1-2. Hkalup hkam ngut ai hpang hpa matut galaw ra ai kun? Sanglang dan u. 

 NTA hpe kade na yang kalang jasan jaseng galaw ai kun? Garai n htawt wa shi yang atsawm galaw na re. Raitim, bai n galaw yang hpa byin wa na kun? Nhpu ni, maza ni bai nga wa na re. Dai majaw, jasan jaseng ayan galaw ya ra ai.

² Anhte a myit mang ai lam, akyang lailen hte seng nna mung dai zawn sha re. Hkalup garai n hkam shi yang, “hkum hkrang hte wenyi hpe awu asin di kau ai matsat shabat hta na tinang hkum hpe jasan jaseng kau” na matu, prat hpe ra ang ai hku galai shai wa ai. (2 Ko 7:1) Raitim, “nnan byin hkra matut galai shai” nga ra ai ngu ai Kasa Pawlu a hpaji jaw ga hpe hkan sa ra ai. (Ehp 4:23, NWT) Hpa majaw matut shakut nga ra ai kun? Ndai mungkan a nhpu ni, maza ni bai nga wa chye ai majaw re. Dai zawn n byin hkra, Yehowa a man hta san seng nga hkra, anhte a myit ai lam, akyang lailen hte ra marin ai lam ni hpe ayan san jep nga ra ai.

3. “Myit jasat hpe galai shai” ngu ai gaw hpa lachyum kun? (Roma 12:2)

³ Myit jasat hpe galai shai lu na matu hpa galaw ra na kun? (Roma 12:2 hpe hti u.) b “Myit jasat hpe galai shai” ngu ai  Grik ga hpe “myit jasat hpe gram lajang ai” ngu gale mai ai. Dai majaw, kaja ai lam ni hpe ntsa lam loi li galaw dan ai hte sha n mai ai. Tinang a kata na masha hpe atsawm san jep ra ai. Yehowa a tsang madang ni hte htep lahti rai hkra, ra ang ai hku galai shai ra ai. Kalang sha n-ga, ayan na dai zawn galaw nga ra ai.

4. Tinang a myit mang lam hpe ndai mungkan a hkrang shachyaw n hkrum hkra gara hku koi lu ai kun?

⁴ Anhte hkum tsup wa ai shaloi galaw ai lam yawng gaw, Yehowa a man hta galoi mung ra sharawng hpa rai nga na re. Ndai aten laman, dai zawn byin na matu ayan na shakut nga ra ai. Karai myit ra ai lam hpe atsawm chye na matu, myit jasat hpe galai shai ra ai ngu Roma 12:2 hta Pawlu tsun ai hpe sadi yu u. Ndai mungkan a hkrang shachyaw ai hpe hkam na malai, tinang a bandung hte dawdan lam ni hta Karai a myit mang ai lam, kade daram shing kang ka-up nga ai hpe shawng san jep ra ai.

5. Yehowa a nhtoi ni wa ai hte seng ai tinang a myit mang lam hpe gara hku san jep lu ai kun? (Sumla hpe yu u.)

⁵ Ga shadawn langai hpe myit yu u. “Karai Kasang a nhtoi hpe, . . . myit marit nga” nga na matu, anhte hpe Yehowa n-gun jaw ai. (2 Pe 3:11) Tinang hkum tinang ndai hku san yu u: “Ndai mungkan a jahtum grai ni nga sai ngu ai hpe chye ai lam, nye a prat hkrun lam gaw madun nga ai kun? Jawng hpaji, bungli hte seng ai nye a dawdan lam ni gaw, Yehowa a magam gun ai gaw nye prat hta ahkyak htum re ai lam madun nga ai kun? Ngai hte nye dinghku a matu Yehowa madi shadaw ya na ngu ai hpe kam ai kun? (sh) Arung arai a matu ayan myit tsang nga ai kun?” Karai a myit ra ai lam hte maren asak hkrung ai shaloi, Karai Kasang kade daram sharawng awng na hpe shingran yu u.​—Mat 6:25-27, 33; Hpl 4:12, 13.

6. Hpa matut galaw nga ra ai kun?

⁶ Tinang a myit mang ai lam hpe ayan san jep nna, ra ang ai hku galai shai ra ai.  “Nanhte gaw dai makam masham hta de nga myit dai kun, tinang dai chyam yu mu; nanhte tinang hkum hpe dinglik yu mu” ngu Korinhtu mare na Hkristan ni hpe Pawlu tsun ai. (2 Ko 13:5) “Makam masham hta de nga” ai ngu ai hta, zuphpawng ni lung ai, hkaw tsun bungli hta chyahkring hkring shang lawm ai daram sha n-ga ai. Tinang a myit mang ai lam, ra marin ai lam, myit madung ni mung lawm ai. Dai majaw, Chyum Laika hti ai, Karai myit ai hku myit ai, Karai myit ra ai hte maren ra ang ai hku galai shai ai hku nna, myit jasat hpe galai shai nga ra ai.​—1 Ko 2:14-16.

7. Ehpesu 4:31, 32 hku nga yang hpa naw galaw ra ai kun? Dai zawn galaw na matu hpa majaw yak chye ai kun?

⁷ Ehpesu 4:31, 32 hpe hti u. Myit jasat hpe galai shai ai sha n-ga, “gawng shing-yan ningnan hpe dagraw” ra ai. (Ehp 4:24) Dai hta lailen lawm ai. Myit machyi ai, masin pawt ai zawn re ai n kaja ai lailen ni hpe tawt lai lu na matu shakut ra ai. Dai zawn galaw na matu hpa majaw yak chye ai kun? N kaja ai lailen nkau gaw ru jung nga chye ai majaw re. Ga shadawn, “pawt sindawng ai,” “myit kahtet ai” masha nkau a lam hpe Chyum Laika hta tsun da ai. (Gsh 29:22) Dai zawn re ai masha ni gaw, hkalup hkam ngut ai hpang hta pyi, masin pawt ai hpe matut hkang ra chye ai. Mahkrum madup langai hpe yu yu ga.

8-9. Gawng shing-yan dingsa hpe raw kau na matu matut shakut nga ra ai hpe Satibin a mabyin gaw gara hku madun dan ai kun?

⁸ Hpunau Satibin gaw masin pawt ai hpe hkang na matu yak nga ai. Shi ndai hku tsun ai: “Hkalup hkam ngut ai hpang hta pyi, masin pawt ai hpe hkang na matu naw shakut nga ra ai. Ga shadawn, kalang mi hta, hkaw tsun sa let lagut langai nye mawdaw kaw na radio lagu mat ai. Ngai shi hpe hkan shachyut ai. Dep wa mahka hta radio hpe shi kabai nna hprawng mat ai. Radio hpe gara hku bai lu la ai lam kaga ni hpe tsun dan ai shaloi, anhte a magam hpung kaw na myitsu salang gaw, ‘Satibin, dai lagut hpe lu rim yang hpa galaw na?’ ngu san ai. Dai ga san gaw ngai hpe grai myit mat shangun ai. Simsa lam nga hkra galaw na matu shadut ya ai.” c

⁹ N kaja ai lailen langai hpe tinang atsawm hkang lu sai ngu shadu da yang pyi, ndum shami bai pru wa chye ai lam Satibin a mabyin gaw madun nga ai. Nang dai zawn byin nga yang myit hkum daw. Hkrat sum mat sai ngu hkum myit la. “Mai kaja galaw mayu ai ngai hkum lala, n hkru n hkra hte ginrun nga ai” ngu kasa Pawlu yin la ai. (Rom 7:21-23) N hkum tsup ai Hkristan yawng gaw, tinang a nta hta sumpum wa ai nhpu ni, maza ni zawn bai pru wa ai n kaja ai lailen ni hpe ninghkap nga ra ai. Matut san seng nga na matu galoi mung shakut nga ra ai. Gara hku nna kun?

10. N kaja ai lailen ni hpe gara hku ninghkap lu ai kun? (1 Yawhan 5:14, 15)

¹⁰ Tinang ninghkap nga ra ai n kaja ai lailen ni a lam Yehowa kaw kyu hpyi nna tsun dan u. Karai Kasang madat ya na, karum ya na ngu ai hpe kam u. (1 Yawhan 5:14, 15 hpe hti u.) N kaja ai lailen ni mat mat hkra, mauhpa lam hte Yehowa karum ya na gaw n raitim, dai zawn n galaw hkrup hkra n-gun jaw lu ai. (1 Pe 5:10) N kaja ai lailen ni bai pru wa shangun ai lam ni hpe n galaw ai hku nna, akyu hpyi ga hte maren nga ra ai. Ga shadawn, tinang  ninghkap nga ai n kaja ai lailen hpe n-gun jaw ya ai sumla hkrung ni, TV lamang ni, laika buk ni hpe sadi ra ai. N htap htuk ai ra marin lam ni hpe sha hkum myit nga.​—Hpl 4:8; Kol 3:2.

11. Gawng shing-yan ningnan hpe dagraw na matu gara lam ni hpe galaw lu ai kun?

¹¹ Gawng shing-yan dingsa hpe raw kau ai hte sha n hkum tsup ai. Gawng shing-yan ningnan hpe dagraw na matu mung ahkyak ai. Gara hku dagraw lu ai kun? Yehowa a atsam ningja ni a lam chye wa ai shaloi, dai hpe kasi la na matu bandung tawn u. (Ehp 5:1, 2) Ga shadawn, Yehowa a mara raw ya ai lam hpe madun dan ai Chyum Laika labau langai hpe hti ai shaloi, tinang hkum tinang ndai hku san u: ‘Kaga ni hpe ngai mara raw ya ai kun?’ Matsan ai ni a ntsa Yehowa matsan dum myit madun ai lam hpe hti ai shaloi, tinang hkum tinang ndai hku san u: ‘Matsan ai hpunau nauna ni hpe ngai matsan dum myit madun ai kun? Dai hpe lailen hte madun ai kun?’ Gawng shing-yan ningnan hpe dagraw ai hku nna, myit jasat hpe galai shai nga u. Dai aten laman, tinang hkum tinang myit galu u.

12. Chyum Laika gaw galai shai ya lu ai atsam nga ai lam, Satibin a mabyin gaw gara hku madun ai kun?

¹² Shawng hta tsun wa ai Satibin gaw, angwi ngwi hte gawng shing-yan ningnan hpe dagraw lu wa ai. Shi ndai hku tsun ai: “Hkalup hkam ai aten kaw nna, masin pawt hpa masa lam ni law law hkrum wa ai. Masin shapawt ai ni hpe koi na matu, masa lam ni hpe kaga lam ni hte hkang na matu, sharin la wa ai. Nye a rawt jat lam hpe madu jan hte hpawn, masha law law shakawn ma ai. Tinang hkum tinang pyi mau ai du hkra re. Dai zawn galai shai wa ai gaw, ngai shakut ai majaw gaw n re. Chyum Laika a galai shai ya lu ai atsam a majaw re ai hpe ngai kam ai.”

13. Htap htuk ai ra marin lam ni hpe shalat lu na matu hpa gaw karum ya na kun? (Galati 5:16)

¹³ Galati 5:16 hpe hti u. Jaw ai hpe galaw na matu, matut gasat nga ra ai. Yehowa gaw chyoi pra ai wenyi hpe nhpaw n ya jaw nna karum ya na re. Chyum Laika hkaja ai gaw, chyoi pra ai wenyi lam matsun hpe hkap la nga ai re. Zuphpawng ni lung ai shaloi mung chyoi pra ai wenyi lu ai. Dai zuphpawng ni hta hpunau nauna ni hte aten jaw kanawn mazum ai shaloi, shanhte mung tinang zawn sha jaw ai hpe galaw na matu shakut nna ninghkap nga ra ai lam chye wa ai majaw n-gun lu ai. (Heb 10:24, 25; 13:7) Gawng kya ai lam nkau hpe ninghkap lu hkra karum ya na matu, Yehowa kaw akroi anoi akyu hpyi ai shaloi, chyoi pra ai wenyi hku nna n-gun jaw ai. Dai zawn galaw ai lam ni gaw, n kaja ai ra marin lam ni hpe n shamat kau ya lu tim, dai hpe n galaw hkrup hkra karum ya na re. Galati 5:16 hta tsun da ai zawn, chyoi pra ai wenyi a lam matsun hte maren hkawm ai ni gaw, “hkum shan a marin ai lam hpe . . . shadik na myit dai n rai.”

14. Htap htuk ai ra marin lam hpe matut shalat na matu hpa majaw ahkyak ai kun?

¹⁴ Wenyi lam ni hpe ayan galaw ai hte sha n ngut ai. Dai lailen ni hpe matut hkang da na matu, htap htuk ai ra marin lam ni hpe matut shalat nga na matu ra ai. Hpa majaw kun? Anhte a hpyen langai gaw ayan gasat nga ai majaw re. Dai hpyen wa gaw, shut ai lam ni hpe galaw hkrup shangun na gunglau ai lam langai re. Hkalup hkam ngut ai shaloi hta pyi, hpaida da ai, ladu lai tsa lu ai (sh) nse nsa sumla yu ai zawn re ai, tinang koi ging ai lam nkau hpe naw ra sharawng nga ai hpe sadi hkrup chye ai. (Ehp 5:3, 4) Ramma hpunau  langai ndai hku yin la ai: “Nye a matu yak htum gaw, hkrang bung shada ra ai myit re. Dai gaw hkamsha lam daram sha re ngu shadu da ai wa, raitim, dai hkamsha lam hpe ya du hkra naw ninghkap nga ra ai.” N htap htuk ai ra marin lam ni grai sawng wa yang, hpa galaw lu ai kun?

15. N htap htuk ai ra marin lam ni gaw, “masha n jan lu ai agung alau” n re ai hpe chye da ai gaw hpa majaw n-gun lu hpa rai kun? (Sumla hpe yu u.)

¹⁵ Grai sawng wa ai n htap htuk ai ra marin lam hpe, shakut hkang nga ra yang, nang langai sha n re ai hpe dum u. “Masha n jan lu ai agung alau gaw nanhte hkrum hkra myit dai n rai” ngu Chyum Laika hta tsun da ai. (1 Ko 10:13) Korinhtu mare na num, la ni hpang de, dai laika hpe ka da ai re. Shanhte kaw na nkau gaw, moi hta num shaw ai, la shada tam ai, chyaru ya shang ai ni re. (1 Ko 6:9-11) Shanhte hkalup hkam ngut ai hpang, n htap htuk ai ra marin lam ni tsep kawp n pru wa sai ngu nang shadu ai kun? Dai gaw n mai byin ai. Namman chya hkam ai Hkristan ni raitim, n hkum tsup ai masha ni naw re. N htap htuk ai ra marin lam ni hpe chyahkring hkring ninghkap wa na re. Dai gaw n-gun lu hpa re. Hpa majaw kun? Tinang ninghkap nga ra ai gara zawn n htap htuk ai ra marin lam mi raitim, dai hpe kaga ni awng dang let ninghkap lu wa ai majaw re. “Nanhte a nhpu nnau ni mung, dai zawn re ai nni nkri hkrum nga ai hpe nanhte chye lu nna, kam sham ai myit” matut nga lu ai.​—1 Pe 5:9.

16. Gara zawn myit ai hpe koi ra ai kun? Hpa majaw kun?

¹⁶ Tinang hkrum nga ai mayak mahkak hpe kadai n chye na ya ai ngu hkum shadu. Dai zawn shadu yang, tinang a masa gaw la hpa n nga sai, n htap htuk ai ra marin lam ni hpe ninghkap na matu, n-gun n nga sai ngu shadu mat chye ai. Chyum Laika hta gaw, “Karai Kasang mung sadi sahka nga ai rai nna, nanhte n jan lu ai agung alau hkrum na ahkang n jaw  nga ai sha, nanhte jan lu myit ga, dai agung alau hte rau pru wa na hkat shi hkat da na ru ai” ngu tsun ai. (1 Ko 10:13) Dai majaw, n htap htuk ai ra marin lam ni grai sawng wa yang pyi, Yehowa a ntsa matut sadi dung lu ai. Dai ra marin lam hte maren n hkan galaw na matu, Yehowa a karum shingtau lam hte ninghkap lu ai.

17. N htap htuk ai ra marin lam ni n pru wa hkra n hkang lu tim, hpa hpe gaw hkang lu ai kun?

¹⁷ Ndai lam hpe galoi mung dum u: N hkum tsup ai masha langai hku nna, n htap htuk ai ra marin lam ni n pru wa hkra, n hkang lu ai. Raitim, dai ra marin lam ni pru wa ai shaloi, Hputihpa a madu jan kaw na, kalang ta hprawng wa ai Yosep zawn, tsep kawp nyet kau u. (Nin 39:12) N htap htuk ai ra marin lam ni hte maren hkum galaw!

18-19. Myit jasat hpe galai shai na matu shakut ai shaloi, tinang hkum tinang gara ga san ni san lu ai kun?

¹⁸ Myit jasat hpe galai shai ai ngu ai gaw, tinang a myit mang ai lam, lailen ni hpe Yehowa ra sharawng ai hte maren byin hkra, galoi mung shakut nga ai hpe tsun ai re. Dai zawn byin lu na matu, tinang hkum tinang ayan na san jep u: ‘Asak hkrung nga ai ahkying aten a ahkyak ai lam hpe, chye na ai lam nye a lailen ni gaw madun nga ai kun? Gawng shing-yan ningnan dagraw ai hta rawt jat nga ai kun? N htap htuk ai ra marin lam ni hte maren n galaw hkrup hkra ninghkap na matu, nye a prat hpe Yehowa a chyoi pra ai wenyi a lam matsun hpe hkam la nga ai kun?’

¹⁹ Tinang hkum tinang san jep ai shaloi, hkum tsup na matu hkum myit mada. Rawt jat ra na daw hpe tam u. Rawt jat ra na lam hpe mu ai shaloi myit hkum daw. “Ya dep madep hte hte maren, dai arawn alai hta anhte hkawm nga ga” ngu ai Hpilipi 3:16 hta lawm ai hpaji jaw ga hpe hkan sa u. Myit jasat hpe galai shai na matu, na a shakut shaja ai lam hpe Yehowa shaman chyeju jaw na hpe kam u.