CHIIYO 40
“Ibapa Bantu Banji Kululama”
“Aabo ibapa bantu banji kululama bayoomweka mbuli nyenyeezi, lyoonse alyoonse mane kukabe kutamani.”—DAN. 12:3.
LWIIMBO 151 Leza Uyakwiita
ZITAYIIGWE *
1. Niinzi chitazoochitike muBweendelezi bwaMinyaka Iili Chuulu?
CHIYOOBA chiindi chibotezya loko kubona bantu kabali kubusigwa aano aanyika muBweendelezi bwaKkristu bwaMinyaka Iili Chuulu. Aabo boonse bali aababbululu bakafwa balangilila kuyoobona babbululu babo kabali kubusigwa. Anguwe Jehova mbalimvwa. (Job. 14:15) Amuyeeye kubotelwa nkubayoobako bantu eezi niziyoochitika munyika yoonse. Mbuli mbutwakabona muchiiyo chakayinda, “baluleme” balaamazina aalembedwe mubbuku lyabuumi, “bazoobusigilwa kubuumi.” (Mil. 24:15; Joh. 5:29) Kweelede kuti babbululu besu biingi banooli aakati kabantu batazoosaangune kubusigwa aanyika. * Mukuyungizya, ‘bataluleme’ chaamba aabo bakafwa kabatanajana mweenya wakwiiya atala aJehova, “bazoobusigilwa kukubetekwa.”
2-3. (a) Mbuli mbukulembedwe muli Isaya 11:9, 10, nguuli mulimu mupati wakuyiisya uutazoochitwe? (b) Tulalanga-langaanzi muchiiyo eechi?
2 Bantu boonse batazoobusigwe beelede kuzooyiisigwa. (Is. 26:9; 61:11) Nkinkaako, mulimu mupati wakuyiisya weelede kuzoochitwa. (Bala Isaya 11:9, 10.) Nkamboonzi? Chakusaanguna, bantu bataluleme batazoobusigwe beelede kuzooyiisigwa atala aJesu, mabambe aaBwaami, chinunuzyo ankani yakusalazigwa kwazina lyaJehova akuti ngwani ulaacheelelo chakweendelezya. Nibaba aabo baluleme, beelede kuzooyiisigwa atala amakanze aaJehova ngibakatayiya pe aali atala anyika. Bamwi babelesi baLeza basyomeka, bakafwa chiindi loko Bbayibbele kalitanamana kulembwa. Nkinkaako, boonse baluleme abataluleme kuli zyiingi nzibayooyiya.
3 Muchiiyo eechi, tulalanga-langa mibuzyo iitobela: Mulimu ooyu mupati wakuyiisya uyoochitwa biyeni? Nkamboonzi mulimu ooyu nuzoopa kuti mazina aabamwi alembwe naakuti atalembwi mubbuku lyabuumi? Kulayandikana kuti tuzibe nsandulo yamibuzyo eeyi. Mbuli mbututabone, kuli bumwi bupolofita bulembedwe mubbuku lyaDaniyele amubbuku lyaChiyubunuzyo butatugwasye kuti tumvwisisisye kuti niinzi zitakachitike bafwide nibaakubusigwa. Lino atulange zintu zitazoochitike zilembedwe muli Daniele 12:1, 2.
“BALEDE ANSI MUBULONGO BAYOOBUKA”
4-5. Lugwalo lwa Daniele 12:1 lutondeezya kuti niinzi zyakali kuzoochitika kumazuba aakumamanino?
4 Bala Daniele 12:1. Bbuku lyaDaniyele litondeezya kutobelana kwazintu zyakali kuzoochitika kuchiindi chakumamanino. Muchikozyano, lugwalo lwa Daniele 12:1 lutondeezya kuti Mikkayeli, chaamba Jesu Kkristu, uliimvwi “kuti agwasye bantu” baLeza. Chipanzi chakusaanguna chabupolofita oobu chakazuzikizigwa mu1914 aawo Jesu naakasalwa kuti abe Mwaami waBwaami bwaLeza.
5 Nikuba oobo, Daniyele wakabuzigwa kuti Jesu wakali ‘kuzooyimikila’ kusikila “ciindi camapenzi aayo aatanacitikide kuzwa ciindi nokwakaba cisi mane kusikila kuciindi eeco.” “Mapenzi” aayo ngingawo aayitwa kuti “mapenzi mapati” muli Mateyo 24:21. Jesu uyakwiimikila chaamba kubweza ntaamu kuti akwabilile bakombi baLeza kumamanino aamapenzi, chaamba lya-Armagedoni. Bakombi baLeza Daniyele mbaakaamba kuti bayookwabililwa aaMikkayeli njinjiyo “nkamu mpati yabantu” yaambidwe mubbuku lyaChiyubunuzyo “bazwa mumapenzi mapati.”—Chi. 7:9, 14.
6. Niinzi chitazoochitike bazoofutuka bankamu mpati? Pandulula. (Alubo langa “Mibuzyo Yabasikubala” muchiiyo eechi atala akubusigwa kwabantu aanyika.)
6 Bala Daniele 12:2. Niinzi zizoochitika bankamu mpati nibazoofutuka kumapenzi? Bupolofita oobu, tabwaambi kubusigwa mubukombi kwabakombi baLeza kulikuchitika kumazuba aano aakumamanino, mbuli mbutwakali kumvwisisisya chiindi. * Pesi majwi aaya, aambuula atala akubusigwa kutazoochitike munyika mpya. Nkamboonzi nitwaamba oobu? Mulugwalo lwa Jobu 17:16 bbala lyakuti “kubulongo” aliti “Cuumbwe” libelesedwe kwaamba chintu chimwi chikozyenie. Nkinkaako, eezi zitondeezya kuti majwi aali muli Daniele 12:2 aamba kubusigwa kwachoonzyo kutazoochitike yaakwiinda nkondo ya-Armagedoni.
7. (a) Zyaambaanzi kuti bamwi bayoobusigilwa “kubuumi butamani”? (b) Nkamboonzi kubusigwa kwabo nikunooli “kubotu loko”?
7 Lugwalo lwa Daniele 12:2 lwaambaanzi chiindi nilwaamba kuti bamwi bayoobusigilwa “kubuumi butamani”? Eezi zyaamba kuti aabo batazoobusigwe akuziba naakuti kuzumanana kuziba akuswiilila Jehova aJesu muminyaka iili 1 000, bazoojana buumi butamani. (Joh. 17:3) Ooku kunooli kubusigwa “kubotu loko” kwiinda kubusigwa kwakachitikide chiindi. (Heb. 11:35) Nkamboonzi? Nkaambo bantu bakabusidwe chiindi bakazoofwa lubo akaambo kakuti teebakamaninide pe.
8. Nkamboonzi bamwi nibayoobusigilwa “kukusampaulwa akusesemwa mane kukabe kutamani”?
8 Teeboonse pe bantu batazoobusigwe batazoozumine kuyiisigwa aaJehova. Bupolofita bwaDaniyele butondeezya kuti bamwi bayoobusigilwa “kubuumi butamani” pesi bamwi ‘kukusesemwa mane kukabe kutamani.’ Akaambo kakuti bayootondeezya muuya wakutaswiilila, mazina aabo taakalembwi pe mubbuku lyabuumi alubo tabakabujani pe buumi butamani. Pesi ‘bayoosesemwa kukabe kutamani,’ naakuti kunyonyoonwa. Nkinkaako, lugwalo lwa Daniele 12:2 lwaambuula atala azitazoochitikile bantu boonse batazoobusigwe, zintu eezyo zinooyendelana aakusala nkubatanooli bachita kabali babusigwa. * (Chi. 20:12) Bamwi bayoojana buumi butamani pesi bamwi tabakabujani pe.
“IBAPA BANTU BANJI KULULAMA”
9-10. Nziizili zimwi zitazoochitike aakwiinda mapenzi mapati alubo mbaani “bayoomweka mbuli kumweka kwajulu”?
9 Bala Daniele 12:3. Niinzi zimbi zitazoochitike nichakwiinda chiindi ‘chamapenzi’? Kuyungizya kuzintu zili muli Daniele 12:2, vesi 3 itondeezya chimwi chintu chitazoochitike aakwiinda mapenzi mapati.
10 Mbaani “bayoomweka mbuli kumweka kwajulu”? Nsandulo twiijana mumajwi aakaambwa aaJesu, muli Mateyo 13:43 atii: “Aachiindi eecho, baluleme bazoomweka loko mbuli zuba muBwaami bwaWisi.” Chiindi Jesu naakaamba majwi aaya, wakali kupandulula majwi aakuti ‘bana baBwaami’ chaamba maKkristu bananikidwe mbatazooyendelezyaabo muBwaami bwakujulu. (Mt. 13:38) Nkinkaako, lugwalo lwa Daniele 12:3 kweelede kuti lwaamba bananike amulimu ngubayoochita muBweendelezi bwaMinyaka Iili Chuulu.
Bali 144 000 bayoobelekaamwi aJesu Kkristu mumulimu wakuyiisya uutakachitwe muminyaka iili 1 000 (Langa fuka 11)
11-12. Muminyaka iili 1 000, nguuli mulimu uutazoochitwe aabali 144 000?
11 Bananike bayoobapa biyeni “bantu banji kululama”? Balulami bayoobelekaamwi aJesu Kkristu mumulimu wakuyiisya uutazoochitwe munyika muminyaka iili 1 000. Bali 144 000 bayoobeleka kabali baami alubo kabali bapayizi. (Chi. 1:6; 5:10; 20:6) Nkinkaako, bayoogwasilizya ‘mukuponia zisi’ alubo bayoogwasilizya mukupa bantu kuti bakamaninine. (Chi. 22:1, 2; Ezk. 47:12) Eezi ziyoopa kuti bananike bakabotelwe loko.
12 Mbaani batazoobe aakati kabantu “banji” batazoobe balulami? Bantu aabo banooswaanizya bantu batazoobusigwe abaabo batazoofutuke lya-Armagedoni abana batazoozyalwe munyika mpya. Niyoomana minyaka iili 1 000, bantu boonse batanooli aanyika banooli bamaninina. Nkinkaako, ndiilili mazina aabo nayoolembelwaato mubbuku lyabuumi kaatachizimiki pe mbuli kuti alembwa aa-inki kutali aapensele?
KUSUNKWA KWAMAMANINO
13-14. Bantu boonse bamaninide banooli aanyika beelede kuzoochitaanzi kuti bazoojane buumi butamani?
13 Tweelede kuyeeya kuti kumaninina takwaambi kuti nchidindo chakujana buumi butamani pe. Amuyeeye zyakachitika kuli Adamu aEva. Nikuba kuti bakalimaninide pesi bakeelede kuswiilila Jehova Leza kuti bapone kukabe kutamani. Chuusisya nchakuti, teebakaswiilila pe.—Rom. 5:12.
14 Yazoomana minyaka iili 1 000, bantu banooli aanyika banooli baba biyeni? Boonse banooli bamaninina. Bantu boonse aabo bazooyanda kweendelezegwa aaJehova na kukabe kutamani? Bazooba mbuli Adamu aEva na bakasala kutasyomeka kuli Jehova nikuba kuti bakalimaninide? Atubone nsandulo yamibuzyo eeyi.
15-16. (a) Ndiilili bantu nibayoopegwa mweenya wakutondeezya kuti balasyomeka kuli Jehova? (b) Niinzi zitazooyubununwe mukusunkwa kwamamanino?
15 Saatani unoowangidwe kwaminyaka iili 1 000. Kuchiindi eecho, tanookonzyi pe kweena bantu. Nikuba oobo, kumamanino aaminyaka iili 1 000 uyoowangununwa. Kuzwa waawo, uyooyezya kweena bantu aabo banooli bamaninina. Kuchiindi eecho chakusunkwa, bantu boonse bamaninide munyika yoonse bazoopegwa mweenya wakutondeezya kuti balayanda kuti zina lyaLeza lilemekwe akuti balazumina na kuti nguwe weelela kuba mweendelezi wabo. (Chi. 20:7-10) Nzyatozoosale umwi awumwi kuchiindi eecho chakusunkwa, nzizyo zitazoope kuti alembelwaato mubbuku lyabuumi naakuti pe.
16 Bbayibbele litondeezya kuti bamwi bayoosala mbuli mbaakasala Adamu aEva, kwiinda mukukaka kweendelezegwa aaJehova. Niinzi zitazoochitike kubantu aabo? Lugwalo lwa Chiyubunuzyo 20:15 lwaamba kuti: “Kufumbwa muntu wakajanika katalembedwe mubbuku lyabuumi, wakawaalilwa mulwizi lwamulilo.” Bantu bataswiilili bayoonyonyoonwa chakumaninina. Pesi bantu biingi bamaninide bayoozunda kukusunkwa ooku kwamamanino. Mazina aabo ayoolembelwaato mubbuku lyabuumi.
“KUCIINDI CAKUMAMANINO”
17. Daniyele wakabuzigwa kuti niinzi zyakali kuyoochitika muchiindi nchitulikupona? (Daniele 12:4, 8-10)
17 Kubotezya loko kuyeeya atala azintu zitazoochitike kunembo! Nikuba oobo, ngilozi yakapa Daniyele makani aayandikana ‘aakuchiindi chakumamanino,’ chiindi nchitulikupona. (Bala Daniele 12:4, 8-10; 2 Tim. 3:1-5) Ngilozi yakabuzya Daniyele kuti: “Luzyibo lwini-lwini luyoovwula kapati.” Majwi aabupolofita aali mubbuku lyaDaniyele akali kuyoomvwisisigwa aabakombi baLeza. Ngilozi eeyo yakayungizya kumubuzya kuti “babi bayoocita bubi, alimwi kunyina muntu mubi naba omwe uuyoomvwisya.”
18. Niinzi zitazoochitike lino-lino kuli basizibi?
18 Mazubaano, kulakonzya kubonekaanga bantu babi balikuchita zintu zibi kabatasubulwi pe. (Malk. 3:14, 15) Pesi kusyeede chiindi chifwiifwi biyo kuti Jesu abateke bantu bali mbuli mpongo kuti abaanzaanie kubantu bali mbuli mbelele. (Mt. 25:31-33) Bantu aaba babi tabakafutuki pe lya-Armagedoni alubo tabakabusigwi pe munyika mpya. Mazina aabo taanoolembedwe pe mubbuku lyabuumi lyaambidwe muli Malaki 3:16.
19. Lino nchiindi chakuti tuchiteenzi alubo nkamboonzi? (Malaki 3:16-18)
19 Lino nchiichiindi chakuti tutondeezye kuti tatuli kubbazu lyabantu babi pe. (Bala Malaki 3:16-18.) Jehova ulikubalangania aabo mbabona mbuli “lubono luyandisi.” Tuyanda kuba aakati kabantu bali boobo.
Tuzoobotelwa loko twaakubona Daniyele, babbululu besu abamwi ‘baakwiimikila’ lubo kuti babweze chaabilo chabo munyika mpya! (Langa fuka 20)
20. Nchiichili chisyomezyo chakumamanino nchaakabuzigwa Daniyele alubo nkamboonzi nulangilila kuzoobona kachilikuzuzikizigwa chisyomezyo eecho?
20 Kwaamba choonzyo, tulikupona kuchiindi chilikuchitika zintu zyiingi zigambya. Pesi muchiindi chifwiifwi chitobela kuyoochitika zintu zigambya loko zyiinda nzitulikubona lino. Lino-lino, bubi boonse buzoomana. Kuzwa waawo, tuyoobona kuzuzikizigwa kwachisyomezyo chaJehova nchaakabuzya Daniyele kuti: “Uyakwiimikila kutegwa ukabweze caabilo cako kumamanino aamazuba.” (Dan. 12:13) Ulayanda na kuyoobona Daniyele ababbululu bako ‘kabalikwiimikila’ lubo? Kuti kuyanda, beleka changuzu kuti ukkale kusyomeka kuchitila kuti zina lyako likalembelwaato mubbuku lyaJehova lyabuumi.
LWIIMBO 80 “Amulabile Mubone Kuti Jehova Mubotu”
^ Chiiyo eechi chilapandulula mbutwakali kumvwisisisya mulimu mupati wakuyiisya waambidwe muli Daniele 12:2, 3. Tulalanga-langa kuti mulimu ooyu uyoochitwa lili akuti mbaani bayooswaanizigwa mulinguwo. Alubo tulabona kuti mulimu ooyu wakuyiisya uyoobagwasya biyeni bantu batanooli aanyika kuti bazoolibambile kusunkwa kwamamanino kutazoochitike kumamanino aaBweendelezi bwaKkristu bwaMinyaka Iili Chuulu.
^ Kweelede kuti bafwide baakubusigwa, kuzoosaanguna aabo bakafwa kabasyomekede kumazuba aakumamanino, mpawo nikutazoobusigwe aabo bakafwa chiindi kweendelana azyalani lyabo. Kuti kakuli boobo, zyalani limwi alimwi liyooba aamweenya wakutambula babbululu babo. Kufumbwa mbuzitazoochitike, Magwalo kaawambuula atala akubusigwa kwabaabo bali aabulangilizi bwakuyoopona kujulu, atondeezya kuti balabusigwa ‘aachiindi chabo cheelede.’ Tulangilila kuti nzizyo zitazoochitike kuli baabo batazoobusigwe aanyika.—1 Kor. 14:33; 15:23.
^ Bupanduluzi oobu, mbwakubambulula kumvwisisisya nkutwakali kuchita chiindi kulembedwe mubbuku liti, Pay Attention to Daniel’s Prophecy! chaandaano 17, aNgaziyakulinda yamuJuly 1, 1987, pp. 21-25.
^ Kusiyana azeezi, majwi aakuti “baluleme abataluleme” aali muli Milimu 24:15 amajwi aakuti “aabo bakachita zintu zibotu” amajwi aakuti “aabo bakachita zintu zibi” aabelesedwe muli Johane 5:29 abikkila maanu kunzila njibakali kulijataayo bantu batakabusigwe kabatanafwa pe.
