1-2. Kuzê ki nu meste kontinua ta faze dipôs ki nu batiza? Splika.

 KANTU bês ki bu ta linpa bu kaza? Talvês antis di bu ba mora la bu linpa-l dretu. Má kuzê ki pode kontise si bu ka linpa-l más? Sima bu sabe, puera ku sujidadi pode djunta faxi. Pa bu kaza kontinua linpu, bu meste linpa-l sénpri.

² Di mésmu manera, tanbê nu meste kontinua ta konpo nos manera di pensa i nos manera di ser. É klaru ki antis di nu batiza, nu sforsa txeu pa muda nos vida, asi pa nu pode fikaba linpu ‘di tudu sujidadi di karni i di spritu’. (2 Cor. 7:1) Má gósi, nu meste obi ku konsedju di apóstlu Polu i ‘kontinua ta bira más novu’. (Efé. 4:23) Pamodi ki nu meste kontinua ta konpo nos manera di pensa i nos manera di ser? Pamodi puera i sujidadi di kel mundu li pode djunta na nos faxi. Pa Jeová kontinua kontenti ku nos, nu meste analiza sénpri nos manera di pensa, nos manera di ser i nos dizejus.

3. Kuzê ki ‘troka nos manera di pensa’ krê fla? (Romanos 12:2)

³ Kuzê ki nu meste faze pa troka ô muda, nos manera di pensa? (Lé Romanos 12:2.) Na gregu, kes palavra ki traduzidu pa ‘troka nhos manera di pensa’, pode traduzidu pa ‘bira nhos manera di pensa novu’. Nton, kel-li ka  krê fla ma nu debe faze sô alguns kuza dretu. Má nu debe analiza kel algen ki nos é di pa déntu i muda kes kuza ki nu meste, asi pa nu pode obi ku leis di Jeová. Nu debe faze kel-li ka sô un bês, má sénpri.

4. Kuzê ki nu pode faze pa mundu ka muda nos manera di pensa?

⁴ Óras ki nu bira perfeitu, sénpri nu ta dexa Jeová kontenti na tudu kuza ki nu ta faze. Má timenti kel-li ka kontise, nu meste kontinua ta sforsa pa agrada Jeová. Repara ma na Romanos 12:2 Polu fla ma nu meste troka nos manera di pensa pa nu sabe kuzê ki Deus krê pa nu faze. Nu ka debe dexa kel mundu mau li muda-nu. Má, primeru nu debe analiza nos kabésa pa odja si nu sta ta dexa manera di pensa di Deus muda métas ki nu ta poi i disizons ki nu ta toma.

5. Ki perguntas ki nu pode faze pa odja si nu ta atxa ma fin sta kuazi ta ben? (Odja fotus.)

⁵ Odja un izénplu. Jeová krê pa nu tene ‘xintidu na prezénsa di se dia’. (2 Ped. 3:12) Faze kes pergunta li: ‘Nha manera di vive ta mostra ma N ta ntende ma fin di kel mundu mau li sta kuazi ta ben? Disizons ki N ta toma sobri bai universidadi ô sobri trabadju ki N ta skodje ta mostra ma sirbi Jeová é kuza más inportanti na nha vida? N ten fé ma Jeová ta kuida di mi i di nha família, ô N sta sénpri preokupadu ku kuzas material?’ Jeová ta fika kontenti óras ki el ta odja-nu ta faze se vontadi sénpri. — Mat. 6:25-27, 33; Fil. 4:12, 13.

6. Kuzê ki nu meste kontinua ta faze?

⁶ Nu meste analiza nos manera di pensa sénpri i dipôs muda kalker kuza ki meste. Polu fla kes kriston na Korintu:  ‘Nhos kontinua ta djobe si nhos sta na fé; nhos kontinua ta prova kuzê ki nhos é di verdadi.’ (2 Cor. 13:5) ‘Sta na fé’ é más di ki sisti runion i partisipa na pregason di vês en kuandu. Tanbê el ta inklui nos manera di pensa, nos dizejus i nos motivason. Nton, nu meste kontinua ta lé Palavra di Deus, ta prende pensa sima Jeová ta pensa, i dipôs ta muda kalker kuza ki meste pa nu dexa-l kontenti. Di kel manera li, nu ta kontinua ta ‘troka nos manera di pensa’. — 1 Cor. 2:14-16.

7. Sima sta na Efésios 4:31, 32, kuzê más ki nu meste faze i pamodi ki kel-li pode ser difísil?

⁷ Lé Efésios 4:31, 32. Alén di muda nos manera di pensa, tanbê nu meste ‘bisti di kel manera di ser novu’. (Efé. 4:24) Nu debe sforsa txeu pa nu faze kel-li. Un di kes kuza ki nu debe faze é sforsa pa kaba ku kes mau kualidadi, sima rankor i raiba. Pamodi ki faze kel-li pode ser difísil? Pamodi alguns manera di ser mariadu sta ben finkadu na nos. Pur izénplu, Bíblia ta fla ma ‘tendénsia di korason di ómi é mau désdi se juventudi.’ (Gén. 8:21) Kontrola kes manera di ser mariadu ki nu ten talvês ta iziji pa nu kontinua ta sforsa, sikrê dipôs ki nu batiza. É kel-li ki kel spiriénsia ki nu sta ben odja ta mostra.

8-9. Modi ki stória di Stephen ta mostra ma nu meste kontinua ta bandona kel manera di ser bédju?

⁸ Un irmon ki txoma Stephen tinha prubléma ku kontrola se raiba. El fla: “Mésmu dipôs ki N batiza, N meste kontinuaba ta sforsa pa N kontrola nha manera di ser. Un bês timenti N staba ku un grupu di irmons ta prega di kaza en kaza, un ladron furta rádiu di nha karu i N kóre se tras. Kantu N staba kuazi ta txiga na el, el bota kel rádiu na txon i el fuji. Kantu N torna volta pa kel grupu di irmons, N fla-s modi ki N konsigi toma nha rádiu otu bês. Un ansion pergunta-m: ‘Stephen, abo nton si bu pegaba el, éra modi?’ N fika ta pensa na kel pergunta li, i N odja ma inda N mesteba sforsa pa N ser un algen di pas.” b

⁹ Stória di Stephen ta mostra ma sikrê nu ta atxa ma nu ta konsigi kontrola un manera di ser mariadu, nu pode mostra-l óras ki nu ka sta ta spéra. Si kel-li kontise ku bo, ka bu dizanima i ka bu atxa ma bu ka ta konsigi sirbi Deus dretu. Ti apóstlu Polu fla: ‘Óras ki N krê faze kel ki é dretu, kel ki é mariadu ta sta na mi.’ (Rom. 7:21-23) Sima dja nu odja, si nu ka linpa nos kaza sénpri, puera i sujidadi pode djunta. Di mésmu manera, tudu algen inperfeitu ki ta sirbi Deus ten ki lida ku kes manera di ser mariadu, ki pode parse na nos vida otu bês. Nton, nu meste sforsa sénpri pa nu kontinua linpu. Modi ki nu pode faze kel-li?

10. Modi ki nu pode luta kóntra kes manera di ser mariadu? (1 João 5:14, 15)

¹⁰ Pâpia ku Jeová na orason sobri kel manera di ser ki bu sta ta luta ku el, ku sertéza ma el ta obi bu orason i ma el ta djuda-u. (Lé 1 João 5:14, 15.) Nbóra Jeová ka ta faze un milagri ta kaba ku kel manera di ser, el pode da-u forsa, asi  pa bu konsigi kontrola-l. (1 Ped. 5:10) Pa bu aji di akordu ku bu orason, ka bu faze kes kuza ki pode poi kel manera di ser bédju ta parse otu bês. Pur izénplu, toma kuidadu ku filmis ki bu ta odja, prugramas di tilivizon ô stórias ki bu ta lé ki ta distaka kel manera di ser ki bu sta tenta kaba ku el. I ka bu kontinua ta pensa na kes dizeju mariadu. — Fil. 4:8; Col. 3:2.

11. Kuzê ki nu pode faze pa nu kontinua ta bisti di kel manera di ser novu?

¹¹ Nbóra nu ten ki bandona kel manera di ser bédju, é inportanti nu sforsa pa nu ten kel manera di ser novu. Modi ki nu pode faze kel-li? Poi méta di imita Jeová óras ki bu ta prende sobri se kualidadis. (Efé. 5:1, 2) Pur izénplu, óras ki bu ta lé un stória na Bíblia ki ta mostra modi ki Jeová ta púrdua, pergunta bu kabésa: ‘N ta púrdua otus algen?’ Óras ki bu ta lé sobri modi ki Jeová ta mostra konpaxon pa kes algen ki ta pasa pa difikuldadi, faze kel pergunta li: ‘N ta preokupa ku kes algen ki ta pasa nisisidadi, i N ta mostra kel-li através di kuzas ki N ta faze?’ Kontinua ta muda bu manera di pensa, bisti di kel manera di ser novu i ten paxénxa ku bu kabésa óras ki bu ta faze kel-li.

12. Modi ki Bíblia konsigi muda vida di Stephen?

¹² Stephen, ki dja nu papiaba di el antis, diskubri ma poku-poku el konsigi bisti di kel manera di ser novu. El fla: “Désdi ki N batiza, N pasa pa txeu situason na vida ki pode poba mi ta aji ku violénsia. N prende afasta di kes algen ki pode provokaba mi ô rezolve situason na pas. Txeu algen, ku nha mudjer ku tudu, ilojia-m pa nha manera ki N lida ku kes situason la. Ti N fika spantadu ku nha kabésa! N ta atxa ma nunka N ka ta konsigiba muda nha manera di ser mi sô. Envês di kel-li, N ten sertéza ma kel-li é un próva ma Bíblia ten puder di muda vida di algen.”

13. Kuzê ki ta djuda-nu faze kel ki é dretu? (Gálatas 5:16)

¹³ Lé Gálatas 5:16. Pa djuda-nu faze kel ki é dretu, Jeová ta da-nu se spritu santu. Óras ki nu ta studa Palavra di Deus, nu sta ta dexa spritu santu di Deus influensia-nu. Tanbê nu ta resebe spritu santu óras ki nu ta sisti nos runion. Na runions nu pode pasa ténpu ku irmons i irmans ki sima nos, sta ta sforsa pa faze kel ki é dretu i kel-li ta nkoraja-nu. (Heb. 10:24, 25; 13:7) I óras ki nu ta ora pa Jeová ta pidi-l pa el djuda-nu ku algun frakéza, el ta da-nu se spritu santu pa da-nu forsa pa nu kontinua ta luta. Studa Bíblia, sisti runion i faze orason ka ta poi kes dizeju mariadu ki nu ten ta kaba, má es ta djuda-nu ka aji di akordu ku nos dizeju. Sima Gálatas 5:16 ta fla, kes ki ta ‘anda di akordu ku spritu, ka ta faze ninhun dizeju di karni.’

14. Pamodi ki é inportanti nu kontinua ta pensa na kuzas dretu?

¹⁴ Óras ki nu ta kumesa ta faze kuzas ki ta djuda-nu ten un bon amizadi ku Jeová, é inportanti nu kontinua ta faze-s i sforsa pa kontinua ta pensa na kuzas dretu. Pamodi? Pamodi un di nos inimigu nunka ka ta para di luta kóntra nos. Kel inimigu li é tentason di faze kuzas mariadu. Sikrê dipôs ki nu batiza,  nu pode xinti tentadu na faze kes kuza ki nu debe ivita, sima djuga dinheru, bebe dimás ô odja pornografia. (Efé. 5:3, 4) Un irmon jóven fla: “Un di kes kuza más difísil ki N ten ki lida ku el é xinti atraídu pa ómi. N pensa ma éra un kuza ki ta duraba poku ténpu, má ti inda N ta xinti-l.” Kuzê ki pode djuda-u si bu sta ta lida ku un dizeju mariadu ki é fórti?

15. Pamodi ki ta anima-nu sabe ma dizejus mariadu é kuzas ki ‘ómis ta pasa pa el’? (Odja fotu.)

¹⁵ Óras ki bu sta ta luta kóntra un dizeju mariadu ki é fórti, lenbra ma bu ka sta bo sô. Bíblia ta fla: ‘Ka txiga na nhos ninhun tentason ki inda ómis ka pasa pa el.’ (1 Cor. 10:13a) Un otu traduson di Bíblia ta traduzi kel versíklu li asi: ‘Inda nhos ka pasa pa ninhun tentason ki otus algen ka pasa pa el tanbê.’ Kes palavra li skrebedu pa irmons ku irmans ki ta viveba na Korintu. Alguns di es ta fazeba adultériu, séksu ómi ku ómi i ta bebeba dimás. (1 Cor. 6:9-11) Bu ta atxa ma dipôs di batismu nunka más es ka xinti kes dizeju li? Talvês es xinti sin. Tudu es éra skodjedu ku spritu santu, má inda es éra inperfeitu. Nu ka ten dúvida ma di vês en kuandu es tinha ki lutaba kóntra kes dizeju li. Kel-li debe da-nu koraji. Pamodi? Ka ta nporta ki dizeju mariadu ki bu sta ta luta ku el, lenbra ma otu algen dja konsigi vense es luta. Bu pode ‘mante firmi na fé pamodi bu sabe ma tudu bus irmon na mundu interu sta ta pasa pa kes mésmu sufrimentu.’ — 1 Ped. 5:9.

16. Ki armadilha nu debe ivita i pamodi?

¹⁶ Ka bu kai na armadilha di pensa ma ningen ka ta konsigi ntende kuzê ki bu sta ta pasa pa el. Pensa di kel manera li pode pô-u ta atxa ma bu situason ka ten  soluson i ma bu ka ten forsa pa aguenta kes dizeju mariadu. Bíblia ta fla: ‘Deus é fiel, i el ka ta dexa nhos pasa pa tentason más di ki kel ki nhos pode aguenta, má, djuntu ku tentason, el ta da un manera di skapa, pa nhos pode aguenta.’ (1 Cor. 10:13b) Nton, sikrê nu ten un dizeju mariadu ki é fórti, nu pode kontinua fiel pa Jeová. Ku ajuda di Jeová, nu pode ivita faze kel ki é mariadu.

17. Nbóra nu ka pode ivita ten dizejus mariadu, kuzê ki nu pode faze?

¹⁷ Lenbra di kel-li sénpri: Dja ki nos é inperfeitu, nu ka ta pode ivita ten dizejus mariadu. Má óras ki es ta parse, nu pode libra di es lógu, sima Juzé faze kantu el fuji di mudjer di Putifar. (Gén. 39:12) Bu ka meste aji di akordu ku dizejus mariadu!

18-19. Ki perguntas nu debe faze timenti nu sta ta sforsa pa kontinua ta troka nos manera di pensa?

¹⁸ Troka nos manera di pensa krê fla kontinua ta sforsa pa muda nos manera di pensa i kuzas ki nu ta faze pa dexa Jeová kontenti. Nton, nu debe analiza nos kabésa i pergunta: ‘Manera ki N ta aji ta mostra ma N ta rekonhese ma nu sta ta vive na ténpu di fin? N sta ta faze prugrésu pa N ten kel manera di ser novu? N sta ta dexa spritu santu di Jeová orienta nha vida, asi pa N ka aji di akordu ku kes dizeju di karni?’

¹⁹ Óras ki bu ta analiza bu kabésa, ka bu spéra perfeison, má fika kontenti ku prugrésu ki dja bu faze. Si bu odja ma bu meste midjora, ka bu dizanima. Má sigi kel konsedju ki sta na Filipenses 3:16, ki ta fla: ‘Ka ta nporta kal ki é prugrésu ki dja nu faze, nu kontinua ta anda na mésmu direson.’ Óras ki bu faze kel-li, bu pode ten sertéza ma Jeová ta abênsua bu sforsu di kontinua ta troka bu manera di pensa.