1, 2. ¿Chuqui yom mi lac bej mel cheʼ bʌ tsaʼix lac chʼʌmʌ jaʼ, i chucoch?

 ¿JAJAYAJL maʼ sʌqʼuesan a wotot? Tajol tsaʼ wen sʌqʼuesa cheʼ bʌ tsaʼ jaxto cʼotiyet ti chumtʌl. ¿Pero chuqui miʼ yujtel mi maʼ cʌy a sʌqʼuesan? La cujil chaʼan mi caj i tempʌyel jiñi i tsʼubenlel yicʼot mi caj i wen bibʼan. Yom mi lac chʌcʌ sʌqʼuesan jiñi la cotot chaʼan utsʼat ti qʼuejlel.

² Cheʼʌch yom mi lac mel (chaʼlen) jaʼel ti lac ñaʼtʌbal yicʼot lac melbal. Cheʼ bʌ maxto lac chʼʌmʌ jaʼ tsaʼ lac chaʼle wersa laj qʼuextan laj cuxtʌlel i tsaʼ lac locʼsa «pejtelel muʼ bʌ i bibʼesan lac bʌcʼtal yicʼot lac ñaʼtʌbal» (2 Cor. 7:1). Pero añix ti lac wenta chaʼan mi lac jacʼ tsaʼ bʌ i yʌlʌ jiñi apóstol Pablo: «Yom mi laʼ bej tsijibtesan jiñi laʼ ñaʼtʌbal» (Efes. 4:23). ¿Chucoch ñuc i cʼʌjñibal cheʼ mi lac chaʼlen wersa chaʼan mi lac mel iliyi? Come jiñi i «biʼbilel» yicʼot i «tsʼubenlel» ili pañimil (mulawil) ti ora miʼ mejlel ti tempʌyel ti lac pusicʼal. Chaʼan maʼañic miʼ yujtel jiñi yicʼot chaʼan sʌc mi la cajñel tiʼ wut Jehová tiʼ pejtelel ora, yom mi lac chʌcʌ tsajin jiñi lac ñaʼtʌbal, bajcheʼ yilalonla yicʼot chuqui tac la com.

3. ¿Chuqui yom i yʌl cheʼ mi lac tsijibtesan lac ñaʼtʌbal? (Romanos 12:2).

³ ¿Chuqui yom mi lac mel chaʼan mi lac tsijibtesan o mi laj qʼuextan lac ñaʼtʌbal? (Pejcan Romanos 12:2). Mach jasʌlic cheʼ mi lac mel chuqui tac wem bʌ chaʼan wen bajcheʼ yilalonla. Yomʌch mi lac tsajin chuqui an ti lac pusicʼal yicʼot mi laj  qʼuextan lac bʌ chaʼan cheʼʌch mi lac chumtʌl cheʼ bajcheʼ miʼ yʌl Jehová. Iliyi yomʌch mi lac chʌcʌ mel, mach junsujtelic jach.

4. ¿Chuqui yom mi lac mel chaʼan maʼañic miʼ yʌsin lac pensar ili pañimil?

⁴ Cheʼ bʌ tojoñixla, muqʼuix caj i mejlel lac tijicñesan Jehová tiʼ pejtelel chuqui mi lac mel. Pero ili ora yom mi lac chaʼlen wersa chaʼan mi lac taj jiñi. Laʼ laj qʼuel tsaʼ bʌ i yʌlʌ jiñi apóstol Pablo ti Romanos 12:2 chaʼan bajcheʼ yom mi lac tsijibtesan lac ñaʼtʌbal yicʼot mi lac wen qʼuel chuqui jiñi yom bʌ Dios. Mach yomic mi la cʌcʼ chaʼan miʼ yʌsiñonla ili pañimil, wen ñuc i cʼʌjñibal cheʼ mi lac tsajin lac bʌ chaʼan mi laj qʼuel bajcheʼ woli (choncol) i coltañonla jiñi i ñaʼtʌbal Dios ti lac meta tac yicʼot ti chuqui tac mi lac mel.

5. ¿Bajcheʼ miʼ mejlel lac ñaʼtan mi añʌch ti lac jol chaʼan lʌcʼʌlix jiñi i qʼuiñilel Jehová? (Qʼuele jiñi foto tac).

⁵ Jumpʼejl ejemplo, Dios yom chaʼan chʌn yʌxʌl la co lac pijtan cheʼ bʌ «miʼ tilel i qʼuiñilel Jehová» (2 Ped. 3:12). Jin chaʼan laʼ laj cʼajtiben lac bʌ: «¿Muʼ ba c pʌs tij cuxtʌlel chaʼan cujil chaʼan lʌcʼʌlix i jilibal ili pañimil? Cheʼ bʌ mic ñaʼtan chuqui mi caj c mel chaʼan jiñi escuela yicʼot chaʼan jiñi eʼtel (troñel), ¿muʼ ba c pʌs chaʼan jiñi ñumen ñuc bʌ i cʼʌjñibal chaʼañon jiñʌch i melbentel i yeʼtel Jehová? ¿Mucʼʌch ba c ñop chaʼan mi caj i cʌntan c familia yicʼot joñon, o mic wen pensarin jiñi chubʌʼañʌl tac?». Jehová tijicña miʼ yubin cheʼ bʌ miʼ qʼuel chaʼan mi lac chaʼlen wersa chaʼan mi lac chumtʌl cheʼ bajcheʼ yom (Mat. 6:25-27, 33; Filip. 4:12, 13).

6. ¿Chuqui yom mi lac bej mel?

⁶ Yom mi lac chʌcʌ tsajin jiñi lac pensar yicʼot mi laj qʼuextan ti ora jiñi yom tac bʌ mi laj qʼuextan. Pablo tsiʼ yʌqʼue ili ticʼojel jiñi xñoptʼañob ti Corinto: «Chʌn tsajin laʼ bʌ chaʼan mi laʼ qʼuel mi xucʼulʌch laʼ ñopoñel. Chʌn qʼuelela majquiyetla tiʼ sujm» (2 Cor. 13:5). Cheʼ  xucʼulʌch añonla ti lac ñopoñel mach jasʌlic cheʼ mi lac majlel ti tempa bʌ o mi lac bixel loqʼuel ti subtʼan. Yaʼ ochem chuqui mi lac ñaʼtan, chuqui mi lac mel yicʼot chucoch mi lac mel. Jin chaʼan, yom mi lac pejcan jiñi i Tʼan Dios, mi laj cʌn chuqui miʼ ñaʼtan yicʼot mi lac tojʼesan lac bʌ chaʼan mi lac tijicñesan, chaʼan cheʼ bajcheʼ jiñi mi lac bej tsijibtesan jiñi lac ñaʼtʌbal (1 Cor. 2:14-16).

7. Cheʼ bajcheʼ miʼ yʌl Efesios 4:31, 32, ¿chuqui yambʌ yom mi lac mel, i chucoch an i tajol wocol?

⁷ (Pejcan Efesios 4:31, 32). Mach jasʌlic cheʼ bʌ mi laj qʼuextan jiñi lac pensar, yomʌch mi lac chʼʌm jaʼel jiñi tsijiʼ bʌ lac melbal (chaʼlibal) (Efes. 4:24). Pero añʌch chuqui yom mi lac mel. Jumpʼejl ejemplo, yom mi lac chaʼlen wersa chaʼan mi laj cʌy jiñi mach tac bʌ weñic lac melbal bajcheʼ jiñi cʌlʌx michʼajel o michʼ pusicʼal. Pero an i tajol wocol mi la cubin come an ñoj ochemix bʌ ti lac tojlel. Cheʼto jaʼel, jiñi Biblia miʼ taj ti tʼan «jini yujil bʌ michʼajel» (Pr. 29:22). Tajol cheʼ bʌ tsaʼix lac chʼʌmʌ jaʼ yomʌch mi lac bej chaʼlen wersa chaʼan maʼañic mi lac chʌn pʌs ili mach tac bʌ weñic lac melbal. Laʼ laj qʼuel jumpʼejl experiencia muʼ bʌ i pʌs jiñi.

8, 9. ¿Bajcheʼ miʼ pʌs tsaʼ bʌ ujti tiʼ tojlel Stephen chaʼan wen ñuc i cʼʌjñibal mi lac bej cʌy jiñi mach bʌ weñic lac melbal?

⁸ Juntiquil hermano i cʼabaʼ Stephen wocol miʼ yubin chaʼan miʼ cʌy jiñi michʼajel. Miʼ yʌl: «Tsaʼto c bej chaʼle wersa anquese tsaʼix c chʼʌmʌ jaʼ. Jumpʼejl ejemplo, ti jumpʼejl bʌ qʼuin woli (yʌquel) c julaʼtan lojon jiñi familia tac chaʼan mic suben lon wen tʼan, i tsaʼ j qʼuele chaʼan juntiquil xujchʼ woliʼ chʼʌm majlel jiñi i radiojlel j carro. Tsaʼ majli cajñesan. I cheʼ bʌ colelix c taj, tsiʼ jʌp choco cʌlel jiñi radio i tsaʼ putsʼi majlel. Cheʼ bʌ tsaʼ c sube jiñi yambʌ hermanojob bajcheʼ tsaʼ c chaʼ taja jiñi c radio, juntiquil hermano wen añix bʌ i ñaʼtʌbal tiʼ subeyon: ‹¿Chuqui tsaʼ mele cheʼ tsaʼic a taja jiñi xujchʼ?›. Jiñi cʼajtiya tsiʼ yʌqʼueyon j qʼuel chaʼan cʌylemto mach bʌ weñic c melbal». b

⁹ Jiñi tsaʼ bʌ ujti tiʼ tojlel Stephen miʼ pʌsbeñonla chaʼan an lac sajtemal tac mach bʌ tsiquilic miʼ chaʼ waʼ pʌs i bʌ, anquese mi lac lon ñaʼtan chaʼan tsaʼix lac locʼsa ti lac tojlel. Mi tsaʼ ujtiyonla bajcheʼ jiñi, mach yomic mi la cubin lac chʼijyemlel mi yomicto mi lac ñaʼtan chaʼan mach weñic bʌ xñoptʼañonla. Jiñi apóstol Pablo tsiʼ yʌlʌ jaʼel: «Cheʼ bʌ com c mel chuqui wen, jiñi mach bʌ weñic an tic tojlel» (Rom. 7:21-23). Cheʼ bajcheʼ miʼ chaʼ bibʼan yicʼot miʼ tempʌyel i tsʼubenlel jumpʼejl otot, pejtelel jiñi xñoptʼañob añob i sajtemal muʼ bʌ i chaʼ pʌs i bʌ come xmulilob. Jin chaʼan, yom mi lac bej chaʼlen wersa chaʼan sʌconla. ¿Chuqui mi caj i coltañonla?

10. ¿Chuqui yom mi lac mel chaʼan maʼañic miʼ mʌlbeñonla jiñi mach bʌ weñic ti lac tojlel? (1 Juan 5:14, 15).

¹⁰ Laʼ lac suben Jehová ti oración chuqui jiñi woli bʌ lac chaʼlen wersa laj cʌy i laʼ lac ñop chaʼan mi caj i ñʌchʼtañonla yicʼot mi caj i coltañonla (pejcan 1 Juan 5:14, 15). I sujmʌch chaʼan Jehová maʼañic mi caj i mel jumpʼejl milagro chaʼan miʼ choc loqʼuel jiñi mach bʌ weñic ti lac tojlel, pero mucʼʌch caj i yʌqʼueñonla lac pʼʌtʌlel chaʼan maʼañic miʼ mʌlbeñonla (jotbeñonla) (1 Ped. 5:10). ¿Chuqui miʼ mejlel lac mel chaʼan mi lac pʌs chaʼan la comʌch jiñi tsaʼ bʌ laj cʼajti ti la coración? Mach yomic mi lac mel pejtelel jiñi maʼañic bʌ miʼ coltañonla lac choc loqʼuel jiñi mach bʌ weñic lac melbal. Jumpʼejl ejemplo, mach yomic mi laj qʼuel película tac, programa tac ti televisión o mi lac  pejcan jun tac muʼ bʌ i pʌs chaʼan weñʌch jiñi woli bʌ lac chaʼlen wersa laj cʌy. I mach la cʌcʼ ti ochel ti lac ñaʼtʌbal jiñi mach bʌ weñic (Filip. 4:8; Col. 3:2).

11. ¿Bajcheʼ miʼ mejlel lac bej chʼʌm jiñi tsijiʼ bʌ lac melbal?

¹¹ Yambʌ yom bʌ mi lac mel jiñʌch mi lac chʼʌm jiñi tsijiʼ bʌ lac melbal. ¿Bajcheʼ? Jiñʌch cheʼ bʌ mi lac chaʼlen wersa lac ñumen cʌn Jehová, jiñi melbal tac am bʌ i chaʼan yicʼot mi lac lajin (Efes. 5:1, 2). Cheʼ bʌ mi lac pejcan jumpʼejl relato muʼ bʌ i pʌs bajcheʼ Jehová miʼ ñusan lac mul, laʼ laj cʼajtiben lac bʌ: «¿Muʼ ba c ñusʌben i mul yañoʼ bʌ?». O cheʼ bʌ mi lac taj lac pejcan muʼ bʌ i pʌs chaʼan Jehová miʼ pʼuntan jiñi wocol bʌ bajcheʼ miʼ ñusañob, laʼ laj cʼajtiben lac bʌ: «¿Muʼ ba c ñaʼtañob yicʼot j coltañob jaʼel jiñi hermanojob muʼ bʌ i ñusañob wocol tac?». Chaʼan mi lac bej tsijibtesan jiñi lac ñaʼtʌbal, laʼ lac chʼʌm jiñi tsijiʼ bʌ lac melbal yicʼot mach lac pijtan chaʼan ti ora mi caj laj qʼuextan jiñi lac melbal.

12. ¿Bajcheʼ miʼ pʌs jiñi i yejemplo Stephen chaʼan jiñi Biblia an i pʼʌtʌlel chaʼan miʼ qʼuextañonla?

¹² Stephen, tsaʼ bʌ ajli ti párrafo 8, cʼunteʼ cʼunteʼ tsaʼ mejli i chʼʌm jiñi tsijiʼ bʌ i ñaʼtʌbal. Miʼ yʌl: «An i tajol wocolʌch mi cubin chaʼan mic ticʼ jiñi c michʼajel cʼʌlʌl cheʼ bʌ tsaʼ c chʼʌmʌ jaʼ. Chaʼan maʼañic miʼ tejchel leto (quera) o jatsʼ mic tʌtsʼ bʌ yaʼ baqui añon o mic ñop ticʼob. Jiñi quijñam yicʼot yambʌ lac piʼʌlob an i chaʼleyoñob ti felicitar i joñonto jaʼel miʼ toj sajtel c pusicʼal chaʼan jiñi. Cujil chaʼan mach c bajñelic tsaʼ mejli j qʼuextan c bʌ. Mic ñop chaʼan ili jiñʌch muʼ bʌ i pʌs chaʼan jiñi Biblia an i pʼʌtʌlel chaʼan miʼ qʼuextañonla».

13. ¿Chuqui mi caj i coltañonla chaʼan mi lac mulan lac mel chuqui wen? (Gálatas 5:16).

¹³ (Pejcan Gálatas 5:16). Jehová wen an i yutslel i miʼ yʌqʼueñonla jiñi chʼujul bʌ espíritu chaʼan miʼ coltañonla lac mel chuqui wen. Cheʼ bʌ mi lac chaʼlen ti estudiar jiñi i Tʼan, mi la cʌcʼ chaʼan jiñi chʼujul bʌ espíritu miʼ coltañonla. Cheʼ jaʼel, mi lac taj jiñi chʼujul bʌ espíritu cheʼ bʌ mi lac majlel ti tempa bʌ tac. Yaʼi mi la cajñel la quicʼot la quermañujob woli bʌ i chaʼleñob wersa jaʼel chaʼan miʼ melob chuqui tac wen, i jiñi miʼ ñuqʼuesan lac pusicʼal (Heb. 10:24, 25; 13:7). I cheʼ bʌ mi lac pejcan Jehová tiʼ pejtelel lac pusicʼal i mi laj cʼajtiben chaʼan miʼ coltañonla lac mʌlben jiñi laj cʼunlel, miʼ yʌqʼueñonla jiñi chʼujul bʌ espíritu chaʼan pʼʌtʌlonla i mi lac bej chaʼlen wersa. I sujmʌch, pejtelel iliyi maʼañic mi caj i jisan jiñi mach bʌ weñic ti lac pusicʼal, pero mi caj i yʌqʼueñonla lac pʼʌtʌlel chaʼan maʼañic miʼ mʌlbeñonla. Cheʼ bajcheʼ miʼ yʌl Gálatas 5:16, jiñi muʼ bʌ i melob chuqui yom jiñi espíritu maʼañic mi caj i wis melob chuqui yomob i bʌcʼtal.

14. ¿Chucoch ñuc i cʼʌjñibal mi lac bej mulan lac mel chuqui wem bʌ?

¹⁴ Anquese muqʼuix lac wen mel chuqui tac miʼ coltañonla chaʼan lʌcʼʌl mi la cajñel tiʼ tojlel Jehová, wen ñuc i cʼʌjñibal cheʼ maʼañic mi laj cʌy i mi lac bej otsan ti lac pusicʼal chuqui tac wem bʌ. ¿Chucoch? Come jiñi lac pusicʼal mi caj i bej ñijcañonla chaʼan mi lac mel mach bʌ weñic. Cheʼto jaʼel, anquese chʼʌmʌlix lac chaʼan jaʼ tajol mi lac mulan lac mel chuqui tac la cujil bʌ chaʼan mach yomic mi lac mel, cheʼ bajcheʼ alas chaʼan bʌ taqʼuin, i cʌlʌx japol lembal o i qʼuelol pornografía (Efes. 5:3, 4). Juntiquil xcolel Testigo bʌ miʼ yʌl: «Junchajp woli bʌ c chaʼlen wersa chaʼan mij cʌy jiñʌch chaʼan maʼañic mic mulan jiñi wiñicob. Tsaʼ c ñaʼta chaʼan ñum jach jiñi muʼ bʌ cubin, pero maʼañic miʼ mejlel c junyaj choc loqʼuel». ¿Chuqui mi caj i coltañonla mi ñoj wocol mi la cubin chaʼan mi laj cʌy jumpʼejl laj cʼunlel?

15. ¿Chucoch miʼ ñuqʼuesan lac pusicʼal cheʼ la cujil chaʼan mach lac bajñelic jach an laj cʼunlel? (Qʼuele jiñi foto).

 ¹⁵ Mi wocol mi la cubin chaʼan mi laj cʌy lac mulan lac mel mach bʌ weñic, laʼ laj cʼajtesan chaʼan mach lac bajñelic jach. Jiñi Biblia miʼ yʌl: «Jiñi i qʼuelbentel laʼ pusicʼal muʼ bʌ laʼ ñusan jiñʌch muʼ bʌ i ñusañob pejtelel lac piʼʌlob» (1 Cor. 10:13a). Yambʌ Biblia miʼ chaʼlen ti traducir ili versículo bajcheʼ ili: «Ma’anic mi junchajpic la’ pʌyol ti mulil mach bʌ anic tsi’ yubiyob yaño’ bʌ». Ili tʼan tac tsaʼ subenti jiñi xñoptʼañob ti Corinto. An xtsʼiʼleloʼ bʌ ti ñaxan, an wiñicob muʼ bʌ i piʼleñob yambʌ wiñicob yicʼot an xyʌcʼʌjelob (1 Cor. 6:9-11). ¿Tsaʼ baʼ i chaʼleyob wersa chaʼan miʼ cʌy i mulañob chuqui tac mach bʌ weñic cheʼ bʌ chʼʌmʌlix i chaʼañob jaʼ? Tsaʼʌch. I sujmʌch chaʼan yajcʌbilob chaʼan miʼ majlelob ti panchan, pero bej xmulilobto. Jin chaʼan, tsaʼʌch i chaʼleyob wersa chaʼan maʼañic miʼ mulañob i mel chuqui mach bʌ weñic. Jiñi yom miʼ ñuqʼuesan lac pusicʼal come miʼ pʌs chaʼan an tsaʼix bʌ i ñusayob bajcheʼ woli lac ñusan joñonla i tsaʼʌch i mʌlʌyob. Jin chaʼan, miʼ mejlel la cajñel ti xucʼul ti lac ñopoñel come la cujil chaʼan pejtelel jiñi la quermañujob woliʼ ñusañob jaʼel jiñi wocol tac (1 Ped. 5:9).

16. ¿Chuqui ti yac mach yomic mi lac yajlel, i chucoch?

¹⁶ Mach yomic mi lac ñaʼtan chaʼan maʼañic majqui miʼ chʼʌmben i sujm jiñi laj cʼunlel. Jumpʼejlʌch yac jiñi. Jiñi miʼ mejlel i yʌqʼueñonla lac ñaʼtan chaʼan maʼañic mi caj i tojʼan jiñi lac wocol yicʼot chaʼan maʼañic mi caj i mejlel lac mʌlben jiñi laj cʼunlel. Pero jiñi Biblia miʼ yʌl: «Dios xucʼulʌch i maʼañic mi caj i yʌcʼ chaʼan mi laʼ qʼuelbentel laʼ pusicʼal baqui jaxʌl maʼañix miʼ mejlel laʼ lʌtʼ, i cheʼ bʌ mi laʼ qʼuelbentel laʼ pusicʼal mi caj i yʌqʼueñetla laʼ loqʼuib jaʼel chaʼan miʼ mejlel laʼ cuch» (1 Cor. 10:13b). Anquese wen la com lac mel mach bʌ weñic, xucʼulʌch mi lac mejlel ti ajñel. Tiʼ coltaya Jehová, maʼañic mi caj lac mel mach bʌ weñic.

17. Anquese jiñi lac pusicʼal mi caj i bej subeñonla lac mel mach bʌ weñic, ¿chuqui jiñi mucʼʌch bʌ i mejlel lac mel?

 ¹⁷ Laʼ lac chʌn cʼajtesan chaʼan tiʼ caj xmulilonla, jiñi lac pusicʼal mucʼʌch caj i bej i subeñonla lac mel mach bʌ weñic. Cheʼ bʌ miʼ yujtel jiñi, la’ lac mel cheʼ bajcheʼ tsiʼ mele José cheʼ bʌ tiʼ putsʼta jiñi i yijñam Potifar (Gn. 39:12). Mach yomic mi lac jacʼ muʼ bʌ i subeñonla jiñi lac pusicʼal.

18, 19. ¿Chuqui ti cʼajtiya tac mi caj i coltañonla chaʼan mi lac bej tsijibtesan lac ñaʼtʌbal?

¹⁸ Mi la com lac tsijibtesan lac ñaʼtʌbal yom mi lac bej chaʼlen wersa chaʼan utsʼat miʼ qʼuel Jehová jiñi lac ñaʼtʌbal yicʼot jiñi lac melbal. Jin chaʼan, laʼ lac chʌcʌ tsajin lac bʌ i laʼ laj cʼajtiben lac bʌ: «¿Muʼ ba c pʌs tic melbal chaʼan cujil chaʼan lʌcʼʌlix i jilibal ili pañimil? ¿Woli ba c chʌn chaʼlen wersa chaʼan mic taj jiñi tsijib tac bʌ c melbal? ¿Muʼ ba cʌcʼ chaʼan jiñi i yespíritu Jehová miʼ coltañon chaʼan maʼañic mic mel mach bʌ weñic?».

¹⁹ Cheʼ mi lac melben lac bʌ ili cʼajtiya tac, laʼ laj qʼuel bajcheʼ yilal woli lac majlel i mach lac pijtan chaʼan luʼ toj chuqui mi lac mel. Mach la cubin lac chʼijyemlel mi tsaʼ laj qʼuele chaʼan anto chuqui yom mi lac tojʼesan. Laʼ lac jacʼ jiñi ticʼojel muʼ bʌ lac taj ti Filipenses 3:16: «Mach yʌlʌyic bajcheʼix cʼamel lac taja laj colel, toj yom mi lac bej chaʼlen xʌmbal ti jin jach bʌ bij». Mi mucʼʌch lac mel, Jehová mi caj i yʌqʼueñonla i bendición cheʼ mi lac chaʼlen wersa chaʼan mi lac tsijibtesan jiñi lac ñaʼtʌbal.