1. Ena anua gbɛnɛ-edo nɛɛ anii’ee naa dɛrɛ nyiɛ nyɔɔ ue a le bu Baibol a?

 GBƐNƐ-EDO nɛɛ anii’ee naa dɛrɛna nyiɛ nyɔɔ pya dɔɔ̄na. Ba naa suā lo pya nɛɛ ba dɛrɛ nyiɛ nyɔɔ doodoo pya bɛbɛɛ, pya saɛns, le pya uradu gbīge nu elee wa loo naa e. Gbaāloo wo, ba naa nɛ enwadɛɛ̄ pya zaāsī tɔbari ba kɔ ba gaa nyɔɔnɛe dumɛ Kraist. Nyɔɔwo, a naa lu i nyɛŋia loo kɔ ba naa ɛrɛ yira bu kpa pya zaāsī yigabari ama kɔ ba gaa zue e’ue aābu, lo a le Baibol.

2. Dɛɛa nyɔɔ ue a le bu kpa Le-yɔɔ 119:160, ena i ɛrɛ esuā leere a?

² Kuma sɔ̄ i lu pya zooro Jɛhova a, i suā leere kɔ alɛ na Bari a “bɔloo eture nyiɛ loo” a, sa a wee gbī nu elee i loo dɛ̄dɛɛ̄ sɔ̄. (Yɔɔ 31:5; Ais 48:17) I suā kɔ i dabe dɛrɛ nyiɛ nyɔɔ nu a le bu Baibol lo a kɔ, “buā . . . ue [Bari] lu kaka.” b (Buū Le-yɔɔ 119:160.) I yiga nu ziī nɛɛ enɔā gbɛnɛkpa a wee nɔ Baibol bee ɛm, lo a kɔ: “Lɔgɔ nu Bari kɔ naa lu esah, e a ɛrɛge edooa. Pya nɛɛ Bari dap dɛrɛ nyiɛ nyɔɔ pya nu a kɔ, nyɔnɛbee ba ture ye nyiɛ loo.”

3. Ena i kɛɛrɛbu bu ekobee ue ama a?

³ Mɛ sīdee na i dap yerebah nɛ pya dɔɔ̄na kɔ ba a dɛrɛ nyiɛ nyɔɔ Muɛ̄ Ue Bari dookɛ̄ ili doo a? Doraa i naa kɛɛrɛbu taa nu anua i dap dɛrɛ nyiɛ nyɔɔ Baibol. I gaa le kɛɛrɛbu kɛ̄ nu alu e’ɛm bu Baibol sii lu enyaana doo, kɛ̄ mɔmanudɛɛ̄ Baibol dooa gbɔ̄mɛɛ doo, le kɛ̄ Baibol ɛrɛ ekpo lo enyaana dum pya nɛɛ doo.

4. Ena anua pio nɛɛ kɛɛrɛ kɔ elua enyaana nu a le bu Baibol a?

⁴ Jɛhova Bari bee su nu alu 40 pya nɛɛ ɛma Baibol. Kerewo, taɛ pya kpa a bee dasī lu e’ɛm bu naa lena ilii dee ama. c Dɛ̄dɛɛ̄ lo i ɛrɛ anii’ee na pya lo a bee lu esikɛ̄ ɛm aāloo lo tuatua. Wo doo kɔ pio nɛɛ a bura lo a le pya nu i gaa buū bu Baibol anii’ee luge aba etɛɛ̄nɛ loo ue a bee le bu lo tuatua a bee lu e’ɛm naa e. O ebee kɛɛrɛge nu anua i yiga kɔ ba lu aba etɛɛ̄nɛ ni?

5. Bu mɛ sīdee na a bee lu esikɛ̄ ɛm Kpa Kaɛ a bee lu e’ɛm bu muɛ̄ ue Hibru a? (Ɛp foto a le nyɔɔ eko.)

⁵ Lokwa a dap lu ekpoogeloo pya ue a bee su ye edɔɔ̄ ɛma ama, Jɛhova bee kɔ alu esikɛ̄ ɛm. A bee kɔ nɛ pya mɛnɛ-buɛ̄ Izrɛl kɔ ba a su wa bah ɛma kpa Lok nɛ wa loo, sa a bee tubobaloo pya Livai kɔ ba a tɔgɛ lo Lok pya nɛɛ. (Deut 17:18; 31:24-26; Neh 8:7) Sɔ̄ ebee lu e’aa pya Juu kuma Babilɔn, ziī eku pya a wee para ɛm kpa, bee bɔātɛ̄ ɛm gbɛnɛ-edo Kpa Kaɛ bu muɛ̄ ue Hibru. (Ezra 7:6) Pya nɛɛ ama bee nwaɛ̄dɛɛ̄ kaāna. E sɔ̄ sɔ̄ aa kiisī, pya ɛm kpa naa bee buū aba buā beebee ue, mɛ ba bee buūnage buā ziī ziī lo eyuu kpa lo emuɛ kɔ dɛ̄dɛɛ̄ nu a bee sikɛ̄ lu e’ɛm era. Mɛ nyɔnɛbee ba lu pya a naa mmana a, pio nwīgbagbara ekwɔ bee yiibu e’ɛma Baibol ama. Kerewo, bee lu e’ɛm gbɛnɛ-edo Kpa Kaɛ ama, nyɔɔwo bee lu emuɛ pya ekwɔ ama sɔ̄ esaa. Bu mɛ sīdee ni?

6. Bu mɛ sīdee na a dap lu emuɛ pya ekwɔ a le bu Baibol a bee lu esu bah ɛma a?

⁶ Pya enɔā gbɛnɛ kpa bu ilii dee ama ɛrɛ pya sīdee ba dap su suā kɛ̄ ekwɔ le bu Baibol a bee lu esikɛ̄ ɛm ama. Lo enɛ edoba: Naa su kɔ alu ekɔ nɛ 100 pya nɛɛ kɔ ba a sikɛ̄ su bah ɛma ziī kpa ebee lu e’ɛm. E ziī nɛɛ a wa le yɛɛ tɛɛ̄ kina ekwɔ sɔ̄ a gaa ɛm. Ziī sīdee i dap muɛ lo ekwɔ na susu lo alɛ bee ɛm dooreloo lo pya elua nɛɛ a bee ɛm. Bu aba lo sīdee, tɛ̄maloo esu pya Baibol a bee lu e’ɛm ama dooreloo ziī, pya enɔā gbɛnɛ kpa edaba muɛ ekwɔ a le bu ale kɛ̄ nɛɛ a bee ɛm pɛɛ yee pio ue.

7. Ena a tɔgɛ kɔ pya a bee sikɛ̄ ɛm Baibol bee doo kɔ a lera sī a?

⁷ Pya a bee sikɛ̄ ɛm Baibol bee piaga kaāna lo edoo kɔ nu ba bee ɛm a lera sī. Naa ɛp ziī edoba a tɔgɛ lo ama. Bee lu esikɛ̄ ɛm lo tuatua ekpo Baibol a bee lu e’ɛm bu muɛ̄ ue Hibru a bu zua 1008 ale 1009 C.E. Alu ekure ye Leningrad Codex. Kerewo, bu aā dee ama, elua emuɛ̄ pio Baibol a bee lu e’ɛm le epɛɛ epɛɛ alu loo, lo a su nu alu 1,000 zua nama Leningrad Codex. Pio nɛɛ dap kɛɛrɛ kɔ sɔ̄ elua esikɛ̄ ɛmgi pya lo kpa gbɛnɛ-edo sɔ̄ bu nu a eeloo 1,000 zua a, e’ɛmanu Leningrad Codex naale e’aana dee bee pya lo nama e’ɛma a. Kerewo, a naale doo wo. Sɔ̄ ba su lo nama le lo aā dooreloo ziī, pya enɔā gbɛnɛ kpa muɛ kɔ kunɛ nwīgbagbara kee na a le yɛɛ pya bee bee ue ba su ɛma a. Kerewo, ue a bee le bu Baibol naa nyaa.

8. Ena alu bera a le yɛɛ sɔ̄ alu esu Baibol a bee lu e’ɛm bu muɛ̄ ue Grik dooreloo pio e’ɛma a bee le a dee kere a?

⁸ Pya Nɛɛ Kraist a bee le bu bagara sɔ̄ bee nyɔɔnɛ edoba pya a bee sikɛ̄ ɛm Kpa Kaɛ a bee lu e’ɛm bu muɛ̄ ue Hibru. Ba bee kuūdɛɛ̄kɛ̄ sikɛ̄ ɛm 27 ekpo ekpo kpa Baibol alu e’ɛm bu muɛ̄ ue Grik, lo  ba wee su daānu sɔ̄ ba gbaa bɔŋana le sɔ̄ ba gaa zue ue. Sɔ̄ elua esu pya Kpa Kaɛ alu e’ɛm bu muɛ̄ ue Grik dooreloo pya dɔɔ̄na kpa a bee lu e’ɛm lo sɔ̄, ziī nɛɛ enɔā gbɛnɛ kpa kɔ kpaɛ̄ kɔ: “Dookɛ̄ a le doo, gbɛnɛ-edo [naɛsī Kpa Kaɛ a bee lu e’ɛm bu muɛ̄ ue Grik] le kɛ̄ anii’ee ee pya dɔɔ̄na kpa, . . . e gbɛnɛkpo ɛɛ era.” Ziī kpa a kura Anatomy of the New Testament kɔ: “Nɛɛ dap dɛrɛ nyiɛ nyɔɔ kɔ nu a buū aābu tatap Baibol a bee lu e’ɛm bu aā sɔ̄ ama [lo a le naɛsī Kpa Kaɛ a bee lu esu muɛ̄ ue Grik ɛma] lu taɛ nu pya a bee ɛm a dee kere a bee ɛm.”

9. Dookɛ̄ kpa Aisaia 40:8 kɔ doo, ena alu kaka akiiloo yereue Baibol a?

⁹ Kɛ̄ pya a bee sikɛ̄ ɛm Baibol bee kuūdɛɛ̄kɛ̄ doo ama, edora kɔ pya Baibol i buū sa nɔ anii’ee alu kaka. d Bu kaka, ɛɛ Jɛhova na a doo kɔ alu ekpooge ye kaka ue leere nɛ pya nɛɛ a. (Buū Aisaia 40:8.) Kerewo, pio nɛɛ dap amkɛ̄ kɔ aba bee a bee lu ekpooge loo ue a le bu Baibol a, naa kura kɔ a aabah Bari. Nyɔɔwo, i naa ɛp pio nu a tɔgɛ kɔ Bari na a bee su ye edɔɔ̄ nɛ pya a ɛm a.

10. Naa nɛ edoba akiiloo mɔmanudɛɛ̄ a bee dooa gbɔ̄mɛɛ lo a tɔgɛ kɔ ue a le bu 2 Pita 1:21 lu kaka. (Ɛp foto.)

¹⁰ Baibol aara gbɛnɛ-edo mɔmanudɛɛ̄ a bee dooa, lo pio ɛɛ bee dooa sɔ̄ nu a yeeloo o’oo tup zua etɛ̄na aā sɔ̄ a bee lu e’ɛm. Eloh kere tɔgɛ kɔ pya lo mɔmanudɛɛ̄ ama bee dooa. Lo ama naa lu i nyɛŋialoo nyɔɔbee i suā kɔ Nɛɛ a ɛrɛ mɔmanudɛɛ̄ a le bu Baibol na Jɛhova. (Buū 2 Pita 1:21.) Naa kɛɛrɛ nu akiiloo dɔdɔ gbɛnɛ buɛ̄ Babilɔn a dee kere. Bu ɛrɛtaa sɔ̄ o’oo tup zua B.C.E., tɛ̄maloo kaɛ edɔɔ̄ nɛɛ mɔmanudɛɛ̄ Aisaia bee kɔ sere kɛ̄ kɔ elu ebe eebah gbɛnɛ buɛ̄ Babilɔn. A bee kuenage bee nɛɛ ebe eebah lo buɛ̄, lo a le Sairus, sa  kɔnage taɛkɛ̄ elu egbeesī lo buɛ̄ doo. (Ais 44:27–45:2) Aisaia bee kɔnage kɔ elu egbeesī Babilɔn sa etɔɔ̄ ekobu. (Ais 13:19, 20) E taɛkɛ̄ a bee sira doo lo. Pya Media le pya Pesia bee be eebah Babilɔn a bu zua 539 B.C.E., e kɛ̄ gbɛnɛ buɛ̄ a bee le elua kpo gbegbee anii’ee—Ɛp vidio a kɔ Baibol Ebee Kɔ Dɔdɔ Babilɔn Sere Kɛ̄ a le 5 gah loo 03 nuenɔ bu kpa a kura Ɛrɛ Ekpeloo Dum Mmɛ Deedee! lo a le bu fon ale kɔmputa.

11. Naa baatɛ̄ kɛ̄ kpa Daniel 2:41-43 gaa dooa gbɔ̄mɛɛ doo anii’ee.

¹¹ Pya mɔmanudɛɛ̄ Baibol aa dooa gbɔ̄mɛɛ anii’ee dookɛ̄ a bee dooa doo a dee kere. Bu edoba, naa kɛɛrɛ kɛ̄ mɔmanudɛɛ̄ akiiloo Bɛbɛɛ Anglo-America aa dooa gbɔ̄mɛɛ doo. (Buū Daniel 2:41-43.) Lo mɔmanudɛɛ̄ bee kɔ kɛ̄ bɛbɛɛ nyɔuwe alu baɛ aba bu ziī ama emɛā doo, sɔ̄ a kɔ “pio sīdee gaa le ɛrɛ ekpo” e “pio sīdee waɛ ebuū” doodoo baɛ̄. Nyaawo, i emɔna kɔ lo ama lu kaka. Britain le America etɔgɛ kɛ̄ ba agaloo bee kpe doo, tɛ̄maloo e’eebah baɛ gbɛnɛ nɔ̄ nyɔuwe sa kiisī lo e’ɛrɛ gbɛnɛkpo pya be nɔ̄. Kerewo, pya a wa le kɛɛ̄ edora kɔ wa ekpo a ɔloo tɛ̄maloo e’amkɛ̄ kɔ alu enɛe wa nu a wa kuu, be pya bɛbɛɛ sa aara kpa tɛ̄ma yah lo ekɔ ue loo nu a naa nia wa. Ziī nɛɛ a wee kɔ nu akiiloo bɛbɛɛ nyɔuwe kɔ a kunɛ dee ama kɔ: “Lɔgɔ bɛbɛɛ pya nɛɛ a ɛrɛ epoo epoo bee lo pya United States anii’ee naale.” E pya Britain alu ziī gah loo ekpo bɛbɛɛ nyɔuwe ama, esiakɛ̄ ɛrɛ epoo epoo bu pio zua akii adumɛ eekɛ̄ a wee le doo, nyɔɔbee keekee ekɛɛrɛ ba ɛrɛ kiiloo kɛ̄ ba esu loo gbaloo pya edonyɔɔ a nuūna European Union doo. Bia kina popooa ama doo kɔ aa waɛnabah Ekpo Bɛbɛɛ Nyɔuwe Anglo-America lo esuā nu edoo.

12. Ena mɔmanudɛɛ̄ Baibol doo kɔ i suā leere a?

¹² Gbɛnɛ-edo mɔmanudɛɛ̄ Baibol lo edooa gbɔ̄mɛɛ doo kɔ i agɛrɛbah dɛrɛ nyiɛ nyɔɔ pya yii Bari eyira kumaloo deesī. A tɔɔ̄ i loo dookɛ̄ a bee tɔɔ̄loo nɛɛ ɛm le-yɔɔ lo a bee yere kara nɛ Jɛhova kɔ: “Ekpo etaa loo na piogi lo egbī o kpɔā, m ɛrɛ bɛābu bu o ue.” (Yɔɔ 119:81) Tɛ̄maloo Baibol, Jɛhova “[enɛa] i sɔ̄ a le sī le bɛābu.” (Jer 29:11) Bɛābu i ɛrɛ kiiloo deesī naa dɛɛa nyɔɔ nu nɛɛ dap doo, mɛ a dɛɛa nyɔɔ yii Jɛhova. Dooraa i kiisī lo edɛrɛ nyiɛ nyɔɔ Muɛ̄ Ue Bari tɛ̄maloo ebiibahkɛ̄ nɔ mɔmanudɛɛ̄ Baibol.

13. Dookɛ̄ kpa Le-yɔɔ 119:66, 138 kɔ doo, dɔɔ̄na ena a tɔgɛ kɔ a dap lu edɛɛa nyɔɔ Baibol a?

¹³ Lokwa i suā dɔɔ̄na nu a tɔgɛ kɔ i dap dɛrɛ nyiɛ nyɔɔ Baibol, i naa ɛp lenu a wee sira aabu sɔ̄ pya nɛɛ nyɔɔnɛ zuurabahtɔ̄ Baibol. (Buū Le-yɔɔ 119:66, 138.) Bu edoba, pya dam le wa lo ebee sah e’aaloo ziī esiakɛ̄ gbaa le bu ɛɛbu anyaawo. Pya wa miɔŋɔ ɛrɛ ɛɛbu lo ele butɔ lo wa tɛ le ka lu Nɛɛ Kraist a wa wereloo sa wa kuūdɛɛ̄loo.—Ɛfɛs 5:22-29.

14. Naa nɛ edoba a tɔgɛ kɛ̄ su kaka ue Baibol yere bu dogo nyaana dum pya nɛɛ kɔ a lee doo.

¹⁴ Tɛ̄maloo esu zuurabahtɔ̄ Baibol yere bu dogo, kunɛ pya bag dogo enyaana wa dum nua lo a lee. Naa ɛp kɛ̄ ye zuurabahtɔ̄ bee yerebah nɛ ziī nɛɛ a kura Jack lo a bee le kpɔgɔrɔ doo. e A bee le nɛɛ bag dogo a wee doo dogo  lumiī, a bee le yɛɛ pya ebee lu ebiaɛ kɔ alu efɛ. Mɛ Jack bee le kɛ̄ sɔ̄ a gaa bee lu enɔɛ̄ Baibol pya nɛɛ. Kɛ̄ pya wuga nɛɛdam a gaa bee tɔgɛ nu lu fɛgɛ doo bee ye tɔaloo kaāna, ewo bee doo kɔ a bɔātɛ̄ enɔ Baibol. Sɔ̄ a bɔātɛ̄ esu pya nu a gaa nɔ yere bu dogo, ye dum bee bɔātɛ̄ enyaa sa lee. Sɔ̄ sɔ̄ aa kiisī, Jack bee lu nɛɛ zue ue a sii liamaā, e sɔ̄ esaa a bee liamaā. A bee su mɛm zuema nu akiiloo Buɛ̄-mɛnɛ Bari nɛ pya le ɛɛ bee le tɔ-kpɔgɔrɔ sa bee yerebah nɛ nu a naa kiikɛ̄ ee nia nɛɛ kɔ ba a nɔ kaka ue. Lɛɛ a gae lu dee ba ye fɛ, Jack ebee nyaa. Ziī ye lawyer bee kɔ: “Jack naa lena dookɛ̄ m bee ye suāloo doo 20 zua akii adumɛ. Tɔgɛnu Pya Ekeebee Jɛhova enyaana ye dum.” Kere a bee lu efɛ Jack dookɛ̄ ebee lu ebiaɛ doo, ye edoba tɔgɛ kɔ i dap dɛrɛ nyiɛ nyɔɔ Muɛ̄ Ue Bari sa a ɛrɛ ekpo lo enyaana dum pya nɛɛ.—Ais 11:6-9.

15. Bu mɛ sīdee na su kaka ue a le bu Baibol yere bu dogo su pya nɛɛ Jɛhova nua kee anii’ee a? (Ɛp foto.)

¹⁵ Pya nɛɛ Jɛhova ɛrɛ gbaaloo nyɔnɛbee ba su kaka ue Baibol yere bu dogo. (Jɔn 13:35; 1 Kɔr 1:10) Pya nɛɛ yere nukuādɛɛ̄ loo efɛɛloo le gbaaloo a i le yɛɛ sɔ̄ ba muɛ epoo epoo a le yɛɛ pya bɛbɛɛ, pya a aa keekee barasī, le pya a ɛrɛ nu ee ziī a le bu nyɔuwe anii’ee. Sɔ̄ ziī zege gbara a kura Jean bee muɛ̄ kɛ̄ gbaaloo le yɛɛ pya nɛɛ Jɛhova doo, a bee ye ɛrɛ kaāna pah nyɔɔ. A bee lu ekpɔā ye bie ziī edonyɔɔ a le barasī Africa. Sɔ̄ nɔ̄ bee dɔ lo edo, a bee yii bu nɔ̄ e sɔ̄ esaa a bee teera kii dɔɔ̄na edonyɔɔ a wa le kpaɛ̄. A bee zɔ̄ŋia Pya Ekeebee Jɛhova bie lo kɛ̄. Jean kɔ: “M bee nɔ kɔ pya a gaa taāŋabah Bari bu kaka sīdee naa wee yii bu bira bɛbɛɛ, e ba naa wee ɛrɛ epoo epoo yɛɛ wa. Taāwo, ba wereloo ziī.” A kiisī lo ekɔ: “M bee su na dum  nɛ bebe lo ekpega na edonyɔɔ. Mɛ sɔ̄ m bee nɔ kaka ue a le bu Baibol, m bee kiī na dum nɛ Jɛhova.” Jean bee nyaa kaāna. Nyaawo, taā a bebe loo pya alu dɔɔ̄na barasī, a gaa zue kaka ue a le bu Baibol nɛ dɛ̄dɛɛ̄ pya a zɔ̄ŋia, lo a su pya nɛɛ gbaloo ziī. Kɛ̄ zuurabahtɔ̄ Baibol dap dɔbiī nɛ pya wa kɛ̄tɔɔ̄ lu keekee doo, lu nu a tɔgɛ kaāna kɔ i dap dɛrɛ nyiɛ nyɔɔ Muɛ̄ Ue Bari.

16. Ena anua alu ebɛɛ̄ kɔ i agɛrɛbah dɛrɛ nyiɛ nyɔɔ Muɛ̄ Ue Bari a?

¹⁶ Kuma sɔ̄ nyɔuwe ama aa agɛrɛbah gbe a, doo kɔ a aga lo edɛrɛ nyiɛ nyɔɔ Muɛ̄ Ue Bari. Pya nɛɛ dap gbī edoo kɔ i ɛrɛ baɛbaɛ beenyiɛ kɔ Baibol kɔ kaka ue, ale kɔ Jɛhova gaa i baɛ loo anii’ee tɛ̄maloo zooro a bɔloo eture nyiɛ loo sa suā nu. Mɛ lo i yiga leere kɔ Muɛ̄ Ue Bari wee lu kaka dɛ̄dɛɛ̄ sɔ̄, i dap amana sɔ̄ alu egbanasī i yira. I dap biaɛfii lo ‘ekiira dɛ̄dɛɛ̄ i beenyiɛ lo edoo dɛ̄dɛɛ̄ etɔānu Jɛhova dɛ̄dɛɛ̄ sɔ̄, mmɛ kuma.’ (Yɔɔ 119:112) “Kɛɛ naale ebɔp” i lo ezue kaka ue nɛ pya dɔɔ̄na sa wa yere mɛm loo kɔ ba a tɔɔ̄dum a gbaaloo kaka ue. (Yɔɔ 119:46) E i dap egerebu bu pya kɛ̄tɔɔ̄ a aga gbɛnɛ, le sɔ̄ alu etɛ̄ŋa i loo sa i ɛrɛ “efɛɛ beenyiɛ gbaāloo ɛɛŋa.”—Kɔl 1:11; Yɔɔ 119:143, 157.

17. Ena ekobee ue zua ama i nyɛŋiabu a?

¹⁷ A nia i kaāna kɔ Jɛhova emuūna ye kaka ue i nɛ! Kaka ue doo kɔ loo i a ziina, i nɛ kaāna ekɛɛrɛ sa i leredeebah bu nyɔuwe a kwɔɔga sa taāŋa agɛrɛbah le bu ama. A nɛ i bɛābu kɔ le kɛ̄tɔɔ̄ ele li deesī kɛɛ̄ bɛbɛɛ Buɛ̄-mɛnɛ Bari. Naa lege bee i ekobee ue zua 2023 yerebah i nɛ kɔ i suā leere kɔ dɛ̄dɛɛ̄ nu a le bu Muɛ̄ Ue Bari lu kaka!—Yɔɔ 119:160.