1, 2. ¿Kʼãrẽta obʼaibara buru kʼoeda tẽãra? Jara ũrĩbira.

 ¿BɄARA badua imabʉka bʉ dera? ¿Kʼãrẽta berabariseabʉ ima ẽ bʉrʉ? Bʉa bʉ deda badua ima ẽ bʉrʉ jaigʉabayi, maʉ̃ kʼarea ima erbaibara neneẽã bamarẽã.

² Abarika dayirãra zarea odaibara daya sãwũã krĩchabʉ ara oita akʉza dayi sãwũãbʉta. Dayirã buru kʼoei naenara zarea osida dayi bebʉ awuara erbaita «dayi kakuata neneẽã [erbaita] akʉza dayi krĩchara kayirua neẽã [erbaita]» (2 Cor. 7:1). Mamina kʼãwũãenara dayirãbara odaibara apostol Pabloba ũrãgʼa diadata «sãwũã krĩchabʉra jipa awuara oibara» (Efes. 4:23). ¿Kʼãrẽa ewariza zarea oibara? Naʉ̃ drʉade obʉba oseabʉ dayirãta Jeowa nãã jaigʉapanamarẽã. Dayirã Jeowa nãã neneẽã baira badua akʉbaibara dayirã sãwũã krĩchabʉta, sãwũãbʉta akʉza dayirãbara kʼãrẽta kãgabʉta.

3. ¿Kʼãrẽta jarakĩrãbʉ krĩcha yiwidi erbaibara? (Romanos 12:2).

³ ¿Kʼãrẽta nesidapanʉ dayirãba krĩcha yiwidi erpanaita? (Akʉra Romanos 12:2). Naʉ̃ testode zokʼabʉ bedʼea griegodebemata, naʉ̃ bedʼeaba jarakĩrãbʉ krĩcha yiwidi erbaita. Naʉ̃bara jarakĩrãbʉ ẽ ewari abapai nebia oita, awuarabʉrʉ akʉibarata dayi sode kʼãrẽtabʉta akʉza nekʼãrẽ jõma oibarata Jeowaba zokʼabʉde bʼaita, maʉ̃ta dayirãbara badua obʼaibara.

4. ¿Kʼãrẽta oibara naʉ̃ drʉadebema kĩrãkʼa krĩcha ẽ baita?

⁴ Dayirã ẽjũã biade nemitia oka babʉrʉdebʉrʉ jõma aripe odayi Jeowaba zokʼabʉra. Maʉ̃ ze ẽ nããra dayirãra  zarea odaibara Jeowaba zokʼabʉ aripe odaita. Apostol Pabloba jarasi Romanos 12:2​de dayirãbara krĩcha yiwidi erbaita nesidabʉta, mawũã kʼawuaita Jeowaba dayirãba kʼãrẽta omarẽã kãgabʉta. Dayirãra krĩchada ẽ baibara naʉ̃ drʉaba krĩchabʉ kĩrãkʼa, awuarabʉrʉ zarea odaibara akʉita naʉ̃ drʉaba krĩchabʉ kĩrãkʼa krĩchabʉ ẽ kʼawuaita, mawũã ẽ bʉrʉ Daizezeba krĩchabʉ kĩrãkʼa krĩchabʉ kʼawuaita.

5. ¿Kʼãrẽa dayikʉza widibara daya kʼawuabʉ kʼawuaita ewari jõira arakʼaitabata? (Akʉra potota).

⁵ Bari jaraita, Jeowaba kãgabʉ «ʉrʉma [jʉ̃ãpanamarẽã iyi] ewari zeyeda» (2 Ped. 3:12). Bʉyikʉza widira: «¿Mʉ̃ sãwũã bʉdeba ũdubibʉka kʼawuabʉta naʉ̃ ewari jõbodoarepanʉta? ¿Mʉ̃a ũdubibʉka Jeowara mʉ̃itara audre yibiata, mʉ̃ unibersidaeda wãbʉira akʉza badu trajo jidabʉira? ¿Mʉ̃ara ĩjãbʉka Jeowabara mʉ̃ta akʉita akʉza mʉ̃ mebẽrãta, mawũã ẽ bʉrʉ mejãcha krĩcha zroma obʉka nebia erbai kʼarea?». Jeowara mejãcha sobiabʉ iya ũdubʉrʉde dayirã zarea obʉta iya kãgabʉ oita (Mat. 6:25-27, 33; Filip. 4:12, 13).

6. ¿Kʼãrẽta obʼaita nesidapanʉ dayirãbara?

⁶ Dayirãba sãwũã krĩchabʉra badua akʉibara, mawũã dayirãba kʼãrẽta ara oita nesidabʉbʉrʉ ara oita. Pabloba jarasi kristianora Corintodebemara: «Akʉidua maraba ĩjãbʉra ariya erbʉ kʼawuaita, ũdubidua mara jʉ̃zababʉta» (2 Cor. 13:5). Dayirãba ĩjãbʉ ariya erbʉ kʼawuaita, bari ãba yi jʉrebarima wã ba ẽ baibara akʉza Daizeze Bedʼea bari jaradia ba ẽ baibara, awuarabʉrʉ akʉibara dayirãba sãwũã krĩchabʉta, dayirã sãwũãbʉta, kʼãrẽta  kãgabʉta akʉza kʼãrẽa mawũã obʉta. Dayirãra krĩcha yiwidita erpanaibara, mawũã oira Daizeze Bedʼeata leibara, mawũã Jeowaba krĩchabʉ kĩrãkʼa krĩchaita akʉza iyi sobiabita (1 Cor. 2:14-16).

7. Efesios 4:31, 32​de jarabʉdera, ¿adewara kʼãrẽta odaibara akʉza kʼãrẽa zareabʉ maʉ̃ idubʉira?

⁷ (Akʉra Efesios 4:31, 32). Dayirãba krĩcha yiwidi erpanʉ awuara, daya obʉdeba ũdubibara krĩcha yiwidi erpanʉta (Efes. 4:24). Mawũã oira zarea odaibara idubʉita dayirã nãã sãwũã badata. Bari jaraita, nejʉrabʉta, jiwaidata, mejãcha kĩrʉmiata akʉza yõmiarata. ¿Kʼãrẽa mejãcha zarea baseabʉ maʉ̃ idubʉita? Ʉ̃kʉrʉitara zare ãya nãã nemitia obada idubʉita, Daizeze Bedʼeaba jarabʉ ʉ̃kʉrʉra badua kĩrʉbʉ baera (Prov. 29:22). Dayi sode maʉ̃ mitia ãĩ bʉeira zarea odaibara dayi buru kʼoeda tẽãbida. Atia akʉdayi yiza maʉ̃ ʉ̃rʉ bedʼeabʉta.

8, 9. ¿Sãwũã kʼarebabʉ Stephen yizadeba krĩcha kayirua nãã erbadara jipa ãĩ bʉeibarata?

⁸ Mebẽã Stephenʼra mejãcha kĩrʉmiabasi. Maʉ̃ba iyitara zareabasi kĩrʉ ẽã awuantakʉaira. Iya jarasi: «Mʉ̃ buru kʼoeda tẽãra zarea oibarabasi mesera kĩrʉ ẽ baita, bari jaraita ewari aba mʉ̃a Daizeze Bedʼea jaradianʉmʉena, nezrʉgamiaba mʉ̃ karru radiota erkã totosi. Mʉ̃ra kʼawabasi baera kʼaidu pẽwã wãsi nezrʉgamiata, mʉ̃ta iyi kʼawa babʉrʉde bae totosi radiota, nezrʉgamiara wẽba wãsi. Mʉ̃a maʉ̃ta wuabema mebẽrã jara ũrĩbiside, zõrãrã abaʉba mʉ̃aʼa widisi: ‹Stephen, ¿bʉa kʼãrẽta okasi maʉ̃ nezrʉgamiata jidasibʉrʉ?›. Mebẽãba mʉ̃a maʉ̃ wididaba, mʉ̃a krĩchabisi jʉrʉita wuabemabawara aduʼa bʼaita». b

⁹ Stephen yizaba ũdubibʉ dayirãbara badu ewaride ũdubiseabʉta dayi sode nemitiabʉra. Daya krĩchasibʉsida wua nemitia oẽ baita, mawũã berabaribʉbʉrʉ krĩcharãra bʉra ẽbẽra kayiruata akʉza zeri ẽãta. Apostol Pabloba jarasi iyi ʉ̃rʉ: «Mʉã biata okrĩña bʼʉdʼera bia ẽãta mʉne bʼʉba idaribi ẽã» (Rom. 7:21-23). Dayirã de imana tẽã jẽda jaigʉabari kĩrãkʼa, dayirãra zarea obʼaibara jẽda krĩcha mitia zebʉ ãĩ bʉeita. Dayirãra ewariza zarea oibara Jeowa nãã neneẽã baita, ¿sãwũã oi maʉ̃ra?

10. ¿Kʼãrẽta oibara krĩcha mitia ãĩ bʉeita? (1 Juan 5:14, 15).

¹⁰ Jeowaʼa widida kʼarebamarẽã idubʉita nemitia zareabʉta akʉza ĩjãra iya kʼarebaita (akʉra 1 Juan 5:14, 15). Jeowaba maʉ̃ nemitia bʉdeba mesera ãĩ bʉe ẽ mina, iya zarea diayi bʉa maʉ̃ nemitiata wua oẽ marẽã (1 Ped. 5:10). Maʉ̃enara oibara bʉa Jeowaʼa widibʉ kĩrãkʼa, mawũã jẽda oẽ baita nemitiata. Bari jaraita, pelikula akʉ ẽ baibara, mawũã ẽ bʉrʉ libro le ẽ baibara, bʉa nemitia idubʉkĩrãbʉ ʉ̃rʉ bedʼeabʉta akʉza zarea ora bʉ burude nemitia oita krĩcha zebʉ ãĩ bʉeita (Filip. 4:8; Col. 3:2).

11. ¿Kʼãrẽta odaibara krĩcha yiwidi erpanaita?

¹¹ Dayirãba nãã krĩcha mitia erbada idubʉeda daucha, erbaibara krĩcha yiwidita, ¿maʉ̃ra sãwũã oseabʉ?  Kʼawuabʉrʉde Jeowaba iyi sode kʼãrẽ nebia erbʉta zarea ora bʉabida iyide kĩrãkʼa oita (Efes. 5:1, 2). Bʉa Daizeze Bedʼea lebʉrʉde ũdura Jeowaba sãwũã kĩrãduabʉta wuabema ẽbẽraba nemitia odata, bʉyikʉza widira: «Wuabemaba nekayirua obʉra, ¿mʉ̃ara kĩrãduabʉka?». Kʼawuabʉrʉde Jeowaba sãwũã so borekea akʉbʉta ẽbẽrarã nekʼãrẽ neẽãbeta bʉyikʉza widira: «¿Mʉ̃ara krĩchabʉka mebẽrãba kʼãrẽ nesidabʉ ʉ̃rʉ akʉza kʼarebabʉka?». Zarea ora krĩcha bia erbaita akʉza ẽbẽra bia bʼaita, adewara kĩrʉrãra bʉa jõma aripe oẽ bʉrʉ.

12. ¿Sãwũã ũdusi Stephenbara Daizeze Bedʼeaba iyi kʼarebasita awuara oita?

¹² Stephenbara kʼawuasi sãwũã wiña wiñane krĩcha bia erbaita akʉza ẽbẽra bia bʼaita. Iya jarabʉ: «Mʉ̃ buru kʼoedadeba ʉ̃ta ũdu zebʉrʉ, nekʼãrẽ mʉ̃ kĩrʉbiseabʉta, mʉ̃a kʼawuasi sãwũã jĩga bʼaibarata ẽbẽrarã mʉ̃ kĩrʉbibʉdeba akʉza nekʼãrẽ awuruta okʼawuasi, mawũã mʉ̃ mejãcha kĩrʉ ẽ baita. Awuru ẽbẽrarãta akʉza mʉ̃ kimata, ibia bedʼeabʉ mʉ̃ kʼãwũã zarea obʉ kʼarea mesera kĩrʉ ẽ baita, mʉ̃ara krĩcha ẽ mʉ̃yidobaʉba jõma bia owãta, awuarabʉrʉ krĩchabʉ Daizeze Bedʼeaba kʼarebasita mawũã jipa awuara oita».

13. ¿Kʼãrẽba kʼarebai krĩcha bia erbaita? (Gálatas 5:16).

¹³ (Akʉra Gálatas 5:16). Jeowaba dayirã kʼarebaita daya nebia omarẽã iya diabʉ, iyi jaure zareata. Dayirã Daizeze Bedʼea akʉbʉde akʉza ãba yi jʉrebarima wãpanʉne iduaribipanʉ Daizeze jaure zareaba kʼarebamarẽã. Ãba yi jʉrepanʉnera ũdupanʉ mebẽrã dayirã kĩrãkʼa zarea opanʉta nemitia oẽ baita, maʉ̃ba dayirã so zarea diabʉ (Heb. 10:24, 25; 13:7). Dayirãta badua Jeowa yiwidʼipanʉbʉrʉ kʼarebamarẽã dayirãba nemitia obʉ idubʉita, Jeowaba diayi iyi jaure zareata dayirãba awuantadamarẽã. Dayirãba mawũã opanʉbara kʼareba ẽ bayi krĩcha mitia zebʉra jipa ãĩ bʉeita, mamina kʼarebayi dayirã krĩcha mitia yi edebi ẽ baita. Gálatas 5:16​ba jarabʉ kĩrãkʼa, Daizeze jaureʼa yi kʼarebabipanʉbʉrʉ «kayirua okĩrãbʉta oda ẽ baya».

14. ¿Kʼãrẽa audre yibia zarea oita krĩcha bia erbaita?

¹⁴ Dayirãta zarea obasibʉrʉ Jeowaʉ̃me neũdukʼawua bia bʼaita akʉza nebia oita, zarea odaibara mawũã obʉra idubʉe ẽ baita, ¿kʼãrẽa? Dayirãbara badu ewaride ũduseabʉ nemitia dayirã baebiseabʉta. Dayirã buru kʼoeda tẽãbida krĩchaseabʉ nekayirua oita. Bari jaraita, itua doita krĩchaseabʉ, ẽbẽrarã ãkadabe akʉita krĩchaseabʉ, mawũã ẽ bʉrʉ plata bari jemeneita krĩchaseabʉ (Efes. 5:3, 4). Mebẽã kʉ̃ra abaʉba jarabʉ: «Mʉ̃itara biode zare abari yumakẽrã kãgabʉ idubʉ ẽ baita, mʉ̃a krĩchasi mʉ̃ mawũã sentibʉra mesera berabari wãita, mamina wabibasidu mawũã sentibʉ». ¿Kʼãrẽba kʼarebaseabʉ bʉa krĩcha mitia erbʉ ãĩ bʉeita?

15. ¿Sãwũã so zarea diabʉ dayirãba kʼawuabʉrʉde mebẽrã jõmaʉ̃ba krĩcha mitia erbʉta? (Akʉra potota).

¹⁵ Bʉta zarea obʉbʉrʉ nemitia okĩrãbʉ idubʉita, kĩrãbera bʉra dobabʉ  ẽãta. Daizeze Bedʼeaba jarabʉ: «Kayiruade baebibari krĩchara jõmaita zebʉ» (1 Cor. 10:13​a). Awuru Daizeze Bedʼearaba naʉ̃ testo ʉ̃rʉ jarabʉ: «Krĩcha kayirua zebʉra jõmaitabida zebʉ». Apostol Pabloba naʉ̃ bedʼeara kristianora Corintodebemaita bʉdabasi, ʉ̃kʉrʉra ãĩ bamiabasi, ʉ̃kʉrʉba abari yumakẽrãta kãgabasi, ʉ̃kʉrʉra ituadomiabasi (1 Cor. 6:9-11). Ãyi buru kʼoeda tẽãra, ¿bʉmara wuara ãyira aña krĩcha ẽ basika? Mawũã ẽ, ãyira ẽbẽrarã ʉ̃ta wãiranebemabasimina nemitia omiabasi, maʉ̃ kʼarea zarea odaibarabasi aripe oita. Naʉ̃ra yiza bia dayirãita, ũdubibʉ baera daya krĩcha mitia erbʉra wuabema mebẽrãsida maʉ̃ne berabarisita akʉza awuantasidata maʉ̃ bedʼea zromara. Maʉ̃ kʼarea bʉabida awuantaseabʉ maʉ̃ bedʼea zromara akʉza Jeowaʉ̃me kʼẽrẽpa baseabʉ «kʼawuapanʉ baera zʉbʉriara wãta naʉ̃ drʉa jõmaʉ̃nẽ» (1 Ped. 5:9).

16. ¿Kʼãrẽ ʉ̃rʉ krĩchada ẽ baibara akʉza kʼãrẽa?

¹⁶ Zarea ora krĩcha ẽ baita bʉa bedʼea zroma erbʉra kʼaiba kʼawua ẽãta. Mawũã krĩchabʉba krĩchabiseabʉ kʼaiba kʼarebaira neẽãta akʉza zarea neẽ bayi krĩcha mitia zebʉrʉde maʉ̃ ãĩ bʉeita. Mamina Daizeze Bedʼeabara jarabʉ dayirãbara awuantaseabʉta bedʼea zromara. Iya jarabʉ: «Mamina Daizezera jipabʉ, maʉ̃ kʼarea kayiruade baebibari krĩchara, daya oẽãsidu wuetara obi ẽ, awuarabʉrʉ kayiruade baebibari krĩcha zebʉrʉdera, Daizezebara kʼarebayi maʉ̃neba ẽdrʉita mawũã zarea bamarẽã» (1 Cor. 10:13b). Dayi burudeba krĩcha mitia ãĩ bʉeita mejãcha zareabʉmina, Jeowaba kʼarebaseabʉ akʉza dayirãra iyiʉ̃me kʼẽrẽpa baseabʉ.  Jeowa kʼarebadeba dayirãbara nekayiruara oẽ bayi.

17. Dayi burude krĩcha mitia zebʉmina, ¿kʼãrẽta oibara?

¹⁷ Kĩrãbera naʉ̃ta, dayirã jõmaʉ̃ta nemitia omia baera krĩcha mitiara dayirã burude zeyi, krĩcha mitia zebʉrʉdera mesera ara oibara Joséba oda kĩrãkʼa. Iyira Potifar kimaneba mesera aña wãsi nemitia oẽ baita (Gén. 39:12). Bʉsida kʼẽrẽpa baseabʉ Jeowaʉ̃me.

18, 19. ¿Dayikʉza kʼãrẽta widibara krĩcha yiwidi erbʉ kʼawuaita?

¹⁸ Naʉ̃ artikulode kʼawuasida dayirãba krĩcha yiwidi erbaira daya sãwũã krĩchabʉdeba, daya obʉdeba, ũdubibarata Jeowaba kãgabʉde obʉta. Maʉ̃ kʼarea dayikʉza badua widibaibara: «¿Mʉ̃a obʉba ũdubibʉka kʼawuabʉta naʉ̃ ewari jõbodoare panʉta? ¿Ũdubibʉka mʉ̃ara krĩcha yiwidʼi erbʉta? ¿Mʉ̃a iduaribibʉka Jeowa jaure zareaba kʼarebamarẽã nemitia oẽ baita?».

¹⁹ Dayikʉza akʉbʉrʉdera kʼãrẽta sãwũã ara oita, akʉ ẽ baibara kʼãrẽta aripe oẽãta, awuarabʉrʉ akʉibara sãwũã wiña wiñane nebia owãta. Mawũãsidu bʉa ũdubʉbʉrʉ wabida nekʼãrẽ ara oita waebʉta, maʉ̃ kʼarea krĩcha zroma orãra akʉza odaibara Filipenses 3:16​ba jarabʉ kĩrãkʼa: «Mamina dayirãba nekʼãrẽ mejãcha obʉmina, maʉ̃ta audre bia owãibara». Mawũã obʉbʉrʉ ĩjãra Jeowaba bʉ kʼarebaita bʉa krĩcha yiwidi erbamarẽã.