago ndrani nya 1000 myaga?
11 Ava va todzidwego va na resa kharini “nya vangi gululamani”? Ava va todzidwego va na thuma gumogo ni Jesu Kristo gasi gu thangeya thumo nya gu hevbudze, wu na girwago omu mafuni ndrani nya 1000 myaga. Ava nya 144 000 kha va na nga thuma basi kha nga dzipfhumu, ganiolu va na thuma kha nga vapiristi. (Gutu. 1:6; 5:10; 20:6) Khu karato, avo va na phasa ‘gu hawulugisa vathu vatshavbo’ ni gu phasa vathu gu khala vathu nyo vbeleye, vbadugwana-vbadugwana. (Gutu. 22:1, 2; Ezek. 47:12) Ava va todzidwego va na tsaka gundzu khu gu gira isoso.
12 Khu mani a na manegago vbakari ga ava “nya vangi” va na reswago gululamani? Ava va gu pata vale va wusidwego ni vale va na vbulugago avba nya Harmagedhoni ni satshavbo sanana si na velegwago ndrani nya mafu nya maphya. Gu hegisani nya 1000 myaga, vatshavbo mafuni va na vbeleya. Khu karato, ginani gi na phasago gu hunga gu khavo malina yawe ma na lowago khu kaneta nasiri khu làpis omu nya libhuku nya womi?
GULINGWA NYO HEGISE
13-14. Ginani egi vathu vatshavbo nyo vbeleye mafuni va yedego gu gira na va si gu hakhi womi nyo gupindruge?
13 Hi yede gu dundruga gu khethu gu vbeleya kha si eneyi gasi gu hi hakha womi nya gupindruge. Dundruga gu khuwe Adhamu ni Evha va di vbelede, ganiolu gu di gu vbwetega gu va engisa Jehovha Nungungulu gasi gu va hakha womi nya gupindruge. Nya ba tsakisa khu gu avo kha va mu engisa. — Rom. 5:12.
14 Vathu va na ba va khade kharini omu mafuni guvbeyani nya 1000 myaga? Vatshavbo va na ba va vbelede. Ina vatshavbo vathu nyo vbeleye va na seketeya Mufumo wa Jehovha kala gupindruga khu gu vbeleya? Mwendro ina vathu nyo khaguri va na fana ni Adhamu ni Evha va nga ba va vbelede, ganiolu va si tumbegi? Siwudziso sesi si yede gu hlamudwa, ganiolu khu dziya muni?
15-16. a) Lini vatshavbo va na hakhago lithomo nya gu yeyedze gutumbega gwawe ga Jehovha? b) Handro muni wu na manegago khu gu lingwa nya gu hegise?
15 Sathane a na khotedwa khu 1000 myaga. Ndrani nya tepo yoyo uye kha na nga si kodza gambe gu kanganyisa vathu. Khu karato, gu hegisani nya 1000 myaga sathane a tshudwa. Uye a na zama gu kanganyisa vathu nya gu vbeleye. Ndrani nya gilingo gyogyo, vatshavbo vathu nya gu vbeleye va na manega ni lithomo nya gu yeyedze gu khavo va ngu ninga githavo lina la Jehovha ni gu seketeya Mufumo waye. (Gutu. 20:7-10) Esi ava na girago khu tepo yoyo, si na yeyedza gu khiso avo va ngu dinganedwa khu gu malina yawe ma lowa khu kaneta omu nya libhuku nya womi.
16 Bhibhiliya yi ngu hi embeya gu khiyo vathu nyo kaguri nya mba khodwa va na fana ni Adhamu ni Evha nigu avo va na bomba wufumo va Jehovha. Ginani gi na va dugeleyago? Gutuledwa 20:15 vari khuye: “Tsivani momu va di rinywa vatshavbo vathu va nga bani va sa Iowa malina yawe omu nya libhuku nya womi.” Khu lisine, vawugeyi vovo va na fuviswa khu gu vbeleya kala gupindruga. Ganiolu, vathu nya vangi nya gu vbeleye va na pala gilingo gegi nya gu hegise. Malina yawe ma na lowa khu kaneta umo nya libhuku nya womi.
NDRANI NYA ‘TEPO NYO HEGISE’
17. Ginani egi Ngilozi yi embedego Dhaniyeli maningano ni esi si na giregago teponi yathu? (Dhaniyeli 12:4, 8-10)
17 Si ngu tsakisa gundzu gu dundrugeya khu sigiro si na giregago mindru va tshigu! Khu kharato, Dhaniyeli gambe a hakhide mahungo nya lisima maningano ni tepo yathu “gikhati nya mahegiso.” (Leri Dhaniyeli 12:4, 8-10, NM; 2 Thim. 3:1-5) Ngilozi yi di embeya Dhaniyeli gu khiyo: “Guti nya lisine gu di hadzi gu kala gungi.” Khu lisine, malito yaya nya wuprofeti nya libhuku laye ma di hadzi gu pwisiswa khu vathu va Nungungulu. Ngilozi yi di engedza khiyo ndrani nya tepo yoyo “vale nya gu vivbedwa khu monyo va na gira silo nya gu vivbe nya gu mwalo nya avo a na gu si pimago.”
18. Ginani nugunugu gi na giregeyago ava nya gu vivbedwe khu monyo?
18 Muhuno si nga gira gu khatshi vale nya gu vivbedwe khu monyo kha va tsayiswi khu mithumo yawe nya guvivbe. (Mal. 3:14, 15) Ganiolu, nugunugu Jesu a na lamula vale va fananiswago ni dzipongo nigu a na va hambanisa ni ava va fananiswago ni dzivuta. (Mat. 25:31-33) Vathu vava nya gu vivedwe khu monyo kha va na nga vbuluga avba nya tshanisa nya yikhongolo nigu kha va na nga wuswa gasi gu vbanya mafuni nya maphya. Malina yawe kha ma na nga lowa omu nya “libhuku nya sialakanyiso” li khumbugwago omu ga Malakiya 3:16.
19. Ginani hi yedego gu gira olu nigu, khu ginani? (Malakiya 3:16-18)
19 Olu tepo nya gu hi yeyedza khu mithumo yathu gu khethu kha hi giri gipandre nya ava “nya gu vivbedwe khu monyo.” (Leri Malakiya 3:16-18.) Jehovha olu a gu tshanganisa ava va ‘mu lumbago’ mwendro thomba yaye. Khu lisine, hi ngu dzina gu manega navo.
Si na tsakisa gundzu gu wona Dhaniyeli sigodwa sathu si fugego ni vathu nya vangi na va gu “wuswa” mafuni nya maphya! (Wona ndrimana 20)
20. Khu gevbini gitumbiso nya gu hegise egi Dhaniyeli a giridwego nigu khu ginani hi vbireyago khu maho nyo fuviye gu wona gitumbiso gegi na gi gu tadzisega?
20 Khu lisine, ha gu vbanya dziteponi nya gu samadzise. Ganiolu, gu nga no girega gambe simbe silo nya gu samadzise. Nugunugu, hi na wona gu fuviswa nya vale nya gu vivbedwe khu monyo. Khu landreya, hi na wona na gi gu tadzisega gitumbiso gya Jehovha a embedego Dhaniyeli gi gu kigyo: “Khu litshigu nya mahegiso u na wuga u hakha tshatshazelo wago.” (Dhan. 12:13, NM) Hatshavbo hi ngu vireya khu maho nyo fuviye tepo eyi Dhaniyeli ni sigodwa sathu si fudego si na “wuswago.” Gasi gu wona silo soso na si gu tadzisega hi yede gu tiyisa gu tumbega gwathu olu ni gu gira satshavbo hi si kodzago gasi gu malina yathu ma simama umo nya libhuku nya womi la Jehovha.
NDZIMO 80 “Lingani Jehovha, uye khwadi”
^ Ndrima yeyi yi na hi phasa gu tshukwadzisa mapwisiselo yathu maningano ni thumo nya wukhongolo nya gu hevbudze nya gu gima wu si giregi mafuni gwatshavbo, wu kumbugwago omu ga Dhaniyeli 12:2, 3. Hi na wona gu khethu lini si na giregago nigu khu vamani va na pategago avba ga thumo wowu nya gu hevbudze. Hi na wona gambe edzi thumo nya gu hevbudze wu na dongiseyago khidzo ava va guromogo mafuni gasi gu emisana ni gu lingwa nya gu hegise guvbeyani nya Mufumo nya mil myaga wa Kristo.
^ Guwuswa ga vale va fudego adzina gu nga pheya khu vale va ngafa na va tumbegide ndrani nya matshigu nya gu hegise, nigu adzina gu landreya va na wuswa vale va fudego gale. Abari kharato, moyo ni moyo a na mana lithomo nya gu hakhe sigodwa saye si fudego. Nigu, ni ga gevbini giyemo miloyo yari khiyo satshavbo si na gimbiya khu ‘sasamedzo’ guya khu gu wuswa ga ava va hongolago dzandzini, nigu hi nga ganeya sasimweso maningano khu gu wuswa ga ava va na vbanyago mafuni. — 1 Kor. 14:33; 15:23.
^ Tshamuselo wowu wu ngu vbindrugedza mapwisiselo hi ma manago omu ga libhuku Preste Atenção à Profecia de Daniel! Omu nya gipimo 17, ni umo nya Mukhedziseyi nya 1 nya Julho nya 1987, dzipajina 21-25, khu Giputukezi.
^ Malito “va nya gululama” ni ‘va nya gu mba lulama’ hi ma manago omu ga Mithumo 24:15 ni malito “vale va giridego silo nya sadi” ni vale “va giridego silo nya guvivbe” hi ma manago umo ga libhuku la Johane 5:29, ma gu ganeya khu mavbanyelo yawe ya gale na va si gufi.
