NDZIMA YA CIGONDZO N.° 40
Va ta ‘kokela vanyingi kululameni’
‘Lava va kokelako vanyingi kululameni va ta fanana ni tinyeleti kala kupindzuka ni kupindzuka.’ — DAN. 12:3.
LISIMU 151 I ta vitana
LEZVI HI TO GONDZA *
1. Zvilo muni zvo tsakisa zvi to maheka ndzeni ka 1000 wa malembe ya kufuma ka Kristu?
A CIKHATI leci a vafileko va to sangula ku vhuxiwa laha misaveni ndzeni ka 1000 wa malembe ya kufuma ka Kristu, ci tava cikhati co tsakisa nguvhu! Vontlhe lava va felweko hi maxaka yabye va zvi xuva nguvhu a ku tlhela va ma wona. Hi zvalezvo Jehovha yenawu a ti zwisako zvona. (Joba 14:15) Makunu hi nga alakanyela lezvi a vanhu vontlhe laha misaveni va to tsakisa zvona a cikhati leci va to wona a maxaka yabye na ma vhuxiwa hi ka vafileko. Kota lezvi hi nga gondza ka ndzima yi hundzileko, “lava vo lulama”, lava a mavito yabye ma tsaliwako bhukwini ga wutomi, va ta “vhuka vaya wutomini”. (Miti. 24:15; Joh. 5:29) Kuzvilava a kutala ka maxaka ya hina ma tava cikari ka lava va to ranga hi vona va vhuxiwa laha misaveni. * A cin’wani kambe, “lava vo kala ku lulama”, vo kota lava va fileko na va nga vangi ni cikhati co enela ca ku tiva Jehovha kutani ku mu tirela hi kutsumbeka, va ta “vhuka vaya kulamulweni”.
2-3. a) Hi kuya hi Isaya 11:9, 10, i ntiro muni wa hombe nguvhu wu to mahiwa misaveni yontlhe? b) Zvini hi to bhula hi zvona ka ndzima leyi?
2 Vontlhe lava va to vhuxiwa hi ka vafileko zvi ta lava ku va gondzisiwa. (Isa. 26:9; 61:11) Hikwalaho, ku ta maheka ntiro wa hombe nguvhu wa ku gondzisa vanhu misaveni yontlhe wa ku a wu se tshuka wu mahiwa. (Lera Isaya 11:9, 10.) Hikuyini? A cin’we ca zvigelo, hi ku lava vo kala ku lulama va to vhuxiwa hi ka vafileko zvi ta lava ku va gondzisiwa xungetano hi Jesu Kristu, ni lulamiselo ga Mufumo, ni hakhelo ya kutlhatlhisa, ni lisima la vito ga Jehovha niku hikuyini a nga yena yece a nga ni fanelo ya ku fuma. Hambu hi valulamileko zvi ta lava ku va gondza lezvi Jehovha hi kutsongwani-kutsongwani a gondzisileko a vanhu vakwe xungetano hi kungo gakwe laha misaveni. A vokari cikari ka lava vo tsumbeka va file na ka ha kiyela cikhati co leha kasi a Bhibhiliya gi mbhela ku tsaliwa. A valulamileko ni vangalulamangiko vontlhe va tava ni zvilo zvo tala zva ku zvi gondza.
3 Ka ndzima leyi, hi ta bhula hi zviwutiso lezvi: A ntiro lowu wa hombe wa ku gondzisa wu ta mahisiwa kuyini? Zvini zvi to humelela lava va to vhumela ku gondzisiwa? Ahati lava va to kala ku vhumela ke? A mihlamulo ya zviwutiso lezvi ya lisima ka hina nyamutlha. Kota lezvi hi to zvi wona, a zviphrofeto zvo kari zvo tsakisa nguvhu zvi tsalilweko ka bhuku ga Dhaniyeli ni ga Kuvhululelwa zvi ta hi vhuna ku chukwatisa mazwisisela ya hina xungetano hi lezvi zvi to maheka a cikhati leci a vafileko va to vhuxiwa. A ku ranga, a hi bhuleni hi zvimaho zvo tsakisa zvi phrofetilweko ka Danieli 12:1, 2.
‘LAVA VA ETLELEKO TSHURINI . . . VA TA VHUKA’
4-5. Zvini lezvi Danieli 12:1 a wulako xungetano hi cikhati ca magumo?
4 Lera Danieli 12:1. A bhuku ga Dhaniyeli gi komba zvimaho zvo tsakisa zva ku landzelana zvi to maheka cikhatini ca magumo. Hi cikombiso, Danieli 12:1 i komba lezvaku Mikayeli, ku nga Jesu Kristu, i ‘yimela a vanhu’ va Nungungulu. A cipandze ca ciphrofeto leci ci sangulile ku tatiseka hi 1914, a cikhati leci Jesu a nga yimisiwa kota Hosi ya Mufumo wa Nungungulu wa le tilweni.
5 Hambulezvo, Dhaniyeli i byelilwe kambe lezvaku Jesu i wa ta ‘yimela’ vanhu va Nungungulu ndzeni ka ‘zvikhati zva zvikarato lezvi zvi kalako zvi nga se huma kusukela kusanguleni ka mifumo kala cikhatini leco’. A ‘zvikhati lezvo zva zvikarato’ ku wuliwa a “kuxaniseka ka hombe” ku kumbukiwako ka Matewu 24:21. Jesu i ta yimela kutani ku i ta maha cokari kasi ku vhikela vanhu va Nungungulu kumbheleni ka zvikhati lezvo zva zvikarato, ku nga yimpini ya Armagedhoni. A bhuku ga Kuvhululelwa gi wulawula hi vona kota “citshungu ca hombe ci humako kuxanisekeni ka hombe”. — Kuv. 7:9, 14.
6. Zvini zvi to maheka andzhako ka loku a citshungu ca hombe ci ponile a kuxaniseka ka hombe? Tlhamusela. (Xungetano hi lava va to vhuxiwa laha misaveni wona ni “Zviwutiso zva vagondzi” ka Murindzeli lowu.)
6 Lera Danieli 12:2. Zvini zvi to maheka andzhako ka loku a citshungu ca hombe ci ponile a zvikhati lezvo zva zvikarato? A ciphrofeto leci a ci wulawuli hi kuvhuka ko fananisa, a kuvhuka hi ka moya ka malandza ya Nungungulu loku ku mahekako masikwini lawa yo gumesa, kota lezvi hi nga zvi zwisisisa zvona kale. * Kanilezvi, a magezu lawa ma wulawula hi kuvhuka ka vafileko loku ku to maheka misaveni yiswa. Hi zvi tivisa kuyini? A gezu ‘tshuri’ gi tirisilwe ni ka Joba 17:16, niku gi na ni mongo wo fana ni legi ga ku “Cilahla”. Lezvi a gezu ‘tshuri’ gi wulako zvalezvi zva zvin’we ni legi ga ku “Cilahla”, Danieli 12:2 i wulawula hi kuvhuka ka vafileko ku to maheka andzhako ka kumbhela ka masiku yo gumesa ni yimpi ya Armagedhoni.
7. a) A vokari va ta vhuxiwa vaya ‘wutomini ga pindzukelwa’ hi ndlela muni? b) Hikuyini loko ku nga “kuvhuxiwa ka chukwana”?
7 Hambulezvo, Danieli 12:2 i wula yini loku aku a vokari va ta vhuxiwa vaya ‘wutomini ga pindzukelwa’? I wula lezvaku lava va to vhuxiwa va tiva Jehovha na Jesu, kutani ku va simama ku va tiva, ni ku va ingisa ndzeni ka 1000 wa malembe, va ta gumesa va kuma wutomi ga pindzukelwa. (Joh. 17:3) Handle ko kanakana loko ku tava “kuvhuxiwa ka chukwana” a ku hundza loku ku vileko kona cikhatini ci hundzileko. (Mah. 11:35) Hikuyini? Hakuva a vanhu lavo vo kala ku mbhelela va tlhelile vafa.
8. A vokari va ta vhuxiwa vaya “tinganeni ni hlokiselelweni wu nga gumelwiko” hi ndlela muni?
8 Kanilezvi lava va to vhuxiwa, a hi vontlhe va to vhumela ku gondzisiwa hi Jehovha. A ciphrofeto ca Dhaniyeli ci wulile lezvaku a vokari va ta vhuxiwa vaya “tinganeni ni hlokiselelweni wu nga gumelwiko”. Lezvi va to kombisa moya wo kala ku ingisa, a mavito yabye ma nga ta tsaliwa bhukwini ga wutomi niku va nga ta kuma wutomi ga pindzukelwa. Wutshan’wini ga lezvo, va ta kuma ‘hlokiselelo wu nga gumelwiko’, kutani kulovisiwa. Hikwalaho, Danieli 12:2 i wulawula hi lezvi zvi to humelela vontlhe lava va to vhuxiwa, hi ku yelana ni lezvi va to maha andzhako ka ku vhuxiwa. * (Kuv. 20:12) A vokari va ta kuma wutomi ga pindzukelwa; a van’wani va nga ta gi kuma.
KU ‘KOKELA VANYINGI KULULAMENI’
9-10. Zvini zvin’wani zvi to humelela andzhako ka kuxaniseka ka hombe niku hi vamani va to “ngangamela ku fanana ni tilo”?
9 Lera Danieli 12:3. Zvini zvin’wani zvi to humelela andzhako ka ‘zvikhati zva zvikarato’? Na gi tlhatekela laha ka Danieli 12:2, a vhesi 3 gi wulawula hi zvilo zvi to maheka andzhako ka kuxaniseka ka hombe.
10 Hi vamani va to “ngangamela ku fanana ni tilo”? Matewu 13:43 wa hi vhuna ku kuma hlamulo, loku aku: “Cikhatini leco a vakululama va ta woninga a ku fana ni gambo Mufun’weni wa Papayi wabye.” Ka mongo wa magezu lawa, Jesu i wa wulawula hi “vana va Mufumo”, ku nga vamakabye vakwe va totilweko, lava a to tira navo Mufun’weni wa le tilweni. (Mat. 13:38) Hikwalaho, Danieli 12:3 i wulawula hi vatotilweko ni ntiro lowu va to wu maha ndzeni ka 1000 wa malembe ya kufuma ka Kristu.
Lava va 144 000 va ta tirisana na Jesu kasi ku rangela a ntiro wa ku gondzisa wu to mahiwa laha misaveni ndzeni ka 1000 wa malembe (Wona paragrafo 11)
11-12. I ntiro muni va to maha lava va 144 000 ndzeni ka 1000 wa malembe?
11 A vatotilweko va ta ‘kokela vanyingi kululameni’ hi ndlela muni? A vatotilweko va ta tirisana na Jesu kasi ku rangela a ntiro wa ku gondzisa lowu wu to mahiwa laha misaveni ndzeni ka 1000 wa malembe. Lava va 144 000 va nga ta tira kota tihosi basi, kanilezvi va ta tlhela va tira kota vapristi. (Kuv. 1:6; 5:10; 20:6) Kota vapristi tlhelo tihosi, va ta vhunetela ku “hanyisa a matiko” — hi kutsongwani-kutsongwani va maha ku a vanhu vontlhe vava vo mbhelela. (Kuv. 22:1, 2; Ezek. 47:12) Handle ko kanakana, a vatotilweko va ta tsaka nguvhu hi ku maha ntiro lowo!
12 Hi vamani va tova cikari ka “vanyingi” lava va to kokelwa kululameni? Hi lava va to vhuxiwa hi ka vafileko, ni lava va to pona Armagedhoni ni vanana lava kuzvilava va to pswaliwa misaveni yiswa. Kumbheleni ka 1000 wa malembe, vontlhe va to ngha va hanya laha misaveni va tava vo mbhelela. Makunu, a mavito yabye ma ta tsaliwa rini lomu bhukwini ga wutomi hi lapizeri na ku nga hi lapi?
KURINGWA KO GUMESA
13-14. Zvini lezvi a vanhu vontlhe laha misaveni zvi to lava ku va kombisa na va nga se kuma wutomi ga pindzukelwa?
13 Hi fanele ku alakanya lezvaku a kuva vanhu vo mbhelela a zvi wuli ku kuma wutomi ga pindzukelwa. Alakanya Adhamu na Evha. Va wa hi vanhu vo mbhelela kanilezvi kasi va kuma wutomi ga pindzukelwa va wa fanele ku ranga hi ku kombisa lezvaku va mu ingisa Jehovha Nungungulu. Hambulezvo, a ya hava hi ku a va mu ingisangi. — Rom. 5:12.
14 Ci tava cihi a ciyimo ca vanhu laha misaveni kumbheleni ka 1000 wa malembe? Vontlhe va tava vanhu vo mbhelela. A vanhu lavo vo mbhelela va ta seketela a kufuma ka Jehovha kala kupindzuka? Kutani a vokari va ta fana na Adhamu na Evha, lava hambu lezvi va nga hi vanhu vo mbhelela va nga kala kutsumbeka? Zvi ta lava ku a vanhu lavo vo mbhelela va hlamula zviwutiso lezvi. Kanilezvi hi ndlela muni?
15-16. a) A vanhu vontlhe va ta gi kuma rini a thomo ga ku kombisa ku va tsumbeka ka Jehovha? b) Ma tava wahi a magumo ya kuringwa go gumesa?
15 Sathani i ta vhalelwa hi 1000 wa malembe. Ndzeni ka cikhati leco, a nga ta zvi kota ku kanganyisa vanhu. Hambulezvo, kumbheleni ka 1000 wa malembe, Sathani i ta humesiwa. Ka cikhati leco, i ta zama ku kanganyisa vanhu vo mbhelela. Ndzeni ka kuringwa loko, a vanhu vontlhe vo mbhelela laha misaveni va tava ni thomo ga ku kombisa kubaseni lezvaku va na ni cichavo hi vito ga Nungungulu niku va seketela wuhosi gakwe. (Kuv. 20:7-10) Lezvi va to maha ka cikhati leco hi zvona zvi to komba ku a mavito yabye ma ta tsaliwa bhukwini ga wutomi ma nga ha vhinyiwi kutani ahihi.
16 A vokari, lava a ntsengo wa vona wu nga tivekiko hi kukongoma, va ta fana na Adhamu na Evha, va ala wuhosi ga Jehovha. Zvini zvi to va humelela? Kuvhululelwa 20:15 i hi byela lezvi: “Ni wihi loyi a vito gakwe gi nga kala ku kumiwa bhukwini ga wutomi i no hoxiwa tiveni ga ndzilo.” Ina, a vanhu lavo va ta lovisiwa kala kupindzuka. Kanilezvi a kutala ka vanhu lavo vo mbhelela va ta tsumbeka laha va to ringwa hi khati go gumesa. A mavito yabye ma ta guma ma tsaliwa bhukwini ga wutomi ma nga ha vhinyiwi.
NDZENI KA ‘CIKHATI XA KUGUMESA’
17. Zvini lezvi Dhaniyeli a nga byeliwa ku zvi wa ta maheka masikwini ya hina? (Danieli 12:4, 8-10)
17 A zvo ku tsakisa a ku ehleketa hi zvilo lezvi zvi to humelela cikhatini ci tako! Hambulezvo, Dhaniyeli i tlhelile a byeliwa mahungu yo kari ya lisima hi ngilozi xungetano hi masiku ya hina, ku nga ‘cikhati ca magumo’. (Lera Danieli 12:4, 8-10; 2 Tim. 3:1-5) A ngilozi yi byelile Dhaniyeli, yiku: A ‘wutivi [ga lisine] gi ta endzeleka.’ A ciphrofeto leci ci nga ka bhuku ga Dhaniyeli ci wa ta zwisisiwa hi kumbhelela hi vanhu va Nungungulu. A ngilozi yi tlhelile yi ku cikhatini leco ‘a vakubiha va ta maha kubiha. Ku hava a wakubiha a ta nga zvi zwisisa’.
18. Zvini zvi to humelela a vakubiha zvezvanyana?
18 Inyamutlha, a vakubiha va nga wonekisa ku khwatsi a va tsayisiwi hi kota ya mahanyela yabye ya kubiha. (Mala. 3:14, 15) Kanilezvi zvezvanyana, Jesu i ta lamula lava va fanako ni timbuti, a va hambanisa ni lava va fananako ni tiyivhu. (Mat. 25:31-33) A vanhu lavo vakubiha va nga ta pona kuxanisekeni ka hombe ne va nga ta vhuxiwa kasi va hanya misaveni yiswa. A mavito yabye ma nga tava kona ‘bhukwini ga cialakanyiso’ gi kumbukiwako ka Malaki 3:16.
19. Zvezvi cikhati ca ku hi maha yini niku hikuyini? (Malaki 3:16-18)
19 Zvezvi cikhati ca ku hi zvi kombisa hi mahanyela ya hina lezvaku a hi vanhu va kubiha. (Lera Malaki 3:16-18.) Jehovha i kari a hlengeleta lava a va wonako kota ‘tshomba yakwe’, kutani tshomba yo hlawuleka. Handle ko kanakana, hi zvi lava nguvhu a kuva cikari kabye.
Zvi ta tsakisa nguvhu a ku wona Dhaniyeli, ni maxaka ya hina ni vanhu van’wani vo tala na va ‘vhuka’ misaveni yiswa! (Wona paragrafo 20)
20. Zvini lezvi Dhaniyeli a tsumbisilweko hi kugumesa niku hikuyini u ku rindzelako hi mahlo yo pswhuka a kutatiseka ka citsumbiso leco?
20 Kunene, hi hanya cikhatini co tsakisa nguvhu. Kanilezvi a zvilo zvo tsakisa nguvhu hi lezvi zvi to maheka zvezvanyana. Lokuloku hi ta wona a kulovisiwa ka wubihi gontlhe. Andzhako ka lezvo, hi ta wona a kutatiseka ka lezvi Jehovha a tsumbisileko Dhaniyeli, zvaku: ‘U ta vhuka u amukela a ciavelo ca wena a kumbheleni ka masiku’. (Dan. 12:13) Wa gi rindzela hi mahlo yo pswhuka a siku legi Dhaniyeli ni maxaka ya wena va to ‘vhuka’ hi ka vafileko? Loku zvi hi lezvo, maha zvontlhe zvi kotekako kasi u simama u tsumbekile. Loku u maha lezvo, tiyiseka lezvaku a vito ga wena gi ta simama bhukwini ga wutomi legi Jehovha a tsalako.
LISIMU 80 ‘Ringani mu wona lezvaku Jehovha mu nene’
^ A ndzima leyi yi chukwatisa a mazwisisela ya hina xungetano hi ntiro wa hombe wa ku gondzisa wu tlhamuselwako ka Danieli 12:2, 3. Hi ta wona ku wu ta maheka rini a ntiro lowo niku hi vamani va to patseka ka wona. Hi ta tlhela hi wona lezvi a ntiro lowo wa ku gondzisa wu to va longiselisa zvona lava va to ngha va hanya laha misaveni kasi va yimisana ni kuringwa ko gumesa kumbheleni ka 1000 wa malembe ya kufuma ka Kristu.
^ A cikhati leci a vafileko va to vhuxiwa, kuzvilava ku ta sangula hi lava va fileko na va tsumbekile ndzeni ka masiku yo gumesa zvi tlhela zviya ndzhako. Loku zvi mahisa lezvo, a munhu ni munhu i tava ni thomo ga ku hoyozela lava a va tivileko. Kani zvi ta mahisa zvezvo kutani ahihi, leci hi ci tivako ku loku a Mitsalo yi wulawula hi lava va to vhuxiwa vaya tilweni, yi wula lezvaku “a mun’we ni mun’wani i ta vhuka hi khati gakwe”. Hikwalaho, hi nga wula kambe lezvaku ni lava va to vhuxiwa laha misaveni vonawu va ta vhuxiwa hi ndlela yi xaxametilweko. — 1 Kor. 14:33; 15:23.
^ A tlhamuselo lowu wu cica lezvi zvi tlhamuselweko ka bhuku Preste Atenção à Profecia de Daniel! cipimo 17 ni ka Murindzeli wa 1 ka Julho wa 1987, paj. 21-25, hi ciPutukezi.
^ A kuhambana ni lezvo, a magezu “lava vo lulama ni lava vo kala ku lulama”, ma nga ka Mitiro 24:15, ni lawa ya ku “lava va mahileko a zvilo zva zvi nene” ni “lava va mahileko a zvilo zva kubiha”, ma nga ka Johani 5:29, ma yisa kupima ka lezvi lava va to vhuxiwa va zvi mahileko na va nga sefa.
