1. Pou ki wézon an chay moun pa ni konfyans an Bib-la?

 JÒDI, an chay moun pa sav ki moun pou mété konfyans yo adan. Yo pa sav si moun yo ni wèspé pou tèl kon, politisyen, siyantis ében nonm biznis vwéman mélé épi yo. Apa di sa, moun pa ni pyès wèspé pou mèt wilizyon. Kon sa, i pa ka sipwi nou yo pa ni konfyans an Bib-la, liv-la mèt wilizyon di yo ka sèvi.

2. An ling épi Sam 119:160, ki asiwans nou sipozé ni?

² Kon sèvant Jéhova, nou asiwé Jéhova sé ‘Dyé lavéwité-aʼ èvèk i toujou vlé sa ki pli mèyè pou nou. (Sam 31:5; Izay. 48:17) Nou sav nou sa konfyé tout sa ki ékwi an Bi-la paski ‘tout sistans pawòl [Bondyé] sé lavéwitéʼ. b (Li Sam 119:160.) Nou ka dakò épi sa an nonm ki ni gwo endikasyon té di. I té di: “La pa ni pyès chans Bondyé sa manti èk la pa ni pyès chans sa i di pa kay fèt. Pèp Bondyé sa konfyé Pawòl li, paski yo ka konfyé Dyé-a ki wèskonsab pou sa ki ékwi an Bib-la.”

3. Kisa nou kay konsidiwé an atik sala?

³ Bon, nou ni konfyans an Bib-la, mé, ki mannyè nou sa édé lézòt pou ni menm konfyans sala? An atik sala nou kay konsidiwé twa (3) wézon nou sa konfyé Bib-la. Sé wézon sala sé: (1) tout sa ki ékwi an Bib-la aplon, (2) pwofèsi ki ékwi an Bi-la ka fèt vwé, èk (3) Bib-la ni pouvwa pou chanjé lavi moun.

4. Pou ki wézon adan moun ka kwè konmisyon-an ki an Bib-la chanjé?

⁴ Jéhova sèvi apipwé kawant (40) nonm pou ékwi Bib-la. Mé sé bagay-la yo té ékwi Bib-la asou pa té sa diwé pou an chay tan. Konsa, jòdi jou nou pa ni pyès sé manniskwit-la yo té sèvi pou ékwi Bib-la. c Sèl sa nou ni sé kòpi. Alò yo ka sèvi yon kòpi pou fè lòt kòpi. Sé pou wézon sala adan moun ka kwè konmisyon-an ki an Bib-la chanjé. Yo ka di, pitèt sa ki an Bib-la apwézan sé pa menm bagay-la sé kawant (40) nonm-lan té ékwi. Ès ou janmen katjilé ki mannyè nou asiwé enfòmasyon-an ki an Bib-la pa chanjé?

5. Kisa yo té ka fè lè yo té ka kòpi pòsyon Bib-la ki té ékwi an langaj Hibrou? (Gadé pòtwé-a ki asou kouvèti Gad-la.)

⁵ Pou pwézèvé Pawòl li, Jéhova diwèkté pèp li pou kòpi Bib-la. Pa ègzanp, i konmandé chak wa Izwayèl pou fè an kòpi Lwa-a pou kò yo. I osi bay sé Livayt-la wèskonsabilité-a pou enstwi pèp li Lwa-a. (Dito. 17:18; 31:24-26; Néhi. 8:7) Apwé sé Jwif-la kité Babilonn, an gwoup nonm koumansé fè an chay kòpi pòsyon Bib-la ki té ékwi an langaj Hibrou. (Èzra 7:6) Sé nonm sala té ni bon ladwès, konsa yo pwan bon pwokosyon lè yo té ka kòpi Bib-la. Pli ta, sé nonm-lan ki té ka fè sé kòpi sala, té ka pwan tèlman pwokosyon, yo té ka jis konté chak mo pawòl èk chak lèt pou fè asiwé sa yo té ka ékwi-a té dwèt. Magwé sa, paski yo pa té pawfé, yo fè yonn dé ti lèwè lè yo té ka kòpi Bib-la. Kanmenm, paski yo té fè plizyè kòpi Bib-la, i té kay posib pou moun idantifyé sé lèwè sala. Ki mannyè?

6. Ki mannyè yo té sa konnèt ki koté sé nonm-lan ki té kòpi Bib-la té fè lèwè?

⁶ Moun ki ka étidyé sé manniskwit Bib-la ni an bon mannyè pou konnèt ki koté sé nonm-lan ki té kòpi Bib-la té fè lèwè. Konsidiwé ilistwasyon sala: Annou di ou mandé yon san (100) nonm pou kòpi sa ki ékwi asou an paj adan an liv. Kanmenm yonn an sé nonm-lan fè an ti lèwè an sa i kòpi. Konsa ki mannyè ou sa konnèt ki koté i fè lèwè-a? Ou sa konnèt koté i fè lèwè-a si ou konpawé sa i ékwi épi sa sé lézòt nonm-lan ékwi. An menm mannyè-a, lè moun ki ka étidyé sé manniskwit Bib-la konpawé plizyè manniskwit, yo sa wè ki koté lèwè té fèt an sé kòpi Bib-la.

7. Bay yon ègzanp ki ka moutwé ki kantité pwokosyon sé nonm-lan ki kòpi Bib-la té pwan.

⁷ Sé nonm-lan ki té kòpi Bib-la fè tout sa yo pé pou fè asiwé sé kòpi-a pa té ni lèwè. Mi yon ègzanp ki ka moutwé sa. Pli vyé manniskwit Bib ki konplèt an langaj Hibrou, sé yonn yo té ékwi an lanné mil ywit (1008) ében lanné mil nèf (1009) An Lépòk Nou. Yo ka kwiyé manniskwit sala ‘Leningrad Codexʼ. Kanmenm moun ja twapé plizyè manniskwit Bib èk sèksyon manniskwit ki yon mil (1,000) lanné pli vyé pasé manniskwit ‘Leningrad Codex-laʼ. Alò, adan moun pé kwè, paski yo té kòpi sé manniskwit-la plizyè fwa, la té kay ni on gwo diféwans ant sé manniskwit-la yo té kòpi-a èk manniskwit ‘Leningrad Codex-laʼ. Kanmenm, lè moun ki ka étidyé sé manniskwit Bib-la konpawé sé manniskwit nèf-la épi sé manniskwit vyé-a, yo pa té jwenn pyès gwo lèwè. Konsa, sé moun-lan ki té ka kòpi Bib-la té byen pwézèvé sistans konmisyon Bib-la.

8. Ki diféwans la ni ant pòsyon Bib-la ki té ékwi an langaj Gwik épi lòt liv yo ékwi an tan lontan?

⁸ Sé Kwityen-an an pwèmyé syèk-la té fè menm kon sé nonm-lan ki té kòpi pòsyon Bib-la an langaj Hibrou. Yo pwan bon pwokosyon lè yo té ka kòpi sé vennsèt (27) liv-la ki té ékwi an langaj Gwik. Èk yo té ka sèvi sé kòpi sala lè yo té ni mitin èk lè yo té ka pwéché. Lè on nonm ki ka étidyé sé manniskwit Bib-la konpawé sa ki ékwi an manniskwit pou pòsyon Bib-la ki té ékwi an langaj Gwik épi lòt liv ki ékwi owon tan sala, i di: “La ni pli [manniskwit pou pòsyon Bib-la ki té ékwi an langaj Gwik] pasé manniskwit pou pyès lot liv ki té ékwi an tan lontan; . . . èk sé manniskwit-la pou Bib-la pli konplèt pasé sé manniskwit-la pou sé lòt liv-la.” Osi, liv-la Anatomy of the New Testament di: “Si ou ni an bon twadiksyon pou sèksyon Bib-la [ki té ékwi an langaj Gwik], ou sa ni konfyans konmisyon-an ki adanʼy sé menm konmisyon-an ki té an Bib-la pwèmyé fwa-a yo té ékwiʼy.”

9. Silon Izaya 40:8, ki konfyans nou sa ni lèʼy vini pou Pawòl Bondyé?

⁹ Pou plizyè san lanné, sé nonm-lan ki té ka kòpi Bib-la té pwan bon pwokosyon. Akòz di sa, Bib-la nou ka sèvi pou li èk étidyé jòdi, byen aplon. d San dout, sé Jéhova ki fè asiwé i byen pwézèvé Pawòl li pou lézòm. (Li Izaya 40:8.) Mé adan moun pé di, menm si konmisyon Bib-la pa chanjé, sa pa vlé di Bib-la sé konmisyon Bondyé. Konsa, annou konsidiwé pwèv ki ka moutwé Bib-la sé Pawòl Bondyé.

10. Ki mannyè pwofèsi-a konsèné vil Babilonn ka konfimé sa 2 Pita 1:21 di? (Gadé sé pòtwé-a.)

¹⁰ Bib-la ni an chay pwofèsi ki ja fèt. Adan sé pwofèsi sala té ékwi plizyè san lanné avan yo té akonpli. Sa ki fèt an tan lontan, ka bay pwèv ki sé pwofèsi sala té fèt vwé. Alò, sa pa ka sipwi nou paski nou sav sé Jéhova ki bay tout sé pwofèsi sala. (Li 2 Pita 1:21.) Pa ègzanp, annou gadé an pwofèsi ki té ni pou fè épi vil Babilonn. An ywityenm syèk-la, Bondyé té di pwofèt Izaya pou ékwi mannyè yo té kay détwi vil Babilonn. Izaya jis di sé an nonm yo té ka kwiyé Sayròs ki té kay ganyen laviktwa asou Babilonn, èk i osi di mannyè Sayròs té kay fè sa. (Izay. 44:27–45:2) Apa di sa, Izaya té di apwé an tan yo té kay détwi vil Babilonn nèt, èk plas-la té kay anbandonnen. (Izay. 13:19, 20) Èk sé sa menm ki fèt. Babilonn tonbé an lanmen jan Midiya èk Pèwja an lanné senk san twant nèf (539) Avan Lépòk Nou. Èk apwézan, plas-la koté vil Babilonn té yé, sé an pil wòch.​—Pou pli enfòmasyon, alé asou wèbsayt-la jw.org èk gadé pou liv-la, Ou Sa Ni On Bon Lavi Pou Tout Tan! Anba lison  03 limowo 5, gadé vidéyo-a Bib-la Té Di Andavans Mannyè Vil Babilonn Té Kay Tonbé.

11. Kisa ki ka fèt pou moutwé Dannyèl 2:41-43 ka fèt vwé an tan nou?

¹¹ Sé pa sèlman an tan pasé pwofèsi ki ékwi an Bib-la té ka fèt vwé. Nou ka wè pwofèsi ka akonpli jòdi jou osi. Pa ègzanp, annou konsidiwé mannyè tout ti détay té akonpli an pwofèsi-a pwofèt Dannyèl té bay konsèné on gouvèdman yo ka kwiyé, ‘Anglo-American World Powerʼ. (Li Dannyèl 2:41-43.) An pwofèsi sala, Dannyèl té di a klè mannyè gouvèdman sala té kay ‘ti miyèt fòʼ kon fè èk ‘ti miyèt fèbʼ kon tè gwa. Èk nou ka wè sa ka fèt vwé jòdi jou. Gouvèdman Langlitè èk Lanméwik ja moutwé yo fò menm kon fè, lè yo té ni gwo siksé an Pwèmyé èk Dézyenm Gwo Ladjè-a. Èk yo ka kontiné sèvi fòs militè yo adan an gwan mannyè jik an jou kon jòdi. An menm di tan, gouvèdman sala ti miyèt fèb paski moun anba kondwit li ka potèsté kont biznis èk gouvèdman. Yon nonm ki ni èspéyans an politik di: “La pa ni pyès péyi asou latè-a ki ni pli divizyon an zafè politik pasé Lanméwik.” Ès Langlitè ni mwens divizyon pasé Lanméwik? Non. Pa ègzanp, pou konmen lanné Langlitè pa sa désidé ki wilasyon yo vlé ni épi sé péyi-a ki an ‘European Union-lanʼ. Alò, paski yo tèlman divizé, sa ka fèʼy pwèskè enposib pou gouvèdman ‘Anglo-American-lanʼ mété tèt yo ansanm pou fè an disizyon yo tout sa dakò épi.

12. Paski an chay pwofèsi an Bib-la ja fèt vwé, ki asiwans sa ka ban nou?

¹² An chay pwofèsi an Bib-la ja fèt vwé. Sa ka vwéman ban nou konfyans tout sa Bondyé pwonmèt pou fè an tan ki ka vini kay fèt vwé osi. Nou ka santi menm kon Samis-la ki té di Jéhova: ‘Sé pa ti èspéwé mwen ka èspéwéʼw délivwé mwen; paski, sé pawòl ou ki ka ban mwen èspwa.ʼ (Sam 119:81) Lè nou li Bib-la, nou ka wè Jéhova vwéman enmen nou, èk i ja ban nou yon ‘èspwa pou denmenʼ. (Jér. 29:11) Èspwa nou pou denmen pa ka dépan asou sa lézòm fè, mé asou pwonmèt Jéhova. Alò, annou kontiné étidyé pwofèsi ki an Bib-la pou nou sa ni pli konfyans an Pawòl Bondyé.

13. Silon Sam 119:66, 138, ki lòt wézon nou ni pou mété konfyans nou an Bib-la?

¹³ La ni an lòt bon wézon pouki nou sa mété konfyans nou an Bib-la. Moun ki swiv konsèy li ka wisivwè an chay bennéfis. (Li Sam 119:66, 138.) Pa ègzanp, la ni moun mayé ki té pawé pou dévosé. Mé, paski yo swiv konsèy Bib-la, apwézan yo ni an bon mawiyaj. Osi, manmay yo kontan yo adan an fanmi koté tout moun ka wèspèkté Pawòl Bondyé, èk koté pawan yo ka byen otjipé yo èk enmen yo.​—Èfés. 5:22-29.

14. Bay yon ègzanp ki ka moutwé mannyè moun ki swiv konsèy Bib-la ka fè bon chanjman an lavi yo.

¹⁴ Moun ki swiv konsèy Bib-la ka fè gwo chanjman an lavi yo. Anfen, konsèy Bib-la sa édé jis kwiminèl ki byen danjéwé chanjé. Annou konsidiwé mannyè konsèy Bib-la édé yon kwiminèl yo té kwiyé Jack. e Akòz di sa Jack té fè, yo météʼy an pwizon èk yo kondannéʼy pou mò. Jack sété an kwiminèl ki té byen vyolan. Anfen, i té yonn an sé pli danjéwé kwiminèl-la yo té kondanné pou mò. Mé yon jou, Jack asiz asou an létid Bib èk lè i wè lanmityé èk jantiyès sé fwè-a ki té ka kondwi létid-la, sa vwéman touchéʼy. Alò i mandé yo pou étidyé épiʼy tou. Kon Jack mété sa i té ka apwann an pwatik, kondwit li èk kawaktèʼy chanjé toubonnman. Padan Jack té an pwizon toujou, i vini on pwoklanmatè ki pa batizé èk tjèk tan apwé, i pwan batenm. Jack té enmen pwéché bay lòt pwizonnyé konsèné Wéyòm Bondyé èk i édé apipwé kat (4) di yo apwann lavéwité-a. Jou-a yo té ni pou tjwéʼy, yonn an sé avokaʼy-la di: “Jack pa menm moun-nan mwen té konnèt ven (20) lanné pasé. Sa Témwen Jéhovah ka enstwi vwéman chanjé laviʼy.” Magwé yo èksikité Jack pou kwim-lan i té fè-a, ègzanp li ka moutwé nou sa konfyé Pawòl Bondyé. Ègzanp li ka osi moutwé Bib-la sa chanjé moun pou fè yo vini pli mèyè.​—Izay. 11:6-9.

15. Paski sèvant Jéhova ka fè sa Bib-la di, ki mannyè sa ka fè yo diféwan? (Gadé pòtwé-a.)

¹⁵ Paski sèvant Jéhova ka fè sa Bib-la di, sa ka fè yo ni lilyon anpami yo. (Jan 13:35; 1 Kòr. 1:10) Lapé-a èk lilyon-an nou ni anpami nou vwéman wimakab, sitou lè nou konpawéʼy épi divizyon-an nou ka wè an latè-a. Moun an latè-a divizé a kòz di zafè politik, was, ében kantité lajan yo ni. Alò, lè yon jenn nonm yo ka kwiyé Jean wè lilyon-an anpami pèp Jehova, sa motivéʼy pou chanjé laviʼy konplètman. Kouté sa ki fèt. Jean lévé adan yon péyi an Afwik. Lè ladjé pété, Jean ay fè sòlda pouʼy té sa goumen pou péyiʼy. Apwé sa, lè Jean kouwi kité péyiʼy, i jwenn épi Témwen Jéhova. Jean di: “Mwen apwann, moun ki an wilizyon vwé-a pa ka mélé kò yo an zafè politik èk yo pa divizé. Okontwè, yo enmen yonn a lòt.” Jean kontiné di: “Mwen té ka sèvi lavi mwen pou goumen pou an péyi, mé lè mwen apwann lavéwité-a, mwen désidé pou sèvi lavi mwen an sèvis Jéhova pito.” Jean chanjé laviʼy konplètman. Vonmyé i goumen kont moun ki sòti diféwan péyi, i ka patajé lavéwité-a épi tout moun i jwenn. Wi, konsèy Bib-la ka édé an pil moun ki sòti an plizyè diféwan péyi. Konsa, sa ka ban nou pwèv nou sa mété konfyans nou an Pawòl Bondyé.

16. Pou ki wézon i enpòtan pou nou fòtifyé konfyans nou an Pawòl Bondyé?

¹⁶ Kondisyon an latè-a kay kontiné vini mové jou apwé jou. Alò, sa pé afébli konfyans nou an Pawòl Bondyé. Moun pé éséyé mété dout an tèt nou. Pa ègzanp, yo pé éséyé fè nou kwè sa ki an Bib-la sé mansonj. Ében yo pé éséyé fè nou kwè Jéhova pa ka sèvi èslav-la ki fìdèl pou djidé sèvant li an tan nou. Mé, si nou ni konfyans Pawòl Jéhova toujou vwé, nou pa kay kité moun kwazé lafwa nou. Pito sa, nou kay ‘détèminé pou toujou obéyi lwa [Jéhova] jis olanmò.ʼ (Sam 119:112) Osi, nou ‘pa kay hontʼ lè nou ni pou pwéché èk ankouwajé moun pou viv silon konsèy Bib-la. (Sam 119:46) Apa di sa, nou kay sa doubout fò épi “ni pasyans épi lajwa an tjè [nou]” anba sitiwasyon ki byen difisil, tèl kon pèsikasyon.​—Kòl. 1:11; Sam 119:143, 157.

17. Kisa tèks nou pou lanné dé mil venntwa (2023) kay édé nou chonjé?

¹⁷ Gwanmèsi Jéhova, nou konnèt lavéwité-a, èk pa dé kontan nou kontan sa! Paski nou konnèt lavéwité-a, sa ka édé nou wèsté kam èk ni konfyans. Osi, gwanmèsi lavéwité-a, nou ni diwèksyon ki klè asou mannyè pou viv lavi nou an latè sala ki plen konfizyon. An plis di sa, nou ni an bèl èspwa pou denmen, sa sé, an bon lavi anba Wéyòm Bondyé. Alò, tèks nou pou lanné dé mil venntwa (2023) kay édé nou kontiné ni konfyans ki, tout sistans Pawòl Bondyé sé lavéwité!​—Sam 119:160.