1. ˈAlomanay tamdaw anini hano cowa ka pakasoˈlin to Fangcalay Cudad hani?

 ANINI, ˈalomanay tamdaw cowa ka fanaˈ to cima ko ngaˈay pakasoˈlinen no niyah. Cisasaay cangra to idahiyay ko ngangan a misasingdiay, kakakosiya ato ˈaˈideman no mirikecay to soˈlinay cangra a ciharateng to sakangaˈay nangra hokira. Roma i, cowa ka ngaˈay tiˈeren ko ˈaˈideman no kiyokay sanay cangra, orato cisasaayto ko harateng to Fangcalay Cudad, samanen sowal no ˈaˈideman no kiyokay mitooray ko niyah to Fangcalay Cudad a maˈorip ato pasifanaˈ to tamdaw sanay.

2. Malecad o sowal no ˈOlic 119:160, papakasoˈlin kita to maanan?

² O finawlan ni Yihofa pakasoˈlinay to o ‘soˈliˈlinay a Kawas’ ci Yihofa, hanaca sahtoay o sakangaˈay ita ko miharatengan Ningra. (ˈOlic 31:5; Isaya 48:17) Mafanaˈay kita to ngangaˈay pakasoˈlin kita to sowal no Fangcalay Cudad, pakasoˈlin to ‘soˈlinay kimad ko sowal no [Kawas].’ b (ˈOsien ko ˈOlic 119:160.) Cecay mikakingkiway to Fangcalay Cudad sanay: “O Kimad no Kawas awaay ko mimimiming aca a mararaway, cowa ko mamalahorac. O finawlan no Kawas wa ngaˈay pakasoˈlin to Kimad no Kawas, samanen mitadiˈecay cangra to somowalay tonini a kimad a Kawas.” Mikifalocoˈay kita mihayda to sowal nonini a mikakingkiway.

3. Oniya lalakaw mamilengo to maanan hani?

³ Sasamaan kita padama to tao pakayni i Kimad no Kawas ira ko malecaday pakasoˈlin no falocoˈ hani? Dotoc a lalakaw mamilengo to ngaˈayay pakasoˈlinen a tolo lalangian no Fangcalay Cudad: O lalakaw no Fangcalay Cudad cowa ka mafalic; o adihayay a sapairasol no Fangcalay Cudad malaˈosiayto; iraay ko ˈicel no Fangcalay Cudad mifalic to kaˈorip no tamdaw.

4. Hano cisasa ko romaroma tamdaw, o lalakaw no Fangcalay Cudad nohatini cowato ka lecad to isalakatay mitilidan hani?

⁴ Misaka dademakan ni Yihofa ko maedeng 40 madimadiay midoko Cingranan a tamdaw mitilid to Fangcalay Cudad. Kawra, ya salakatay mitilidan a Fangcalay Cudad awaayto materek, o materekay nohatini sahtoay o miliyawan mitilid. Mihaenay, cisasaay ko romaroma tamdaw o maˈosiay ita Fangcalay Cudad nohatini cowato ka lecad to isalakatay mitilidan. Samaanay ko miso harateng hani? Hano ngaˈay pakasoˈlin kita to cowa ka falic ko lalakaw no Fangcalay Cudad hani?

5. O Hipray Sowal Fangcalay Cudad samaanay padotoc materek hani? (Nengnengen ko papotalay coka.)

⁵ Sapiterekaw to lihaf no Fangcalay Cudad, palimoˈotan ni Yihofa ko mitiliday to Fangcalay Cudad a tamdaw. Misaalian Ningra ko hongti no Israil o niyah ko mitilid to Rikec, misaka dademakayho to ngasaw no Lifi a tamdaw pasayra i finawlan mitadtad to lalakaw no Rikec. (Limoˈot 17:18; 31:24-26; Nihimiya 8:7) O maholiway a Yutaya tamdaw mikitini i Papilon minokay i nalacolan ikor, o cecay ˈopo idahiyay mitilid to Fangcalay Cudad a tamdaw adihayay ko miliyawan mitilid to no Hipray Sowal Fangcalay Cudad. (Icra 7:6 ato roma pihongyak.) O waywayan nonini a tamdaw cowa ka ˈamelas. Ikor, sapisaˈosiaw eca ka lawa ko cecacecay tilid no sinael, cowa ko pisaˈosi aca nangra to hakowaay ko adihay no sowal, misaˈosiayho to hakowaay ko adihay no tilid. Soˈlin mahaen, samanen cowa ko malefotay ko tamdaw, o mitilidan kamayan ira ko dangoc. Kawra samanen o malecaday a sinael adihayay ko mitilidan, mihaenay onini a dangoc ngaˈayay a makilim. O maanan ko pakayraan hani?

6. O miliyawan mitilid a Fangcalay Cudad sasamaan mikilim to mararaway han?

⁶ Anini, iraay ko cecay ngaˈayay a pakayraan no mikakingkiway mikilim to mararaway, onini a pakayraan ngaˈayay tano sapatinako a mitadtad. Ano ira ko 100 a tamdaw mamitilid to malecaday a lalakaw, ilalomaˈ no cecay tamdaw iraay ko mimingay a mararaway. Ano alaen kora mitilidan ningra palalini to mitilidan no roma tamdaw, mamahapinangto konini a mararaway. Malecaday, pakayni pipalalini to cowa ka lecad a mitilidan a Fangcalay Cudad, mamahela no mikakingkiway ko mararaway anca malawaay no cecay mitilidan.

7. Samaan kita mihapinang, ˈalomanay miliyaway mitilid to Fangcalay Cudad a tamdaw soˈlinay a misongilaˈ ko demak?

⁷ Samanen mitiliday to Fangcalay Cudad a tamdaw taˈangayay ko mihadakan a ˈicel, mihaen o lalakaw no Fangcalay Cudad hato matatodongay awa ko mararaway a materek. Nengnengen ko cecay tinakoan. Nohatini o sahalafinay materekay a Hipray Sowal Fangcalay Cudad o Leninkele a Miliyawan Mitilid, o kahererekan a toki nonini miliyawan a mitilid itini Kongyen 1008 anca 1009 miheca. Ikor, mahelaay aca no tamdaw ko mikikakaay ko halafin to 1,000 miheca to Leninkele a Miliyawan Mitilid a cudad. O roma tamdaw saan miharateng alatek, mataˈlif ko 1,000 miheca misaliyaliyaw a mitilid, o Leninkele a Miliyawan Mitilid cowato ko mamahecad to ikakaay ko halafin a mitilidan saan. Nikawrira, cowa ka haen ko demak. Pakayni palalini tonini cowa ka lecad a lintad a miliyawan mitilid, mahapinangay no mikakingkiway pinaay aca tatilidan ko cowa ka lecad, o lihaf no Fangcalay Cudad cowa ka mafalic.

8. Palalinien to Krisiya Sowal Fangcalay Cudad to romaroma miliyawan mitilid i kalecadan a laliyadan a cudad ikor, mahapinangay ita ko maanan?

⁸ Isalakatay Krisciyang minaˈonay misinanot a misangaˈ to miliyawan mitilid 27 cacudadan no Krisiya Sowal Fangcalay Cudad, hanaca itini kasaˈopoan ato mitosil misaka dademak tonini miliyawan mitilid a cudad. Cecay mikakingkiway  palaliniay to Krisiya Sowal Fangcalay Cudad to romaroma miliyawan mitilid i kalecadan a laliyadan a cudad, tolas no sowal ningra i, ikakaay ko adihay no Krisiya Sowal Fangcalay Cudad miliyawan mitilid, hanaca marocekay ko lalakaw. Sapitadtad to Sinyak (no Padaka) cudad sanay: “Ngaˈay kita pakasoˈlin, itini ngaˈayay tiˈeren a [Krisiya Sowal Fangcalay Cudad] mihongyakan anini a lintad maˈosiay ita a lalakaw, awaay ko kasasiromaan to no telangan a mitilidan.”

9. Pakayni i lihaf no Fangcalay Cudad, ngaˈayay kita mikitini Isaya 40:8 mahapinang ko maanan?

⁹ Itini adihayay a hahekalan, marorayay ko ˈalomanay tamdaw, minaˈonay ko falocoˈ miliyaw mitilid to Fangcalay Cudad. Kao ngaˈayay iraay cangra, hato maˈosiay ita anini ko matatodongay a Fangcalay Cudad. c Awaay ko hasasa, o ci Yihofa ko patatodongay a miterek to kimad Ningra. (ˈOsien ko Isaya 40:8.) Kawra, saan ko sowal no roma tamdaw alatek, materek ko lihaf no Fangcalay Cudad cowa ko ngangaˈay misawacay to o Kawas ko mikayatay to tamdaw mitilid to Fangcalay Cudad. Dotoc nengnengen ita, iraay ko maanan a wacay to paihkalay to mikitiniay i Kawas ira ko Fangcalay Cudad.

10. Samaan kita mihapinang to matatodongay ko sowal no 2 Pitiro 1:21? Tano cecay malaˈosiayto a sapairasol mitadtad. (Nengnengen ko coka.)

¹⁰ O wacay no likisi paihkalay, adihayay sapairasol no Fangcalay Cudad malaˈosiayto, o roma ˈayaw no malaˈosi to pina soˈot miheca matilidayto. Pakayni tonini cowa ko fafahkaˈen kita, samanen mafanaˈay kita o sapairasol no Fangcalay Cudad sahtoay naitiniay ci Yihofaan. (ˈOsien ko 2 Pitiro 1:21.) Nengnengen ko milingatay to kapeleng nolitengan a Papilon a sapairasol. ˈAyaw no Kongyen saka 8 hahekalan, pairasolay a Isaya itiniay i sakayat no Kawas a paliˈayaw, taˈangayay ko ˈicel a Papilon niyaroˈ wa mapeleng no tamdaw. Hanaca masowalay ni Isaya o mamipeleng toniya niyaroˈ a tamdaw ci Kirus, hanaca ihkalay pasowal to sasamaan konini a niyaroˈ mapeleng. (Isaya 44:27–45:2) Roma i, paliˈayawayho ci Isaya, salikor wa mapalaˈafo ko Papilon, awaayto ko mamaroˈ a tamdaw. (Isaya 13:19, 20) Soˈlinay a mahaen mifekad ko demak. ˈAyaw no Kongyen 539 miheca, o Papilon  maˈafasayto no Mitiya ato Pirsiya a tamdaw. Nohatini, onini a na ciˈicelay isaˈayaw a niyaroˈ soˈlinay malahorac. —Nengnengen ko Layapen ko Midaˈocay ˈOrip! i tingnaw saka 3 fedengan saka 5 kalimlaan Pairasolay ko Fangcalay Cudad to Nika Peleng no Papilon kamotoˈay a ika.

11. Tadtaden samaanay malaˈosi anini ko sapairasol no Taniil 2:41-43.

¹¹ O sapairasol no Fangcalay Cudad cowa ka itini aca i mataˈlifayto a toki malaˈosi, o roma sapairasol malaˈosiay nohatini, cecay tinakoan i pakayniay i Ikok ato Padaka Ciˈicelay Mikowanay to Hekal a sapairasol ni Taniil. (ˈOsien ko Taniil 2:41-43.) Sowal nonini a sapairasol o Ikok ato Padaka Ciˈicelay Mikowanay to Hekal o kalitosa mahecaday o marad ciˈicel, o kalitosa mahecaday o ditaˈ a malonay. Soˈlinay mahaen ko demak. O Ikok ato Padaka soˈlinay mahecad o marad a ciˈicel, pakalowiday cangra i Saka Tosa Lalood no Hekal, padotocayho malo ciˈicelay ko sofitay a kitakit. Kawra itini roma pakayraan, o finawlan nangra sapaˈadingaw to fadangalan no niyah, mikidatay to adihayay no maomahay a pitowakang, fadangalan no finawlan ato misatekeday a demak, telocto malowanay ko ˈicel nonini tosa kitakit. I ngata, o cecay mikakingkiway to mirikecay no hekal a tamdaw sanay: “Anini, toniya hekal macakatay ko katayalan a kitakit awaay ko malecaday to Padaka a maliwasak ko mirikecay a pakayraan.” I ngata no mihecaan, matongalay ko kaliwasak no Ikok. Pakayni samaan a ngaˈay ko kalalaˈed to Iwropaay a roma kitakit, caay ka hecad ko harateng nangra. Samanen padotocay ira ko masasiromaay a harateng, o Ikok ato Padaka Ciˈicelay Mikowan to Hekal ano mananto a demakan awaay ko tanektekay a pakayraan misaysay.

12. O sapairasol no Fangcalay Cudad papipakasoˈlinay kitaanan to maanan hani?

¹² Maˈaraw ko adihayay sapairasol no Fangcalay Cudad malaˈosiayto, mamatongal ko pakasoˈlin ita to mikiˈokan no Kawas to hanoikor mamalaˈosi maemin. Malecaday ko harateng ita to cecay mitiliday to ˈOlic, sanay cingra pasowal ci Yihofaan: ‘Makalimay kako milifok to salidong Iso, o sowal Iso o hatokel no mako.’ (ˈOlic 119:81) Itini Fangcalay Cudad mikiˈokay ci Yihofa kitaanan, o papairaen Ningra ko ‘hatokel’ no mita. (Yirimiya 29:11) Ira ko tokel ita, coko pakayniay pakasoˈlin to pitadiˈec no tamdaw to ˈicel no niyah misangaˈ to makapahay a hanoikor, ao pakayniay i pakasoˈlin ita to sakiˈok ni Yihofa. Nanay padadotoc kita misongilaˈ minanam to sapairasol no Fangcalay Cudad, mikitini a paˈicel to pakasoˈlin ita to Kimad no Kawas.

13. Mikitini ˈOlic 119:66, 138, ngaˈay kita pakasoˈlin to Fangcalay Cudad a roma lalangian o maanan?

¹³ O roma lalangian pakasoˈlin kita to Fangcalay Cudad i, ˈalomanay tamdaw midoedoay to sapasifanaˈ no Fangcalay Cudad a midemak ikor milifokay to adihayay a epoc. (ˈOsien ko ˈOlic 119:66, 138.) Tinakoen, o romaroma mararamoday na mamalacinowasto, kawra misaka dademakay cangra to safalod no Fangcalay Cudad, nohatini patatikolayto a mala kangaˈay, rahekerayto ko kaˈorip. O wawa nangra itiniay i matomesay to olah a lalomaˈan no Krisciyang a lomahad, tada dihkoay, rihaday ko falocoˈ.—Ifiso 5:22-29.

14. Tinakoen mitadtad, misaka dademak to soˈlinay kimad no Fangcalay Cudad samaanay mifalic to cecay tamdaw.

¹⁴ Misaka dademak to safalod no Fangcalay Cudad ko cecay tamdaw ikor taˈangayay ko kafalic, ano katalawanto a mararaway tamdaw ngaˈayay mafalic. Nengnengen ko tinakoan ni Cike, d na o mariˈangay a tamdaw cingra, itini i lalomaˈ  no papatayen a tamdaw i kapalitan, o masakatalawan cingra. Kawra kinacecayay, mirienangay ci Cike to pinanam no roma tamdaw to Fangcalay Cudad. Maˈaraw ningra ko misikayay a salikaka tada sidaˈitay, matemeray ko falocoˈ, oranto satapangay minanam to Fangcalay Cudad. Padotocay cingra itini kaˈorip misaka dademak to safalod no Fangcalay Cudad, telocto o waywayan ato capeling mafalicayto. Ikor, iraay ko tatodong ni Cike malo cowaho picada to paputisem a mitosilay, salikor micadaay to paputisem. Fanekfekay cingra pasayra i roma mapalitay milasil to Hongti Kitakit no Kawas, hanaca sasepatay ko mapadamaay a tamdaw mafanaˈ to soˈlinay kimad. Tahira pipatayan cingranan a romiˈad, masongilaˈayto mafalic cingra. O cecay fingkosi ningra sanay: “Ci Cike cowato koya kafanaˈan ako i ˈayaw no 20 miheca a tamdaw, o sapasifanaˈ no Misawacayay Tamdaw ni Yihofa a kimad taˈangayay ko pifalic to kaˈorip ningra.” Soˈlin kamayan patayen ci Cike, kawra o tinakoan ningra ihkalay mitadtad, iraay ko ˈicel no Kimad no Kawas mifalic to tamdaw, awaay ko hasasa ita a mitadiˈec.—Isaya 11:6-9.

15. O finawlan ni Yihofa pakayni pisaka dademak to kimad no Fangcalay Cudad samaanay eca ka lecad to ˈalomanay tamdaw hani? (Nengnengen ko coka.)

¹⁵ O finawlan ni Yihofa samanen misaka dademakay to soˈlinay kimad no Fangcalay Cudad, hato ngaˈayay makedec malacecay. (Yohani 13:35; 1 Korinto 1:10) Anini, ˈalomanay tamdaw no hekal pakayniay i ka eca ka lecad no finacadan, midamaan a mirikecay ato saaroˈan a maliwasak, kita saan pakayni pitafo to makedecay ngaˈayay a dipayal. Mikiriwiˈay a masakalimlaan konini, pakayniay tonini a mahapinang no ˈalomanay tamdaw kita. O cecay kapah ci Lang, maˈaraw ningra makedecay ko finawlan no Kawas, matemeray ko falocoˈ. Itiniay cingra i Afrika a lomahad, mifekad ko lalood mirienangay cingra to sofitay, kawra ikor milaliway cingra tayra i roma kitakit, itira malitemohay ko Misawacayay Tamdaw ni Yihofa. Sanay cingra: “Mananamay ako o matatodongay ko pihakelongan a tamdaw cowa pirienang to mirikecay, malaliwasak, ao masasiolahay. Na makahiay kako patafang to ˈorip no niyah paˈading to kitakit, kawra ikor no minanam to soˈlinay kimad no  Fangcalay Cudad, misaˈosiay kako patafang to hakelong no ˈorip midoko ci Yihofaan.” Onini a kapah masongilaˈayto ko kafalic. Isalakat mirienangay cingra to malalooday, midokaˈ to cowa ka hecad ko lalengawan a tamdaw, kawra nohatini pasayraay cingra i malitemohay a tamdaw milasil to padipayalay to tamdaw a kimad no Fangcalay Cudad. Ano samaanayto ko lalengawan no tamdaw, ano misaka dademak cingra to safalod no Fangcalay Cudad, o mamilifok to haepoc. O ciˈicelay a wacay konini, misawacay to ngaˈayay tadiˈecen ko Kimad no Kawas.

16. Paˈicel to pakasoˈlinay falocoˈ to Fangcalay Cudad hano masakalimlaan hani?

¹⁶ O pakayraan noniya hekal malingaday ko tatiih, o pakasoˈlin ita to soˈlinay kimad o mamalingad ko kataˈangay no macadaay a sapalifet. Alatek mikayhiday ko tao kitaanan cisasa o soˈlinay ko Kimad no Fangcalay Cudad hokira, anca cisasa to soˈlinay nilnilen ni Yihofa ko madimadiay citanengay a koli mikerid to finawlan Ningra hokira. Kawra ano pakasoˈlin kita to Kimad ni Yihofa o matatodongay i, o papakacoˈay to mahaenay a saˈodis ecato ka ngiyangi. ‘Misetek kita to falocoˈ a midofdof to safalod ni [Yihofa] tahatolas ko pidofdof, tahadaˈoc caka falic.’ (ˈOlic 119:112) Ano milengo kita i tao to Fangcalay Cudad i ‘cowa ko mamangodoen,’ ao tatimolo a pasowal cangranan to soˈlinay kimad no Fangcalay Cudad, hanaca pakalalok cangranan midoedo to soˈlinay kimad a maˈorip. (ˈOlic 119:46) Soˈlin tahasiˈayaw to sapalak ato pakidemay a sapalifet, o ngangaˈay kita ‘ira ko mihadidiay ato lipahak’ tahatolas a miemem.—Kolosay 1:11; ˈOlic 119:143, 157.

17. O pakamihecaay a sinael no 2023 miheca pafeliay kitaanan to maanan a sapatalipaˈelal hani?

¹⁷ Padamaay ci Yihofa kitaanan mafanaˈ to soˈlinay kimad, tada miakoˈiday kita Cingranan! Malingaday ko sasifod noniya hekal, kawra pakayni kafanaˈ ita to soˈlinay kimad iraay ko matatodongay a patosokan ato hatokel no kaˈorip. O soˈlinay kimad padamaay kitaanan matomes ko hatokel noikor, pakasoˈlin to aitini ko niyah i pikowan no Hongti Kitakit no Kawas tahadaˈoc milayap to makapahay a kaˈorip. Nanay o pakamihecaay a sinael no 2023 miheca ngaˈay padama kitaanan tanektek eca ka ngiyangi, pakasoˈlin to sahtoay o soˈlinay kimad ko Sowal no Kawas! —ˈOlic 119:160.