GU KEKEAPAI DU TIPA WISIGOHO 40
“Sa Dungu Yo sa Rurupai”
“Agu yo nisa dungu yo sa rurupai i akĩ wa akerekuru nye anye kindi.”—DAN. 12:3.
BIA 151 Ko Ayambahe
AGU APAI DU ROGO GI KEKEAPAI RE *
1. Gini weneapai nasungudo rani ti regbo Zogarago Tipa Agarã Kutu?
NAIRIWO gu bawene uru nika ngiaha re ho zingabekpio nika tona ni auru kpotosende ti regbo ga Kristo Zogarago Tipa Agarã Kutu! Agu aboro dunduko zanga gayo aboro rogo kpio yo na nyemu ka bi yo berewe. Kinawo du Yekova a. (Eyo. 14:15) Oni berẽnga pa wai aboro dunduko nika du na ngbarago auru kpotosende ho i nika zingisa gayo aboro ni be kpio. A wa ani awirikihe rogo gu kekeapai naadu mbata fu gere, gu “ruru aboro” du rimoyo ni kekehe rogo buku unga, nika gbia “gu zingabekpio nga ga unga.” (Amo. 24:15; Yo. 5:29) Isoke, badungu gu gaani aboro nakpiki nika duadu dagba agu aboro yo i nika zingisa yo * ngbutuko tingbafuo Aramegido. Kurigure, “iraira aboro,” wa aguyo naadunga na bakere momu beyo ka ino Yekova watadu ka irisoko ni ruruyo mbata fu i kpiki ya, i nika zingisa yo sa “gu zingabekpio nga ga sapangbanga.”
2-3. (a) A wa i nayuguhe rogo Yesaya 11:9, 10, gini bakere wirikapai kisusi rogo gu pangbanga yo nga ga aboro nika manga? (b) Gini apai ani nika sakapai tipaha rogo gi kekeapai re?
2 Si nika ida gupai nga i yugupai ayugo fu agi aboro dunduko i nika zingisa yo be kpio re. (Yes. 26:9; 61:11) Sidu, si nika ida gu bakere wirikapai kisusi rogo gu pangbanga yo nga ga aboro mangi. (Oni gedi Yesaya 11:9, 10.) Tipagine? Pai sa nga, gu iraira aboro i nika zingisa yo, si nika ida i wirikipai tipa Yesu Kristo, tipa ga Mbori Kindo, tipa ga Yesu motumo tumorii, tipa pa wai nyakipa rimo Yekova na tipa ndu gupai du kina ko sa na rengo beko ka zogarago ti ni. Zavura si nika ida ruru aboro wirikipai awirika tipa agu apai Yekova ninaayugo ho yeeye fu gako aboro nibipa gako ringbisapai tipa kpotosende. Kura gi ruru aboro re aima kpiko bakuru kusayo mbata fu ke Ziazia Kekeapai nyasi. Badungu apai iraira aboro gbiati ruru aboro nika wirikaha.
3 Rogo gi kekeapai re, ani nika wisigopai tipa agi asanahe re: Waigu i nika manga gi bakere sunge nga ga yugopai re? Waigu ga aboro mangaapai kuti gi sunge re nika du na maapai singia rimoyo nika du ni kekehe nyeanye kindi rogo buku unga yo watadu si adunga ni kekehe te? Agu akaragapai du kuti agi asanahe re ima du na nyanyakipaha furani areme. A wa ani nika bihe, kura wene sangbaanebi du ni kekehe rogo agu abuku nga ga Daniere na Yugoti nika undo na rugusa gaani giarogopaiyo nibipa gupai nika manga ho i nika zingisa kpikpi aboro ni be kpio. Ni bambataha, ani wisigingo pai tipa gu bawene apai i apehe kumbatayo rogo gu sangbanebi nga ga Daniere 12:1, 2.
“AGU YO NAAKPIKI KU NVUTU . . . YO AZÍNGA BEREWE”
4-5. Ginipai Daniere 12:1 ayugoho tipa yangara arame?
4 Oni gedi Daniere 12:1. Gu buku nga ga Daniere nayugopa gu gene wene apai nikaa manga ngbaha kina ti genehe ti yangara arame. Ni kpiapai, Daniere 12:1 nayugo gupai nga Mikaere du nga, Yesu Kristo, “naruga pa [ga Mbori] aboro.” Gu papara sangbanebi re atona digiso tihe rogo 1914 ho i amoi Yesu ni ni Bakindo ga Mbori Kindo ngbangbaturũ yo.
5 Ono tie, i ape gupai fu Daniere a nga, Yesu nika ‘gúari’ ti regbo ‘fuda, nga gu ngbatunga ha adu nga mbata wa gu re, tona wa rikaaboro aenge ki da ti gu rago re ya.’ Gi “fuda” re nga gu “bakere gberãngbi” i napepaha rogo Matayo 24:21. Yesu nika ru kuari watadu ka mangapai tipa ka banda ga Mbori aboro ti digido gi regbo fuda re, naida ka ya, ti regbo Aramegido. Gu buku nga ga Yugoti nafura tipa agi aboro re nga i nga “bakere rimbasa aboro nga aguyo naakuru rogo bakere gberãngbi.”—Yugo. 7:9, 14.
6. Ginipai nika manga tingbafuo bakere rimbasa aboro bati be bakere gberãngbi? Oni sakingo rogoyo. (Oni bi gu kekeapai a nga, “Asanahe be Agedihe” nibipa zingabekpio auru kpotosende, nga gu du rogo gi Ngbaõbambu Sinziri re.)
6 Oni gedi Daniere 12:2. Ginipai nika manga tingbafuo bakere rimbasa aboro bati ti gi regbo fuda re? Gi sangbanebi re afuranga tipa gu zingabekpio narukuba kurapai te, ono nga ka zingisa ga Mbori amoyambu berewe rogo toro yo nga gu namanga ti yangara arame wa gu ani agi rogoyo mbata te. * Mbata kusayo, ani aberẽ gupai nga Daniere 12:2 nafura tipa gu zingabekpio nga ga ngbangbaturũ watadu gu sonakumbatayo nga ga sunge tingbafuo gu regbo asogo rani ambedi ka rugusa sunge tungusapai ti ni rogo 1918. Ono tie, gu giarogopaiyo du ani na ni awere nga, agu afugo re nabipa gu zingabekpio nga ga kpikpi aboro nga gu nika manga rogo gu vovo zegino naye. Tipagine ani apehe ti ni wo? Gu fugo nga “nvutu,” i namangisunge na ni a rogo Eyobo 17:16, na rogoyo sa a na gu fugo nga “muro.” Mbiko gupai nga gu fugo nga “nvutu,” rogoyo sa na gu fugo nga “muro,” Daniere 12:2 nafura tipa ndikidi zingabekpio nga gu nika manga tingbafuo yangara arame naima digo na tingbafuo gu vura nga ga Aramegido.
7. (a) Rogo gini gene i nika zingisa gu kura aboro sa “nyenye unga”? (b) Tipagine du gi zingabekpio re ti ni ni bawene “zingabekpio”?
7 Ono tie, ginipai Daniere 12:2 aaida ka pehe ho si aya ni wẽ i nika zingisa kura aboro sa “nyenye unga”? Rogoyo nga, agu aboro i nika zingisa yo be kpio na i ki ye ka ino aYekova na Yesu watadu kini ndu kindi kumbatayo kaa ino yo na kini gisangba yo ti regbo agarã 1,000, i nika yeaye ki gbia nyenye unga. (Yo. 17:3) Gere nika ngia “wene zingabekpio” kisusi gu nadu bakuru kusayo nangia ga gu kura aboro i azingisiyo be kpio. (Eb. 11:35) Tipagine? Bambiko gu kpakpa aboro re aima ye ki kpi berewe.
8. Waigu i nika zingisa kura aboro “sa nyenye wasiro”?
8 Ono anga agu aboro dunduko i nika zingisayo be kpio nika ida gupai nga Yekova yugupai fuyo te. Gu sangbanebi nga ga Daniere nape gupai nga kura aboro kinaho i nika zingisa yo “sa nyenye wasiro.” Bambiko gupai nga i nika yugo gu toro nga ga samungu, i akenga rimoyo rogo buku unga yo te, na i agbianga nyenye unga te. Kuba gure, i nika gbia “nyenye wasiro,” watadu gbarasahe. Sidu, Daniere 12:2 nafura tipa gupai nika manga ni yangaraha tipa agu aboro dunduko i nika zingisa yo be kpio ringbisihe kuti gupai i nika mangaha tingbafuo gayo zingabekpio. * (Yugo. 20:12) Kura aguyo nika gbia nyenye unga; na ka agu akurayo agbianga ha ya.
‘SA DUNGU YO SA RURUPAI’
9-10. Gini kurapai nika manga tingbafuo bakere gberãngbi, na ada nikaa ‘kĩ imaima wa vuro ngbangbaturũ’?
9 Oni gedi Daniere 12:3. Gini kurapai nika manga tingbafuo gu “rago fuda” naye kumbatayo? Kupati Daniere 12:2, veresi 3 nafura tipa gu kurapai nga gu nika manga tingbafuo bakere gberãngbi.
10 Ada nikaa ‘kĩ imaima wa vuro ngbangbaturũ’? Matayo 13:43 naundo rani ani ini ada du nga agu aboro re ho si aya ni wẽ: ‘Ni gu rago re ruru aboro ahasa rago wa kina uru rogo ga Bayo ngbi yo.’ Nibi agu averesi du pati agi afugo re, Yesu aafura tipa “awiri ngbi,” du nga mbedimbedi awirinako, nga aguyo nika mangasunge na ko rogo gu Kindo nga ga ngbangbaturũ. (Mt. 13:38) Sidu, Daniere 12:3 nafura tipa mbedimbedi aKristano na gu sunge i nika mangaha ti regbo Zogarago Tipa Agarã Kutu.
Agu aboro du bangeyo nga 144,000 nika mangasunge mbembedi na Yesu Kristo tipa kaa rugapa gu sunge yugopai nika manga ti regbo agarã 1,000 (Oni bi genewaraga 11)
11-12. Gini sunge agu aboro du bangeyo nga 144,000 nika mangaha ti regbo agarã 1,000?
11 Waigu mbedimbedi aKristano nika ‘sa dungu yo sa rurupai’? Mbedimbedi aKristano nika mangasunge mbembedi kube kube na Yesu Kristo tipa kaa rugapa gu yugopai nika manga auru kpotosende ti regbo agarã 1,000. Agu aboro du bangeyo nga 144,000 amanganga sunge sa nikina abakindo te, ono i nika mangasunge amanga ni aboro motumo a. (Yugo. 1:6; 5:10; 20:6) Sidu, i nika undo na “husa aboro” na kini undo aboro yeeye i da ni rengberengbe yo berewe. (Yugo. 22:1, 2; Yeze. 47:12) Nairiwo gu pa ngbarago nika ngiaha re fu mbedimbedi aKristano!
12 Ada nika du dagba gu “dungu yo” i nika sa yo sa rurupai? Agi aboro re nika koda agu aboro i nika zingisayo be kpio na agu aboro a nika bata ti regbo Aramegido kodihe na agu agude i narengbe ka vunga yo rogo vovo zegino. Ti digido agarã 1,000, agu aboro dunduko nikaa raka auru kpotosende nika du ni rengberengbe yo. Sidu, ti gini regbo du i nika ke arimo yo nyeanye kindi na gu ime kepai agbandakanga ya rogo buku unga, angianga na gu wiringua kepai nagbandaka agbandaka ya?
YANGARA ASADA
13-14. Ginipai si nika ida gu rengberengbe aboro dunduko nika du auru kpotosende mangihe mbata fu i gbia nyenye unga?
13 Si naida ani tingidi gupai nga, du boro ni rengberengbe ni ayugongo gupai nga gu boro re nika gbia nyenye unga nibasa te. Oni berẽnga pa aAdamu na Eva. I adu ni rengberengbe yo, ono si aaida i yugu gayo giasangba fu Yekova Mbori mbata fu i fu nyenye unga fuyo. Na si nafu kina gberãrago nga i aagianga sangba ko te.—Rom. 5:12.
14 Ginipai nika du tipa agu aboro nika du auru kpotosende ti digido agarã 1,000? Aboro dunduko nika du ni rengberengbe yo. Ya mo gu rengberengbe aboro re dunduko nikaa songoda ga Yekova zogarago ngba rengberengbe gene nyeanye kindi? Watadu kura aboro kinaho nika du wa aAdamu na Eva, nga aguyo naaye ka zanga du ni ruruyo si ki vura du vurũ nga i angia rengberengbe aboro? Si nika ida akaragapai aida kuti agi asanahe re, ono wai?
15-16. (a) Ti gini regbo ngbatunga aboro dunduko nika gbia momu ka yugo gayo padu ni ruruse fu Yekova ti ni? (b) Yangara sangbana gi asada re nika ngia gine?
15 I nika kiso Satana tipa agarã 1,000. Ti gu regbo re, ko adunga na rengba ka nanga aboro te. Ono tie, ti digido agarã 1,000, i nika kusa Satana bambukiso yo. Fuo gure, ko nika asada ka nanga rengberengbe aboro. Ti regbo gu asada re, rengberengbe aboro dunduko auru kpotosende nika du na momu beyo ka yugoho ziazia singia i nairisa rimo Mbori na kini songodi gako zogarago. (Yugo. 20:7-10) Gupai i nikaa mangaha ti gu regbo re nika yugoho singia si naida i ke rimoyo nyeanye kindi ku rogo buku unga yo.
16 Ziazia Kekeapai nape gupai furani nga kura aboro kinaho nika zanga du ni ruruyo wa Adamu na Eva, na i nika ká ga Yekova zogarago. Ginipai nika mangayo? Yugoti 20:15 nape gupai furani nga: “Ka i abi nga rimo gu ni rogo kitabu unga yo ya, i ba ni ku rogo ngirimo we yo.” Ii, i nika gbarasa agi asamungu re kusayo nyeanye kindi. Ono badungu rengberengbe aboro nika du na diabese rogo gi yangara asada re. Fuo gure, i kini ke rimoyo nyeanye kindi rogo buku unga yo.
TI “DIGIDA RAGOHO”
17. Ginipai i apehe fu Daniere nga si nika manga ti gaani regbo? (Daniere 12:4, 8-10)
17 Nairiwo wai duhe nipa ngbarago ka berãpa agi apai nika manga kumbatayo re! Ono tie, maraika aima pepa kura nyanyakipa pai fu Daniere nibipa gaani regbo, du nga, ‘digida rago.’ (Oni gedi Daniere 12:4, 8-10; 2 Tim. 3:1-5) Maraika agumba gupai fu Daniere nga: ‘Ndikidi inahe amáa pai.’ Nirengo, si adu nga ga Mbori aboro nika giarogo agu afugo sangbaanebi du rogo gako buku yo wenengai gbe. Maraika agbia kurapai kuti ni nga, ti gu regbo re “gbegberẽ yo amánga pai ni gbegberẽ he. A nga gu ni sa dagba gbegberẽ yo yo nikaruga tini na pai te.”
18. Ginipai nika manga tipa gbegberẽ aboro barambeda?
18 Areme, si ima rengba kaa ngera wa i afunga mbusa fu gbegberẽ aboro tipa gayo gbegberẽ mangaapai te. (Mara. 3:14, 15) Ono bara mbeda, Yesu nika sapangbanga aguyo du wa ameme na ki kpara yo ti agu aboro du wa akandoro. (Mt. 25:31-33) Gi gbegberẽ aboro re abatanga ti regbo bakere gberãngbi te, na i azingisanga yo a be kpio ku rogo vovo zegino te. Rimoyo adunga rogo gu “kitabu tingidapai” i napepa ha rogo Maraki 3:16 te.
19. Awere nga regbo furani tipa ani mangi ginipai, na tipagine? (Maraki 3:16-18)
19 Awere nga regbo furani tipa ani yugu gupai nga ani dagba gbegberẽ aboro te. (Oni gedi Maraki 3:16-18.) Yekova nadungura agu aboro ko abi yo ni “ũkumuko,” naida ka ya agu aboro du na nyanyakipa yo fuko. Ani naida aida ni rengo kadu dagbayo.
Nairiwo wai si nika du ni pa ngbarago ka bi Daniere, gaani aboro, gbiati kura badungu aboro i ‘naru kuari’ rogo kina gu ba i aringbisihe fuyo rogo vovo zegino! (Oni bi genewaraga 20)
20. Gini yangara kidohe i amangihe fu Daniere, na tipagine mo angera ti ni kumbatayo tipa digisidigisi gu kidohe re?
20 Nirengo, ani naraka ti wene aregbo. Ono tie, badungu weneapai kindi koyo ata manganga ya, nga gu nika manga barambeda. Barambeda, ani nika bi wai i nika digiso gbegberẽ apai dunduko. Tingbafuo gure, ani nika bi digisidigisi gu ga Yekova kidohe ko afuhe fu Daniere nga: “Ti digida agu arame re mo ki ru rogo kina gu ga ba i aringbisi he foro.” (Dan. 12:13) Ya mo mo na nyemu gu regbo tiro ho Daniere gbiati gu gamo aboro naakpiki nika ‘ru kuari’ ni berewe? Ka ngia wo duhe, mo mangipai na omero dũ awere tipa kadu niruru ro, na mo rengbe kadu na gu kido nga rimoro nika nyeanye ni kekehe rogo ga Yekova buku unga yo.
BIA 80 “Oni Hia Yekova ka Bi Wene Ko”
^ Gi kekeapai re na vovo giarogopaiyo nibipa gu bakere mbakadapai nga ga wirikapai kisusi i nafura tipaha rogo Daniere 12:2, 3. Ani nika wisigopai tipa gu regbo gipai re nika manga ti ni na ada si nika koda yo. Ani nika bi wai a gi mbakadapai nga ga wirikapai re nika mbakada agu aboro nika du auru kpotosende tipa yangara asada ti digido ga Kristo Zogarago Tipa Agarã Kutu.
^ Zingabekpio rengbe ka tona na agu aboro nakpiki ni ruruyo ti yangara arame na fuo gure, i kini ru ka zingisa agu aboro nakpiki mbata fuyo, i nikaa zingisa badona rikaaboro fuo arikaaboro. Ka ngia wo du si nika du, ai badona rikaaboro nika du na momu beyo ka dia agu aboro kugume i aima ino yo nitiyo. Singia ginigu nga ginigu, Ziazia Kekeapai nape gupai nga i nikaa zingisa aboro “ti kina ragoyo” ho si afura ni tipa gu zingabekpio nga ga ngbangbaturũ, na ani ima rengba ka berã gupai a nga gu zingabekpio nga ga kpotosende nika manga kina ti genehe.—1 Kor. 14:33; 15:23.
^ Gi sakarogopaiyo re nga ariapai rogo gu giarogopai yo du rogo gu buku nga Pay Attention to Daniel’s Prophecy! kapita 17, na rogo gu Ngbaõbambu Sinziri nangia ga Bamburu 1, 1987, kpe. 21-25, rogo pa-Ngirisi.
^ Ono tie, agu afugo nga “ruru aboro” na “iraira aboro” nga gu du rogo Amokedi 24:15 na agu afugo nga “agu yo nanamanga wenepai” na “agu yo nanamanga gbegberẽpai” du rogo Yoane 5:29 nafura tipa gu mangaapai agu aboro i nika zingisayo be kpio amangihe mbata fu i kpiki.
