1-2. Nama utai ti patut terus dikereja kitai pengudah dibaptisa? Terangka.

 NI PENYUAH nuan nuchi rumah nuan? Engka nuan bebendar nuchi rumah nya sebedau nuan pindah kia. Tang nama deka nyadi enti nuan badu agi nuchi iya? Iya tentu jampat deka nyadi kamah baru. Ngambika rumah nuan mengkang kemas, nuan patut seruran nuchi iya.

² Kitai mega patut terus ngemetulka runding sereta pendiau kitai. Endang amat, sebedau dibaptisa kitai bebendar ngaga ubah ti patut ba pengidup kitai ngambika ulih “nuchi diri ari semua pekara ke ngamahka tubuh enggau runding.” (2 Kor. 7:1) Tang, diatu kitai patut ngasika jaku lalau rasul Paul ke ngasuh kitai “terus ngubah chara [kitai] berunding nyadi baru.” (Eps. 4:23) Nama kebuah kitai patut terus ngemetulka diri empu? Laban utai ti jai ba dunya tu ulih ngasuh kitai enda tuchi ba mata Jehovah. Ngambika ulih terus ngelantangka ati Jehovah, kitai patut terus meresa runding, pendiau, sereta pengingin kitai.

3. Nama reti “ngubah chara kitai berunding”? (Rome 12:2)

³ Nama patut digaga kitai kena ngubah chara kitai berunding? (Bacha Rome 12:2.) Ngubah chara kitai berunding ukai mai reti semina ngereja sekeda utai ti manah aja, tang kitai patut meresa sapa kitai ke bendar, lalu ngaga ubah ti patut ngambika kitai ulih ngasika standard Jehovah enggau chara ti  pemadu manah. Kitai patut seruran ngereja tu, ukai sekali aja.

4. Baka ni kitai ulih nentuka runding kitai enda diubah nitihka runding dunya tu?

⁴ Lebuh kitai nyadi sempurna ila, kitai deka seruran ngelantangka ati Jehovah ba semua utai ti dikereja kitai. Tang sebedau nya, kitai patut terus bebendar ngelantangka ati Jehovah. Peratika ba Rome 12:2, Paul madahka kitai patut ngubah chara kitai berunding ngambika ulih nemu utai ti dikedekaka Petara kereja kitai. Ari ke nejuka runding dunya tu ngubah runding kitai, kitai patut meresa dulu runding kitai. Tu kena nemu naka ni kitai nejuka runding Petara ngiring juluk ati sereta pemutus kitai. Kitai enggai runding ari dunya tu ngachau runding kitai.

5. Baka ni kitai ulih meresa runding kitai bekaul enggau hari Jehovah ti majak semak? (Peda gambar.)

⁵ Peratika siti chunto tu. Jehovah dekaka kitai “seruran berundingka penatai hari Jehovah.” (2 Pet. 3:12) Tanya diri empu: ‘Kati gaya pengidup aku nunjukka aku nemu sistem dunya ti jai tu deka dirusakka enda lama da agi? Kati pemutus aku bekaul enggau belajar ba universiti tauka kereja ke dipilih aku nunjukka aku ngenuluka sembah ngagai Jehovah dalam pengidup aku? Kati aku arap Jehovah deka nyediaka utai ti diguna aku enggau diri sebilik, tauka kati aku seruran irau pasal utai ti diguna ba pengidup besehari-sehari?’ Jehovah amat gaga ati lebuh Iya meda kitai nguji enggau naka ulih ngereja peneka Iya ba semua utai ti dikereja kitai.—Mat. 6:25-27, 33; Plp. 4:12, 13.

6. Nama utai ke patut terus dikereja kitai?

⁶ Kitai patut seruran beratika chara kitai berunding sereta ngaga ubah ti patut. Paul madah ngagai orang ba Korint: “Anang ngetu meresa diri empu kena nentuka kita arapka Petara enggau pengabis iya tauka enda.  Anang ngetu meresa diri kena nentuka kati gaya kita kebendar iya.” (2 Kor. 13:5) “Arapka Petara” ukai semina mai reti datai begempuru tauka nginjil aja, tang tu mai reti ti lebih ari nya. Tu nyengkaum utai ti diperundingka kitai, utai ti dikinginka kitai, sereta tuju ati kitai. Nya alai, kitai patut ngubah chara kitai berunding. Baka ni chara iya? Macha Jaku Petara, nguji berunding baka Petara, lalu udah nya ngereja utai ti patut kena ngelantangka ati Jehovah.—1 Kor. 2:14-16.

7. Nitihka Epesus 4:31, 32, nama agi patut dikereja kitai lalu nama kebuah tu ulih nyadi siti cabaran?

⁷ Bacha Epesus 4:31, 32. Kelimpah ari ngubah chara kitai berunding, kitai mega patut “ngerasukka pendiau ti baru.” (Eps. 4:24) Kitai patut bebendar ngereja tu. Ari semua utai ke patut diubah kitai, kitai patut bebendar muai pendiau ti enda manah baka pemangah, pengeringat, sereta pemenchi. Nama kebuah tu ulih nyadi siti cabaran? Laban sekeda pendiau ti enda manah amat tusah deka diubah. Ambika chunto, Bup Kudus madahka bisi sekeda orang “jampat lengkar” tauka “jampat ringat.” (J-lam. 29:22) Sekeda orang ke bisi pendiau ti enda manah ke baka tu mega patut terus bebendar ngaga ubah, taja pan sida udah dibaptisa. Tu meh utai ti nyadi ba pengalaman ke nangkanka tu.

8-9. Baka ni pengalaman Stephen nunjukka kebuah kitai patut terus muai pendiau ti enda manah?

⁸ Siku menyadi lelaki ke benama Stephen bisi penanggul deka ngawal pemangah iya. Ku iya: “Pengudah dibaptisa aku agi patut nagang pemangah aku. Bisi sekali, lebuh aku nginjil, radio kereta aku dichuri. Aku begagaika penchuri nya, lalu lebuh aku semak iya penchuri nya ninggalka radio nya lalu ngerarika diri. Lebuh aku madahka cherita nya ngagai bala menyadi Kristian, siku tuai gempuru nanya aku, ‘Stephen, enti nuan ulih nangkap penchuri nya, nama deka digaga nuan?’ Tanya nya ngasuh aku berunding, lalu meransang aku bebendar deka bebaik enggau orang.” b

⁹ Ari pengalaman Stephen, kitai nemu pendiau ti enda manah ulih datai enggau enda dijangka taja pan kitai ngumbai diri udah muai pendiau nya. Enti nya nyadi ba nuan, anang asa ati lalu ngumbai diri udah gagal nyadi orang Kristian ti manah. Indah rasul Paul mega ngaku: “Lebuh aku ingin deka ngereja utai ti manah, pengingin deka ngereja utai ti jai bisi ba dalam aku.” (Rom. 7:21-23) Semua orang Kristian ti enda sempurna bisi sekeda pendiau ti enda manah ke bisi maya iya datai baru baka uras ke ngamahka rumah. Kitai patut bebendar muai uras nya. Baka ni kitai ulih ngereja nya?

10. Baka ni kitai ulih ngelaban pendiau ti enda manah? (1 John 5:14, 15)

¹⁰ Besampi ngagai Jehovah pasal pendiau ti enda manah ke tusah deka diubah nuan, lalu andal meh Iya deka ninga sereta nulung nuan. (Bacha 1 John 5:14, 15.) Taja pan Jehovah enda ngereja pengawa ajih kena muai pendiau ti enda manah nya, tang Iya deka meri nuan pengering ngambika nuan enda ngayanka pendiau nya. (1 Pet. 5:10) Pia mega, ba maya ti sama, kereja meh utai sejalai enggau sampi nuan. Anang ngereja utai ke ngasuh pendiau ti enda manah nya pulai baru. Ambika chunto, bejimat enggau movie sereta program TV ke dipeda, tauka cherita ke dibacha ti nyungkak pendiau ti enda manah ke deka dibuai nuan. Lalu anang meh nejuka runding nuan alah laban pengingin ti enda manah.—Plp. 4:8; Kol. 3:2.

11. Nama ulih dikereja kitai kena terus ngerasukka pendiau ti baru?

 ¹¹ Taja pan nuan udah muai pendiau ti lama, tang nuan patut nentuka diri benung ngerasukka pendiau ti baru. Nya amat penting. Baka ni nuan ulih ngereja nya? Tetapka juluk ati kena neladan Jehovah lebuh nuan belajar pasal sifat Iya. (Eps. 5:1, 2) Ambika chunto, lebuh nuan macha cherita ba Bup Kudus ke nunjukka sifat Jehovah ti deka ngampun, tanya diri empu, ‘Kati aku ngampunka orang bukai?’ Lebuh nuan macha pasal pengasih Jehovah ngagai sida ke seranta, tanya diri empu, ‘Kati aku bisi ngayanka pengibuh ti sama ngagai bala menyadi ke begunaka bantu? Kati aku nunjukka nya nengah ulah aku?’ Terus meh ngubah runding nuan enggau ngerasukka pendiau ti baru, lalu sabar enggau diri empu seraya nuan ngereja nya.

12. Baka ni Stephen ngasaika kuasa Bup Kudus ti ulih ngubah pengidup?

¹² Stephen ke dipadah tadi, ngasaika iya ulih belubah-lubah ngerasukka pendiau ti baru. Ku iya: “Kenyau ari maya aku dibaptisa, bisi sekeda utai ti nyadi ke ulih ngasuh aku ringat. Enti orang bukai nguji ngasuh aku ringat, aku deka mupuk ari endur nya tauka mutarka utai ti nyadi nya enggau chara bukai. Mayuh orang, nyengkaum bini aku, muji aku laban udah mutarka penanggul nya enggau manah. Aku tekenyit meda ubah tu! Aku pechaya utai tu nyadi ukai ketegal aku empu. Tang, laban Bup Kudus endang bisi kuasa ngubah pengidup.”

13. Nama ulih nulung kitai ngereja utai ti betul? (Galatia 5:16)

¹³ Bacha Galatia 5:16. Jehovah udah enggau gerah jari meri kitai kuasa kudus Iya kena nulung kitai mujur ngelaban pengingin ti deka ngereja utai ti salah. Lebuh kitai belajarka Jaku Petara, kitai nejuka kuasa kudus Petara ngubah runding kitai. Kitai mega bulih kuasa kudus lebuh datai ba gempuru. Ba gempuru Kristian, kitai ulih begulai enggau bala menyadi ti sama baka kitai. Sida mega bebendar nguji ngereja utai ti betul. Nya amat meransang. (Heb. 10:24, 25; 13:7) Lalu lebuh kitai bebendar besampi ngagai Jehovah, sereta minta Iya nulung kitai mutarka sesiti pengelemi, Iya deka meri kitai kuasa kudus kena ngeringka pengeran kitai ti deka terus ngelaban pengingin ti enda manah nya. Amat, utai tu enda ngasuh pengingin deka ngereja utai ti salah lenyau tekala nya, tang tu deka nulung kitai ngelaban pengingin ti salah nya. Baka ke dipadah ba Galatia 5:16, sida ke nitihka iring kuasa kudus “tentu enggai nitihka pengingin ti bedosa.”

14. Nama kebuah penting terus ngemansangka pengingin ti deka ngereja utai ti betul?

¹⁴ Lebuh kitai udah berengkah ngereja utai ti nulung kitai ngembuan kaul ti manah enggau Jehovah, kitai patut nentuka diri terus ngereja utai nya sereta terus ngemansangka pengingin ti deka ngereja utai ti betul. Nama kebuah? Laban siku ari bala munsuh kitai enda kala ngetu belaban enggau kitai. Munsuh nya penguji ke ngasuh kitai bisi pengingin ke deka ngereja utai ti salah. Indah pengudah dibaptisa, kitai engka bisi pengingin deka ngereja utai ti patut diseliahka kitai, baka bejudi, udu ngirup, tauka meda pornografi. (Eps. 5:3, 4) Siku menyadi Kristian lelaki ti biak ngaku: “Siti ari utai ti pemadu tusah ke patut diputarka aku iya nya pengingin homoseksual. Aku ngumbai pengingin nya deka lenyau, tang kekadang pengingin nya agi datai ngachau aku.” Nama ulih nulung nuan enti  sesiti pengingin ti salah nya balat ngachau nuan?

15. Pengingin ti salah nya “biasa ditapi orang.” Nama kebuah nemu tu ulih meransang kitai? (Peda gambar.)

¹⁵ Kingatka meh, lebuh nuan bebendar deka ngawal sesiti pengingin ti salah ke balat ngachau nuan, nuan enda kediri. Bup Kudus madahka: “Penguji ke ditapi kita kebendar nya penguji ke biasa ditapi orang.” (1 Kor. 10:13a) Utai ke ditulis nya dituju ngagai semua orang Kristian ke diau ba Korint, enda ngira sida nya lelaki tauka indu. Sekeda ari sida nya suba orang ke butang, orang ke ngereja pengawa homoseksual sereta orang ke pemabuk. (1 Kor. 6:9-11) Ba runding nuan, kati pengudah sida dibaptisa, sida nadai pengingin ti salah ke patut diputarka? Tentu enda. Amat, sida nya orang Kristian ke dipilih ke serega tang sida agi mensia ti enda sempurna. Sida mega tentu patut bebendar belaban enggau pengingin ti deka ngereja utai ti salah. Nya amat meransang kitai. Nama kebuah? Laban nya nunjukka bisi orang udah mujur ngelaban pengingin ti salah ke benung dilaban nuan. Amat, nuan ulih mengkang ngembuan pengarap ti tegap laban nuan nemu “semua bala menyadi kitai ba serata dunya benung napi pemerinsa ti sama.”—1 Pet. 5:9.

16. Nama utai ti bahaya ke patut diseliahka kitai, lalu nama kebuah?

¹⁶ Anang ngumbai nadai orang ulih meretika penanggul ke benung ditapi nuan. Nya amat bahaya. Enti nuan ngembuan runding ti baka nya, nya ulih ngujungka nuan ngumbai situasi nuan enda ulih diputarka agi lalu nuan mega engka ngumbai diri nadai daya agi kena ngelaban pengingin ti salah nya. Tang Bup Kudus madahka utai ti bebida. Iya madah: “Petara ke tetap ati enda nejuka kita napi penguji ke enda ulih ditatka kita. Lebuh diuji, Iya deka meri kita jalai pansut, ngambika kita tan napi penguji nya.” (1 Kor. 10:13b) Nya alai,  taja pan sesiti pengingin ti salah nya balat ngachau nuan, tang nuan agi ulih mengkang tetap ati ngagai Jehovah. Enggau bantu ari Jehovah, kitai ulih nyeliahka diri ari ngereja utai ti salah.

17. Taja pan kitai engka enda ulih nagang diri ari ngembuan pengingin ti salah, tang nama utai ulih dikawal kitai?

¹⁷ Seruran ingatka tu: Ketegal kitai enda sempurna, kitai enda ulih nyeliah ari ngembuan pengingin ti salah. Tang lebuh pengingin ti salah tu datai ba runding kitai, laban meh iya tekala nya baka ke digaga Josep ke jejampat ngerarika diri ari bini Potipar. (P-kal. 39:12) Anang ngereja pengingin ti salah nya!

18-19. Nama tanya ke ulih ditanya diri empu seraya kitai bebendar nguji ngubah runding kitai?

¹⁸ Kena ngubah runding kitai reti iya kitai patut terus nentuka runding sereta ulah kitai ngelantangka ati Jehovah. Nya alai, kitai patut seruran meresa diri empu lalu nanya: ‘Kati ulah aku nunjukka aku nemu aku benung idup ba Hari ti Penudi? Kati aku benung ngaga pemansang enggau ngerasukka pendiau ti baru? Kati aku nejuka kuasa kudus Jehovah ngiring pengidup aku ngambika aku ulih ngelaban pengingin ti deka ngereja utai ti salah?’

¹⁹ Lebuh nuan meresa diri empu, anang ngumbai diri deka nyadi sempurna tang gaga ati meh enggau pemansang ti udah dikereja nuan. Enti nuan bisi beratika utai ti patut dikemansangka nuan, anang asa ati. Tang, titihka jaku lalau ba Pilipi 3:16: “Enda ngira naka ni pemansang kitai, aram meh kitai terus mansang ngena chara ti sama tu.” Lebuh nuan ngereja nya, andal meh Jehovah deka merekatka usaha nuan ti bebendar deka ngubah runding nuan.