1-2. Ano ang dapat padayon naton nga himuon pagkatapos kita mabawtismuhan? Ipaathag.

 PIRME ka bala nagapaninlo sa imo balay? Posible nga antes ka nagsaylo sa isa ka balay, gintinluan mo anay ini sing maayo. Pero ano abi kon wala ka na nagpaninlo liwat? Sigurado nga madasig lang ini nga nahigkuan kag nayab-ukan. Para pirme manami tan-awon ang imo balay, dapat pirme mo man ini tinluan.

² Pareho man sa sini ang dapat naton himuon para mabag-o naton ang aton panghunahuna kag personalidad. Antes kita nabawtismuhan, ginpanikasugan gid naton nga maghimo sang mga pagbag-o sa aton kabuhi para ‘tinluan ang aton kaugalingon sa tanan nga nagapahigko sang lawas kag tagipusuon.’ (2 Cor. 7:1) Pero subong, dapat naton iaplikar ang laygay ni apostol Pablo nga ‘padayon nga maghimo sang mga pagbag-o.’ (Efe. 4:23) Ngaa dapat padayon naton nga bag-uhon ang aton kaugalingon? Bangod madasig kita nga maimpluwensiahan sini nga kalibutan kag mangin mahigko kita sa panulok ni Jehova. Para indi ini matabo kag padayon nga malipay si Jehova sa aton, dapat naton regular nga usisaon ang aton panghunahuna, personalidad, kag mga handum.

3. Ano ang buot silingon sang ekspresyon nga “bag-uha na ninyo ang inyo panghunahuna”? (Roma 12:2)

³ Ano ang dapat naton himuon para mabag-o naton ang aton panghunahuna? (Basaha ang Roma 12:2.) Ang Griego nga ekspresyon nga gin-translate “bag-uha na ninyo ang inyo panghunahuna” puede man i-translate nga “kay-uha ang inyo panghunahuna.” Gani indi bastante nga maghimo lang kita sang gamay nga pagbag-o sa aton kabuhi. Halimbawa, para makay-o ang isa ka balay, indi bastante nga butangan lang ini sang mga dekorasyon. Sing kaanggid, para makay-o ang aton panghunahuna, indi bastante  nga maghimo lang kita sang pila ka maayo nga mga butang kay daw pareho lang ini sa dekorasyon. Sa baylo, dapat naton usisaon ang aton nasulod nga pagkatawo kag dapat kita maghimo sang mga pagbag-o para matuman naton ang mga kasuguan ni Jehova sa bug-os naton nga masarangan. Indi bastante nga isa ka beses lang naton ini nga himuon, kundi dapat padayon naton ini nga himuon.

4. Ano ang dapat naton himuon para indi maimpluwensiahan sining malain nga kalibutan ang aton panghunahuna?

⁴ Kon perpekto na kita, masarangan na naton nga mapalipay si Jehova sa tanan naton nga ginahimo. Pero samtang wala pa ini nga tion, dapat padayon kita nga magpanikasog para malipay sia sa aton. Talupangda nga sa Roma 12:2, nagsiling si Pablo nga dapat naton bag-uhon ang aton panghunahuna para mabal-an naton ang kabubut-on sang Dios. Indi naton luyag nga maimpluwensiahan sining malain nga kalibutan ang aton mga desisyon kag ang mga gusto naton nga himuon. Gani dapat naton usisaon ang aton kaugalingon kon bala ang panghunahuna sang Dios amo gid ang nagaimpluwensia sa aton.

5. Paano naton mausisa ang aton panghunahuna parte sa adlaw ni Jehova nga malapit na lang gid matabo? (Tan-awa ang piktyur.)

⁵ Binagbinaga ini nga halimbawa. Gusto ni Jehova nga ‘pirme naton dumdumon ang presensia sang adlaw ni Jehova.’ (2 Ped. 3:12) Pamangkuta ang imo kaugalingon: ‘Makita bala sa akon paagi sang pagkabuhi nga nahangpan ko nga malapit na lang gid laglagon ining malain nga kalibutan? Ang akon bala desisyon parte sa pag-eskwela sa unibersidad ukon parte sa pagpili sang obra nagapakita nga ang pag-alagad kay Jehova amo ang pinakaimportante sa akon kabuhi? Nagatuo bala ako nga amanan ako ni Jehova kag ang akon pamilya, ukon basi pirme ako nagakabalaka parte sa materyal nga mga butang?’ Nalipay gid si Jehova kon makita niya nga  ginapanikasugan naton nga himuon ang iya kabubut-on.—Mat. 6:25-27, 33; Fil. 4:12, 13.

6. Ano ang dapat padayon naton nga himuon?

⁶ Dapat naton usisaon sing regular ang aton panghunahuna kag bag-uhon naton dayon ang mga dapat naton bag-uhon. Ginsilingan ni Pablo ang mga taga-Corinto: “Padayon nga usisaa kon malig-on ang inyo pagtuo; padayon nga pamatud-i kon ano kamo.” (2 Cor. 13:5) Mapakita naton ang aton “pagtuo,” indi lang paagi sa pag-attend sa mga miting kag pagbantala, kundi paagi man sa aton panghunahuna, handum, kag motibo. Gani dapat padayon naton nga bag-uhon ang aton panghunahuna paagi sa pagbasa sang Pulong sang Dios, paagi sa pag-ilog sa iya panghunahuna, kag paagi sa paghimo sang kabubut-on ni Jehova sa bug-os naton nga masarangan.—1 Cor. 2:14-16.

7. Suno sa Efeso 4:31, 32, ano pa ang dapat naton himuon, kag ngaa posible nga indi ini mahapos?

⁷ Basaha ang Efeso 4:31, 32. Magluwas nga dapat naton bag-uhon ang aton panghunahuna, dapat man naton “isuklob ang bag-o nga personalidad.” (Efe. 4:24) Dapat kita magpanikasog para mahimo naton ini. Dapat naton panikasugan nga dulaon ang indi maayo nga mga kinaiya pareho sang dumot, kaakig, kag kasingkal. Pero posible nga indi ini mahapos himuon. Ngaa? Bangod mabudlay gid bag-uhon ang pila ka indi maayo nga mga kinaiya. Halimbawa, ang Biblia nagasiling nga may mga tawo nga “madali maakig” kag “madali magsingkal.” (Hulu. 29:22) Kon may amo sini nga mga kinaiya ang isa ka tawo, posible gid nga kinahanglan niya nga padayon nga magpanikasog nga bag-uhon ini bisan pa nabawtismuhan na sia. Binagbinagon naton ang isa ka eksperiensia nga nagapakita sini.

8-9. Paano ginapakita sang eksperiensia ni Stephen nga dapat padayon kita nga magpanikasog para mauba naton ang daan nga personalidad?

⁸ Nabudlayan ang isa ka brother nga si Stephen nga kontrolon ang iya kaakig. “Bisan bawtismado na ako,” siling niya, “kinahanglan ko gihapon panikasugan nga makontrol ang akon pagkamaakigon. Halimbawa, isa ka bes sang nagapamalaybalay kami sa pagbantala, ginlagas ko ang kawatan nga nagkuha sang radyo sa akon salakyan. Sang malapit ko na lang sia maabtan, ginbuy-an niya ang radyo kag nagdalagan. Sang ginsugid ko sa mga kaupod ko kon paano ko nabawi ang akon radyo, ginpamangkot ako sang gulang sa amon grupo, ‘Stephen, ano ang himuon mo kon naabtan mo sia?’ Ginpamensar ko ina nga pamangkot kag nagpahulag ini sa akon nga manikasog nga mangin mahidaiton.” b

⁹ Ginapakita sang eksperiensia ni Stephen nga may mga tion nga nagabalik ang aton indi maayo nga mga kinaiya nga abi naton nabag-o na naton. Kon matabo ini sa imo, indi ka dapat maluyahan sang buot kag indi paghunahunaa nga malain ka nga alagad ni Jehova. Bisan si apostol Pablo nagsiling: “Kon luyag ko himuon ang husto, ang malain yari sa akon.” (Roma 7:21-23) Indi kita tanan perpekto, gani may mga tion nga nagabalik ang pila naton ka indi maayo nga mga kinaiya. Daw pareho ini sa higko kag yab-ok sa balay nga ara naman liwat pagkatapos naton paninlo. Gani dapat padayon kita nga magpanikasog para mangin matinlo kita pirme sa panulok ni Jehova. Paano naton ini mahimo?

10. Paano naton makontrol ang indi maayo nga mga kinaiya? (1 Juan 5:14, 15)

¹⁰ Ipangamuyo kay Jehova ang parte sa kinaiya nga nabudlayan ka nga bag-uhon, kag magsalig nga pamatian ka niya kag buligan. (Basaha ang 1 Juan 5:14, 15.) Indi ini pagdulaon ni Jehova paagi sa milagro, pero pabakuron ka niya para makontrol mo ini. (1 Ped. 5:10) Dayon himua kon ano ang imo ginpangamuyo paagi sa paglikaw sa mga butang nga posible mangin rason  sa pagbalik sang daan nga personalidad. Halimbawa, maghalong sa imo ginatan-aw nga mga pelikula, mga programa sa TV, ukon sa imo ginabasa nga mga istorya. Luyag ka papatihon sang pila sa sini nga wala sing malain sa kinaiya nga gusto mo bag-uhon. Kag sikwaya dayon sa imo hunahuna ang indi husto nga mga handum.—Fil. 4:8; Col. 3:2.

11. Ano ang himuon naton para padayon naton nga mapakita ang bag-o nga personalidad?

¹¹ Kon nauba mo na ang daan nga personalidad, importante nga padayon mo nga ipakita ang bag-o nga personalidad. Paano mo ini mahimo? Sa kada tion nga may matun-an ka nga kinaiya ni Jehova, panikasugi nga iluga sia. (Efe. 5:1, 2) Halimbawa, kon ginabasa mo ang kasaysayan sa Biblia nga nagapakita sang kahanda ni Jehova sa pagpatawad, pamangkuta ang imo kaugalingon, ‘Ginapatawad ko bala ang iban?’ Kon ginabasa mo ang parte sa kaluoy ni Jehova sa mga nagakinahanglan, pamangkuta ang imo kaugalingon, ‘Naluoy man bala ako sa mga kauturan nga nagakinahanglan, kag ginapakita ko bala ini paagi sa buhat?’ Padayon nga bag-uha ang imo panghunahuna paagi sa pagsuksok sang bag-o nga personalidad. Kon daw mahinay ang imo pagbag-o, indi ka dapat maluyahan sang buot.

12. Paano napabag-o sang Biblia si Stephen?

¹² Amat-amat nga nasuksok ni Stephen, nga ginsambit kaina, ang bag-o nga personalidad. Nagsiling sia: “Sugod sang nabawtismuhan ako, pila ka beses ako nga nakaatubang sing mga kahimtangan nga mahimo magpaakig sa akon. Natun-an ko nga talikdan ang mga tawo nga nagapaakig sa akon ukon pakalmahon ang sitwasyon sa iban nga paagi. Madamo nga tawo, lakip ang akon asawa, ang nagahatag sa akon sing komendasyon kon paano ko naatubang ini nga mga sitwasyon. Bisan ako, nakibot sa sini! Nagbag-o ang akon personalidad indi bangod sa akon kaugalingon lang nga panikasog. Sa baylo, nagapati ako nga pamatuod ini sang nagapabag-o nga gahom sang Biblia.”

13. Ano ang makabulig sa aton nga mahimo ang husto? (Galacia 5:16)

¹³ Basaha ang Galacia 5:16. Para buligan kita nga mahimo ang husto, maalwan nga ginahatag ni Jehova ang iya balaan nga espiritu. Kon ginatun-an naton ang Pulong sang Dios, nagapaimpluwensia kita sa balaan nga espiritu. Mabaton man naton ang balaan nga espiritu kon naga-attend kita sa aton mga miting. Sa sini nga mga pagtilipon, makaupod naton ang aton mga kauturan nga nagapanikasog man nga himuon ang husto pareho sa aton, kag makapalig-on gid ini. (Heb. 10:24, 25; 13:7) Kag kon hanuot kita nga nagapangamuyo kay Jehova para buligan kita sa aton kaluyahon, hatagan niya kita sang iya balaan nga espiritu para pabakuron kita kag padayon ini nga pakigbatuan. Kon himuon naton ini nga mga hilikuton, indi man buot silingon nga madula na ang aton sala nga mga handum. Pero buligan kita sini nga indi paghimuon ini nga mga handum. Ang Galacia 5:16 nagasiling nga ang mga nagalakat suno sa espiritu ‘indi gid makahimo sang undanon nga handum.’

14. Ngaa importante nga hunahunaon naton pirme ang husto nga mga handum?

¹⁴ Kon nasugdan na naton nga himuon ang mga hilikuton nga nagapasuod sa aton kay Jehova, importante nga himuon naton ini sing regular kag hunahunaon naton pirme ang husto nga mga handum. Ngaa? Bangod may kaaway kita nga wala nagauntat sa pagpakig-away sa aton. Ini nga kaaway amo ang pagsulay nga maghimo sang sala. Bisan pa nabawtismuhan na kita, posible gihapon nga daw matentar kita sa mga butang nga dapat naton likawan, pareho sang pagsugal, pagpahubog, ukon pornograpiya. (Efe. 5:3, 4) Ang isa ka pamatan-on nga brother nagsiling: “Naluyag ako sa  pareho ko nga mga lalaki, kag amo ini ang isa sa pinakanabudlayan ko gid nga pakigbatuan. Abi ko madula man lang ini nga balatyagon, pero ara gihapon ini asta subong.” Ano ang makabulig sa imo kon mabaskog gid ang imo indi husto nga handum?

15. Ngaa makapalig-on mabal-an nga ‘naagihan man sang iban’ ang indi husto nga mga handum? (Tan-awa ang piktyur.)

¹⁵ Kon mabaskog gid ang indi husto nga handum nga imo ginapakigbatuan, dumduma nga wala ka nagaisahanon. Ang Biblia nagasiling: “Wala sing pagsulay nga nagaabot sa inyo nga wala maagihan sang iban.” (1 Cor. 10:13a) Ang isa ka translation sang sini nga teksto nagasiling: “Wala sing pagsulay nga nagaabot sa inyo nga wala man nagaabot sa iban nga mga tawo.” Ginsulat ini para sa tanan nga Cristiano sa Corinto. Mga makihilahion anay ang pila sa ila, mga homoseksuwal, kag mga palahubog. (1 Cor. 6:9-11) Sa banta mo, wala na bala sila nakahunahuna sang indi husto nga mga handum pagkatapos sila mabawtismuhan? Indi ina posible. Mga hinaplas sila tanan, pero mga tawo gihapon sila nga indi perpekto. Sigurado gid nga may mga tion nga ginapakigbatuan nila ang indi husto nga mga handum. Makapalig-on gid ini sa aton. Ngaa? Bangod ginapakita sini nga kon may ginapakigbatuan ka nga indi husto nga handum, may ara na sang nakaeksperiensia sini kag nasarangan niya nga daugon ini. Huo, makapabilin ka nga ‘malig-on sa imo pagtuo, bangod nahibaluan mo nga ang amo man nga sahi sang mga pag-antos naeksperiensiahan man sang tanan mo nga kauturan sa bug-os nga kalibutan.’—1 Ped. 5:9.

16. Ano ang indi naton dapat paghunahunaon, kag ngaa?

¹⁶ Indi paghunahunaa nga wala sing may nakaintiende sa imo kaluyahon. Kon amo sini ang imo panghunahuna, posible nga pamensaron mo nga wala na sang paglaum ang imo sitwasyon kag indi mo gid masarangan nga daugon ang indi husto nga mga handum. Pero lain ang ginasiling  sang Biblia. Nagasiling ini: “Ang Dios matutom, kag indi sia magtugot nga sulayon kamo labaw sa inyo masarangan, apang kon mag-abot ang pagsulay magahimo man sia sang lulutsan agod mabatas ninyo ini.” (1 Cor. 10:13b) Gani bisan pa mabaskog gid ang aton indi husto nga handum, masarangan naton nga daugon ini. Sa bulig ni Jehova, masarangan naton nga indi paghimuon ini nga handum.

17. Bisan pa indi naton malikawan nga makahunahuna sang indi husto nga mga handum, ano ang masarangan naton nga himuon?

¹⁷  Dumduma ini pirme: Bangod indi kita perpekto, indi naton malikawan nga makahunahuna sang indi husto nga mga handum. Pero kon mahunahuna naton ini, masarangan naton nga sikwayon ini dayon, pareho sa ginhimo ni Jose sang nagdalagan sia dayon palayo sa asawa ni Potifar. (Gen. 39:12) Masarangan naton nga indi paghimuon ang indi husto nga mga handum.

18-19. Samtang ginapanikasugan naton nga bag-uhon ang aton panghunahuna, ano ang mga puede naton ipamangkot sa aton kaugalingon?

¹⁸ Ang pagbag-o sang aton panghunahuna nagakahulugan nga dapat naton pirme siguraduhon nga nalipay si Jehova sa aton mga ginahunahuna kag ginahimo. Gani dapat naton pirme usisaon ang aton kaugalingon: ‘Makita bala sa akon mga ginahimo nga nagapati ako nga hilingagawon na gid ang aton tion subong? Padayon ko bala nga ginapakita ang bag-o nga personalidad? Nagapabulig bala ako sa espiritu ni Jehova para madaug ko ang indi husto nga mga handum?’

¹⁹ Usisaa ang imo kaugalingon. Kon may nakita ka nga pag-uswag, dapat ka malipay. Pero kon may nakita ka nga dapat pauswagon, indi ka dapat maluyahan sang buot. Sa baylo, sunda ang laygay sang Filipos 3:16: “Bisan ano man nga pag-uswag ang aton nahimo sa sini, padayon kita nga maglakat sa husto nga paagi sa amo gihapon nga dalanon.” Kon himuon mo ini, makasalig ka nga pakamaayuhon ni Jehova ang imo mga pagpanikasog para bag-uhon ang imo panghunahuna.