Stadi Atikol 40
“Helpim Planti Man Long Kamap Stretpela Man”
“Ol man i helpim planti man long kamap stretpela man, ol bai lait olsem ol sta inap oltaim oltaim.”—DAN. 12:3.
SINGSING 151 [12]Em Bai Singaut
PRIVIU *
1. Wanem ol gutpela samting bai kamap insait long Wan Tausen Yia Bilong Krais i Stap King?
YUMI bai amamas tru long lukim ol man i stat long kirap bek hia long graun insait long Wan Tausen Yia Bilong Krais i Stap King! Olgeta manmeri i laik tru long lukim gen ol pren na ol wanfamili bilong ol husat i bin dai. Jehova tu i gat bikpela laik tru long lukim ol dispela lain i kirap bek. (Jop 14:15) Piksaim long tingting bikpela amamas ol manmeri long graun bai pilim taim ol i lukim ol pren na ol wanfamili bilong ol i kirap bek. Olsem yumi stori pinis long atikol i kamap paslain, “ol stretpela man” em ol man em nem bilong ol i stap long buk bilong laip na “kirap bek bilong ol em bilong kisim laip.” (Apo. 24:15; Jon 5:29) Ating planti bilong ol pren na ol wanfamili bilong yumi bai insait long ol fes lain em ol bai kirap bek bihain liklik long pait bilong Armagedon i pinis. * Na tu, “ol man nogut” em ol man husat i no bin gat rot long kisim save long Jehova o long lotuim em paslain long ol i dai, “kirap bek bilong ol em bilong kisim kot.”
2-3. (a) Olsem Aisaia 11:9, 10 i stori long en, wanem bikpela wok bai kamap winim olgeta narapela taim bipo? (b) Yumi bai skelim wanem ol askim long dispela atikol?
2 Yumi mas skulim olgeta manmeri em ol i kirap bek. (Ais. 26:9; 61:11) Olsem na bai i gat bikpela wok tru bilong skulim ol manmeri i kamap long graun winim olgeta narapela taim bipo. (Ritim Aisaia 11:9, 10.) Bilong wanem? Wanpela risen em olsem, ol man nogut i kirap bek ol i mas kisim save long Jisas Krais, Kingdom, pe bilong baim bek man, na risen na ol i mas onarim nem bilong Jehova na sapotim wok bos bilong em. Isi isi Jehova i skulim ol manmeri bilong em long ol samting em i tingting pinis long mekim long graun, na ol stretpela man tu i mas kisim save long ol dispela samting. Sampela bilipman na bilipmeri i bin dai paslain long Jehova i bungim olgeta tok bilong Em na kamapim Baibel. Yes, ol man nogut wantaim ol stretpela man i mas kisim save long planti samting tru.
3 Long dispela atikol, yumi bai skelim ol dispela askim: Olsem wanem yumi bai mekim dispela bikpela wok bilong skulim ol manmeri? Taim yumi skulim ol, yu ting disisen ol i mekim bai makim olsem nem bilong ol bai stap long buk bilong laip bilong stap oltaim? Em i bikpela samting long yumi mas save long bekim bilong ol dispela askim long nau. Olsem yumi bai lukim, ol narakain tok profet i stap long Buk Daniel na Buk Revelesen bai helpim yumi long kliagut moa long ol samting bai kamap taim ol man i dai pinis i kirap bek. Pastaim, yumi ken skelim sampela gutpela samting bai kamap em Daniel 12:1, 2 i tok profet long en.
‘OL MAN I SLIP INSAIT LONG DAS BILONG GRAUN BAI KIRAP’
4-5. Daniel 12:1 i tokaut long wanem samting bai kamap long taim bilong pinis?
4 Ritim Daniel 12:1. Buk Daniel i stori long oda bilong ol narakain samting bai kamap long taim bilong pinis. Olsem, Daniel 12:1 i tokaut olsem Maikel, em Jisas Krais, i “sanap bilong helpim ol manmeri bilong [God].” Namba 1 hap bilong dispela tok profet i kamap tru long yia 1914 taim God i makim Jisas olsem King long Kingdom Bilong God long heven.
5 Tasol Daniel i kisim tok tu olsem Jisas bai “sanap” long “taim bilong bikpela hevi . . , kain hevi olsem i no bin kamap kirap long taim wanpela kantri i kamap i kam inap long dispela taim.” Dispela “taim bilong bikpela hevi” em dispela “traipela hevi tru” em Matyu 24:21 i stori long en. Jisas i sanap, o mekim pait bilong lukautim ol manmeri bilong God, long pinis bilong dispela taim bilong bikpela hevi, em long pait bilong Armagedon. Buk Revelesen i kolim ol dispela manmeri olsem “bikpela lain manmeri . . . i bin winim dispela traipela hevi tru.”—Rev. 7:9, 14.
6. Wanem samting bai kamap long bikpela lain manmeri em ol i winim traipela hevi tru? Stori long dispela. (Lukim tu “Askim Bilong Ol Rida” we i stori long ol man bai kirap bek na kisim laip long graun long dispela nius.)
6 Ritim Daniel 12:2. Wanem samting bai kamap bihain long bikpela lain manmeri i winim taim bilong bikpela hevi? Dispela tok profet i no stori long God i bin helpim gen lain bilong em long kirap gen long mekim bikpela wok bilong autim tok long taim bilong las de, em tingting bipo yumi bin holim. * Tasol tok profet long Daniel 12:2 i stori long ol manmeri i dai pinis em ol bai kirap bek long graun long nupela taim em klostu nau bai kamap. Bilong wanem yumi tok olsem? Long Jop 17:16, dispela tok “graun” i makim “Matmat.” Dispela i soim klia olsem Daniel 12:2 i stori long ol man bai kirap bek long graun bihain long taim bilong las de i pinis na bihain long pait bilong Armagedon i pinis.
7. (a) Baibel i tok sampela man bai kirap bek na “kisim laip oltaim oltaim,” dispela i makim wanem samting? (b) Bilong wanem “dispela kirap bek i gutpela moa”?
7 Daniel 12:2 i tok sampela man bai kirap bek na “kisim laip oltaim oltaim.” Dispela i makim wanem samting? Dispela i makim olsem ol man em ol i kirap bek na ol i kisim save o ol i wok yet long kisim save long Jehova na Jisas na bihainim tok bilong tupela insait long 1,000 yia, ol bai kisim laip oltaim. (Jon 17:3) “Dispela kirap bek i gutpela moa” winim kirap bek bilong sampela manmeri long pastaim. (Hib. 11:35) Wai na yumi tok olsem? Long wanem, ol dispela manmeri em ol i no gutpela olgeta na ol i bin kirap bek, ol i bin dai gen.
8. Bilong wanem sampela man i kirap bek bai “kamap olsem samting bilong kisim sem long en na bilong heitim inap oltaim oltaim”?
8 Tasol sampela em ol i kirap bek, ol bai no laik long Jehova i skulim ol. Daniel i tok profet olsem sampela bai kirap bek na “kamap olsem samting bilong kisim sem long en na bilong heitim inap oltaim oltaim.” Ol bai mekim bikhetpasin, olsem na nem bilong ol bai no inap stap long buk bilong laip na ol bai no inap kisim laip oltaim, nogat. Ol bai kamap olsem samting bilong “heitim inap oltaim oltaim,” dispela i makim olsem ol bai bagarap na pinis olgeta. Olsem na Daniel 12:2 i stori long samting bai kamap long ol manmeri i kirap bek na ol pasin ol i mekim bihain long ol i kirap bek. * (Rev. 20:12) Sampela bilong ol bai kisim laip oltam, na ol narapela i no inap kisim laip oltaim.
“HELPIM PLANTI MAN LONG KAMAP STRETPELA MAN”
9-10. (a) Wanem narapela samting bai kamap bihain long traipela hevi tru i pinis? (b) Husat ol manmeri “bai lait tru olsem skai”?
9 Ritim Daniel 12:3. Wanem narapela samting bai kamap bihain long “taim bilong bikpela hevi”? Daniel 12:2 i bin stori long wanpela samting, na ves 3 i stori long narapela samting bai kamap bihain long traipela hevi tru i pinis.
10 Husat ol manmeri “bai lait tru olsem skai”? Yumi kisim save long bekim bilong dispela askim long tok bilong Jisas long Matyu 13:43, em i tok: “Long dispela taim ol stretpela man bai lait bikpela olsem san long Kingdom bilong Papa bilong ol.” Long ol ves i stap klostu, Jisas i stori long “ol pikinini bilong Kingdom,” em ol Kristen God i bin makim na ol bai mekim wok wantaim Jisas long Kingdom long heven. (Mat. 13:38) Olsem na yumi ken save tru olsem Daniel 12:3 i stori long ol Kristen em God i bin makim na wok ol bai mekim insait long Wan Tausen Yia Bilong Krais i Stap King.
Lain 144,000 bai wok gut wantaim Jisas Krais long stiaim bikpela wok tru bai kamap bilong skulim ol manmeri insait long 1,000 yia (Lukim paragraf 11)
11-12. Lain 144,000 bai mekim wanem wok insait long 1,000 yia?
11 Olsem wanem ol Kristen God i makim bai “helpim planti man long kamap stretpela man”? Ol bai wok gut wantaim Jisas Krais long stiaim bikpela wok bilong skulim ol man we bai kamap hia long graun insait long 1,000 yia. Lain 144,000 bai mekim wok olsem ol king, na tu, ol bai mekim wok olsem ol pris. (Rev. 1:6; 5:10; 20:6) Olsem na ol bai helpim wok bilong “oraitim sik bilong olgeta lain manmeri”—dispela i makim olsem isi isi ol bai helpim ol manmeri long kamap gutpela olgeta. (Rev. 22:1, 2; Ese. 47:12) Tru tumas, ol Kristen God i makim bai amamas tru long mekim dispela wok!
12 Daniel 12:3 i tok “planti man” bai kamap stretpela man. Dispela tok “planti man” i makim husat ol manmeri? Em i makim ol manmeri em ol i kirap bek, na tu, ol manmeri em ol i winim pait bilong Armagedon wantaim ol pikinini em ating ol i bon insait long nupela taim. Long pinis bilong 1,000 yia, olgeta manmeri long graun bai kamap gutpela olgeta. Olsem na yumi laik save, wanem taim bai God i raitim nem bilong ol dispela manmeri long ing, na i no long pensil, long buk bilong laip?
LASPELA TRAIM
13-14. Olgeta manmeri i kamap gutpela olgeta na ol i stap long graun, ol i mas mekim wanem bilong kisim laip oltaim?
13 Yumi mas tingim olsem maski yumi kamap gutpela olgeta, dispela i no makim olsem yumi bai kisim laip oltaim, nogat. Tingim Adam na Iv. Tupela i gutpela olgeta, tasol ol i mas soim olsem ol i bihainim tok bilong God Jehova paslain long em i givim laip oltaim long tupela. Tasol sori tru, tupela i no bihainim tok bilong em.—Rom 5:12.
14 Wanem samting bai kamap long ol manmeri long graun long pinis bilong 1,000 yia? Olgeta manmeri bai kamap gutpela olgeta. Yu ting ol dispela manmeri i kamap gutpela olgeta bai sapotim wok bos bilong Jehova inap oltaim? O yu ting sampela bilong ol bai bihainim pasin bilong Adam na Iv na i no stap gut long God maski ol i gutpela olgeta? Yumi mas kisim save long bekim bilong ol dispela askim. Tasol hau bai yumi save long ol bekim?
15-16. (a) Long wanem taim bai rot i op long olgeta manmeri long soim olsem ol i stap gut long Jehova? (b) Wanem samting bai kamap bihain long laspela traim?
15 Satan bai kalabus insait long 1,000 yia. Insait long dispela haptaim, em bai no inap giamanim ol manmeri. Tasol long pinis bilong 1,000 yia, Satan bai lusim kalabus. Na em bai traim long giamanim olgeta manmeri em ol i gutpela olgeta. Long dispela laspela traim, rot bai op long olgeta manmeri i gutpela olgeta long soim klia olsem ol i onarim nem bilong God na sapotim wok bos bilong em, o nogat. (Rev. 20:7-10) Disisen em wan wan man i mekim taim Satan i traim ol bai makim olsem nem bilong ol bai stap long buk bilong laip bilong stap oltaim o nogat.
16 Sampela manmeri em yumi no save long hamas namba bilong ol, ol bai bihainim pasin bilong Adam na Iv na sakim wok bos bilong Jehova. Wanem samting bai kamap long ol? Revelesen 20:15 i tok: “Ol man em nem bilong ol i no stap long buk bilong laip, em i tromoi ol i go insait long dispela raunwara i gat bikpela paia.” Yes, ol dispela bikhet manmeri bai bagarap na pinis olgeta inap oltaim oltaim. Tasol bikpela namba bilong ol manmeri i gutpela olgeta bai winim dispela laspela traim. Na God bai raitim nem bilong ol long buk bilong laip bilong stap oltaim.
LONG “TAIM BILONG PINIS”
17. Wanpela ensel i givim wanem tok long Daniel long samting bai kamap long taim bilong yumi? (Daniel 12:4, 8-10)
17 Yumi amamas tru long tingim ol dispela samting em klostu nau ol bai kamap! Tasol Daniel i kisim ol tok i kam tu long wanpela ensel long sampela bikpela samting bai kamap long taim bilong yumi, em long “taim bilong pinis.” (Ritim Daniel 12:4, 8-10; 2 Tim. 3:1-5) Ensel i tokim Daniel olsem: “Stretpela save bai kamap bikpela tru.” Yes, ol manmeri bilong God bai kliagut moa long insait bilong ol tok profet i stap long Buk Daniel. Dispela ensel i tok moa olsem long dispela taim, “ol man nogut bai mekim pasin nogut, na i no gat wanpela man nogut bai kliagut long dispela tok.”
18. Klostu nau wanem samting bai kamap long ol man nogut?
18 Long nau bai i luk olsem ol man nogut i no kisim hevi long ol pasin nogut ol i mekim. (Mal. 3:14, 15) Tasol klostu nau Jisas bai mekim wok jas na em bai tilim ol man i olsem ol meme i go long wanpela sait na ol man i olsem ol sipsip i go long narapela sait. (Mat. 25:31-33) Ol dispela man nogut bai no inap winim traipela hevi tru, na ol bai no inap kirap bek na stap laip long nupela taim. Nem bilong ol i no inap stap insait long “buk i gat nem bilong ol man [God] i tingim ol” olsem Malakai 3:16 i stori long en.
19. Nau em taim bilong yumi long mekim wanem, na bilong wanem? (Malakai 3:16-18)
19 Nau em i taim bilong yumi long soim long pasin bilong yumi olsem yumi no stap long sait bilong ol man nogut. (Ritim Malakai 3:16-18.) Jehova i wok long bungim ol manmeri em ol i “spesel lain” long ai bilong em, o ol i dia tumas long em. Yumi laik tru long stap insait long dispela lain, a?
Yumi bai amamas tru long lukim Daniel wantaim ol pren na ol wanfamili bilong yumi i “kirap sanap” na kisim sea bilong ol long nupela taim! (Lukim paragraf 20)
20. Jehova i mekim wanem laspela tok promis long Daniel, na bilong wanem yu wet long lukim truim bilong dispela tok promis?
20 Tru tumas, yumi stap long wanpela spesel taim tru. Tasol i gat planti gutpela samting moa bai kamap. Klostu nau yumi bai lukim ol man nogut i bagarap na pinis olgeta. Bihain long dispela, yumi bai lukim Jehova i truim tok promis em i bin mekim long Daniel, olsem: “Yu bai kirap sanap na kisim sea bilong yu long pinis bilong dispela taim.” (Dan. 12:13) Yu wet long lukim dispela taim we Daniel wantaim ol pren na ol wanfamili bilong yu bai “kirap sanap” gen? Sapos olsem, yu mas taitim bun long stap gut long God long nau, na yu ken bilip tru olsem nem bilong yu bai stap yet long buk bilong laip em Jehova i raitim.
SINGSING 80 [1] “Traim na Lukim Olsem Jehova i Gutpela Tru”
^ Dispela atikol bai stori long nupela save yumi kisim long tok i stap long Daniel 12:2, 3 long dispela bikpela wok tru bilong skulim ol man bai kamap winim olgeta narapela taim bipo. Yumi bai stori long wanem taim dispela wok bai kirap, na husat bai insait long dispela wok. Yumi bai stori tu long olsem wanem dispela wok bilong skulim ol man bai helpim ol manmeri i stap long graun long redi long laspela traim bai kamap long pinis bilong Wan Tausen Yia Bilong Krais i Stap King.
^ I luk olsem ol man i stap gut long God i go inap long ol i dai long taim bilong las de, ol bai kirap bek pastaim, na ol man i dai paslain long ol, ol bai kirap bek bihain—wan wan jeneresen bai kirap bek. Sapos dispela em i tru, orait olgeta wan wan jeneresen bai i gat sans long welkamim bek ol manmeri em ol i save gut long ol. Yumi wet long lukim kirap bek bai kamap olsem wanem, tasol taim Baibel i stori long ol Kristen em ol bai kirap bek na kisim laip long heven, em i tok ol bai kisim laip “long taim bilong ol yet.” Olsem na yumi ken ting olsem taim ol man i kirap bek long graun, ol bai kirap bek long taim stret bilong ol na ol samting i no inap paul nabaut.—1 Kor. 14:33; 15:23.
^ Dispela em nupela save yumi kisim long ol tok i stap long sapta 17 bilong buk Putim Yau Long Tok Profet Bilong Daniel!, na long ol tok i stap long The Watchtower bilong Julai, 1, 1987, p. 21-25.
^ Tasol dispela tok “ol stretpela man” na “ol man nogut” long Aposel 24:15 na dispela tok “ol man i bin mekim ol gutpela pasin” na “ol man i bin mekim ol stingpela pasin” long Jon 5:29 i stori long pasin em ol man i kirap bek i mekim paslain long ol i bin dai.
