1-2. Ki nou bizin kontign fer apre nou batem? Explike.

 ESKI to netway to lakaz souvan? Kitfwa premie fwa ki to ti rant dan to lakaz, to ti netway li afon. Me ki pou arive si to pa netway li ankor? Kouma to kone, bien vit to lakaz pou vinn sal. Pou ki to gard to lakaz dan enn bon leta, to bizin netway li regilierman.

² Nou bizin fer bann mem zefor kan sa konsern nou fason panse ek nou personalite. Biensir, avan ki nou pran batem, nou fer boukou zefor pou fer bann sanzman ki bizin pou “pirifie noumem, [ek] separ nou avek tou seki kapav sali nou lekor ek nou lam.” (2 Kor. 7:1) Me aster-la, nou bizin swiv konsey ki lapot Pol ti done pou kontign ‘renouvle nou konpletman.’ (Efe. 4:23) Kifer nou bizin kontign fer sa zefor-la? Parski bien vit, linflians sa lemond-la kapav fer nou vinn sal devan Zeova. Pou evit sa ek pou res prop devan Zeova, nou bizin regilierman examinn nou fason panse, nou personalite, ek nou bann dezir.

3. Ki savedir lexpresion ‘transform zot lintelizans’? (Romin 12:2)

³ Ki nou bizin fer pou transform nou lintelizans, setadir pou sanz nou fason panse? (Lir Romin 12:2.) Lexpresion Grek ki’nn servi pou lexpresion ‘transform zot lintelizans’ vedir osi “renouvle zot fason panse.” Alor, sa pa vedir ki nou bizin fer zis de-trwa bon kitsoz. Okontrer, nou bizin examinn noumem ek fer ninport ki sanzman ki bizin pou ki nou lavi an-akor avek seki Zeova demande. Nou bizin fer sa, pa zis enn fwa, me touletan.

4. Kouma nou kapav fer sir ki sa move lemond-la pa pe inflians nou?

 ⁴ Kan nou pou parfe, nou pou touletan reisi fer seki Zeova anvi nou fer. Me pou linstan, nou bizin kontign fer bann zefor pou ki nou reisi fer Zeova plezir. Remarke ki dan Romin 12:2, Pol dir ki nou bizin transform nou lintelizans pou ki nou reisi kone seki Bondie anvi nou fer. Alor, olie ki nou les sa move lemond-la inflians nou, nou bizin examine ki kantite nou pe les fason panse Bondie inflians nou bann lobzektif ek nou bann desizion.

5. Kouma nou kapav kone si pou nou, zour Zeova li pre? (Get zimaz.)

⁵ Anou get enn lexanp. Zeova anvi ki nou kontign “atann zour Lesegner.” (2 Pier 3:12) Alor, demann tomem: ‘Eski fason ki mo viv montre ki mo konpran ki lafin sa lemond-la bien pre? Eski mo bann desizion konsernan mo ledikasion ouswa mo travay montre ki servi Zeova se kitsoz ki pli inportan dan mo lavi? Eski mo ena lafwa ki Zeova pou donn mwa ek mo fami seki nou bizin, ouswa eski mo touletan gagn traka konsernan bann kitsoz ki mo bizin?’ Mazine ki kantite Zeova pou kontan kan Li trouv nou fer bann sanzman dan nou lavi, pou ki nou fer Li plezir.​—Mat. 6:25-27, 33; Fil. 4:12, 13, NW.

6. Ki nou bizin kontign fer?

⁶ Nou bizin examinn nou fason panse regilierman ek osi fer bann sanzman ki bizin. Pol ti dir bann Korintien: “Examinn zotmem pou verifie si zot pe viv dan lafwa. Teste zotmem.” (2 Kor. 13:5) “Viv dan lafwa” vedir plis ki zis asiste bann renion ek prese detanzantan. Sa inplik osi nou fason  panse, nou bann tandans, ek nou motivasion. Alor, nou bizin transform nou lintelizans kan nou lir Parol Bondie, kan nou aprann pou pans parey kouma Zeova, ek kan nou fer bann sanzman ki bizin pou ki nou viv dapre volonte Zeova.​—1 Kor. 2:14-16.

7. Dapre Efezien 4:31, 32, ki kitsoz ankor nou bizin fer, ek kifer sa kapav difisil?

⁷ Lir Efezien 4:31, 32. Anplis ki nou bizin fer bann sanzman dan nou fason panse, nou bizin ‘abiy nou avek enn nouvo natir,’ setadir met nouvo personalite lor nou. (Efe. 4:24) Nou bizin fer bann zefor pou fer sa. Anplis, nou pou bizin fer boukou zefor pou tir bann defo kouma lamertim, laraz, ek koler. Kifer sa kapav difisil? Parski li posib ki sertin defo bien anrasine dan noumem. Par exanp, Labib dir ki sertin dimounn “ena tandans pou ankoler” ek “kontan fer laraz.” (Prov. 29:22) Kitfwa, pou kontrol sa bann defo-la, nou pou bizin kontign fer bann zefor mem apre nou batem. Se seki nou pou trouve dan bann lexanp ki nou pou gete aster-la.

8-9. Kouma lexanp Stephen montre nou ki li bien inportan ki nou tir nou vie personalite?

⁸ Enn frer ki apel Stephen ti pe gagn difikilte pou kontrol so koler. Li dir: “Mem apre mo batem, mo ti bizin kontign travay lor mo karakter. Par exanp, enn fwa kan nou ti pe prese, enn kikenn ti kokin radio ki ena dan mo loto. Lerla, mo’nn galoup deryer li. Kan mo’nn vinn pre avek li, li’nn zet radio-la ek li’nn sove. Kan mo’nn rakont lezot kouma mo’nn reisi regagn mo radio, enn ansien dan group-la ti demann mwa, ‘Stephen, ki to ti pou fer si to ti reisi trap voler-la?’ Sa kestion-la ti fer mwa reflesi ek ti pous mwa pou kontign fer bann zefor pou vinn enn kikenn ki fer lape.” b

⁹ Kouma lexanp Stephen montre nou, enn defo kapav revini enn kout koumsa, mem si nou panse ki nou ena kontrol lor li. Si sa ariv twa, fode pa to dekouraze ek panse ki to enn move Kretien. Mem lapot Pol ti rekonet: “Kan mo oule fer kiksoz bien, mo retrouv mwa pe fer lemal.” (Rom. 7:21-23) Tou bann Kretien inparfe bizin fer fas ar bann defo ki kapav revini parey kouma lapousier ki revini dan nou lakaz. Nou bizin kontign fer zefor pou res prop. Kouma nou kapav fer sa?

10. Kouma nou kapav lit kont nou bann defo? (1 Zan 5:14, 15)

¹⁰ Priye Zeova konsernan defo lor ki to anvi travay, ek ena konfians ki Li pou tann twa ek ed twa. (Lir 1 Zan 5:14, 15.) Mem si Zeova pa pou fer enn mirak ek eliminn to defo, Li pou donn twa lafors ki to bizin pou ki to nepli manifeste sa defo-la. (1 Pier 5:10) Anmemtan, azir an-akor avek to bann lapriyer kan to pa fer bann kitsoz ki kapav fer to vie personalite revini. Par exanp, fer atansion ar bann fim ek bann program televizion ki to gete, ouswa ar bann zistwar ki to lir. Fode pa ki sa bann kitsoz-la fer defo ki to pe anvi rezete, paret enn kitsoz ki bon. Ek osi, pa les to lespri kontign pans lor bann move dezir.​—Fil. 4:8; Kol. 3:2.

11. Ki kitsoz nou kapav fer pou met nouvo personalite lor nou?

 ¹¹ Mem si to’nn tir vie personalite lor twa, li inportan ki to manifeste nouvo personalite dan to lavi. Kouma to kapav fer sa? Amezir ki to aprann plis lor bann kalite ki Zeova ena, fixe twa lobzektif pou imit Li. (Efe. 5:1, 2) Par exanp, kan to lir bann pasaz dan Labib ki koz lor fason ki Zeova pardonn lezot, demann tomem: ‘Eski mo pardonn lezot?’ Kan to lir ki Zeova ena konpasion pou bann ki pe pas dan bann moman difisil, demann tomem: ‘Eski mwa osi, mo ena mem santiman pou mo bann frer ek ser ki bizin led? Eski mo montre sa par mo bann aksion?’ Kontign transform to lintelizans kan to met nouvo personalite lor twa, ek ena pasians anver tomem kan to fer sa.

12. Kouma lexanp Stephen montre nou ki Labib ena pouvwar pou sanz lavi bann dimounn?

¹² Stephen, ki nou ti mansione avan, ti trouve ki tigit-tigit li ti pe kapav met nouvo personalite lor li. Li dir: “Depi ki mo’nn pran batem, mo’nn fer fas ar diferan sitiasion kot mo ti bizin kontrol mo koler. Mo’nn aprann pou evit bann dimounn ki esey provok mwa, ouswa pou aret enn sitiasion avan ki li vinn pli pir. Boukou dimounn, ek parmi ena mo madam, inn felisit mwa pou fason ki mo zer sa bann sitiasion-la. Mo ti etone ar momem! Me mo kone ki se pa gras-a mwa ki mo’nn reisi fer sa bann sanzman-la dan mo personalite. Okontrer, pou mwa sa se enn prev ki Labib ena pouvwar pou sanz lavi bann dimounn.”

13. Ki kitsoz pou ed nou pou fer seki drwat? (Galat 5:16)

¹³ Lir Galat 5:16. Pou ed nou pou fer seki drwat, Zeova donn nou so lespri sin. Kan nou etidie Parol Bondie, nou les lespri sin Bondie diriz nou. Nou osi gagn lespri sin kan nou asiste nou bann renion. Pandan sa bann renion-la, nou kapav zwenn nou bann frer ek ser, ki parey kouma nou, pe fer boukou zefor pou fer seki drwat, ek sa bien ankouraz nou. (Ebre 10:24, 25; 13:7) Ek kan nou priye Zeova ek sipliy Li pou ed nou pou lit kont nou bann febles, Li pou donn nou so lespri sin pou ki nou gagn lafors pou kontign lite. Mem si kitfwa sa bann kitsoz-la pa pou fer nou bann move dezir disparet, zot pou ed nou pou pa azir dapre sa bann move dezir-la. Parey kouma Galat 5:16 dir, bann ki les lespri diriz zot lavi “pa pou viv dapre dezir laser.”

14. Kifer li bien inportan pou kontign devlop dezir pou fer seki drwat?

¹⁴ Kan nou’nn koumans fer bann kitsoz ki ed nou pou ena enn bon relasion avek Zeova, li bien inportan ki nou gard sa bann bon labitid-la ek ki nou kontign devlop dezir pou fer seki drwat. Kifer? Parski nou ena enn lennmi ki zame pa pou aret lager kont nou. Sa lennmi-la, se tantasion pou fer seki pa bon. Mem apre nou batem, kitfwa nou pou trouve ki nou atire pou fer bann kitsoz ki fode pa nou fer. Par exanp, ena zwe larzan, bwar tro boukou lakol, ouswa get pornografi. (Efe. 5:3, 4) Enn zenn frer dir: “Enn parmi bann kitsoz ki ti pli difisil pou mwa, se ki mo ti atire ar bann  dimounn mem sex ki mwa. Mo ti panse ki sa bann santiman-la ti pou ale avek letan, me sa bann santiman-la pe kontign fatig mwa.” Ki kitsoz kapav ed twa si to ena enn move dezir ki bien for?

15. Kouma sa kapav ankouraz nou kan nou kone ki nou bann move dezir “parey kouma seki tou dimoun gagne”? (Get zimaz.)

¹⁵ Amezir ki to pe lit kont enn move dezir, kitfwa to pe trouve ki sa dezir-la li parey kouma enn lennmi ki bien malin. Me rapel ki to pa tousel. Labib dir: “Tou tantasion ki zot finn gagne li parey kouma seki tou dimoun gagne.” (1 Kor. 10:13a) Sa verse-la ti konsern bann zom ek bann fam ki ti viv dan Korint. Avan, sertin parmi zot ti bann soular, bann omosexiel, ouswa ti pratik ladilter. (1 Kor. 6:9-11) Eski to panse ki apre zot batem, zame zot pa ti pou bizin lit kont bann move dezir? Non, sa li pa posib. Mem si zot tou ti bann Kretien ki ena lesperans pou al dan lesiel, zot ti kanmem bann dimounn inparfe. Alor, pena dout ki detanzantan, zot ti ena pou lit kont bann move dezir. Sa bizin ankouraz nou tou. Kifer? Parski sa montre ki mem si to pe lit kont bann move dezir, ena lezot ki’nn deza reziste kont sa bann move dezir-la. Alor, vremem to kapav ‘res touzour ferm dan lafwa parski to kone ki to bann frer ek ser dan lemonn antie pe pas par mem kalite soufrans.’​—1 Pier 5:9.

16. Ki piez nou bizin evite, ek kifer?

¹⁶ Evit tom dan piez pou panse ki personn pa kapav konpran par ki difikilte to pe pase. Si to pans koumsa, sa kapav fer twa panse ki pena okenn lespwar dan to sitiasion ek ki to pa kapav reziste kont to bann move dezir. Rapel ki Labib dir nou: “Bondie fidel dan so promes ek li pa pou les zot gagn enn tantasion ki  zot pa kapav tini. Kan zot pou tante, li pou donn zot enn sime pou sorti ladan.” (1 Kor. 10:13b) Alor, mem si to bann move dezir bien for, to kapav res fidel ar Zeova. Avek led Zeova, to kapav evit fer seki move.

17. Mem si kitfwa nou pa kapav evit ena bann move dezir, ki kitsoz nou kapav kontrole?

¹⁷ Touletan rapel sa: Nou bann dimounn inparfe ek nou pa kapav evit ena bann move dezir. Me kan nou ena bann move dezir, nou kapav rezet zot deswit, parey kouma Zozef ti fer kan li ti sove devan Potifar so madam. (Zen. 39:12) To pa oblize les to bann move dezir kontrol twa!

18-19. Ki bann kestion nou kapav poz noumem amezir ki nou transform nou lintelizans?

¹⁸ Nou bizin kontign fer zefor pou transform nou lintelizans pou ki nou pans ek azir dapre volonte Zeova. Pou ki to reisi fer sa, examinn tomem regilierman ek demann twa: ‘Eski fason ki mo viv montre ki mo rekonet ki lafin bien pre? Eski mo pe kontign fer zefor pou met nouvo personalite lor mwa? Eski mo pe les lespri sin Zeova diriz mo lavi pou ki mo kapav reziste kont mo bann move dezir?’

¹⁹ Kan to examinn tomem, pa atann ki to parfe. Me to bizin kontan ar bann progre ki to’nn fer. Si to trouve ki to ankor ena bann sanzman pou fer, pa dekouraze. Okontrer, swiv konsey ki ena dan Filipien 3:16: “Me kot nou finn arive [dan nou progre], anou kontigne tini ferm dan mem direksion.” Kan to fer sa, to kapav sir ki Zeova pou beni to bann zefor pou kontign transform to lintelizans.