NKHANI YAKUSAMBIRA 40
‘Ŵazamwiza na Ŵanandi ku Urunji’
“Awo ŵakwiza na ŵanandi ku urunji ŵazamuŵala nga ni nyenyezi muyirayira swii.”—DAN. 12:3.
SUMU 151 Wazamuchema
IVYO VILI MU NKHANI IYI a
1. Kasi ntchinthu wuli chakukondweska icho tikulindilira mu nyengo ya Muwuso wa Khristu wa Vyaka 1,000?
CHIZAMUŴA chakukondweska chomene para ŵanthu ŵazakamba kuwuskika pa charu chapasi mu nyengo ya Vyaka 1,000 vya Muwuso wa Khristu. Wose awo ŵakutemweka ŵawo ŵali kufwa ŵakukhumba chomene kuŵawonaso. Yehova nayo ndimo wakukhumbira. (Yobu 14:15) Waliyose pa charu chapasi wazamukondwa chomene para ŵakutemweka ŵake ŵazakamba kuwuskika. Nga umo tikasambilira mu nkhani iyo yajumpha, “ŵarunji” awo mazina ghawo ghali kulembeka mu buku la umoyo, “ŵazamuwukira ku umoyo.” (Mil. 24:15; Yoh. 5:29) Panji ŵakutemweka ŵithu ŵazamwamba kuwuskika para Aramagedoni yajumpha waka. b Kweniso ŵanthu “ŵambura urunji,” awo ŵakaŵavya mwaŵi wakukwana kuti ŵamanye Yehova panji kumuteŵetera mwakugomezgeka pambere ŵandafwe, “ŵazamuwukira ku cheruzgo.”
2-3. (a) Nga umo pakulongolera pa Yesaya 11:9, 10, kasi ni ntchito wuli yikuru yakusambizga iyo yindachitikepo mu mbiri yose ya ŵanthu iyo yizamuchitika? (b) Kasi tiwonenge vichi mu nkhani iyi?
2 Ŵanthu wose awo ŵazamuwuskika ŵazamukhumbikwira kusambizgika. (Yes. 26:9; 61:11) Ntheura ntchito yikuru chomene iyo yindachitikepo mu mbiri yose ya ŵanthu yizamukhumbikwira kuchitika. (Ŵazgani Yesaya 11:9, 10.) Chifukwa wuli? Chifukwa chimoza ntchakuti, ŵanthu ŵambura urunji awo ŵazamuwuskika ŵazamukhumbikwira kuti ŵasambire vyakukhwaskana na Yesu Khristu, Ufumu wa Chiuta, sembe yakuwombora ya Yesu, ndiposo kuzirwa kwa zina la Yehova na chifukwa icho iyo pera ndiyo ngwakwenelera kuwusa. Nanga ni ŵanthu ŵarunji, nawo ŵazamukhumbikwira kusambira vinthu ivyo Yehova wali kusambizga ŵanthu ŵake, vyakukhwaskana na khumbo lake ku charu chapasi. Ŵanthu ŵanyake ŵakugomezgeka aŵa ŵakafwa kale chomene pambere Baibolo lindamare kulembeka. Ntheura ŵanthu ŵarunji na ŵambura urunji wuwo ŵazamuŵa na vinthu vinandi vyakuti ŵasambire.
3 Mu nkhani iyi, tiwonenge mafumbo agha: Kasi ntchito yikuru iyi yakusambizga yizamuchitika wuli? Kasi umo ŵanthu ŵazamuchitira na mulimo uwu vizamukhwaska wuli usange mazina ghawo ghakwenera kulembeka muyirayira panji yayi? Mazgoro gha mafumbo agha ngakuzirwa chomene kwa ise mazuŵa ghano. Nga umo tiwonerenge, mauchimi ghanyake ghakukondweska gha mu buku la Chivumbuzi, ghatovwirenge umo tikupulikiskira pasono ivyo vizamuchitika para ŵakufwa ŵawuskika. Chakwamba, tiyeni tiwone vyakuchitika vyakukondweska ivyo uchimi wa pa Daniyeli 12:1, 2 ukayowoyerathu.
‘AWO ŴAKUGONA MU FUVU . . . ŴAZAMUWUKA’
4-5. Kasi lemba la Daniel 12:1 likuyowoya vichi vyakukhwaskana na nyengo yaumaliro?
4 Ŵazgani Daniyeli 12:1. Buku la Daniyeli likulongosora ndondomeko ya umo vyakuchitika vyakukondweska ivi vizamuchitikira mu mazuŵa ghaumaliro. Mwachiyelezgero, lemba la Daniel 12:1 likuyowoya kuti Mikayeli, uyo ni Yesu Khristu, ‘wazamwimilira kuti wawovwire ŵanthu ŵa Chiuta.’ Chigaŵa cha uchimi uwu chikamba kufiskika mu 1914 apo Yesu wakimikika kuŵa Themba la Ufumu wa Chiuta kuchanya.
5 Ndipouli, Daniel wakayowoyaso kuti Yesu wazamwimilira mu “nyengo ya suzgo iyo yindaŵeko nakale kufuma apo kukaŵira mtundu wa ŵanthu m’paka pa nyengo iyo.” “Nyengo ya suzgo” iyi, ni “suzgo yikuru” iyo yikuyowoyeka pa Mateyu 24:21. Yesu wazamwimilira, panji kuti kuvikilira ŵanthu ŵa Chiuta, paumaliro wa “nyengo ya suzgo” iyi, apo mpha Aramagedoni. Buku la Chivumbuzi likuyowoyaso za ŵanthu aŵa kuti ni ‘mzinda ukuru uwo wafuma mu suzgo yikuru.’—Chivu. 7:9, 14.
6. Kasi ntchivichi chizamuchitika pamanyuma pakuti mzinda ukuru wapona pa suzgo yikuru? Longosorani. (Mu magazini iyi, wonaniso “Mafumbo Ghakufuma ku Ŵaŵazgi” kuti mumanye fundo zinyake zakukhwaskana na chiwuka cha ŵanthu awo ŵazamuwukira ku umoyo pa charu chapasi.)
6 Ŵazgani Daniyeli 12:2. Kasi ntchivichi chizamuchitika pamanyuma pakuti mzinda ukuru wapona panyengo ya suzgo iyi? Kumasinda uku tikatenge lemba la Daniel 12:2 likuyowoya vya chiwuka cha awo ŵakuwuskikira kuchanya, panji kusazgikira kwa mulimo wakupharazga pamanyuma pakuti mulimo uwu walekeskeka na ŵakususka mu 1918. c Ndipouli, sono tikupulikiska kuti mazgu gha pa lemba ili ghakuyowoya za chiwuka cha ŵakufwa icho chizamuchitika mu charu chiphya. Chifukwa wuli tikuyowoya nthena? Mazgu ghakuti “fuvu” ndigho ghali kugwiliskirikaso ntchito pa lemba la Yobu 17:16, ndipo ghakung’anamura kuti “dindi.” Ntheura fundo iyi yikulongora kuti lemba la Daniyeli 12:2 likuyowoya vya chiwuka chanadi icho chizamuchitika pamanyuma pakuti mazuŵa ghaumaliro ghamara, kweniso pamanyuma pa nkhondo ya Aramagedoni.
7. (a) Kasi ŵanyake ŵazamuwukira ku “umoyo wamuyirayira” munthowa wuli? (b) Chifukwa wuli chiwuka ichi ‘ntchiwemi chomene’?
7 Ipo kasi lemba la Daniyeli 12:2 likung’anamurachi para likuti ŵanyake ŵazamuwuskikira ku “umoyo wamuyirayira”? Likung’anamura kuti awo ŵazamuwuskika na kumumanya Yehova na Yesu na kulutilira kumanya vinandi vyakukhwaskana na iwo, kweniso kuŵapulikira mu nyengo ya vyaka 1,000, ŵazamusanga umoyo wamuyirayira. (Yoh. 17:3) Ichi chizamuŵa “chiwuka chiwemi’ chomene kuluska cha ŵanthu ŵanyake awo ŵakawuskikapo mu nyengo yakale. (Heb. 11:35) Chifukwa wuli? Chifukwa ntchakuti ŵanthu aŵa pamanyuma ŵakafwaso.
8. Kasi ŵanyake awo ŵazamuwuskika “ŵazamulengeskeka na kuyuyulika kwamuyirayira” munthowa wuli?
8 Kweni ni wose yayi awo ŵazamuwuskika awo ŵazamukhumba kusambizgika na Yehova. Uchimi wa Daniyeli ukuyowoya kuti ŵanyake awo ŵazamuwuskika “ŵazamulengeskeka na kuyuyulika kwamuyirayira.” Chifukwa chakuti ŵazamulongora mzimu wauchigaluka, mazina ghawo ghazamulembeka yayi mu buku la umoyo ndipo ŵazamupokera yayi umoyo wamuyirayira. M’malo mwake, “ŵazamuyuyulika kwamuyirayira” panji kuti kuparanyika. Ntheura lemba la Daniyeli 12:2 likuyowoya ivyo vizamuchitika paumaliro, ku wose awo ŵazamuwuskika kutolera pa ivyo ŵazamuchita pamanyuma pa chiwuka. d (Chivu. 20:12) Ŵanyake ŵazamusanga umoyo wamuyirayira; ŵanyake yayi.
‘ŴAZAMWIZA NA ŴANANDI KU URUNJI’
9-10. Kasi ntchivichi chinyake chizamuchitika pamanyuma pa suzgo yikuru, ndipo mbanjani awo “ŵazamuŵala nga mbungweru wa mlengalenga wa kuchanya”?
9 Ŵazgani Daniyeli 12:3. Kasi ntchivichi chinyake chizamuchitika pamanyuma pa “nyengo ya suzgo”? Padera pa Daniyeli 12:2, vesi 3 likuyowoyaso chinthu chinyake icho chizamuchitika pamanyuma pa suzgo yikuru.
10 Kasi mbanjani awo “ŵazamuŵala nga mbungweru wa mlengalenga wa kuchanya”? Lemba la Mateyu 13:43 likutovwira kumanya awo ŵakuyowoyeka apa. Lemba ili likuti: “Pa nyengo iyo, ŵarunji ŵazamuŵala ngwee nga ni dazi mu Ufumu wa Awiskewo.” Para tikuwona nkhani yose mu chaputara ichi, Yesu wakayowoyanga vyakukhwaskana na “ŵana ŵa Ufumu,” ŵabali ŵake ŵakuphakazgika, awo wamuteŵetera nawo mu Ufumu wakuchanya. (Mat. 13:38) Ntheura lemba la Daniyeli 12:3 likwenera kuti likuyowoya za ŵakuphakazgika na ntchito iyo ŵazamuchita mu Vyaka 1,000 vya Muwuso wa Khristu.
Ŵa 144,000 ŵazamukolerana chomene na Yesu Khristu pakulongozga mulimo wakusambizga mu nyengo ya vyaka 1,000 (Wonani ndime 11)
11-12. Kasi ni ntchito wuli iyo ŵa 144,000 ŵazamuchita mu nyengo ya vyaka 1,000?
11 Kasi ŵakuphakazgika ‘ŵazamwiza wuli na ŵanandi ku urunji’? Ŵakuphakazgika ŵazamukolerana chomene na Yesu Khristu pakulongozga ntchito yakusambizga iyo yizamuchitika pa charu chapasi mu nyengo ya vyaka 1,000. Ŵa 144,000 padera pakuŵa mathemba, iwo ŵazamuŵaso ŵasembe. (Chivu. 1:6; 5:10; 20:6) Ntheura, ŵazamovwira ‘pakuchizga mitundu’ na kovwira ŵanthu kuŵaso ŵakufikapo pachoko na pachoko. (Chivu. 22:1, 2; Ezek. 47:12) Ŵakuphakazgika ŵazamukondwa chomene.
12 Kasi mbanjani awo ŵazamuŵa pa gulu la “ŵanandi” awo ŵizenge ku urunji? Pa ŵanthu aŵa paliso awo ŵazamuwuskika kweniso awo ŵazamupona pa Aramagedoni pamoza na ŵana ŵawo awo ŵazamubabika mu charu chiphya. Kuzakafika kuumaliro kwa vyaka 1,000, wose awo ŵazamuŵa ŵamoyo pa charu chapasi ŵazamuŵa kuti mbakufikapo. Ipo mphawuli apo mazina ghawo ghazamulembeka kwamuyirayira na inki mu buku la umoyo na phesulu yayi?
CHIYEZGO CHAUMALIRO
13-14. Kasi ŵanthu wose ŵakufikapo ŵazamukhumbikwira kulongora vichi pambere ŵandapokere umoyo wamuyirayira?
13 Tikwenera kumanya kuti kuŵa waka ŵakufikapo chikung’anamura kuti munthu mbwenu wasanga kale umoyo wamuyirayira yayi. Ghanaghanirani Adamu na Eva. Iwo ŵakaŵa ŵakufikapo, kweni ŵakeneranga kulongora dankha kuti ŵakumupulikira Yehova Chiuta pambere ŵandapike umoyo wamuyirayira. Ndipo chachitima ntchakuti ŵakatondeka kumupulikira.—Rom. 5:12.
14 Kasi vinthu vizamuŵa wuli ku awo ŵazamuŵa pa charu chapasi kuumaliro kwa vyaka 1,000? Wose ŵazamuŵa kuti mbakufikapo. Kasi ŵanthu wose ŵakufikapo ŵazamukhozgera mwakugomezgeka muwuso wa Yehova kwamuyirayira? Panji kasi ŵanyake ŵazamuchita nga ni Adamu na Eva, awo nangauli ŵakaŵa ŵakufikapo kweni ŵakagaluka? Mafumbo agha ghazamukhumbikwira kuzgoreka, kweni ghazamuzgoreka wuli?
15-16. (a) Kasi mphawuli apo ŵanthu wose ŵazamupika mwaŵi wakulongora usange mbakugomezgeka kwa Yehova? (b) Kasi ntchivichi chizamuchitika paumaliro wa chiyezgo chaumaliro?
15 Satana wazamujalirika kwa vyaka 1,000. Panyengo iyi, wazamutondeka kupuluska waliyose. Ndipouli, paumaliro wa vyaka 1,000, Satana wazamufumiskika. Apa sono wazamuyezga kupuluska ŵanthu ŵakufikapo. Panyengo ya chiyezgo iyi, ŵanthu wose ŵakufikapo ŵazamuŵa na mwaŵi wakulongora usange ŵakuchindika Chiuta na kukhozgera muwuso wake. (Chivu. 20:7-10) Ivyo ŵazamuchita panyengo iyi ndivyo vizamulongora usange mazina ghawo ghakwenera kulembeka kwamuyirayira mu buku la umoyo.
16 Baibolo likutiphalira kuti ŵanthu ŵanyake ŵazamugomezgeka yayi nga umo Adamu na Eva ŵakachitira, ndipo ŵazamukana muwuso wa Yehova. Kasi ntchivichi icho chizamuŵachitikira? Lemba la Chivumbuzi 20:15 likutiphalira kuti: “Waliyose uyo wakasangika kuti wandalembeke mu buku la umoyo wakaponyeka mu nyanja ya moto.” Nadi, ŵanthu ŵakugaluka aŵa ŵazamuparanyika kwamuyirayira. Kweni ŵanthu ŵanandi ŵakufikapo ŵazamutonda panji kuti kujumpha pa chiyezgo chaumaliro ichi. Ndipo mazina ghawo ghazamulembeka kwamuyirayira mu buku la umoyo.
MU “NYENGO YAUMALIRO”
17. Kasi mungelo wakaphalira Daniyeli kuti ntchivichi chizamuchitika mu nyengo yithu yino? (Daniyeli 12:4, 8-10)
17 Ntchakukondweska chomene kughanaghanira vinthu vyakukondweska ivi ivyo vizamuchitika munthazi. Ndipouli, Daniyeli wakapokeraso uthenga wakuzirwa kufuma kwa mungelo wakukhwaskana na nyengo yithu yino, “nyengo yaumaliro.” (Ŵazgani Daniyeli 12:4, 8-10; 2 Tim. 3:1-5) Mungelo wakaphalira Daniel kuti: “Umanyi wenecho uzamwandana.” Nadi, mazgu ghauchimi gha mu buku lake mbanthu ŵa Chiuta pera awo ŵangaghapulikiska makora. Mungelo wakasazgirapo kuti panyengo iyi “ŵanthu ŵaheni ŵazamuchita viheni [ndipo] palije muheni uyo wazamupulikiska.”
18. Kasi ntchivichi icho chichitikirenge ŵaheni sonosono apa?
18 Mazuŵa ghano vingawoneka nga kuti ŵaheni ŵakulangika yayi apo ŵakuchita viheni. (Mal. 3:14, 15) Kweni sonosono apa Yesu weruzgenge ŵanthu awo ŵali nga ni mbuzi na kuŵapatura ku ŵanthu awo ŵali nga ni mberere. (Mat. 25:31-33) Ŵaheni aŵa ŵazamupona yayi pa suzgo yikuru, nesi kuwuskika mu charu chiphya. Mazina ghawo ghazamuŵamo yayi mu “buku lachikumbusko” ilo likuzunulika pa Malaki 3:16.
19. Kasi tikwenera kuchita vichi sono, ndipo chifukwa wuli? (Malaki 3:16-18)
19 Sono ndipo tikwenera kulongora kwizira mu nkharo yithu kuti tili pa gulu la ŵanthu ŵaheni yayi. (Ŵazgani Malaki 3:16-18.) Yehova wakuwunjika ŵanthu awo wakuŵawona kuti ni katundu wake wapadera, panji kuti ‘chuma chake chapadera.’ Tili na chigomezgo chose kuti nase tikukhumba kuŵa pakati pa gulu ili.
Chizamuŵa chakukondweska chomene kuwona Daniyeli, ŵakutemweka ŵithu, na ŵanyake ŵanandi ‘ŵakwimilira’ na kupokera chigaŵa chawo mu charu chiphya! (Wonani ndime 20)
20. Kasi ni layizgo wuli ilo Daniyeli wakaphalirika, ndipo chifukwa wuli tikulindilira mwakunweka kufiskika kwa layizgo ili?
20 Nadi, tili mu nyengo yakukondweska chomene. Kweni vinthu vinyake vyakuzizwiska vichitikenge sonosono apa. Sonosono apa tizamuwona ŵaheni ŵakuparanyika. Kufuma apo, tizamuwona kufiskika kwa layizgo ilo Yehova wakalayizga Daniyeli kuti: “Uzamwimilira kuti upokere chigaŵa chako paumaliro wa mazuŵa.” (Dan. 12:13) Kasi namwe mukulindilira mwakunweka zuŵa ilo, apo Daniyeli pamoza na ŵakutemweka ŵinu ‘muzamwimiliraso’? Usange ni nthena, chitani vyose ivyo mungafiska pasono kuti muŵe ŵakugomezgeka, ndipo muŵenge na chigomezgo chose kuti zina linu lilutilirenge kuŵamo mu buku la umoyo la Yehova.
SUMU 80 “Chetani Mwe, Muwone Kuti Yehova Ni Muwemi”
a Nkhani iyi yikulongosora umo tikupulikiskira pasono nkhani yakukhwaskana na ntchito yikuru yakusambizga iyo yikuyowoyeka pa Daniyeli 12:2, 3. Tiwonengeso apo ntchito iyi yizamwambira kweniso awo ŵazamuchitako. Kweniso tiwonenge umo ntchito yakusambizga iyi yizamunozgekereskera awo ŵazamukhala pa charu chapasi kujumpha cheruzgo chaumaliro, paumaliro wa Vyaka 1,000 vya Muwuso wa Khristu.
b Panji ŵanthu awo ŵazamwamba kuwuskika ni awo ŵakafwa kuti mbakugomezgeka mu mazuŵa ghaumaliro, ndipo kufuma apo awo ŵakafwa pambere iwo ŵandafwe ŵazamuwuskika, kwendera muwiro na muwiro. Usange ndimo vizamuŵira nadi, muwiro uliwose uzamuŵa na mwaŵi wakupokelera ŵanthu awo ŵakamanyananga nawo. Mulimose umo vizamuŵira, Malemba ghakulongora kuti chiwuka cha awo ŵakuwuskikira kuchanya chikuchitika “mu ndondomeko” yakwenelera, ndipo tiliso na chigomezgo chose kuti chiwuka cha ŵanthu awo ŵazamukhala pa charu chapasi, nacho chizamuchitika mu ndondomeko yakwenelera.—1 Kor. 14:33; 15:23.
c Fundo iyi yikusintha umo tikapulikiskiranga kale nga umo vili kulembekera mu buku la Samalani Ndi Ulosi wa Danieli! mutu 17, na mu Gongwe la Mulinda la Chichewa la Julayi 1, 1987, pp. 21-25.
d Kweni mazgu ghakuti “ŵarunji” na “ŵambura urunji” agho ghakusangika pa Milimo 24:15 kweniso mazgu ghakuti “awo ŵakachitanga vinthu viwemi” na “awo ŵakachitanga vinthu viheni” agho ghakusangika pa Yohane 5:29, chomene ghakuyowoya vya nkharo ya ŵanthu awo ŵazamuwuskika iyo ŵakaŵa nayo pambere ŵandafwe.
