1-2. Chumanyi chitwatela kutwalekahu kwila hanyima yakupapatishewa? Lumbululenu.

 MAPAMPA añahi imwawahishaña mwitala denu? Hadaha henohu kanda mubuukilimu, mwawahishilimu chikupu. Hanu dinu chumanyi chikumwekana neyi mukuhita kwampinji muleka kuwahishamu? Chakadi nikujina, mukushikena kwinzala lunkuñu nimajilu. Hakwila mwitala denu mwiikali mwawunyonji, mwatela kuwahishañamu mpinji yejima.

² Munjila yoyimu, twatela kutwalekahu kuzata nañovu neyi tunakukeña kwolola yitoñojoka yetu niwuntu wetu. Kafwampi, henohu kanda tupapatishewi twazatili nañovu kuhimpa yilwilu yetu kulonda “[tuditookeshi] kuyuma yejima yatamishaña mujimba nispiritu.” (2 Kor. 7:1) Hela chochu, twatela kutwalekahu kulondela kufumba kwakapostolu Pawulu “[kwakutwalekahu] kubalumuka nakwikala amaha.” (Efwe. 4:23) Muloñadi chitwatela kutwalekelahu kuzata nañovu? Muloña yuma yidi neyi lunkuñu nimajilu yamukanu kaayi yinateli kwiñila swayi mudi etu. Hakwila chuma chamuchidiwu chibuli kutumwekena kulonda tutwalekihu kwikala atooka kumesu aYehova, mpinji yejima twatela kushinshikaña chidi yitoñojoka yetu, wuntu wetu niyuma yitwafwilaña.

3. ‘Kuhimpa yitoñojoka yenu’ kwatalisha mudihi? (ARoma 12:2)

³ Chumanyi chitwatela kwila hakwila tuhimpi yitoñojoka yetu, dikwila nawu, kuhimpa chitwatoñojokaña? (Tañenu ARoma 12:2.) Mazu achiGiriki abalumunawu nawu ‘kuhimpa yitoñojoka yenu’ anateli kuyibalumuna cheñi nawu “kuwahisha yitoñojoka yenu.” Dichi, ichi hichatalisha mukwila  nawu twatela hohu kukumina hakwila yuma yayiwahi yanteshaku. Ilaña twatela cheñi kushinshika chekala wuntu wetu wamukachi nakuhimpa hanakukeñeka kulonda twovwahileña chikupu nshimbi jaYehova muchihandilu chetu. Twatela kutwalekahu kwila mwenimu.

4. Tunateli kwiladi hakwila yitoñojoka yetu abuli kuyibalumuna kudi yuma yamunshakaminu yamakonu?

⁴ Chitwakekala awanina, twakamuzañaleshaña Yehova mpinji yejima muyuma yejima yitwakelaña. Chayinu mpinji, twatela kutwalekahu kuzata nañovu hakwila tumuzañalesheña. Talenu Pawulu chashimwiniyi kunuñañana kwekala hakachi kakuhimpa yitoñojoka yetu nakwiluka nkeñelu yaNzambi, neyi chasonekawu haARoma 12:2. Chatela twiteji atubalumuni kudi yuma yamunshakaminu yamakonu, twatela kusambila kudishinshika kulonda twiluki chitunakwiteja yitoñojoka yaNzambi kutulombola muyuma yitwafwilaña kwila niyitwafuukulaña, bayi yitoñojoka yamukaayiku.

5. Tunateli kudishinshika ñahi kulonda twiluki chidi yitoñojoka yetu kutalisha hakwinza kwefuku daYehova? (Talenu mwevulu.)

⁵ Talenu chumichi. Yehova wakeñaña nindi “[twanukeña] chikupu kwikalahu kwefuku daYehova.” (2 Pet. 3:12) Dihulenu nenu: ‘Yuma yinelaña muchihandilu chami komana yamwekeshaña nawu neluki nami tudi kwakwihi nakukuma kwayuma yamunshakaminu yamakonu? Komana kufuukula kwami kutalisha hakuya kushikola nihakwiñila nyidimu kwamwekeshaña nawu kumukalakela Yehova dichuma chasweja kulema muchihandilu chami? Komana namukuhwelela Yehova nami wukunyinkaña yuma yinukukeñaña ami nichisaka chami, tahindi nakamenaña mpinji yejima kutalisha hayuma yakumujimba? Toñojokenu muzañalu watiyañayi Yehova  neyi amona tunakuhanda kwesekeja nankeñelu yindi.—Mat. 6:25-27, 33; Fwili. 4:12, 13.

6. Chumanyi chitwatela kutwalekahu kwila?

⁶ Twatela kushinshikaña chidi yitoñojoka yetu mpinji yejima nikuhimpa neyi hadi hanakukeñeka. Pawulu wayilejeli aKorinda nindi: “Desekenuña kulonda mwiluki neyi mudi muchikuhwelelu; dishinshikenuña kulonda mwiluki chimwekala enu aweni.” (2 Kor. 13:5) Kwikala “muchikuhwelelu” bayi neyi hikuya hohu nakupompa kwawakaKristu nikushimwina mpinji yejimaku. Ilaña mwabombela chitwatoñojokaña, yuma yitwafwilaña niyatusañumunaña. Dichi twatela kutwalekahu kuhimpa yitoñojoka yetu kuhitila mukutaña Izu daNzambi, kutoñojoka neyi chatoñojokañayi nikwila yuma yejima yikuletesha tumutiyisheña Yehova kuwaha.—1 Kor. 2:14-16.

7. Kwesekeja naAEfwesesa 4:31, 32, chumanyi chikwawu chitwatela kwila, nawa muloñadi chumichi chichinateli kutukalila?

⁷ Tañenu AEfwesesa 4:31, 32. Kubombela hakuhimpa yitoñojoka yetu twatela cheñi ‘kuvwala wuntu wawuha.’ (Efwe. 4:24) Twatela kuzata nañovu hakwila twili mwenimu. Twatela cheñi kuzata nañovu kulonda tutondolweleña iyi yilwilu yatama yidi neyi, ndulu, kuhila nikuzuwa. Muloñadi chichinateli kutukalila kwila mwenimu? Muloña chinateli kwikala chakala kuleka yilwilu yikwawu yatama. Chakutalilahu, Bayibolu yahoshaña nawu antu amakwawu ‘azuwaña swayi’ nawa ‘ekalaña nandulu.’ (Yish. 29:22) Hakwila muntu aleki yilwilu yatama yashimata mumuchima windi watela kutwalekahu kuzata nañovu nihanyima yakupapatishewa, neyi chitukumona munichi chuma chamwekeni.

8-9. Chuma chamumwekeneni Stephen chinakutukwasha ñahi kwiluka chichalemena kutwalekahu kuvuula wuntu wawukulu?

⁸ Manakwetu Stephen wadiña nakuzuwa swayi. Wahosheli nindi, “Nihanyima yakupapatishewa nakeñekeleña kuzata nañovu hakwila nibuleña kuzuwa swayi. Chakutalilahu, ifuku dimu chinayili nakushimwina kwitala nikwitala, nakumpishili ikombi wafumini tuhu nakwiya wayilesi mumotoka yami. Chinashikili hakamwihi nakumuwana, wayiholweli nawa watemukili. Chinayilumbulwilili akwetu chuma chinelili hakwila nitambuli wayilesi yami, mukulumpi wadiñahu wañihwili nindi, ‘Stephen, wadi kwila ñahi neyi wamukwata?’ Ilu lwihu lwanletesheli kutoñojokahu nawa lwankwashili kutwalekahu kuzata nañovu hakwila nibuleña kuzuwa swayi.” b

⁹ Neyi chitunamoni chuma chamumwekeneni Stephen, tunateli kumwekesha chilwilu chatama chakadi etu kwiluka, hela chakwila twatoñojokaña netu twachileka dehi. Neyi chuma chamuchidiwu chiyimwekena, bayi muneña nakukunkulula nenu himunashikilimu kwikala mukaKristuku. Kapostolu Pawulu niyena wetejeli chumichi nindi: “Neyi nifwila nami nikoñi chuma chaloña, chuma chatama dichenzaña mudi ami.” (Rom. 7:21-23) Hamuloña wakubula kuwanina, akaKristu ejima atwalekañahu kulwisha nayitoñojoka yatama yayifuntilaña neyi lunkuñu nimajilu enzalaña mwitala detu. Twatela kutwalekahu kuzata nañovu hakwila twiikali akadi majilu. Tunateli kwila ñahi mwenimu?

10. Tunateli kutondolwela ñahi yilwilu yatama? (1 Yowanu 5:14, 15)

¹⁰ Mulombenu Yehova hachilwilu chatama chimunakulwisha nachu, nakukuhwelela  nenu wukuyitiya nawa wukuyikwasha. (Tañenu 1 Yowanu 5:14, 15.) Hela chakwila Yehova hakufumishahu ochu chilwilu muchihayamishaku, ilaña wukuyinka ñovu yikuyikwasha kubula kuchimwekesha cheñi. (1 Pet. 5:10) Chayinu mpinji, ilenuña yuma kwesekeja nakulomba kwenu kuhitila mukutondolwela yuma yikuletesha mwiikali cheñi nanichi chilwilu chawuntu wawukulu. Chakutalilahu, tondolwelenuña kutala mafilimu, maprogilamu aha TV, hela kutaña nsañu yamwekeshaña oyu yilwilu yimunakukeña kuleka nawu yayiwahi. Nawa bayi mutoñojokaña hayuma yatamaku.—Fwili. 4:8; Kol. 3:2.

11. Yumanyi yitwatela kwila hakwila tutwalekihu kuvwala wuntu wawuha?

¹¹ Hela chakwila mwavuula dehi wuntu wawukulu, chalema kwikala nayilwilu yawuntu wawuha. Munateli kwila ñahi mwenimu? Fwilenuña kumwimbujola Yehova hampinji yimunakudiza hayilwilu yindi. (Efwe. 5:1, 2) Chakutalilahu, neyi mutaña nsañu yamuBayibolu yahosha hadi Yehova chanakenañayi, dihulenu nenu, ‘Komana nanakenaña akwetu?’ Neyi mutaña nsañu yinakumwekesha Yehova chayimwekesheleliyi antu adiña mukukala wushona, dihulenu nenu, ‘Komana ninami nayakamenaña akwetu akakwitiya adi mukukala nikuyililahu yuma yimu?’ Twalekenuhu kuhimpa yitoñojoka yenu kuhitila mukuvwala wuntu wawuha nawa ikalenu adiwunjika hampinji yimunakwila mwenimu.

12. Ñovu yikweti Bayibolu yakuhimpa yilwilu yawantu yamukwashili ñahi manakwetu Stephen?

¹² Manakwetu Stephen ashimunawu hakusambila, wenjili nakwiluka nindi wavwalileña wuntu wawuha chovu-chovu. Wahosheli nindi: “Kufuma tuhu hinapapatisheweli, nahiti mukukala kwakuvulu nankashi kwadi kunletesha kuzuwa swayi. Neyi kudi antu anakunvuloka nadifuminañahu hela kudimwenenahu. Antu amavulu kushilahu nimwinikwami, anhamekaña chinelaña naniku kukala. Chumichi chinakunhayamisha ninami aweni! Nahimpi yilwilu bayi neyi nañovu jami ami aweniku. Ilaña nakuhweleli nami iku kuhimpika kunakumwekesha ñovu yikweti Bayibolu yakuhimpa yilwilu yawantu.”

13. Chumanyi chikutukwasha kwila yuma yaloña? (AÑalija 5:16)

¹³ Tañenu AÑalija 5:16. Hakwila tutwesheña kwila yuma yaloña, Yehova watwinkaña spiritu yindi yajila. Neyi tudiza Izu daNzambi, tunakwiteja iyi spiritu kutukwasha. Twatambwilaña cheñi spiritu yajila neyi tuya nakupompa. Haniku kupompa kwawakaKristu, tunateli kuhanjeka nawamanakwetu niahela, anakuzata nañovu kwila yuma yaloña neyi etu, nawa chumichi chikutukolesha. (Heb. 10:24, 25; 13:7) Nawa neyi tumulomba Yehova chakufuma hamuchima nakumulembelela netu atukwashi mukuzeyazeya kutukweti, wukutwinka spiritu yindi yajila kulonda yitukwashi kutwalekahu kulwisha. Hela chakwila iyi yuma hiyinateli kufumishahu kufwila kwatamaku, ilaña yikutukwasha kudikaña nayitoñojoka yatama yakufwila kwila yuma yatama. Neyi chahosha AÑalija 5:16 nawu, antu endaña naspiritu “[hiyakukoñaña] yuma yafwilaña mujimbaku.”

14. Muloñadi chichalemena kutwalekahu kufwila kwila yuma yayiwahi?

¹⁴ Neyi tutachika kwila yuma yikutukwasha kwikala nawubwambu wakola naYehova, chalema kutwalekahu kwila mwenimu kulonda tufwileña kwila yuma yayiwahi. Muloñadi? Muloña chilumbu chetu wumu hakaamañaku. Iwu chilumbu himuchima wakufwila  kwila yuma yatama. Nihanyima yakupapatishewa hadaha tunateli kutachika kufwila yuma yitwatela kubula kwila, yidi neyi kuhema yisela yalwisu, kusheta hela kutala nyevulu yanzekesi. (Efwe. 5:3, 4) Manakwetu wumu wakansi wahosheli nindi: “Kukala kumu kwasweja kunalwishaña naku hikukomoka akwetu awamayala. Natoñojokeleña nami iku kukala kwakamana, ilaña nichidi kuzuña naku.” Chumanyi chinateli kuyikwasha neyi kufwila kwatama kunatwalekihu?

15. Kwiluka netu “antu ejima alwishaña” nakufwila kwatama chatukoleshaña ñahi? (Talenu mwevulu.)

¹⁵ Hampinji yimunakulwisha nakufwila kwatama kudi neyi chilumbu wababala, anukenuña nenu himudi nkawenuku. Bayibolu yahosha nawu: “Kwosi kweseka kunayimwekeni kwabulaña kumonawu antu ejimaku.” (1 Kor. 10:13a) Bayibolu yikwawu yabalumuna iwu mukuku nawu: “Hikunayiwani kweseka kwabulaña kutwesha antu ejimaku.” Awa mazu ayisonekeleli amayala niambanda akaKristu ashakamineña muKorinda. Amakwawu hakusambila adiña akawujila, akawutumwa niakakusheta. (1 Kor. 6:9-11) Munakutoñojoka nenu hanyima yakupapatishewa, hiyalwishileñahu nakufwila kwatama kudi kwejimaku? Alwishileña. Hela chakwila wejima wawu adiña akaKristu awayishewa, ilaña achidiña antu abula kuwanina. Chakadi nikujina, alwishileña nakufwila kwatama mpinji yejima. Chumichi chatukoleshaña. Muloñadi? Muloña chinakumwekesha nawu kufwila kudi kwejima kumwalwishaña naku, kudi muntu wakushindahu dehi. Mwamweni, munateli kutwalekahu kwikala “akola mbe-e muchikuhwelelu, nanochu chimuneluki nenu makabi wowamu imunakuhitamu, diwu anakuhitamu nianakwenu ejima.”—1 Pet. 5:9.

16. Muhetwinyi wutwatela kutondolwela, nawa muloñadi?

¹⁶ Bayi mufwa mumuhetu wakutoñojoka  nenu kwosi muntu wunateli kutiyishisha kukala kumunakumonaku. Kutoñojoka muniyi njila kukuyiletesha kukunkulula nenu kukala kumunakumona kwila kumana nehi nawa nenu himukutwesha kushinda kufwila kwatamaku. Ilaña Bayibolu yahosha chambukaku. Yahosha nawu: “Nzambi washinshika, nawa hakwiteja kuyeseka kubadika muñovu jenuku, ilaña neyi kweseka kunayiwani, wukuyiloñeshela ninjila kulonda mutweshi kuumika.” (1 Kor. 10:13b) Dichi, hela chakwila tunakulwisha nakufwila kwatama nankashi, tunateli kuumika. Yehova wukutukwasha kubula kukoña chuma chatama.

17. Hela chakwila hitukutwesha kukañesha kufwila kwatama kwinza mudi etuku, chumanyi chitwatela kwila?

¹⁷ Mpinji yejima anukenuña chumichi: Chineli mwawanina wanyi, kwila mutwesha kukañesha kufwila kwatama kwinza mudi enu nehi. Ilaña neyi hikukwinza mudi enu, kukaanenu hohenohu neyi chashikeneniyi Yosefu kumutemuka ñoda Potifwari. (Kutach. 39:12) Bayi mwiteja kufwila kwatama kuyikojeji kwila chuma chatamaku!

18-19. Malwihwinyi itwatela kudihula etu aweni hampinji yitunakuzata nañovu hakwila tuhimpi yitoñojoka yetu?

¹⁸ Hakwila tuhimpi yitoñojoka yetu twatela kutwalekahu kuzata nañovu kulonda tutoñojokeña nikwila yuma kwesekeja nachakeñañayi Yehova. Dichi mwatela kudishinshikaña enu aweni nakudihula nenu: ‘Komana nelaña yuma yamwekeshaña nawu neluka nami tunakushakama mumafuku akukuminina? Inakuzata nañovu kuvwala wuntu wawuha? Komana netejaña spiritu yaYehova kunlombola kulonda nibuleña kwiteja kufwila kwatama kunleteshi kwila chuma chatama?’

¹⁹ Chimunakudishinshika enu aweni, talenuña hayuma yimunakwila chiwahi, bayi hakukeña nenu mwiikali awaninaku. Neyi mumona nenu hadi himwatela kuhimpa, bayi muzeyaku. Ilaña, londelenu kufumba kwekala haAFwilipi 3:16 kwakwila nawu: “Kwesekeja nakupama kwejima kutunapaminiku, tutwalekenuhu kwenda chiwahi muniyi njila yoyimu.” Neyi mwila mwenimu, kuhwelelenu nenu Yehova wukuyikwashaña chimukuzataña nañovu hakwila muhimpi yitoñojoka yenu.