1. Ne a mea fakaofoofogia kolā ka ‵tupu i te Pulega i te Afe Tausaga?

 KO TAFAGA la te gali o te aso tenā māfai ko kamata te toe‵tuga o tino i te lalolagi i te Pulega a Keliso i te Afe Tausaga! Ko olioli malosi eiloa a tino kolā ne ‵galo olotou tino pele ke toe fetaui mo latou. Konā foki loa a lagonaga o Ieova. (Iopu 14:15) Mafaufau la ki te taimi fakafiafia o te ‵toe ‵kau fakatasi tenā i te lalolagi kātoa. E pelā mo mea ne tauloto mai te mataupu mai mua atu, a “tino amio‵tonu,” kolā e maua olotou igoa i te tusi o te ola “ka toe‵tu mai ki te ola.” (Galu. 24:15; Ioa. 5:29) Kāti ka aofia muamua ou tino pele e tokouke i a latou kolā ka toe‵tu mai ki te ola i te toe‵tuga ki te lalolagi. * E se gata i ei, a “tino sē amio‵tonu” e pelā mo latou kolā ne seki maua te avanoaga ke iloa a Ieova io me ke tavini atu ki a ia mo te fakamaoni a koi tuai o ‵mate “ka toe‵tu mai ki te fakamasinoga.”

2-3. (a) E pelā mo te Isaia 11:9, 10, se a te ‵toe polokalame sili o akoakoga i tala fakasolopito o tino? (e) Ne a mea ka mafau‵fau tatou ki ei i te mataupu tenei?

² A tino katoa kolā ka toe‵tu mai e ‵tau o akoako faka‵lei. (Isa. 26:9; 61:11) Tela la, a te ‵toe polokalame sili o akoakoga i tala fakasolopito o tino ka kamata i te taimi tenā. (Faitau te Isaia 11:9, 10.) Kaia? E tasi te pogai, me i tino sē amio‵tonu kolā ka toe‵tu mai, e ‵tau o tauloto e uiga ki a Iesu Keliso, te fakatokaga o te Malo, te togiola, mo te kinauga tāua i te iunivesi  telā e aofia i ei a te igoa mo te pulega sili a Ieova. Ke oko ki tino amio‵tonu, e ‵tau o akoako ke iloa ne latou a mainaga ‵fou kolā ko oti ne fakaasi malielie mai ne Ieova e uiga ki tena fuafuaga mō te lalolagi. Ko leva ne ‵mate a nisi tino fakamaoni konei a koi tuai o tuku fakatasi te muna a Ieova ki te Tusi Tapu. Ka uke ‵ki eiloa a mea e ‵tau o tauloto ne tino sē amiotonu mo tino amio‵tonu.

³ I te mataupu tenei, ka mafau‵fau tatou ki fesili konei: Ne a mea e aofia i te ‵toe polokalame sili o akoakoga tenei? Ka aoga pefea te polokalame tenā faitalia me ko igoa o latou ko tumau i te tusi o te ola io me ikai? A tali ki fesili konei e ‵tau o tāua ‵ki ki a tatou i aso nei. E pelā mo mea ka lavea atu, a nisi valoaga fakaofoofogia kolā ne fakamau i te tusi o Tanielu mo Fakaasiga e fesoasoani mai ke momea aka te ‵tou malamalama ki mea ka ‵tupu māfai ko toe‵tu mai a tino ‵mate. Muamua la, ke mafau‵fau tatou ki mea ‵gali kolā ne ‵valo mai i te valoaga i te Tanielu 12:1, 2.

4-5. Se a te mea fakaasi mai i te Tanielu 12:1 e uiga ki te taimi o te gataga?

⁴ Faitau te Tanielu 12:1. E fakaasi mai i te tusi o Tanielu a te fakasologa o mea fakaofoofogia kolā ka ‵tupu i te taimi o te gataga. E pelā mo te Tanielu 12:1 e fakaasi mai me i a Mikaele, ko Iesu Keliso, “telā e tu mō ou tino [o te Atua].” Ne kamata o fakataunu te vaega o te valoaga tenā i te 1914 i te taimi ne fakasopo aka ei a Iesu e pelā me ko te Tupu i te Malo faka-te-lagi o te Atua.

⁵ Kae ne fai atu foki ki a Tanielu, me i a Iesu “ka tu aka” i “se taimi o te puapuaga telā e seki tupu aka eiloa talu mai te taimi ne kamata ei o isi se fenua.” A te “taimi [tenei] o te puapuaga” ko te “fakalavelave lasi” telā ne taku mai i te Mataio 24:21. E tu aka a Iesu io me gasuesue o ‵pulu a tino o te Atua i te fakaotiga o te taimi o te puapuaga, telā ko Amaketo. A te tusi o Fakaasiga e fakasino atu ki tino konei e pelā me ko te “vaitino tokouke” telā “ne ‵sao i te fakalavelave lasi.”—Faka. 7:9, 14.

6. Ne a mea ka ‵tupu māfai ko oti ne ‵sao atu te vaitino tokouke i te fakalavelave lasi? Fakamatala mai. (Onoono foki ki te mataupu tenei, “Fesili Mai te Kau Fai‵tau” e uiga ki te toe‵tuga ki te ola i te lalolagi.)

⁶ Faitau te Tanielu 12:2. Ne a mea ka ‵tupu māfai ko oti ne ‵sao atu a te vaitino tokouke i te taimi tenei o te puapuaga? A te valoaga tenei e se fakauiga ki se toetuga fakatusa, ko te ‵toe ola mai i te feitu faka-te-agaga o tavini a te Atua telā ka tupu i aso fakaoti, e pelā mo te ‵tou malamalama muamua. * I lō te fai penā, e fakasino atu a pati konei ki te toetuga o tino ‵mate i te lalolagi fou. Kaia e mafai ei o fai atu tatou penā? A te tugapati ko “te ‵pefu” ne fakaaoga foki i te Iopu 17:16 e pelā me se tugapati e ‵pau mo “te Tanuga.” E fakaasi mai te manatu tonu tenei i te Tanielu 12:2 e fakasino atu ki te toetuga tonu telā ka tupu mai tua o aso fakaoti mo te taua i a Amaketo.

7. (a) Ka faka‵tu aka pefea a nisi tino “ki te ola se-gata-mai”? (e) Kaia ‘e ‵lei atu ei a te toetu’ tenei?

⁷ Se a la te mea e fakauiga ki ei te Tanielu 12:2, me ka toe‵tu mai a nisi tino “ki te ola se-gata-mai”? E fakauiga i ei me i a latou kolā ka toe‵tu kae iloa, io me tumau i te iloa kae faka‵logo ki a Ieova mo Iesu i te 1,000 tausaga ka maua eiloa ne latou te ola se-gata-mai. (Ioa. 17:3) Ka ‵lei atu a “te toetu” tenei i lō te toe‵tuga muamua o nisi tino ki te ola i aso ko ‵teka. (Epe. 11:35) Kaia? Me i tino sē ‵lei katoatoa konā ne toe ‵mate.

8. Ka toe‵tu mai pefea a nisi tino “ki te masiasi mo te fakatakalialia ki te se-gata-mai”?

 ⁸ Kae e se ko tino katoa kolā ka toe‵tu mai, ka talia ne latou a te polokalame o akoakoga a Ieova. E fai mai te valoaga i te Tanielu me ka toe‵tu mai a nisi tino “ki te masiasi mo te fakatakalialia ki te se-gata-mai.” Ona ko te mea ka fakaasi atu ne latou se uiga ‵teke, ka se tusi olotou igoa i te tusi o te ola kae ka se maua foki ne latou a te ola se-gata-mai. I lō te fai penā, ka toe‵tu mai latou ki te “fakatakalialia ki te se-gata-mai,” io me ko te fakaseaiga. Tela la, e faipati te Tanielu 12:2 ki te ‵toe ikuga fakaoti o latou katoa kolā e toe‵tu mai telā e fakavae ki mea e fai ne latou mai tua o te lotou toe‵tuga. * (Faka. 20:12) Ka maua ne nisi tino a te ola se-gata-mai; kae e se ko nisi tino.

9-10. Se a foki te suā mea ka tupu mai tua o te fakalavelave lasi, kae ko oi “ka maina malosi mai e pelā mo te la”?

⁹ Faitau te Tanielu 12:3. Se a te foki te suā mea ka tupu mai tua o te “taimi o te puapuaga”? I tafa o te Tanielu 12:2, e fakasino atu te fuaiupu 3 ki se mea telā ka tupu mai tua o te fakalavelave lasi.

¹⁰ Ko oi “ka maina malosi mai e pelā mo te la”? E maua ne tatou te tali i pati a Iesu i te Mataio 13:43: “I te taimi tenā, a tino amio‵tonu ka maina malosi mai e pelā mo te la i te Malo o te lotou Tamana.” I te mataupu kātoa o pati konei, ne faipati a Iesu e uiga ki “tama o te Malo,” ko ana taina fakaekegina kolā ka tavini fakatasi atu latou i te Malo faka-te-lagi. (Mata. 13:38) Tela la, e mafai eiloa o fakauiga a te Tanielu 12:3 ki te kau fakaekegina mo te galuega telā ka fai ne latou i te Pulega i te Afe Tausaga.

11-12. Se a te galuega telā ka fai ne te toko 144,000 i te 1,000 tausaga?

¹¹ Ka aumai pefea ne te kau fakaekegina “a tino e tokouke”? Ka ga‵lue fakatasi a te kau fakaekegina mo Iesu Keliso ke takitaki a te polokalame o akoakoga telā ka fai i te lalolagi i te 1,000 tausaga. Ka se pule mai fua a te toko 144,000 e pelā me ne tupu, kae ka tavini foki e pelā me ne faitaulaga. (Faka. 1:6; 5:10; 20:6) E ‵tusa mo olotou tofi konā, ka fesoasoani latou ke “faka‵lei a ma‵saki o atufenua”—kae fesoasoani malielie ki tino ke oko atu ki te tulaga ‵lei katoatoa. (Faka. 22:1, 2; Eseki. 47:12) Ko tafaga la te fiafia ka maua ne te kau fakaekegina i te taimi tenā!

¹² Ko oi ka aofia i “tino e tokouke” kolā ka aumai ki te amiotonu? Ka aofia i ei a tino kolā ka toe‵tu mo latou kolā ka ‵sao atu i a Amaketo fakatasi mo so se tamaliki telā e mafai o fanau mai i te lalolagi fou. I te fakaotiga o te 1,000 tausaga, a tino ola katoa i te lalolagi ka ‵lei katoatoa. Tela la, ko te taimi fea ka tusi ei olotou igoa ke tumau i te tusi o te ola ki se peni kae e se ko te penitala?

13-14. Se a te mea e ‵tau o fakaasi atu ne tino ‵lei katoatoa katoa i te lalolagi a koi tuai o maua ne latou te ola se-gata-mai?

¹³ E ‵tau o masaua ne tatou me i te ‵lei katoatoa e se fakauiga i ei me ka maua ne se tino a te ola se-gata-mai. Mafaufau ki a Atamu mo Eva. Ne ‵lei katoatoa lāua, kae ne ‵tau o fakaasi atu te lā faka‵logo ki a Ieova te Atua a koi tuai o maua ne lāua te ola se-gata-mai. Kae se mea fakafanoanoa me ne fakata‵mala lāua o faka‵logo ki a ia.—Loma 5:12.

¹⁴ Se a te tulaga o tino i te lalolagi i te fakaotiga  o te 1,000 tausaga? A tino katoa ka ‵lei katoatoa. E mata, ka ‵lago katoatoa atu a tino ‵lei katoatoa katoa ki te pulega a Ieova ki te se-gata-mai? Io me e isi ne tino ka fai pelā mo Atamu mo Eva—kolā ne seki fakamaoni faitalia te lā ‵lei katoatoa? E ‵tau o tali aka a fesili konei, kae ka tali aka pefea?

15-16. (a) Ko te taimi fea ka maua ei ne tino katoa a te avanoaga ke fakaasi atu te lotou fakamaoni ki a Ieova? (e) Se a te ikuga fakaoti o te tofotofoga tenā?

¹⁵ Ka saisai a Satani mō te 1,000 tausaga. I te taimi tenā, ka se toe takitaki ‵se ne ia se tino. Kae i te fakaotiga o te 1,000 tausaga, ka toe ‵tala mai a Satani. Ka taumafai ei a ia o takitaki ‵se a tino ‵lei katoatoa. I te taimi o te tofotofoga tenā, ka maua ne tino ‵lei katoatoa i te lalolagi se avanoaga ke fakaasi faka‵lei atu a te lotou tulaga i te kinauga e uiga ki te igoa mo te pulega sili a te Atua. (Faka. 20:7-10) A te auala e ‵saga atu ei a tino taki tokotasi ki taumafaiga a Satani ka fakaiku aka i ei me e ‵tau io me se ‵tau o tusi olotou igoa i se auala tumau i te tusi o te ola.

¹⁶ Ka fai eiloa a nisi tino, kolā e se iloa te lotou aofaki, e pelā mo Atamu mo Eva, kolā ne ‵teke atu ki te pulega a Ieova. Se a te mea ka tupu ki a latou? E fai mai te Fakaasiga 20:15: “So se tino e se tusi tena igoa i te tusi o te ola e ‵pei ki te lase ‵ka ulaula.” Ao, ka fakaseai katoatoa atu ki te se-gata-mai a tino ‵teke konei. Kae ko te tokoukega o tino ‵lei katoatoa ka manumalo i te ‵toe tofotofoga tenei.  Tenā te taimi ka tusi i ei olotou igoa i se auala tumau i te tusi o te ola.

17. Ne a mea ne fai atu ki a Tanielu me ka ‵tupu i ‵tou taimi? (Tanielu 12:4, 8-10)

¹⁷ Ko oko eiloa i te ‵tou fia‵fia ke mafau‵fau ki mea ‵tupu konei i aso mai mua! Kae ne maua foki ne Tanielu mai i se agelu a nisi fakamatalaga tāua e uiga ki ‵tou taimi, ko “te taimi o te gataga.” (Faitau te Tanielu 12:4, 8-10; 2 Timo. 3:1-5) Ne fai atu te agelu ki a Tanielu: “Te iloaga tonu ka gasolo aka eiloa o lasi.” Ao, a pati fakavaloaga i tena tusi, ka malamalama katoatoa i ei a tino o te Atua. Ne toe fai atu te agelu me i te taimi tenei, a “tino amio ma‵sei ka fai a mea ma‵sei, kae e seai se tino amio masei ka malamalama.”

18. Se a te mea ko pili o tupu ki tino ma‵sei?

¹⁸ I aso nei, e foliga mai me e se fakasala a tino ma‵sei ona ko olotou amioga ma‵sei. (Mala. 3:14, 15) Kae e se leva nei, ka fakamasino ne Iesu a tino pelā me ne kouti, kae ‵vae keatea latou mai i tino kolā e fai pelā me ne mamoe. (Mata. 25:31-33) A tino ma‵sei konei ka se ‵sao i te fakalavelave lasi kae ka se toe‵tu mai latou ke ola i te lalolagi fou. Ka se maua olotou igoa i te “tusi o fakamasauaga” telā e taku mai i te Malaki 3:16.

19. Se a te mea e ‵tau o fai nei ne tatou? (Malaki 3:16-18)

 ¹⁹ Tenei eiloa te taimi ke fakamaoni atu ne tatou me e se aofia tatou i tino ma‵sei. (Faitau te Malaki 3:16-18.) E fakamaopoopo ne Ieova a latou kolā e ‵kilo atu a ia ki e pelā me “se kope fakapito,” io me se koloa tāua. E ma‵nako eiloa tatou ke aofia tatou i a latou.

20. Se a te folafolaga fakaoti ne fai atu ki a Tanielu, kae kaia e olioli malosi koe ki te fakataunuga o te folafolaga tenā?

²⁰ E tonu, ko ola tatou i toe taimi tāua. Kae ka sili atu te fakaofoofogia o mea kolā ka ‵tupu i aso mai mua. Ko pili nei kae ka lavea atu ne tatou a te fakaseaiga o tino ma‵sei katoa. E ‵soko atu ki ei, ka lavea ne tatou a te fakataunuga o te folafolaga a Ieova ki a Tanielu: “Ka tu aka koe ki luga ke maua tou vaega i te fakaotiga o aso.” (Tani. 12:13) E mata, e olioli malosi koe ki te aso telā ka “tu aka” a Tanielu fakatasi mo ou tino pele? Kafai e penā loa, ke na fakaoti ou mafi i te fakamaoni nei, kae e mafai o mautinoa i a koe me ka tumau tou igoa i te tusi o te ola a Ieova.