Leza Ulamubikkila Maano
BBAIBBELE lilijisi lulayo lwiinda kubota nkaambo lizwa kuli Leza. Talili bbuku lyaamba zyabusilisi, pele lilakonzya kutugwasya kuliyumya ciindi notutyompedwe kapati, notwanyonganizyigwa mumizeezo, notujisi mapenzi aakumubili, alimwi aciindi notwaciswa bulwazi bwamumizeezo.
Pele kwiinda zyoonse, Bbaibbele litusyomezya kuti Mulengi wesu, Jehova Leza, a ulaimvwisya mizeezo yesu alimwi ambotulimvwa kwiinda muntu uuli woonse. Ulilibambilide kutugwasya mumapenzi aali woonse ngotukonzya kujana. Mucikozyanyo, amulange-lange zibalo zyobilo zyamu Bbaibbele zyuumbulizya:
“Jehova ulaafwaafwi abaabo batyompedwe mumoyo; aabo bapengede mumizeezo ulabafwutula.”—INTEMBAUZYO 34:18.
“Mebo nde Jehova Leza wako, ndilikujatide kujanza lyako lyalulyo, ndendime Yooyo uukwaambila kuti, ‘Utayoowi pe. Mebo ndilakugwasya.’”—ISAYA 41:13.
Pele ino mbuti Jehova mbwatugwasya kuliyumya ciindi notwaciswa bulwazi bwamumizeezo? Mbubonya mbomutiibone muzibalo zitobela, Jehova ulatondezya kuti ulatubikkila maano munzila zinji zigwasya.
a Jehova ndezina lya Leza limugeme.—Intembauzyo 83:18.
