2 | ‘Bup Kudus Meri Kitai Peransang’
KU BUP KUDUS: “Semua utai ke udah ditulis dulu kelia ba Bup Kudus endang ditulis kena ngajar kitai, laban Bup Kudus nulung kitai betan sereta meri kitai peransang. Nya alai, kitai andal nganti utai ke deka diberi Petara jemah ila.”—ROME 15:4.
Reti Iya
Bup Kudus ngembuan jaku ti meransang ke ulih nulung kitai bulih pengering sereta betan ngelaban runding ti negatif. Bup Kudus mega bisi nyebut pasal harapan ti madahka dudi hari nadai agi pemerinsa ba emosi.
Baka Ni Tu Ulih Nulung?
Semua kitai kala berasai tusah ati. Tang, orang ke bisi kemurungan tauka bisi penyakit balat irau engka seruran berasai tusah ati. Baka ni Bup Kudus ulih nulung?
Bup Kudus ngembuan mayuh jaku ti positif ke ulih nganti runding ti negatif. (Pilipi 4:8) Tu ulih ngisi runding kitai enggau utai ti meransang sereta ngelantangka ati kitai. Enggau chara tu, kitai ulih nagang emosi diri empu.—Masmur 94:18, 19.
Bup Kudus ulih nulung kitai ngelaban runding ke ngumbai diri nadai guna.—Luke 12:6, 7.
Mayuh ari ayat Bup Kudus ngasuh kitai andal, kitai enda kediri. Lalu, Petara kitai amat-amat ulih faham asai ati kitai.—Masmur 34:18; 1 John 3:19, 20.
Bup Kudus besemaya, Petara deka muai semua pengingat ti enda manah. (Isaiah 65:17; Pemandang 21:4) Lebuh kitai merinsa ba runding sereta emosi, kitai ulih ngasaika semaya tu meri kitai pengering kena neruska pengidup.
Nuan Engka Rindu Meda Tu
SAUT NGAGAI TANYA PASAL BUP KUDUS
Kati Ulih Aku Tetemuka Jaku ti Ngelantangka Ati dalam Bup Kudus?
Ayat Bup Kudus ke udah ngelantangka ati mayuh orang ke bisi penanggul sereta tekanan ba emosi.
