1-2. Isiyani ihinlamuliyeehu uhiya upanka napattisiyaka?

 NYUUVA nnaakwecaka wapuwani winyu? Pooti ukhalaka wiira Nhinaaya uthamela wapuwani winyu, nyuuva mwahokwecakweca cinene. Masi isiyani yaahala wiirannya wakhalaka wiira nnaathamela woohikweca-tho? Inupeenyu yaahala ukhala yootakhalaca ni yanhala uhiiryaca. Napheelaka ukhalana inupa yooreera, nihaana nirattelaka woohihiyerera.

² Inanna imocaaru, napheelaka ukhalana moopuwelelo ni meettelo anoncivela Yehova, khaninlamuliya unyoonyaciya ni nihaana nihihiyereraka wiikurumica. Ninaacuwela wiira nihinaaya upattisiya, hi nihopanka marukunuso moolupale muukumini wihu wiira nihiye citthu cootakhala “cinhiiriha irutthu.” (2 Akor. 7:1) Masi vano, nihaana nittharaka ikano ya apostolu Paulu imphwanyannya nhina Efesu 4:23, ineera: “Nhihiye urehererya moopuwelelweenyu.” Kontha isiyani khaninlamuliya uhiya urehererya moopuwelelweehu? Kontha ikokhola ni citthu coohiirya co ila ituninyeela pooti waakuva ukela mmoopuweleloni wihu. Wiira iyo itthwiiyo ihiniirannyeele ni wiira nihihiye untteeliha nrima Yehova, hiiva nihaana nihihiyaka uweheeha moopuwelelweehu, meettelweehu ni nrimeehu.

3. ‘Urehererya moopuwelelweehu’ maanaaya isiyani? (Nwehe Arooma 12:2.)

³ Ninhala ukhitiri cani urehererya moopuwelelweehu awula urukunusa mananna hiiva ninoopuweleehu? (Nsome Arooma  12:2.  b) Uhiya paahi wiikurumica upanka citthu comaana, hiiva nihaana ciicammo nirukunusaka makhalelweehu nhina wihu awula wanrimani wihu ni urukunusa mananna ninoopuweleehu wiira nintteelihe nrima Yehova. Khaninlamuliya upanka iyo itthwiiyo ikwaha imoca paahi. Masi nihaana nipankaka woohihiyerera.

4. Isiyani inlamuliyeehu upanka wiira moopuwelelweehu ahihapusiye nimoopuwelelo ontuninyani?

⁴ Nakhalaka atthu oohipahuwa, ninaahala ukhitiri untteeliha nrima Yehova ukati wotheene. Masi nenna coo nihaana niikurumicaka wiira meettelweehu antteelihe nrima Yehova. Nhina Arooma 12:2, apostolu Paulu enre wiira nihaana nirehereraka moopuwelelweehu wiira nicuwele itthu innipheelelaawe Nluku. Hi khaninlamuliya uhiya ila ituninyeela inihapusaka. Masi nihaana niwehaka mananna ciriihu wiira nicuwele wakhala wiira citthu cinlakeleehu ni cimpheeleehu cintthara moopuwelelo o ntuninyani awula mena.

5. Makohoni anlamuliyeehu wiipanka anhala unikavihera woona mananna cinwehereehu uwa wo nihuku na Yehova? (Nwehe ilatarato.)

⁵ Ibiiblya ineera wiira nihaana ‘nihiliyalaka wiira ninaahala uwa nihuku na Yehova.’ (2 Pet. 3:12) Mwiikohe co: ‘Mananna cinkhalaaka muukumini waka kinawoonihera wiira kinaakupali wiira ila ituninyeela ihanle vakaani uphiya umwiiso? Citthu cinlakelaaka nhina nteko awula usoma cinaathoonyera wiira unswalela Yehova phi itthu yoopacera muukumini waka? Kinaakhuluvela wiira unswalela Yehova naahala ukikavihera miiva ni amucyaaka uphwanya itthu yowiilihera awula kinkhala kitothaka mihakhu?. Khweeliini, Yehova naakhala ootteeliya nrima venci anoonaka wiira ninawiikurumica untteeliha nrima nhina citthu cotheene cimpankeehu.—Mat. 6:25-27, 33; Afili. 4:12, 13.

6. Isiyani ihinlamuliyeehu uhiya upanka?

 ⁶ Hi nihaana niweheehaka moopuwelelweehu ni upanka marukunuso woohihiyerera. Apostolu Paulu aheera: “Nhihiye wiiweheeha khampa wiira nanlelo munnaamini. Nhihiye uviriha mwaavi inanna nyuuva ciriinyu.” (2 Akor. 13:5) ‘Waamini’ khunaaciya paahi urwaa umikutthaanoni ni wuulalyaani ukati nkhwaawe. Waamini unaahela nhina moopuwelelweehu, meettelweehu ni citthu cimpheeleehu. Phimaana, wiira nirehererye moopuwelelweehu, nihaana nihihiyaka usoma Nuulumo na Nluku, wiitthuca wuupuwela khampa Yehova cinoopuwelaawe ni wiikurumica upanka yotheene inkhitiriihu wiira nintteelihe nrima Yehova.—1 Akor. 2:14-16.

7. Toko cinthoonyeraaya Efesu 4:31, 32, isiyani-tho inlamuliyeehu upanka, ni kontha isiyani iyo itthwiiyo pooti unirika?

⁷ Nsome Efesu 4:31, 32. c Uhiya urukunusa moopuwelelweehu paahi, hiiva ciicammo nihaana ‘niwarelaka meettelo ophiyaaru.’ (Efesu 4:24) Masi wiira nipanke iyo itthwiiyo, nihaana niikurumicaka cinene. Hiiva nihaana niikurumicaka uhiya waakhalela nruukwa akhunanihu, urusiya ni ucaca. Masi uhiya nnyo citthunnyo pooti unirika. Kontha isiyani? Kontha pooti ukhalaka wiira nnyo citthunnyo nanlelo nihaana wanrimani wihu. Wootakihera, Ibiiblya ineera wiira atthu akhwaawe ‘anawaakuva urusiya’ awula ‘khampica uviruwa.’ (Miru. 29:22) Ntthu commo atthunaka haana eekurumicaka cinene wiira ahiye nnyo citthunnyo hataa ukhalaka wiira hopattisiya. Nttwee noone ntakihero nimoca nhina iparaagarafu inhaleehu ukela.

8-9. Ntakihero naamunna Stephen ninthoonyera cani wiira nihaana niikurumicaka uhiya meettelo okhalayi?

⁸ Munna mmoca neehaniya Stephen unanrika wiivaraca arusiyaka. Uyo heera: “Hataa uwakati waapattisiyaaka, mi kahaana keekurumicaka wiira kiivarace karusiyaka. Ikwaha imoca kinari wuulalyaani, ahaavo ntthu aacisale iraatiyu yo nkaaroni waka. Vano, mi kahancera umoomolaniha. Mi kahomphiyeera, masi uyo ahottikhela iraatiyu vathi ni ahotthawa. Ukati waahimenryaaka mayamunna mananna caakhitinryaaka uphwanya iraatiywaaka, humu mmoca ahokikoha co: ‘Munna Stephen, mwaahala upanka isiyani unari wiira nhonvara uyo latarawuuyo?’ Iyo itthwiiyo yahokiiriha wuupuwela ni yahokikurumica wiira kikhale ntthu onnema.” d

⁹ Khampa cinthoonyeraaya itthu yaamwiirannyenle munna Stephen, hataa hiiva nuupuwelaka wiira nihohiya itthu yaapankeehu khalayi, ukati uhinweherereehu, iyo itthwiiyo pooti uniphwanya tootho. Yawiirannyeelakani iyo itthwiiyo, nhikhale nimasukhuli ni nhuupuwele wiira khannakhala nkristau omaana. Mpaka apostolu Paulu ahokupali wiira iyo itthwiiyo yaanaamwiiraka. Uyo aheera: “Keeraka kipankeke itthu yomaana, ihaavo ikuru inkikakhelela upanka itthu yoohinamaana.” (Aroo. 7:21-23) Toko conneehu wiipaceroni, naahikweceke inupeehu, pooti uhokoleela unanaraca ni uhiirya. Inanna imocaaru, ukhala wiira hiiva naatthu oopahuwa, citthu cootakhala cihiileehu upanka pooti uhokoleela upanka. Phimaana, nihaana nihihiyaka wiikurumica unyema nnyo citthunnyo. Masi ninhala wiikurumica cani?

10. Isiyani inlamuliyeenyu upanka wiira nkhitiri uhiya citthu cootakhala? (Nwehe 1 Joau 5:14, 15.)

¹⁰ Wakhala wiira ihaavo itthu yootakhala inoorikani uhiya, munlompe Yehova ni nkhuluvele wiira naahala wuukaviherani. (Nsome  1 Joau 5:14, 15. e) Ninaacuwela wiira Yehova khanhala upanka miiriirya ni wuuhiihani upanka itthu yootakhala. Masi uyo naahala wuuvahani ikuru cimpheeleenyu wiira nkhitiri wiikurumica mpaka wanhaleenyu uhiya upanka iyo itthu yoohinamaaneeyo. (1 Pet. 5:10) Mwiikurumice weettela itthu inlepenleenyu ukati wanlompeenyu ni nnyeme citthu cinhala uwiirihani uhokoleela upanka itthu yootakhala. Wootakihera, nnyeme ifiilime, iporokaraama co TV awula myaha cinaakurumica atthu upanka itthu impheeleenyu uhiya upanka. Ciicammo, nnyeme wuupuwela citthu cootakhala.—Afili. 4:8; Akolo. 3:2.

11. Isiyani inlamuliyeehu upanka wiira nikhalane meettelo ophiyaaru?

¹¹ Wakhalaka wiira nhokhitiri uhiya meettelo okhalayi, nhaana mwiikurumicaka ukhalana meettelo ophiyaaru. Nnohala ukhitiri cani upanka iyo itthwiiyo? Nlakele wiitthuca makhalelo omaana a Yehova ni utakiha ayo makhalelwaayo. (Efesu 5:1, 2) Wootakihera, mwasomaka ihantisi yo mbiiblyani inthoonyera mananna Yehova cinaalevelelaawe atthu, mwiikohe co: ‘Miiva kinaatthuna waalevelela akhunanaka?’ Mwasomaka mbiiblyani mananna Yehova cinaawaceraawe amasikhini, mwiikohe co: ‘Toko Yehova, miiva kinnopanka citthu cinthoonyera wiira kinawaawacera mayamunnaaka anthwennya?’ Coo, nrehererye moopuwelelweenyu mwiikurumicaka ukhalana meettelo ophiyaaru ni nhoocye. Nhiliyale wiira pooti uvira ukati mwinci mwiikurumicaka upanka iyo itthwiiyo.

12. Manannani ikuru irinaaya Ibiiblya cirukunusilyaaya makhalelo a Stephen?

¹² Munna Stephen oolumiye vakaani-vakaani ahancera urukunusa makhalelwaawe. Uyo heera: “Upattisiya waka, mi kahottehiya imaara cinci. Miiva kaakhitiri unyema nnyo citthunnyo kaahuluwaka atthu yaakitteha. Mi kaholakela uhiya waathukana asipatthannyaaka okhalayi. Atthu enci ni ciicammo amwaaraka yahancera ukittottopela nlattu wo itthu yaapankilyaaka, hataa miiva kahancera wiitikhinaca! Ayo marukunuswaayo akaakhitinri veekha. Khweeliini, anoonihera ikuru irinaaya Ibiiblya, inrukunusa makhalelo aatthu.”

13. Isiyani inhala unikavihera unyema citthu ni moopuwelelo oohiloka? (Nwehe Akalasiya 5:16.)

¹³ Nsome Akalasiya 5:16. f Uhiya nnyo citthunnyo unaarika. Masi nikaviheriyaka ninnepa wowaarya wa Yehova, hi ninaahala ukhitiri. Nasomaka Ibiiblya, nimpheela wiira nuupuwele khampa Nluku cinoopuwelaawe. Ciicammo, hi ninaakaviheriya ninnepa wowaarya wa Nluku naahihiyeke urwaa umikutthaanoni. Umikutthaanoni ninaaviriha ukati nimayamunneehu aneekurumica upanka citthu comaana toko hiiva. Ni uviriha ukati naayo unaanilipiha. (Mabere. 10:24, 25; 13:7) Nalompaka nanlepelaka Yehova wiira anikavihere uhiya upanka citthu coohinamaana, uyo naahala univaha nnepaawe wowaarya wiira unilipihace wiira nikhitiri. Usoma Ibiiblya, urwaa umikutthaanoni ni ulompa kahi phi citthu cinhala unihiiha upanka citthu coohiloka. Masi phinhala unikavihera ukhitiri unyema citthu coohiloka. Khampa cinhimyaaya Akalasiya 5:16, naahihiyeke uttharihelela nnepa wowaarya wa Nluku ‘khaninhala upanka citthu cimpheelaaya irutthwiihu.’

14. Kontha isiyani ikhanle itthu yofayita uhihiyerera wiikurumica ukhalana moopuwelelo omaana?

¹⁴ Wakhalaka wiira nihancera upanka citthu cinhala unikavihera ukhalana upatthani womaana ni Yehova, nihaana nihihiyaka  upanka nnyo citthunnyo ni nihaana niikurumicaka ukhalana moopuwelelo omaana. Kontha isiyani? Kontha nwananiihu khanhiya uvara nteko uthana ni uhiyu. Uyo nwananiihuuyo, ukhanle uttehiya wiira nipanke citthu coohiloka. Hi ninaattehiya wiira nipanke citthu coohiloka uthana ni uhiyu. Hataa ukhalaka wiira nihopattisiya, hi pooti wancera upheela upanka citthu cihinlamuliyeehu upanka, toko unttikha cuuku, uhapaliya awula woona ipornografia. (Efesu 5:3, 4) Mmirawo mmoca naahimya itthu immwiira eeraka: “Itthu imoca intepa ukirika cinene uhiya ukhanle uciveliya naalopwana akhwaaka. Mi kooniha wiira ayo moopuwelelwaayo khayaahala upica uvira, masi hataa uviraka ukati mwinci, nanlelo inaakiphwanyaka iyo itthwiiyo. Isiyani nyuuva inlamuliyeenyu upanka wakhalaka wiira ihaavo itthu yootakhala inoorikani cinene uhiya wuupuwela?

15. Nlattuni unreeraaya ucuwela wiira ahaavo atthu caarikile uhiya upanka citthu cootakhala cinnirika hiiva uhiya upanka? (Nwehe ilatarato.)

¹⁵ Wakhala wiira ihaavo itthu yootakhala inoorikani cinene uhiya upanka, nhiliyale wiira nyuuva khanri veekha. Ibiiblya ineera: “Khayuuphwanyileni nanka itthu imoca yowuuttehani cihikhanle cile cinaakhumelela apinaatamu.” (1 Akor. 10:13a) Ihaavo Ibiiblya ikhwaawe itaphulenle ayo moolumwaayo co: “Uttehattehiya winyu khunvirikana nuutthehattehiya waatthu akhwaawe.” Ayo moolumwaayo yantikheliye mayamunna ni mayanuunu o wanlokoni no Korintu. Nhina nno nlokonno, mayamunna ni mayanuunu akiina ahineetthuca ikhweeli ca Nluku yaanaweetta uluva, yaanaarupihana alopwanaru awula athiyanaru ni yaanaahapaliya cinene (1 Akor. 6:9-11) Nyuuva woonela winyu, niireke wiira ayo mayamunnaayo nrimaaya khawaawiiriha upheela uhokoleela upanka nnyo citthunnyo? Khweeli ayo yahopattisiya, masi nlattu wookhala atthu oopahuwa, ukati nkhwaawe yaanawuupuwelaka upanka citthu coohiloka. Ucuwela iyo itthwiiyo pooti unikavihera. Kontha isiyani? Kontha hataa ukhalaka wiira ihaavo itthu yootakhala innirika uhiya upanka, hi ninaacuwela wiira ahaavo  atthu akhitinri uhiya upanka iyo itthwiiyo. Hi pooti ukhalana “waamini woolipa nicuwelaka wiira masankiho cinniphwanya, mayamunneehu ntuninyani motheene ciicammo cinawaaphwa.”—1 Pet. 5:9.

16. Itthuni yowoopiha ihinlamuliyeehu wuupuwela, ni nlattuni?

¹⁶ Nhuupuwele wiira khaavo ntthu nhala uwacera itthu inwiirani. Wuupuwela commo unawoopiha ni pooti uwiirihani uhikupali wiira nyuuva nnaahala ukhitiri uhiya upanka itthu yootakhala inoorikani. Masi moone itthu Ibiiblya inhimyaaya: “Nluku khanle ookhuluvelya ni uyo khanhala wuuhiyererani nttehiyaka wahinhaleenyu ukhitiri. Masi mwattehiyaka uyo ciicammo naahala upanka itthu wiira nkhitiri uvilela.” (1 Akor. 10:13b) Iyo itthwiiyo maanaaya wiira hataa itthu yootakhala yuurikakani cinene uhiya, Yehova pooti wuukaviherani. Yehova ookaviherakani, nyuuva nnaahala ukhitiri uhiya upanka itthu yootakhala.

17. Hataa ukhalaka wiira hiiva khaninkhitiri uhuupuwela citthu cootakhala, isiyani hiiva inkhitiriihu?

¹⁷ Nhiliyale: hi nikhanle apinaatamu oopahuwa ni khaninhala ukhitiri ukati wotheene uhuupuwela citthu cootakhala. Masi moopuwelaka itthu yootakhala, nyuuva pooti uhipicapica ukumiha mmuru winyu iyo itthwiiyo khampa caapankilyaawe Yusufu aatthawale amwaara a Potifari. (Upha. 39:12) Nyuuva pooti ukhitiri uhipanka citthu cootakhala cinoophwanyani mmuru winyu ni uvara matampi!

18-19. Ukati uneekurumiceehu urehererya moopuwelelweehu, makohoni anlamuliyeehu wiipanka?

¹⁸ Urehererya moopuwelelweehu ukhanle uhihiya wiikurumica wiira citthu cinoopuweleehu ni cimpankeehu cintteelihe nrima Yehova. Wiira nikhitiri upanka commo, nihaana nihihiyaka weemela ni wiikoha co: ‘Citthu cimpankaaka cinaathoonyera wiira miiva kinaakupali wiira ila ituninyeela ihanle vakaani umalamalihiya? Kinnohiya nnepa wowaarya wa Nluku ukikaviheraka unyema citthu cootakhala cinkiphwanya mmuru waka?’

¹⁹ Ukati wooweha mananna ciryaaya moopuwelelweenyu ni meettelweenyu, nhiweherere wiira khannohala uvonya. Masi wuutteeleni nrima nlattu woocuwela wiira munnorwaa uhoolo. Moonelelaka wiira ihaavo itthu ihimpankeenyu ratta inlamuliyeenyu wiikurumica wiira nrukunuse ni mpanke saana, nhikhale nimasukhuli. Uhiya commo, ntthare ikano imphwanyannya nhina Afilipo 3:16: “Hataa ukhalaka wiira nihothoonyera wiira ninnorwaa uhoolo, niikurumice wiira nihihiye weetta iyo iphirweeyo.” Mwapankaka commo, mwaamini ni nkupali wiira Yehova naahala ucaaliha wiikurumica winyu urehererya moopuwelelweenyu.