1-2. Sowtu moiti u mu e meke baka te u dopu?

 OMEN leisi ye kiin yu osu? Kande fosi i foloisi go tan aini, i be kiin mi en bun. Ma san be o pasa efi ya kiin mi en baka dati moo? A be o tyobo baka. Neen meke efii wani yu osu tan kiinkiin, i mu e kiin mi en ala yuu.

² Na aseefi sani ya u mu e du anga a denki anga den manii fu u. Fosi u dopu, u meke bunbun moiti fu ‘kiin useefi puu ala sowtu sani di sa tyobo a sikin anga a fusutan fu u’ (2 Kor. 7:1). Ma baka te u dopu u mu wooko anga a sani di Pawlesi be taki. U mu ‘e meke moiti fu denki taa fasi’ (Efe. 4:23). Saide u mu tan meke a moiti ya? A fu di den sani fu a goontapu sa meke Yehofa nai si wi enke sama di kiin moo. Efu u wani Yehofa piisii anga u, u mu e ondoosuku a fasi fa we denki, den manii, anga den fii fu u.

3. San a wani taki fu kengi a fasi fa we denki? (Romesama 12:2)

³ San u mu du fu man kengi a fasi fa we denki? (Leisi Romesama 12:2.) A Giiki wowtu fu ‘kengi a fasi fa ye denki’, wani taki fu ‘seeka i denki kon bun baka’. A sani ya wani taki wa mu e du bun namo da a kaba. Ma u mu e ondoosuku luku efu a fasi fa we denki, e kai anga fa Yehofa e denki. U mu tan meke moiti tu fu  kengi u manii fu man libi enke fa Yehofa wani. A ná wan leisi namo u mu du a sani ya, ma u mu e du en ala yuu.

4. San u mu du efu wa wani a goontapu abi kaakiti na a fasi fa we du sani?

⁴ Baka a Dunsu Yali Tii, u naw abi sondu moo. Neen meke u naw go e du sani di Yehofa á lobi. Ma fosi a ten de doo, u mu e meke moiti fu du sani enke fa Yehofa wani. Aini Romesama 12:2 Pawlesi be taki u mu kengi a fasi fa we denki. U mu meke moiti fu sabi san Gadu wani u du. Wa mu meke a goontapu abi kaakiti na a fasi fa we du sani. Ma u mu luku efu den sani di we denki, anga den sani di u wani du, e kai anga a fasi fa Gadu e denki.

5. Faw sa ondoosuku luku efu we holi a dei fu Yehofa a pakisei? (Luku a fowtow.)

⁵ Pakisei a toli ya. Yehofa wani u ‘holi a pakisei taki a dei fi en koosube’ (2 Peit. 3:12). Akisi iseefi taki: ‘A fasi fa mi e libi e soi taki mi e fusutan taki a kaba o kon dyonson? A fasi fa mi e si hei sikoo anga wooko, e soi taki mi e si a dini di mi e dini Yehofa enke a moo pelensipali sani aini mi libi? Mi e biibi taki Yehofa o solugu mi anga mi osufamii, efuso na ala yuu mi e booko mi ede anga den sani di mi abi fanowdu?’ Yehofa e piisii te ai si taki we meke moiti fu du sani di e kai anga a wani fi en.​—Mat. 6:25-27, 33; Filip. 4:12, 13.

6. San u mu e du ala yuu?

⁶ Na ala yuu u mu e ondoosuku a fasi fa we denki, da u meke moiti fu du sani enke fa Yehofa wani. Pawlesi be taigi den Kelesten fu Korente taki: ‘U mu e ondoosuku naamo luku efu u de a biibi,  e soi namo sowtu sama a yu’ (2 Kor. 13:5). A ná te we go a komakandaa, efuso peleikiwooko wanwan leisi da u ‘de a biibi ete’. A fasi fa we denki, den sani di u wani du, anga saide we du den sani ya, e soi tu efu u de a biibi ete. Neen meke efu u wani kengi a fasi fa we denki, u mu e leisi a Wowtu fu Gadu. U mu e meke moiti fu denki enke fa Yehofa e denki tu. Boiti dati, efu u si taki a de fanowdu, u mu meke moiti fu kengi fu u sa du sani di o meke Yehofa piisii.​—1 Kor. 2:14-16.

7. Enke fa Efeisesama 4:31, 32 e soi, da sowtu taa sani u mu du? Saide a sani ya sa taanga fu du?

⁷ Leisi Efeisesama 4:31, 32. Boiti taki u mu kengi a fasi fa we denki, ‘u mu kengi u manii’ tu (Efe. 4:24). A bunbun moiti u mu meke fu man du a sani ya. U mu meke moiti fu u naabi takuu atiboon, fu wi ati nai boon gaw, anga fu u nai bali taawan. Saide a sani ya sa taanga fu du? A fu di den sowtu manii ya taanga fu kengi. Beibel taki son sama ‘ati e boon gaw’. A taki son sama ‘ati e boon tumisi’ tu (Odo 29:22). Wan sama di abi den manii ya, mu tan meke moiti fu kengi winsi a dopu kaba. Na a sani ya wo si aini a ondoofenitoli di e kon.

8-9. Fa a toli fu Stephen e soi taki u mu tan meke moiti fu kengi u manii?

⁸ A be e taanga gi wan baala den e kai Stephen fi en ati nai boon gaw. A taki: ‘Baka di mi dopu, mi be mu tan meke moiti ete fu mi ati nai boon gaw moo. Wan leisi di u be e peleiki osu fu osu, mi be si taki wan sama be fufuu a laadiyow fu a wagi fu mi. Neen meke mi lon na a man ya baka. Di mi e koosube neen, a losi a laadiyow towe a doti, neen a lon gwe. Di mi taigi den taawan fa mi fende a laadiyow baka, a owluman di be e teke fesi aini a kulu pe mi be de akisi mi taki: “Stephen, sai be o du efii be kisi a fufuuman?” A sani di a taki ya meke mi go pakisei a toli. Mi kon si taki mi be mu meke moo moiti fu mi ati nai boon gaw.’ b

⁹ A toli fu Stephen e soi u taki son yuu u sa abi wan swakifasi ete, di u be denki taki wa be abi moo. Efu a sani ya e miti i, ya mu fii enke ya bun. Pawlesi seefi a sani ya be e miti. A be taki: ‘Te mi wani du bun, da a ogii de aini mi’ (Rom. 7:21-23). Ya poi kiin wan osu wan leisi da a tan kiinkiin. Efii wani yu osu tan kiinkiin, yu abi fu e sibi en ala yuu. A letiso a de anga den swakifasi fu u tu. Wi abi fu meke moiti ala yuu fu den á basi u. Faw sa du a sani ya?

10. San o yeepi u fu feti anga den swakifasi fu u? (1 Yohanisi 5:14, 15)

¹⁰ Begi Yehofa fu a yeepi i anga den swakifasi di ye feti anga den. I mu e biibi tu taki aw yeepi i. (Leisi 1 Yohanisi 5:14, 15.) Winsi fa Yehofa naw du wan wonduu fu puu den swakifasi fu u, toku aw gi wi a kaakiti fu feti anga den (1 Peit. 5:10). Te u begi Yehofa kaba, u mu meke moiti fu u nai du sani di e meke a moo taanga gi u fu feti anga den swakifasi fu u. Wa mu e luku felon, efuso leisi buku di e gi sama taanga-sikin  fu du denseefi sani di we meke moiti fu fika. Boiti dati, u mu meke moiti fu u nai sidon pakisei sani di á bun.​—Filip. 4:8; Kol. 3:2.

11. San u mu du efu u wani abi den manii di Yehofa wani wi abi?

¹¹ A ná kengi namo u mu kengi u manii, ma u mu meke moiti fu kon abi bun manii tu. Faw sa du a sani ya? Te ye leli sabi Yehofa moo bun, i mu meke moiti fu kon abi denseefi manii fi en (Efe. 5:1, 2). Meke u taki ye leisi wan pisi aini Beibel di e soi fa Yehofa e gi sama paadon, i sa akisi iseefi taki: ‘Mi e gi sama paadon?’ Efu a wan pisi ye leisi di e soi fa Yehofa e soi tyali-ati gi den sama di de a nowtu, i sa akisi iseefi taki: ‘Mi e booko mi ede anga den baala anga sisa di abi yeepi fanowdu? San mi e du fu yeepi den?’ I mu tan meke moiti fu kon abi den manii di Yehofa wani yu abi. Ya mu kuutu iseefi tumisi tei si taki ye misi son yuu.

12. Fa a toli fu Stephen e soi taki Beibel poi yeepi sama fu kengi?

¹² Stephen di u be taki fi en kaba taki a meke moiti te a be man kengi en manii. A taki: ‘Baka di mi dopu, a omen sani pasa pe mi be mu holi miseefi fu mi ati a boon pasa maiki. Mi leli taki son yuu mi abi fu waka gwe te mi si taki mi ati o boon. Ma son yuu mi abi fu du wan sani fu koo a taki. A omen sama e gafa mi te den si fa mi e tyai miseefi a den okasi ya. Mi uman seefi e gafa mi tu. Son yuu miseefi nai biibi taki a mi kengi so. Mia poi gafa taki a miseefi be man kengi mi manii. Ma na a Beibel yeepi mi fu kengi.’

13. San o yeepi u fu feti anga den swakifasi fu u? (Galasiyasama 5:16)

¹³ Leisi Galasiyasama 5:16. Yehofa e gi wi a santa yeye fu yeepi u feti anga den anga den swakifasi fu u. Te we sutudeli Beibel, da we gi a santa yeye a okasi fu abi kaakiti aw tapu. We fende a santa yeye tu te we go a komakandaa. Te u de a den komakandaa, we fende taanga-sikin te u si a moiti di taa baala anga sisa e meke fu libi enke fa Yehofa wani (Heb. 10:24, 25; 13:7). Boiti dati, te u begi Yehofa, ai gi wi a kaakiti di wi abi fanowdu fu tan feti anga den swakifasi fu u. Den sani ya nai puu den fii fu u, ma toku den e yeepi u fu wa du san a sondu sikin wani. Galasiyasama 5:16 e soi taki den sama di e du san a yeye wani, ‘naw du san a sondu sikin wani’.

14. Saide u mu tan feti anga den swakifasi fu u?

¹⁴ U mu tan du sani di e yeepi u fu wi anga Yehofa á poli, bika na a sani de o yeepi u fu wa du san a sondu fii wani. Saide u mu tan du den sani ya? Bika wi abi wan feyanti di nai siibi. Na ala yuu wo go e fii fu du sani di á bun. Baka te u dopu seefi wo go e fii fu du son sani di u be gwenti du fosi. Kande wo fii fu diingi sopi pasa peesi, fu luku sekisi felon efuso du taa sani di á bun (Efe. 5:3, 4). Wan yonkuu baala taki: ‘Wan fu den takuu fii di mi mu feti anga en, na a lobi di mi be lobi taa mannengee. Mi be denki taki a wan pisiten namo mi be o fii so, ma te anga now mi abi fu feti anga a fii ya.’ San o yeepi u fu feti anga  den swakifasi fu u winsi fa ai taanga son yuu?

15. Saide ai gi u taanga-sikin fu sabi taki a naw wawan e feti anga den swakifasi fu u? (Luku a fowtow.)

¹⁵ Efu ye feti anga wan swakifasi, holi a pakisei taki a nai wawan de. Beibel taki: ‘Nawan fu den tesi di e miti u, a tesi di nai miti taa sama’ (1 Kor. 10:13a). Wan taa Beibel taki a tekisi ya so: ‘Ala den tesi di e miti i, a tesi di gwenti miti taa sama.’ A den baala anga sisa di be e tan a Korente den be sikiifi a sani ya gi. Son wan fu den be e waka gi den toowpaa. Son wan fu den baala aini Korente be e siibi anga taa mannengee fosi den toon Kelesten, a so a be de anga son sisa tu. Son wan fu den a be sopiman (1 Kor. 6:9-11). I si enke baka di den dopu den á be e fii fu du den sani ya moo? A musu de taki den be e fii fu du den sani ya baka. Den a be salufu Kelesten so na tuu, ma toku den a be sondu libisama. Neen meke den be abi fu e feti anga den swakifasi fu den son yuu. Ai gi u taanga-sikin fu sabi a sani ya. Saide? Bika ai soi taki winsi sowtu swakifasi e fooseli u, sama be de di be wini den fii de kaba. Neen meke iseefi poi wini den tu. Fu man du a sani ya, ‘i biibi mu taanga. Ya mu feegete taki a denseefi tesi ya e miti den baala fu u a hii goontapu’.​—1 Peit. 5:9.

16. San wa mu denki? Saide wa mu denki so?

¹⁶ A ná wan koni sani fu denki taki taa sama naw man fusutan a swakifasi fii. Efi ye denki so, i naw meke moiti fu feti anga den moo, bika yo denki taki i naw poi wini den. Ma a sani de a ná tuu, bika Beibel taki: ‘U sa fitoow Gadu. A naw meke tesi di ya poi tyai, miti i.  Ma te tesi miti i, aw yeepi i fii holidoo’ (1 Kor. 10:13b). Neen meke winsi fa den swakifasi fii taanga, i poi wini den. Yehofa poi yeepi i fii man feti anga den.

17. San u poi du winsi fa wa poi puu den sondu fii fu u?

¹⁷ Holi a pakisei taki enke sondu libisama son yuu wo go e fii fu du sani di á bun. Ma te wi e fii so, wa mu daaidaai. Leti enke fa Yowsefu be lon gwe fika a uman fu Potifar, a so u mu meke moiti gawgaw fu pakisei taa sani te we fii fu du sani di á bun (Gen. 39:12). Winsi fa wa poi puu den sondu fii fu u, toku u poi feti anga den fii ya.

18-19. San a wantu sani di u sa akisi useefi te we meke moiti fu kengi a fasi fa we denki?

¹⁸ A bunbun moiti u mu meke fu man kengi a fasi fa we denki. A bunbun moiti u mu meke tu fu tan tyai useefi enke fa Yehofa wani. Fu man du den sani ya, u mu e akisi useefi ala yuu taki: ‘A fasi fa mi e libi e soi taki mi e fusutan taki a kaba de koosube? Mi e go a fesi te mi luku den manii fu mi? Mi e gi a yeye fu Yehofa a okasi fu yeepi mi fu mia du san a sondu sikin wani?’

¹⁹ Te ye ondoosuku iseefi, ya mu e poti pakisei a den fowtu di ye meke namo, ma i mu e luku fa ye go a fesi tu. Tei si taki i mu kengi son sani ete, ya mu fii booko-saka. Pe fu ye fii so, a moo bun fu wooko anga a sani di sikiifi a Filipisama 3:16: ‘Efu we go a fesi kaba, da meke u meke moiti fu tan go a fesi.’ Efu ye tan meke moiti fu du a sani ya, i sa biibi taki Yehofa o belesi a moiti di ye meke fu denki enke fa ai denki.