1-2. Unsay angay nga padayon natong himoon human sa bawtismo? Ipatin-aw.

 PIRME ba kang manglimpiyo sa balay? Tingali sa wala pa nimo ni puy-i, imo gyod ning gilimpiyohag maayo. Pero unsay mahitabo kon di na nimo ni hinloan? Siyempre, mobaga ang abog ug magtipun-og ang hugaw. Aron pirmeng hapsay ang imong balay, kinahanglang pirme pod kang manghinlo.

² Ingon ana pod ang kinahanglang himoon kon bahin sa atong panghunahuna ug personalidad. Siyempre sa wala pa ta mabawtismohi, naningkamot ta sa paghimog mga kausaban aron ‘mahinloan nato ang atong kaugalingon sa tanang kahugawan sa unod ug espiritu.’ (2 Cor. 7:1) Pero karon, kinahanglan natong sundon ang tambag ni apostol Pablo nga ‘padayong magbag-o.’ (Efe. 4:23) Nganong kinahanglan nato nang himoon? Kay ang impluwensiya niining kalibotana dali rang makapahugaw nato atubangan ni Jehova. Aron dili na mahitabo ug pirme tang hinlo sa iyang atubangan, kinahanglang pirme natong susihon ang atong panghunahuna, personalidad, ug mga tinguha.

3. Unsay gipasabot sa “pagbag-o sa inyong hunahuna”? (Roma 12:2)

³ Unsay kinahanglan natong himoon aron mabag-o ang atong hunahuna, o paagi sa paghunahuna? (Basaha ang Roma 12:2.) Ang Gregong ekspresyon nga gihubad ug “pagbag-o sa inyong hunahuna” puwedeng hubaron nga “pag-renovate sa inyong hunahuna.” Busa dili igo nga dekorasyonan lang nato ang atong kinabuhi ug pipila ka maayong buhat. Kinahanglan nga  susihon nato ang atong pagkatawo ug mohimog mga kausaban aron masunod nato ang mga sukdanan ni Jehova kutob sa mahimo. Kinahanglan nga padayon nato ning himoon, dili kay kas-a lang.

4. Unsay atong himoon aron ang atong panghunahuna dili maimpluwensiyahan niini nga sistema sa mga butang?

⁴ Kon hingpit na ta, pirme na natong mapalipay si Jehova sa tanan natong himoon. Pero sa pagkakaron, kinahanglan pa tang padayong maningkamot nga mapalipay si Jehova. Matikdi nga sa Roma 12:2, si Pablo miingon nga kinahanglan natong bag-ohon ang atong hunahuna aron masabtan nato ang kabubut-on sa Diyos. Imbes pasagdan lang ang kalibotan nga mag-impluwensiya nato, kinahanglan nga susihon una nato ang atong kaugalingon aron makita kon ang panghunahuna ba gyod sa Diyos​—dili sa kalibotan—​ang nag-impluwensiya sa atong mga tumong ug desisyon.

5. Unsaon nato pagsusi ang atong kaugalingon kon nagtuo ba gyod ta nga duol na ang adlaw ni Jehova? (Tan-awa ang hulagway.)

⁵ Konsideraha ang usa ka pananglitan. Gusto ni Jehova nga ‘maghunahuna ta kanunay sa presensiya sa adlaw ni Jehova.’ (2 Ped. 3:12) Pangutan-a ang kaugalingon: ‘Ang ako bang paagi sa pagkinabuhi nagpakita nga nakasabot gyod ko nga hapit nang laglagon kining sistemaha sa mga butang? Ang ako bang mga desisyon bahin sa pag-eskuwela ug panarbaho nagpakita nga ang pag-alagad kang Jehova mao gyod ang pinakaimportante sa akong kinabuhi? Nagtuo ba gyod ko nga si Jehova magtagana para nako ug sa akong pamilya, o pirme ba kong mabalaka bahin sa materyal nga mga butang?’ Hunahunaa kon unsa ka malipayon si Jehova dihang makita niya nga naningkamot ta nga ipahiuyon ang atong kinabuhi sa iyang kabubut-on.​—Mat. 6:25-27, 33; Filip. 4:12, 13.

6. Unsay angay nga padayon natong himoon?

 ⁶ Kinahanglan nga pirme natong susihon ang atong panghunahuna dayon mohimog mga kausaban. Giingnan ni Pablo ang mga taga-Corinto: “Padayong sulayi kon naa ba mo sa pagtuo; padayong pamatud-i kon unsa mo sa inyong kaugalingon.” (2 Cor. 13:5) Aron ‘naa ta sa pagtuo,’ kinahanglang motambong ta sa mga tigom ug mosangyaw. Pero dili kay kana ra. Kinahanglan pod nga ang atong panghunahuna, tinguha, ug mga motibo nahiuyon sa kabubut-on ni Jehova. Busa kinahanglan nga padayon natong bag-ohon ang atong panghunahuna pinaagi sa pagbasa sa Pulong sa Diyos, pagsundog sa iyang panghunahuna, ug dayon paghimo sa gikinahanglang mga kausaban aron mapalipay si Jehova.​—1 Cor. 2:14-16.

7. Base sa Efeso 4:31, 32, unsa pay kinahanglan natong himoon, ug nganong dili tingali ni sayon?

⁷ Basaha ang Efeso 4:31, 32. Gawas pa sa paghimog mga kausaban sa atong panghunahuna, kinahanglan pod natong “isul-ob ang bag-ong personalidad.” (Efe. 4:24) Nagkinahanglan nag paningkamot. Apil sa paningkamotan natong wad-on mao ang dili maayong mga kinaiya, sama sa pagdumot, kasuko, ug kapungot. Nganong lisod tingali nang himoon? Tungod kay ang ubang negatibong kinaiya posibleng nakagamot na pag-ayo. Pananglitan, ang Bibliya nag-ingon nga ang uban “daling masuko” o “masuk-anon.” (Prov. 29:22) Bisag bawtismado na ang usa ka Kristohanon, kinahanglan tingali siyang padayong maningkamot nga kontrolahon ang iyang nakagamot pag-ayo nga mga kinaiya, sama sa gipakita sa mosunod nga eksperyensiya.

8-9. Giunsa pagpakita sa eksperyensiya ni Stephen nga kinahanglang padayon tang maningkamot nga dili ibalik pagsul-ob ang daang personalidad?

⁸ Ang brader nga si Stephen naglisod pagkontrol sa iyang kasuko. Siya miingon: “Bisag bawtismado na ko, kinahanglang padayon nakong buntogon ang pagkamasuk-anon. Pananglitan, dihang nagsangyaw mi sa balaybalay, diha koy gigukod nga kawatan kay gikuha ang radyo sa akong sakyanan. Sa nagkaduol ko niya, gibuhian niya ang radyo ug mikaratil ug dagan. Pag-estorya nako sa uban kon giunsa nako pagkuhag balik ang radyo, ang ansiyano sa among grupo nangutana, ‘Stephen, unsa untay imong himoon kon nadakpan nimo siya?’ Kana nakapahinuktok ug nakatukmod nakong maningkamot gyod nga magmakigdaiton.” b

⁹ Sama sa gipakita sa eksperyensiya ni Stephen, ang dili maayong kinaiya puwedeng motunghag balik, bisan dihang nagtuo ta nga nawala na nato ni. Kon mahitabo na nimo, ayawg kadismayar ug ayawg hunahunaa nga daotan na ka nga Kristohanon. Bisan si apostol Pablo miingon: “Dihang gusto nakong buhaton ang matarong, ang daotan ania kanako.” (Roma 7:21-23) Ang tanang dili hingpit nga mga Kristohanon naay dili maayong mga kinaiya nga magbalikbalik, samag abog ug hugaw sa atong balay. Kinahanglang padayon tang maningkamot nga magpabiling hinlo. Unsaon nato na paghimo?

10. Sa unsang paagi masuklan nato ang dili maayong mga kinaiya? (1 Juan 5:14, 15)

¹⁰ Kon naa kay kinaiya nga lisod wad-on, iampo na kang Jehova ug salig nga iya kang dunggon ug tabangan. (Basaha ang 1 Juan 5:14, 15.) Bisan tuod si Jehova dili mohimog milagro aron mawala ang imong dili maayong kinaiya, hatagan ka niyag kusog aron dili ka madaog niana. (1 Ped. 5:10) Siyempre, lihok uyon sa imong mga pag-ampo ug ayaw paghimog bisan  unsa nga makapabalik sa imong daang personalidad. Pananglitan, pag-amping sa mga pelikula o salida sa TV nga imong tan-awon o sa mga estorya nga imong basahon kay basig nagpasiugda ni sa mga kinaiya nga gipaningkamotan nimong wad-on. Ug kon mosantop sa imong hunahuna ang sayop nga mga tinguha, ayaw ni tugoti nga magpadayon.​—Filip. 4:8; Col. 3:2.

11. Unsay padayon natong himoon aron masul-ob ang bag-ong personalidad?

¹¹ Bisag nahukas na nimo ang daang personalidad, naa gihapon kay angayng himoon. Kinahanglang ugmaron nimo ang bag-ong personalidad. Unsaon man? Samtang nagtuon ka sa mga hiyas ni Jehova, paningkamoti nga masundog nimo siya. (Efe. 5:1, 2) Pananglitan, dihang magbasa kag estorya sa Bibliya nga nagpasiugda sa pagpasaylo ni Jehova, pangutan-a ang imong kaugalingon, ‘Nagpasaylo ba ko sa uban?’ Dihang magbasa ka bahin sa kaluoy ni Jehova sa mga kabos, pangutan-a ang imong kaugalingon, ‘Naluoy pod ba ko sa mga igsoon nga nanginahanglan, ug makita ba ni sa akong mga buhat?’ Padayon sa pagbag-o sa imong hunahuna pinaagi sa pagsul-ob sa bag-ong personalidad, ug samtang imo nang ginahimo, pailobi ang imong kaugalingon.

12. Sa unsang paagi ang Bibliya nakapausab kang Stephen?

¹² Si Stephen, nga gihisgotan ganina, anam-anam nga nakahimo sa pagbag-o sa iyang personalidad. Siya miingon: “Sukad ko nabawtismohan, kadaghan ko makasugamak ug panghitabo nga makapaulbo sa kasuko. [Nakakat-on] ko nga likayan na lang ang mga tawong makapahagit nako, o kaha pakalmahon ang kahimtang sa ubang paagi. Daghang tawo, lakip sa akong asawa, ang nakadayeg sa akong pag-atubang niini. Bisan ako, nasorpresa! Dili tungod nako nga nabag-o ko. Hinunoa, nasayod kong pamatuod kana sa makapabag-ong gahom sa Bibliya.”

13. Unsay makatabang nato nga maugmad ang hustong mga tinguha? (Galacia 5:16)

¹³ Basaha ang Galacia 5:16. Aron tabangan ta nga molampos sa atong paningkamot nga himoon kon unsay husto, si Jehova naghatag nato sa iyang balaang espiritu. Dihang magtuon ta sa Pulong sa Diyos, nagpaimpluwensiya ta sa iyang espiritu. Madawat pod nato ang balaang espiritu dihang motambong ta sa mga tigom. Makauban nato ang mga igsoon nga naningkamot pod sa paghimo kon unsay husto, ug makapadasig na. (Heb. 10:24, 25; 13:7) Ug dihang kinasingkasing tang moampo kang Jehova ug mangayo niyag tabang aron madaog nato ang atong mga kahuyangan, hatagan ta niya sa iyang balaang espiritu aron madasig ta nga padayong maningkamot. Ang atong espirituwal nga mga rutina dili tingali makapawala sa atong sayop nga mga tinguha, pero tabangan ta niini nga dili himoon ang maong mga tinguha. Sama sa giingon sa Galacia 5:16, kon maglakaw ta pinaagi sa espiritu, “dili gyod [nato] mahimo ang tinguha sa unod.”

14. Nganong importante nga padayon natong ugmaron ang hustong mga tinguha?

¹⁴ Kon naa na tay maayong rutina sa espirituwal nga mga kalihokan, kinahanglang mentinahon nato ang maong rutina ug padayong ugmaron ang hustong mga tinguha. Ngano? Kay dili ta lung-an sa usa sa atong mga kaaway. Kana nga kaaway mao ang tentasyon sa paghimog daotan. Bisan dihang nabawtismohan na ta, basin naay mga panahon nga ganahan gihapon ta sa mga butang nga angay natong likayan, sama sa pagsugal, paghuboghubog, o pornograpiya. (Efe. 5:3, 4) Usa ka brader  miingon: “Lisod kaayong suklan ang usa sa akong mga kahuyangan; maibog ko sa parehas nako nga lalaki. Abi nakog molabay ra ni nga pagbati, pero magbalikbalik gihapon ni usahay.” Unsay makatabang nimo kon kusog kaayo ang imong sayop nga tinguha?

15. Nganong makapadasig ang pagkahibalo nga ang sayop nga mga tinguha naeksperyensiyahan pod sa kadaghanan? (Tan-awa ang hulagway.)

¹⁵ Samtang naningkamot ka nga suklan ang sayop nga tinguha nga lisod wad-on, hinumdomi nga dili lang ikaw ang nakaeksperyensiya ana. Ang Bibliya nag-ingon: “Walay tentasyon nga miabot kaninyo gawas nianang sagad sa mga tawo.” (1 Cor. 10:13a) Ang laing hubad niini nga teksto nag-ingon: “Ang tanang tintasyon nga naagian ninyo naagian usab sa kadaghanan.” Kini nga mga pulong gisulat ngadto sa Kristohanong mga lalaki ug babaye sa Corinto. Ang uban nila mga mananapaw, homoseksuwal, ug palahubog kaniadto. (1 Cor. 6:9-11) Sa imong hunahuna, human sa ilang bawtismo wala na ba gyod sila mobatig sayop nga mga tinguha? Mibati gihapon. Bisag dinihogang mga Kristohanon sila, dili gihapon sila hingpit. Seguradong naay mga panahon nga nakigbisog pod sila sa sayop nga mga tinguha. Makapadasig gyod na nato. Ngano? Kay gipakita ana nga bisag unsa pang sayop nga tinguha ang imong gipaningkamotang wad-on, naa nay milampos sa pagsukol niana. Oo, makapabilin kang ‘lig-on sa pagtuo, kay nahibalo ka nga ang imong mga igsoon sa tibuok kalibotan nakasinati sab sa samang mga pag-antos.’​—1 Ped. 5:9.

16. Unsang panghunahuna ang angay natong likayan, ug ngano?

¹⁶ Samtang naningkamot ka nga suklan ang imong kahuyangan, ayaw gyod paghunahuna nga walay makasabot nimo kay delikado na. Kon maghunahuna ka ana, magtuo na hinuon ka nga wala na kay mahimo sa imong situwasyon ug nga di gyod nimo masuklan ang sayop nga mga tinguha. Dili na tinuod kay ang  Bibliya nag-ingon: “Ang Diyos kasaligan, ug dili niya itugot nga tentalon mo nga labaw sa inyong maantos, apan uban sa tentasyon siya magtaganag kalingkawasan aron makalahutay mo niini.” (1 Cor. 10:13b) Busa bisag kusog ang atong sayop nga tinguha, makapabilin tang matinumanon. Sa tabang ni Jehova, mapugngan nato ang atong kaugalingon sa paghimo sa atong tinguha.

17. Bisag dili nato malikayan nga motungha usahay ang sayop nga mga tinguha, unsay kaya natong himoon?

¹⁷ Hinumdomi ni: Kay dili ka hingpit, dili nimo malikayan nga motungha usahay ang sayop nga mga tinguha. Pero kon mahitabo na, sukli dayon na, sama sa gihimo ni Jose dihang miikyas dayon siya palayo sa asawa ni Potipar. (Gen. 39:12) Ayawg paundayoni ang imong sayop nga mga tinguha!

18-19. Unsay atong ipangutana sa kaugalingon samtang naningkamot ta nga bag-ohon ang atong hunahuna?

¹⁸ Ang pagbag-o sa atong hunahuna nagpasabot nga padayon tang maningkamot nga ipahiuyon ang atong panghunahuna ug binuhatan sa kabubut-on ni Jehova. Busa kinahanglang regular natong susihon ug pangutan-on ang atong kaugalingon: ‘Ang ako bang ginahimo nagpakita nga nakasabot gyod ko nga dinalian na ang atong panahon? Miuswag ba ko sa pag-ugmad sa bag-ong personalidad? Nagpagiya ba ko sa espiritu ni Jehova aron masuklan nako ang tentasyon nga himoon ang sayop nga mga tinguha?’

¹⁹ Dihang susihon nimo ang imong kaugalingon, pagpokus sa imong pag-uswag, dili sa imong mga sayop. Kon nakita nimo nga naa kay angayng pauswagon, ayawg kaluya. Hinuon, sunda ang tambag sa Filipos 3:16: “Bisan unsang pag-uswag ang atong nahimo, ipadayon nato kini.” Kon imo ning sundon, makasalig ka nga panalanginan ni Jehova ang imong mga paningkamot nga bag-ohon ang imong hunahuna.