1-2. Kɛ́ abaptisi wɔ po lɛ, mɛni esa akɛ wɔya nɔ wɔfee? Ni mɛni hewɔ okɛɔ nakai?

 SHII enyiɛ osaa oshĩa lɛ mli? Ekolɛ be ni oyahi jɛmɛ ehee lɛ, oje gbɛ otse ohe osaa jɛmɛ jogbaŋŋ. Shi kɛji yɛ no sɛɛ lɛ osaaa jɛmɛ dɔŋŋ lɛ, mɛni baaba? Jɛmɛ baawo muji ekoŋŋ. No hewɔ lɛ, kɛ́ oosumɔ ni oshĩa lɛ mli atse be fɛɛ be lɛ, belɛ esa akɛ osaa jɛmɛ be fɛɛ be.

² Nakai nɔŋŋ esa akɛ wɔya nɔ wɔjaje wɔjwɛŋmɔ ni wɔtsake wɔsubaŋ. Dani abaabaptisi wɔ lɛ, wɔmia wɔhiɛ wɔjie “nɔ fɛɛ nɔ ni woɔ mɔ he muji yɛ heloŋ kɛ jwɛŋmɔ mli lɛ” kɛje wɔhe. (2 Kor. 7:1) Bianɛ lɛ, nɔ ni eshwɛ wɔ ji, ni wɔbaabo ŋaa ni bɔfo Paulo wo lɛ toi, ni ‘wɔya nɔ wɔtsake wɔjwɛŋmɔ koni etsɔ ehee be fɛɛ be.’ (Efe. 4:23) Mɛni hewɔ ehe hiaa ni wɔfee nakai? Nɔ hewɔ lɛ ji akɛ, kɛ́ wɔfeee nakai lɛ je lɛ baawo wɔhe muji oya nɔŋŋ. Kɛ́ wɔsumɔɔɔ ni wɔhe woɔ muji yɛ Yehowa hiɛ lɛ, no lɛ, esa akɛ wɔhã wɔhiɛ ahi nibii ni wɔsusuɔ he, bɔ ni wɔbaa wɔjeŋ wɔhãa, kɛ nibii ni wɔshweɔ yɛ wɔtsui mli lɛ ahe.

3. Kɛ́ akɛɛ ‘wɔya nɔ wɔtsake wɔjwɛŋmɔ’ lɛ, te atsɔɔ tɛŋŋ? (Romabii 12:2)

³ Mɛni kɛ́ wɔfee lɛ, no baatsɔɔ akɛ wɔmiitsake wɔjwɛŋmɔ? (Kanemɔ Romabii 12:2.) Abaanyɛ atsɔɔ Greek wiemɔ ni atsɔɔ  shishi akɛ ‘nyɛyaa nɔ nyɛtsakea nyɛjwɛŋmɔ’ lɛ shishi hu akɛ, ‘nyɛhãa nyɛjwɛŋmɔ afea ehee.’ No hewɔ lɛ, kɛ́ wɔfee nibii kpakpai fioo ko lɛ, no etsɔɔɔ akɛ wɔtsake wɔjwɛŋmɔ. Moŋ lɛ, esa akɛ wɔpɛi wɔmli jogbaŋŋ wɔkwɛ akɛ wɔmiihi shi yɛ Yehowa mlai lɛ anaa lo koni wɔfee tsakemɔi ni sa lɛ. Ni esa akɛ wɔfee enɛ daa, jeee shi kome ko pɛ.

4. Kɛ́ wɔsumɔɔɔ ni je lɛ shɔ̃ɔ wɔ lɛ, mɛni esa akɛ wɔfee?

⁴ Kɛ́ wɔye emuu lɛ, wɔbaafee nibii ni sa Yehowa hiɛ be fɛɛ be. Shi kɛyashi nakai be lɛ baashɛ lɛ, ja wɔmia wɔhiɛ dani wɔbaanyɛ wɔfee nɔ ni sa Yehowa hiɛ. Kadimɔ akɛ, yɛ Romabii 12:2 lɛ, Paulo tsɔɔ akɛ, ja wɔtsake wɔjwɛŋmɔ dani wɔbaanyɛ wɔyɔse nɔ ni ji Nyɔŋmɔ suɔmɔnaa nii. Enɛ tsɔɔ akɛ, kɛ́ wɔsumɔɔɔ ni je lɛ shɔ̃ɔ wɔ loo enáa wɔnɔ hewalɛ lɛ, esa akɛ yiŋ ni wɔkpɛɔ kɛ otii ni wɔkɛmamɔɔ wɔhiɛ lɛ kɛ Yehowa susumɔi akpã gbee, shi jeee je lɛ susumɔi.

5. Kɛ́ wɔmiitao wɔle kɛji wɔjwɛŋmɔ yɛ nɔ lɛɛlɛŋ akɛ Yehowa gbi lɛ ebɛŋkɛ waa lɛ, mɛɛ saji wɔbaanyɛ wɔbi wɔhe? (Kwɛmɔ mfoniri lɛ.)

⁵ Akɛ nɔkwɛmɔnɔ lɛ, Yehowa miisumɔ ni ‘wɔhã egbi lɛ baa lɛ ahi wɔjwɛŋmɔ mli jogbaŋŋ.’ (2 Pet. 3:12) No hewɔ lɛ, bi ohe akɛ: ‘Ani bɔ ni mihiɔ shi mihãa lɛ tsɔɔ akɛ mile akɛ je lɛ naagbee lɛ ebɛŋkɛ waa? Ani yiŋ ni mikpɛɔ yɛ yunivɛsiti yaa he kɛ nitsumɔ he lɛ hãa anaa akɛ Yehowa sɔɔmɔ lɛ ji nɔ ni he hiaa mi fe fɛɛ yɛ mishihilɛ mli? Ani daa nɛɛ miiye mitsui yɛ heloonaa nibii ahe, aloo miheɔ miyeɔ akɛ Yehowa baakwɛ mi kɛ miweku lɛ?’ Kɛ́ Yehowa na akɛ wɔmiimia wɔhiɛ ni wɔfee nɔ ni esumɔɔ be fɛɛ be lɛ, enáa miishɛɛ waa.​—Mat. 6:25-27, 33; Fip. 4:12, 13.

6. Mɛni esa akɛ wɔfee be fɛɛ be?

⁶ Be fɛɛ be lɛ, esa akɛ wɔkwɛ akɛ wɔsusumɔi kɛ Yehowa nɔ lɛ kpãa gbee lo koni wɔfee  tsakemɔi ni sa lɛ. Paulo kɛɛ Kristofoi ni yɔɔ Korinto lɛ akɛ: “Nyɛyaa nɔ nyɛpɛia nyɛmli nyɛkwɛa akɛ nyɛyɛ hemɔkɛyeli lɛ mli lo; nyɛyaa nɔ nyɛkaa bɔ ni nyɛji diɛŋtsɛ lɛ nyɛkwɛa.” (2 Kor. 13:5) Kɛ́ akɛɛ ‘wɔyɛ hemɔkɛyeli lɛ mli’ lɛ, jeee Kristofoi akpeei kɛ shiɛmɔ ni wɔyaa yɛ be kɛ beiaŋ lɛ pɛ he ekɔɔ. Ekɔɔ nibii ni wɔsusuɔ he, nibii ni wɔshweɔ, kɛ nɔ ni tsirɛɔ wɔ ni wɔsɔmɔ Yehowa lɛ hu he. No hewɔ lɛ, esa akɛ wɔtsake wɔjwɛŋmɔ loo wɔhã efee ehee be fɛɛ be kɛtsɔ Biblia lɛ ni wɔbaakane lɛ nɔ, ni wɔmia wɔhiɛ wɔhã wɔjwɛŋmɔ kɛ Yehowa nɔ lɛ akpã gbee ni wɔfee esuɔmɔnaa nii.​—1 Kor. 2:14-16.

7. Yɛ nɔ ni aŋma yɛ Efesobii 4:31, 32 lɛ naa lɛ, mɛni ekoŋŋ esa akɛ wɔfee? Ni mɛni hewɔ enɛ feemɔ kãaa shi akɔɔɔ lɛ?

⁷ Kanemɔ Efesobii 4:31, 32. Shi jeee wɔjwɛŋmɔ pɛ esa akɛ wɔtsake. Esa akɛ ‘wɔwo gbɔmɔ hee lɛ’ hu. (Efe. 4:24) Ja wɔmia wɔhiɛ waa dani wɔbaanyɛ wɔfee nakai. Kɛ́ wɔmiitao wɔwo gbɔmɔ hee lɛ, belɛ esa akɛ wɔmia wɔhiɛ wɔjie sui gbohii tamɔ mlijoomɔ, mlila, kɛ mlifu yɛ wɔhe, ni enɛ feemɔ kãaa shi akɔɔɔ. Mɛni hewɔ? Ejaakɛ sui gbohii nɛɛ ekomɛi eka wɔhe ni amɛtsakemɔ wa. Akɛ nɔkwɛmɔnɔ lɛ, Biblia lɛ kɛɛ mɛi komɛi ‘amli fuɔ mramra’ loo ‘amɛtsui baa mramra.’ (Abɛi 29:22) Kɛ́ mɔ ko yɛ sui gbohii nɛɛ eko lɛ, ekolɛ yɛ ebaptisimɔ sɛɛ po lɛ ehe baahia ni emia ehiɛ waa dani ebaanyɛ etsake. Nakai wɔbaana yɛ niiashikpamɔ ni nyiɛ sɛɛ lɛ mli.

8-9. Mɛɛ gbɛ nɔ Stephen niiashikpamɔ lɛ hãa wɔnaa akɛ, kɛ́ wɔjie su gbonyo ko yɛ wɔhe lɛ no etsɔɔɔ akɛ etee kwraa?

⁸ No mli lɛ, nyɛmi nuu ko ni atsɛɔ lɛ Stephen lɛ tsui shaa lɛ waa. Ewie akɛ: “Be ni abaptisi mi lɛ sɛɛ po lɛ, ehe bahia ni makudɔ bɔ ni mitsui shaa mi lɛ. Akɛ nɔkwɛmɔnɔ lɛ, be ko be ni wɔmiishiɛ yɛ shĩa fɛɛ shĩa lɛ, miwo foi kɛyi mɔ ko ni baju mikar lɛ mli redio lɛ sɛɛ. Be ni mibɛŋkɛ lɛ lɛ, eŋmɛɛ redio lɛ he ni ejo foi. Be ni mikɛɛ mɛi ni fata mihe lɛ bɔ ni fee ni minine shɛ miredio lɛ nɔ lɛ, asafoŋ onukpa ko ni fata he lɛ bi mi akɛ, ‘Stephen, eji omɔ lɛ kulɛ mɛni obaafee?’ Sanebimɔ nɛɛ hã mijwɛŋ waa, ni ehã mina akɛ esa akɛ maya nɔ matiu toiŋjɔlɛ sɛɛ.” b

⁹ Stephen niiashikpamɔ lɛ hãa wɔnaa akɛ, su gbonyo ko ni wɔsusuɔ akɛ wɔjie yɛ wɔhe lɛ baanyɛ ajie ehiɛ kpo trukaa be ni wɔkpaaa gbɛ. Kɛ́ eba lɛ nakai lɛ, kaahã onijiaŋ je wui, ni kaanu he akɛ ojeee Kristofonyo kpakpa. Bɔfo Paulo po wie akɛ: “Kɛ́ miitao mafee nɔ ni ja lɛ, minaa nɔ gbonyo hu yɛ mimli.” (Rom. 7:21-23) Wɔ fɛɛ lɛ, adesai ni yeee emuu ji wɔ. No hewɔ lɛ, sui gbohii ni wɔjie yɛ wɔhe lɛ baanyɛ aku sɛɛ ekoŋŋ, tamɔ bɔ ni shĩa ko ni asaa mli lɛ mli baanyɛ awo muji ekoŋŋ lɛ. Enɛ hewɔ esa akɛ be fɛɛ be lɛ wɔhã wɔhiɛ ahi wɔhe nɔ lɛ. Shi te wɔbaafee tɛŋŋ wɔfee nakai?

10. Mɛni kɛ́ wɔfee lɛ, ebaaye ebua wɔ ni wɔye su gbonyo ko nɔ? (1 Yohane 5:14, 15)

¹⁰ Sɔlemɔ ohã Yehowa koni eye ebua bo ni ojie su gbonyo lɛ ni efee tamɔ nɔ ni eka ohe lɛ, ni ohe oye akɛ ebaabo bo toi ni ebaaye ebua bo. (Kanemɔ 1 Yohane 5:14, 15.) Yehowa tsɔŋ naakpɛɛ gbɛ nɔ ejieŋ su gbonyo lɛ yɛ ohe, shi ebaaye ebua bo koni be fɛɛ be ni ebaafee tamɔ nɔ ni su nɛɛ miitao ejie ehiɛ kpo lɛ, oye nɔ. (1 Pet. 5:10) Nakai beiaŋ nɔŋŋ lɛ, tsi ohe kɛje nɔ fɛɛ nɔ ni baanyɛ ahã nakai su gbonyo lɛ aku sɛɛ ekoŋŋ lɛ he, ni no baatsɔɔ akɛ ootao Nyɔŋmɔ abo osɔlemɔ lɛ  toi. Akɛ nɔkwɛmɔnɔ lɛ, kwɛmɔ ohe nɔ jogbaŋŋ yɛ sinii, TV nɔ nifeemɔi, kɛ woji ni hãa efeɔ tamɔ nɔ ni naagba ko bɛ su gbonyo lɛ ni ootao ojie yɛ ohe lɛ he. Agbɛnɛ hu, kɛ́ susumɔ gbonyo ko ba ojwɛŋmɔ mli lɛ, jiemɔ oya.​—Fip. 4:8; Kol. 3:2.

11. Kɛ́ wɔmiitao wɔwo gbɔmɔ hee lɛ, mɛni esa akɛ wɔfee?

¹¹ Eyɛ mli akɛ ojie gbɔmɔ momo lɛ yɛ ohe moŋ, shi esa akɛ omia ohiɛ owo gbɔmɔ hee lɛ. Te obaafee tɛŋŋ ofee nakai? Okɛfee oti ni ma ohiɛ akɛ, obaakase Yehowa sui lɛ ahe nii ni obɔ mɔdɛŋ ojie amɛ kpo. (Efe. 5:1, 2) Akɛ nɔkwɛmɔnɔ lɛ, kɛ́ okane Biblia mli sane ko ni hãa anaa akɛ Yehowa kɛ eshai keɔ lɛ, bi ohe akɛ, ‘Kɛ́ mɛi tɔ̃ minɔ lɛ, ani mikɛkeɔ amɛ?’ Kɛ́ okane sane ko ni ona bɔ ni Yehowa musuŋ tsɔɔ lɛ yɛ ohiafoi ahe lɛ, obaanyɛ obi ohe akɛ, ‘Ani minuɔ he mihãa minyɛmimɛi ni efi amɛ lɛ, ni ani mifeɔ nɔ ko kɛwaa amɛ?’ Kɛ́ wɔtee nɔ wɔbɔ mɔdɛŋ akɛ wɔbaawo gbɔmɔ hee lɛ, no baatsɔɔ akɛ wɔmiitsake wɔjwɛŋmɔ koni etsɔ ehee be fɛɛ be. Ni be ni wɔbɔɔ mɔdɛŋ akɛ wɔbaafee nakai lɛ, wɔbaatɔ̃ kɛ̃, no hewɔ lɛ esa akɛ wɔná tsui wɔhã wɔhe.

12. Mɛɛ gbɛ nɔ Biblia lɛ hã Stephen tsake?

¹² Fiofio lɛ, Stephen ni wɔwie ehe kɛtsɔ hiɛ lɛ nyɛ ewo gbɔmɔ hee lɛ. Ewie akɛ: “Kɛjɛ be ni abaptisi mi nɛɛ, mikɛ shihilɛi srɔtoi ni kulɛ ebaahã malɛmɔ atswɛrɛ naa lɛ ekpe. Amrɔ nɛɛ kɛ́ mɔ ko tsɔ̃ minaa lɛ, mitsiɔ mihe kɛjeɔ ehe loo mitsɔɔ gbɛi krokomɛi anɔ mijɔɔ sane lɛ he. Mɛi pii, ni miŋa hu fata he lɛ, ejie miyi waa yɛ bɔ ni mitsuɔ shihilɛi ni tamɔ nɛkɛ lɛ ahe nii lɛ hewɔ. Mi diɛŋtsɛ po lɛ, efeɔ mi naakpɛɛ! Jeee minyɛmɔ naa minyɛ mifee tsakemɔi nɛɛ yɛ mishihilɛ mli. Moŋ lɛ, miheɔ miyeɔ akɛ, eji odaseyeli ni tsɔɔ akɛ Biblia lɛ yɛ hewalɛ ni ekɛtsakeɔ mɛi.”

13. Mɛni baaye abua wɔ ni wɔkashwe nibii ni esaaa? (Galatiabii 5:16)

¹³ Kanemɔ Galatiabii 5:16. Yehowa droɔ wɔ emumɔ krɔŋkrɔŋ lɛ koni no aye abua wɔ ni wɔfee nɔ ni ja kɛ́ nakai feemɔ wa po. Kɛ́ wɔkase Nyɔŋmɔ Wiemɔ lɛ, belɛ wɔmiiŋmɛ gbɛ ni emumɔ krɔŋkrɔŋ lɛ atsu nii yɛ wɔnɔ. Kɛ́ wɔtee Kristofoi akpeei hu lɛ, Yehowa hãa wɔ emumɔ krɔŋkrɔŋ lɛ. Yɛ kpeei ni tamɔ nɛkɛ ashishi lɛ, wɔnáa hegbɛ wɔkɛ wɔnyɛmimɛi lɛ gbaa sane, ni akɛni amɛ hu amɛmiimia amɛhiɛ ni amɛfee nɔ ni ja hewɔ lɛ, wɔnyɛɔ wɔwowoɔ wɔhe hewalɛ. (Heb. 10:24, 25; 13:7) Kɛ́ wɔjɛ wɔtsuiŋ wɔsɔle wɔkpa Yehowa fai ni eye ebua wɔ ni wɔye wɔgbɔjɔmɔ ko nɔ lɛ, ebaahã wɔ emumɔ krɔŋkrɔŋ lɛ koni no aye abua wɔ ni wɔye omanye. Eyɛ mli akɛ ekolɛ nibii ni wɔtsĩ tã nɛɛ hãŋ akɔnɔi gbohii ni wɔyɔɔ lɛ alaaje kwraa moŋ, shi amɛbaaye amɛbua wɔ ni wɔkadi akɔnɔi nɛɛ asɛɛ ni wɔyafee nɔ ko ni ejaaa. Galatiabii 5:16 lɛ kɛɔ akɛ, ‘mɛi ni nyiɛɔ yɛ mumɔ lɛ naa lɛ efeŋ nibii ni heloo lɛ shweɔ lɛ.’

14. Mɛni hewɔ ehe miihia ni wɔya nɔ wɔfee nibii ni baahã wɔshwe akɛ wɔfee nibii kpakpai?

¹⁴ Kɛ́ wɔbɔi nibii ni baahã wɔ kɛ Yehowa teŋ wekukpaa lɛ mli awa lɛ feemɔ lɛ, esaaa akɛ wɔkpaa, ejaakɛ no baahã daa nɛɛ wɔshwe akɛ wɔfee nibii kpakpai. Wɔ fɛɛ wɔyɛ henyɛlɔ ko ni miigbɔbi wɔ be fɛɛ be. Nakai henyɛlɔ lɛ ji nibii gbohii ni kɛ́ efee lɛ wɔshweɔ akɛ wɔfee lɛ. Ekolɛ yɛ wɔbaptisimɔ sɛɛ po lɛ, wɔbaanu he akɛ wɔyashwɛ asɔ, loo wɔyatɔ dãa, loo wɔyakwɛ ponografi, loo wɔyafee nɔ kroko ni wɔle akɛ Yehowa sumɔɔɔ. (Efe. 5:3, 4) Nyɛmi nuu oblanyo ko wie akɛ: “Nɔ kome ni ewa waa kɛhã mi akɛ maye nɔ ji, mináa bɔlɛnamɔ henumɔi mihãa hii. Miyasusu akɛ kɛ́ be shwie mli fioo lɛ, nakai henumɔ lɛ baaya.  Shi kɛbashi ŋmɛnɛ lɛ, eegba minaa lolo.” Kɛ́ wɔ hu wɔyɛ akɔnɔ gbonyo ko, ni wɔfee he eko aahu shi eyaaa lɛ, mɛni baanyɛ aye abua wɔ?

15. Mɛɛ gbɛ nɔ le ni wɔle akɛ jeee wɔ pɛ wɔwuɔ wɔshiɔ akɔnɔi fɔji lɛ baanyɛ awo wɔ hewalɛ? (Kwɛmɔ mfoniri lɛ.)

¹⁵ Kɛ́ akɔnɔ gbonyo ko miihao bo waa ni ewa kɛhã bo akɛ obaaye nɔ lɛ, kaimɔ akɛ, jeee okome onuɔ he nakai. Biblia lɛ kɛɛ: “Kaa ko bako nyɛnɔ ni jeee gbɔmɛi ahe nɔ.” (1 Kor. 10:13a) Aŋma sane nɛɛ ahã Kristofoi ni yɔɔ Korinto lɛ. Dani amɛbatsɔmɔ Kristofoi lɛ, no mli lɛ amɛteŋ mɛi komɛi ji gbalafitelɔi, hii ni kɛ hii krokomɛi náa bɔlɛ, kɛ dãatɔlɔi. (1 Kor. 6:9-11) Ani osusuɔ akɛ yɛ amɛbaptisimɔ sɛɛ lɛ, amɛnáaa shwelɛ gbonyo ko kwraa dɔŋŋ? Dabi, enyɛŋ eba lɛ nakai. Eyɛ mli akɛ no mli lɛ amɛ fɛɛ amɛji Kristofoi ni afɔ amɛ mu moŋ, shi amɛkã he amɛji adesai ni yeee emuu. No hewɔ lɛ ekã shi faŋŋ akɛ, yɛ be kɛ beiaŋ lɛ, amɛnu he akɛ amɛyafee nibii gbohii. Sane nɛɛ woɔ wɔ hewalɛ waa. Mɛni hewɔ? Ejaakɛ ehãa wɔnaa akɛ, ekɔɔɔ he eko shwelɛ gbonyo ni wɔmiibɔ mɔdɛŋ ni wɔye nɔ lɛ, mɔ ko kɛkpe pɛŋ ni eye nɔ. Esa akɛ enɛ awaje wɔ ni ‘wɔdamɔ shi shiŋŋ yɛ hemɔkɛyeli lɛ mli, ejaakɛ wɔle akɛ nakai amanehulu lɛ nɔŋŋ wɔnyɛmimɛi asafo muu lɛ fɛɛ ni yɔɔ je lɛ mli lɛ hu kɛkpeɔ.’​—1 Pet. 5:9.

16. Mɛɛ susumɔ esaaa akɛ wɔnáa kɔkɔɔkɔ? Ni mɛni hewɔ?

¹⁶ Kaasusu kɔkɔɔkɔ akɛ mɔ ko mɔ ko nyɛŋ anu bɔ ni onuɔ he ohãa lɛ shishi. Susumɔ ni tamɔ nakai lɛ baanyɛ ahã onu he akɛ, nɔ ko nɔ ko kwraa bɛ ni obaanyɛ ofee yɛ akɔnɔ gbonyo ni haoɔ bo lɛ he. Shi jeee nakai Biblia lɛ kɛɔ. Ekɛɔ akɛ: “Anɔkwafo ji Nyɔŋmɔ, ni ehãŋ aka nyɛ fe bɔ ni nyɛbaanyɛ naa nyɛdamɔ, shi moŋ yɛ kaa lɛ mli lɛ, ebaaje gbɛ ni nyɛkɛaaje mli hu ehã nyɛ koni nyɛnyɛ naa nyɛdamɔ.” (1 Kor. 10:13b) No hewɔ lɛ,  kɛ́ akɔnɔ gbonyo ko miihao bo waa tamɔ mɛ, obaanyɛ naa odamɔ. Yehowa baanyɛ eye ebua bo ni nakai akɔnɔ lɛ akatsirɛ bo ni oyafee nɔ ko ni ejaaa.

17. Eyɛ mli akɛ bɔ fɛɛ bɔ ni fee lɛ wɔbaaná akɔnɔ gbonyo ko kɛ̃ yɛ wɔtsui mli moŋ, shi kɛ́ eba lɛ nakai lɛ, mɛni wɔbaanyɛ wɔfee?

¹⁷ Esaaa akɛ wɔhiɛ kpaa nɔ akɛ, wɔ fɛɛ lɛ, adesai ni yeee emuu ji wɔ. No hewɔ lɛ, bɔ fɛɛ bɔ ni fee lɛ wɔbaaná akɔnɔ fɔŋ ko kɛ̃. Kɛ́ eba lɛ nakai lɛ, esa akɛ wɔjie kɛje wɔtsui mli oya nɔŋŋ, tamɔ bɔ ni Yosef jo foi eshi Potifar ŋa lɛ oya nɔŋŋ lɛ. (1 Mo. 39:12) No hewɔ lɛ, kɛ́ wɔmiinu he akɛ wɔyafee nɔ ko gbonyo lɛ, no etsɔɔɔ doo akɛ wɔyafee; wɔbaanyɛ wɔye nɔ!

18-19. Mɛɛ saji wɔbaanyɛ wɔbi wɔhe ni baaye abua wɔ ni wɔya nɔ wɔtsake wɔjwɛŋmɔ koni etsɔ ehee be fɛɛ be?

¹⁸ Kɛ́ wɔmiitao wɔtsake wɔjwɛŋmɔ ni etsɔ ehee lɛ, belɛ be fɛɛ be lɛ, esa akɛ wɔhã wɔsusumɔ kɛ Yehowa nɔ lɛ akpã gbee ni wɔfee nɔ ni esumɔɔ. No hewɔ lɛ, esa akɛ opɛi omli be fɛɛ be ni obi ohe akɛ: ‘Ani bɔ ni mifeɔ minii mihãa lɛ hãa anaa faŋŋ akɛ, mile akɛ jeŋ fɔŋ nɛɛ naagbee lɛ ebɛŋkɛ waa? Ani miibɔ mɔdɛŋ fe tsutsu akɛ mawo gbɔmɔ hee lɛ? Ani miifee nibii ni baahã Yehowa mumɔ lɛ atsu nii yɛ minɔ koni mikayafee nibii ni miheloo lɛ shweɔ lɛ?’

¹⁹ Be fɛɛ be ni obaapɛi omli lɛ, obaana akɛ otee ohiɛ yɛ nibii komɛi amli, ni esa akɛ oná miishɛɛ yɛ enɛ he. Shi obaana hu akɛ, nibii komɛi yɛ ni esa akɛ oya ohiɛ yɛ mli. Kaahã no je onijiaŋ wui. Moŋ lɛ, feemɔ nɔ ni Filipibii 3:16 lɛ woɔ wɔ ŋaa akɛ wɔfee lɛ. Ekɛɛ: “He ni wɔtee hiɛ kɛshɛ lɛ, nyɛhãa wɔyaa nɔ wɔnyiɛa jogbaŋŋ yɛ nɛkɛ gbɛ nɛɛ nɔŋŋ nɔ.” Kɛ́ ofee nakai lɛ, Yehowa baaye ebua bo koni oya nɔ otsake ojwɛŋmɔ ni etsɔ ehee be fɛɛ be.