Penanggul ba Pengerai Mental di Serata Dunya

TEBAH

“Aku suah berasai amat irau, taja pan maya aku semina duduk kediri ba dalam bilik.”

“Lebuh aku berasai amat-amat gerai, aku irau. Laban aku nemu, pengudah aku berasai ‘amat gaga,’ udah nya aku ‘balat tusah ati.’”

“Aku nguji fokus ngagai siti utai aja dalam sehari. Tang kekadang, enda memukai aku ulih berasai irau ketegal utai bukai.”

Kati nuan empu ngasaika utai ke disebut ditu? Tauka nuan nemu sapa-sapa orang ke dikesayauka nuan mega ngasaika utai tu?

Kingatka, nuan enda kediri. Mayuh orang kemayaharitu mega napi penanggul ba pengerai. Enda ngira nya sida empu tauka orang ke dikesayauka sida.

Endang amat, kitai diau ba “maya ti balat jai sereta balat tusah,” ke ngasuh mayuh pemerinsa nyadi. (2 Timoti 3:1) Nitihka siti pansik, ba serata dunya kira-kira siku ari lapan iku orang napi penanggul ba pengerai mental. Ketegal COVID-19, ba taun 2020 enti dibandingka enggau 2019, nambah 26 peratus orang ke kena sakit balat irau (anxiety) lalu kira-kira nambah 28 peratus orang ke kena kemurungan.

Taja pan riput pasal penyakit tu penting, tang iya ke penting agi iya nya, chara nuan enggau orang ke dikesayauka nuan ulih ngelaban nya.

Nama reti penanggul ba pengerai mental?

Suah iya, orang ke nadai napi penanggul ba pengerai mental ulih berunding enggau manah. Sida ulih ngelaban stress ke biasa nyadi, kereja enggau manah, sereta berasai puas enggau pengidup.

Penanggul ba pengerai mental . . .

UKAI nunjukka orang nya lemi.
TU penyakit ke ngachau runding, emosi enggau ulah ti enda tetagang.
Tu ulih ngasuh sesiku orang tusah deka begulai enggau orang bukai sereta ngaduka pengawa ninting hari.
Tu ulih nyadi ba sapa-sapa aja, enda ngira umur, budaya, bansa, agama, pelajar tauka penatai pemisi sesiku orang.

Giga meh bantu

Kekadang sesiku orang berengkah berubah perangai, kurang tinduk tauka kelalu balat tinduk, kurang makai tauka kelalu balat makai, tauka berengkah balat irau sereta tusah ati. Enti sema tu bisi nyadi, orang nya patut minta bantu ari pakar ke nemu pasal penyakit tu, ngambika iya nemu kebuah utai tu nyadi, lalu baka ni ulih mutarka nya.

Mensia ke pemadu pintar iya nya Jesus, kala madahka, “Orang ke gerai enda begunaka lutur, tang semina orang ke sakit begunaka lutur.” (Matthew 9:12) Orang ke bisi napi penyakit tu, tang udah nerima bantu ari pakar sereta makai ubat ti betul ke ulih ngurangka pemedis nya, ulih neruska pengidup sida enggau mujur sereta gaga ati. Enti pemedis tu majak balat sereta dalam timpuh ti panjai, anang meh betangguh ngiga bantu berubat. a

Bup Kudus ukai bup kena berubat. Tang, iya ngembuan jaku ke ulih meri penguntung enti sema napi penanggul ba pengerai. Kami meransang nuan beratika artikel ti nangkanka tu, pasal chara baka ni Bup Kudus ulih nulung kitai napi penanggul ba pengerai.

a Majalah Menara Jaga tu enda madahka enggau nyemetak chara berubat ke patut digaga. Tiap iku orang patut bejimat beratika chara berubat ti ngena ba sida sebedau ngaga pemutus.