1-2. Bapatiso murinai dounu dahaka baita kara be namo? Ba herevalaia.

 EMU ruma be nega hida o haḡoevaiamu? Reana ba noholaia matama neganai, o haḡoevaia ḡoevaḡoeva. To una murinai so haḡoevaia be ede bamona? Emu ruma toana baine namo totona, namona na ba haḡoevaia hanaihanai.

² Una heḡereḡerena, hanaihanai baita hekwarahi eda lalohadai bona kara baita hamaoromaorodia. Momokani, do asita bapatiso ai ita na ta hekwarahi eda mauri ai ḡau haida ta haidau, anina na “tau-anina bona lauma ihadikadia karadia iboudiai” ta huri oho. (2 Kor. 7:1) To hari, namona na Paulo ena sisiba baita badinaia, eto, “daramui ba hamatamata.” (Efe. 4:23) Dahaka dainai hanaihanai unu baita kara toma? Badina ina tanobada ena lalohadai ese eda lalohadai bona kara na baine hamirodia o baine hadikadia haraḡa diba. Una basine vara bona Iehova matanai baita ḡoeva totona, namona na eda lalohadai, kara, bona ura na baita sekedia loulou.

3. “Lalomui ba hamatamata” anina be dahaka? (Roma 12:2)

³ Dahaka baita kara unu amo laloda baita hamatamata o eda  lalohadai daladia baita haidau? (Roma 12:2 ba duahia.) Grik gado herevana e hahanaia “lalomui ba hamatamata” anina na lalomui ba haḡoeva. Una dainai, eda mauri ai kara namodia haida mo baita kara na dia heḡereḡere. To, namona na eda lalohadai bona kara baita haerodia namonamo, unu amo baita diba ededia be baita haidaudia, Iehova ena taravatu heḡereḡerena baita mauri totona. Una na baita karaia hanaihanai ḡauna.

4. Dahaka baita kara ina nega oromana ese eda lalohadai basine biagua totona?

⁴ Ita baita ḡoevadaemu neganai, baita karamu ḡaudia iboudiai lalodiai Iehova baita hamoaleamu. To hari, namona na baita hekwarahi Iehova baita hamoalea. Roma 12:2 ai, Paulo ese laloda baita hamatamata bona Dirava ena ura baita diba na e gwauraidia hebou. Ina nega oromana ese eda lalohadai basine biagua totona, ḡau ginigunana na siboda baita heseke, iseda ura bona ta abi hidimu ḡaudia be Dirava ena lalohadai heḡereḡerena eiava lasi.

5. Iehova ena dina e kahikahimu dainai, ta ta siboda ese ededia henanadai baita lalodia diba? (Laulau ba itaia.)

⁵ Ina aita laloa, Iehova na e uramu ita ese ‘ena dina ena mai baita naria.’ (2 Pet. 3:12) Sibomu ba henanadai: ‘Lau egu mauri dalana ese e hahedinaraiamu lau na lalopararamu ina nega oromana dokona na kahirakahira, a? Edukeisin eiava moni ḡaukara ai na karaiamu abi hidina ese e hahedinaraiamu lau ese Iehova ena hesiai ḡaukara na laloa badamu, a? Lau be na abidadamamu Iehova ese lau bona egu bese na be narimaimu, eiava lau na hanaihanai tauanina ḡaudia na lalohekwarahilaimu, a?’ Iehova na be moalemu bema ena ura heḡereḡerena ai baita maurimu.​—Mat. 6:25-27, 33; Fili. 4:12, 13.

6. Hanaihanai dahaka baita kara be namo?

 ⁶ Namona na hanaihanai ta lalomu ḡaudia na baita haerodia, unu amo baita diba dahaka baita haidaudia. Paulo ese Korinto taudia e hamaorodia, eto: “Sibomui ba hetahu bona sibomui ba hediba, umui na abidadama taumui eiava lasi.” (2 Kor. 13:5) Baita “abidadama” anina na hebou baitala bona haroro ḡaukara baita karaia, to dia una mo, namona na eda lalohadai, ura, bona eda kara badidia baita haero. Una baita karaia dalana na, Dirava ena Hereva baita duahia, ia e lalohadaimu heḡereḡerena baita lalohadai, bona Ia ihamoalena karadia baita kara.​—1 Kor. 2:14-16.

7. Efeso 4:31, 32, heḡereḡerena, dahaka ma baita kara, bona dahaka dainai una na mai hekwarahina?

⁷ Efeso 4:31, 32 ba duahidia. Laloda baita hamatamata mo na dia heḡereḡere, to namona na “tau matamatana” o kara matamata baita hahedokilaia danu. (Efe. 4:24) Una anina na ḡau haida baita kara. Heḡereḡere, baita hekwarahi heiriheiri karadia, daḡedaḡe, bona badu baita dadaraidia. Dahaka dainai unu baita kara tomamu na mai hekwarahina? Badina unu kara haida na ta manadalai. Heḡereḡere, Baibul na e gwaumu haida na “badu” o “badu momo” taudia. (Her. 29:22) Kara unu bamodia e manadalai taudia na bapatiso murinai danu, dounu be hekwarahimu unu kara bae dadarai, bona baita herevalaiamu ekspiriens ese una be hahedinaraiamu.

8-9. Edena dala ai Stephen ena ekspiriens ese e hahedinaraiamu hanaihanai kara gunadia baita dadarai na namo?

⁸ Tadikaka ta ladana Stephen enai na auka ena badu baine biagua totona. Ia na e gwaumu: “Na bapatiso murinai danu, dounu na hekwarahiva egu badu baina biagua. Heḡereḡere, nega ta ruma ta ruma ta haroro ḡaukara a karaiava lalonai, raskol ta na havaia, badina egu motuka amo reidio e henaoa. Na kahikahi neganai, ia na una reidio e hamorua bena e heau boio. Reidio na abia lou sivaraina na grup taudia vairadiai na gwauraia neganai, elda ese e nanadaigu, ‘Stephen, ia boma dogoatao neganai dahaka boma kara?’ Una henanadai ese e durugu ma haida ida baina maino totona baina hekwarahi na namo.” b

⁹ Stephen ena ekspiriens ese e hahedinaraiamu, ta manadalaia karana ta na baita karaia lou dibamu, ena be ta laloamu una na ta dadaraia. Bema oiemu ai una baine vara, basio lalomanoka bona basioto oi na dia Kristen tauna namona. Aposetolo Paulo danu e gwa: “Kara namo baina karaia na tomu, to dika na egu ai e miamu.” (Roma 7:21-23) Kristen taudia iboudiai na dia ḡoevadae dainai edia kara gunadia na be hedinarai louloumu, kahu bona miro na ruma ai e vareai louloumu heḡereḡerena. Namona na hanaihanai baita hekwarahi eda kara bae ḡoeva. Edena dala ai?

10. Kara gunadia be ede baita dadaraidia toma? (1 Ioane 5:14, 15)

¹⁰ Emu kara gunana ba dadaraia totona Iehova ba ḡuriḡuri henia, bona bavabia dae ia na be kamonaimu bona be durumumu. (1 Ioane 5:14, 15 ba duahidia.) Iehova na dia hoa dalanai una kara be kokiamu, to goada be henimumu una kara basio karaia totona. (1 Pet. 5:10) Namona na emu ḡuriḡuri heḡereḡerena, ba hekwarahi ura dikadia e havaramu ḡaudia ba dadarai. Heḡereḡere, unu kara e hahedinaraimu muvidia bona televisen program basio ita eiava bukadia basio duahi. Bona ura dikadia na basio abi.​—Fili. 4:8; Kol. 3:2.

11. Kara matamata baita hahedinarai totona dahaka baita kara?

 ¹¹ Ena be kara gunadia na vada o dadarai, to kara matamata ba hahedinarai na mai anina bada. Edena dala ai unu ba kara toma? Dalana na, Iehova ena kara ba dibadia bona ba tohotohodia. (Efe. 5:1, 2) Heḡereḡere, Baibul ai Iehova ese dika e gwautaomu sivaraina ta o duahiamu neganai, sibomu ba henanadai, ‘Lau ese haida edia dika na gwautaomu, a?’ Eiava Iehova ese nega aukadia ai haida e bogadia hisi sivaraina ta o duahiamu neganai, sibomu ba henanadai, ‘Tadikaka taihu metau e davarimu negadiai na lalodiamu bona na durudiamu, a?’ Lalomu o hamatamataiamu bona kara matamata o hahedinaraimu lalonai, ba haheauka na namo.

12. Edena dala ai Stephen ena ekspiriens ese e hahedinaraiamu, Baibul na mai siahuna ta ena kara baine haidaua?

¹² Stephen, guna ta herevalaia tadikakana, na taina ruana kara matamata vada e hahedinarai. Ia na e gwa: “Na bapatiso negana amo, ihabadugu ḡaudia momo e vara. To na dibaia ḡauna na, e habadugumu taudia edia amo baina raka oho eiava dala ma haida ai egu badu baina biagua. Unu na kara toma dainai, taunimanima momo bona adavagu ese danu e hanamogu. Lau danu na hoa! To dia sibogu egu goada dainai egu kara na haidau. Na abia daemu, unu na kara toma ese e hahedinaraiamu Baibul na mai siahuna ta ena kara baine haidaua.”

13. Dahaka ese baine duruda kara maorodia baita kara? (Galatia 5:16)

¹³ Galatia 5:16 ba duahia. Iehova ese ena lauma helaḡa amo be durudamu kara maorodia baita kara. Dirava ena Hereva ta stadilaiamu neganai, dala ta kehoamu una lauma helaḡa ese baine duruda totona. Danu hebou ta laomu negadiai lauma helaḡa ta abiamu. Unu hebou ai tadikaka taihu ida ta hahegoada hehenimu; idia danu ita heḡereḡereda e hekwarahimu kara maorodia bae kara. (Heb. 10:24, 25; 13:7) Bona mai momokanida ida Iehova baita ḡuriḡuri heniamu neganai, ia ese ena lauma helaḡa be henidamu, unu amo eda manoka ḡaudia baita dadaraimu. Ena be stadi, hebou bona ḡuriḡuri karadia ese ura dikadia na basie kokidiamu, to be duruda dibamu unu ura dikadia baita dadaraidia. Galatia 5:16 ena hereva heḡereḡerena, lauma ena dala ai e rakamu taudia ese ‘tau-anina ena ura basie karaia.’

14. Dahaka dainai hanaihanai kara maorodia ikaradia urana baita habadaia na mai anina bada?

¹⁴ Eda hetura karana Iehova ida ihagoadana karadia ta karamu lalonai, namona na hanaihanai kara maorodia ikaradia urana baita habadaia. Dahaka dainai? Badina ita inaida ta na se mahutamu. Una na kara dika ikarana hedibaḡanina. Bapatiso murinai danu baita dadaraidia na namo ḡaudia, heḡereḡere ponografi, laki gadara, bona inuinu kekero karadia ese laloda na be verimu. (Efe. 5:3, 4) Eregabe tadikakana ta na e gwa: “Na hekwarahilaia ḡauna badana ta na, memero iura henidia urana baina dadaraia. Na laloa unu hemami na be oremu, to dounu unu hemami na abimu.” Dahaka ese baine durumu bema ura dikana ta lalomu ai na goada herea?

15. Ta dibamu “taunimanima iboudiai” ese ura dikadia e abimu, una ese ita be ede e duruda tomamu? (Laulau ba itaia.)

¹⁵ Ura dikana ta idadaraina totona ta hekwarahimu neganai, baita helalotao una na  dia ita edai mo e varamu. Baibul na e gwaumu: “Vada e butumui taomu hedibaḡanidia na taunimanima iboudiai ese e haheaukalai hedibaḡanidia heḡereḡeredia.” (1 Kor. 10:13a) Una na Korinto ai e nohova Kristen tatau bona hahine e tore henidia herevana. Guna idia haida na e heuda-hanaiva, tatau na hahine edia kara e karava eiava hahine na tatau edia kara e karava, bona e kekerova. (1 Kor. 6:9-11) O laloamu idia e bapatiso murinai ura dikadia be ma asie abi lou, a? Lasi. Idia na horoa Kristen taudia to dounu mai edia kara dika. Una dainai nega ta ta ura dikadia na e abiva. Una ta dibamu ese ita na e hagoadadamu. Dahaka dainai? Badina oi ese o hekwarahilaiamu ba dadaraia ura dikana na, ma ta ese vada e dadaraia. Oibe, namona na “abidadama ai ba gini tutuka-tutuka; ba diba, o animu hisidia heḡereḡeredia varavaramui tanobada heḡeḡe-madai ai danu e animu.”​—1 Pet. 5:9.

16. Edena lalohadai baita dadaraia na namo, bona dahaka dainai?

¹⁶ Ta ese oiemu hekwakwanai se lalopararalaiamu lalohadaina na ba dadaraia. Badina unu bo lalo tomamu neganai, bo mamiamu oi na asi idurumu bona asi goadamu ura dikadia ba dadarai. To, Baibul na e gwaumu: “Dirava na momokani; ia ese baine narimui, emui goada e hereaiamu hedibaḡanina ta ese baine butumui tao na garina; hedibaḡani negana ai ia ese emui roho mauri dalana baine henimui, bena ba haheaukalaia diba.” (1 Kor. 10:13b) Una dainai, ena be ura dikana ta na goada herea, to baita dadaraia diba. Oibe, Iehova ena heduru amo baita kwalimu diba.

17. Ura dikadia lalodai bae vara neganai dahaka baita kara?

¹⁷ Namona na ina baita laloatao: Ita na dia ḡoevadae dainai, ura dikadia na lalodai bae vara diba. To una e varamu neganai, baita  dadaraidia haraḡa, Iosef e kara heḡereḡerena, ia na Potifara adavana ena amo e heau oho haraḡa. (Gen. 39:12) Namona na ura dikadia basita badinadia!

18-19. Ita ta ta ese ededia henanadai baita lalo na namo?

¹⁸ Ita ese laloda baita hamatamata anina na, hanaihanai baita hekwarahi eda lalohadai bona kara na Iehova ena ura ida bae heḡereḡere. Unu baita kara toma totona, namona na ta ta eda mauri baita haeroa bena baita henanadai: ‘Egu kara amo na hahedinaraiamu lau be na lalopararamu nega dokona na vada kahirakahira, a? Egu kara na hamatamatamu, a? Dala na kehoamu Iehova ena lauma helaḡa ese baine hakaugu ura dikadia baina dadarai totona, a?’

¹⁹ Emu mauri o haeroamu neganai, emu kara o hanamodiamu dainai ba moale, dia ba ḡoevadae dainai. Bema o itaiamu ḡau haida na ba hanamo, basio lalomanoka. To, Filipi 3:16 ena hereva ba badinaia, etomu: “Vada ta davari ḡaudia heḡereḡeredia ai baita raka.” Namona na ba diba bema bo hekwarahimu lalomu bo hamatamataiamu neganai, Iehova ese be hanamomumu.