1. Σόσκε μπουτ τζενέ αντιβές να ντένα μπέσα κι Αγία Γραφή;

 ΜΠΟΥΤ τζενέ αντιβές να τζανένα κάσκε τι ντεν μπέσα. Νανέ σίγουροι άμα ο τζενέ σο σεβάνενα, σαρ για παράδειγμας ο πολιτικοί, ο επιστήμονες ντα ο επιχειρηματίες μαρένα-πες πάντα τι κερέν ο πο λατσσό λένγκε. Επίσης, να σεβάνενα ι θρησκειάκε αρχηγόν σο βακερένα ότι ισί Χριστιανοί. Οτθάρ, να κερέλα αμένγκε εντύπωση σο να ντένα μπέσα κι Αγία Γραφή, κο βιβλίος σο οντουλά αρχηγοί ι θρησκειάκε βακερένα ότι ντένα καν.

2. Καλέ πραγμάσκε πρέπει τι αβάς σίγουροι, σαρ βακερέλα ο εδάφιος Ψαλμός 119:​160;

² Σαρ υπηρέτες ι Ιεχωβάσκε, αμέν ισινάμ σίγουροι ότι βοβ ισί ο “Ντεβέλ σο λέσταρ αβέλα η αλήθεια” ντα ότι πάντα μανγκέλα ο πο λατσσό αμένγκε. (Ψαλμ. 31:5· Ησ. 48:​17) Τζανάσα ότι μπορίνασα τι ντας μπέσα οντουλέντε σο διαβάνασα κι Γραφή​—ότι “ο λάφι [ι Ντεβλέσκο] ισί μπαγιά”. (Διαβάνεν Ψαλμός 119:​160) Πακιάσα αμέν-ντα ακαβά σο γραφιντάς εκ σπουδαγμέ τζενό σο ασχολίντιβελας ι Γραφιάσαρ: «Τίποτα οντουλένταρ σο βακερντάς ο Ντεβέλ νανέ ψέμας ή να κα μπορίνελας μα τι νικιόλ μπαγιά. Ο υπηρέτες ι Ντεβλέσκε μπορίνενα τι ντεν μπέσα οντουλέντε σο βακερέλα επειδή ντένα μπέσα κο Ντεβέλ σο βακερντάς-λεν».

3. Σο κα ντικχάς ανταλέ μαθημάστε;

³ Σαρ μπορίνασα τι βοηθίνας γιαβερέν τι ντεν αζόμ μπαρί μπέσα κο Λάφι κι Ντεβλέσκο καζόμ ντάσα αμέν; Για τι σκεφτίνας τριν λόγοι σο μπορίνασα τι ντας μπέσα κι Γραφή. Κα ντικχάς ότι οντουλά σο βακερέλα η Γραφή να αλλαξάλε, ο προφητείες ι Γραφιάκε νικίστιλε μπαγιά ντα ότι η Γραφή τθερέλα ι ζορ τι αλλάνελ ι τζενένγκε ζωές.

4. Σόσκε μερικά τζενέ πακιάνα ότι οντουλά σο βακερέλα η Γραφή αλλαξάλε;

⁴ Ο Ιεχωβά Ντεβέλ τσσουντάς πασέ 40 πιστέ μουρσέν για τι γραφίνεν ο βιβλία ι Γραφιάκε. Όμως, καέκ κατά πρώτα χειρόγραφα να υπαρχίντιβελα αντιβές. b Σο-ντα τθεράσα ισί αντίγραφος κατά αντίγραφα. Ανταβά κερέλα μερικέ τζενέν τι πουτσέν-πες άμα ανταλά σο διαβάνασα κι Γραφή αντιβές ισί ίδια οντουλέντζαρ σο γραφιντέας οντουλά μουρσά κι αρχή. Σκεφτιντέν ποτές σαρ μπορίνασα τι αβάς σίγουροι ότι οντουλά σο βακερέλα η Γραφή να αλλαξάλε;

5. Σαρ αβέλας η αντιγραφή κατά Εβραϊκές Γραφές; (Ντικχέν ι φωτογραφία κι ανγκλαϊνί σελίδα)

⁵ Για τι αρακχαβέλ οντουλά σο βακερντάς, ο Ιεχωβά ντινάς εντολή τι κερέν-λεν αντιγραφή. Ντινάς οδηγία κι Ισραηλιτένγκε βασιλιάδες τι κερέν αντιγραφή βον ο Νόμος σο ισινέ γραμμέ ντα τσσουντάς ι Λευιτέν τι σικλιαρέν ανταβά Νόμος κο λαός. (Δευτ. 17:​18· 31:​24-26· Νεεμ. 8:7) Αφού ο Ιουδαίοι ελευθερωσάλε κατά Βαβυλώνα, εκ ομάδα σο ισινέ επαγγελματίες αντιγραφείς αρχισάλε τι κερέν μπουτ αντίγραφα κατά Εβραϊκές Γραφές. (Έσδρ. 7:6, υποσημειώσεις) Οντουλά μουρσά ισινέ προσεκτικοί. Τελικά, ο αντιγραφείς αρχισάλε τι γκινέν, όχι σάντε ο λέξεις, αλλά ο γράμματα-ντα για τι αβέν σίγουροι ότι σαρέ κερντιλέ αντιγραφή σωστά. Αλλά επειδή ισινέ ατελείς, χάνικ κατά αντίγραφα οντουλά τθερένας χουρντέ λάθη. Όμως, επειδή κερντιλέ μπουτ αντίγραφα κατά ίδιος κείμενος, ανταλά λάθη μπορισάλε τι αρακχίντιβεν. Σαρ;

6. Σαρ κα μπορίνενας τι αρακχίντιβεν ο λάθη κο αντίγραφα κι Γραφιάκε;

⁶ Ο σπουδαγμέ τζενέ αμαρέ ντιβεσέντε τθερένα εκ λατσσό τρόπος για τι αρακχέν ο λάθη σο κερντέ ο αντιγραφείς κο κείμενα κι Γραφιάκε. Για παράδειγμας, βακερέν χάι ότι βακέρντιβελα 100 μουρσέντε τι κερέν αντιγραφή πουμαρέ βαστέσαρ ο λάφια εκχέ σελιδάκε. Εκ λένταρ κερέλα εκ χουρντό λάθος κι αντιγραφή. Εκ τρόπος για τι αρακχάς ανταβά λάθος ισί τι συγκρίνας λέσκο αντίγραφος σαρέ ι γιαβερέντζαρ. Αντικάς, κάνα συγκρίνενα μπουτ χειρόγραφα ι Γραφιάκε, ο σπουδαγμέ τζενέ αρακχένα λάθη ή κάτι σο να γραφιντάς οντουβά σο κερέλας ι αντιγραφή.

7. Καζόμ προσεκτικοί ισινέ μπουτ αντιγραφείς ι Γραφιάκε;

⁷ Οντουλά σο κερντέ αντιγραφή ο χειρόγραφα ι Γραφιάκε μαρντέ-πες για τι κερέν-λες ανταβά καζόμ πο λατσσές αβέλας-πες. Ντικχέν εκ παράδειγμας σο σικαβέλα-λες ανταβά. Ο πο πουρανό σαστό χειρόγραφος κατά Εβραϊκές Γραφές κερντιλό κο 1008 ή 1009 Κ.Χ. Βακέρντιβελα Κώδικας του Λένινγκραντ. Ο τελευταία μπρεσά όμως, ο τζενέ αρακχλέ μπουτ χειρόγραφα ντα κομμάτια ι Γραφιάκε σο ισί περίπου 1.000 μπρεσά πο πουρανέ κατά Κώδικας του Λένινγκραντ. Εκ τζενό κα μπορίνελας τι σκεφτίνελ ότι, επειδή αβιλέ-πες μπουτ φαρ αντιγραφή οντουλά χειρόγραφα αντρέ 1.000 μπρεσέντε, ο λάφια κατά Κώδικας του Λένινγκραντ κα αβένας μπουτ διαφορετικά κατά λάφια σο ισινέ κο πο πουρανέ χειρόγραφα. Αλλά να αβέλα-πες κάτι ασακό. Σπουδαγμέ τζενέ σο κερντέ σύγκριση ο πο πουρανέ χειρόγραφα ι πο νεβέντζαρ αρακχλέ ότι, παρόλο σο υπαρχίντιβενας χουρντέ διαφορές κο λάφια, ο νόημας οντουλένγκο σο βακερέλα η Γραφή να αλλαξάλο ιτς.

8. Σο διαφορά τθερένα ο αντίγραφα κατά Χριστιανικές Ελληνικές Γραφές κατά αντίγραφα γιαβερέ πουρανέ βιβλιόνταρ;

⁸ Ο πρώτοι Χριστιανοί κερντέ βον-ντα αντίγραφα κατά Εβραϊκές Γραφές. Κερντέ αντιγραφή μπουτ προσεκτικά ο 27 βιβλία κατά Ελληνικές Γραφές, σο χρησιμοποιήνενας-λεν κο  συναθροίσεις ντα κο έργος. Εκ σπουδαγμέ τζενό, σο κερντάς σύγκριση ο χειρόγραφα κατά Ελληνικές Γραφές γιαβερέ βιβλιόντζαρ σο γραφίντιλεας κο ίδιος βακίτι, βακερντάς: «Γενικά υπαρχίντιβενα αντιβές πο μπουτ [αντίγραφα κατά Ελληνικές Γραφές], . . . ντα ο πο μπουτ φαρ ισί πο πφερντέ». Ο βιβλίος Ανατομία της Καινής Διαθήκης (Anatomy of the New Testament) βακερέλα: «Μπορίνασα τι αβάς σίγουροι ότι οντουλά σο διαβάνασα αντιβές [κατά Ελληνικές Γραφές] σε εκ λατσσί μετάφραση τθερένα ο ίδιος νόημας οντουλέντζαρ σο γραφιντέ ο πουρανέ συγγραφείς».

9. Καβά πράγμας ισί μπαγιά για το λάφι ι Ντεβλέσκο, σαρ σικαβέλα ο εδάφιος Ησαΐας 40:8;

⁹ Για εκατοντάδες μπρεσά, μπουτ αντιγραφείς μαρντέ-πες προσεκτικά τι κερέν αντίγραφα ι Γραφιάκε. Οτθάρ, οντουλά σο διαβάνασα ντα σικλιαράσα-αμέν κατά Γραφή αντιβές να αλλαξάλε. Τζανάσα ότι ο Ιεχωβά ισί οντουβά σο κερντάς τι τθεράς αντιβές λέσκο λάφι χωρίς τι αλλάντιβελ. (Διαβάνεν Ησαΐας 40:8) Όμως, κάποια τζενέ βακερένα ότι, απλώς επειδή ο λάφια ι Γραφιάκε να αλλαξάλε, ανταβά να μανγκέλα τι βακερέλ ότι ισί κατά Ντεβέλ. Οτθάρ, ακανά κα ντικχάς μερικά πράγματα σο σικαβένα ότι η Αγία Γραφή ισί κατά Ντεβέλ.

10. Βακερέν εκ παράδειγμας εκχέ προφητειάταρ σο αβιλί-πες ντα σικαβέλα καζόμ μπαγιά ισί ο λάφια ι εδαφιόσκε 2 Πέτρου 1:​21. (Ντικχέν ο φωτογραφίες)

¹⁰ Η Αγία Γραφή τθερέλα μπουτ προφητείες σο νικίστιλε μπαγιά, ντα μερικές λένταρ εκατοντάδες μπρεσά από αζομάν σο γραφισάλε. Η ιστορία σικαβέλα ότι ανταλά προφητείες νικίστιλε μπαγιά. Ανταβά να κερέλα αμένγκε εντύπωση επειδή τζανάσα ότι σαρέ ο προφητείες ι Γραφιάκε αβένα κατά Ιεχωβά. (Διαβάνεν 2 Πέτρου 1:​21) Σκεφτίνεν ο προφητείες σο βακερένας σαρ κα περέλας η πουρανί πόλη Βαβυλώνα. Κο όγδοος αιώνας Π.Κ.Χ., ο προφήτης Ησαΐας βακερντάς ι Ντεβλέσκε πνευμάσαρ ότι οντιά πόλη ι Βαβυλωνάκι σο αζομάν ισινέ ζουρανί κα λιντιόλας. Βακερντάς ατζέ-ντα ο ναβ ι μουρσέσκο σο κα λέλας ι πόλη​—κα βακέρντιβελας Κύρος. Ντα βακερντάς ακριβώς σαρ κα κερέλας-λες ανταβά. (Ησ. 44:​27–45:2) Επίσης, ο Ησαΐας βακερντάς ότι η Βαβυλώνα τελικά κα καταστραφίντιβελας ντα κα ατσσόλας  ντιπ τσουτσί. (Ησ. 13:​19, 20) Ακριβώς ανταβά αβιλό-πες. Ο Μήδοι ντα ο Πέρσες λιντέ ι Βαβυλώνα κο 539 Π.Κ.Χ., ντα ο τθαν σο ισινέ ανταγιά μπαρί πόλη αβιλό ερείπια ερειπίων.​—Ντικχέν ο βίντεος Η Αγία Γραφή Βακερντάας ότι κα Καταστραφίντιβελας η Βαβυλώνα κι ηλεκτρονική έκδοση κι βιβλιόσκι Μπουτ Σουκάρ Ζωή για Πάντα!, μάθημας 03, σημείος 5.

11. Βακερέν σαρ νικιόνα μπαγιά αντιβές ο εδάφια Δανιήλ 2:​41-43.

¹¹ Ο προφητείες ι Γραφιάκε να νικιόνας μπαγιά σάντε κο πουρανέ μπρεσά. Αντιβές-ντα ντικχάσα τι νικιόν μπαγιά προφητείες. Για παράδειγμας, ντικχέν σαρ νικίστιλι μπαγιά η προφητεία ι Δανιηλίσκι σο τθερέλα τι κερέλ με την Αγγλοαμερικανική Παγκόσμια Δύναμη. (Διαβάνεν Δανιήλ 2:​41-43) Ανταγιά προφητεία βακερντάς ότι η Αγγλοαμερικανική Παγκόσμια Δύναμη κα αβέλας «εμ ζουρανί» σαρ σίδερος «εμ μπίζουρανι» σαρ τσικ. Ντα ακανά ντικχάσα ότι ανταβά νικίστιλο μπαγιά. Η Βρετανία ντα η Αμερική σικαντέ ότι ισί ζουρανέ σαρ σίδερος επειδή κχελντέ σημαντικός ρόλος για τι κερδίντιβεν ο ντούι-ντα Παγκόσμιοι Πόλεμοι ντα επειδή ατζέκ ατζέκ τθερένα μπαρό στρατός. Όμως, λένγκι ζορ χουρντιλί κατά τζενέ σο μπεσένα οντουλέ τθεμέντε ντα ρόντενα πουμαρέ δικαιώματα μπουτέ τροπόντζαρ​—κερένα απεργίες, νικιόνα κο ντρομά ντα ντένα βίκος, ντα μανγκένα πουμαρί ελευθερία. Εκ ειδικός κι πολιτική σο ντικχέλα σο αβέλα-πες σαρό κο ντουνιάς βακερντάς: «Αμαρέ ντιβεσέντε, καέκ γιαβέρ δημοκρατικός τθεμ κο ντουνιάς νανέ αζόμ πολιτικά τρουγιμέ καζόμ ισί ο Ηνωμένες Πολιτείες αντιβές». Η Βρετανία-ντα, ο γιαβέρ κομμάτι κατά παγκόσμια δύναμη ανταγιά, ισί μπουτ τρουγιμέ κο τελευταία μπρεσά επειδή ο τζενέ ναστί συμφωνίνενα σο σχέση πρέπει τι τθερέν ι τθεμέντζαρ κατά Ευρωπαϊκή Ένωση. Ντα επειδή η Αγγλοαμερικανική Παγκόσμια Δύναμη ισί αζόμ τρουγιμέ, ισί μπουτ δύσκολος τι αποφασίνελ κάτι ντα τι κερέλ-λες.

12. Σο σιγουριά ντένα-αμέν ο προφητείες ι Γραφιάκε;

¹² Ο μπουτ προφητείες ι Γραφιάκε σο αβιλέ-πες μπαριαρένα αμαρί σιγουριά ότι ο υποσχέσεις ι Ντεβλέσκε οντουλένγκε σο κα αβέν-πες κο μέλλον κα νικιόν μπαγιά. Νιωθίνασα σαρ ο ψαλμωδός σο προσευχισάλο κο Ιεχωβά ντα βακερντάς: «Μπεκλεντίναβα σαρ σαρ τι σώνες-μαν, σόσκε το λάφι ισί μι ελπίδα». (Ψαλμ. 119:​81) Αντράλ κατά Γραφή, ο Ιεχωβά ντινάς-αμέν λατσσιμάσαρ «μέλλον ντα ελπίδα». (Ιερ. 29:​11) Αμαρί ελπίδα για το μέλλον να στηρίντιβελα κο προσπάθειες κι τζενένγκε, αλλά κο υποσχέσεις κι Ιεχωβάσκε. Οτθάρ, τι σικλιαράς-αμέν λατσσές κατά προφητείες ι Γραφιάκε για τι μπαριαράς αμαρί μπέσα κο Λάφι κι Ντεβλέσκο.

13. Σο γιαβέρ σικαβέλα ότι μπορίνασα τι ντας μπέσα κι Γραφή, σαρ βακερένα ο εδάφια Ψαλμός 119:​66, 138;

¹³ Κάτι γιαβέρ σο σικαβέλα ότι μπορίνασα τι ντας μπέσα κι Γραφή ισί ότι βοηθίνελα ι τζενέν κάνα κερένα ο συμβουλές λάκε. (Διαβάνεν Ψαλμός 119:​66, 138) Για παράδειγμας, αντρόγυνα σο ισινέ έτοιμα τι χωρίνεν τζουβντιόνα ακανά γιεκ ευτυχισμέ. Λένγκε τσσαβέ τθερένα ι χαρά τι μπαριόν εκχέ Χριστιανικέ φαμιλιάτε σο αρακχαβένα-λεν ντα μανγκένα-λεν.​—Εφεσ. 5:​22-29.

14. Βακερέν εκ παράδειγμας σο σικαβέλα ότι κάνα ο τζενέ κερένα πουμαρέ ζωγιάτε οντουλά σο σικλιόνα κατά Γραφή αβένα πο λατσσέ.

¹⁴ Ατζέ-ντα μπαρέ εγκληματίες κερντέ μπαρέ αλλαγές πουμαρέ ζωγιάτε κάνα κερντέ ο γκοντιαβέρ συμβουλές ι Γραφιάκε. Ντικχέν σαρ ανταλά συμβουλές βοηθιντέ εκχέ φυλακισμέ τζενές σο βακερένας λέσκε Τζακ. c  Ο Τζακ ισινέ βίαιος εγκληματίας, ντα σαρέ τζανένας ότι ισινέ εκ κατά πο επικίνδυνα τζενέ σο καταδικασάλεας τι μερέν. Εκ ντιβές όμως ντικχλάς σαρ αβέλα-πες εκ μελέτη κατά Γραφή. Σαστισάλο κατά λατσσιπέ ι πφραλένγκο σο κερένας ι μελέτη ντα αρχισάλο βοβ-ντα τι σικλιόλ κατά Γραφή. Καζόμ κερέλας πι ζωγιάτε οντουλά σο σικλιόλας, λέσκι συμπεριφορά ντα ατζέ-ντα λέσκο χαρακτήρας αβένας πο λατσσέ. Καζόμ νακχέλας ο βακίτι, ο Τζακ αβιλό μπίμπολντο ευαγγελιζόμενος ντα μπολντιλό. Κερέλας λάφι αντράλ πι γκίσταρ ι Ντεβλέσκε Βασιλειάκε κο γιαβερά φυλακισμέ ντα βοηθιντάς τουλάχιστον σταρέ λένταρ τι σικλιόν ι αλήθεια. Κάνα ερεσλό ο ντιβές τι μουνταρέν-λες, ο Τζακ ισινέ εκ γιαβέρ τζενό. Εκ κατά δικηγόροι λέσκε βακερντάς: «Ο Τζακ νανέ οντουβά σο γνωριντόμας 20 μπρεσά πο τζανγκλέ. Οντουλά σο σικλιλό κατά Μάρτυρες ι Ιεχωβάσκε αλλαντέ λέσκι ζωή». Παρόλο σο μουνταρντέ-λες, ο Τζακ σικαντάς πι παραδειγμάσαρ ότι αξίνελα τι ντας μπέσα κο Λάφι κι Ντεβλέσκο ντα ότι τθερέλα ι ζορ τι κερέλ ι τζενέν πο λατσσέ.​—Ησ. 11:​6-9.

15. Σαρ ξεχωρίνελα ο λαός ι Ιεχωβάσκο αντιβές επειδή κερέλα οντουλά σο σικλιόλα κατά Γραφή; (Ντικχέν ι φωτογραφία)

¹⁵ Επειδή ο λαός ι Ιεχωβάσκο κερέλα οντουλά σο σικλιόλα κατά Γραφή, ισί ενωμέ. (Ιωάν. 13:​35· 1 Κορ. 1:​10) Αμαρί ειρήνη ντα αμαρί ενότητα ξεχωρίνενα σόσκε ο πο μπουτ τζενέ αντιβές ισί τρουγιμέ επειδή τθερένα διαφορετικές πολιτικές απόψεις, αστάρντιβενα γιαβερέ τθεμέσταρ ή τθερένα διαφορετικές θέσεις κι κοινωνία. Κάνα εκ τερνό, ο Ζαν, ντικχλάς ι ενότητα σο τθερέλα ο λαός ι Ιεχωβάσκο, σαστισάλο. Ο Ζαν μπαριλό εκχέ τθεμέστε κι Αφρική. Κάνα αρχισάλο ο εμφύλιος τζένγκι, γκιλό κο στρατός αλλά πο σοράν νασλό εκχέ γιαβερέ τθεμέστε οτθέ πασέ. Οτθέ αρακχλάς ι Ιεχωβάσκε Μαρτυρέν. Βοβ βακερέλα: «Σικλιλόμ ότι οντουλά σο ισί κι αληθινή θρησκεία να ανακατούντιβενα κι πολιτική ντα νανέ τρουγιμέ. Οκιά μπάνταρ, μανγκένα ο εκ  ι γιαβερές». Ντα βακερέλα: «Ντινόμ σαρί μι ζωή για τι κεράβ τζένγκι εκχέ τθεμέσκε. Αλλά κάνα σικλιλόμ ι αλήθεια ι Γραφιάκι, ανταβά τσσιντιντάς-μαν τι νταβ σαρί μι ζωή κο Ιεχωβά». Ο Ζαν αλλαξάλο ντιπ. Αντίς τι κερέλ τζένγκι τζενέντζαρ σο ισί διαφορετικοί λέσταρ, ακανά μουτθαβέλα σαριλένγκε οντουλά σο βακερέλα η Γραφή για την ειρήνη. Επειδή ο συμβουλές ι Γραφιάκε κερένα μπαρό λατσσιπέ σαβέ τι μανγκές τζενένγκε, ανταβά σικαβέλα ξεκάθαρα ότι μπορίνασα τι ντας μπέσα κο Λάφι κι Ντεβλέσκο.

16. Σόσκε ισί σημαντικός τι μπαριαράς αμαρί σιγουριά κο Λάφι κι Ντεβλέσκο;

¹⁶ Καζόμ ανταβά ντουνιάς αβέλα χειρότερος, κα αβέλ πο δύσκολος τι ντας μπέσα κο λάφι κι Ντεβλέσκο. Ο τζενέ μπέκιμ κα προσπαθίνεν τι κερέν-αμέν μα τι αβάς σίγουροι ότι η Γραφή ισί μπαγιά ή ότι ο Ιεχωβά τσσουντάς εκχέ πιστέ ντα φρόνιμε δουλός για τι οδηγίνελ πι υπηρετόν αντιβές. Αλλά άμα ισινάμ σίγουροι ότι ο Λάφι ι Ιεχωβάσκο ισί πάντα μπαγιά, κα μπορίνας τι ντας-λεν πέρα κάνα τζάνα κόντρα κι πίστη αμαρί. Κα “μανγκάς σαρέ αμαρέ γκίσαρ τι ντας καν κο εντολές [κι Ιεχωβάσκε] πάντα, μέχρι κο τέλος”. (Ψαλμ. 119:​112) “Να κα λατζάς” τι κεράς λάφι ι αληθειάκε ντα τι τσσίντας ι γιαβερέν τι κερέν πουμαρέ ζωγιάτε ο συμβουλές ι Γραφιάκε. (Ψαλμ. 119:​46) Επίσης, κα νταϊντίνας «με υπομονή ντα χαρά» σαρέ κο πράγματα, ατζέ-ντα κάνα τζάνα αμέντζαρ κόντρα.​—Κολ. 1:​11· Ψαλμ. 119:​143, 157.

17. Σο ανέλα αμαρέ γκοντιάτε ο εδάφιος ι μπρεσέσκο;

¹⁷ Καζόμ εκτίμηση τθεράσα ι Ιεχωβάσκε σο μουκχλάς-αμέν τι σικλιάς ι αλήθεια! Η αλήθεια βοηθίνελα-αμέν τι νιωθίνας ήρεμοι ντα σίγουροι ντα σικλιαρέλα-αμέν ξεκάθαρα σαρ πρέπει τι τζουβντιάς εκχέ ντουνιάστε σο αβέλα πο μπερδεμέ ντα χειρότερος. Ντέλα-αμέν ελπίδα ότι κα τζουβντιάς εκχέ πο λατσσέ ντουνιάστε σο κα κερέλ κουμάντος η Βασιλεία ι Ντεβλέσκι. Μακάρι ο εδάφιος ι μπρεσέσκο για το 2023 τι βοηθίνελ-αμέν τι αβάς σίγουροι ότι σαρό ο Λάφι ι Ντεβλέσκο ισί μπαγιά!​—Ψαλμ. 119:​160.