Salud mental unguita charij gentecunami chashna comentariocunata nishca. ¿Quiquinbashchu tal vez paicunashna sintiringui o pitapash shina sintirijta rijsingui?

Shina cashpaca, na quiquinllachu chashna sintiripangui. Mundo enteropi ashtaca gentecunami, salud mental unguihuan sufrinajun o familiamanda pipash shina unguihuan sufrijujpimi llaquilla can.

Chashna pasajujta ricushpami, ‘na aguantai ushanalla tiempopi’ causanajushcata ricupanchi (2 Timoteo 3:1). Chaimandami ashtaca cosascuna ñucanchitaca ninanda llaquinchi. Organización Mundial de la Salud nishcashnaca, mundo enteropica 8 personacunamandaca, shuj personami salud mental unguihuan sufrin. Shinallata huata 2020​pi, COVID-19 pandemiamandaca ansiedad unguica 26 porcientomi mirarca. Cutin trastorno depresivo grave unguica 28 porcientomi mirarca.

Shinapash cai unguihuan mashna gentecuna sufrijushcatallaca na ricunachu canchi. Chaipa randica, quiquinda, quiquinba familiatapash ima ayudai ushashcata yachanami ashtahuan importante can.

Salud mental unguita na charijcunaca alimi sintirin. Imata rurana cajpipash tranquilo ruranllami. Ima problema ricurijpipash aguantai ushanllami. Ima trabajota rurashpapash uchalla, alimi ruran. Paipa vidahuanbash contentomi sintirin.

• NA debilmanda canllu.

• Cai unguitaca doctormi tratana can. Na shina rurajpica, cai unguica ninandami llaquichita ushan. Paicunapa yuyaita, pensamientocunata, comportamientotapashmi afectaita ushan. Emocionalmentemi ninanda llaquichin.

•   Casi siempremi pihuanbash tandanajungapaj, paicunapa responsabilidadcunata pactachingapapash problemacunata charin.

• Cai unguica ima edadta, ima religionda charijpipash, runa, mishu o yana cajpipash, estudiashca o na estudiashca cajpipash, pobre o charij cajpipash pitapashmi japita ushan.

Huaquinbica paicunapa causaipi, comportamientopi, alimentacionbi o puñuipi huaquin cambiocunata chari callarin. O ña unaillatami llaquilla, preocupado o manllaihuan sintirin. Quiquinllata o pipash shina sintirijta yachashpaca, uchallami doctorpa ayudata mascana can. Doctormi imamanda shina cashcata, imashina ayudanata ninga. Pero ¿maipita ayudata tari ushanchi?

Alipacha yachaita charij Jesusca nircami: “Sano gentecunaca doctortaca na minishtinllu. Pero ungushca gentecunaca minishtinmi” nishpa (Mateo 9:12). Salud mentalmanda especialistacunapa ayudahuanmi, shuj personaca uchalla mejorashpa cutin cushilla, contento caita ushanga. Cai unguipa sintomacunata sintishpa o unaillata charishca cashpaca, uchallami shuj doctorpa ayudata mascana can. a

Bibliaca jambicunamanda parlaj libroca na canllu. Shinapash, Bibliapi consejocunaca ali salud mentalta charichunmi ayudaita ushan. Cai revistapa cati temacunaca, salud mentalpa problemacunata imashina chimbapurai ushanatami parlan. Liichunmi animapanchi.