1, 2. Ka lunbei wadügüni lárigiñe wabadiseirun, ani ka uagu?

 KADA átiri dan harumadahoun huban? Gayaraati arumadaha humanu buidu buidu lubaragiñe háguyun awinwanda ñein. Gama lumoun kaba asusereda anhein marumadahan humá? Subudi wamuti, labuinchuba lan kaliki luma ifei tidan lau lóufudagun. Lun buidu lan taríawagun muna, mosu tarumadahóun sagü weyu.

² Lunti wadügüni ligiaméme lau wasaminan luma lau wagaburi. Inarüni, lubaragiñe lan wabadiseirun áfaaguatiwa lun wadügüni asansiruni le mégeiwabei lidan wabagari luma lun “wachibuni sun luwuyeri iwiyei wawariua, dandu luéi wágubu kei tuéi wawani” (2 Ko. 7:1). Lau sun lira lunti gaganbadi wamá lun adundehani le líchugubei apostolu Pábulu: “Iserigua humá lidan hani sífiri luma lidan hisaminan” (Efe. 4:23). Ka uagu súdini lubéi lun wadügüni áfaaguni le súnwandan? Ladüga gayara lan lebelurun “iwiyei” luma “kaliki” lánina ubóu le lau lóufudagun tidoun wanigi. Lun masuseredun lan katei le woun luma lun haruma wamá ligibugiñe Heowá, lunti wakutihani le wasaminarubei súnwandan, wagaburi luma le wayumahabei.

3. Ka mini lubéi wasansiruni ligaburi wasaminan? (Rómana 12:2).

³ Ka lunbei wadügüni lun wasansiruni ligaburi wasaminan? (Aliiha huméi Rómana 12:2). Úati buídurügü lan wadügün  somu katei buiti lun buidu lan wabagari. Lubaragiñe lira, lunti wakutihani ida waña lan múnadagiñe wabiti ani adüga wameime asansiruni le mégeiwabei lun lúaradun wabagari luma lilurudun Heowá. Anihán katei le lunbei wadügüni súnwandan, mámarügü aban wéiyaasu.

4. Ka lunbei wadügüni lun mígiraguagüdün wamá woungua lun lahandilihani ubóu le ligaburi wasaminan?

⁴ Danme le mafigounhadiwa, gayaraabei wadügüni le hínsiñebei lun Heowá lidan sun katei. Lubaragiñe liabin dan ligía, mosu wáfaagun saragu lun wagundaaragüdüni Heowá. Teni wamá lun ida liña lan lagoubaguagüdüni apostolu Pábulu lunti lan wasansiruni ligaburi wasaminan lumoun wachoururuni ka lan lugundanbei Bungiu le adarirubei lidan Rómana 12:2. Lubaragiñe wígirun lun lahandilihani lagübüri ubóu le wasaminan, súdiniti lun wakutiragun woungua lun warihini anhein úara lubéi le wadügübei luma lisaminan Bungiu lidan le wanúadirubei wadügün luma lidan ligaburi wasaminarun.

5. Ida luba wasubudiruni ka lan wasaminarubei luagu yarafaali lan luéyuri Heowá? (Ariha humóun iyawaü).

⁵ Kei hénpulu, busenti Wabungiute lun agagudúañu wamá agurabahei “lachülürün luéyuri” (2 Fe. 3:12). Ligíati, álügüdagua wamá woungua: “Arihúati san lidan nibagari luagu gunfuranda nani yarafaali lan lagumuchagüle ubóu le? Arufuda lumuti san le nanúadirubei nadügün luáguti aturiahani luma luagu wadagimanu súdinitima lan nun neseriwidun lun Heowá? Afiñetina san lóunigirubadina lan góunigi láñame niduheñu, o súnwandan nidiheri nan luagu umegeguni?”. Gúndaati Heowá dan le larihin áfaagua wamá lun wawinwandun úara luma lugundan (Mat. 6:25-27, 33; Fili. 4:12, 13).

6. Ka lagurabubei Bungiu lun wadügüni?

⁶ Súnwandan lunti lan wakutihani ligaburi wasaminan adüga wameime furumiñeguarügü asansiruni le wemegeirubei. Ru lumuti Pábulu adundehani le houn kristiánugu ha  Korintubaña: “Aríagu humá houngua anhein derebuguñu hiña lubéi lidan hafiñen; hóuchagua humá hungua” (2 Ko. 13:5). Lun derebugu humá “lidan hafiñen” úati buídurügü lan habasiihan adamuridagua ni hapurichihan sagü gayara lan. Gadan lumuti giñe ligaburi wasaminarun, katei burí le hínsiñebei woun luma lébuna wadügüni katei. Ligíati megei wabéi wasigirun asansirei ligaburi wasaminan lau waliihanu Lererun Bungiu, lau wafurendeirun asaminara kei ligía lúmati lau wadügüni asansiruni le megei wabéi lun gayara lan wagundaaragüdüni Bungiu (1 Ko. 2:14-16).

7. Kei lariñaguni Éfesuna 4:31, 32, ka amu katei lunbei wadügüni, ani ka uagu hénrengu lubéi lun wadügüni?

⁷ (Aliiha huméi Éfesuna 4:31, 32). Amu katei luéi wasansiruni ligaburi wasaminan, lunti giñe wadaüragun “lau iseri igaburi” (Efe. 4:24). Lun wibihini katei le, mosu wáfaagun saragu. Kei hénpulu, lunti wáfaagun saragu lun wígiruni luriban igaburi le wawagubei kei burí, wareidahan igarihabu luma igañi. Ka uagu gayara lubéi hénrengu lan wígiruni katei le? Ladüga güraali fiu lídangiñe luriban burí igaburi le wawagu. Ayanuhatu Bíbülia, hawagu ha “gañi gáñibaña”, luma hawagu ha adügübaña “saragu katei le moun lumuti” (Ari. 29:22). Anhein anihein lubéi lagübüri igaburi le wawagu, mosu wasigirun áfaagua íbini lárigiñe wabadiseirun. Ariha wamá aban sügǘ le arufudubalin katei le.

8, 9. Ida liña larufuduni le lásügürübei Stephen súdini lan lun wasigirun agidarei binadu igaburi wawariua?

⁸ Anihein meha aban íbiri gíriti Stephen, hénrenguti meha lun lárügüdagun lungua luéi igañi. Ariñagati: “Íbini lárigiñe nabadiseirun, mosu meha nasigirun áfaagua lun nárügüdagun nungua luéi igañi. Kei hénpulu luagu aban dan wapurichihaña meha lidan aban fulasu, ani aba narihin aban híweruti íweruhoun tiradiu nikarün. Aba nidin éibaagueina lárigi. Dan le nárügüdaali lan yebe, aba lachüürünu radiu múarugu ani aba lidin éibaagueina. Dan le nabahüdaguni houn ha híbiri íbirigu ida liña lanya nibihinu niradiu, aba lariñagun aban íbiri derebuguti lafiñen nun: ‘Lun hamuga bárügüdüni híweruti ligía, kaba hamugati badüga lau?’. Adügati álügüdahani le ladügübei íbiri le nun lun níchugun fe anihagua lan buga lídangiñe binadu igaburi nuagu”. b

⁹ Arufudahati likesin Stephen luagu gayara lan lagiribudun luriban igaburi sódini, íbini dan le samina wamá luagu gidaali lan wawéi. Anhein asusereda aban katei ítarati woun, mábürüha lan warüna masaminara wamá giñe aban lan kristiánu wuribati wagía. Íbini apostolu Pábulu ariñagati: “Dan lan le busén nan nadügüni le buídubei, wuribatirügüñein [...] nadüga” (Rom. 7:21-23). Kei gafigoun wabéi, sun wagía anihein igaburi le wawagu le áfuachubei kei iwiyei luma kaliki le abuinchubei tidan aban muna. Ligía mosu lubéi wasigirun áfaagua lun haruma wamá. Kaba íderaguawa?

10. Ka lunbei wadügüni lun mígiraguagüdün wamá woungua lun lagumadiruniwa luriban igaburi? (1 Huan 5:14, 15).

¹⁰ Ayanuha wamá luma Heowá lidan furíei luagu luriban igaburi le wawagubei le úmabei wageindagua lun wagidaruni wawariua lau ichouruni luagu laganbubadiwa lan ani líderagubadiwa lan giñe (aliiha huméi 1 Huan 5:14, 15). Inarüni magidarun lubéi lan Heowá luriban igaburi le wawagubei lau aban milaguru, gama lumoun, líchugubei erei le wemegeirubei woun lun wárügüdagun woungua (1 Fe. 5:10). Ida luba wuwaradun luma le wamuriahabei lidan furíei? Mosu wígiruni furumiñeguarügü  katei le adügübei lun láfuachun luriban igaburi le. Kei hénpulu, siñati warihini kei aban katei buiti waríagun pelikula, programa tidan bigibigitu o waliihan somu katei le adügüti lun láfuachun luriban igaburi. Ani mígira wamá lun wasaminarun luagu katei le wuribabei (Fili. 4:8; Kol. 3:2).

11. Ida luba gayara lan nasigirun adaüragua lau iseri igaburi?

¹¹ Úati buídurügü lan wagidaruni luriban igaburi wawariua, súdiniti giñe lun wasigirun adaüragua lau iseri igaburi. Ida luba gayara lan wadügüni? Lau wáfaagun lun wasubudiruni ligaburi Heowá buidu buidu, ani áyeiha wameime lani hénpulu (Efe. 5:1, 2). Dan le waliihan tidan Bíbülia aban sügǘ le arufudubalin feruduna lan Heowá, álügüdagua wamá woungua: “Feruduna numutiña san amu?”. Dan le waliihan luagu gudemehabu le larufudubei Heowá houn ha ásügürübaña lídangiñe lénrengunga, álügüdagua wamá woungua: “Nidiheritina san hawagu níbirigu ha mégeihabubaña, ani adügatina san somu katei lun níderaguniña?”. Sigí wamá abuiduragüdei wasaminan lau wadaüragun lau iseri igaburi ani gaguraasun wamá wámagua.

12. Ida liña larufuduni lani Stephen hénpulu gabafu tan Bíbülia lun tasansiruni hagaburi gürigia?

¹² Stephen, le iridúbei lidan párafu 8, áfaaguati lun ladaüragun lau iseri igaburi murusun murusun. Ariñagati: “Lúmagiñe nabadiseirun, anihein dan hénrengu lan nun nárügüdagun nungua luéi igañi. Le nadügübei aba nadisedun luéi nageindagun ani aba náfaagun lun ñein lan darangilaü. Ariñagaaña saragu gürigia nun, íbini nani weiriou, buidu lan nadüga, íbini au wéiritu nanigi lau asansiruni le nadügübei. Mama lau nubafu guánarügü nadügei asansiruni le lidan nigaburi. Afiñetina tídangiñe sun nanigi ubafu lan le tídanbei Bíbülia adügübei lun tasansiruni hagaburi gürigia”.

13. Kaba íderaguawa lun wabusenrun wadügüni le buídubei súnwandan? (Galasiana 5:16).

¹³ (Aliiha huméi Galasiana 5:16). Lun líderaguniwa Heowá adügei le buídubei ru lumuti lani sífiri sandu woun lau areini. Dan le waturiahanu Lererun, ígiratiwa lun ladundehaniwa lani Bungiu sífiri sandu. Resibitiwa giñe sífiri sandu dan le wabasiihan lidoun adamuridaguni. Ñein sügütiwa dan hama wábirigu, ítara kei wagía, háfaaguña giñe lun hadügüni le buídubei, ani ruti katei le dǘgüdaguaü woun (Ebü. 10:24, 25; 13:7). Dan le wafurieidun lun Heowá tídangiñe sun wanigi ani bégitiwa lun, lun líderaguniwa lidan somu wadebilin, ru lumuti lani sífiri sandu woun lun here wamá luma lun wasigirun áfaagua. Inarüni, madügünbei lan katei le lun lagidarun luriban ayumahani le wawéi, gama lumoun líchuguba erei woun lun mábürüha lan warüna lun wasigirun áfaagua. Kei tariñaguni gárada houn Galasiana 5:16, ha ígiraguagüdübaña houngua lun ladundehaniña sífiri sandu míchubaña “gúnfuli lun layumahan ǘgürügü”.

14. Ka uagu súdini lubéi wasigirun áfaagua lun wadügüni le buídubei?

¹⁴ Dan le gumeseediwa adügei katei le lunbei líderaguniwa abuiduragüdei wamadagua luma Heowá, súdiniti lun meferidirun wamani igaburi le luma lun wadügüni le buídubei. Ka uagu? Ladüga memeraagun lan aban hádangiñe wáganiñu —óuchawaguni—. Íbini lárigiñe wabadiseirun gayaraati lachawahaniwa katei le subudi wamuti moun lumuti lan wadügüni, kei burí wáhurerun luagu seinsu, wátagun luma warihin iyawaü lánina agamariduni (Efe. 5:3, 4). Ariñagati aban nibureinti gefenti luagu Heowá: “Aba katei le úmabei nageindagua hínsiñe hamá wügüriña níledigu nun. Saminatina yebe lásügürüba lan le nasandirubei  nuéi, gama lumoun mígirunlagidina; sandimemenagili”. Ka gayaraabei líderaguniwa anhein anihein lubéi lueirin luriban ayumahani wawagu?

15. Ka uagu líchiga dǘgüdaguaü woun wasubudiruni kamani lan layumahan ǘgürügü hadan sun gürigia? (Ariha humóun iyawaü).

¹⁵ Anhein wáfaaguña lubéi lun wagidaruni luriban ayumahani wawariua, haritagua waméi mámañadiwa lan wábugua. Ariñagatu Bíbülia: “Masufurirungidün ni aban óuchawaguni le hásiñarun gürigia awanda” (1 Ko. 10:13a). Sügügüda tumuti amu Bíbülia bérusu le ítara: “Óuchawaguni le úmabei hagagibudagua ligiaméme óuchawaguni le úmabei hagagibudagua ha híbiri gürigia”. Houn íbirigu ha lídanbaña uburugu Korintu lariñawagúa dimurei burí le. Fiu hádangiñe agabarahatiña meha, magüsi meha, ani gátaditiña meha (1 Ko. 6:9-11). Afiñetün san lárigiñe lan habadiseirun aba lan lagidarun sun luriban ayumahani hawéi? Úa mítaranti. Inarüni anúadiruaaña lan súngubei lun harúeihan sielu, gama lumoun cháramemegiña meha ladüga gafigoun hamá. Ligíati chóuruti anihein lan meha dan mosu lan meha háfaagun lun hagidaruni somu luriban ayumahani hawariua. Lunti líchugun katei le gurasu woun ladüga sügühaña lan amu lídangiñe ligiaméme turobuli le úmabei wagagibudagua ani hiñugua hamaali burí turobuli le. Ligíati, gayaraati “deregüdagu humá lidan hafiñen, subudiñu huméi luagu ligiaméme lan giñe hasufurirubei hiduheñu luéigiñe Kristu lidan sun fulasu” (1 Fe. 5:9).

16. Ka san sádara moun lubéi wéiguadun tidoun, ani ka uagu?

¹⁶ Moun lumuti wasaminarun úabei lan gunfuranda hamani amu wadebilin. Aban sádara katei le. Wasaminarun ítara, gayaraati lanügüniwa lun wafiñerun máranina lan wadebilin ani siñá lan wagidaruni wawariua. Gama lumoun, ariñagatu Bíbülia: “Gúnfuliti Bungiu, mígirunbei lun hibihin óuchawaguni le hásiñarun awanda. Lubaragiñe lira, danme liabin óuchawaguni,  larufudubei giñe Bungiu hun ida luba lan háfuridun lídangiñe; ítara luba gayara lan hawanduni” (1 Ko. 10:13b). Ligíati, íbini weiri lan ayumahani le wasandirubei, gayaraati úaragua wamá lun Heowá. Lau lídehan, mígiraguagüdünbadiwa woungua lun wábürühan lidoun luriban ayumahani ligía.

17. Íbini siñá lan wagidaruni luriban ayumahani wawariua sunsuinagubei ka gayaraabei wadügüni?

¹⁷ Haritagua waméi súnwandan kei gafigoun wabéi gayaraati liabin luriban ayumahani tidoun wanigi. Anhein asusereda aban katei ítarati woun, lunti wagidaruni wawariua lau lóufudagun, kei ladügüni Hosé dan le lanurahanbei tuéi lani Potifárü weiriou (Agu. 39:12). Moun lumuti lun lidamunbadiwa lan luriban ayumahani.

18, 19. Kaba álügüdahani íderaguawa lun wasansiruni ligaburi wasaminan?

¹⁸ Anhein busén wabéi lun wasansiruni ligaburi wasaminan, mosu wáfaagun lun úara lan wasaminan luma wóuserun lidan aban igaburi le aubei lagundaarun Heowá. Ligíati lunti wakutiragun woungua ida waña lan súnwandan ani álügüdagua wagíame woungua: “Arufuda lumuti san le nadügübei luagu subudi nani yarafaali lan lagumuchagüle ubóu? Náfaaguña san lun nadaüragun lau iseri igaburi? Ígiratina san lun ladundehanina lani Heowá sífiri sandu lun mígiraguagüdün nan nungua lun luriban ayumahani?”.

¹⁹ Lau wadügüni akutihani le, teni wamá lun wawanserun ani magurabahan wamá macharabadiwa lan. Ánhawa ariha mosu lan wabuiduragüdüni somu igaburi le wawagubei, mábürüha lan warüna. Lubaragiñe lira, falá waméi adundehani le lídanbei Filipuna 3:16: “Lau sun luwuyeri, lunti wabagaridun úaragua luma katei le furendei wamaalibei”. Anhein wadüga, labinirubei Heowá áfaaguni le wadügübei lun wasigirun asansirei ligaburi wasaminan.