Coob Tus Muaj Tus Mob Puas Siab Puas Ntsws
“Txawm kuv twb tsis ua dab tsi los kuv yeej txhawj xeeb tas li.”
“Thaum twg kuv zoo siab kiag xwb ces kuv pib txhawj. Rau qhov kuv paub tias tom qab ntawd kuv yeej yuav nyuaj siab.”
“Txhua hnub, kuv tsuas tsom ntsoov txog tej uas kuv yuav tau ua rau hnub ntawd xwb. Tiam sis tej thaum, kuv cia li mus txhawj txog tag kis nag kis puag nrauv.”
Cov lus no yog hais los ntawm cov uas muaj tus mob puas siab puas ntsws. Koj los sis ib tug uas koj paub puas tau xav ib yam li lawv xav thiab?
Tsis yog koj tib leeg xwb muaj tus mob puas siab puas ntsws. Yeej muaj coob tus muaj tus mob no.
Peb nyob rau ib lub sij hawm uas “kev ntxhov siab” los raug coob tus. (2 Timautes 3:1) Muaj ib co neeg tshawb pom tias ib tug ntawm yim leej muaj tus mob puas siab puas ntsws. Nyob rau xyoo 2020, vim muaj tus kab mob khaus viv-19 (COVID-19) kis thoob qab ntuj, tib neeg thiaj yim huab muaj kev txhawj xeeb thiab kev nyuaj siab ntau dua xyoo 2019.
Yog li, yeej tseem ceeb rau peb paub tias peb thiab peb tsev neeg yuav tau ua li cas, sawv daws thiaj noj qab nyob zoo.
Kev puas siab puas ntsws yog dab tsi?
Thaum ib tug noj qab nyob zoo ces nws ua dab tsi los nws yeej ua tau. Tiam sis tus uas puas siab puas ntsws muaj kev nyuaj siab ntau dhau, nws ua ib yam dab tsi los nws tsis qab siab ua, nws nyiaj tsis taus kev ntxhov siab, thiab tsis muaj kev kaj siab lawm.
Tus mob puas siab puas ntsws:
-
Cov uas muaj tus mob no xav tias yog tim lawv zoo tsis txaus. Tiam sis TSIS YOG LI NTAWD.
-
Tus mob no YOG THAUM kws kho mob pom tias ib tug neeg muaj ib txoj kev nyuaj siab loj dhau uas cuam tshuam nws txoj kev xav thiab nws tus cwj pwm.
-
Tus mob no ua rau ib tug ntaus phooj ywg nyuaj nrog lwm tus, thiab ua tsis tau tej yam uas nws niaj hnub ua.
-
Tus mob no yeej los raug txhua leej txhua tus, tsis hais tus laus tus hluas, tus muaj tus pluag, tus ntse tus ruam, hais yam lus twg, haiv neeg twg los sis ntseeg txoj kev ntseeg twg.
Nrhiav kev pab rau tus mob puas siab puas ntsws
Yog ib tug twg coj tus yam ntxwv txawv lawm, pw ntau dhau los yog pw tsis tsaug zog, noj mov tsis qab los sis noj ntau dhau, pheej tu siab, nyuaj siab, los sis pheej txhawj tas li, ces tej zaum nws yuav tau mus nrhiav kev pab. Nws yuav tau mus cuag kws kho mob seb yog vim li cas nws thiaj li muaj tej no. Tiam sis nws yuav mus nrhiav kev pab qhov twg?
Yexus Khetos yog ib tug neeg uas muaj tswv yim zoo tshaj plaws, nws hais li no tias: “Cov neeg tsis muaj mob yeej tsis mus cuag kws kho mob, cov uas muaj mob thiaj mus xwb.” (Mathais 9:12) Cov uas muaj mob, yog lawv mus cuag kws kho mob thiab tau kev pab los sis tau tshuaj noj, yuav pab tau lawv tus mob thiab pab kom lawv qab siab ua neej. Yog thaum ib tug noj tsis qab haus tsis zoo tau ntev loo lawm, cia li maj nroos mus nrhiav kev pab. a
Txawm phau Vajlugkub tsis yog ib phau ntawv qhia txog kev kho mob los, tej lus nyob rau hauv yeej pab tau peb. Phau ntawv no qhia tias phau Vajlugkub yuav pab peb thev taus kev puas siab puas ntsws.
a Phau Tsom Faj tsis yog txhawb kom nej mus nrhiav ib txoj kev kho mob twg. Nyias yuav tsum tau ua tib zoo txiav txim siab rau nyias tus kheej.
Tej Yam No Yuav Pab Tau Koj Thiab
LUS NUG THIAB LUS TEB TXOG PHAU VAJLUGKUB
Phau Vajlugkub Puas Daws Tau Peb Tej Kev Nyuaj Siab?
Vajtswv qhia txog 3 txojkev uas pab tau peb nyiaj dhau tej kev nyuaj siab.
ESSENTIAL BIBLE TEACHINGS
Ua Li Cas Vajtswv Cia Muaj Kev Txom Nyem?
Phau Vajlugkub qhia peb seb yog ua li cas tiag.
NTSIG TXOG PEB
Rau Npe Kawm Vajlugkub
Kav tsij rau npe yog koj muaj dab tsi xav nug Yehauvas Cov Tim Khawv los sis xav paub seb Yehauvas Cov Tim Khawv ntseeg li cas.
