AWTIK POU ÉTIDYÉ 2
« Kontinyé chanjé mantalité a-w pou transfòwmé-w »
« Kontinyé chanjé mantalité a zòt pou transfòwmé-zòt, konsa zò ké pé vérifyé zòtmenm ka ki volonté a Bondyé, on volonté ki bon, ki konm i fo é ki pawfè » (WOM. 12:2).
KANTIK 88 « Fais-moi connaître tes voies »
ON TI LIDÉ ASI SA NOU KAY VWÈ a
1-2. Apré nou pran batèm, ka fò-nou kontinyé fè ? Bay on ti èsplikasyon.
ADAN on mwa, konmen fwa ou ka nétwayé kaz a-w ? Pétèt kè avan ou té rantré adan-y, ou nétwayé toupatou byen pwòp. Men ka ki té’é rivé si ou pa té jen nétwayé-y ankò ? Adan on batzyé, pousyè é salté té’é anvayi-w an kaz-la. Pou kaz a-w rété pwòp, fò ou nétwayé-y toutlè.
2 Menmjan-la, fò-nou kontinyé korijé mantalité an nou, é fò-nou kontinyé fè éfò pou nou vin on pibon moun. Sé vré, avan nou té pran lèbatèm, nou fè onlo éfò pou nou té « pwòpté-nou parapòt a tousa ki ka sali kò an nou é lèspri an nou » (2 Kor. 7:1). Men konnyéla, fò-nou suiv konsèy a lapòt Pòl, kivédi fò-nou ‘kontinyé lésé mantalité-la ki ka dirijé-nou la chanjé pou i vin nèf’ (Éféz. 4:23). Poukwa fò-nou kontinyé korijé-nou ? Paskè adan on batzyé, tout « pousyè-la » é tout « salté-la » ki adan mond-lasa pé rivé a anvayi tchè an nou é lèspri an nou. Pou sa pa rivé-nou, é pou nou kontinyé fè Jéova plézi, fò-nou pran labitid réfléchi pou vwè ki mantalité nou ni, ki jan dè moun nou yé, é ki kalité biten nou anvi fè.
KONTINYÉ « CHANJÉ MANTALITÉ A-W »
3. Pou nou ‘chanjé mantalité an nou’, ka sa ka mandé ? (Women 12:2).
3 Ka pou nou fè pou nou chanjé mantalité an nou ? (li Women 12:2). Sé mo grèk la yo tradui la é ki bay « chanjé mantalité a zòt » pé bay osi « mèt lèspri a zòt anèf ». Sa pa vé di kè nou ka enki fè déotwa bon biten, é nou fini. Fò-nou pran tan gadé ki jan dè moun nou yé vréman, é fò-nou fè tout sé chanjman-la ki fo la pou vi an nou annakò èvè prensip a Jéova. É a pa enki onsèl fwa pou nou fè sa, fò-nou fè sa akontinyé.
Lè ou ka chwazi ki étid ou ké fè, oben ki travay ou ké fè, ès ou ka montré kè sé Wayòm-la ou ka mèt prèmyé douvan an vi a-w c ? (gadé sé paragraf 4 é 5 la).
4. Ka pou nou fè pou mond-la pa détenn asi mantalité an nou ?
4 Lè nou ké pawfè, tousa nou ké fè ké fè Jéova plézi. Men annatandan, fò-nou fè bon éfò pou nou fè-y plézi. Si ou byen gadé, an Women 12:2, Pòl ka montré kè ni 2 biten ki k’ay ansanm : chanjé mantalité, é vérifyé ka ki volonté a Bondyé. É fò pa nou enn rété la, ka lésé mond-lasa détenn asi nou. Olyé dè sa, pisimé nou pran on tan pou gadé si sé mantalité a Bondyé, oben si sé mantalité a mond-la ki ka aji plis asi òbjèktif an nou, é asi désizyon nou ka pran.
5. Ki kèsyon nou pé pozé-nou pou vwè si nou sèten kè jou a Jéova toupré ? (gadé imaj-la).
5 An-nou pran on ègzanp. Jéova vlé kè nou ‘toujou sonjé jou a-y’ (2 Pyè 3:12). Alò mandé-w : « Èskè jan-la an ka viv la ka montré kè an sèten kè talè, mond-lasa kay disparèt ? Lèwvwè an ka chwazi ki étid an ké fè oben ki travay an ké fè, ès an ka montré kè sa ki pli enpòwtan pou mwen, sé sèvi Jéova ? Ès an sèten kè Jéova ké ba ki mwen, ki fanmi an mwen sa nou bizwen, oben ès an toujou ka pran tèt an mwen parapòt a biten matéryèl ? » Sonjé jan Jéova ka kontan lè i ka vwè kè ou ka éséyé fè volonté a-y adan vi a-w (Mat. 6:25-27, 33 ; Filip. 4:12, 13).
6. Ka pou nou kontinyé fè ?
6 Fò-nou pran labitid analizé mantalité an nou, é aprésa, fò-nou chanjé sa ki mérité chanjé. Mi sa Pòl di sé Korentyen-la : « Kontinyé vérifyé si zò adan lafwa ; kontinyé vérifyé ki jan dè moun kè zòt menm yé » (2 Kor. 13:5). Pou nou « adan lafwa », apatoudi ay réinyon é préché dè tanzantan. Sa ka konsèwné mantalité an nou, sa nou anvi, é sa ki ka pousé-nou aji osi. Fò-nou li Pawòl a Bondyé pou nou kontinyé chanjé mantalité an nou. Konsa, nou ké aprann réfléchi menmjan ki Jéova, é nou ké pé fè tousa ki fo pou nou fè-y plézi (1 Kor. 2:14-16).
« MÈT NOUVO PÈWSONALITÉ-LA ASI-W »
7. Dapré Éfézyen 4:31, 32, ki dòt biten fò-nou fè, é poukwa sa pé rèd ban nou ?
7 (Li Éfézyen 4:31, 32.) Fò-nou chanjé mantalité an nou, men anplisdisa, fò-nou « mèt nouvo pèwsonalité-la » asi nou (Éféz. 4:24). Sa ka mandé onlo éfò, é sé vré, paskè si nou ni mové rankin, raj, oben kòlè andidan an nou, sa pé’é disparèt konsa. Sa pa fasil pou nou woté sé vyé défo-lasa adan pèwsonalité an nou. Poukwa nou ka di sa ? Pas ni sèwten adan yo ki ja fè rasin andidan an nou, é sé rasin-la byen fon. Pa ègzanp, Bib-la ka di kè ni moun « ki ka fè kòlè fasil » é « ki ka lévé cho vit » (Pwov. 29:22). Menm lèwvwè on moun ja pran lèbatèm, fò i ké fè éfò akontinyé pou i woté sé kalté défo-lasa adan pèwsonalité a-y, é dayè nou kay vwè on ègzanp ki ka montré sa.
8-9. Pou nou woté vyé pèwsonalité-la asi nou, fò-nou fè éfò akontinyé. Kijan istwa a Stephen ka montré-nou sa ?
8 On frè non a-y sé Stephen té ka fè vyé kòlè. Mi sa i di : « Menm apré an pran lèbatèm, fò-mwen té kontinyé fè on travay asi mwen. Pa ègzanp, on jou an té ka préché dè kaz-an-kaz, an kòchté dèyè on boug ki té sòti volé radyo a vwati an mwen. An té toupré pongné-y, é lèwgadé, i lagé radyo-la atè-la, é i chapé kò a-y. Lè an rakonté sélézòt frè é sè la kijan an rékipéré radyo an mwen, on ansyen rété i di-mwen : “Stephen, si ou té kenbé-y, ka ou té’é fè-y ?” Kèsyon-lasa fè-mwen réfléchi, é sa ban-mwen fòs pou mwen kontinyé fè éfò pou vin on moun ki kalm b. »
9 Ègzanp a Stephen ka montré-nou kè nou pé ka konprann kè nou ja débarasé-nou dè on défo, men an réyalité, i la toujou. É délè, i pé woupran lanmen asi nou, é sa pé siwprann-nou. Si sa ka rivé-w, pa dékourajé, é pa mèt an tèt a-w kè ou pa’a sèvi Jéova kon ou dwètèt. Mi sa lapòt Pòl limenm a-y admèt : « Lè an vlé fè sa ki jis, sé sa ki mové ki andidan an mwen » (Wom. 7:21-23). Konm noutout enpawfè, fò-noutout goumé akontinyé pou sé vyé défo-la nou ni la pa woupran lanmen asi nou, pas yo ka touvé-yo kon pousyè-la é salté-la ki ka sali kaz an nou la. Pou nou rété « pwòp », fò pa nou jen arété fè éfò. Kijan nou pé rivé about ?
10. Kijan pou nou goumé èvè défo nou ni ? (1 Jan 5:14, 15).
10 Priyé Jéova pou di-y kè ou vlé goumé èvè on défo ki ka ba-w gaz toubònman, men lè ou ka fè sa, fò ou sèten kè i ké kouté-w é kè i ké édé-w (li 1 Jan 5:14, 15). I pé’é fè on mirak pou fè défo-lasa disparèt, men i ké ba-w fòs pou ou pa lésé-y pran lanmen asi-w (1 Pyè 5:10). É voumenm dè koté a-w, aji annakò èvè priyè a-w, é pa fè ayen ki té’é pé fè vyé pèwsonalité-la woupran fòs. Pa ègzanp, fò pa ou gadé pon fim ni pon émisyon ki ka mèt défo-la ou ka goumé èvè-y la an valè, é fò pa ou li pon istwa ki k’ay an sans-lasa nonplis. Anplisdisa, pa rété ka réfléchi asi pon mové biten kè ou anvi fè (Filip. 4:8 ; Kol. 3:2).
11. Ka pou ou kontinyé fè pou mèt nouvo pèwsonalité-la asi-w ?
11 Menmsi ou ja mèt vyé pèwsonalité-la dèyè do a-w, fò ou kontinyé fè éfò pou ou mèt nouvo-la asi-w. Kijan pou ou fè sa ? Lè ou ka vwè kijan Jéova ka montré kè i ni tèl ou tèl kalité, chèché a imité-y (Éféz. 5:1, 2). Pa ègzanp, lè ou ka li on istwa an Bib-la ki ka montré jan Jéova enmé padonné, pozé-w kèsyon-lasa : « Ès an ka padonné lézòt ? » Oben lè ou ka li on vèwsé ki ka montré jan Jéova ni pityé pou sé maléré-la, mandé-w : « Ès an ka enkyété-mwen pou frè é sè an mwen ki pa ni granzafè, é ès an ka fè on biten pou montré-yo sa ? » Kontinyé chanjé mantalité a-w, é pou sa, mèt nouvo pèwsonalité-la asi-w. É menmsi ou ka vwè kè ou ka pran tan pou chanjé, pran pasyans èvè-w.
12. Ka ki édé Stephen vwè kè Labib pé chanjé on moun ?
12 Talè la nou palé dè Stephen. Piti-a-piti, i rivé mèt nouvo pèwsonalité-la asi-y. Mi sa i konstaté : « Dépi an batizé, an ja touvé-mwen adan plizyè sitiyasyon ki té’é pé fè-mwen fè gwo kòlè. Men konnyéla, lèwvwè on moun ka chèché-mwen tren, an sav ba-y gran lè a-y, oben an sav kalmé on sitiyasyon, pou biten-la pa vin pli cho. Madanm an mwen é onlo dòt moun félisité-mwen pas an rivé jéré sé sitiyasyon-lasa byen. Mwenmenm an touvé sa fò ! Men an sav byen kè a pa mwen ki dèyè tout sé chanjman-lasa. Sé Bib-la ki fè si an chanjé. »
LÈ OU ANVI FÈ SA KI PA BON, KONTINYÉ GOUMÉ
13. Ka ki ké ban-nou anvi fè sa ki byen ? (Galat 5:16).
13 (Li Galat 5:16.) Konm fò-nou fè bon éfò pou nou fè sa ki byen, Jéova ka ban-nou lèspri sen a-y volontyé. Lè nou ka étidyé Pawòl a Bondyé, nou ka pèwmèt lèspri sen aji asi nou. Nou ka rèsèvwa lèspri sen osi lèwvwè nou k’ay réinyon. Nou ka pasé on bèl moman èvè frè é sè an nou ki ka goumé kon noumenm pou fè sa ki byen, é sa ka ankourajé-nou (Ébr. 10:24, 25 ; 13:7). É lèwvwè nou ka sipliyé Jéova èvè tout tchè an nou pou i édé-nou goumé èvè on féblès nou ni, i ka sèvi èvè lèspri sen a-y, é konsa nou ka ni fòs pou nou kontinyé konba-lasa. A pa paskè nou ka étidyé, nou k’ay réinyon, é nou ka priyé Jéova, pou nou konpranndèdi kè nou pé’é jen anvi fè sa ki pa bon. Men sé biten-lasa ké édé-nou kenbé, pou nou pa fè ayen ki mal. Kon Galat 5:16 ka di, moun ki ka lésé lèspri sen gidé-yo ‘pé ké fè sa chè a yo bizwen fè-yo fè’.
14. Fò-nou kontinyé goumé pou nou anvi fè sa ki byen. Poukwa sa enpòwtan kè nou fè sa ?
14 Lè nou pran labitid fè sèwten biten ki ka édé-nou vin bon zanmi èvè Jéova, fò pa nou pèd sé labitid-lasa, é fò-nou kontinyé fè bon éfò pou nou anvi fè sa ki byen. Poukwa sa enpòwtan kè nou fè sa ? Pas nou ni on lènmi ki pa jen ka dòmi. Lènmi-lasa, sé péché-la nou ni andidan an nou la, é ki ka ban-nou anvi fè sa ki pa bon. Nou pé touvé-nou anvi fè sèwten biten kè nou pa dwètèt fè, kon jouwé jé, bwè a dépasé, oben gadé biten pòwno (Éféz. 5:3, 4). Mi sa on jenn frè ka admèt : « Pawmi tout sé konba-la an ni a menné la, yonn ki pli rèd pou mwen, sé kè an ka touvé nonm kon mwenmenm agou an mwen. An konprann sé on défo an té’é ni pannan on ti moman sèlman, men jousalè an ni-y toujou. » Alò ka ki pé édé-w si ou anvi fè on biten ki pa bon, é kè ou ka santi kè ou ni dimal a tchenbé ?
Si ou ka goumé rèd pou ou pa fè on biten ki pa bon, pa pèd èspwa ; ni dòt moun ki menné menm konba ki-w, é ki gangné konba-lasa (gadé sé paragraf 15 é 16 la).
15. Nou sav kè « toutmoun » ka anvi fè biten ki pa bon. Poukwa lidé-lasa ka ban-nou fòs pou nou kontinyé goumé ? (gadé imaj-la).
15 Si ou ka santi kè ou anvi fè on biten ki pa bon, é kè ou ni dimal a tchenbé, sonjé kè a pa-w tousèl ki adan sitiyasyon-lasa. Mi sa Bib-la ka di : « Tout sé tantasyon-la zò sibi la, sé sé menm tantasyon-lasa toutmoun ka sibi » (1 Kor. 10:13a). Yo maké sé pawòl-lasa ba sé krétyen Korent la, ki pou misyé, ki pou madanm. Ni sa adan yo ki té ka fè adiltè avan, ni sa ki té ka kouché èvè moun ki ni menm sèks ki yo, é ni dòt ankò ki té bwasonnè (1 Kor. 6:9-11). Ès ou ka di kè apré yo batizé, yo pa jen té anvi fè sé biten-lasa ankò ? Fò yotout té kontinyé goumé, piskè menmsi yotout té wen, yo té enpawfè toujou. Donk délè, fò-yo té goumé pou yo pa té viré fè sé mové biten-la yo té ka fè la avan. Lidé-lasa pé ankourajé-nou toubònman. Poukwa ? Pas sa ka montré kè avan-w, ni on moun ki goumé pou i pa té fè sé mové biten-la ou anvi fè la, é i rivé kenbé. Kifè, vou osi, ni mwayen ou rété ‘byen doubout adan lafwa, paskè ou sav kè tout frè é sè a-w asi latè ka jwenn menm kalité soufrans ki-w’ (1 Pyè 5:9).
16. Adan ki pyèj fò pa nou tonbé é poukwa ?
16 Sèwten moun ka kwè kè ponmoun pé ké konprann ki konba yo ka menné. Men pa tonbé an pyèj-lasa, sinon ou pé rivé a kwè kè pwoblèm a-w pa ni solisyon, é kè ou pé’é jen kapab kenbé lèwvwè ou anvi fè on biten ki pa bon. Okontrè, mi sa Labib ka di : « Bondyé fidèl, é i pé ké jen lésé on tantasyon zò ka sibi ay pli lwen ki sa zò pé sipòté, men lè tantasyon-la ké rivé, i ké wouvè on pòt ba zòt, pou zò pé sa sipòté-y » (1 Kor. 10:13b). Sa vé di kè menmsi ou anvi fè on biten ki pa bon, é kè ou ni dimal a kenbé, ni mwayen ou rété fidèl a Jéova. É grasa-y, ni mwayen ou kenbé pou ou pa fè ayen ki pa bon.
17. Ni délè, nou ké anvi fè on biten ki pa bon, é nou pé pa anpéché sa. Men ka nou pé fè lè sa ka rivé ?
17 Ni on biten fò pa ou jen oubliyé : konm ou enpawfè, antoutjan, ni délè ou ké anvi fè on biten ki pa bon. Men lèwvwè sa ka rivé, ni mwayen ou rété solid menmjan ki Jozèf, lè i pa tadé pou i té pran pyé a kouri a-y douvan madanm a Pitifa (Jén. 39:12). A pa paskè ou anvi fè on biten ki pa bon kè ou oblijé fè-y !
KONTINYÉ FÈ BON ÉFÒ
18-19. Ki kèsyon ki pé édé-nou chanjé mantalité an nou ?
18 Pou chanjé mantalité an nou, fò-nou fè éfò akontinyé pou sa nou ka pansé é sa nou ka fè annakò èvè volonté a Jéova. Sé pousa dè tanzantan, fò ou pran on moman pou réfléchi asi sitiyasyon a-w. Pozé-w sé kèsyon-lasa : « Èskè sa an ka fè ka montré kè an sèten kè nou ka viv sé dènyé jou-la ? Ès an ka vin on pibon moun, kifè an pé di kè an ka kontinyé fè éfò pou mèt nouvo pèwsonalité-la asi mwen ? Ès an ka fè sa ki fo pou lèspri a Jéova aji asi mwen, é pou an kenbé kò an mwen lèwvwè an anvi fè on biten ki pa bon ? »
19 Lè ou ka réfléchi asi sé kèsyon-lasa, éséyé vwè ki pwogré ou ja fè. Fò pa ou two rèd èvè-w, é fò pa ou chèché a vin pawfè. Si ou ka konstaté kè ou ni dòt biten a chanjé, pa dékourajé-w. Suiv konsèy-la nou ka touvé an Filipyen 3:16. Pasaj-lasa ka di : « Kèlkanswa kantité pwogré nou ja fè, an-nou kontinyé maché annòd adan menm dirèksyon-la. » Si ou fè sa, ou pé sèten kè Jéova ké béni tout éfò ou ka fè pou kontinyé chanjé mantalité a-w.
KANTIK 36 « Préservons nos cœurs »
a Lapòt Pòl èspliké frè é sè a-y kè fò pa yo lésé mond méchan lasa détenn asi jan yo ka pansé, é asi jan yo ka aji. Konsèy-lasa itil pou nou osi. Fò-nou fè atansyon pou mond-lasa pa détenn asi nou anponjan, é pou sa, fò-nou korijé mantalité an nou chakfwa nou ka rann-nou kont kè i pa annakò èvè volonté a Bondyé. Adan awtik-lasa, nou ké vwè kijan nou pé rivé fè sa.
b Gadé awtik-la « Ma vie allait de plus en plus mal », ki adan niméwo a 1é juiyé 2015 a Tou dè Gad la.
c SA NOU KA VWÈ ASI IMAJ-LA : On jenn frè ka réfléchi pou i sav si i k’ay linivèwsité, oben si i ka vin pyonyé pèwmanan.
