1-2. Kai si arus terus silakoken kenca iperidiken ras engkai?

 RUSUR nge bersihkenndu rumahndu? Banci saja sope lenga kam pindah ku sada rumah bersihkenndu lebe rumah e. Tapi uga adi kenca si e lanai pernah bersihkenndu rumah e? Rumah e pasti melket mulihi. Guna njaga rumahndu tetap bersih perlu ratur ibersihkenndu.

² Bage ka pe, arus terus sipereksa perukurenta ras sipat-sipatta. Memang sope iperidiken enggo kerja keras kita erban perubahen si iperluken guna ‘mbersihken dirita arah kai pe si banci erban dagingta ras perukurenta najis.’ (2 Kor. 7:1) Tapi kenca iperidiken, perukurenta arus “terus iubah” bali bagi nasehat Rasul Paulus. (Ep. 4:23) Engkai? Perban doni enda banci mpengaruhi perukurenta. Gelah terus siban meriah ukur Jahwe arus ratur sipereksa perukurenta, sipat-sipatta, ras sura-surata.

3. Kai si perlu silakoken guna ‘ngubah perukurenta’? (Roma 12:2)

³ Kai si perlu silakoken guna ‘ngubah perukurenta’? (Baca Roma 12:2.) Istilah bas bahasa Junani si iterjemahken jadi “ngubah perukuren” banci ka iterjemahken jadi “mpesikap perukuren.” Kalak si mpesikap rumah pesikapna bagin-bagin si ceda, labo terjeng tamana piga-piga barang gelah rumah e teridah mejile. Bage ka pe, adi siubah ateta perukurenta, labo bias terjeng silakoken piga-piga perbahanen si mehuli. Tapi, arus sipereksa  kalak si uga kin kita janah siban perubahen gelah banci tuhu-tuhu siikutken patoken Jahwe. Si e arus lalap silakoken, labo bias sekali saja.

4. Uga carana gelah perukurenta la ipengaruhi doni enda?

⁴ Adi enggo sempurna pagi kita, banci lalap siban meriah ukur Jahwe. Tapi gundari, arus kerja keras kita guna erban meriah ukur Jahwe. Bas Roma 12:2 ikataken Paulus maka perlu siubah perukurenta ras la kita nggit ipengaruhi doni enda gelah banci sidalanken sura-sura Dibata. Emaka, siusahakenlah gelah tujun geluhta ras keputusenta sesuai ras sura-sura Dibata, labo ngikutken perukuren doni enda.

5. Uga carata mbuktikenca maka enggo ndeher siakap wari Jahwe? (Nen gambar.)

⁵ Cuba ukuri contoh enda. Ate Jahwe ‘tetap min siinget wari kerehenNa.’ (2 Pet. 3:12) Cuba sungkuni bandu, ‘Teridah nge arah kegeluhenku maka enggo kuangka ndeher kel kedungen doni si jahat enda? Arah keputusenku kerna pendidiken ntah pe kerna dahin, teridah nge maka ngelayani Jahwe kuakap si pentingna bas geluhku? Tek nge aku maka pasti isikapken Jahwe keperlunku ras keluargaku, ntah lalap nge aku kuatir kerna hal-hal materi?’ Pasti meriah kel ukur Jahwe sanga idahNa silakoken peratenNa asa ngasupta.​—Mat. 6:25-27, 33; Pil. 4:12, 13.

6. Kai si arus terus silakoken?

⁶ Arus ratur sipereksa perukurenta janah siban perubahen kai pe si iperluken. Bagenda nina Paulus man kalak Korinti, “Teruslah pereksa diri kena, erkiniteken denga kin kena ntah lang? Teruslah pastiken uga kin kena situhuna.”  (2 Kor. 13:5) “Erkiniteken” labo maksudna terjeng ratur reh ku perpulungen ras erberita. Kinitekenta banci ka teridah arah kai si lit bas perukuren, sura-sura, bage pe tujunta. Emaka perlu terus siubah perukurenta alu mbaca Kata Dibata, erlajar guna ngusih perukuren Jahwe, janah silakoken kai pe si iperluken guna erban meriah ukur Jahwe.​—1 Kor. 2:14-16.

7. Menurut Epesus 4:31, 32, kai deba nari si perlu silakoken janah engkai maka banci saja mesera ngelakokenca?

⁷ Baca Epesus 4:31, 32. Perubahen penting si deban si perlu silakoken eme ‘make sipat-sipat si mbaru.’ (Ep. 4:24) Perlu kerja keras ngelakoken si e. Arus erjuang kita ngendaliken sipat-sipat si la mehuli. Contohna dendam, merawa, ras ngamuk. Engkai maka banci saja mesera ngelakokenca? Perban piga-piga arah sipat si la mehuli e enggo rurat bas pusuhta. Contohna, ikataken Pustaka maka piga-piga kalak “nukah merawa” janah “nukah naik darehna.” (Kua. 29:22) Piga-piga kalak arus terus erjuang ngelawan sipat-sipat si bage amin pe enggo iperidiken. Mari sibahas piga-piga pengalamen si mbuktiken si e.

8-9. Uga pengalamen Stephen mbuktiken maka perlu terus kita erjuang ngelawan sipat-sipat si ndekah?

⁸ Sekalak turang seninata si gelarna Stephen mesera kapna ngendaliken rawana. Bagenda nina, “Kenca aku iperidiken arus denga aku terus erjuang ngendaliken rawaku. Contohna, bas sada wari sanga erberita aku arah rumah ku rumah, lit kalak si nangko radio bas motorku janah kuayaki ia. Paksa aku enggo reh deherna ras ia, idabuhkenna radio e janah kiam ia. Sanga kuceritaken man kalak si deban uga carana maka kudat mulihi radioku, sekalak pertua bas kelompok kami e nungkun aku, nina, ‘Stephen, kai nge si lakokenndu adi datndu pinangko e?’ Penungkunen e erban aku rukur janah ngiahken aku guna terus erjuang ngusahaken perdamen.” b

⁹ Arah pengalamen Stephen ndai banci siidah maka sipat-sipat si la mehuli banci ka rempet-rempet reh, amin pe siakap enggo banci siambekken sipat e. Adi e terjadi man bandu ula kitik ukurndu janah ula akapndu kam kalak Kristen si la mehuli. Rasul Paulus pe pernah bagenda nina, “Sanga kulakoken ateku kai si benar, kai si la mehuli lit bas aku.” (Rom. 7:21-23) Kerina kalak Kristen la sempurna, emaka arus terus kalak e erjuang ngelawan sipat-sipat si la mehuli si banci ka reh mulihi, bali bagi abu bas rumahta. Emaka, arus terus kita erjuang ngambekken sipat-sipat si la mehuli gelah banci kita tetap bersih. Uga carata ngelakokenca?

10. Uga carata ngambekken sipat si la mehuli? (1 Johanes 5:14, 15)

¹⁰ Ertotolah kam man Jahwe adi mesera kapndu ngambekken sipatndu si la mehuli. Teklah maka pasti ibegiken ras isampati Jahwe kam. (Baca 1 Johanes 5:14, 15.) Memang, labo imasapken Jahwe sipat-sipatndu si la mehuli e alu mukjizat. Tapi, banci kam pegegehiNa gelah la kam nyerah. (1 Pet. 5:10) Selain si e, sesuailah ban perbahanen  ras totondu janah ula lakoken kai pe si banci erban sipat-sipat si ndekah turah mulihi. Contohna, hati-hatilah bas milih film, acara TV, ntah pe bacan si ncidahken maka sipat si atendu ambekkenndu e labo salah. Adi turah sura-sura si salah bas pusuhndu, mislah ambekken.​—Pil. 4:8; Kol. 3:2.

11. Kai si perlu silakoken gelah banci terus makeken sipat-sipat si mbaru?

¹¹ Amin pe enggo ambekkenndu sipat-sipat si ndekah, penting kel guna mpebelin sipat-sipat si mbaru. Uga carana? Pelajarilah sipat-sipat Jahwe janah usahakenlah ngusih Ia. (Ep. 5:1, 2) Contohna, sanga bacandu bas Pustaka kerna sipat Jahwe si nggit ngampuni, sungkuni bandu, ‘Nggit nge aku ngampuni kalak si deban?’ Sanga bacandu kerna perkuah ate Jahwe man kalak si mesera, sungkuni bandu, ‘Bage ka nge perasanku man turang seninaku si merluken penampat secara materi, janah teridah nge si e arah perbahanenku?’ Teruslah ubah perukurenndu alu makeken sipat-sipat si mbaru. Adi lenga kam berhasil erban perubahen, sabarlah kam janah ula nyerah.

12. Uga Stephen nggejapken maka Pustaka banci ngubah kalak?

¹² Stephen, si ituriken ndai nggejapken maka banci alu manjar-anjar ipakena sipat-sipat si mbaru. Bagenda nina, “Kenca aku iperidiken, sempat kuadapi piga-piga situasi si erban aku merawa. Tapi, kuusahaken gelah la merawa alu lawes je nari ntah pe kulakoken cara si deban gelah la reh parahna situasina. Gundari enterem kalak si mujiken aku, termasuk diberuku, perban banci aku tetap tenang bas situasi si bage. Aku pe la kusangka banci bage. Labo aku mujiken bana bas perubahen si kuban e. Tek aku enda pasti perban penampat arah Pustaka.”

13. Kai si banci nampati kita ngelakoken kai si benar? (Galati 5:16)

¹³ Baca Galati 5:16. Perlu kita erjuang guna ngelakoken kai si benar. Guna nampati kita, enggo bereken Jahwe kesah si badiaNa. Banci kita itegu-tegu kesah si badia adi sipelajari Kata Dibata. Banci ka sialoken kesah si badia sanga reh kita ku perpulungen. Bas perpulungen, banci kita ergaul ras turang seninata si erjuang ngelakoken kai si benar janah e banci mpegegehi kita. (Heb. 10:24, 25; 13:7) Selain si e, perlu kita tutus ertoto man Jahwe janah sipindo gelah sampatiNa kita ngadapi piga-piga kelemahenta. Ipegegehi Jahwe ka kita alu kesah si badiaNa gelah terus erjuang. Memang, si e kerina labo erban bene sura-sura si salah. Tapi e banci nampati kita terus erjuang ngelawan sura-sura si salah. Bali bagi si ikataken bas Galati 5:16, kalak si itegu-tegu kesah si badia ‘la ikutkenna sura-sura dagingna.’

14. Engkai maka arus terus siusahaken ngelakoken kai si benar?

¹⁴ Amin pe enggo silakoken kegiaten rohani alu mehuli, kai deba nari si arus silakoken? Arus sipertahanken ras terus siusahaken ngelakoken kai si benar. Engkai maka e penting? Perban sura-sura si salah banci turah ndigan pe, bali bagi musuh si la pernah ngadi nyerang kita. Amin pe enggo iperidiken, erjuang denga kita ngelawan sura-sura si arus sipedauh, misalna, erjudi, minem-minem,  ntah pe nonton pornografi. (Ep. 5:3, 4) Bagenda nina sekalak turang seninata si nguda denga, “Salah sada si meserana kuakap ngadapisa eme ngena ateku sesama jenis. Kuakap bene nge kari perasan e, kepeken tetap denga lit.” Kai si banci lakokenndu adi mbelin kel sura-surandu ngelakoken si salah?

15. Engkai maka kita terpegegehi alu meteh maka labo kita ngenca si arus erjuang ngelawan sura-sura si salah? (Nen gambar.)

¹⁵ Sanga erjuang kita ngelawan sura-sura si salah si seh kel gegehna, ingetlah maka labo kita sisada. Bagenda nina Pustaka, “Kerina percuban si adapi kena situhuna percuban si biasa adapi kerina kalak.” (1 Kor. 10:13a) Kata-kata e itulis man kalak Kristen i Korinti. Piga-piga arah kalak e mbarenda perlua-lua, homo, ras pemabuk. (1 Kor. 6:9-11) Menurutndu, kenca kalak e iperidiken perlu denga nge ia erjuang ngelawan sura-sura si salah? Ue, pasti. Kalak e kerina kalak si ipilih ku surga, tapi kalak e lenga sempurna. Emaka pasti arus terus kalak e erjuang ngelawan sura-sura si salah. Arusna terpegegehi kita meteh si e. Engkai? Perban e mbuktiken maka labo kita ngenca si erjuang ngelawan sura-sura si salah. Situhuna banci tetap ‘paguh kinitekenta perban bagi si enggo siteh kerina temanta si sada kiniteken pe datken kiniseran si seri.’​—1 Pet. 5:9.

16. Perukuren kai si arus sipedauh, ras engkai?

¹⁶ Ula min siakap la lit kalak si ngangkai masalah si sangana siadapi. Perukuren si bage bahaya, perban banci erban kita rukur maka la mungkin kita menang ngelawan sura-sura si salah. Bagenda nina Pustaka, “Dibata e setia, labo pediatNa kena icubai lebih asa gegeh kena. Sanga lit percuban, bereNa kena jalan  keluar gelah banci kena sabar ngadapisa.” (1 Kor. 10:13b) Emaka, amin pe megegeh kel sura-sura si salah e, banci nge kita tetap setia man Jahwe. Alu penampat Jahwe, banci kita terus erjuang ngelawan sura-sura si salah.

17. Amin pe la banci sibeneken sura-sura si salah, kai si banci silakoken?

¹⁷ Ingetlah, perban kita la sempurna, la banci sibeneken sura-sura si salah. Tapi sanga lit sura-sura si salah, banci mis situlak, bali bagi Jusup si mis kiam sanga igoda diberu Potipar. (Kej. 39:12) Ula kita nggit nyerah man sura-sura si salah!

18-19. Penungkunen kai saja si banci siukuri guna mereksa dirita?

¹⁸ Enggo sipelajari maka ngubah perukuren ertina terus sipastiken maka perukuren ras perbahanenta erban meriah ukur Jahwe. Emaka, arus terus sipereksa dirita alu ratur janah sisungkun banta, ‘Teridah nge arah perbahanenku maka sadar aku enggo ndeher kel kedungen jaman enda? Reh ulina nge aku i bas makeken sipat-sipat si mbaru? Kupediat nge kesah si badia negu-negu kegeluhenku, alu bage banci nampati aku terus erjuang ngelawan sura-sura si salah?’

¹⁹ Sanga pereksandu dirindu, ula arapkenndu kam enggo sempurna. Adi lit denga kapndu si perlu ipehuli, ula kitik ukurndu. Tapi ikutkenlah nasehat bas Pilipi 3:16: “Teruslah sipepaguh kinitekenta bagi si enggo silakoken sedekah enda.” Emaka teruslah ban perubahen. Teklah kam maka pasti pasu-pasu Jahwe usahandu guna terus ngubah perukurenndu.