1-2. Was mise mer wayter noom taaf mache? Lee tas aus.

 WII ofts machst tuu tayn haus sauwer? Fiilaycht eeps tuu tich kewanert host, host tuu yeete ek kans sauwer kelos. Awer was teet pasiire wëns tuu es soo lose teest un net mee sauwer mache teest? Klaych, teet tas haus noch mool trekich kepe. Fer tayn haus in ortnung lose, must tuu tas eftas sauwer mache.

² Een eenlich aanxtrengung is neetich fer unser ketanke un personaliteet korikiire. Kewis, foer uns taafe lose, hon mer uns aan kextrengt fer ti neetiche ënerunge mache fer “uns fon ale sorte trek fon flayx un kayst sauwer mache”. (2 Kor. 7:1) Awer yets, mise mer te aphostel Phaul sayn aanreet aan wëne: “Tuut wayter ti aat wii teyer tenkt, nay mache.” (Ëfe. 4:23) Warom mise mer wayter uns selepst korikiire? Wayl ti influëns fon tiise welt khan uns xnel “trekich” lose. Tes weeche fer Yeehoowa wayter kefale, mise mer ofts unser ketanke, personaliteet un winxe noo kuke.

3. Was petayt unser “ferxtant nay mache”? (Romaaner 12:2)

³ Was mise mer mache fer unser ferxtant nay mache, es wil saan, ti aat wii mer tenke, ënere? (Lees Romaaner 12:2.) b Etwas nay lose, petayt mee wii ploos ënerunge in te  ausweenich sayt mache. Tsum payxpiil: een haus nay mache is mee wii ploos tas xeen lose. Kraat soo, unser ketanke nay mache is mee wii ploos phaar kuute tinge mache. Xtats tas, mise mer tenke aan te persoon woo mer wërklich inweenich sin un ti neetiche ënerunge mache. Soo, khene mer Kot sayn kesetse aan heere soo wii eyer wil. Un meyer sole tas imer mache, net ploos een mool.

4. Was mise mer mache fer net lose tiise welt unser ferxtant influentsiire?

⁴ Wën mer perfekt wëre, tuun mer imer Yeehoowa kefale in ales was mer mache. Awer pis tiise tsayt khomt, mise mer uns wayter aan xtrenge fer Kot kefale. Kuk mool tas in Romaaner 12:2, macht Phaul een ferpiinung tswixich unser ferxtant nay mache un se wise was Kot sayn wile is. Xtats lose ti welt uns mustere, mise mer uns selepst noo kuke fer se siin wii fiil Yeehoowa sayn ketanke unser tsiile un ëntxlise influentsiire tuun.

5. Wii khene mer wise ep Yeehoowa sayn taach ‘fest in unser ketanke’ is? (Kuk tas pilt.)

⁵ Kuk mool een payxpiil. Yeehoowa wil hon tas mer ‘te taach fon sayn presens fest in unser ketanke hale’. (2 Phe. 3:12) Froo tich: ‘Tuut ti aat wii ich leepe tsayche tas ich ferxteen tas tas ën fon tiise welt ticht is? Tuun mayn ëntxlise iwer hoochxuul un aarwayt tsayche tas Yeehoowa tiine tas haupste in mayn leepe is? Tuun ich klaape tas Yeehoowa tas neetiches fer mich un mayn familye fersoriche tuut orer tuun ich mich imer ketanke iwer materyaalixe tinge mache?’ Yeehoowa kefalt sich aarich fiil wën eyer siit tas mer uns aan xtrenge fer tëm sayn wile in ales in unser leepe mache. (Mat. 6:25-27, 33; Fili. 4:12, 13)

6. Was mise mer wayter mache?

⁶ Meyer mise unser ketanke ofts noo kuke un tan ti neetiche ënerunge mache. Phaul hot fer ti korinter kesaat: “Tuut wayter fer aych selepst kuke, op iir im klaape sayt.  Tuut wayter in proop xtele weer iir wërklich sayt.” (2 Kor. 13:5) ‘Im klaape sin’ petayt mee wii ploos in te fersamlunge keen un als mool preetiche. Es hot aach se tuun mit unser ketanke, winxe un motiwatsyoone. Tes weeche, fer unser ketanke wayter nay mache, mise mer ti Piipel leese, lërne se tenke wii Yeehoowa tenkt un tan mache ales was neetich is fer Yeehoowa kefale. (1 Kor. 2:14-16)

7. Tëm noo Ëfeser 4:31, 32, was noch mise mer mache un warom khan tas xweyer sin?

⁷ Lees Ëfeser 4:31, 32. c Een aner wichtich ënerung woo mer mache mise, is ti “nay personaliteet aan tsiie”. (Ëfe. 4:24) Tas mache, khost aanxtrengung. Tswixich anere tinge, mise mer xtram xafe fer ti xlechte kwaliteete — wii piterliche xpiirunge, peesheet un wuut — aus rope. Warom khan tas xweyer sin? Wayl etliche xlechte kwaliteete fon unser personaliteet khene tiif kewortselt sin. Tsum payxpiil: ti Piipel saat tas etliche wëre “laycht pees” un een “wuutich personaliteet” hon. (Xpr. 29:22) Yemant woo soo sorte xlechte kwaliteete hot, mus tsiimlich sicher sich wayter aan xtrenge fer ënerunge mache soo kaar noo sayn taaf. Tas is was ti speryens im neekste apsats tsayche tuut.

8-9. Wii tuut Stephen sayn speryens tsayche tas mer mise wayter ti alt personaliteet aus tuun?

⁸ Es waar xweyer fer een pruuter, woo Stephen heest, sayn wuut kontroliire. “Soo kaar noo mich taafe lose — saat eyer —, must ich noch wayter mich aan xtrenge fer mayn wuut kontroliire. Tsum payxpiil: een mool, wii mer haus tsu haus am preetiche waare, hot een xpitspuup te ratyo fon mayn khare kextool. Ich sin tëm noo kexprung, awer wii ich xon ticht waar, hot eyer te ratyo fale kelos un is aus keris. Ich hon fer ti anere in te krup fertseelt wii ich te ratyo tsurik kriit hon. Too hot een elteste mich kefroot: ‘Was hëst tuu kemacht, Stephen, wëns tuu tëm kefang hëst?’ Tiise frooch hot mich tenke kemacht un hot mich uf kemuut wayter traan xafe fer friitlicher sin.” d

⁹ Stephen sayn speryens tsaycht tas een xlecht kwaliteet khan foer khome wën mer es net waarte — soo kaar wën mer ketenkt hon tas mer se xon kontroliirt hate. Wën tas mit tich pasiirt, playp net oone muut un tenk net tas tuu een xlecht krist pist. Soo kaar te aphostel Phaul hot erkhënt: “Wën ich mache wil was richtich is, xteet in mich was xlecht is.” (Rom. 7:21-23) Al ti imperfekte kriste hon xlechte kwaliteete woo als mool tsurik khome, soo wii te trek woo in unser haus imer foer khomt. Meyer mise uns wayter aan xtrenge fer uns sauwer hale. Wii khene mer tas mache?

10. Wii khene mer keeche ferkheerte kwaliteete khëmpfe? (1^te Yoohan 5:14, 15)

¹⁰ Peet tsu Yeehoowa iwer ti kwaliteet woo xweyer fer tich is ënere, mit te sicherheet tas eyer tich heere un helfe tuut. (Lees 1^te Yoohan 5:14, 15.) e Yeehoowa tuut net een wuner mache fer ti xlecht kwaliteet wech nëme, awer tee kept tich kraft fer tiise kwaliteet net  tsayche. (1 Phe. 5:10) Foerlaywich, xtel tich aan tëm noo tayn kepeet un mach net ti tinge woo khente ti alt personaliteet tsurik pringe. Tsum payxpiil: phas uf mit fiilme, TV prokrame orer kexichte woo aus siin mache tas ti xlecht kwaliteet woos tuu wech nëme wilst, kuut is. Un los net ti ferkheerte winxe in tayn ketanke plaype. (Fili. 4:8; Kol. 3:2)

11. Was khene mer mache fer ti nay personaliteet wayter aan tsiie?

¹¹ Opwool tuu ti alt personaliteet uf sayt kelos host, is es wichtich ti nay personaliteet aan tsiie. Wii khanst tuu tas mache? Wiis tuu iwer Yeehoowa sayn kwaliteete lërnst, xtel tas tsiil fer tëm noo mache. (Ëfe. 5:1, 2) Tsum payxpiil: wëns tuu een kexicht in te Piipel leest woo tsaycht wii Yeehoowa krooshërtslich fertsayt, froo tich: ‘Tuun ich ti anere fertsaye?’ Wëns tuu leest iwer Yeehoowa sayn mitlayt fer tii woo aarm sin, froo tich: ‘Hon ich eenliche xpiirunge noo mayn priiter un xwestere woo materyaalixe tinge prayche? Tuun ich tas tsayche torich aktsyoone?’ Tuu wayter tayn ferxtant nay mache un ti nay personaliteet aan tsiie. Say aach ketultich mit tich selepst soo lang wiis tuu tas machst.

12. Wii hot Stephen ti kraft fon te Piipel kexpiirt?

¹² Stephen, iwer weem mer foner traan kexproch hon, hot kemërkt tas, lamsam, khont eyer ti nay personaliteet aan tsiie. Tee saat: “Ich khent mich wyolënt aan kextelt hon in fiile situatsyoone woo ich torich ti yoore mit kemacht hon. Awer ich hon kelërnt faart keen wën ti layt mich uf kehetst hon orer een aner aat fine fer ti situatsyoon friitlich resolwiire. Mayn fraa un anere hon mich keloopt weeche mayn aanxtelung in tiise situatsyoone. Mayn aanxtelung hot soo kaar mich selepst ferwunert! Ich khent nii tiise ënerunge mit mayn aychne kraft mache! Ich klaape tas es ploos meechlich is weeche ti kraft fon te Piipel.”

13. Was tuut uns helfe se mache was richtich is? (Kalater 5:16)

¹³ Lees Kalater 5:16. f Wii helft uns Yeehoowa te khampf fer se mache was richtich is, kewine? Tee tuut sayn hayliche kayst krooshërtslich fersoriche. Wën mer ti Piipel xtutiire, lose mer Kot sayn kayst uns influentsiire. Meyer kriin aach hayliche kayst wën mer tsu te fersamlunge keen. Tat, khene mer mit priiter un xwestere sin woo, soo wii uns, sich aan xtrenge fer se mache was richtich is un tas muut uns fiil uf. (Hep. 10:24, 25; 13:7) Un wën mer hërtslich tsu Yeehoowa peete un tëm hilef ferlange fer mit een xwacheet um keen, kept eyer uns hayliche kayst fer uns ferxtërke fer wayter khëmpfe. Tsiimlich sicher, tuun tiise tinge net ti ferkheerte winxe wech nëme, awer tii kepe uns kraft fer uns fest too tekeeche xtele, tas mer ti ferkheerte winxe net erfiile. Soo wii Kalater 5:16 saat, tii woo sich fom kayst lënke lose, tuun “khee sintiche wunx erfiile”.

14. Warom is es wichtich wayter richtiche winxe ëntwikele?

¹⁴ Noo tas mer aan fange tinge mache woo unser fraayntxaft mit Yeehoowa xtark hale, is es wichtich tiise rutiin hale un wayter richtiche winxe ëntwikele. Warom? Wayl eene fon unser faynte tuut nii ruue. Tiise faynt is ti fersuuchung fer se mache was ferkheert is. Soo kaar noom taaf, khene mer mërke tas mer noch te wunx hon fer se mache ti tinge woo mer uns wech hale sole — wii kelt xpiile,  tsu fiil alkohool trinke orer pornokrafii kuke. (Ëfe. 5:3, 4) Een yung pruuter erkhënt: “Eene fon te xlimste tinge woo ich khëmpfe, sin mayn seksuaale winxe noo layt fom selwiche sëks. Ich hon ketenkt tas tiise winxe teete mit te tsayt ferxwiine, awer tii sin net faart kang.” Was khan tich helfe wën een ferkheert wunx aarich xtark is?

15. Warom is es ufmuutich se wise tas ti ferkheerte winxe sin “keweenlich fer ti kanse mënxe”? (Kuk tas pilt.)

¹⁵ Pist tuu am khëmpfe keeche een ferkheert wunx woo aarich xtark is? Eriner tich: tuu pist net aleen. Ti Piipel saat: “Khee fersuuchung is iwer aych khom, woo net keweenlich fer ti kanse mënxe is.” (1 Kor. 10:13 1^te teel) Tiise wërter sin kexrip kep fer mëner un fraae woo kriste in Korinto waare. Friier, etliche fon tëne waare untroy in te hayrat, sifer orer hon homoseksuaalismus pratikiirt. (1 Kor. 6:9-11) Mënst tuu tas, noo sayn taaf, hon se khee mee ferkheerte wunx kehat? Kewis net. Es is woer tas se al kesalpte kriste waare. Noch soo, waare se imperfekte mënxe kewees. Sicher muste se als mool keeche ferkheerte winxe khëmpfe. Tas wise sol uns uf muute. Warom? Wayl es tsaycht tas, ekaal te ferkheert wunx woos tuu khëmpfst, yemant is xon too triwer wech khom. Yawool, tuu khanst ‘fest im klaape plaype, wayl tuu weest tas ti kans pruuterxaft uf te kans welt tas selwiche eelent mit macht’. (1 Phe. 5:9)

16. Was khan een fal fer uns sin un warom is tas kefeerlich?

¹⁶ Tenke tas nimant tayn xwacheet ferxteen khan, is een fal. Phas uf! Weeche soo sorte ketanke, khanst tuu tenke tas es khee hofnung fer tich kept un tas tuu niks mache khanst fer keeche ti ferkheerte winxe khëmpfe. Awer ti Piipel saat was aneres: “Kot is troy, un tee tuut net lose tas teyer mee fersuucht wërt wii teyer aus hale khent. Awer, wën ti fersuuchung khomt, tuut eyer aach  een ausweech tsayche tas teyer es aus hale khent.” (1 Kor. 10:13 2^te teel) Tes weeche, soo kaar wën een ferkheert wunx xtark is, is es meechlich troy tsu Yeehoowa plaype. Mit Kot sayn hilef, is es meechlich ti ferkheerte winxe net erfiile.

17. Meyer khene net ti ferkheerte winxe um hale, foer khome. Awer was khene mer kontroliire?

¹⁷ Ferkes tich net: wayl mer imperfekt sin, khene mer net um hale ti ferkheerte winxe foer khome. Awer wën mer ferkheerte winxe hon, khene mer se klaych ap xtose. Tas is was Yoosef kemacht hot, wii eyer klaych fon Potifaar sayn fraa aus keris is. (Xee. 39:12) Tuu praychst net ti ferkheerte winxe erfiile!

18-19. Soo lang wii mer uns aan xtrenge fer unser ferxtant nay mache, was fer frooche khene mer uns mache?

¹⁸ Unser ferxtant nay mache, petayt uns wayter sicher lose tas unser ketanke un aktsyoone Yeehoowa kefale. Tes weeche sole mer uns selepst eftas noo kuke un uns frooe: ‘Tuut mayn aanxtelung tsayche tas ich erkhëne wii ticht tas ën is? Mit was se tuun hot mit te nay personaliteet aan tsiie, sin ich am foran keen? Lose ich Yeehoowa sayn kayst mich lënke tas ich mich keeche ti ferkheerte winxe fest xtele khan?’

¹⁹ Wëns tuu tich selepst noo kukst, waart net perfektsyoon. Awer say froo mit wii wayt tuu xon foran kang pist. Wëns tuu mërkst tas tuu tich ferpesere must, playp net oone muut. Xtats tas, tuu te aanreet fon Filiper 3:16 aan wëne: “Ekaal wii wayt mer xon foran kang sin, wole mer wayter in tiise selwich weech keen.” Wëns tuu tas machst, say tich sicher tas Yeehoowa tayn aanxtrengung seechne tuut fer tayn ferxtant wayter nay mache.