1. Mukunda natshi mangino athu avula anago gushila Biblia mutshima?

 MANGINO athu avula anago gujiya gula nanyi ajiya gushila mutshima. Ana gudihula gula enya politike nu enya ndunge nu enya mungenda ana kamba diago gubonga guawo. Ana nemesa ndo mafumu a ikombelelo anyi ana zuela egi adi Aklisto. Gishina giene, tushigo naye gudihula gula athu ene ashigo mushila Biblia mutshima, handaga mafumu a ikombelelo yene ana zuela egi ana guyitumagela.

2. Ha gutadila Ngimbo 119:160, tudi naye gusha mutshima mu ndaga itshi?

² Esue akombeledi a Yehowa tuana sha mutshima egi Yehowa udi ‘Nzambi wa giamatshidia.’ Wana kamba nji gubonga guetu tangua diagasue. (Ngi. 31:5; Yesh. 48:17) Tudi mujiya egi tuajiya gusha mutshima mu ndaga tuana tanga mu Biblia. Tuana sha mutshima egi, ‘Mbimbi yaye yagasue idi ya giamatshidia.’ (Tanga Ngimbo 119:160.) Tudi mutshigina ndaga jiasonegele muenya ndunge mumoshi egi: “Gushigo nga ndaga imoshi yazuelele Nzambi idi ya mambo nga mbayishigo mutagenesewa. Akombeledi a Nzambi ana tshigina ndaga jiana zuela muene handaga ana gumushila mutshima.”

3. Itshi tuza muzuelela mu longo edi?

³ Luholo lutshi tuajiya gukuatesa athu ako, ha gushila Mbimbi ya Nzambi mutshima gifua esue? Tutadilenu ndaga thathu jidi gututuma ha gushila Biblia mutshima. Tuza mumona luholo ndaga jidi mu Biblia jiasombegesewego, luholo profesi jia Biblia jiatagenesewe nu luholo Biblia yana kuatesa athu ha gusombegesa makalegelo awo.

4. Mukunda natshi athu ako ana gudihula gula ndaga jidi mu Biblia jiasombegesewego?

⁴ Yehowa Nzambi watombele mala 40 agujinginyina ha gusonega Biblia. Uvi mangino tushigo nga nu manuscrit b amoshi a Biblia. Biblia jiagasue tudi najio, jidi phamba ba kopi a ba manuscrits ene. Gishina giene, athu ako ana gudihula gula ndaga tuana tanga mu Biblia jiakhala luholo lumoshi nu ndaga jiasonegele mala 40 atombewe gudi Nzambi. Aye nji wana gudihula ngenyi ba?

5. Luholo lutshi atshitshile kopi jia mikanda ya Biblia yasonegewe mu Hebelu? (Tala gifuanesa holu dia gizula.)

⁵ Ha gubamba Biblia, Yehowa watogele athu ha gutshita ba kopi avula. Wawambelele fumu wagasue wa gu Isalele ha gutshita kopi jienji jia Mikhuala. Watombele nji enya Levi ha gulongesa athu Mikhuala yene. (Mikh. 17:18; 31:24-26; Neh. 8:7) Tangua enya Yuda akatugile mu uhiga gu Babilona, athu ako mukatshi diawo akhalele mujiya muabonga gusonega mikanda, asendesele gusonega mikanda yavula ya Biblia yasonegewe mu Hebelu. (Ez. 7:6) Mala ene akhalele atema. Akhalele mutanga mbimbi nga gisona gimoshi gimoshi, ha gujiya gula asonegele diago ndaga gifua luholo jiakhalele. Uvi luholo akhalelego athu atagana, ajimbidile nji tundaga tuko tuazonda zonda mu Biblia. Luholo atshitshile ba kopi avula, yakhalelego lamba ha gumona mafundo ajimbidile. Luholo lutshi?

6. Itshi yakuatesele enya ndunge ha gumona mafundo athu atshitshile ba kopi ajimbidile?

⁶ Enya ndunge a mu tangua dietu akalegele metode amoshi abonga ha gujiya mafundo athu atshitshile ba kopi a Biblia ajimbidile. Ha gufezegesa, tangiza egi awambela athu 100 ha gutshita kopi ya mukanda umoshi nu mago. Uvi muthu mumoshi mukatshi diawo wajimbila ndaga imoshi yazonda mu kopi yenji. Ha gujiya fundo diajimbila muthu muene, tudi naye gufuanesa kopi yenji nu kopi jia athu ako 99. Luholo lumoshi nji tangua enya ndunge afuanesele ba manuscrits a Biblia, yakhalelego lamba gudi ene ha gumona mafundo athu atshitshile ba kopi alundile nga akatudile ndaga jiko.

7. Itshi idi mumonesa egi athu avula atshitshile ba kopi a Biblia atshitshile diago mudimo wabonga?

⁷ Athu atshitshile kopi jia manuscrits a Biblia atshitshile ngolo ha gujisonega gifua luholo jiakhalele. Tutadilenu gifezegeselo gidi mutshiginyisa ndaga eyi. Kopi ikulu ya mudidi ya Gitshinyi gia Biblia Giasonegewe mu Hebelu, yatshitshiwe mu givo 1008 nga 1009 G.Y. Kopi yene yana tamegewa egi Codex de Leningrad. Mu masugu abalega, enya ndunge amonele ba manuscrits nu itshinyi iko ya ba manuscrits yasonegewe ivo hehi nu 1 000 gutuama dia gusonega Codex de Leningrad. Athu ako ajiya gutangiza egi Codex de Leningrad idi diago ya gudisha nu ba manuscripts akulu. Handaga ba maniscrits ene, adiangele gusonegewa ivo gubalega 1 000 gutuama dia gusonega Codex de Leningrad. Uvi ishigo ngenyi. Tangua enya ndunge afuanesele ba manuscrits akulu nu manuscrits ahe-ahe, amonele egi gudisha guazonda guakhalele mu mbimbi uvi asombegeselego ndaga jidi mu Biblia.

8. Gudisha gutshi gudi mukatshi dia kopi jia Gitshinyi gia Biblia Giasonegewe mu Greke nu kopi jia mikanda iko ikulu?

⁸ Aklisto a mu siekle ya thomo nji alanduile gifezegeselo gia athu atshitshile ba kopi a mikanda ya Biblia yasonegewe mu Hebelu. Atshitshile muabonga kopi 27 jia mikanda ya Biblia yasonegewe mu Greke, jinyi akhalele mukalegela mu gudibungisa nu mu mudimo wa gulongesa. Tangua muenya ndunge mumoshi wafuanesele ba manuscrits a Gitshinyi gia Biblia Giasonegewe mu Greke nu mikanda iko yasonegewe mu tangua diene, wazuelele  egi: “Mangino gudi nu ba manuscrits avula a [Gitshinyi gia Biblia Giasonegewe mu Greke gubalega mikanda iko yasonegewe nu ba manuscrits ene sungi imoshi], . . . ba manuscrits avula mukatshi dia manuscrits ene akhala a mudidi.” Mukanda umoshi wana zuela egi: “Tuajiya gusha mutshima egi ndaga tudi mutanga mu [Gitshinyi gia Biblia Giasonegewe mu Greke] jiabalumuiwa mu masugu etu, jidi luholo lumoshi nu ndaga jiakhalele mu ba manuscrits akulu.”​—Anatomy of the New Testament.

9. Yeshaya 40:8 idi muzuela itshi mukunda nu ndaga jidi mu Biblia?

⁹ Athu avula atshitshile mudimo wakola, wa gutshita ba kopi a Biblia mu ivo yavula. c Hene tudi nu Biblia yabonga tuana tanga nu tuana longuga mangino. Tudi mujiya egi Yehowa watshitshile yagasue hagula tuhete Biblia idi nu ndaga gifua luholo jiasonegewe. (Tanga Yeshaya 40:8.) Uvi athu ako ajiya guzuela egi, luholo ndaga jidi mu Biblia jiasombegesewego, ishigo mukotelesa egi yasonegewe mu ngolo jia Nzambi. Henyaha tutadilenu ndaga jidi mumonesa egi Biblia yasonegewe mu ngolo jia Nzambi.

10. Hana gifezegeselo gidi mumonesa egi, ndaga jidi mu 2 Phetelo 1:21 jidi jia giamatshidia. (Tala gifuanesa.)

¹⁰ Biblia idi nu profesi jiavula jiatagenesewe gale. Profesi jiko jiasonegewe ivo yavula gutuama. Mene jiavula jidi mumonesa egi profesi jiene jiatagenesewe. Tushigo naye gudihula mukunda nu ndaga yene, handaga tudi mujiya egi profesi jiagasue jia Biblia jiana katuga gudi Yehowa. (Tanga 2 Phetelo 1:21.) Tangiza gale profesi yatadila gushiyiwa gua dimbo dia Babilona. Mu siekle ya 8 G.G.Y., nyuma ya Nzambi yakuatesele profete Yeshaya ha guzuela egi dimbo diakola dia Babilona mbadishiyiwa. Wazuelele nji egi Siluse mbawutambula dimbo diene. Wamonesele nji luholo dimbo diene mbaditambuiwa. (Yesh. 44:27–45:2) Yeshaya wazuelele nji egi dimbo dia Babilona mbadishiyiwa nu mbadisala makhulu. (Yesh. 13:19, 20) Ndaga jiabalegele diago ngenyi. Mu givo 539 G.G.Y., enya Mede nu Phelese atambudile dimbo dia Babilona. Fundo diene  didi makhulu uu nu mangino.​—Tala video Biblia Yadiangele Guzuelela Gushiyiwa gua Babilona mu mukanda Heta Monyo wa Ivo nu Ivo! longo 03 gitshinyi gia 5.

11. Kotelesa luholo lutshi profesi idi mu Danyele 2:41-43 idi mutagenesewa mangino.

¹¹ Profesi jia Biblia jiatagenesewego phamba mu tangua dikulu, uvi jidi mutagana nji mangino. Ha gufezegesa, tuzuelelenu gutagenesewa gua profesi ya Danyele yatadila ifutshi mbadi yabalega ngolo idi Muhinyina Mavu a Mudidi yana tamegewa egi Anglo-Americain. (Tanga Danyele 2:41-43.) Profesi yene yadiangele guzuela egi, ufumu udi muhinyina mavu agasue mbawukhala “gitshinyi giko giakola” gifua utadi, “gitshinyi giko gialeba” gifua uma. Mangino tudi mumona gutagenesewa gua profesi yene. Grande-Bretagne nu États-Unis amonesele egi adi akola gifua utadi, luholo atshistshile mudimo wakola ha gubinga ita ya thomo nu ita ya mbadi ya ha mavu a mudidi. Adi nji nu masuta a ngolo jiavula. Uvi enya ifutshi yawo ana lebesa ngolo jiawo, luholo ana zoga ha gutoga egi mafumu awo akalegele athu ndaga mu luholo luabonga. Ana tuma nji athu gudi mafumu ene, hagula akalegele enya midimo ndaga mu luholo luabonga. Ana gualumbugila nji. Muenya ndunge mumoshi wana longuga ndaga jia politike jia ha mavu, udi muzuela egi: “Mangino gushigo nu gifutshi gimoshi ha mavu a mudidi gidi gia gudikapha mu ndaga jia politike gifua États-Unis.” Mu ivo yabalega, Grande-Bretagne idi gitshinyi giko gia ngolo jia ha mavu a mudidi, yakhalele ya gudikhaphumuna handaga athu ako akhalele mutshigina egi asale mu Union européenne, uvi ako akhalele mutuna. Luholo enya ifutshi yene ana khala ya gudikhaphumuna mu ndaga jiavula, yana khala lamba gudi Anglo-Americain (Ngolo jia ha Mavu a Mudidi) ha gutshita ndaga nu ngolo jiagasue.

12. Profesi jia Biblia jidi gututshiginyisa itshi?

¹² Luholo profesi jia Biblia jiavula jiatagenesewe gale, idi mukolesa gutshigina guetu egi ndaga jiatulayele Nzambi mukunda nu masugu adi muza, mbajitagenesewa. Tuana gudivua gifua muadivile muyimbi wa ngimbo ha kombelele muene Yehowa egi: ‘Ngana nenga lusugu mbawunguhuluisa, handaga Mbimbi yaye yana gunguhana felela.’ (Ngi. 119:81) Yehowa watuhanele ‘felela mukunda nu masugu adi muza’ mu Mbimbi yenji. (Yel. 29:11) Tuanago gusha felela mu ndaga jiana gukalagala athu, uvi tuana sha felela mu ndaga jiatulayile Yehowa. Tuajiya gulandula gushila Mbimbi ya Nzambi mutshima gula tudi mulonguga muabonga profesi jia Biblia.

13. Ngimbo 119:66, 138 idi gutumonesa egi ndaga tshi iko yana gututuma ha gushila Biblia mutshima?

¹³ Ha gujiya ndaga iko yana gututuma ha gushila Biblia mutshima, tutadilenu gubonga athu ana heta gula adi mulandula malongo enji. (Tanga Ngimbo 119:66, 138.) Ha gufezegesa, athu ako akhalele mutshigina gushiya ma ulo awo, henyaha adi nu gusuanguluga luholo ana kalagela malongo a Biblia. Luholo mvuaji jiene jidi mukalegela malongo a Biblia, jiana gusansa an’awo nu guzumba guagasue. Ndaga yene yana suanguluisa an’awo, handaga ana gudivua egi mvuaji jiawo jiana guazumba nu jiana guabamba.​—Ef. 5:22-29.

14. Hana gifezegeselo gidi mumonesa luholo malongo a Biblia asombegesele makalegelo a athu.

¹⁴ Malongo a Biblia akuatesele gale athu ako akhalele mbundudi jiakola ha gusombegesa makalegelo awo. Tutadilenu luholo malongo ene akuatesele Jack d hakhalele muene mu bologo. Wakhalele mbundudi yakola  mukatshi dia mbundudi jinyi jiakhalele naye gushiyiwa. Uvi lusugu lumoshi Jack wayile mukhala ha fundo athu akhalele mulonguga Biblia. Luholo phangi wakhalele mutuameza gulonguga gua Biblia wakhalele muzuela nu gisemo, yakuatele diago mutshima wa Jack, muene nji wasendesele gulonguga Biblia. Tangua Jack wasendesele gukalegela malongo a Biblia, makalegelo enji nu umuthu wenji wasendesele nji gusombegesa. Jack wabuile mulongeshi khenji gabatijiwa galego gungima dienji wabatijiwe. Walongesele enya bologo ako nu gikhesa giagasue ndaga jiatadila Ufumu wa Nzambi. Wakuatesele athu nguana mukatshi diawo ha gulonguga Biblia. Mu lusugu lua gushiyiwa guenji, Jack wakhalele wasombegesa gale makalegelo enji. Muthu mumoshi mukatshi dia athu akhalele gumusophela milonga, wazuelele egi: “Jack ashigo luko gifua luholo ngamujiyile ivo 20 yabalega gale. Malongo a Matemue a Yehowa asombegesele makalegelo enji.” Ikhale Jack washiyiwe, uvi gifezegeselo gienji gidi mumonesa egi tuajiya gushila Mbimbi ya Nzambi mutshima, handaga idi nu ngolo jia gusombegesa makalegelo a athu.​—Yesh. 11:6-9.

15. Luholo lutshi gukalegela malongo a Biblia guana kuatesa akombeledi a Yehowa ha gukhala yagudisha nu athu ako? (Tala gifuanesa.)

¹⁵ Akombeledi a Yehowa ana khala mu gudivua handaga ana kalegela malongo a Biblia. (Yone 13:35; 1 Kol. 1:10) Gula tuafuanesa luholo athu a ha mavu awa anago gudivua mu ndaga jia politike, mukunda nu ilema ya muila, nga mukunda nu makhalasa awo, yana monega diago haphelo egi esue akombeledi a Yehowa tuana jinga mu guhuima nu mu gudivua. Tangua muvuala mumoshi mu jina dia Jean wamonele luholo akombeledi a Yehowa ana jinga mu gudivua, ndaga yene yakuatele diago mutshima wenji. Wakudile mu gifutshi gimoshi mu Afrika. Tangua ita yasendesele mu gifutshi giawo, wanginyine mu mudimo wa gisuta. Gungima walengele wayile mukhala mu gifutshi gimoshi giakhalele hehi nu gifutshi giawo. Guene atagenele nu Matemue a Yehowa. Jean  udi muzuela egi: “Ngakotelesele egi athu adi mu gikombelelo gia giamatshidia, anago gudinginyisa mu ndaga jia politike, ana jinga mu gudivua. Ana khala nji nu guzumba mukatshi diawo.” Udi muzuela luko egi: “Ngadihanele ha guluila gifutshi gietu. Uvi tangua ngalongugile Biblia, ngazudile desizio dia gukombelela Yehowa.” Jean wasombegesele diago makalegelo enji. Mangino wana longesa athu agasue ana tagana nawo lukuma luabonga lua guhuima, ha fundo dia guya nu guluisa athu anyi akhala agudisha nu muene. Luholo malongo a Biblia ana kuatesa athu a maluholo agasue, idi diago mumonesa egi tuajiya gushila Mbimbi ya Nzambi mutshima.

16. Mukunda natshi idi nu ndando ha gulandula gushila Mbimbi ya Nzambi mutshima?

¹⁶ Luholo ndaga jia ha mavu awa jidi mulandula gubola, mbayikhala lamba gudi athu ha gushila Mbimbi ya Nzambi mutshima. Athu ajiya gututuma ha gutangiza egi ndaga jidi mu Biblia jishigo jia giamatshidia, nga gututuma ha gutuna gushila muhiga wafubidila nu wa tema mutshima, yago Yehowa watombele ha gutuameza akombeledi enji mangino. Uvi gula tudi nu gutshigina egi Mbimbi ya Yehowa idi ya giamatshidia mbayitukuatesa ha gusala ya gujinginyina gula tuatagana nu ndaga jia luholo elu. ‘Mbatuzula desizio dia gutumagela mikhuala ya Yehowa tangua diagasue, uu nu gugisugishilo.’ (Ngi. 119:112) Mbatushigo ‘muvua musonyi’ ha gulongesa athu ako giamatshidia nu guakuatesa ha gukalegela malongo a Biblia mu monyo wawo. (Ngi. 119:46) Ngenyi gula tuatagana nu malamba akola nga usageshi, mbatukolesela nu “guhuiminyina nu gusuanguluga guagasue.”​—Kol. 1:11; Ngi. 119:143, 157.

17. Mukhapho wa givo 2023 uza gutukuatesa mu ndaga itshi?

¹⁷ Tudi muhana Yehowa mersi yavula luholo watukuatesele ha gujiya giamatshidia, handaga ndaga jia ha mavu awa jidi mubola muavula. Uvi giamatshidia giene giana gutukuatesa ha gutuna gudisagesa nu ha gujiya ndaga tuajiya gukalagala ha gukhala muabonga. Giana gutuhana nji felela egi mbatukhala muabonga mu masugu adi muza tangua Ufumu wa Nzambi mbawuhinyina mavu. Tudi nu felela egi mukhapho wetu wa givo 2023, uza gutukuatesa ha gukhala nu gutshigina guakola egi Mbimbi ya Nzambi yagasue idi ya giamatshidia!​—Ngi. 119:160.