1. Engkai maka enterem kalak la tek man Pustaka?

 GUNDARI enterem kalak mesera akapna tek man kalak si deban. La kalak e tek maka kalak si ergaina bagi peminpin politik, ilmuwan, ras pengusaha, tuhu-tuhu ermediate man kalak e. Selain si e, kecewa kalak e ngidah peminpin-peminpin gereja. Emaka, labo ateta mamang adi la kalak e tek man Pustaka perban peminpin-peminpin e ngaku-ngaku ngikutken Pustaka.

2. Menurut Masmur 119:160, kerna kai nge arusna kita tek?

² Kerina umat Jahwe tek maka Jahwe e “Dibata kebenaren,” janah kai si ajarkenNa lalap guna kiniulinta. (Ms. 31:5; Jes. 48:17) Siteh maka banci kita tek man isi Pustaka. Tek kita maka “benar kap kerina kata [Dibata].” (Baca Masmur 119:160.) Setuju kita nandangi kai si ikataken sekalak ahli Pustaka, nina, “Tuhu kerina si kataken Dibata, ntah pe kerina si katakenNa pasti terjadi. Umat Dibata banci tek maka Kata Dibata lalap benar perban tek kalak e man baNa.”

3. Kai kari sibahas bas artikel enda?

³ Uga carata nampati kalak si deban gelah tek ka man Kata Dibata? Mari sibahas telu alasenta tek man Pustaka: (1) Isi Pustaka la berubah, (2) nubuat-nubuat bas Pustaka lalap terjadi, ras (3) nasehat bas Pustaka banci ngubah kegeluhen.

4. Engkai maka lit kalak si ragu man isi Pustaka?

⁴ Lit kira-kira 40 dilaki si setia si ipake Dibata Jahwe nulisken buku-buku bas Pustaka. Tapi, manuskrip si asli si itulis kalak e lanai lit gundari. b Si lit gundari salinenna ngenca. Enda erban piga-piga kalak ragu isi Pustaka e sesuai denga ntah lang ras tulisen aslina. Pernah nge ukurindu engkai maka kita banci tek isi Pustaka la pernah berubah?

5. Uga carana Kitap-Kitap Heber isalin? (Nen gambar sampul.)

⁵ Gelah Pustaka lalap lit, iaturken Jahwe gelah lit salinen Pustaka. IsuruhNa raja-raja bas Israel erban salinen arah Undang-Undang Musa, janah ilantikNa kalak Lewi guna ngajarken undang-undang e man kalak Israel. (Ul. 17:18; 31:24-26; Neh. 8:7) Bas pudi wari, kenca kalak Jahudi ibebasken arah Babilon, sada kelompok penyalin si enggo ahli mulai erban melala salinen Kitap-Kitap Heber. (Esa. 7:6, cataten i teruh) Hati-hati kalak e bas ngelakoken si e. Si ikira kalak e labo saja kata-katana tapi termasuk hurup-hurupna, guna mastiken kerina isalin alu tepat. Amin pe bage, perban kalak e la sempurna, lit piga-piga kesalahen si kitik bas salinen-salinen e. Tapi, perban enggo mbue salinen si iban, kesalahen-kesalahen e banci iteh. Uga carana?   

6. Uga carana meteh kesalahen si lit i bas salinen-salinen Pustaka?

⁶ Iteh ahli-ahli Pustaka cara si mehuli guna ndatken kesalahen si lit bas salinen Pustaka. Perumpamanna bagenda: Katakenlah 100 dilaki isuruh erban sada salinen, janah salah sada arah kalak e erban kesalahen si kitik. Banci siteh kesalahen si ibanna e alu mbandingken salinenna ras salinen-salinen si deban. Bage ka pe, alu mbandingken melala manuskrip Pustaka, ahli-ahli Pustaka banci meteh kesalahen bage pe bagin si bene arah sada manuskrip.

7. Payo nge penyalin Pustaka enggo erban salinen si tepat?

⁷ Erjuang kel kalak si erban salinen manuskrip Pustaka gelah salinenna tepat janah hasilna luar biasa. Mari siperdiateken contohna. Mbarenda, manuskrip Kitap-Kitap Heber si lengkap si metuana eme Kodeks Leningrad, si iban bas tahun 1008 ntah pe 1009 M. Tapi bas pudi wari, idat me melala manuskrip Pustaka bage pe potongen-potongen manuskrip si enggo iban 1.000 tahun sope Kodeks Leningrad. Banci saja piga-piga kalak erpengakap maka isi Kodeks Leningrad pasti beda kel ras manuskrip-manuskrip si tertuan e, perban isina enggo isalin piga-piga kali sedekah 1.000 tahun. Tapi kepeken labo bage. Sanga ibandingken ahli Pustaka manuskrip-manuskrip si ndekah ras si mbaru, kepeken sitik ngenca bedana. Idat kalak e piga-piga kata si beda, tapi situhuna ertina seri.

8. Kai bedana salinen Kitap-Kitap Junani Kristen ras salinen buku-buku si nai?

⁸ Bali bagi penyalin Kitap-Kitap Heber, kalak Kristen bas abad pertama pe erban salinen Pustaka. Rajin kalak e erban salinen 27 buku si termasuk bas Kitap-Kitap Junani. Salinen-salinen e ipake kalak e sanga perpulungen ras erberita. Sekalak ahli mbandingken erbage manuskrip Kitap-Kitap Junani si lit denga  ras manuskrip buku-buku si deban si itulis bas jaman si seri. Nina, “Buen salinen [Kitap-Kitap Junani], . . . ras lebih lengkap.” Buku Anatomy of the New Testament (Struktur Perjanjin si Mbaru) ngataken, “Banci kita tek maka terjemahen Kitap-Kitap Junani si gundari terteki janah isina cocok ras kai si ate penulisna ipesehna.”

9. Kai buktina kata-kata bas Jesaya 40:8 tuhu?

⁹ Ratusen tahun dekahna, enterem penyalin enggo kerja keras janah hati-hati erban salinen Pustaka. E me sebapna banci kita tek maka Pustaka si sangana sibaca ras sipelajari gundari banci terteki. c Siteh maka Jahwe me si mastiken kataNa lit lalap seh ngasa gundari, janah isina la berubah. (Baca Jesaya 40:8.) Amin pe piga-piga kalak ngataken maka isi Pustaka labo berubah, tapi la kalak e tek maka e rehna arah Dibata. Gundari mari sibahas piga-piga buktina maka Pustaka e rehna arah Dibata.

10. Ceritaken sada nubuat si mbuktiken maka kata-kata bas 2 Petrus 1:21 tuhu. (Nen gambar.)

¹⁰ Mbue nubuat-nubuat si bas Pustaka enggo terjadi. Piga-piga arah nubuat e itulis ratusen tahun sope lenga terjadi. Sejarah pe mbuktiken maka nubuat-nubuat e tuhu-tuhu terjadi. Labo kita sengget kerna si e perban siteh maka kerina nubuat bas Pustaka rehna arah Jahwe nari. (Baca 2 Petrus 1:21.) Cuba ukuri nubuat-nubuat kerna kehancuren kota Babilon si nai. Kira-kira antara tahun 778 seh 732 SM, itegu-tegu kesah si badia Nabi Jesaya gelah inubuatkenna maka kota Babilon si erkuasa e nandangi italuken. Ikatakenna ka ise gelar si nalukenca, eme Kores. (Jes. 44:27–45:2) Ijelasken Jesaya ka uga pagi kota e ihancurken. (Jes. 13:19, 20) Selain si e, inubuatken Jesaya maka Babilon ihancurken pagi janah lanai lit si ngianisa. Bage  me si terjadi. Bas tahun 539 SM, Babilon italuken Media Persia janah kota si mbarenda erkuasa e gundari tading reruntuhen nari ngenca.​—Nen video Keruntuhen Babilon Enggo Inubuatken Pustaka si Badia bas buku Ermeriah Ukur Seh Rasa Lalap!​ versi elektronik bas pelajaren 03, nomor 5.

11. Jelasken uga nubuat bas Daniel 2:41-43 terjadi gundari.

¹¹ Nubuat-nubuat si lit bas Pustaka labo saja terjadi mbarenda. Gundari pe banci siidah nubuat-nubuat e terjadi. Contohna, cuba ukuri kerna nubuat Nabi Daniel si luar biasa kerna Kuasa Doni Inggris-Amerika. (Baca Daniel 2:41-43.) Bas nubuat e alu tepat ikataken maka duana kuasa doni e eme Inggris-Amerika “deba megegeh” bali bagi besi janah “deba la megegeh” bali bagi taneh liat. Bage me si terjadi gundari. Inggris ras Amerika tuhu-tuhu megegeh bali bagi besi. Penting kel pengaruh kalak e bas kemenangen perang doni si pertama ras peduaken, janah seh asa gundari pasuken militer kalak e megegeh. Tapi, gegeh kalak e reh lemahna perban rakyatna si rusur protes ngelawan pemerentah ras perusahan-perusahan si galang. Salah sada ahli politik doni ngataken, “Arah kerina negara demokratis si lit gundari, Amerika Serikat me si kacauna janah terbagi kel secara politik.” Selain si e, bas piga-piga tahun enda reh buena perpecahen bas Inggris, eme bagin si deban arah kuasa doni e. Lit erbage pendapat kerna uga arusna hubungen kalak e ras negara-negara i Uni Eropa. Perban lit perpecahen si bage, Kuasa Doni Inggris-Amerika la banci nggunaken kerina kekuasanna.

12. Nubuat-nubuat bas Pustaka erban kita tek kerna kai?

¹² Melala nubuat bas Pustaka enggo terjadi, janah e erban reh tekna kita maka janji-janji Dibata kerna masa depan pasti terjadi. Perasanta bali bagi pemasmur si ertoto man Jahwe, nina, “Merhat kel aku nimai keselamaten arah Kam nari, sebap kataNdu kap arapenku.” (Ms. 119:81) Ibereken Jahwe man banta ‘masa depan si arapken kita’ arah Pustaka. (Jer. 29:11) Arapenta kerna masa depan labo perban usaha manusia tapi perban janji Jahwe. Emaka, teruslah siusahaken gelah reh tekna man Kata Dibata alu rajin mpelajari nubuat bas Pustaka.

13. Menurut Masmur 119:66, 138, kai alasen si deban si mbuktiken maka Pustaka terteki?

¹³ Alasen si deban engkai maka Pustaka banci terteki eme perban Pustaka enggo nampati kalak si nggit ndalanken nasehat si lit bas Pustaka. (Baca Masmur 119:66, 138.) Contohna, piga-piga pasangen si nandangi cerai, enggo meriah ukurna gundari perban dalankenna nasehat Pustaka. Meriah ukur anak-anakna perban ipebelin bas keluarga si ermediate man kalak e ras engkelengi kalak e.​—Ep. 5:22-29.

14. Ceritaken sada pengalamen si mbuktiken maka nasehat Pustaka banci nampati kalak jadi reh ulina.

¹⁴ Kalak si jahat kel pe banci berubah kegeluhenna adi idalankenna nasehat Pustaka. Cuba ukuri uga nasehat Pustaka nampati sekalak tahanen si gelarna Jack. d Ia sekalak penjahat si kejam.  Janah ia itandai selaku tahanen si bahayana si nandangi ihukum mate. Tapi, bas sada wari Jack ikut megi-megi bas sada pelajaren Pustaka. Kena kel ku pusuhna kiniulin senina-senina si ngajarken Pustaka, janah dungna mulai ia erlajar Pustaka. Perban dalankenna kebenaren Pustaka bas geluhna, perbahanenna bage pe sipat-sipatna enggo mulai reh ulina. Bas pudi wari, Jack enggo banci jadi perberita si lenga iperidiken janah dungna iperidiken. Semangat ia erberita kerna Kerajan Dibata man tahanen si deban. Silang-langna lit empat kalak si iajarina kerna Pustaka. Sanga enggo seh warina ia ihukum mate, Jack enggo berubah. Salah sada pengacarana ngataken, “Jack enggo beda ras si kutandai 20 tahun si lewat. Kai si ajarken Saksi-Saksi Jahwe erban berubah kegeluhenna.” Amin pe dungna Jack ihukum mate, usihenna mbuktiken maka Kata Dibata banci terteki janah banci erban kegeluhen kalak reh ulina.​—Jes. 11:6-9.

15. Kai hasilna perban idalanken umat Jahwe nasehat Pustaka? (Nen gambar.)

¹⁵ Umat Jahwe ersada perban dalankenna kebenaren bas Pustaka. (Joh. 13:35; 1 Kor. 1:10) Kedamen ras persadanta jelas kel teridah perban teremen kalak gundari la ersada perban politik, suku, ras status sosial. Sekalak anak muda si gelarna Jean ngidah persadan bas umat Jahwe, janah e luar biasa kel akapna. Jean ipebelin i sada negri i Afrika. Sanga terjadi perang sipil, ikut ia jadi tentera tapi dungna kiam ia ku negri si deban. Bas negri e, jumpa ia ras Saksi Jahwe. Bagenda nina Jean, “Erlajar aku maka pengikut agama si benar ersada janah la terlibat bas politik. Selain si e, kalak e sikeleng-kelengen.” Nina ka, “Sange, kugunaken geluhku erperang guna ndukung negaraku. Tapi kenca  aku erlajar kebenaren arah Pustaka, kuputusken mereken geluhku guna ngelayani Jahwe.” Gundari Jean enggo berubah, lanai ia erperang ngelawan kalak si beda latar belakangna ras ia. Ibagikenna kebenaren arah Pustaka man kerina kalak si jumpaina. Pengalamen e mbuktiken maka nasehat arah Pustaka tuhu-tuhu erguna kel man kalak arah erbage latar belakang. Enda mbuktiken maka Kata Dibata banci terteki.

16. Engkai maka penting sipegegehi kinitekenta man Kata Dibata?

¹⁶ Situasi doni enda terus pagi reh kelekna janah kinitekenta man Kata Dibata pasti iuji. Banci saja usahaken kalak gelah ragu kita man kebenaren bas Pustaka, ntah pe gelah ragu kita maka enggo ipilih Jahwe budak si setia ras pentar guna negu-negu umatNa gundari. Tapi, adi tek kita maka Kata Jahwe lalap benar, banci kita ngasup ngadapi tentangen si bage. Banci ‘tetap ukurta guna matuhi peraturen-peraturen Jahwe, segedang geluhta seh ku kedungenna.’ (Ms. 119:112) ‘La kita mela’ nceritaken kerna kebenaren man kalak si deban janah siiahken kalak e guna ndalanken nasehat Pustaka. (Ms. 119:46) Selain si e, ngasup kita ngadapi tentangen si mberat termasuk penganiayan, “alu sabar ras ermeriah ukur.”​—Kol. 1:11; Ms. 119:143, 157.

17. Ayat tahunenta ngingetken kita kerna kai?

¹⁷ Ngata bujur kel kita man Jahwe perban enggo pebetehkenNa kebenaren man banta! Kebenaren e nampati kita gelah tenang ras la kuatir. Lit ka tujun geluhta janah siteh uga arusna kita nggeluh bas doni si reh kacauna enda. Lit ka arapen man banta kerna masa depan si terulin bas Kerajan Dibata pagi. Mbera-mbera ayat tahunenta man tahun 2023 nampati kita tetap tek maka kerina Kata Dibata e kebenaren!​—Ms. 119:160.