1-2. Ihi itwatokala kusuluka mu kubhanga kyoso kyatubatizala? Jimbulula.

 LUKUXI lu wene muzelesa o inzo yé? Nange ande dya kuya kutungamu, eye wa izelesa kyambote. Kyoso ki wejikalamu kyá, ihi yejibhita se kweji ku izelesa dingi? Kala kiwejiya, yene itena kuxila dingi ni lusolo. Phala o inzo yé isuluke ni kuzela, eye watokala ku ikomba izuwa yoso.

² Etu we twatokala kusuluka mu kulungulula o ibanzelu yetu ni ukexilu wetu. Mu kidi, ande dya kutubatizala twabhingile kulungulula ima ku mwenyu wetu phala “tudizelese mu ufusa woso wa xitu ni wa nzumbi.” (2 Ko. 7:1) Maji kindala twabhingi kukayela o kitendelesu kya poxolo Phawulu kya kukolokota “mu kulungulula o ixinganeku” yetu. (Efe. 4:23) Mukonda dyahi twatokala kusuluka mu kulungulula o ixinganeku yetu? Mukonda o ixete ya mundu yú itena kutunaminina ni lusolo. Phala kiki ki kibhite netu, ni tutene kusangulukisa Jihova, twatokala kuditonginina mu ithangana yoso o ibanzelu yetu, o ukexilu wetu ni jihanji jetu.

3. Ihi itwatokala kubhanga phala kulungulula o ilunji yetu? (Loma 12:2)

³ Ihi itwatokala kubhanga phala kulungulula o ilunji mba o ibanzelu yetu? (Tanga Loma 12:2.) Phala “kulungulula o ilunji” yetu, kitutokala kubhanga kiki mu ithangana yofele ngó. Twatokala kutonginina o muxima wetu ni kulungulula bhu jimbandu bhu twabhingi, phala tutene kubelesela o itumu  ya Jihova. Kitutokala kubhanga kiki lumoxi ngó kana, maji mu ithangana yoso.

4. Ihi itwatokala kubhanga phala kitwehele o mundu yú kutufunyisa?

⁴ Kyoso kitwandakala tu athu ayuka, yoso itwandabhanga yanda sangulukisa Jihova. Maji kindala twatokala kyá kubhanga yoso ni yoso phala ku musangulukisa. Mu divulu dya Loma 12:2; Phawulu wambe kwila twatokala kulungulula o ilunji yetu phala tutongolole o vondadi ya Nzambi. Mu veji dya kwehela o mundu yú wayibha kutufunyisa, kyadyanga twatokala kuditonginina phala kumona se twamusuwa o jimbambe ku mwenyu wetu kala kyamesena Nzambi, kana kala kyamesena o mundu yú.

5. Ihi itwatokala kudibhwidisa mu kwijiya kwila o kizuwa kya Jihova kyazukama? (Tala o foto.)

⁵ Jihova wamesena kwila tukolokota mu “kukingila ni kuxinganeka o kizuwa” kyê. (2 Ph. 3:12) Dibhwidise: ‘O ukexilu wa mwenyu wami ulondekesa kwila ngitendela kuma o mundu yú wayibha kwakambe ngó bhofele anda ubwika kyá? O kwila o ima ingisola yalungu ni xikola ya katunda mba salu ilondekesa kuma o kusidivila Jihova kyene o kima kyabeta kota ku mwenyu wami? O kwila ngidyelela kuma Jihova wandadikila o ibhindamu yami ni ya mwiji wami, inga ngitandanganya dingi ni jimbote?’ Xinganeka o kusangukula kukala naku Jihova kyoso kyatumona kubhanga nguzu phala kumubelesela mu ibhangelu yetu yoso.—Mat. 6:25-27, 33; Fil. 4:12, 13.

6. Twatokala kusuluka mu kubhanga ihi?

⁶ Mu ithangana yoso twabhingi kutonginina o ixinganeku yetu ni kulungulula bhwoso bhu twabhingi. Phawulu wambe ku akwa Kolindu: “Kolokotenu mu ku di tonginina mudyenu phala mu mone se mwala mu  kixikanu.” (2 Ko. 13:5) O kukala “mu kixikanu” ki kwalungu ngó ni kuya mu yônge ni kuboka. Maji kwalungu we ni ixinganeku yetu, o ima itwamesena kubhanga ni ima yala ku muxima wetu. Kyenyiki tusuluke mu kulungulula o ilunji yetu mu kutanga o Mak’â Nzambi, kubanza kala mwene ni kulungulula o ukexilu wa mwenyu wetu phala tutene kumusangulukisa.—1 Ko. 2:14-16.

7. Kala kilondekesa Efezu 4:31, 32, ihi dingi itwatokala kubhanga? Mukonda dyahi kubhanga kiki kubhonza?

⁷ Tanga Efezu 4:31, 32. Kima kya mukwá kitwatokala kubhanga o “kuzwata o ukexilu wa ubhe.” (Efe. 4:24) Twatokala kubhanga nguzu yavulu phala kuxisa o idifwa yoso yayibha kala o unguma, o kutema ni njinda. Mukonda dyahi kubhanga kiki kubhonza? Mukonda sayi idifwa yayibha yatunaminina moxi dyetu. Mu kifika, o Bibidya yamba kwila sayi athu ala akwa “njinda,” akwa “nganji.” (Jisa. 29:22) Se muthu wala ni idifwa yiyi yayibha, mwene watokala kubhanga nguzu yavulu phala kulungulula o ukexilu wê né mwene kyoso kyamubatizala. O musoso wakayela ulondekesa o maka enyá.

8-9. Kyebhi o musoso wa manu Stephen ulondekesa kwila twatokala kusuluka mu kuxisa o ukexilu wokulu?

⁸ Phange amwixana manu Stephen kexile mutena kulanga o njinda yê. Mwene wambe: “Né mwene kyoso kya ngi batizala, nga suluka ni kulungulula o ukexilu wami wa kukala ni njinda. Mu kifika, sayi kizuwa kyoso ki ng’exile muya mu boka nzo ni inzo, nga kayela o mwiyi wa nyanene o mutelembe wa dikalu dyami. Kyoso ki nga zukamene phala ku mu kwata, mwéne wa sonona o mutelembe yu wa lenge. Kyoso ki ngatangela ku akwetu iyabhiti, o phang’etu kafunga wa ngi bhula: ‘Stephen, ihi i weji bhanga se wa mu kuatele?’ O kibhwidisu kiki, kya ngi bhangesa kuxinganeka, kya ngi bhangesa we kusuluka mu kusota o kutululuka.” b

⁹ O musoso wa manu Stephen utwidikisa kwila, tutena kulondekesa kidifwa kyayibha mu kithangana ki twakifikile, né mwene se twabanze kuma o kidifwa kiki twakitolola kyá. Se kiki kibhita n’eye, kana kuluwala, kubanze kwila u Kidistá wayibha. Katé mwene poxolo Phawulu wambe kiki: “Kyoso ki ngimesena kubhanga o ima yawabha, o ima yayibha yéne i ngi zukama.” (Lom. 7:21-23) Sayi bhabha o fufuta ni ixete ivutuka dingi mu inzo, mu kyenyiki o mukwa inzo watokala ku izelesa mu ithangana yoso. Kyene we kimoxi, o Jikidistá joso akwa ituxi, atokala kudibhana ni idifwa yayibha yanaminina moxi dyâ. Mu kiki, etu enyoso twatokala kubhanga nguzu phala kuzela mu nzumbi. Kyebhi kitubhanga kiki?

10. Kyebhi kitutena kutolola o idifwa yayibha? (1 Nz. 5:14, 15)

¹⁰ Samba kwa Jihova yalungu ni kidifwa kyayibha kiwamubhânga nakyu, dyelela kwila mwene wandakukwivwa ni ku kukwatekesa. (Tanga 1 Nzwá 5:14, 15.) Jihova kanda kukatula o kidifwa kiki mu madiwanu, maji wandakubhana nguzu phala utene kukilanga. (1 Ph. 5:10) Maji bhanga o ima iwabhingi ku musambu phala o ukexilu wokulu ki uvutuke dingi. Mu kifika, kana kutala jifilime, jiprograma mu mutelembe wa izunzumbya, mba kutanga madivulu abhangesa o ukexilu wé wokulu kuvutuka. Kana kweha o kilunji kyé kudikwatenena ku jihanji jayibha.—Fil. 4:8; Kol. 3:2.

11. Ihi itwatokala kubhanga phala kulungulula o ukexilu wayibha?

 ¹¹ Sumbala twaxisa kya o ukexilu wokulu, maji twatokala kukala ni ukexilu wa ubhe. Kyebhi kitutena kubhanga kiki? Kyoso ki uya mu kudilonga yalungu ni Jihova, kayela o idifwa yê. (Efe. 5:1, 2) Mu kifika, kyoso ki utanga musoso mu Bibidya yalungu ni kyebhi Jihova kya loloka, dibhwidise: ‘O kwila ngene muloloka akwetu?’ Kyoso ki utanga yalungu ni henda ya Jihova ku jingadyama, dibhwidise: ‘O kwila ngitandanganya we ni jiphange abhindama, inga ngibhanga nguzu phala ku akwatekesa?’ Kyenyiki suluka mukulungulula o ukexilu wé, ejiya kuma phala kubhanga kiki kwabhingi mwene kithangana.

12. Kyebhi o kutena kwa Bibidya kwalungulula o mwenyu wa manu Stephen?

¹² Manu Stephen, twamutumbula kudima bhofele bhofele watenene kulungulula o ukexilu wê wayibha. Mwene wambe: “Tundé kya ngi batizala, nga dibhana ni ima yavulu yeji ngi bhangesa kubhânga, mukonda dya njinda. Nga dilongo o kudisondoloka bhu kaxi k’athu a mesena ku ngi lokalala mba ngi sota kutululuka mu ukexilu wengi. Athu avulu katé mwene ni muhatu’ami, a ngi ximana mukonda dya kudibhana kyambote ni maka yâ. Katé mwene eme, ngi diwana mudyami! Ngejiya kwila ki nga mu lungulula o ukexilu wami mu nguzu yami ngó. Ngi xikina kwila nga mu bhanga kiki, mukonda dya kutena kwa Bibidya kwa mu ngibhangesa kulungulula o ukexilu wa mwenyu wami.”

13. Ihi yanda tukwatekesa kukala ni jihanji jambote? (Ngalásya 5:16)

¹³ Tanga Ngalásya 5:16. Phala kutukwatekesa kutolola o jihanji jayibha ni kubhanga o ima yambote, Jihova utubhana o nzumbi yê ikola. Kyoso ki tudilonga o Mak’â Nzambi, twamukwehela o nzumbi ikola kutukwatekesa. Etu we tutambula o nzumbi ikola kyoso kitukala mu yônge. Mu yônge yiyi tukala kumoxi ni jiphange amubhanga we nguzu yavulu phala kubhanga o ima yatokala. O kiki kituswinisa kyavulu. (Jih. 10:24, 25; 13:7) Kyoso kitusamba kwa Jihova ni kumudyonda o kikwatekesu kyê phala kutolola kidifwa kyayibha kitwala nakyu, mwene wanda tubhana o nzumbi yê ikola phala kutukwatekesa kutolola o kidifwa kiki. Sumbala o ima yiyi kiyanda bhangesa o jihanji jiji kubhwa, maji yene yanda tukwatekesa kukolokota mu kudibhana ni jihanji jiji jayibha. O mukanda ku akwa Ngalásya 5:16, wamba kwila o athu ene mu kwehela o nzumbi ikola kwa endesa, “kandabhanga o ima ya xitu.”

14. Mukonda dyahi kima kyambote kusuluka mu kukala ni ibanzelu yatokala?

¹⁴ Kyoso kitumateka kubhanga o ima ikolesa o ukamba wetu ni Jihova, kima kyambote kusuluka mu kubhanga kiki phala kukala ni ibanzelu yatokala. Mukonda dyahi? Mukonda twala ni nguma, kene muzeka. O nguma yiyi o hanji yakubhanga o ima yayibha. Né mwene kyoso kyatubatizala, tutena kubhanga o ima yayibha, kala o kujokala phala kutambula kitadi, o uhólwa mba kutala o ufusa. (Efe. 5:3, 4) Sayi phange yadiyala munzangala wambe: “O hanji yayibha ingadibhele nayu o kuwabhela o mayala. Ngafikile kwila kyexile ngó kakithangana, maji katé lelu ngamudibhana hanji ni kibhidi kiki.” Ihi itena ku kukwatekesa se wamudibhana ni hanji yayibha yamukubhonza ku ixisa?

15. Mukonda dyahi kituswinisa kwijiya kuma athu oso ene mubhânga ni jihanji jayibha? (Tala o foto.)

¹⁵ Se wamudibhana ni jihanji jayibha  kinene, lembalala kwila eye kiwala ubheka. O Bibidya yamba: “O jitendasá ji mwene mudibhana naju, jene jimoxi ni jene mudibhana naju akwenu.” (1 Ko. 10:13a) Sayi Bibidya yamukwá, o velusu yiyi a ilungulula kiki: “O jitendasá ji mwene mudibhana naju, jene jimoxi jene mudibhana naju o athu.” O izwelu yiyi ya poxolo Phawulu wa isoneka phala o jiphange mu kilunga kya Kolindu. Sayi athu mu mbanza yiyi, ande dya kukala Jikidistá exile akwa jiphánda, amukwa exile mala akwa kuzeka ni mala ni akwâ, ni jihôlwa. (1 Ko. 6:9-11) O kwila uxinganeka kwila ene kyoso kya abatizala kexile mu bhânga dingi ni jihanji jayibha? Kana ngana! Sumbala exile Jikidistá ja undu, maji exile hanji akwa ituxi. Sayi bhabha exile mwene mubhânga ni jihanji jayibha. O kwijiya o maka enyá kituswinisa. Mukonda dyahi? Mukonda o jihanji jayibha jiwene mudibhana naju, sayi athu ajitolola. Mu kidi eye utena kukolokota fiyele kwa Jihova, kala kyambe poxolo Phetele: “Mu difikidile mu kixikanu, mu kwijiya kwila o jiphaxi ji mwa mudibhana naju, jene jimoxi ni ja mudibhana naju o jiphange jenu mu ngongo yoso.”—1 Ph. 5:9.

16. Kixinganeku kyahi kitwatokala kulenga, ni mukonda dyahi?

¹⁶ Kana kuxinganeka kuma seku muthu utendela o ibhidi iwamudibhana nayu. O kukala ni kixinganeku kiki kitena ku kubhangesa kudivwa kuma eye kiwala ni valolo, ni kwila kiwanda tena kutolola o jihanji jayibha. Maji o Bibidya yamba: “Nzambi fiyele, mwene kanda myehela kwila a mitendala katé bhwa suku o nguzu yenu. Maji kyoso ki kumoneka o jitendasá, mwene wanda mibhana o ditundilu, phala mutene kukolokota.” (1 Ko. 10:13b) Né mwene se kyamutubhonza kutolola o jihanji jayibha, tutena kukolokota fiyele kwa Jihova. Ni kikwatekesu kyê, twandatena kutolola o jihanji jiji.

17. Sumbala kitutena kulenga o jihanji joso jayibha, kitubhingi kubhanga ihi?

 ¹⁷ Lembalala: Kuma tu akwa ituxi kitwandatena kulenga o jihanji joso jayibha. Maji jene se jimoneka tutena kulenga kala kyabhange Zuze kyoso kyalenge o muhatu wa Potifale. (Dim. 39:12) Etu kitubhingi kukayela o jihanji jetu jayibha!

18-19. Ihi itwatokala kudibhwidisa kyoso kituya ni kubhanga nguzu phala kulungulula o ilunji yetu?

¹⁸ Phala kulungulula o ilunji yetu, twatokala kusuluka mu kubhanga nguzu ni kubhanga o ima isangulukisa Jihova. Ithangana yoso twabhingi kuditonginina ni kudibhwidisa: ‘O kwila o ibhangelu yami ilondekesa kuma, ngixikina kwila twala mwene mu izuwa isukidilaku? O kwila ngamuditunda kyambote mu nguzu ingibhanga phala kukala ni ukexilu wa ubhe? O kwila ngamukwehela o nzumbi ya Jihova kwendesa o mwenyu wami ni ngitene kutolola o jihanji jayibha?’

¹⁹ Mu kuditonginina, kana kubanza kwila eye kiwanda lweza dingi, maji sanguluka ni nguzu iwene mubhanga. Kana kuluwala se umona kwila sayi idifwa wabhingi ku ilungulula. Mu veji dya kiki, kayela o kitendelesu kyala mu mukanda ku akwa Filipe 3:16: “Kuma twala kyá ni kixikanu kyakolo, twatokala kusuluka mu kwenda mu ukexilu yú.” Mu kubhanga kiki, dyelela kwila Jihova wandabesowala o nguzu i ubhanga phala kulungulula o ilunji yé.