1. Aiz zaitea lokank Bible-acher visvas dovrunk kiteak kotthin zata?

 AIZ zaitea lokank konnacherui visvas dovrunk khub kotthin zata. Tim khub visvas dovortat te munis, zoxe rajki fuddari, vidneanik ani veapar-dhondo korpi, khoreaninch aplea borea pasot vavurtat kai mhunn tim dubhavtat. Toxench, apunn Kristanv mhunn sangtat tea dhormik fuddareancher visvas dovrunk pasun tankam kotthin zata. Karonn te apunn Bible-a pormonnem jietat mhunn sangtat, punn toxem korinant tem tim polloitat. Tea pasot, hea lokank Bible-acherui visvas dovrunk khub kotthin zata.

2. Stotr 119:160-a pormonnem, ami kosli khatri dovrunk zata?

² Punn Jehovachea sevokank, Jehova ek “sotacho Dev” ani to amche vixim sodanch borem chintʼta mhunn visvas asa. (St. 31:5, NW; Iz. 48:17) Toxench, “[Devachem] utor sogllem sotuch,” mhunnche, ami Bible-ant jem vachtat tacher ami visvas dovrunk zata mhunn ami zannant. (Stotr 119:160 vachat.) Eka Bible-achea zannaran oxem mhunnttlolem: “Dev kednanch fott marina vo to sangta tem sodanch ghoddon ieta. Devache lok, to sangta tacher visvas dovortat. Karonn tankam Devacher visvas asa.” Hem kitlem khorem nhoi!

3. Hea lekhant ami kitem polloitolim?

³ Amkam Devachea Utracher bhavarth asa to dusreankui asonk zai zalear ami tankam koxi modot korunk zata? Hem zannam zaunk Bible-acher amcho visvas ghott kortat toslea tin puraveam vixim atam ami polloum-ia. Te mhunnttlear, Bible-acho sondex aiz porian bodlonk na, tantunt dilʼleo bhasaunneo purnn zatat, ani Bible lokanchem jivit bodlunk xokta.

4. Bible-ant asa tem sarkem asa kai na mhunn thoddo lok kiteak dubhavtat?

⁴ Jehova Devan Bible-achim soglim pustokam borounk sumar  40 visvaxi munxank uzar kele. Punn tannim boroilʼlim hostolekam aiz amche lagim nant. b Karonn tancho nas zaun gelo. Aiz amche lagim fokot tancheo kopi asat. Tea pasot, aiz amche lagim aslolea Bible-ant, Bible boroupeamnim jem kitem boroilʼlem tench asa kai, vo tantunt bodol zala kai, mhunn thoddo lok chintunk puro. Tumchea-i monant ho prosn aila kai? Tor Bible-ant boroila to sondex aiz porian bodlonk na mhunn ami kiteak khatri dovrunk zata tem fuddem polloum-ia.

5. Hebrev Bhaxen Boroilʼlea Pustokancheo kopi koxeo keleo? (Masikachem fuddlem chitr polloiat.)

⁵ Apnnem prerit kelʼlo sondex bodolna zaunk, Jehovan aplea lokank tacheo kopi boroun kaddunk sangleo. Zoxem, tannem Israelachea dor eka razak svota pasot, boroun dovorlolea Kaideachi ek kopi boroun kaddunk laili. Ani tea Kaideant kitem boroilʼlem asa tem lokank xikounk tannem Levitank nemle. (D.S. 17:18; 31:24-26; Ne. 8:7) Toxench Judev lokank Babilonkaramnim dhorun vhelea uprant, kopi korunk kola aslolea boroupeancho ek zomo, Hebrev Bhaxen Boroilʼlea Pustokancheo zaiteo kopi korunk lagle. (Ezra 7:6, ftns., NW) He boroupi dhean diun boroitale. Ani vell soron gelo toso, te boroitale tea kopimnim kosleoch chuki zaina zaunk, te utranch nhoi punn okxoram pasun mezunk lagle. Tori astana, opurnntaiek lagon tannim boroilʼlea kopimnim thoddeo chukeo asleo. Punn tannim jem kitem boroilʼlem tacheo zaiteo kopi asleo dekhun, uprant teo chukeo sodhun kaddunk modot zali. Koxi?

6. Bible-achea kopimnim zalʼleo chukeo zannar koxe sodhun kaddttat?

⁶ Bible-acheo kopi korpeancheo chukeo sodhun kaddunk atanche zannar ek bori vatt uzar kortat. Udharonnak, 100 lokank eke page-ichi hatin kopi korunk lailea mhunn chintat. Kopi kortam-kortam tantuntlo ek munis ek lhanxi chuk korta. Tor tannem chuk kelea mhunn amkam koxem kollttolem? Tachi kopi ami dusreanchea kopi sangata sor kortat tednam tachi chuk amkam dison ietoli. Heach bhaxen, Bible-acheo zaiteo kopi sor kelʼlean, zannarank kopi korpeamnim khoim chuk kelea vo te kitem borounk chukleat tem sarkem kollon ieta.

7. Bible kopi korpi zaite zann, ekdom dhean diun kopi kortale mhunn ami kiteak mhunnonk zata?

⁷ Bible kopi korpeamnim zaiteo kopi keleo dekhun vorsam gelim toxim tantunt bodol zalo astolo, oxem thoddeank disonk puro. Punn tantunt kainch bodol zaina zaunk Bible kopi korpi, ekdom dhean diun kam kortale. Hacho amkam ek puravo asa. Hebrev Bhaxen Boroilʼlea Pustokancho akʼkho bhag 1008 vo 1009 K.X.-ant boroilʼlo. Taka Leningrad Codex oxem mhunnttat. Ani hem sogleam-von pornnem hostolek aslem. Punn halinchea vorsamnim, Bible-achim anikui hostolekam vo hostolekanche bhag mellʼlleat. Ani him, Leningrad Codex hea hostoleka poros sumar 1,000 vorsam poilim boroilʼlim. Hea pasot, Leningrad Codex-ant jem kitem boroilam ani hea pornea hostolekamnim jem kitem boroilam, tantunt khub ontor astolo oxem konnakui disonk puro. Punn khorem mhunnttlear, zannaramnim him hostolekam sor kelea uprant, tantunt fokot utram voir-sokol zaleant ani tancho orth bodlonk na mhunn tankam kollon ailem.

8. Grik Bhaxen Boroilʼlea Pustokancheo kopi, ani adlea kallar boroilʼlea her pustokanchea kopi modem kitem ontor asa?

⁸ Poilea xekddeantlea Kristanvamnim pasun Hebrev Bhaxen Boroilʼlea Pustokanchi kopi korpeanchi dekh ghetli. Tannim Grik Bhaxen Boroilʼlea 27 Pustokancheo kopi boroun kaddleo. Ani tannim hem kam khub dhean diun kelem. Heo kopi, tim mittingemnim ani porgottnnechea kamant uzar kortalim. Eka zannaran, Grik Bhaxen Boroilʼlea Pustokancheo aiz meren kitleo kopi asat, ani tea kallar boroilʼlea her pustokancheo kitleo kopi asat tem sor korun  polloilem. Tea vixim to oxem sangta: “Aiz Grik Bhaxen Boroilʼlea Pustokancheo chodd kopi asat . . . ani tancho akʼkho bhag amchea lagim asa.” Toxench, Anatomy of the New Testament hea pustokant oxem boroilam: “Aiz ami Grik Bhaxen Boroilʼlea Pustokanchi bore toren bhaxantor kelʼli ek kopi vachtat zalear, tantunt adlea kallar boroupeamnim boroilʼlo toch sondex asa mhunn ami khatri dovrunk zata.”

9. Izaias 40:8-a pormonnem, Bible-a vixim ami kitem mhunnonk zata?

⁹ Xemboramnim vorsam porian, zaitea kopi boroupeamnim, Bible-acheo kopi borounk khub vavr kelo. Hea pasot aiz amche lagim, vachunk ani xikonk sarki mahiti dita toslo ek Bible asa. c Hem soglem Jehovakuch lagon zaunk pavlam mhunn kainch dubhav na. Karonn sogleam lagim aplem Utor aslolem ani tantunt sarki mahiti asloli Jehovak zai. (Izaias 40:8 vachat.) Punn Bible-acho sondex aiz porian bodlonk na, heach karonnak lagon to Devan prerit kela oxem ami mhunnonk zaina, mhunn thoddim zannam sangonk puro. Tor Bible Devachea preronnan boroila mhunn kosle purave asat tem atam polloum-ia.

10. 2 Pedru 1:21-ant sanglam tem sot mhunn dakhoun dita toslem ek udharonn diat. (Chitram polloiat.)

¹⁰ Bible-ant boroilʼleo zaiteo bhasaunneo ghoddon aileat. Ani hantuntleo thoddeo bhasaunneo, teo ghoddon ieunchea xemboramnim vorsam poilim boroilʼleo. Itihas polloilear, teo sangloleo toxeoch purnn zaleat mhunn amkam khatri melltta. Punn hem zannam zaun ami ojap zainant. Karonn Bible-antlea soglea bhasaunneancho Boroupi Jehova Dev zaun asa. (2 Pedru 1:21 vachat.) Udharonnak, Babilon xaracho nas zatolo mhunn kelʼli bhasaunni koxi ghoddon aili tea vixim chintat. Sumar 778 ani 732 K.X.A.-chea modem, bollixtt xar Babilonacher akromonn kortole mhunn provadi Izaiasan bhasaunni kelʼli. Toxench, Sirus nanvacho ek munis hea xaracher zoit vhortolo ani to tem koxe toren kortolo tea vixim pasun Izaiasan boroilʼlem. (Iz. 44:27–45:2) Tea bhair, Babilon xar fatranchi ras zatolem ani konnuch thoim ravchona oxem-i Izaiasan bhasailʼlem.  (Iz. 13:19, 20) Ani hi bhasaunni sangloli toxich ghoddon aili. 539 K.X.A.-nt, Medie-Persien Babilonacher akromonn kelem. Ani eka vellar bollixtt aslolem hem xar, aiz purnn toren nas zalam ani konnuch thoim ravona.—Sasnak Khuxalkaien Jieiat! pustokache electronic kopint, odheai 3, mudʼdo 5-ant aslolo, Babilonacho Nas Zatolo Mhunn Bhasaunni, ho video polloiat.

11. Daniel 2:41-43-ant sangloli bhasaunni aiz koxi purnn zata tem somzaiat.

¹¹ Tor Bible-acheo bhasaunneo adlea kallaruch purnn zaleo oxem nhoi. Aiz pasun heo bhasaunneo purnn zatat tem ami pollounk xoktat. Udharonnak, Sonvsarachi Vorixtt Razvottki Anglo-America vixim Danielan kelʼli bhasaunni aiz ojapache ritin koxi ghoddon ieta tea vixim chintat. (Daniel 2:41-43 vachat.) Anglo-America, tem mhunnttlear, Britain ani America, lokhondda bhaxen “ordem ghott” ani matie bhaxen “ordem osokt” astolem mhunn tea bhasaunnent sanglolem. Ani him utram sot mhunn aiz amkam sarkem dison ieta. Hi razvottki lokhondda bhaxen ghott asa. Karonn donui Vixv Zhuzam jikhonk, mukhel zaun tancho hat aslo. Ani aiz pasun tanche lagim ek vhodd ani bollixtt fouz asa. Punn aiz amkam hi razvottki matie bhaxen oskot zalea tem-ui dison ieta. Karonn tanche nagrik aple hokʼk melloun gheunk sorkarachea add voitat, ektthaim ieun morcha kaddttat, kamdar veg-veglle songotton ghoddoun haddttat, toxench te sorkar ani veapar-dhondo korpeam add zhuztat. Halinch sonvsarantlea rajkaronnachea eka zannaran oxem mhunnttlem: “Aiz rajkaronnak lagon jitli futt United States-ant poddlea, titli futt aiz khoincheach democratic desant poddonk na.” Ani Britain-a vixim polloilear, halinchea vorsamnim tanchea modem hea vixoi-ancher futt poddlea. Tem mhunnttlear, European Union-ache bhag zaun aslolea her desam sangata tannim sombond dovorcho kai na, hea vixim tanche vichar veg-veglle asat. Hea pasot, Sonvsarache Vorixtt Razvottkek, mhunnche Anglo-Americak, apleak zai tem korunk mellona.

12. Bible-antlea bhasaunneam udexim amkam kosli khatri melltta?

¹² Bible-ant sangloleo zaiteo bhasaunneo ghoddon aileat tem polloun, Jehovan fuddara vixim kelʼleo bhasaunneo pasun ghoddon ietoleoch mhunn amchi khatri vaddtta. Amkam ghoddie Jehova lagim magnnem kelʼlem tea stotrkara bhaxen disonk puro. Tannem mhunnttlolem: “Tuje soddvonnek hanv axetam, otrektam; Tujea utracher patieun ravtam.” (St. 119:81) Aplea Utrantlean, Jehovan amkam “bhorvanxean bhorlolo boro fuddar” ditolo mhunn sanglam. (Jer. 29:11) Ani ho bhorvonxean bhorlolo fuddar, munxanchea vavracher nhoi, punn Jehovan jeo bhas dileat tacher adarit asa. Tor Bible-antlea bhasaunneancher bariksannen obheas korun, Devachea Utracher amcho bhorvonso ami ghott korit ravum-ia.

13. Stotr 119:66, 138-a pormonnem, Bible-acher visvas dovrunk anik koslem karonn asa?

¹³ Bible-acher visvas dovrunk anik ek karonn mhunnttlear, tantuntle solʼle apnnailolean zaitea lokank faido zala. (Stotr 119:66, 138 vachat.) Udharonnak, jim zoddpim divors gheunk sodhtalim tannim Bible-antle solʼle apnnailolean tim aiz khuxalkaien ani ekvottan jietat. Toxench, tanchim bhurgim pasun oslea vatavoronnant vaddttat zoim tanchim avoi-bapui tanchi kallji ghetat ani tancho mog kortat.—Ef. 5:22-29.

14. Bible-ant dilʼle solʼle apnnailolean lokanchea jivitacher koslo porinnam zata? Ek udharonn diat.

¹⁴ Bible-ant dilʼle solʼle apnnailolean bhirankull opradi pasun ekdom bore munis zaunk pavleat. Oxench, Jack nanvachea eka koideak ghoddlem. d To ek opradi aslo ani to itlo krur  aslo ki mornnachem formonn poddlolea bondkhonnint aslolea soglea koideam modem, to chodd bhirankull aslo. Punn ek dis, thodde bhav Bible obheas ghetale tednam Jack thoim hajir aslo. Tea bhavamnim dakhoilʼli doiallai Jack-achea kallzak lagli ani to-ui Bible xikonk laglo. Tannem Bible-antle solʼle apnnaile ani aplea sobhavant bodlav kelo. Itlench nhoi, to ek boro munis pasun zaunk pavlo. Uprant, vell soron gelo toso Jack ek porgottnnar zalo ani tannem bautizm ghetlo. To urben bondkhonnint aslolea her koideam sangata Devachea Rajea vixim uloitalo, ani tannem unneant-unnem char zannank sot xikonk modot keli. Jack-ak jivexim marcho dis lagim ieta mhunnosor to ek ekdom boro munis zalʼlo. Tache vixim, tachea eka vokhilan oxem mhunnttlem: “Ho hanv 20 vorsam poilim vollkhotalo to Jack nhoi. Karonn Jehovachea Sakxeanche xikounne udexim tachem akʼkhem jivit bodolʼlem.” Jack-ak jivexim marlo khoro, punn tachea udharonnantlean ami Devachea Utracher visvas dovrunk zata ani tea Utrak munxachem jivit bodlunk xokti asa mhunn amkam kollon ieta.—Iz. 11:6-9.

15. Bible-antle solʼle apnnailolean aiz Jehovache lok sonvsarantlea lokam poros veglle koxe asat? (Chitr polloiat.)

¹⁵ Jehovacho lok Bible-ant dilʼle solʼle apnnaitat dekhun tanchea modem ekvott asa. (Ju. 13:35; 1 Kor. 1:10) Punn sonvsarantlea zaitea lokam modem rajkaronnak lagon, girestkaiek ani goribik lagon, ani zati-katik lagon futt poddlea. Tea pasot, Jehovachea lokam modem aslolo ekvott ekdom khas asa. Ho ekvott polloun Jean nanvachea eka tornnatteacher ekdom boro probhav poddlo. To Afrikachea eka desant vaddlolo. Tachea desant zhuz zalem tednam to foujent bhorti zalo. Punn uprant to xezarchea eka desant pollon gelo. Thoim to Jehovachea Sakxeank mellʼllo. Jean sangta: “Khorea dhormache lok rajkaronnant bhag ghenant ani tanchea modem ekvott ani mog asta mhunn hanv xiklom.” Jean fuddem mhunntta: “Hanvem mhojem jivit mhojea desa pasot zhuzonk somorponn kelʼlem. Punn hanv sot xiklom tednam hanvem mhojem jivit Jehova Devak somorponn  korunk nichov kelo.” Jean-an aplea jivitant bodlav kelo. Atam to aplea poros veglle aslolea lokam add zhuz korchea bodlek, apleak mellttolea soglea lokank Bible-ant aslolo xanticho sondex sangta. Tor Bible-ant dilʼlo solʼlo soglea raxttranchea ani sonskrutaiechea lokank faideak poddtta tem polloun, ami Bible-acher visvas dovrunk zata mhunn amkam khatrecho puravo melltta.

16. Devachea Utracher amcho visvas ghott korit ravop kiteak mhotvachem?

¹⁶ Hea sonvsarachi poristhiti anikui vaitt zata toxi, Devachea Utracher aslolea amchea visvasachi porikxa zatoli. Bible-ant khoreaninch sot asa kai, vo aiz Jehova aplea sevokank margdorxon diunk khoreaninch visvaxi ani xannea chakrak uzar korta kai, mhunn lok amchea monant dubhav ghalunk xoktat. Punn Devachea Utrant kainch fott na, tem ekdom khorem mhunn amkam purnn khatri asa zalear ami amcho bhavarth matui halonk diunchimnant. Ami ‘dhean-mon lavun Jehovache nem pallunk’ nichov kortolim. (St. 119:112) Toxench, lokank sota vixim sangonk ani Bible-achea dorjeam pormonnem cholonk tankam urba diunk ami ‘kednanch lozchimnant.’ (St. 119:46) Tea bhair, ekdom kotthin poristhitimnim, zoxem amcher dhumallo ieta tednam pasun, ami tacho “pasiensan ani khuxalkaien” fuddo korunk pavtolim.—Kol. 1:11, NW; St. 119:143, 157.

17. 2023 vorsachem vers amkam kitem korunk modot kortolem?

¹⁷ Jehovan amkam tachea Utrantlean sot kolloilam mhunn ami kitlim upkari asat nhoi! Hem sot zannam zalolean amkam xant ravonk modot zata, toxench amkam bhorvonso melltta. Ani hea sonvsarant anikui goddbodd vaddtta toso ami koxem jieunk zai tem ami zannam zatat. Tea bhair, Devachea Rajea khala amkam ek boro fuddar astolo mhunn amkam bhorvonso melltta. Tor 2023 vorsachem vers, Devachem Utor soglem sotuch mhunn tumcho bhavarth anikui ghott kortolem mhunn ami axetat.—St. 119:160.