1-2. Ki éfò nou ni pou kontiné mété apwé nou batizé? Bay yon ègzanp.

 ANNʼ di ou jwenn an bon kay pou wèsté adan. Mé avan ou antwé an kay sala ou kay byen nétwayéʼy. Konmen fwa ou té kay nétwayé kay sala? Èskè ou té kay nétwayéʼy an sèl fwa? Mé non. Ou té kay nétwayéʼy souvan pouʼy sa wèsté nèt, paski siʼw pa nétwayéʼy souvan i kay ni an chay lapousyè.

² Alò menm kon nou ni pou mété éfò pou tjenn an kay nèt, sé menm mannyè-a nou ni pou mété éfò pou tjenn katjil nou èk kawaktè nou nèt. Avan nou té batizé nou twavay byen wèd pou fè chanjman an lavi nou pou “tiwé . . . tout sé bagay-la ki ka nwèsi lachè épi lèspwi nou.” (2 Kòr. 7:1) Mé apwézan nou ni pou kontiné swiv konsèy-la zapòt Pòl té bay lè i di “zòt sipozé twansfòmé nèt”. (Èfés. 4:23) Poutji nou bouzwen mété tout éfò sala? Sé paski si nou pa mété éfò, katjil latè-a sa antwé an sèvèl nou ében an tjè nou, menm kon lapousyè ka sanblé byen vit adan an kay. Kanmenm si nou pa vlé sa fèt èk si nou vlé wèsté nèt douvan Jéhova, i enpòtan pou nou ègzanminé katjil nou, kawaktè nou, èk dézi nou souvan.

3. Kisa èspwèsyon-an ‘an lidé ki nèfʼ vlé di? (Ronm 12:2)

³ Kisa nou ni pou fè pou chanjé mannyè nou ka katjilé? (Li Ronm 12:2.) Èspwèsyon-an ‘an lidé ki nèfʼ vlé di pou ‘fè chanjman ki konplèt an katjil ou.ʼ Konsa nou pa vlé senpliman fè yonndé ti bagay ki bon. Mé pito nou vlé toujou ègzanminé kò nou, épi fè népòt chanjman ki nésésè pou viv an ling épi wèg Jéhova.

4. Kisa nou ni pou fè pou anpéché latè-a enflouwansé katjil nou?

⁴ Lè nou vini pawfé nou kay sa toujou plè Jéhova an tout bagay. Paditan nou ka èspéwé jou sala wivé, nou ni pou kontiné twavay wèd pou plè Jéhova. Chonjé, an Ronm 12:2 zapòt Pòl di nou, nou bouzwen an lidé ki nèf pou nou sav sa nou ni pou fè pou plè Bondyé. Alò nou pa vlé katjil latè-a enflouwansé lavi nou. Mé nou vlé fè asiwé nou ka kité katjil Jéhova diwèkté nou an tout sa nou ka fè.

5. Ki kwèsyon nou sa mandé kò nou pou konnèt si nou vwéman kwè bout sistèm sala pwé? (Gadé pòtwé-a.)

⁵ Annou konsidiwé yon ègzanp. Jéhova vlé nou “èspéyé pou jou-a [lèʼy] kay vini jijé latè-a”. (2 Pita 3:12) Alò mandé kòʼw: ‘Ès mannyè mwen ka viv lavi mwen ka moutwé mwen vwéman kwè bout latè sala pwé? Ès sé disizyon-an mwen ka fè konsèné endikasyon ében twavay, ka moutwé sèvis Jéhova sé bagay-la ki pli enpòtan an lavi mwen? Ès mwen ni lafwa Jéhova kay potjiwé ban mwen èk fanmi mwen? Ében ès mwen ka toujou bay kò mwen tèt cho konsèné labizwen mwen èk labizwen fanmi mwen?ʼ Toujou chonjé, i ka bay Jéhova an chay lajwa lèʼy wè nou ka fè tout sa nou pé pou viv lavi nou an ling épi volontéʼy.​—Maf. 6:25-27, 33; Filip. 4:12, 13.

6. Kisa nou ni pou kontiné fè?

⁶ Nou ni pou ègzanminé katjil nou souvan, épi fè népòt chanjman ki nésésè. Zapòt Pòl di jan Kòrint: “Gadé lavi zòt menm pou wè si zòt ka kwè pou vwé. Ègzanminé konsyans zòt.” (2 Kòr. 13:5) Konsa si nou di nou “ka kwè pou vwé” nou ni pou fè plis pasé atandé mitin épi pwéché. Nou ni pou osi kontiné ègzanminé katjil nou, santiman nou, èk wézon-an nou ka fè sèten bagay. Alò pou nou sa kontiné ni an lidé ki nèf nou ni pou kontiné li Bib-la, éséyé pou ni katjil Jéhova, épi fè tout sa ki nésésè pou mété lavi nou an ling épi divwa Jéhova.​—1 Kòr. 2:14-16.

7. Silon Èfésòs 4:31, 32, ki lòt chanjman nou bouzwen fè, èvèk pouki i pé difisil pou fè sa?

⁷ Li Èfésòs 4:31, 32. Apa di fè chanjman an katjil nou, nou bouzwen fè on lòt chanjman ki enpòtan, nou ni pou “mété an kawaktè ki nèf”. (Èfés. 4:24) Alò, nou ni pou twavay byen wèd pou fè sa. Sé vyé kawaktè-a nou ni pou twavay wèd pou tiwé-a, sé kawaktè tèl kon waj èk lè nou toujou faché. Pouki i pé difisil pou tiwé yo? Sa sé paski adan sé bagay sala wasiné byen fon andidan nou. Pou ègzanp, Bib-la di, la ni moun ki ka ‘faché vitʼ èk ki ka ‘fè kòlè [yo] lévé vitʼ. (Pwov. 29:22) Alò si on moun ni sé vyé kawaktè sala i kay ni pou twavay byen wèd pou chanjé. Délè jis apwé moun-lan batizé i ni pou twavay wèd, kon nou kay wè an èspéyans Stephen.

8-9. Ki mannyè èspéyans Stephen ka moutwé nou ni pou kontiné mété kawaktè nèf-la?

⁸ An fwè nonʼy sé Stephen té ni on gwo pwoblenm, i té difisil pouʼy kontwolé kòlèʼy. I di: “Jis apwé mwen batizé, i té wèd pou mwen kontwolé kòlè mwen. Pou ègzanp, yon jou padan nou té an minis-la, yon nonm vòlè radyo mwen an motoka-a. Konsa mwen pati kouwi dèyèʼy, èk lèʼy wè mwen té kay tjenbéʼy, i ladjé radyo mwen atè. Pli ta lè mwen té ka di gwoup-la mannyè mwen twapé radyo mwen viwé, yon ansyen mandé mwen: ‘Ében Stephen siʼw té tjenbé nonm-lan, kisa ou té kay fèʼy?ʼ Kwèsyon sala fè mwen katjilé byen fon, èvèk sa ankouwajé mwen pou kontiné twavay wèd pou kontwolé kòlè mwen, èk pou viv an lapé.” b

⁹ Ègzanp Stephen ka moutwé nou, délè nou pé kwè nou ja mété vyé kawaktè dèyè nou. Mé la ni sitiwasyon ki sa lévéʼy lè nou pa ka èspéwé. Si sa wivéʼw pa vini dékouwajé, épi pa kwè ou sé on moun ki mové. Zapòt Pòl té di: “Mwen ka vlé fè sa ki bon, mé sé bagay ki mové mwen ka wivé fè.” (Ronm 7:21-23) Alò, menm kon nou ni pou kontiné tiwé lapousyè an kay nou, sé menm mannyè-a nou ni pou kontiné tiwé vyé kawaktè. Konsa annou kontiné fè asiwé nou twavay wèd pou mété an kawaktè ki nèf. Mé ki mannyè nou sa fè sa?

10. Ki mannyè nou sa goumen kont vyé kawaktè? (1 Jan 5:14, 15)

¹⁰ Lè nou ka goumen kont on vyé kawaktè, nou ni pou pwédyé bay Jéhova épi ni konfyans-lan i kay tann lapwiyè nou, épi i kay édé nou. (Li 1 Jan 5:14, 15.) Menm si Jéhova pa kay fè on miwak pou tiwé vyé kawaktè-a, nou asiwé Jéhova kay ban nou fòs-la pou édé nou pou pa tonbé. (1 Pita 5:10) Lè nou pwédyé bay Jéhova pou ban nou èd, nou pa vlé mété kò nou an sitiwasyon ki kay lévé vyé kawaktè-a. Pou ègzanp nou kay pwan pokosyon pou pa gadé pòtwé, ében li liv, ében kouté moun ki ka ankouwajé vyé kawaktè-a nou vlé ladjé-a. Osi nou pa vlé katjilé asou vyé dézi.​—Filip. 4:8; Kòl. 3:2.

11. Kisa nou sa fè pou kontiné mété kawaktè nèf-la?

¹¹ Magwé ou ja mété vyé kawaktè-a dèyè, i enpòtan pou mété kawaktè nèf-la. Ki mannyè ou sa fè sa? Lèʼw apwann konsèné bèl kawaktè Jéhova, ou sa fè éfò-a pou imité sé kawaktè sala. (Èfés. 5:1, 2) Pou ègzanp, lèʼw ka li listwa an Bib-la konsèné mannyè Jéhova ka padonnen moun, mandé kòʼw: ‘Ès mwen ka padonnen lézòt?ʼ Lè ou li konsèné konpasyon Jéhova èvèk mannyè i édé moun ki té bouzwen èd, mandé kòʼw: ‘Ès mwen ka moutwé sé fwè èk sè-a ki bouzwen èd konpasyon menm kon Jéhova? Èk ès mwen ka fè sa mwen pé pou édé yo?ʼ Konsa, kontiné mété an lidé ki nèf èk kontiné fè éfò-a pou mété kawaktè nèf-la. Èk chonjé sé pou ou ni pasyans konʼw ka fè sa.

12. Ki mannyè èspéyans Stephen ka moutwé Bib-la ni pouvwa pou chanjé lavi moun?

¹² Stephen nou té mansyonnen pli bonnè-a, té twavay wèd pou mété kawaktè nèf-la. Stephen di: “Dépi mwen batizé, mwen té ni pou aji épi plizyè sitiwasyon koté mwen té ni pou kontwolé kòlè mwen. Mwen ja apwann lè moun ka éséyé pou lévé kòlè mwen, mwen djòs ni pou tiwé kò mwen anpami yo. Èk osi, mwen ja apwann mannyè pou anpéché on sitiwasyon vini pli mové. Madanm mwen, épi on chay lòt moun ja di mwen, yo kontan mwen ka wété dous an sé sitiwasyon sala. Mé mwen sav sé Jéhova ki té édé mwen fè sé chanjman sala. Apwézan mwen sa di, Bib-la vwéman ni pouvwa pou chanjé lavi moun.”

13. Kisa ki kay édé nou goumen kont vyé dézi? (Galécha 5:16)

¹³ Li Galécha 5:16. Jéhova ka ban nou lisentèspwiʼy pou édé nou goumen kont dézi ki pa bon. Lè nou étidyé Pawòl Bondyé, nou ka kité lisentèspwi Jéhova djidé nou. Osi, lè nou atandé sé mitin-lan nou ka wisivwè lisentèspwi Jéhova. An sé mitin sala, nou ka pasé tan épi sé fwè èk sè-a ki ka éséyé pou fè sa ki bon èvèk ègzanp yo ka ankouwajé nou. (Hib. 10:24, 25; 13:7) Èk lè nou pwédyé èvèk mandé Jéhova pou édé nou épi fèblès nou, i kay ban nou lisentèspwiʼy pou ban nou fòs-la pou kontiné goumen. Magwé nou ka fè sé bon bagay sala sé vyé dézi-a pitèt pa kay dispawèt. Mé nou sa ni asiwans-lan ki, si nou kontiné étidyé Pawòl Bondyé, atandé mitin, èvèk pwédyé, sa kay anpéché nou fè sa ki pa bon. Kon Galécha 5:16 di, si nou kité lèspwi Bondyé kondwi lavi nou, nou “pa kay fè tout sé bagay-la kò-a vlé fè-a”.

14. Pouki i enpòtan pou nou kontiné dévlopé bon dézi?

¹⁴ Lè nou koumansé fè bagay ki kay édé nou pou ni an bon wilasyon épi Jéhova, i enpòtan pou nou kontiné fè yo. Èk osi i enpòtan pou nou kontiné dévlopé bon dézi. Pouki sa enpòtan? Sa enpòtan paski yonn an sé lèlmi nou-an ka toujou goumen kont nou. Lèlmi sala sé tantasyon-an pou fè sa ki pa bon. Jis apwé batenm, nou pé ni dézi-a pou fè bagay ki pa bon. Bagay tèl kon jwé gwenndé, bwè twòp wonm, ében pou gadé pònografi. (Èfés. 5:3, 4) Yon jenn fwè di: “Yonn an sé bagay-la mwen ni pou débat épi sé, mwen enmen nonm. Mwen té kwè santiman sala té kay dispawèt, mé mwen ka kontiné débat épiʼy.” Alò, siʼw ni an vyé dézi ki byen wasiné, kisa ki sa édéʼw?

15. Pouki i ka ankouwajé nou pou konnèt “lòt moun” ka goumen kont vyé dézi menm kon nou? (Gadé pòtwé-a.)

¹⁵ Lè ou ka goumen kont an vyé dézi ki byen wasiné, chonjé la ni lòt moun ki ka goumen menm kon ou. Bib-la di: “Lè ou anba tantasyon, sé pou ou sav i ni lòt moun ki anba menm sé tantasyon sala.” (1 Kòr. 10:13 pwèmyé pa-a) Lè zapòt Pòl té ékwi lévanjil sala, i té ka palé bay fwè èk sè ki té ka viv an vil Kòrint. Avan yo té vini Kwityen, adan di yo té ka fè adiltè, adan di yo té ka kouché épi nonm èk fanm menm kon yo, èvèk adan di yo té toujou sou. (1 Kòr. 6:9-11) Apwé yo batizé, ès ou kwè sé vyé dézi sala té annèk dispawèt? Non, pitèt yo té ni pou goumen kont vyé dézi toujou. Magwé, yo sété Kwityen ki té ni èspwa-a pou alé an syèl yo pa té pawfé. Konsa, yo té ni pou goumen kont sé vyé dézi sala. Pouki sa sipozé ankouwajé nou? Sa sipozé ankouwajé nou, paski népòt vyé dézi nou ka goumen épi, la ni lòt moun ki ja goumen épiʼy osi. Anfen, ou sa “doubout fò an lafwaʼw, paski ou sav sé fwè èk sèʼw-la ki ka wèsté an latè sala ka soufè menm kon ou.”​—1 Pita 5:9

16. Kisa nou pa sipozé kwè, èk pouki?

¹⁶ Sé pa pou ou janmen kwè pyèsonn pa ka konpwann sitiwasyonʼw, paski katjil sala byen danjéwé. Si ou ka katjilé kon sa, sa pé fèʼw kwè anyen pa sa édéʼw, èk ou pé kwè ou pa kay ni kouway-la pou goumen kont sé vyé dézi-a. Okontwè, Bib-la di nou, nou pa pa kò nou. Pou ègzanp, dézyenm pa-a an 1 Kòrint 10:13 di: “Bondyé ka tjenn pwonmèt li, épi i pa kay kitéʼw pasé anba pyès tantasyon ki kay twò fò paséʼw. Lè ou anba tantasyon sala, i kay baʼw kouway-la pou ou sa diwé, épi i kay toujou ouvè an chimen baʼw pou ou sa chapé.” Konsa, lè nou ni an vyé dézi ki byen wasiné, nou sa goumen épiʼy èk wèsté fidèl pou Jéhova. Wi, épi èd Jéhova nou sa fè sa ki bon!

17. Magwé nou kay toujou ni vyé dézi, kisa nou sa fè?

¹⁷ Toujou chonjé sa, paski nou pa pawfé nou kay toujou ni vyé dézi. Mé lè an vyé dézi vini an lidé nou, nou vlé fè tout sa nou pé pou widjèktéʼy vitman. Wi, nou sa imité ègzanp Jozèf ki té vit pou kouwi hòd madanm Pòtifa. (Jen. 39:12) Konsa, magwé nou kay toujou ni vyé dézi, nou pa oblijé fè sa ki pa bon.

18-19. Ki kwèsyon nou sa mandé kò nou kon nou ka éséyé pou ni an lidé ki nèf?

¹⁸ An atik sala nou apwann pou ni an lidé ki nèf, nou ni pou kontiné fè asiwé ki katjil nou èk aksyon nou ka fè Jéhova kontan. Konsa nou ni pou ègzanminé kò nou wéglé. Alò, pou édé nou fè sa, nou sa mandé kò nou sé kwèsyon sala: ‘Ès sa mwen ka fè ka moutwé mwen ka viv an sé dènyé jou-a? Ès mwen ka fè éfò pou mété kawaktè nèf-la? Ès mwen ka kité lisentèspwi Jéhova djidé lavi mwen pou mwen sa goumen kont vyé dézi?ʼ

¹⁹ Lè ou ka ègzanminé kòʼw fiksé asou pwogwé-a ou ja fè, paski ou pa pawfé. Si ou wè ou ni pou fè pli chanjman, pa vini dékouwajé. Pito sa, swiv konsèy-la ki an Filipay 3:16. Kotéʼy di: “Kontiné maché menm mannyè-a nou té koumansé maché-a.” Lè ou fè sa, ni asiwans-lan ki, Jéhova kay benni tout éfò-a ou ka fè pou ni an lidé ki nèf.