ARTÍCULO YUʼUN ESTUDIO 40
Ya xpʼijubtesotik «tsobolic ta bin toj ta pasel»
«Te machʼatic ya spʼijubteslan tsobolic ta bin toj ta pasel hich ya xcʼohtic te bin utʼil te eqʼuetic sbahtel qʼuinal» (DAN. 12:3).
KʼAYOJIL 151 Ya xchaʼkuxajik tal
¿BIN YA KILBEYTIK SKʼOPLAL? *
1. ¿Bintik ya xkʼot ta pasel ta yorail te Wentainel yuʼun Cristo ta jmil jaʼbil?
JNOP KAʼIYTIK te kʼax tʼujbil kʼalal ya xjajch te chaʼkuxajel ta Balumilal ta yorail te Wentainel yuʼun Cristo ta jmil jaʼbil, melel jpisiltik ya jkʼan ya kiltik te machʼatik lajem kuʼuntike. Jaʼnix jich ya skʼan-euk te Jehová (Job 14:15). Ta swolol Balumilal bayal machʼatik kʼax tseʼel yoʼtanik te kʼalal ya schaʼyil sbaike. Jich bitʼil la kiltikix ta yan artículo, te machʼatik «toj yoʼtanik», te tsʼibaybil sbiilik ta libro yuʼun kuxlejalil, ya «xchaʼkuxajik yuʼun ya yichʼ skuxlejalik» (Hech. 24:15; Juan 5:29). Jaʼniwan nail ya xchaʼkuxajik ta Balumilal te machʼatik lajem kuʼuntik. * Jaʼnix jich, te machʼatik «maba toj yoʼtanik», te ma juʼix la snaʼbeyik sba ta lek te Jehová o te ma juʼ abatinikix ta stojol, ya «xchaʼkuxajik yuʼun ya yichʼik ichʼel ta kʼop».
2, 3. 1) Jich bitʼil ya yal Isaías 11:9, 10, ¿bin smakojbey skʼoplal te pʼijubtesel te maʼyuk jich yichʼoj pasele? 2) ¿Bin ya kilbeytik skʼoplal ta artículo ini?
2 Spisil te machʼatik ya xchaʼkuxajik bayalto te bin ya skʼan ya snopike (Is. 26:9; 61:11). Jaʼ yuʼun mukʼ skʼoplal te ya yichʼ pʼijubtesel te ants winiketik te maʼyuk jich yichʼoj pasel-ae (kʼopona Isaías 11:9, 10). Te machʼatik maba toj yoʼtanik ya skʼan ya snopik ta swenta te Jesucristo, te Wentainel yuʼun Dios, te slajel te Jesús, te bin smakojbey skʼoplal te sbiil te Jehová sok te jaʼnax ya xwentainwane. Soknix te machʼatik toj yoʼtanik ya skʼan ya snopikxan ta swenta te skʼanojel yoʼtan te Jehová. Ay machʼatik te jun yoʼtan lajik te kʼalal mato lajem ta tsʼibayel-a te Bibliae. Jaʼ yuʼun te machʼatik maba toj yoʼtanik sok te machʼatik toj yoʼtanik bayal te bin ya skʼan ya snopike.
3 Ta artículo ini ya kakʼbeytik sujtib te jojkʼoyeletik ini: ¿Bin-utʼil ya yichʼ akʼel te pʼijubtesele?, ¿bin ya xkʼot ta stojolik te machʼatik ya skʼanik te pʼijubtesele? Sok ¿bin ya xkʼot ta pasel ta stojol te machʼatik ma skʼanike? Ya skʼan te mukʼuk skʼoplal ta koʼtantik te sujtib ta ora ini. Jich bitʼil ya xbajt kiltik, ay cheʼoxeb albilkʼopetik ta libro yuʼun Daniel sok Apocalipsis te ya skoltayotik yuʼun ya xkʼotxan ta koʼtantik te bin ya xkʼot ta pasel kʼalal ya xchaʼkuxajik te machʼatik lajemike. Ta nailal, ya kilbeytik skʼoplal te albilkʼop ta Daniel 12:1, 2 te ya yal te bintik ya xkʼot ta pasele.
«TE MACHʼATIC WAYALIC TA TSʼUBIL LUM YA XHAHCHIC»
4, 5. ¿Bin ya yal te Daniel 12:1 te ya xkʼot ta pasel ta slajibal kʼajkʼal?
4 (Kʼopona Daniel 12:1). Ta libro yuʼun Daniel ya yalbotik te bintik ya xkʼot ta pasel ta slajibal kʼajkʼale. Jich bitʼil ta Daniel 12:1 ya yalbotik «te ya scanantay» te pueblo yuʼun Dios te Miguel, te jaʼ te Jesucristo. Te albilkʼop-abi jajch ta kʼoel ta pasel ta 1914, kʼalal te Jesús och ta Ajwalil yuʼun te Wentainel yuʼun Dios.
5 Te Daniel la yichʼ albeyel te ya xjajch te Jesús ta «yorahil bayel wocol» te «mayuc hich cʼohem ta pasel cʼalal hahchemic nacionetic cʼalal ta hich ora». Te yorail bayal wokol-abi, jaʼ te «tulan wokolil» te ya yalbey skʼoplal te Mateo 24:21. Te Jesús ya xjajch o ya skanantay te pueblo yuʼun Dios ta slajibal te yorail wokol, te jaʼ ta Armagedón. Ta libro yuʼun Apocalipsis ya yalbey skʼoplal te jaʼik te «kʼax bayal ta tul ants winiketik» te ya xkolik jilel ta yorail te «tulan wokolil» (Apoc. 7:9, 14).
6. ¿Bin ya xkʼot ta pasel kʼalal ya xkolik jilel te bayal ta tul ants winiketik ta yorail tulan wokolil, sok bin yuʼun jich ya kaltik? (Jaʼnix jich ilawil ta revista ini te sección «Te bintik ya sjojkʼoyik te machʼatik ya skʼopon te june» te ya yal ta swenta te chaʼkuxajel ta Balumilal).
6 (Kʼopona Daniel 12:2). ¿Bin ya xkʼot ta pasel kʼalal ya xkolik jilel te bayal ta tul ants winiketik ta yorail wokol? Te albilkʼop ya yalbey skʼoplal ta swenta te chaʼkuxajel, pero ma jichuk te bitʼil kʼoem ta koʼtantik-ae. Ta nailal, kʼoem ta koʼtantik-a te jaʼ te chaʼkuxajel ta chʼulchan o te kʼalal mukʼub te kaʼteltik ta spatilal yuʼun te jaʼbil 1918 kʼalal te jkontrataktik kʼan skomik te scholel skʼop Dios. * Ta ora ini, kʼoem ta koʼtantik te jaʼ te chaʼkuxajel ta achʼ balumilal. ¿Bin yuʼun te jich ya kaltike? Ta Job 17:16 jaʼnix jich ya yalbey skʼoplal te «tsʼuʼlum», te pajal skʼoplal sok te «stsobojibal machʼatic chamenic». Ta Daniel 12:2 ya yal ta swenta te chaʼkuxajel ya x-ayin liʼ ta Balumilal kʼalal ya xlaj te slajibal kʼajkʼal sok kʼalal kʼaxemix-a te Armagedón.
7. 1) ¿Bin swentail te ya xchaʼkuxajik yuʼun ya yichʼik skuxlejalik «scuenta sbahtel qʼuinal»? 2) ¿Bin yuʼun jaʼ lekxan te chaʼkuxajel-abi?
7 ¿Bin ya skʼan ya yal te Daniel 12:2 te kʼalal ya yal te ya xchaʼkuxajik yuʼun ya yichʼ «scuxlejalic scuenta sbahtel qʼuinal»? Ya skʼan ya yal-abi te machʼatik ya xchaʼkuxajik te ya xkʼot snaʼbeyik sba te Jehová sok te Jesús o ma skom sbaik ta snaʼbeyel sba sok ya schʼuunbeyik te smantal ta yorail te jmil jaʼbil ya xjuʼ ya sta kuxlejal ta sbajtelkʼinal (Juan 17:3). Jaʼ-abi jaʼ «te chaʼkuxajtesel te lekxane» ma spaj sok te chaʼkuxajtesel kʼot ta stojol chaʼoxtul ants winiketik ta nameye (Heb. 11:35). ¿Bin yuʼun? Melel te ants winiketik-abi chaʼlajik.
8. ¿Bin swentail te ay machʼatik «ya xbahtic ta qʼuexlal soc ta pʼajel sbahtel qʼuinal»?
8 Maba spisil te machʼatik ya xchaʼkuxajik ya skʼanik te pʼijubtesel yuʼun Jehová. Te albilkʼop ta Daniel ya yal te ay chaʼoxtul ya xchaʼkuxajik te «ya xbahtic ta qʼuexlal soc ta pʼajel sbahtel qʼuinal». Ta swenta te la skʼaxuntayik kʼope, te sbiilik maba ya yichʼ tsʼibayel ta libro yuʼun kuxlejal sok maba ya yichʼik te kuxlejal sbajtelkʼinal. Ya yichʼik «pʼajel sbahtel qʼuinal» o lajinel. Jich yuʼun ta Daniel 12:2 ya yal te bin ya xkʼot ta stojolik te machʼatik ya xchaʼkuxajik, jaʼ chikan te bin la spasik te kʼalal chaʼkuxajemikix-ae * (Apoc. 20:12). Ay machʼatik ya yichʼik kuxlejal sbajtelkʼinal sok ay yantik te maʼuke.
YA XPʼIJUBTESOTIK «TSOBOLIC TA BIN TOJ TA PASEL»
9, 10. 1) Jich bitʼil ya yal Daniel 12:3, ¿binxan ya xkʼot ta pasel kʼalal kʼaxemix-a te tulan wokolil? 2) ¿Machʼatik-a te «ya xtihl stsʼanabul te bin utʼil stsʼanabul te syaxal chʼulchan»?
9 (Kʼopona Daniel 12:3). ¿Binxan ya xkʼot ta pasel kʼalal kʼaxemix-a te «yorahil bayel wocol», te nopol ayixe? Ta Daniel 12:2 ay bin la yakʼ jnoptikix, sok ta versículo 3 ay binxan ya yakʼ jnoptik te ya xkʼot ta pasel ta patil kʼalal kʼaxemix-a te tulan wokolil.
10 ¿Machʼatik-a te «ya xtihl stsʼanabul te bin utʼil stsʼanabul te syaxal chʼulchan»? Te bin la yal te Jesús te ay ta Mateo 13:43 ya skoltayotik ta snaʼel. Jich la yal: «Ta yorail-abi, te machʼatik toj yoʼtanik kʼaxtome jich ya xtilik-a te bin-utʼil kʼajkʼal ta banti te Wentainel yuʼun te sTatike». Te kʼalal jich la yal te Jesús, jaʼ yak ta yalbeyel skʼoplal «te yal snichʼnab te Wentainele», te ya skʼan la yal te yermanotak te tsabilik te ya xbajtik ta Wentainel ta chʼulchan sok te Jesús (Mat. 13:38). Jich yuʼun te Daniel 12:3 jaʼ skʼoplalik te machʼatik tsabilik sok te bin ya xbajt spasik ta yorail te Wentainel ta jmil jaʼbil.
Te 144 mil ta tul jun-nax ya x-aʼtejik sok te Jesucristo ta spʼijubtesel te ants winiketik ta jmil jaʼbil. (Ilawil te párrafo 11).
11, 12. ¿Bin aʼtelil ya spasik te 144 mil ta yorail te jmil jaʼbil?
11 Te machʼatik tsabilik «ya spʼijubteslan tsobolic ta bin toj ta pasel». ¿Bin-utʼil ya spasik? Jaʼ kʼalal jun-nax ya x-aʼtejik sok te Jesucristo ta spʼijubtesel te ants winiketik liʼ ta Balumilal ta jmil jaʼbil. Te 144 mil ta tul ma jaʼuknax ya x-ochik ta ajwalil, jaʼnix jich ta sacerdoteetik (Apoc. 1:6; 5:10; 20:6). Ya skoltayik ta «slecubtesel te nacionetique» yuʼun jich kʼunkʼun ya xkʼotik ta tojil ants winiketik (Apoc. 22:1, 2; Ezeq. 47:12). ¡Ya x-akʼbotik bayal stseʼelil yoʼtanik te bin ya spasik te machʼatik tsabilike!
12 ¿Machʼatik-a te «tsobolic» ya xpʼijubtesotik «ta bin toj ta pasel»? Jaʼik te machʼatik ya xchaʼkuxajik, te machʼatik ya xkolik jilel ta Armagedón sok te alaletik ya x-ayinik ta achʼ balumilal. Ta slajibal te jmil jaʼbil, spisil te machʼatik ya xkuxinik ta Balumilal tojil ants winiketik ya xkʼotikix-a. Jich yuʼun, ¿bin-ora ya yichʼ tsʼibayel te sbiilik ta tinta ta libro yuʼun kuxlejalil te ma jaʼukix ta lápiz?
SLAJIBAL PRUEBA
13, 14. ¿Bin ya skʼan ya yakʼik ta ilel te tojil ants winiketik te ya xkuxinik ta Balumilal kʼalal mato yichʼojik-a te kuxlejal sbajtelkʼinal?
13 Juluk ta koʼtantik te ma skʼan ya yal te ya sta skuxlejal sbajtelkʼinal te machʼa tojil ants winike. Jnop kaʼiytik ta swenta te Adán sok te Eva. Tojil ants winiketik-a, pero ya skʼan ya yakʼik ta ilel te ya schʼuunbeyik skʼop te Jehová swenta ya staik te kuxlejal sbajtelkʼinal. Pero mel-oʼtantik sba te maba la schʼuunik te kʼope (Rom. 5:12).
14 Jich bitʼil la kiltikix, ta slajibal te jmil jaʼbil, spisil te machʼatik ya xkuxinik ta Balumilal tojil ants winiketik ya xkʼotikix-a. ¿Yabal yakʼ sbaik ta stojol te Jehová ta sbajtelkʼinal? O ¿jichbal ya spasik bitʼil te Adán sok te Eva, manchukme tojil ants winiketik-a maba jun yoʼtan la yakʼ sbaik? ¿Bin-nix-utʼil ya xkʼot ta pasel-a?
15, 16. 1) ¿Bin-ora ya yakʼik ta ilel spisil te ants winiketik te jun yoʼtanik ta stojol te Jehová? 2) ¿Bin ya xkʼot ta pasel ta slajibal prueba?
15 Te Satanás ya yichʼ makel jmil jaʼbil sok maʼyuk machʼa ya sloʼlayix-a. Pero ta slajibal te jmil jaʼbil ya yichʼ koltayel lokʼel tal sok ya xjajch sloʼlay te tojil ants winiketike. Ta prueba-abi, spisilik ya skʼan ya yakʼik ta ilel teme ya skoltaybeyik skʼoplal sbiil te Dios sok te bitʼil jaʼnax te Jehová mukʼ ajwalil stukel (Apoc. 20:7-10). Ta swenta te bin ya spasik, ya yakʼik ta ilel teme ya yichʼik tsʼibayel te sbiilik ta sbajtelkʼinal ta libro yuʼun kuxlejalil.
16 Ay chaʼoxtulik —ma jnaʼtik jaytul— te jich ya xkʼotik bitʼil te Adán sok te Eva, sok ya spʼajik te wentainel yuʼun Jehová. ¿Bin ya xkʼot ta stojolik? Te Apocalipsis 20:15 jich ya yal: «Te machʼatik maba tsʼibaybil sbiilik ta libro yuʼun kuxlejalil la yichʼik chʼojel ochel ta pamal kʼajkʼ te yak ta tilele». Jaʼ yuʼun, te jkʼaxunkʼopetik ya yichʼik lajinel ta sbajtelkʼinal. Pero jteb ma spisil te tojil ants winiketik ya xkʼax yuʼunik te slajibal prueba. Ya yichʼ tsʼibayel te sbiilik ta sbajtelkʼinal ta libro yuʼun kuxlejalil.
TA «YORAHIL SLAJIBAL» KʼAJKʼAL
17. ¿Bin albot te Daniel te ya xkʼot ta pasel ta jkʼajkʼaleltik? (Daniel 12:4, 8-10).
17 ¡Ya yakʼ stseʼelil koʼtantik spisil te bintik ya xkʼot ta pasel ta pajel chaʼbej! Jtul chʼul-abat jaʼnix jich ay bin mukʼ skʼoplal la yalbey te Daniel ta swenta te bin ya xkʼot ta pasel ta jkʼajkʼaleltik, ta «yorahil slajibal» kʼajkʼal (kʼopona Daniel 12:4, 8-10; 2 Tim. 3:1-5). Jich la yalbey te Daniel: «Ya xpʼohl te bintic ay ta naʼel». Jich yuʼun te lum yuʼun Dios ya xkʼotxan ta yoʼtan te albilkʼopetik te ay ta libro yuʼun Daniel. Te chʼul-abat ay binxan la yal ta swenta te yorail slajibal kʼajkʼal, jich la yal: «Te machʼatic chopolic stalel chopol ya xhilic, soc mayuc ni jtuhluc te machʼa chopol yoʼtan te ya snaʼbe scuentahil».
18. ¿Bin ya xkʼot ta stojol te machʼatik chopolik?
18 Ta jkʼajkʼaleltik, jich yilel te ya spas te bin ya skʼan yoʼtanik te machʼatik chopolike (Mal. 3:14, 15). Pero nopol ya yichʼix ta kʼop te Jesús te machʼatik jich kʼoemik bitʼil tentsunetik sok parte ya yakʼ te machʼatik jich kʼoemik bitʼil tuminchijetik (Mat. 25:31-33). Te machʼatik chopolike maba ya xkolik jilel ta yorail tulan wokolil ni jaʼuk ya xchaʼkuxajik ta achʼ balumilal. Sok maba tsʼibaybil sbiilik ta «libro yuʼun snaʼojibal» te ya yalbey skʼoplal te Malaquías 3:16.
19. ¿Bin ya skʼan ya jpastik ta ora ini, sok bin yuʼun? (Malaquías 3:16-18).
19 Ta kʼajkʼal ini ya skʼan ya kakʼtik ta ilel te maba tey ochem jkʼoplaltik ta grupo yuʼun te machʼatik chopolike (kʼopona Malaquías 3:16-18). Te Jehová yak ta stsobel te machʼatik «ha cʼulejalil» yuʼun o te machʼatik mukʼ skʼoplal ta yoʼtane. ¿Mabal jichuk te ya jkʼantik te tey ochem jkʼoplaltik-ae?
¡Ya xbajt yakʼbotik bayal stseʼelil koʼtantik kʼalal ya xchaʼkuxaj ta achʼ balumilal te Daniel, te machʼatik lajem kuʼuntik sok yantik ants winiketik! (Ilawil te párrafo 20).
20. ¿Bin albot ta jamal te Daniel, sok bin yuʼun awoʼtan te ya xkʼotix ta pasele?
20 Yakotikix ta kuxinel ta yorail te bayal bintik yak ta kʼoel ta pasel. Pero ay yanxan te bin ya xkʼot ta pasel te yan-nax ya kiltik-ae. Nopol ya yichʼix lajinel te bintik chopole. Ta patil, ya kiltik te ya xkʼot ta pasel te bin jamal la yal te Jehová ta stojol te Daniel: «Ta slajibal cʼahcʼal ya xhahchat yuʼun yac awichʼ te bin ya xcʼoht ta acuenta» (Dan. 12:13). ¿Awoʼtanixbal te ya xchaʼkuxaj te Daniel sok te machʼatik lajem awuʼune? Teme jiche, pasa tulan yuʼun jun awoʼtan ta stojol te Jehová sok jich ya yichʼ tsʼibayel te abiil ta libro yuʼun kuxlejal.
KʼAYOJIL 80 Ilawilik, kʼax lek yoʼtan te Jehová
^ Ta artículo ini ya yichʼ jamaltesbeyel skʼoplal te pʼijubtesel ya yichʼ akʼel te ya yal Daniel 12:2, 3. Ya kilbeytik skʼoplal bin-ora ya xkʼot ta pasel sok machʼatik ya xpʼijubteswanik. Jaʼnix jich ya kiltik bin-utʼil te pʼijubtesel-abi ya xkoltayotik ta slajibal prueba te machʼatik ya xkuxinik ta Balumilal, te kʼalal ya xlaj te Wentainel yuʼun Cristo ta jmil jaʼbil.
^ Jaʼniwan ya xjajchik ta chaʼkuxajel te machʼatik jun yoʼtan lajik ta slajibal kʼajkʼal sok ta patil te machʼatik lajik ta nailale. Teme jiche, kajalkaj tsʼumbalil ya yilik te machʼatik la snaʼtiklanbey sbae. Te Biblia ya yal te «xmelmon ya xchaʼkuxajik» te machʼatik ya xbajtik ta chʼulchan, jaʼ yuʼun ya kaltik te xmelmon ya xchaʼkuxajik te machʼatik ya xkuxinik liʼ ta Balumilal (1 Cor. 14:33; 15:23).
^ Te bin la yichʼ cholbeyel skʼoplal liʼ ini ma pajalukix sok te bin ya yal te capítulo 17 yuʼun te libro Prestemos atención a las profecías de Daniel sok te revista La Atalaya 1 yuʼun julio 1987, página 21 kʼalal ta 25.
^ Te kʼopetik «toj yoʼtanik» sok «maba toj yoʼtanik» te ya yal Hechos 24:15 sok te bin ya yal Juan 5:29 «te machʼatik la spasik te bintik leke» sok «te machʼatik la spasik te bintik chopole» jaʼ ya yalbey skʼoplal te bin la spasik te kʼalal mato lajemik-a te machʼatik ya xchaʼkuxajike.
