1-2. Afta wi get baptaiz, wa wi fi mek shuor se wi stil a du? Tel wi wa mek yu se so.

 WEN yu dis muuv iina wan ous yu nuo se yu afi kliin it gud gud bifuo yu liv iin de. Bot afta dat, supuoz yu jos jrap yu an an no bada kliin op di plies? Yu don nuo se it a-go get doti faas. So ef yu waahn yu ous fi luk gud an kliin yu nuo se yu afi kliin it aafn.

² Jos laik ou wi kyaahn tap kliin wi ous, wi afi mek shuor se wen it kom aan tu di sitn dem we wi tingk bout an di wiez dem we wi av, wi afi eva a mek shuor se wi a wok aad fi get rid a di doti wiez dem an di bad sitn dem we wi tingk bout. Bifuo wi did get baptaiz wi did wok aad fi chienj wi wiez dem so dat wi kyan “stie faar fram sin an kip wi badi an wi spirit kliin.” (2 Kor. 7:1) Bot nou wi afi mek shuor se wi a du wa di apasl Paal se wen im se ‘unu fi lorn ou fi kanchuol unu main fi tingk iina wan nyuu wie.’ (Ifii. 4:23) Wi fi aalwiez a lorn ou fi tingk iina wan nyuu wie kaaz it no aad fi wi staat fi tingk bout di naasi an doti sitn dem we di piipl dem iina da worl ya a du we Jeuova iet. Fi mek shuor se dat no apm an Jeuova api wid wa wi a du, wi afi eva a luk pan di sitn dem we wi a tingk bout, di wiez dem we wi av, an di sitn dem we wi waahn fi du.

3. Wa it miin fi ‘mek Gad chienj di wie ou [wi] a tingk’? (Ruoman 12:2)

³ Wen di Baibl se wi fi chienj di wie ou wi a tingk, wa it riili a aks wi fi du? (Riid Ruoman 12:2.) Di Griik wod we dem yuuz fi miin “chienj di wie ou unu tingk” riili a se wi fi du evriting we wi kyan du fi chienj di wie ou wi a tingk. So dat no miin tu se wi kyan dis du som gud sitn an a it dat, dat wuda komiin laik se wi a priti op wan doti ous. Insted-a dat, wi afi luk iina wiself an si uu wi riili bi an si ef notn de de we wi afi chienj so dat wi kyan liv di wie ou Jeuova waahn wi fi liv. An dis a sitn we wi no fi tap du.

4. Wa wi kyan du fi mek shuor se wi naa fala di sitn dem we di piipl dem iina di worl a du?

⁴ Wen wi porfek it a-go iiziya fi du di sitn dem we mek Jeuova api. Bot rait ya nou wi afi wok aad aad fi mek Jeuova api. Wen wi luk pan wa Paal se iina Ruoman 12:2, wi si se wi afi a chienj di wie ou wi a tingk ef wi fi riili nuo wa Gad waahn wi fi du. So wi kyaahn dis sidong an mek di piipl dem iina da worl ya tel wi ou fi liv wi laif. Wi afi luk pan wiself an si ef di wie ou wi a tingk bout tingz a di wie ou piipl tingk bout tingz ar di wie ou Jeuova tingk bout tingz.

5. Wen wi sidong an tingk bout se di worl suun don, wa a som a di kwestiyan dem we wi fi aks wiself? (Luk pan di picha.)

⁵ Tingk bout dis, Jeuova waahn wi fi luk faawod tu di taim wen im get rid a im enimi dem an im Kindom staat fi ruul uova di wol ort. (2 Pii. 3:12) Aks yuself: ‘Di wie ou mi a liv mi laif, it riili a shuo se mi nuo se da worl ya suun don? Wen mi a mek op mi main ef mi fi go a yuunivorsiti ar kalij ar di kain-a wok we mi fi du, mi a shuo se a Jeuova riili kom fos iina mi laif? Mi riili chos iina Jeuova se im a-go mek shuor se mi fambili av di sitn dem we wi niid fi liv,  ar mi aalwiez a wori wori op miself bout moni an dem ting de?’ It riili mek Jeuova api wen im si se wi a du evriting we wi kyan du fi du wa im waahn wi fi du.​—Mat. 6:25-27, 33; Fil. 4:12, 13.

6. Wa wi fi mek shuor se wi a gwaan du?

⁶ Wi afi a mek shuor se wi eva a luk pan di wie ou wi a tingk bout tingz so wi kyan tingk bout tingz di wie ou Jeuova waahn wi fi tingk bout tingz. Paal did tel di Kristiyan dem we liv a Korint se: “Luk an tes fi si ef unu riili a liv laik ou piipl we biliiv iina Gad sopuoz fi liv.” (2 Kor. 13:5) Fi “liv laik ou piipl we biliiv iina Gad sopuoz fi liv,” it no miin onggl fi go a miitn an fi go a fiil sorvis. Bot wa wi fi du a luk pan di sitn dem we wi a tingk bout an di sitn dem we wi waahn fi du an wa mek wi waahn fi du dem. So wa wi fi du a mek shuor se wi eva a riid Gad wod so wi kyan lorn ou fi tingk di wie ou im waahn wi fi tingk an den du di sitn dem we im se wi fi du so dat wi kyan liv di wie ou im waahn wi fi liv.​—1 Kor. 2:14-16.

7. Azkaadn tu Ifiijan 4:31, 32, wa els wi fi du an wa mek dat mait-a aad?

⁷ Riid Ifiijan 4:31, 32. Wi no fi jos chienj di wie ou wi a tingk, wi afi mek shuor se wi “lorn fi liv laik wan nyuu sumadi” tu. (Ifii. 4:24) So dat miin se wi afi a du tingz fi chienj op di wie ou wi tan. An wi fi a wok aad fi get rid a di doti wiez dem we wi av, laik wi fi wok aad fi no kyari beli fi wi wan aneda, an beks op beks op, an get mad wid wi wan aneda. Dis mait-a aad fi wi du kaaz it no iizi fi chienj wi doti wiez dem, laik di Baibl mek wi nuo se som piipl “kwik fi get beks” an “eva a get bringgl.” (Pr. 29:22) So iivn afta wi baptaiz wi afi stil wok aad aad fi get rid a nof a dem doti wiez ya. An wi a-go si dat wid wa did apm wid Stephen.

8-9. Ou wa did apm wid Stephen mek wi si se wi afi wok aad fi get rid a wi doti wiez dem?

⁸ Wan breda we niem Stephen did eva a get beks. Im se: “Iivn afta mi did baptaiz, mi did stil afi a gwaan wok aad fi no get bringgl aal di taim. Laik wan a di taim mi did de iina sorvis an wan man did tiif out di riediyo outa mi kyaar an mi ron im dong, an wen mi kech nier im, im jrap di riediyo an ron we. Wen mi go bak go tel di ada breda an sista dem wa mi du an ou mi did get bak mi riediyo, wan elda we did a wok wid wi aks mi, ‘So Stephen wa yu wuda weehn du ef yu did kech im?’ Wen im aks mi dat, it mek mi tingk bout tingz iina wan difrant wie, an it did push mi fi staat si ou mi kuda wok aada so mi no kwik fi get beks.” b

⁹ Wa did apm wid Stephen mek wi si se iivn wen wi tingk se wi gud nou an wi get rid a aal a wi doti wiez dem, aal av a sodn sitn kyan apm we shuo op dem doti wiez de. Wen dat apm no bada fiil bad. It no miin se yu a no wan gud Kristiyan. Iivn di apasl Paal did se: “Wen mi waahn fi du we rait, mi kyan onggl chuuz fi du wa wikid.” (Ruo. 7:21-23) Kaa non a wi no porfek wi afi wok aad fi get rid a wi doti wiez dem, kaa jos laka ou wan ous kyan get bak doti afta wi kliin it a siem so di doti wiez dem we wi av kyan kom bak. Ou wi kyan du dat?

10. Ou wi kyan wok aad fi get rid a wi doti wiez dem? (1 Jan 5:14, 15)

¹⁰ Prie tu Jeuova an aks im fi elp yu fi get rid a di doti wiez we yu a chrai fi get rid a, an yu kyan nuo fi shuor se im a-go ier yu an im a-go elp yu. (Riid 1 Jan 5:14, 15.) Jeuova naa go wok no mirikl fi yu get rid a yu doti wiez, bot im a-go gi yu di chrent  we yu niid so yu no du di bad sitn we yu mait-a waahn fi du. (1 Pii. 5:10) An wen yu a prie bout it, yu fi mek shuor se yu naa du notn we a-go mek it aada fi yu get rid a dem doti wiez de. So yu naa go a wach muuvi ar notn pan tv ar riid no buk we a big op di doti wiez dem we yu a chrai fi get rid a. An no bada spen yu taim a tingk bout tingz we naa mek Jeuova api.​—Fil. 4:8; Kol. 3:2.

11. Wa wi kyan du so dat wi kyan chienj wi wiez dem an bi wan nyuu sumadi?

¹¹ Iivn duo yu wok aad aad fi don we wid di bad wiez dem we yu yuus tu av, yu afi mek shuor se yu a wok aad fi chrai fi bi wan nyuu sumadi. Ou yu kyan du dat? Lorn bout di gud wiez dem we Jeuova av an si ou yu kyan du laik im. (Ifii. 5:1, 2) So laik wen yu riid sitn iina di Baibl we shuo ou Jeuova eva redi fi paadn piipl, yu kyan aks yuself, ‘Mi paadn ada piipl?’ An wen yu riid di Baibl an si ou Jeuova fiil it fi di wan dem we tingz aad fi dem, yu kyan aks yuself, ‘A siem so mi fiil it fi mi breda an sista dem wen tingz aad fi dem? Wa mi a du fi elp dem?’ So gwaan du yu bes fi mek Gad chienj di wie ou yu a tingk bout tingz so im kyan elp yu fi bi wan nyuu sumadi, bot memba fi tek taim wid yuself.

12. Ou di Baibl did chienj Stephen laif fi di beta?

¹² Stephen did si se likl bai likl im kuda get fi chienj im doti wiez dem. Im se: “Afta mi baptaiz, a nof taim mi go chuu som tingz we mi kuda did get beks bad bad bout. Bot mi lorn se bifuo mi get beks bad mi kyan jos waak we, ar mi kyan du ada tingz fi no mek tingz get wos. Mi waif an uol iip a ada piipl tel mi se dem did laik fi si ou mi a diil wid tingz ya nou. Bwai, mi naa tel yu no lai, aal mi fraitn fi si ou mi a diil wid tingz. Mi nuo fi shuor se a di Baibl elp mi fi chienj mi laif fi di beta.”

13. Wa a go elp wi fi waahn du di rait sitn dem? (Gyalieshan 5:16)

¹³ Riid Gyalieshan 5:16. Kaa Jeuova wel waahn wi fi du wa rait, im api fi yuuz im uoli spirit fi elp wi. Wen wi stodi Gad Wod an go a wi miitn dem, a so kom wi a-go get im spirit fi elp wi. Wen wi go a wi miitn dem, wi get fi de roun wi breda an sista dem, an jos laik wi, dem a wok aad fi du wa rait, an dat kyan elp wi fi tan op chrang. (Iib. 10:24, 25; 13:7) An wan neda wie ou Jeuova yuuz im spirit fi elp wi a wen wi prie tu im an beg im fi elp wi fi no du sitn we wi a chrai aad no fi du. Wen wi du aal a dem sitn ya, it no miin se wi a-go dis waahn tap fi du tingz we bad, bot wi a-go get di chrent so dat wi no du dem sitn de. An Gyalieshan 5:16 mek wi nuo se di wan dem we a aks Jeuova fi yuuz im uoli spirit fi elp dem “naa go gi iin tu sin an du di rang sitn dem we [dem] eva waahn fi du.”

14. Wa mek wi afi gwaan wok aad so wi eva waahn fi du wa rait?

¹⁴ Wen wi staat fi du tingz we a-go kip wi kluos tu Jeuova wi afi mek shuor se wi gwaan du dem an no tap. An wi fi gwaan wok aad so das wi aalwiez waahn fi du wa rait. Wi fi du dem sitn de kaa di bad sitn dem we wi eva waahn fi du komiin laka wan enimi we no sliip. Iivn afta wi baptaiz wi mait-a fain se wi stil waahn fi du tingz we wi nuo wi no fi du, laik wi mait-a waahn fi gambl, ar jringk tu moch lika, ar go wach bluu muuvi an dem ting de. (Ifii. 5:3, 4) Wan yong breda did se dis: “Wan a di aadis ting we mi afi diil wid a dat mi fain se mi laik man. Mi did tingk se dem fiilinz de we mi av wuda go we, bot bwai, mi stil a chogl  wid dem.” So wa kyan elp yu ef yu riili fain se yu a chogl fi no du sitn we yu nuo se rang iina Gad yai?

15. Wa mek it kyan elp wi fi fiil beta fi nuo se di bad sitn dem we wi a chogl wid “evribadi els a chogl wid dem tu”? (Luk pan di picha.)

¹⁵ Wen yu a fain it aad fi tap waahn fi du sitn we yu nuo se rang, memba se a no yu wan a chogl wid dem sitn de. Di Baibl tel wi se: “Di siem sin dem we unu a chogl wid, evribadi els a chogl wid dem tu.” (1 Kor. 10:13a) Wen Paal did rait dis im did a taak tu di man an uman dem we did a sorv Jeuova we did liv iina Korint. Som a dem did sliip wid piipl we dem neehn marid tu, som a dem a man we did sliip wid man an uman we did sliip wid uman, an som a dem did yuus tu jringk til dem jongk. (1 Kor. 6:9-11) Yu tingk se afta dem piipl ya did baptaiz dem wuda neva eva tingk bout fi waahn fi du som a dem sitn ya we dem yuus tu du? Notn kudn go so. Wi nuo se Gad did pik dem breda an sista de fi go a evn, bot dem did a stil sumadi laka wi, dem neehn porfek. So som a di taim, dem mos did fain it aad fi no waahn fi du di bad sitn dem tu. Ou dis kyan elp wi? It mek wi si se eniting we yu mait-a a chogl wid sumadi did chogl wid it tu an dem neehn gi iin. So yu kyan “tan op chrang . . . kaaz [yu] nuo se a no [yu] wan a go chuu dis, [yu] breda an sista dem we de aal uova di worl a go chuu di siem kain-a sofarieshan.”​—1 Pii. 5:9.

16. Wa wi fi chrai aad fi no du, an wa mek?

¹⁶ Yu no fi tingk se nobadi kyaahn riili andastan wa yu a go chuu. Wen yu tingk dem wie de, it a-go mek yu fiil laik se yu kyaahn du notn bout di sitn we yu a chogl wid an laik se yu afi gi iin tu di bad sitn we yu waahn fi du. Di Baibl mek wi nuo se notn no go so. It se: “Gad gud, im naa go mek yu fies no sin an no gi yu wan wie fi diil wid it​—im naa go gi yu muor dan yu kyan manij.” (1 Kor. 10:13b) So iivn wen wi wel waahn fi  du sitn we wi nuo se rang, Jeuova kyan elp wi fi no du it an wi nuo se wi kyan tan op chrang.

17. Aalduo som a di taim wi mait-a fain out se wi stil a tingk bout som bad sitn we wi waahn fi du, wa wi kyan du?

¹⁷ So aalwiez memba dis: Kaaz yu no porfek, som a di taim yu mait-a fain se yu a tingk bout som bad sitn we yu waahn fi du. Bot wen dat apm, yu kyan du sitn sed taim fi mek shuor se yu no du dem bad sitn de​—yu kyan du jos laik Juozif wen im did tek fut an ron we fram Patifa waif. (Jen. 39:12) Yu no afi gi iin tu di bad sitn dem we yu mait-a waahn fi du!

18-19. Ef wi waahn fi tingk di wie ou Gad waahn wi fi tingk, wa a som kwestiyan we wi kyan aks wiself?

¹⁸ Ef wi a-go lorn fi tingk di wie ou Gad waahn wi fi tingk wi afi aalwiez a mek shuor se di sitn dem we wi tingk bout an di sitn dem we wi du a tingz we mek Jeuova api. So it wuda gud ef yu sidong an tingk bout dem kwestiyan ya: ‘Di wie ou mi a liv mi laif, it a shuo se mi riili biliiv se wi a liv iina di laas die dem? Mi a wok aad fi get rid a mi doti wiez dem an a chrai fi bi wan nyuu sumadi? Mi a du tingz we shuo se a Jeuova a mek mi nuo ou fi liv mi laif so dat mi no gi iin tu di bad sitn dem we mi mait-a waahn fi du?’

¹⁹ Wen yu a gwaan luk pan ou yu a du tingz, no chrai fi si ef yu a du evriting porfek, jos si ou yu kyan gwaan du beta. Ef yu si sitn we yu niid fi chienj bout yuself, no bada fiil bad an jrap yu an. Insted-a dat, du wa Filipiyan 3:16 se: “Gwaan uol aan pan wa Gad mek wi nuo aredi” an no tap chrai fi du beta. Wen yu du dat, yu kyan nuo se Jeuova a-go de de a elp yu so dat yu kyan gwaan tingk iina di wie ou im waahn yu fi tingk.