1-2. X’għandna nkomplu nagħmlu wara li nitgħammdu? Spjega.

 KEMM-il darba tnaddaf id-dar tiegħek? Forsi qabel dħalt toqgħod fiha tajtha tindifa tajba. Imma x’jiġri kieku qatt ma terġaʼ tnaddafha wara? Malajr terġaʼ titħammeġ. Biex iżżomm id-dar nadifa, trid tnaddafha b’mod regulari.

² Biex nibqgħu nirranġaw il-mod kif naħsbu u l-personalità tagħna, irridu nagħmlu xi ħaġa simili. Żgur li qabel tgħammidna ħdimna iebes biex nirranġaw ħajjitna ħalli “nitnaddfu minn kull tinġis tal-laħam u taʼ l-ispirtu.” (2 Kor. 7:1) Imma issa, irridu napplikaw il-parir tal-appostlu Pawlu biex inkomplu “niġġeddu.” (Efes. 4:23) Għala għandna nibqgħu nagħmlu sforz? Għax id-dinja malajr tistaʼ tinfluwenzana u ma nibqgħux nodfa għal Ġeħova. Biex nibqgħu nogħġbu lil Ġeħova, b’mod regulari għandna niċċekkjaw sew kif qed naħsbu, il-karattru u x-xewqat tagħna.

3. Xi jfisser li ‘nġeddu moħħna’? (Rumani 12:2)

³ Xi rridu nagħmlu biex inġeddu moħħna, jiġifieri nbiddlu l-mod taʼ kif naħsbu? (Aqra Rumani 12:2.) L-espressjoni bil-Grieg ‘iġġedded moħħok’ tistaʼ tfisser ‘biddel moħħok.’ Mela dan ma jfissirx li sempliċiment  nagħmlu ftit affarijiet tajbin. Minflok, aħna rridu naħsbu sew dwar dak li aħna minn ġewwa u nagħmlu l-bidliet li jkun hemm bżonn biex nobdu l-livelli taʼ Ġeħova kemm nistgħu. Dan ma jsirx taʼ darba, imma l-ħin kollu.

4. X’nistgħu nagħmlu biex ma nħallux id-dinja teffettwa l-mod kif naħsbu?

⁴ Meta nkunu perfetti, dejjem se nferrħu lil Ġeħova b’dak li nagħmlu. Imma sa ma jasal dak iż-żmien, irridu naħdmu iebes ħalli anki issa nferrħuh. F’​Rumani 12:2, Pawlu jgħid li rridu nkomplu nġeddu moħħna biex inkunu nafu xi jridna nagħmlu Alla. Minflok ma nħallu din id-dinja ħażina tinfluwenzana, l-ewwel irridu neżaminaw lilna nfusna biex inkunu nafu jekk hux qed inħallu l-ħsibijiet t’Alla jinfluwenzaw il-miri u d-deċiżjonijiet tagħna.

5. Kif nistgħu nuru li nemmnu li l-jum taʼ Ġeħova hu viċin? (Ara l-istampa.)

⁵ Aħseb dwar dan l-eżempju. Ġeħova jridna ‘dejjem inżommu f’moħħna l-preżenza tal-jum tiegħu.’ (2 Pt. 3:12) Staqsi lilek innifsek: ‘Il-mod kif ngħix ħajti juri li nifhem li din id-dinja ħażina dalwaqt se tispiċċa? Id-deċiżjonijiet tiegħi dwar li nkompli nistudja jew liema xogħol nagħżel juru li l-iktar ħaġa importanti hi li naqdi lil Ġeħova? Għandi fidi li Ġeħova se jagħti lili u lill-familja tiegħi dak li jkollna bżonn jew noqgħod ninkwieta dwar l-affarijiet materjali?’ Ġeħova jkun ferħan ħafna meta jarana nipprovaw nagħmlu dak li jixtieq hu f’ħajjitna.—Mt. 6:25-27, 33; Flp. 4:12, 13.

6. X’għandna nkomplu nagħmlu?

⁶ Irridu neżaminaw il-mod kif naħsbu  b’mod regulari u mbagħad nagħmlu l-bidliet li jkun hemm bżonn. Pawlu qal lill-Korintin: “Ibqgħu għarblu jekk intomx fil-fidi, ibqgħu agħtu prova taʼ x’intom.” (2 Kor. 13:5) Li nkunu “fil-fidi” ma jfissirx biss li kultant immorru l-laqgħat u nippritkaw. Dan jinkludi dwar xiex naħsbu, ix-xewqat tagħna, u għala nagħmlu l-affarijiet. Allura rridu nkomplu nbiddlu l-mod taʼ kif naħsbu billi naqraw il-Kelma t’Alla, nitgħallmu naħsbu kif jaħseb Ġeħova, u nagħmlu dak li jkun hemm bżonn biex nogħġbu lilu.—1 Kor. 2:14-16.

7. Skont Efesin 4:31, 32, xi rridu nagħmlu iżjed, u għala jistaʼ jkun diffiċli?

⁷ Aqra Efesin 4:31, 32. Bidla oħra importanti li rridu nagħmlu hi li ‘nilbsu l-personalità l-ġdida.’ (Efes. 4:24) Biex nagħmlu dan irridu naħdmu iebes. Fost affarijiet oħra, aħna rridu nneħħu kwalitajiet ħżiena, bħal pereżempju l-mibegħda u r-rabja. Dan għala jistaʼ jkun diffiċli? Għax dawn jistgħu jsiru parti minna. Pereżempju, il-Bibbja tgħid li xi nies ‘jirrabjaw malajr’ u ‘għandhom it-tendenza li jinkorlaw.’ (Prov. 29:22) Xi ħadd li għandu kwalitajiet bħal dawn għandu jkompli jaħdem iebes biex jinbidel, anki jekk ikun mgħammed. Dan se narawh fl-esperjenza fil-paragrafu li jmiss.

8-9. L-eżempju taʼ Stephen kif jurina li rridu nkomplu naħdmu biex ninżgħu l-personalità l-qadima?

⁸ Ħu jismu Stephen kellu problema biex jikkontrolla r-rabja tiegħu. Hu qal, “Anki wara li tgħammidt kelli nkompli nipprova nikkontrolla r-rabja tiegħi. Pereżempju, darba waħda waqt li kont qed nipprietka, tlaqt niġri wara ħalliel li seraqli r-radio tal-karozza. Meta kont se naqbdu, telaq ir-radio u ħarab jiġri. Meta għedt lil dawk li kienu miegħi li rnexxieli nġib ir-radio, anzjan fil-grupp qalli, ‘Stephen, x’kont tagħmel li kieku qbadtu?’ Din il-mistoqsija ġegħlitni naħseb u għenitni nifhem kemm irrid inkompli naħdem fuq il-personalità tiegħi.” b

⁹ L-eżempju taʼ Stephen jurina li aħna xorta nistgħu nerġgħu nuru kwalitajiet ħżiena, anki wara li nkunu ħsibna li ħlisna minnhom. Jekk jiġrilek hekk, taqtax qalbek u taħsibx li m’intix Kristjan tajjeb. Anki l-appostlu Pawlu qal: “Meta nixtieq nagħmel dak li hu sewwa, dak li hu ħażin ikolli fija.” (Rum. 7:21-23) Il-Kristjani kollha imperfetti u għandhom xi kwalitajiet ħżiena li jerġgħu joħorġu bħalma t-trab u l-ħmieġ jinġabar fid-djar tagħna. Aħna rridu nibqgħu naħdmu biex nibqgħu nodfa. Kif nistgħu nagħmlu dan?

10. X’nistgħu nagħmlu biex inneħħu kwalitajiet ħżiena? (1 Ġwanni 5:14, 15)

¹⁰ Itlob lil Ġeħova dwar il-kwalità li ssib diffiċli biex tbiddel, u kun ċert li hu se jisimgħek u jgħinek. (Aqra l-1 Ġwanni 5:14, 15.) Ġeħova mhux se jneħħilek din il-kwalità ħażina b’xi miraklu, imma hu jistaʼ jgħinek biex ma turix din il-kwalità. (1 Pt. 5:10) Fl-istess ħin, aħdem fuq dak li qed titlob billi ma tagħmilx affarijiet li jistgħu jġibu  l-personalità l-qadima tiegħek lura. Pereżempju, irridu noqogħdu attenti li ma narawx films jew programmi, jew naqraw kotba li jagħtu x’tifhem li ma fiha xejn ħażin li jkollok kwalità ħażina. U m’għandniex naħsbu fuq xewqat ħżiena.—Flp. 4:8; Kol. 3:2.

11. X’nistgħu nagħmlu biex inkomplu nilbsu l-personalità l-ġdida?

¹¹ Għalkemm inżajt il-personalità l-qadima, huwa importanti li taħdem fuq il-personalità l-ġdida. Kif? Agħmilha mira li timita lil Ġeħova int u titgħallem dwar il-kwalitajiet tiegħu. (Efes. 5:1, 2) Pereżempju, meta fil-Bibbja taqra dwar il-maħfra taʼ Ġeħova, staqsi lilek innifsek, ‘Jien naħfer lil oħrajn?’ Meta taqra kif Ġeħova jħossu dwar il-foqra, staqsi lilek innifsek, ‘Inħossni l-istess għall-aħwa li huma fil-bżonn, u nuri kif inħossni b’dak li nagħmel?’ Kompli biddel il-mod kif taħseb billi tilbes il-personalità l-ġdida, u kun paċenzjuż miegħek innifsek hekk kif tagħmel dan.

12. Il-Bibbja kif għenet lil Stephen jinbidel?

¹² Stephen, li semmejna qabel, induna li bil-mod irnexxielu jilbes il-personalità l-ġdida. Hu qal: “Kemm ilni mgħammed iffaċċjajt ħafna sitwazzjonijiet fejn stajt nirreaġixxi b’mod vjolenti. Tgħallimt li l-aħjar jew nitlaq ’l hemm jew nipprova nirranġa s-sitwazzjoni bil-kwiet. Il-mara tiegħi u ħafna nies oħra faħħruni taʼ kif bqajt kalm f’dawn is-sitwazzjonijiet. Anki jien bqajt impressjonat bija nnifsi! Qatt ma kien se jirnexxili nagħmel dawn il-bidliet waħdi. Dan stajt nagħmlu biss bl-għajnuna tal-Bibbja.”

13. X’se jgħinna nagħmlu dak li hu tajjeb? (Galatin 5:16)

¹³ Aqra Galatin 5:16. Ġeħova b’mod ġeneruż jagħtina l-ispirtu qaddis tiegħu biex jgħinna nagħmlu dak li hu tajjeb. Aħna nirċievu l-ispirtu qaddis meta nistudjaw il-Bibbja u nattendu l-laqgħat. F’dawn il-laqgħat, aħna nistgħu nqattgħu l-ħin m’aħwa li bħalna qed jaħdmu iebes biex jagħmlu dak li hu tajjeb, u dan jinkuraġġina. (Ebr. 10:24, 25; 13:7) U meta nitolbu lil Ġeħova mill-qalb biex jgħinna nneħħu xewqat ħżiena, hu se jagħtina l-ispirtu qaddis tiegħu biex nibqgħu niġġieldu u biex ma naqtgħux qalbna. Dan mhux se jneħħilna x-xewqat ħżiena, imma se jgħinna biex ma nċedux għalihom. Kif jurina Galatin 5:16, dawk li ‘jimxu bl-ispirtu ma jwettqu assolutament l-ebda xewqa tal-laħam.’

14. Għala hu importanti li nkomplu naħdmu biex nagħmlu dak li hu tajjeb?

¹⁴ Biex ikollna ħbiberija tajba maʼ Ġeħova, aħna bdejna nagħmlu affarijiet tajbin. Hu importanti li nkomplu nagħmluhom u nkomplu naħdmu biex ikollna xewqat tajbin. Għala? Għax wieħed mill-għedewwa tagħna dejjem jiġġieled kontrina. Dan l-għadu hu t-tentazzjoni biex nagħmlu dak li hu ħażin. Anki wara l-magħmudija jistaʼ jkollna ġibdiet lejn affarijiet li m’għandniex nagħmlu, bħal-logħob tal-flus, l-alkoħol żejjed, jew il-pornografija. (Efes. 5:3, 4) Kristjan żagħżugħ qal: “Waħda mill-iktar affarijiet diffiċli li sibt kienet il-ġibda lejn dawk tal-istess sess tiegħi. Jien ħsibt  li mhux se nibqaʼ nħossni hekk, imma xorta għad għandi din il-ġibda.” X’jistaʼ jgħinek jekk ikollok xewqat ħżiena qawwija?

15. Li nafu li xewqat ħżiena jiġu fuq “il-bnedmin kollha” għala jinkuraġġina? (Ara l-istampa.)

¹⁵ Meta tkun qed tiġġieled biex tikkontrolla xewqat ħżiena, ftakar li m’intix waħdek. Il-Bibbja tgħid: “Ebda tentazzjoni ma ġiet fuqkom ħlief dik li tiġi fuq il-bnedmin kollha.” (1 Kor. 10:13a) Dan il-kliem inkiteb lil nisa u rġiel Kristjani li kienu jgħixu f’Korintu. Xi wħud minnhom kienu adulteri, omosesswali, u jixorbu żżejjed. (1 Kor. 6:9-11) Taħseb li wara li tgħammdu qatt ma kellhom xewqat ħżiena? Żgur li kellhom. Veru li kienu kollha mill-midlukin, imma huma xorta kienu bnedmin imperfetti. Bla dubju, kultant kellhom jiġġieldu kontra xewqat ħżiena. Dan għala jinkuraġġina? Għax juri li hi x’inhi x-xewqa li qed tiġġieled kontriha, xi ħadd ieħor irnexxielu jegħlibha. Fil-fatt, int tistaʼ tibqaʼ ‘sod fil-fidi għax taf li sofferenzi bħal dawn qed iseħħu fil-fratellanza kollha fid-dinja.’—1 Pt. 5:9.

16. Liema periklu rridu nevitaw, u għala?

¹⁶ Evita l-periklu li taħseb li ħadd ma jistaʼ jifhem il-problema li għandek. Jekk toqgħod taħseb hekk, tistaʼ tirraġuna li s-sitwazzjoni tiegħek hi bla tama u li ma tistax tirreżisti xewqat ħżiena. Il-Bibbja tgħidilna xi ħaġa differenti. Hi tgħid: “Alla hu leali, u ma jħallikomx tiġu ttantati iktar milli tifilħu, imma mat-tentazzjoni jiftħilkom ukoll it-triq sabiex tkunu tistgħu tissaportuha.” (1 Kor. 10:13b) Għalhekk, anki meta jkollna xewqa ħażina qawwija, aħna nistgħu nibqgħu leali lejn Ġeħova. Bl-għajnuna taʼ Ġeħova, aħna nistgħu  nirreżistu biex ma nagħmlux affarijiet ħżiena.

17. Għalkemm ma nistgħux nevitaw li jkollna xewqat ħżiena, x’nistgħu nagħmlu?

¹⁷ Dejjem ftakar li minħabba li aħna imperfetti, ma nistgħux nevitaw li jkollna xewqat ħżiena. Imma meta jiġuna, aħna nistgħu nneħħuhom mill-ewwel, bħalma għamel Ġużeppi meta ħarab mill-mara taʼ Potifar. (Ġen. 39:12) Int tistaʼ tiġġieled ix-xewqat ħżiena li jkollok!

18-19. X’mistoqsijiet nistgħu nsaqsu lilna nfusna waqt li naħdmu biex inbiddlu l-mod kif naħsbu?

¹⁸ F’dan l-artiklu tgħallimna li biex inbiddlu l-mod kif naħsbu, irridu nkunu ċerti li l-ħsibijiet u l-azzjonijiet tagħna jogħġbu lil Ġeħova. Allura rridu neżaminaw lilna nfusna b’mod regulari u nistaqsu: ‘Il-mod kif naġixxi juri li jien konxju li qegħdin ngħixu fl-aħħar żminijiet? Qiegħed naħdem biex nilbes il-personalità l-ġdida? Qed inħalli l-ispirtu taʼ Ġeħova jiggwidani u nirreżisti x-xewqat ħżiena?’

¹⁹ Meta teżamina lilek innifsek tistenniex li tkun perfett, imma kun ferħan bil-progress li għamilt. Jekk tara li għandek fejn tirranġa, taqtax qalbek. Minflok, applika l-parir li nsibu f’​Filippin 3:16: “Għamilna kemm għamilna progress, ejjew inkomplu mexjin bl-ordni b’din l-istess rutina.” Meta tagħmel hekk, kun ċert li Ġeħova se jbierek l-isforzi tiegħek biex tkompli tbiddel il-mod kif taħsibha.