1-2. Bapatiso murinai dahaka ita karaia be namo bona dahaka dainai?

 NEGA hida emu ruma oi hagoevaia? Reana ruma matamata oi abia neganai, oi hagoevaia namonamo. To dahaka do ia vara bema oi hagoevaia lou lasi? Oi diba vadaeni, do ia miro haraga. Emu ruma toana ia namo totona, hanaihanai do oi hagoevaia.

² Iseda lalohadai bona kara dekenai unai bamona do ita karaia danu. Oibe, ita do bapatiso lasi neganai, ita hekwarahi iseda mauri ai gau haida ita haidaua totona, unai amo “tauanina bona lalona hamiroa gaudia ibounai amo ita goeva.” (2 Kor. 7:1) To hari, aposetolo Paulo ena sisiba do ita badinaia bona ‘iseda lalona do ita hamatamataia noho.’ (Efe. 4:23) Dahaka dainai unai do ita karaia noho? Badina inai tanobada ena miro ese kara haraga iseda lalohadai bona kara ia hadikaia diba. Unai ia vara lasi bona Iehova ita hamoalea noho totona, iseda lalohadai, kara bona ura ita sekea be namo.

3. Iseda ‘lalona ita hamatamataia’ ena anina be dahaka? (Roma 12:2)

³ Iseda lalona ita hamatamataia eiava iseda lalohadai ita haidaua totona, dahaka ita karaia be namo? (Roma 12:2 duahia.) Gau ta oi hanamoa ena anina be oi haidaua momokani. Hegeregere, ruma ta ita hanamoa neganai, herahera gaudia sibona ita atoa lasi. Unai hegeregerena, iseda mauri ai kara namodia haida sibona ita hahedinaraia be iseda lalohadai ita hanamoa  lasi. To, iseda kudouna ai idia noho gaudia ita diba be namo. Unai amo iseda kara ita haidaua bona Iehova ena taravatu hegeregerena do ita noho. Nega tamona sibona unai ita karaia lasi, to hanaihanai.

4. Edena dala ai inai tanobada dikana ena lalohadai ita dadaraia diba?

⁴ Goevadae taudia ai ita lao neganai, iseda kara ibounai lalonai hanaihanai Iehova do ita hamoalea. Hari, namona be ita gaukara goada noho Iehova ita hamoalea totona. Laloatao Roma 12:2 ai, Paulo ia gwau namona be iseda lalona ita hamatamataia unai amo Dirava ena ura ita totona do ita diba. Namo lasi inai tanobada dikana ese iseda lalona ia biagua, to namona be iseda lalona do ita sekea bona itaia bema iseda tahua gaudia bona abia hidi gaudia be Dirava ena laloa dalana hegeregerena eiava tanobada ena lalohadai ita badinaia noho.

5. Edena dala ai ita hahedinaraia Iehova ena dina be kahirakahira? (Laulau itaia.)

⁵ Haheitalai ta mani ita laloa. Iehova ia ura “ena dina ena mai negana do [ita] . . . laloa noho.” (2 Pet. 3:12) Sibona oi nanadaia: ‘Egu mauri dalana amo lau hahedinaraia lau laloparara inai tanobada dikana ena dokona be kahirakahira, a? Edukeisen bona moni gaukara dekenai disisen lau karaia neganai, lau hahedinaraia Iehova hesiai henia karana lau laloa bada, a? Lau abia dae momokani Iehova ese lau bona egu famili edia dabu gaudia do ia henia, eiava kohu bona moni lau lalohekwarahilaia momo, a?’ Iehova do ia moale bema iseda mauri ita gaukaralaia iena ura ita karaia totona.​—Mat. 6:25-27, 33; Fili. 4:12, 13.

6. Dahaka do ita karaia noho be namo?

⁶ Namona be iseda lalohadai do ita sekea hanaihanai bona gau haida ita haidaua. Paulo ese Korinto tadikaka taihu ia hamaorodia:  “Umui tahua noho bema umui be emui abidadama umui dogoatao noho eiava lasi, bona do umui hamomokania noho umui be edena bamona taudia.” (2 Kor. 13:5) Iseda “abidadama” ita dogoatao noho totona, nega ta ta ai Keristani heboudia bona haroro gaukara ita lao be hegeregere lasi. To, iseda lalohadai bona ura danu be mai anina bada. Namona be Dirava ena Hereva ita duahia, iena laloa dalana ita badinaia, bona iena ura hegeregerena iseda kara ita haidaua, unai amo iseda lalona do ita hamatamataia.​—1 Kor. 2:14-16.

7. Efeso 4:31, 32 hegeregerena, dahaka do ita karaia noho bona dahaka dainai unai ita karaia be auka?

⁷ Efeso 4:31, 32 duahia. Iseda laloa dalana ita haidaua be namo, to gau badana be “kara matamata” do ita atoa danu. (Efe. 4:24) Namona be inai kara be iseda mauri amo do ita kokidia: Inai heheni karana, badu bona badu dikadika karadia. Unai ita karaia totona ita hekwarahi be namo. Dahaka dainai? Badina unai kara dikadia haida ita rakatania totona be auka. Hegeregere, Baibel ia gwau haida be “badu momo” bona “badu haraga” taudia. (Aon. 29:22) Bema tadikaka o taihu ta be guna unai bamona kara dikadia ia manadalaia, ena be ia bapatiso vadaeni, do ia hekwarahi noho ena kara ia hanamoa totona. Tadikaka ta ena sivarai ese unai ia hahedinaraia.   

8-9. Edena dala ai Stephen ena sivarai ese ia hahedinaraia do ita hekwarahi noho kara dika haida ita rakatania totona?

⁸ Tadikaka ta ladana Stephen be iena badu karana ia biagua diba lasi. Ia gwau: “Ena be lau bapatiso vadaeni, to lau hekwarahi noho egu badu karana lau rakatania totona. Hegeregere, nega ta ruma-ta-ruma-ta haroro gaukara lalonai, egu motuka ena reidio ia henao tauna lau lulua. Kahirakahira ia lau dogoatao neganai, reidio ia negea bona ia heau boio. Ai haroro hebou taudia dekenai unai lau sivarailaia neganai, elda ta ese lau ia nanadaia, ‘Stephen, bema ia oi dogoatao neganai, dahaka do oi karaia?’ Unai henanadai ese lau ia hagoadaia lau gaukara goada noho ma haida ida maino ai lau noho totona.” b

⁹ Stephen ena sivarai ese ia hahedinaraia bamona, kara dika ta ita karaia diba, ena be ita laloa ita rakatania vadaeni. Bema oi dekenai unai ia vara, oi lalomanoka lasi bona namo lasi oi laloa oi be Keristani tauna namona lasi. Aposetolo Paulo danu be ia gwau: “Lau ura kara namona lau karaia neganai, kara dika be lau ida ia noho.” (Roma 7:21-23) Goevadae lasi Keristani taudia ibounai be idia hekwarahi noho unai bamona kerere haida do idia hanamoa totona. Unai be hegeregere ruma ta ia miro loulou bamona. Do ita hekwarahi noho ita goeva totona. Edena dala ai unai ita karaia diba?

10. Edena dala ai kara dikadia ita dadaraia diba? (1 Ioane 5:14, 15)

¹⁰ Oi ura hanamoa karana ta be Iehova dekenai oi gurigurilaia bona namona be oi abia dae emu guriguri do ia kamonai bona oi do ia durua. (1 Ioane 5:14, 15 duahia.) Iehova ese hoa dalana ai unai kara do ia kokia lasi, to oi dekenai goada do ia henia unai kara oi dadaraia totona. (1 Pet. 5:10) To, emu guriguri oi badinaia bona kara gunana do ia havaraia karadia oi karaia lasi. Hegeregere muvi o televisen program idauidau itaia karana, eiava unai kara gunana ia herevalaia bukadia duahia karana oi dadaraia be namo. Danu namona be ura dikadia oi laloa lasi.​—Fili. 4:8; Kol. 3:2.   

11. Dahaka ita kara diba kara matamata ita hahedinaraia totona?

 ¹¹ Ena be kara gunadia oi kokia vadaeni, to kara matamatana oi hahedinaraia danu be gau badana. Edena dala ai unai oi karaia diba? Tahua gauna ta be, Iehova ena kara namodia oi dibaia bona oi tohotohoa. (Efe. 5:1, 2) Hegeregere, Baibel ai Iehova ese dika ia gwauatao karana ena sivarai ta oi duahia neganai, sibona oi nanadaia, ‘Haida edia dika lau gwauatao, a?’ Iehova ese ogogami taudia ia hebogahisi henia edia sivarai oi duahia neganai, sibona oi nanadaia, ‘Idia dabu tadikaka taihu lau hebogahisi henia bona egu kara amo unai lau hahedinaraia, a?’ Kara matamata oi hahedinaraia amo emu lalona do oi hamatamataia noho bona unai oi karaia totona oi manau be namo.

12. Edena dala ai Stephen ia abia dae momokani Baibel ena hereva be mai ena siahu ta ena mauri ia haidaua totona?

¹² Matamanai ita herevalaia tadikaka, Stephen, be metairametaira kara matamata ia hahedinaraia. Ia gwau: “Lau bapatiso negana amo gau idauidau ese egu badu haraga karana ia tohoa. To, unai bamona negadiai taunimanima amo lau raka siri eiava dala ma haida ai egu badu karana lau biagua. Unai bamona lau karaia dainai, egu adavana bona ma haida ese lau idia hanamoa. Lau danu egu kara dekenai lau hoa! Do lau gwau lasi, sibona egu goada dekenai amo egu mauri lau haidaua, to lau abia dae momokani Baibel ena hereva be mai ena siahu ta ena mauri ia haidaua totona.”

13. Dahaka ese ita do ia durua lalohadai namodia ita abia totona? (Galatia 5:16)

¹³ Galatia 5:16 duahia. Iehova ese ena lauma helaga amo ita do ia durua kara maoromaoro ita karaia noho totona. Dirava ena Hereva ita stadilaia neganai, lauma helaga ena heduru ita abia unai. Danu hebou ita lao neganai lauma helaga ena heduru ita abia. Keristani heboudia ai, iseda tadikaka taihu ida ita hebamo, idia danu be ita bamona idia hekwarahi noho kara maorodia idia karaia totona. Unai be hagoadaia gauna. (Heb. 10:24, 25; 13:7) Bona bema iseda manoka gaudia ita hanaia totona mai kudouna ibounai ida Iehova ita guriguri henia, ena lauma helaga amo ita do ia durua. Ena be unai ese lalohadai dikadia ia kokidia lasi, to ita do ia durua unai ita dadaraia totona. Galatia 5:16 ena hereva bamona, lauma helaga ena dala hegeregerena idia raka noho taudia be ‘tauanina ena ura karana ta do idia karaia lasi.’

14. Dahaka dainai ura namodia do ita goadalaia noho?

¹⁴ Iehova tura henia karadia ita goadalaia neganai, namona be unai ita karaia noho bona ura namodia do ita havaraia noho. Dahaka dainai? Badina iseda inai tauna be hanaihanai ita ia tohoa. Iseda inai tauna be ita ia tohoa kara dikadia ita karaia totona. Ena be ita bapatiso vadaeni, to guna ita rakatania gaudia ese iseda lalona idia veria diba, hegeregere, laki gadara, inuinu kekero, o ponografi itaia karana. (Efe. 5:3, 4) Keristani tadikaka matamata ta ia gwau: “Lau hekwarahi memero ura henia karana lau dadaraia. Lau laloa inai hemami be do idia ore, to lasi inai hemami lau do abia noho.” Dahaka ese oi ia durua diba bema unai ura dikadia be idia goada?

15. Edena dala ai haida idia hekwarahi noho ura dikadia idia dadaraia totona ena sivarai ese ita ia durua? (Laulau itaia.)

¹⁵ Bema oi hekwarahi noho ura dikana ta oi dadaraia totona, laloatao oi sibona be unai bamona oi mamia lasi. Baibel ia gwau: “Umui  davaria hedibagani be vaia taunimanima ibounai ese idia davaria hedibagani bamona.” (1 Kor. 10:13a) Unai siri be Korinto ai idia noho Keristani tatau bona hahine totona ia torea. Idia haida be guna heudahanai taudia, hahine edia kara bamona idia karaia tatau, bona kekero momo taudia. (1 Kor. 6:9-11) Oi laloa idia bapatiso murinai, idia hekwarahi lasi unai bamona ura dikadia idia dadaraia totona, a? Lasi, idia hekwarahi. Momokani, idia ibounai be horoa Keristani taudia, to idia be goevadae lasi. Unai dainai, nega ta ta ai, idia hekwarahi ura dikadia idia dadaraia totona. Unai ese ita ia hagoadaia. Dahaka dainai? Badina unai ese ia hahedinaraia herevana dahaka ura dikana oi hekwarahi oi dadaraia totona, to ta be unai ia dadaraia vadaeni. Oibe, emui abidadama oi hagoadaia “badina [oi] diba, emui tadikaka oreana tanobada hegegemadai danu be unai bamona hisihisi idauidau idia davaria noho.”​—1 Pet. 5:9.

16. Dahaka lalohadai ita dadaraia be namo bona dahaka dainai?

¹⁶ Namo lasi oi laloa ta ese emu hekwakwanai do ia lalopararalaia lasi. Unai bamona lalohadai dainai, oi mamia gau ta oi karaia diba lasi bona oi be hegeregere lasi ura dikadia oi dadaraia totona. To Baibel ia gwau: “Dirava be ena hereva ia badinaia, ia ese umui do ia rakatania lasi emui goada ia hereaia hedibagani umui davaria totona, to hedibagani idia vara neganai, ia ese umui do ia durua umui haheauka totona.” (1 Kor. 10:13b) Unai dainai, ena be ura dikadia be idia goada, to ita dadaraia diba. Iehova ena heduru dainai, unai ita hanaia diba.

17. Ena be ura dikadia do ita koua lasi, to dahaka ita karaia diba?

¹⁷ Hanaihanai inai oi laloatao: Ita be goevadae lasi dainai, ura dikadia do ita koua momokani lasi. To ura dikadia idia vara lou neganai, karaharaga abia hidi oi karaia oi dadaraia totona.  Iosepa bamona, Potifara ena adavana amo karaharaga ia heau siri. (Gen. 39:12) Ura dikadia oi dadaraia diba!

18-19. Iseda lalona ita hamatamataia totona, dahaka henanadai ita henia diba?

¹⁸ Namona be ita hekwarahi noho iseda lalona ita hamatamataia, unai amo iseda lalohadai bona kara be Iehova ena ura hegeregerena. Sibona ita nanadaia: ‘Egu kara amo lau hahedinaraia ita be nega dokona ai ita noho, a? Lau hekwarahi noho kara matamata lau hahedinaraia, a? Iehova ena lauma helaga be lau ia hakaua noho unai amo ura dikadia do lau dadaraia, a?’

¹⁹ Sibona oi sekea neganai, namo lasi oi laloa emu kara be idia goeva sibona, to namona be oi karaia senisi dainai oi moale. Bema oi itaia kara haida do oi haidaua, oi lalomanoka lasi. To, namona be Filipi 3:16 ena sisiba oi badinaia: “Hari ita goada hegeregerena, unai dala tamona ai do ita raka namonamo noho.” Emu lalona oi hamatamataia noho neganai, namona be oi abia dae Iehova be emu hekwarahi do ia hanamoa.