1. Dahaka dainai momo be Baibel idia abidadama henia lasi?

 HARI inai negai, taunimanima idia diba lasi daika do idia abidadama henia. Idia diba lasi bema politikol, saiens bona bisinesi taudia be edia namo idia laloa. Ma danu, idia be Kerisendom ena dubu gunalaia taudia idia matauraia lasi. Unai dainai, idia ura lasi tomadiho gunalaia taudia ese idia gwau idia badinaia bukana, Baibel, idia abidadama henia.

2. Salamo 119:160 hegeregerena, dahaka ita abia dae diba?

² Ita be Iehova ena hesiai taudia dainai, ita abia dae ia be “kara momokani Diravana” bona hanaihanai iseda namo ia laloa bada. (Sal. 31:5; Isa. 48:17) Ita abia dae Baibel lalonai ita duahia hereva ita abidadama henidia diba, badina “[Dirava ena] hereva ibounai be momokani.” (Salamo 119:160 duahia.) Baibel ia diba bada tauna ta, ia gwau: “Dirava ese ia gwauraia herevadia be idia koikoi lasi bona do idia guguru. Dirava ena taunimanima ese unai diba bada tauna ese ia gwauraia hereva idia abia dae diba, badina unai hereva ia gwauraia Diravana idia abidadama henia.”

3. Inai atikol ai dahaka do ita herevalaia?

³ Edena dala ai ma haida ita durua ita bamona, Dirava ena hereva idia abidadama henia totona? Mani Baibel ita abidadama henia ena badina toi ita herevalaia. Do ita itaia Baibel ena hereva be idia idau lasi, Baibel ena peroveta herevadia idia guguru, bona Baibel ese taunimanima edia mauri ia haidaua.

4. Dahaka dainai haida idia laloa Baibel ena hereva be idia haidaua?

⁴ Iehova Dirava ese abidadama tatau 40 ia gaukaralaia Baibel ena buka idauidau idia torea totona. To, hari unai maniuskrip korikoridia be idia noho lasi. b Unai maniuskrip be nega momo idia torea hanai, bona edia kopi sibona idia noho. Unai dainai, haida idia daradara bema hari Baibel lalonai ita duahia herevadia be unai maniuskrip gunadia hegeregerena. Edena dala ai ita hamomokania diba Baibel ena hereva be idia haidaua lasi?

5. Heberu Toretoredia idia torea hanai gaukarana be edena bamona idia karaia? (Rau 1 ena laulau itaia.)

⁵ Iehova ese Baibel ena hereva ia gimaia totona, ena taunimanima ia hamaorodia kopi do idia toredia. Ia ese Israela edia king taudia ia hamaorodia Taravatu ena kopi ta be idia sibona totona do idia torea, bona Levi taudia ia abia hidi unai Taravatu be taunimanima dekenai do idia hadibaia. (Deu. 17:18; 31:24-26; Neh. 8:7) Iuda taudia be Babulonia ai idia lao murinai, toretore taudia oreana ta be Heberu Toretoredia edia kopi momo idia torea hanai. (Esr. 7:6, ftn.) Unai tatau be edia gaukara idia karaia namonamo. Gabeai, toretore taudia idia ura hamomokania idia torea hanai herevadia be maoro dainai, hereva bona leta ta ta idia duahia. To idia be goevadae lasi taudia dainai, unai kopi haida lalonai kerere maragidia haida idia karaia. Unai lokua toretore ena kopi be momo idia karaia dainai, gabeai unai kerere maragidia idia davaria.

6. Edena dala ai Baibel idia torea hanai taudia edia kerere idia davaria?

⁶ Hari inai negai, diba bada taudia be dala namona ta amo Baibel idia torea hanai taudia edia kerere idia davaria diba. Mani inai haheitalai ita laloa: Tatau 100 idia hamaorodia rau ta ena hereva ibounai be imana amo do idia torea hanai. Idia ta be ena kopi dekenai kerere maragina ta ia karaia. Unai kerere ita davaria totona ia torea kopi be ma haida edia kopi ida do ita hahegeregerea. Unai hegeregerena, Baibel ena maniuskrip haida idia hahegeregerea karana amo, diba bada taudia ese toretore taudia edia kerere eiava idia kokia herevadia idia itaia diba.

7. Baibel idia torea hanai taudia edia gaukara be edena bamona idia karaia namonamo?

⁷ Baibel idia torea hanai taudia be edia gaukara idia karaia namonamo. Mani unai point ia hahedinaraia haheitalai ta ita laloa. Heberu Toretoredia edia maniuskrip gunana ena kopi ibounai be lagani 1008 o 1009 C.E. ai idia torea. Iena ladana be Leningrad Codex. To, vanegai laganidia lalonai, Baibel maniuskrip eiava edia kahana maragidia haida idia davaria, bona idia be lagani 1,000 gunanai idia torea gaudia. Reana ta do ia laloa lagani 1,000 lalodiai maniuskrip ena kopi momo idia torea hanai dainai, Leningrad Codex ena toretore be vanegai idia davaria maniuskrip edia toretore amo do idia idau. To, unai be momokani lasi. Diba bada taudia haida ese Baibel maniuskrip gunadia be Leningrad Codex ida idia hahegeregerea neganai, idia davaria edia hereva haida sibona be idia idau, to unai ese Baibel ena hereva badana ia haidaua lasi.

8. Keristani Greek Toretoredia edia kopi bona guna idia torea buka ma haida edia idau be dahaka?

⁸ Keristani ginigunadia ese Heberu Toretoredia idia torea hanai taudia edia gaukara idia tohotohoa. Idia ese Greek Toretoredia ena buka 27 edia kopi idia karaia bona edia hebou bona haroro gaukara ai idia gaukaralaia. Diba bada tauna ta ese Greek Toretoredia be nega tamona ai idia torea buka  ma haida ida ia hahegeregerea neganai, ia gwau: “[Greek Toretoredia edia maniuskrip edia kopi] momo idia do noho ema bona hari, . . . bona edia toretore ibounai be hegeregere, to buka ma haida be unai bamona lasi.” Buka ta (Anatomy of the New Testament) ia gwau: “Ita abia dae diba hari idia hahanaia [Greek Toretoredia] ita duahia neganai, idia be idaunegai toretore taudia ese idia torea herevadia hegeregerena.”

9. Edena dala ai Isaia 40:8 ena hereva be momokani?

⁹ Lagani momo lalodiai Baibel idia torea hanai taudia edia gaukara namona dainai, hari ita ese Baibel ita duahia bona stadilaia diba. c Ita daradara lasi, Iehova ese iena hereva ia gimaia, bona unai dainai taunimanima ibounai ese idia duahia diba. (Isaia 40:8 duahia.) To, reana haida idia gwau Baibel be ia noho ema bona hari ese ia hamomokania lasi Dirava ese Baibel ia torea. Mani hamomokania gaudia haida ita herevalaia.

10. Mani 2 Petero 1:21 ena hereva ia hamomokania peroveta herevana ta oi gwauraia. (Laulau itaia.)

¹⁰ Baibel ena peroveta herevadia momo be idia guguru. Idia haida be idia torea bena lagani handred momo murinai idia guguru. Histori ese ia hamomokania danu unai peroveta herevadia be idia vara momokani. Unai dekenai ita hoa lasi, badina ita diba Baibel ena peroveta herevadia ibounai be Iehova amo. (2 Petero 1:21 duahia.) Hegeregere, idaunega Babulonia ena siti do ia moru ena peroveta herevadia mani ita laloa. Lagani 778 bona 732 B.C.E. huanai, peroveta tauna Isaia ia gwau siti goadana Babulonia be tuari taudia ese do idia hadarerea. Ia gwau unai siti do ia hadarerea tauna ena ladana be Kurese, bona siti do ia hamorua dalana ia herevalaia. (Isa. 44:27–45:2) Danu, Isaia ia gwau Babulonia be do idia hadikaia momokani bona taunimanima ta ese do ia noholaia lasi. (Isa. 13:19, 20) Unai be ia vara momokani. Lagani 539 B.C.E. ai, Mede bona Parasa tuari taudia ese Babulonia idia hadarerea  bona hari unai siti badana be nadi momoru sibona.​—Vidio ladana, Baibel ese Babulonia Ena Moru ia Perovetalaia be Mauri Moalelaia Hanaihanai! ena elektronik gauna, leseni 3 point 5 ai oi itaia.

11. Edena dala ai Daniela 2:41-43 be hari ia guguru noho?

¹¹ Baibel ena peroveta herevadia be idaunegai sibona lasi to hari inai negai danu idia guguru noho. Hegeregere, Daniela ese Anglo-America Basileia Badana ia perovetalaia ena guguru dalana mani ita laloa. (Daniela 2:41-43 duahia.) Unai peroveta herevana ia hahedinaraia unai basileia badana be “mai ena goada” auri bamona bona “mai ena manoka” raro bamona. Unai ia vara momokani. Britain bona America be auri bamona edia goada idia hahedinaraia, Tanobada Tuari badadia rua idia gunalaia bona idia kwalimu bona hari edia ami be idia goada noho. To, edia goada be edia taunimanima ese idia hamanokaia, unai taudia ese bisinesi bona gavamani idia dagedage henia. Vanegai politikol oreadia edia kara ia stadilaia tauna ta, ia gwau: “Hari, United States be politikol dalanai ia parara momokani, tano ma ta be unai bamona lasi.” Bona unai basileia badana ena kahana, Britain tanona unai, be vanegai laganidia lalonai ia parara badina taunimanima haida idia ura European Union idia rakatania, to haida be idia ura lasi. Unai lalotamona lasi karadia dainai ia auka Anglo-America Basileia Badana be disisen maorodia ia karaia totona.   

12. Edena dala ai Baibel ena peroveta herevadia ese ita ia hagoadaia?

¹² Baibel ena peroveta herevadia momo idia guguru vadaeni karana ese iseda abidadama ia hagoadaia, badina Dirava ena gwauhamata vaira negai totona be do ia vara momokani. Iseda hemami be Salamo torea tauna ena hegeregerena, ia gwau: “Emu hahemauri totona lau naria noho, badina emu hereva lau abidadama henia.” (Sal. 119:81) Iehova be Baibel amo ita dekenai “vaira nega ai noho namo” ena helaro ia henia. (Ier. 29:11) Iseda helaro vaira nega totona be Iehova ena gwauhamata hegeregerena do ia vara, to taunimanima ena lasi. Baibel ena peroveta herevadia ita stadilaia namonamo karana amo, Dirava ena Hereva do ita abidadama henia noho.

13. Salamo 119:66, 138 hegeregerena, Baibel ita abidadama henia ena badina ta be dahaka?

¹³ Baibel ita abidadama henia ena badina ma ta be, taunimanima ese ena sisiba idia badinaia neganai namo idia davaria. (Salamo 119:66, 138 duahia.) Hegeregere, tau ta bona ena adavana be kahirakahira idia divos, to Baibel ena sisiba idia badinaia dainai hari idia moale noho. Danu, edia natudia idia moale badina edia tama sina ese idia lalokau henidia bona lalodia bada.​—Efe. 5:22-29.

14. Mani Baibel ese taunimanima edia mauri ia haidaua ena haheitalai ta gwauraia.

¹⁴ Baibel ena sisiba badinaia karana ese raskol taudia dikadia ia durua edia mauri idia haidaua totona. Dibura ruma ai ia noho tauna ta, ladana Jack ia durua dalana mani ita laloa. d Momo idia diba ia be dagedage tauna, bona kota ia gwau do idia hamasea. To dina ta Jack be Baibel stadi ta lalonai ia helai. Stadi idia hakaua tadikaka edia kara namodia ese ena lalona ia veria dainai, ia danu be ia stadi matamaia. Jack be Baibel ena hereva momokani ia badinaia neganai, ena kara ia haidaua bona tau namona ai ia lao. Daudau lasi murinai, Jack be bapatiso lasi pablisa ai ia lao bena ia bapatiso. Dibura taudia ma  haida dekenai Dirava ena Basileia ia harorolaia goadagoada bona dibura taudia foa ia durua Baibel idia stadilaia totona. Jack do idia hamasea dinana ia ginidae neganai, ia be ena mauri ia haidaua vadaeni. Jack ena loea ta ia gwau: “Jack ena mauri be lagani 20 gunanai bamona lasi. Iehova ena Witnes taudia edia hahediba herevadia ese ena mauri ia haidaua.” Herevana Jack idia hamasea, to ena sivarai ese ia hahedinaraia ita ese Dirava ena Hereva ita abidadama henia diba, bona ia be mai ena siahu ta ena mauri ia haidaua bona taunimanima namona ai ta ia halaoa totona.​—Isa. 11:6-9.   

15. Iehova ena taunimanima be Baibel ena hereva idia badinaia dainai edena dala ai idia idau? (Laulau itaia.)

¹⁵ Iehova ena taunimanima be idia lalotamona badina Baibel ena hereva momokani idia badinaia. (Ioa. 13:35; 1 Kor. 1:10) Bona iseda huanai ia noho maino bona lalotamona karana be taunimanima ese idia itaia diba, to tanobada taudia be politikol, bese bona mauri dalana dainai idia parara. Tau matamata ta ladana Jean be Iehova ena taunimanima huanai ia noho lalotamona karana ese ia hagoadaia. Ia be Africa tanona ai ia tubu daekau. Tuari ia vara matamaia neganai, ami lalonai ia vareai to gabeai tano ma ta dekenai ia heau. Unuseniai Iehova ena Witnes taudia ia davaria. Jean ia gwau: “Lau dibaia gauna be tomadiho momokanina idia badinaia taudia be politikol karadia lalonai idia vareai lasi bona idia parara lasi, to ta ta idia lalokau henia.” Ma ia gwau: “Egu mauri lau gaukaralaia bona tano ta totona lau heai. To Baibel ena Hereva momokani lau diba neganai, egu mauri lau gaukaralaia Iehova lau hesiai henia totona.” Jean be ena mauri ia haidaua momokani. Hari idau taudia ia tuari henia lasi, to taunimanima ibounai dekenai Baibel ena hereva momokani ia hadibaia. Oibe, Baibel ena sisiba ese taunimanima idauidau ia durua karana ese ia hamomokania, Dirava ena Hereva ita abidadama henia diba.

16. Dahaka dainai Dirava ena hereva dekenai iseda abidadama ita hagoadaia be gau badana?

¹⁶ Inai tanobada be ia dika ia lao noho lalonai, do ia auka Dirava ena hereva momokani ita abidadama henia totona. Taunimanima ese ita dekenai daradara do idia havaraia, reana do ita laloa Baibel be momokani eiava hari Iehova ese hesiai tauna mai ena kamonai bona mai ena aonega ia abia hidi ena hesiai taudia ia hakaua totona, a? To bema ita abia dae Iehova ena Hereva be hanaihanai ia momokani, iseda abidadama idia hadikaia herevadia do ita dadaraia. Iseda ‘lalona ita hadaia, [Iehova ena] hakaua hereva ita badinaia . . . nega ibounai ela bona hanaihanai.’ (Sal. 119:112) Do ita “hemarai lasi” ma haida dekenai hereva momokani ita gwauraia bona idia ita hagoadaia edia mauri ai Baibel ena sisiba idia badinaia totona. (Sal. 119:46) Danu, ita ese metau aukadia bona dagedage be “mai boga-auka bona moale ida” do ita haheaukalaia.​—Kol. 1:11; Sal. 119:143, 157.

17. Iseda lagani ena siri badana ese ita dekenai dahaka ia hadibaia?

¹⁷ Iehova ese ita dekenai hereva momokani ia hahedinaraia karana be moale gauna, ani? Hereva momokani ese ita ia durua ita manau bona gari lasi totona. Danu ita ia hadibaia namonamo edena bamona inai daradara bona hekwakwanai amo ia honu tanobadana ai do ita noho totona. Dirava ena Basileia ese ita dekenai vaira nega ena helaro namona do ia henia. Iseda lagani 2023 ena siri badana ese iseda abidadama ia hagoadaia badina Dirava ena Hereva ibounai be momokani!​—Sal. 119:160.