Aʼin nekeʼxye li kristiʼaan li nekeʼkʼeheʼk saʼ chʼaʼajkilal xbʼaan li xkʼaʼuxebʼ. Ma ak xaakʼul junsutaq aʼin malaj nakaanaw ru junaq li qas qiitzʼin li yook ajwiʼ xkʼulbʼal aʼin?

Wi joʼkan, ma nakaanaw naq moko kaʼaj tawiʼ laaʼat nakatkʼuluk re aʼin? Saʼ chixjunil li ruuchichʼochʼ, naabʼalebʼ li qas qiitzʼin yookebʼ chi yajerk xbʼaan li xkʼaʼuxebʼ malaj rahebʼ saʼ xchʼool xbʼaan naq ebʼ li xkomon yookebʼ xkʼulbʼal li chʼaʼajkilal aʼin.

Chʼolchʼo naq wanko «saʼ rosoʼjikebʼ li kutan» li qʼaxal chʼaʼaj xnumsinkil, joʼkan naq wank naabʼal li kʼaʼaq re ru li nakʼehok qakʼaʼuxl ut xrahil qachʼool (2 Timoteo 3:1). Naq li nimla molam chirix li kawilal (OMS) xtzʼil rix aʼin, xkʼutbʼesimank naq jun rehebʼ waqxaqibʼ chi kristiʼaan saʼ chixjunil li ruuchichʼochʼ wankebʼ xyajel xbʼaan li xkʼaʼuxl. a Saʼ xkʼabʼaʼ li COVID-19, saʼ li chihabʼ 2020 li kristiʼaan li xeʼyajerk xbʼaan li xkʼaʼuxebʼ kixqʼax li 26% chiru li chihabʼ 2019. Ut li xkʼihalil li kristiʼaan li xeʼyajerk xbʼaan li xnimal ru rahil chʼoolej (depresión grave) kixqʼax 28%.

Xnawbʼal jarubʼ li qas qiitzʼin yookebʼ xkʼaʼuxl ut xrahil xchʼoolebʼ wank xwankil abʼan qʼaxal wank wiʼ chik xwankil xnawbʼal kʼaru li naʼlebʼ tixbʼaanu naq laaʼat ut laakomon sa teʼrekʼa ribʼ.

Naq junaq li kristiʼaan maakʼaʼ nachʼiʼchʼiʼink re li xkʼaʼuxl, sa narekʼa ribʼ ut naru xbʼaanunkil chiʼus li xkʼanjel rajlal kutan. Naru xqʼaxbʼal ru li nakʼehok xkʼaʼuxl ut sa saʼ xchʼool saʼ li xyuʼam.

• Moko nakʼulmank ta saʼ xkʼabʼaʼ naq xaabʼaanu junaq li naʼlebʼ li inkʼaʼ us.

• Aʼan bʼan jun li yajel li naxkʼam chaq naabʼal rahil chʼoolej choʼq re junaq li kristiʼaan ut naxpoʼ chanru narekʼa ribʼ, nanaʼlebʼak ut nakʼoxlak.

•   Nekeʼchʼaʼajkoʼk chiru xsikʼbʼalebʼ ramiiw joʼ ajwiʼ li nekeʼxbʼaanu rajlal kutan.

• Chixjunil naru teʼxkʼul aʼin, maakʼaʼ naxye li xchihabʼebʼ, li xtenamitebʼ, li xwanjikebʼ, li xpaabʼalebʼ, li xtzolbʼalebʼ, ma wankebʼ xtumin malaj inkʼaʼ.

Wank sut junaq li kristiʼaan naʼok chi jalaak xnaʼlebʼ, junes wark chik naraj malaj inkʼaʼ chik nawark. Naʼok chi waʼak chi naabʼal malaj inkʼaʼ chik nawaʼak, naʼok ajwiʼ naabʼal xkʼaʼuxl malaj narahoʼk saʼ xchʼool. Wi aʼin nakʼulmank, maare t-ajmanq naq tixsikʼ xtenqʼ re xnawbʼal kʼaʼut yook xkʼulbʼal aʼin ut chanru xtuqubʼankil ru. Abʼan, bʼar naru tixtaw li xtenqʼ?

Li winq li qʼaxal naabʼal xnawom li kiwank saʼ Ruuchichʼochʼ, aʼ li Jesukriist, kixye: «Inkʼaʼ nekeʼraj aj bʼanonel li kawebʼ, aʼebʼ bʼan li yaj nekeʼajok re» (Mateo 9:12). Laj bʼanonel naru tixtenqʼa re naq tkotzq li xrahilal, twanq wiʼ chik joʼ kiwank chaq junxil ut sahaq saʼ xchʼool. Wi chʼolchʼo chaawu naq aʼin li yookat xkʼulbʼal malaj najter xat-ok rekʼankil, aajel ru naq taasikʼ aatenqʼ saʼ junpaat. b

Li Santil Hu maawaʼ jun li hu li naʼaatinak chirix chanru tatbʼaneʼq, abʼan saʼ xkʼabʼaʼ naq chalenaq rikʼin li Yos naru tatxtenqʼa re naq inkʼaʼ tnumtaaq laakʼaʼuxl. Saʼebʼ li junchʼol chik li tzolom tooʼaatinaq chirix chanru li Santil Hu naru nokooxtenqʼa chi xqʼaxbʼal ru li nakʼehok xyajel li qakʼaʼuxl. Naqaj naq taawil.