1-2. Emhin nela ọkhẹke nin mhan wo ha lu mhan ha mianmẹn fo? Gbotọle fanọn an.

 UWẸ be gbo uwa nọnsẹ a ẹghe rebhe? Asabọmiẹn ọkuẹsẹ uwẹ hẹ emhin nabhi ọne uwa, uwẹ da wo manman gbo ọle a nọnsẹn. Ọkpakinọn, be ha sunu sade uwẹ bha yẹ ha gbo ọle a? Ọne uwa ki wo gbitọn an. Ọkhẹke nin uwẹ ha gbo uwa nọnsẹ a ẹghe rebhe beji ọ ha da wo ha mhọn-ose.

² Iriọ yẹ nọn rẹji mhan. Ọkhẹke nin mhan wo ha dia uwedẹ nin mhan rẹ ria eria, bi uwedẹ nin mhan rẹ lu emhin. Bhi ọsi ẹmhọanta, ọkuẹsẹ mhan mianmẹn, mhan da dọnmhegbe rẹ fi emhin eso denọ bhi iẹnlẹn nọnsẹmhan, beji mhan ha da sabọ “kpe egbe mhan khia bhi emhin rebhe ne re itọn ọbhi efun bi oriọn.” (2 Cor. 7:1) Sokpan bhi ejayenan nian, ọkhẹke nin mhan re obọ rẹkhan ibhude nọnsi Pọl rẹ “ha kiẹn ọria ọgbọn.” (Eph. 4:23) Bezẹle nọn da khẹke nin mhan wo dọnmhegbe ha lu iriọ? Ranmhude uwedẹ nin ọne agbọn nan rẹ lu emhin dẹ sabọ re ẹjẹje re imhan miẹn ghe, mhan bha yẹ kiẹn eria ne khiale bhi ẹlo nọnsi Jehova. Nin mhan rẹ sabọ rẹban emhin ne sẹ inian, yẹ wo ha lu emhin ne ti Jehova bhọ, ọkhẹke nin mhan ha fẹghe ẹghe rebhe, uwedẹ nin mhan rẹ ria eria, uwedẹ nin mhan rẹ lu emhin, bi emhin nin egbe mhan guanọ.

3. Be a re ọle ta nin ọria rẹ “fi ọkhọle denọ?” (Romans 12:2)

³ Be ọkhẹke nin mhan lu nin mhan rẹ fi ọkhọle nọnsẹmhan denọ, ọnin hi, nin mhan rẹ fi uwedẹ nin mhan rẹ ria eria denọ?  (Tie Romans 12:2.) Ukpọta Grik nan zedu ọle diọbhi “fi ọkhọle denọ,” dẹ yẹ sabọ mundia nin, “nin ọria rẹ hẹnhẹn ọkhọle nọnsọle oi.” Bhiriọ, nin mhan rẹ gheghe lu emhin esili eso bha sẹ. Ọkhẹke nin mhan fẹ unan ọria nin mhan gene khin ghe, yẹ fi eji mhan ida lu nọnsẹn denọ beji mhan ha da sabọ manman ha re obọ rẹkhan uhi nesi Jehova. Ọ iyi osukpa mhan ha rẹ lu ọnan. Sokpan, ọkhẹke nin mhan wo ha lu ọle ẹghe rebhe.

4. Be imhan ha lu beji a ha da miẹn ghe uwedẹ nin ọne agbọn nan rẹ lu emhin bha rẹso iria-eria nọnsẹmhan?

⁴ Ahamiẹn mhan kiẹn eria ne gbale, mhan ki sabọ ha lu emhin rebhe ne ti Jehova bhọ ẹghe rebhe. Ọkuẹsẹ ọne ẹghe nin, ọkhẹke nin mhan wo ha dọnmhegbe rẹ ha lu emhin ne ti Jehova bhọ. Bhi Romans 12:2, Pọl da yọle ghe ọkhẹke nin mhan fi ọkhọle nọnsẹmhan denọ beji mhan ha da sabọ lẹn emhin nin Osẹnobulua ho nin mhan lu. Nin mhan rẹ ji uwedẹ nin ọne agbọn nan rẹ lu emhin ha rẹso mhan, ọkhẹke nin mhan ka fẹ egbe mhan ghe, beji mhan ha da lẹn si mhan be ha ji uwedẹ nin Osẹnobulua rẹ ria eria ha rẹso emhanmhan nesẹmhan, bi emhin nin mhan zẹ rẹ lu, la si uwedẹ nin ọne agbọn nan rẹ ria eria be ha rẹso mhan.

5. Be imhan ha rẹ sabọ lẹn si mhan muegbe khẹ ukpẹdẹ nọnsi Jehova? (Fẹ ifoto ghe.)

⁵ Bhi ọsi ijiẹmhin, Jehova guanọ nin mhan “mun ọkhọle ọbhi ẹghe nin ukpẹdẹ [nọnsọle] ha rẹ vae.” (2 Pet. 3:12) Nọọn egbe ẹ: ‘Uwedẹ nin mẹn rẹ nyẹnlẹn be rẹman mẹn lẹn sẹbhọ ghe, ọne agbọn nan dẹ kẹ kpẹn? Emhanmhan nesẹmhẹn nin mẹn rẹ yo yunivasiti, la unan iwẹnna nin mẹn ha lu be rẹman ghe nin mẹn rẹ ga Jehova hi emhin nọn lu uhọnmhọn emhin nẹ bhi iẹnlẹn nọnsẹmhẹn? Mẹn be rẹọbhọ ghe Jehova dẹ ne emhin nin mẹn bi azagba-uwa nọnsẹmhẹn ha rẹ ha gbẹloghe egbe nin mhan? La, ẹghe rebhe mẹn be rẹ kpokpo egbe ba emhin nin mhan ha rẹ ha gbẹloghe egbe?’ Ria ẹmhọn ebi ọ ha rẹ re Jehova ha ghọnghọn yẹ sade ọle daghe mhan  wo ha dọnmhegbe rẹ ha lu iho nọnsọle ẹghe rebhe.—Matt. 6:25-27, 33; Phil. 4:12, 13.

6. Be ọkhẹke nin mhan wo ha lu?

⁶ Ọkhẹke nin mhan ha fẹ uwedẹ nin mhan rẹ ria eria ghe ẹghe rebhe, yẹ fidenọ bhi eji mhan ida lu nọnsẹn. Pọl da taman ibhokhan Kọrint yọle: “Bha [ha] fẹ egbe bha ghe si bha sẹyẹ khian bhi uwedẹ urẹọbhọ; Bha ha rẹman unan ọria nin bha khin.” (2 Cor. 13:5) Nin mhan da ha khian bhi uwedẹ urẹọbhọ rẹman ghe, ọkhẹke nin mhan lu gbera nin mhan rẹ gheghe ha vae bhi ikolo oga, yẹ dagbare bhi inẹbho ẹghe-ẹghe. Ọ yẹ rẹso emhin nin mhan ria ẹmhọn ọlẹn, emhin ne egbe mhan guanọ, bi emhin ne rẹ mhan lu emhin nin mhan lu. Bhiriọ, ọkhẹke nin mhan ha fi ọkhọle nọnsẹmhan denọ beji mhan ha rẹ ha tie Ọta nọnsi Osẹnobulua, ha ria eria bhi uwedẹ nin ọle rẹ ria eria, yẹ dọnmhegbe ha lu emhin rebhe nin mhan ha sabọ lu rẹ ha lu emhin ne ti ọle bhọ.—1 Cor. 2:14-16.

7. Beji Ephesians 4:31, 32 rẹman, emhin ọbhebhe nela ọkhẹke nin mhan lu? Bezẹle nin ọnan ha da sabọ ha nọghọ?

⁷ Tie Ephesians 4:31, 32. Ọ iyi nin mhan rẹ fi uwedẹ nin mhan rẹ ria eria denọ ọkpa ọkhẹke nin mhan lu. Ọ yẹ khẹke nin mhan “mun akpa ọsọgbọn yọ.” (Eph. 4:24) Ọkhẹke nin mhan wẹnna kaka beji mhan ha da sabọ lu ọnan. Rẹ deba emhin ne khẹke nin mhan rẹban, ọkhẹke nin mhan wẹnna kaka rẹ rẹban ene ikpẹ nan ne imhẹn bọsi, ẹkẹ-uriamhin, ohu, bi ẹkẹkhọmhin. Bezẹle nin ọnan ha da sabọ ha nọghọ mhan rẹ lu? Ranmhude ọ dẹ wo manman nọghọ nan rẹ zẹ ikpẹ ne imhẹn eso obọ. Bhi ọsi ijiẹmhin, Baibo yọle ghe ẹbho eso kẹ wo miẹn ohu, yẹ kẹ wo khọẹkẹ. (Prov. 29:22) Iriọ a ha da miẹn ọria nọn mhọn ene ikpẹ nan ne imhẹn dẹ wo ha dọnmhegbe nin ọle rẹ fi ele denọ, a ha bhọ rẹ miẹn ọle mianmẹn fo. Ọnan hi ebi isẹlobhemhin nin mhan ha zilo nyan nian ha rẹman.

8-9. Be isẹlobhemhin ọsi Stephen rẹ rẹman yẹ ebezẹle nọn da khẹke nin mhan wo ha rẹban emhin ne imhẹn nin mhan rẹ ka ha lu?

⁸ Ọ da wo ha nọghọ obhio mhan nin okpea natiọle Stephen rẹ rẹban ohu. Ọle da yọle: “Arẹmiẹn mẹn mianmẹn fo, ọ da khẹke nin mẹn sẹyẹ wo ha dọnmhegbe rẹ rẹban ohu nọn re mẹn. Bhi ọsi ijiẹmhin, ẹghe ọkpa nin mhan rẹ ha tẹmhọn Osẹnobulua rẹ na bhi uwa rẹ sibhi uwa, mẹn da khu rẹkhan oyi ọkpa nọn do iredio re bhi ẹkẹ imoto nọnsẹmhẹn. Ẹghe nin mẹn ki rẹ ha sikẹ ọle, ọle da mun ọne iredio fiọbhi otọ nẹgbe. Ẹghe nin mẹn ki rẹ taman ibhio mhan nekẹle nin mhan ko dagbare ebi mẹn rẹ miẹn ọne oyi iredio nọnsẹmhẹn yẹ, ọwanlẹn ọkpa nọn ribhi usun nọnsẹmhan da nọọn mẹn yọle, ‘Stephen, be bhọ uwẹ ha rẹ lu sade uwẹ mun ọlẹn?’ Ọne inọnta nan da re imẹn ria eria, yẹ re ọne ọhubhudu nin mẹn rẹ dọnmhegbe ha yi ọria ọfure.” b

⁹ Isẹlobhemhin ọsi Stephen rẹman ghe, ikpẹ ne imhẹn nin mhan ka rẹ guẹ dẹ yẹ sabọ zegbere, a ha bhọ rẹ miẹn mhan riale mhan rẹban ele fo. Ahamiẹn ọnan sunu ji uwẹ, hẹi ji egbe lọ uwẹ la ha riale ghe uwẹ iyi Kristiẹn esili. Pọl nin odibo bhọ da yọle: “Ẹghe nin mẹn ha rẹ ha guanọ nin mẹn lu emhin nọn diale, emhin ebe ki vae dọ ne mẹn dia.” (Rom. 7:21-23) Ranmhude ọ bha gba nin mhan rebhe, ikpẹ ne imhẹn nin mhan zẹ ele obọ dẹ kie wo ha zegbere beji iku bi eyaya rẹ zegbere bhi uwa nọnsẹmhan. Bhiriọ, ọkhẹke nin mhan wo ha wẹnna kaka beji mhan ha da ha yi eria ne khiale. Be imhan ha rẹ sabọ lu iriọ yẹ?

10. Be imhan ha rẹ sabọ rẹban ikpẹ ne imhẹn yẹ? (1 John 5:14, 15)

¹⁰ Taman Jehova bhi erọnmhọn ẹmhọn ikpẹ ne imhẹn nin uwẹ dọnmhegbe nin uwẹ rẹ rẹban, uwẹ ha yẹ rẹọbhọ ghe ọle dẹ họn erọnmhọn nọnsẹ yẹ rẹkpa uwẹ. (Tie 1 John 5:14, 15.) Arẹmiẹn Jehova ida wo re uwedẹ ọhan-ilo rẹ ne ene  ikpẹ ne imhẹn nin uwẹ mhọnlẹn kie, ọle dẹ sabọ rẹkpa uwẹ beji a da miẹn uwẹ bha dọ ha re ele man. (1 Pet. 5:10) Sokpan, dọnmhegbe rẹ re obọ rẹkhan erọnmhọn nesẹ, beji uwẹ ha rẹ rẹban emhin ne ha re uwẹ kie dọ ha re ene ikpẹ ne imhẹn man. Bhi ọsi ijiẹmhin, dọnmhegbe rẹ rẹban ifinmu, la emhin eso nan rẹman bhi tẹlẹvisiọn, bi ebe ne re ọle diabe ghe, emhin nọn mhẹn nọn nin mhan rẹ ha mhọn ikpẹ ne imhẹn nin uwẹ a dọnmhegbe rẹ rẹban. Sẹyẹ, hẹi ha ria emhin ne imhẹn bhi ọkhọle.—Phil. 4:8; Col. 3:2.

11. Be imhan ha sabọ lu beji mhan ha da sabọ ha mhọn ikpẹ esili?

¹¹ Arẹmiẹn uwẹ rẹban ikpẹ ne imhẹn nin uwẹ ka rẹ ha mhọn khẹ, ọ yẹ khẹke nin uwẹ dọnmhegbe ha mhọn ikpẹ ne mhẹn. Be uwẹ ha rẹ sabọ lu ọnan yẹ? Dọnmhegbe nin uwẹ rẹ re egbe khọkhọ Jehova beji uwẹ ha rẹ ha luẹ ikpẹ nesọle. (Eph. 5:1, 2) Bhi ọsi ijiẹmhin, ahamiẹn uwẹ tie ijeso bhi Baibo nọn tẹmhọn uwedẹ nin Jehova rẹ rẹhunmhan mhan, nọọn egbe ẹ, ‘Mẹn be rẹhunmhan ẹbho?’ Ahamiẹn uwẹ tie ijeso rẹji ebi Jehova rẹ re ẹkẹ-ẹjẹjẹ man ene ribhi ọnọghọ yẹ, nọọn egbe ẹ, ‘Mẹn be yẹ re inian re ẹkẹ-ẹjẹjẹ man ibhio mhan ne guanọ urẹkpa, yẹ lu emhin rẹ rẹkpa ele?’ Wo ha fi ọkhọle nọnsẹ denọ beji uwẹ ha rẹ dọnmhegbe ha mhọn ikpẹ ne mhẹn, yẹ ha mhọn iziẹngbe beji uwẹ ha rẹ ha lu iriọ.

12. Be Baibo rẹ rẹkpa Stephen yẹ rẹ fi emhin denọ bhi iẹnlẹn nọnsọle?

¹² Stephen nin mhan ka tẹmhọnlẹn da kere ghe, ọle da sabọ fẹkẹ dọ ha mhọn ikpẹ ne mhẹn. Ọle da yọle: “Rẹ na ẹghe nin mẹn rẹ mianmẹn, mẹn da wo kuẹlo da idia kẹkẹ nin ẹkẹ ha da sabọ khọ mẹn. Mẹn luẹ rẹ ha sibhi eji ẹbho ye re ne dọnmhegbe rẹ re ẹkẹ khọ mẹn, la lu emhin ebhebhe beji a ha da miẹn ghe ẹkẹ bha khọ mẹn. Ẹbho ne bunbun rẹ deba okhuo mẹn wo gẹn mẹn bhi uwedẹ nin mẹn rẹ lu emhin bhi ene idia nan. Ọnan bhọ yẹ han mẹn ilo! Ọ iyi ahu mẹn, mẹn rẹ tobọmhẹn fi emhin denọ bhi iẹnlẹn nọnsẹmhẹn. Sokpan, mẹn rẹọbhọ ghe ene emhin nan ne sunu rẹman Baibo dẹ sabọ fi iẹnlẹn ọsi eria denọ.”

13. Be ha rẹkpa mhan ha ria ẹmhọn emhin ne mhẹn? (Galatians 5:16)

¹³ Tie Galatians 5:16. Jehova re ẹlinmhin nọn khiale nọnsọle rẹ rẹkpa mhan beji mhan ha da sabọ ha lu emhin ne mhẹn. Mhan ji ẹlinmhin nọn khiale nọnsi Osẹnobulua ha dia mhan sade mhan tie Baibo. Jehova yẹ re ẹlinmhin nọn khiale nọnsọle nin mhan sade mhan yo ikolo oga nesẹmhan. Bhi ikolo oga nesẹmhan, mhan dẹ sabọ deba ibhio mhan gbe ẹghe ne yẹ wo ha dọnmhegbe rẹ ha lu emhin ne mhẹn bii mhan. Ọnan wo re izebhudu nin mhan. (Heb. 10:24, 25; 13:7) Sẹyẹ, ahamiẹn mhan bhii Jehova bhi erọnmhọn nin ọle rẹkpa mhan rẹ khọn ijeso nin mhan da wẹghẹ, ọle ki re ẹlinmhin nọn khiale nọnsọle nin mhan rẹ sabọ ha khọn ele. Arẹmiẹn ene emhin nan ida wo lu ọle nin iria-eria ne imhẹn hẹi nabhi ọkhọle nọnsẹmhan, ele dẹ rẹkpa mhan beji a ha da miẹn ghe mhan bha dọ ha lu ene emhin ne imhẹn nin mhan ria. Beji Galatians 5:16 tale, ẹbho ne ji ẹlinmhin nọn khiale ha dia ele “ida lu ilọnmhọn efun egbe soso.”

14. Bezẹle nọn da khẹke nin mhan wo ha ria ẹmhọn emhin esili?

¹⁴ Ahamiẹn mhan munhẹn ha lu emhin ne ha rẹ mhan deba Jehova ha mhọn ikolu nọn mhẹn, ọkhẹke nin mhan wo ha lu ene emhin, yẹ wo ha ria ẹmhọn emhin esili. Bezẹle? Ranmhude mhan mhọn oghian ọkpa nọn ne mhan dan. Ọne oghian nan hi, ọne ọkhọle nin mhan rẹ lu emhin ne imhẹn. Mhan ha bhọ rẹ mianmẹn fo, ọ sabọ rẹ dọ ha yẹẹ mhan rẹ ha lu emhin ne khẹke nin mhan rẹban, emhin bọsi nan rẹ ha fi ono, nan rẹ ha danyọn gbe egbe, la ha ghe ifoto ọsi ẹbho ne banọn an. (Eph. 5:3, 4) Obhio mhan nin usẹn okpea da yọle: “Emhin ọkpa nọn manman nọghọ mẹn rẹ rẹban hi, nin mẹn rẹ ne okpea  bii mẹn ha nowẹ. Mẹn da riale a ha ki zẹbue, ene iria-eria nan dẹ sibhi ọkhọle nọnsẹmhẹn re. Sokpan, ene iria-eria nan yẹ vae bhi ọkhọle nọnsẹmhẹn.” Be ha rẹkpa uwẹ ahamiẹn emhin nọn imhẹn ribhọ nin egbe nọnsi uwẹ wo guanọ?

15. Bezẹle nọn ha da re ikoudure nin uwẹ nin uwẹ rẹ lẹn ghe ọ iyi uwẹ ọkpa dọnmhegbe ha khọn iria-eria ne imhẹn? (Fẹ ifoto ghe.)

¹⁵ Ahamiẹn uwẹ dọnmhegbe ha khọn iria-eria ne imhẹn, yere ghe ọ iyi uwẹ ọkpa ọnan sẹ sunu je. Baibo yọle: “A bha miẹn edọnmhẹn nin bha ha miẹn bhi egbe nin ẹbho bha sẹ ka miẹn khẹ.” (1 Cor. 10:13a) Baibo ọbhebhe da re inian zedu ọne ulọnlẹn nan yọle: “Edọnmhẹn soso iribhọ nin uwẹ sẹ miẹn nin eria bha sẹ miẹn.” Ikristiẹn ne ha nyẹnlẹn bhi Kọrint a gbẹn ọnan je. Eso bhi ẹwẹ ele ka ha gboghẹ, ikpea eso bhi ẹwẹ ele ka ha ne ikpea nowẹ. Sẹyẹ, eso da ha danyọn gbe egbe. (1 Cor. 6:9-11) Uwẹ be riale beji ele mianmẹn fo, iria-eria ne imhẹn soso bha yẹ na ele bhi ọkhọle? Ọ ida ha yi iriọ. Ẹmhọanta nọn ghe enanzẹle ele khin. Ọkpakinọn, eria ne bha gba fo ele sẹyẹ khin. Edandan iribhọ ghe ele dẹ wo ha dọnmhegbe rẹ ha khọn iria-eria ne imhẹn rẹ na ẹghe rẹ sẹ ẹghe. Ọkhẹke nin ọnan re ikoudure nin mhan. Bezẹle? Ranmhude ọ rẹman ghe, emhin nọn imhẹn nọn hi ki rẹ khin nin uwẹ dọnmhegbe ha ne dan, ọria ọbhebhe ka sabọ nanlẹn dan. Gene-gene, uwẹ dẹ sabọ ‘mundia nọnsẹn bhi urẹọbhọ nọnsẹ, ranmhude uwẹ lẹnmhin ghe, inian ibhio uwẹ rebhe ne ribhi ọne agbọn nan yẹ rẹ ha le ọne oya nan.’—1 Pet. 5:9.

16. Be bhọ ọkhẹke nin mhan hẹi ha ria ẹmhọn ọlẹn? Bezẹle?

¹⁶ Hẹi ha riale ghe ọria soso ida sabọ lẹn ọnọghọ nin uwẹ kuẹlo da. Ahamiẹn mhan re inian ha ria eria, mhan sabọ rẹ dọ ha mhọn ọlẹn bhi ọkhọle ghe ọsi mhan wo fo, ghe mhan iyẹ mhọn ọne ahu nin mhan rẹ sabọ khọn emhin ne imhẹn ne na mhan bhi ọkhọle. Ọkpakinọn, Baibo ji mhan lẹn ghe, “Osẹnobulua ihiẹ ọria, ọle ida ji edọnmhẹn nin bha ha miẹn kaka sẹbhọ ghe bha ida sabọ ziẹngbe ọle. Ọle dẹ yẹ tuje uwedẹ a nin bha rẹ sabọ ziẹngbe ọne edọnmhẹn.” (1 Cor.  10:13b) Bhiriọ, aharẹmiẹn iria-eria ne bha gba ribhọ nin mhan wo ha ne dan, mhan dẹ sabọ khọn ele miotọ. Bhi ahu nọnsi Jehova, mhan dẹ sabọ rẹban emhin ne imhẹn.

17. Arẹmiẹn mhan ida sabọ lu ọle nin emhin ne imhẹn hẹi ha na mhan bhi ọkhọle, be bhọ mhan mhọn ọne ahu rẹ lu?

¹⁷ Wo ha ye ọnan re: Ranmhude ọ bha gba nin mhan fo, mhan ida sabọ lu ọle nin iria-eria ne imhẹn hẹi na mhan bhi ọkhọle. Ọkpakinọn, ahamiẹn emhin ne imhẹn na mhan bhi ọkhọle, mhan dẹ sabọ re ẹjẹje rẹban ele, beji Josẹf lu nọn re ẹjẹje nẹ sibhi eji okhuo Pọtifa ye re. (Gen. 39:12) Ọ bha khẹke nin mhan lu rẹkhan emhin ne imhẹn nin mhan ria ẹmhọn ọlẹn!

18-19. Inọnta nela mhan ha sabọ nọọn egbe mhan le beji mhan rẹ ha dọnmhegbe rẹ ha fi ọkhọle nọnsẹmhan denọ?

¹⁸ Mhan luẹ ghe, nin mhan rẹ fi ọkhọle nọnsẹmhan denọ rẹman ghe, mhan ki ha dọnmhegbe beji a ha da miẹn emhin nin mhan ria, bi emhin nin mhan lu ki ha ti Jehova bhọ. Bhiriọ, ọkhẹke nin mhan ha fẹ emhin nin mhan lu ghe ẹghe rebhe, yẹ nọọn egbe mhan ene inọnta nan: ‘Emhin nin mẹn lu be rẹman ghe mẹn lẹn sẹbhọ ọne agbọn nan nin mhan da ha nyẹnlẹn dẹ kẹ kpẹn? Mẹn be ha lu re alo bhi akpa ọsọgbọn nin mẹn a mun yọ? Mẹn be ji ẹlinmhin nọn khiale nọnsi Osẹnobulua ha dia uwedẹ nin mẹn rẹ nyẹnlẹn, beji a ha da miẹn ghe mẹn ki sabọ rẹban emhin nin egbe nọnsẹmhẹn guanọ?’

¹⁹ Hẹi ha riale ghe ọ dẹ wo gba nin uwẹ bhi emhin rebhe nin uwẹ lu sade uwẹ fẹ ebi uwẹ lu ghe. Sokpan, ha ghọnghọn bhi uwedẹ nin uwẹ rẹ ha lu re alo. Hẹi ji egbe lọ uwẹ sade uwẹ daghe eji uwẹ ha da lu re alo. Sokpan, re obọ rẹkhan ibhude nọn ribhi Philippians 3:16 nọn yọle: “Ebi mhan hi ki rẹ lu re alo sẹ yẹ, bha wo ji mhan ha lu nọnsẹn beji mhan lu.” Uwẹ ha lu iriọ, uwẹ ki ha mhọnlẹn bhi ọkhọle ghe Jehova dẹ nan erọnmhọn nin uwẹ bhi uwedẹ nin uwẹ rẹ ha dọnmhegbe rẹ ha fi ọkhọle nọnsẹ denọ.