Bible kekɔ la tokanyi efula t’esambelo takoka tosha ekeketshelo ndo ekikelo keso la tɔ ohomba dia ndɔshana la tokanyi ta kɔlɔ. Losango la lo Bible toshaka nto elongamelo k’ɔnɛ keem’edja paa ya lo yimba yanga nshila.

Sho tshɛ diɛnɛka l’awui wa sha paa efula lo ntena dimɔtshi; koko wanɛ wasowa la hemɔ k’ɔkɔmwɛlɔ kana ekiyanu mbeyaka monga ko wekɔ lo ndɔshana l’ɔkɔmwɛlɔ wa lo yimba kana ekiyanu lushi tshɛ. Ngande wakoka Bible kokimanyiya?

• Bible mbishaka tokanyi efula t’amɛna takoka pɛnyama la tokanyi ta kɔlɔ. (Filipɛ 4:8) Tɔ koka ndodia yimba yaso la tokanyi takeketsha ndo tatutadia asolo takoka tokimanyiya dia mbahemɛ nsaki yaso.—Osambo 94:18, 19.

• Bible koka tokimanyiya dia ntshika nkanyiya ɔnɛ sho bu ohomba.—Luka 12:6, 7.

• Avɛsa efula wa lo Bible toshikikɛka dia sho bu ekalema ndo ɔnɛ Nzambi, Otungi aso shihodiaka tshɛ lo tshɛ woho wayaokaso.—Osambo 34:18; 1 Joani 3:19, 20.

• Bible tolakaka dia Nzambi ayanga nkomiya awui tshɛ watosha paa lo yimba. (Isaya 65:17; Ɛnyɛlɔ 21:4) Etena kadiɛnɛso la tokanyi tasha paa, sho koka mɛna dia daka sɔ koka tosha wolo wa mbikikɛ.