1, 2. ¿Ndáaña xíniñúʼu keʼéyó tá xa̱a̱ nda̱kuchiyó, ta nda̱chun?

 ¿NDA̱SAA yichi̱ ndáyákún ti̱xin veʼún? Sana tá kúma̱níka kixáʼún koún ti̱xin veʼe yóʼo viíní nda̱tiʼvíún ti̱xinña. Soo, ¿ndáaña kuu tá ná sandákoún ndatiʼvíún ti̱xinña? Xa̱ʼa̱ ña̱ ndeéní íyo ya̱a̱ á yáká, kamaní kuyaku̱a̱ ti̱xinña. Xa̱ʼa̱ ña̱kán, ña̱ va̱ʼa limpioña, ndiʼi tiempo xíniñúʼu ndatiʼvíún iniña.

² Ki̱ʼva saá xíniñúʼu keʼéyó xíʼin ña̱ ndákanixi̱níyó xíʼin ki̱ʼva ña̱ íyoyó. Tá kúma̱níka ndakuchiyó, chi̱kaa̱níyó ndee̱ ña̱ sa̱ndákooyó keʼéyó sava ña̱ʼa, tá kúú, ña̱ xi̱ ixayaku̱a̱ ku̱ñuyó xíʼin ña̱ va̱ása va̱ʼa xi̱ndakanixi̱níyó (2 Cor. 7:1). Soo, vitin kúú ña̱ xíniñúʼu kundiku̱nyó consejo ña̱ ta̱xi ta̱ apóstol Pablo tá ka̱chira: “Kǒo sandákoondó ña̱ ndasaxa̱ándó ña̱ ndákanixi̱níndó” (Efes. 4:23). ¿Nda̱chun xíniñúʼu chikaa̱níyó ndee̱ keʼéyó ña̱yóʼo ndiʼi ki̱vi̱? Saáchi tá ná va̱ása keʼéyó ña̱yóʼo, ña̱ yaku̱a̱ ña̱ íyo ñuyǐví yóʼo kamaní ki̱ʼviña xi̱níyó ta kixáʼayó ndakanixi̱níyó xa̱ʼa̱ña. Ta ña̱ va̱ʼa kǒo kundoʼoyó ña̱yóʼo ta keʼéyó ña̱ kútóo Jehová xíniñúʼu ndiʼi tiempo kotoyó ndáa ki̱ʼva íyo ña̱ ndákanixi̱níyó, ndáa ki̱ʼva íyoyó ta saátu ndáaña kúni̱yó keʼéyó.

3. ¿Ndáaña kúni̱ kachi ña̱ nasamayó ña̱ ndákanixi̱níyó? (Romanos 12:2).

³ ¿Ndáaña xíniñúʼu keʼéyó ña̱ va̱ʼa nasamayó ña̱ ndákanixi̱níyó? (Kaʼvi Romanos 12:2). Su̱ví nda̱saa ña̱ va̱ʼa chika̱a̱yó ndee̱ keʼéyó. Chi xíniñúʼu chikaa̱yó ndee̱ kotoyó ndáaña ndákanixi̱níyó  tasaá nasamayó ña̱yóʼo, tasaá xa̱a̱yó keʼéyó ña̱ kútóo Jehová. Su̱ví iin yichi̱ keʼéyó ña̱yóʼo, chi ndiʼi tiempo xíniñúʼu chikaa̱yó ndee̱ ña̱ keʼéyóña.

4. ¿Ndáaña xíniñúʼu keʼéyó ña̱ va̱ása taxiyó ña̱ nasama na̱ ñuyǐví yóʼo ña̱ ndákanixi̱níyó?

⁴ Tá ná xa̱a̱yó kooyó ñuyǐví xa̱á va̱ása kookayó na̱ yiví ku̱a̱chi ta ndiʼi tiempo keʼéyó ña̱ sákusi̱í-ini Jehová. Ta nani ndátuyó ña̱ ná kixaa̱ ña̱ ki̱vi̱ yóʼo, ná chikaa̱yó ndee̱ ña̱ kǒo keʼéyó ña̱ va̱ása va̱ʼa. Ná kotoyó ndáaña kivi sakúaʼayó xíʼin ña̱ ni̱ka̱ʼa̱n ta̱ apóstol Pablo nu̱ú Romanos 12:2. Ta̱ apóstol Pablo ni̱ka̱ʼa̱nra ña̱ ndáyáʼviní nasamayó ña̱ ndákanixi̱níyó tasaá kúú ña̱ kivi kunda̱a̱-iniyó ndáaña kúú ña̱ kúni̱ Ndióxi̱ keʼéyó. Ta nu̱úka ña̱ taxiyó ña̱ nasama ña̱ ñuyǐví yóʼo ña̱ ndákanixi̱níyó, ndáyáʼviní kotoyó á kítáʼan ña̱ kúni̱yó keʼéyó ta saátu ndáaña ndáka̱xinyó keʼéyó xíʼin ña̱ ndákanixi̱ní Ndióxi̱.

5. ¿Ndáaña chindeétáʼan xíʼinyó ña̱ kunda̱a̱-iniyó ndáaña ndákanixi̱níyó xa̱ʼa̱ ña̱ xa̱a̱ ku̱yatinní kixaa̱ ki̱vi̱ káʼnu Jehová? (Koto na̱ʼná).

⁵ Jehová kúni̱ra ña̱ ná kundoo tu̱ʼvaníyó ña̱ kixaa̱ ki̱vi̱ káʼnura (2 Ped. 3:12). Ña̱kán ná ndakanixi̱níyó xa̱ʼa̱ ña̱yóʼo: “¿Á náʼi̱ xíʼin ña̱ kéʼíi̱ ña̱ kándíxai̱ ña̱ xa̱a̱ ku̱yatinní kixaa̱ ki̱vi̱ káʼnu Jehová? Tá ndáka̱xii̱n ña̱ keʼíi̱ iin chiñu á ña̱ kaʼvi va̱ʼi̱, ¿á náʼa̱ ña̱yóʼo ña̱ ndáyáʼvika nu̱úi̱ kúú ña̱ kachíñui̱ nu̱ú Jehová? ¿Á kándíxai̱ ña̱ miíra kundaa yi̱ʼi̱ ta saátu na̱ veʼi̱ á ndiʼi tiempo ndíʼi̱-inii̱ xa̱ʼa̱ ña̱ kuumiíi̱ ku̱a̱ʼá ña̱ʼa?”. Kúsi̱íní-ini Jehová tá xítora ña̱ chíkaa̱níyó ndee̱ keʼéyó ña̱ kúni̱ra (Mat. 6:25-27, 33; Filip. 4:12, 13).

6. ¿Ndáaña xíniñúʼu ndakundeéyó keʼéyó?

⁶ Ndiʼi tiempo xíniñúʼu kotoyó ndáa ki̱ʼva íyo ña̱ ndákanixi̱níyó ta xíniñúʼu chikaa̱yó ndee̱ ña̱ nasamayó ña̱yóʼo. Ta̱ Pablo ta̱xira consejo ndaʼa̱ na̱ cristiano ña̱ ñuu Corinto:  “Kiʼin va̱ʼandó kuenta xíʼin ña̱ kéʼéndó ña̱ va̱ʼa kunda̱a̱-inindó á ndixa kándíxandó Ndióxi̱. Na̱ʼa̱kandó xíʼin ña̱ kéʼéndó ndáa na̱ yiví kúúndó” (2 Cor. 13:5). Ña̱ “kándíxayó Ndióxi̱” va̱ása kúni̱ kachi kuitíña ña̱ ku̱ʼu̱nyó reunión, á ña̱ keeyó sava yichi̱ kuití natúʼunyó xa̱ʼa̱ Ndióxi̱ chi ku̱a̱ʼáníkava ña̱ kúni̱ kachiña. Saátu ndáyáʼviní kiʼinyó kuenta xíʼin ña̱ ndákanixi̱níyó xíʼin ña̱ kúni̱yó keʼéyó. Xa̱ʼa̱ ña̱kán xíniñúʼu ndakundeéyó nasamayó ña̱ ndákanixi̱níyó, ta iin ki̱ʼva ña̱ keʼéyó ña̱yóʼo kúú ña̱ kaʼviyó tu̱ʼun Ndióxi̱. Xíniñúʼu sakúaʼayó ndakanixi̱níyó nda̱a̱ táki̱ʼva ndákanixi̱níra, tasaá chikaa̱yó ndee̱ ña̱ nasamayó ndiʼi ña̱ kéʼéyó ña̱ va̱ʼa sakúsi̱íyó-inira (1 Cor. 2:14-16).

7. Nda̱a̱ táki̱ʼva káchi Efesios 4:31, 32, ¿ndáaka ña̱ xíniñúʼu keʼéyó, ta nda̱chun kivi ixayo̱ʼvi̱ña xíʼinyó ña̱ keʼéyóña?

⁷ (Kaʼvi Efesios 4:31, 32). Su̱ví ña̱ ndákanixi̱ní kuitíyó xíniñúʼu ndasaxa̱áyó chi saátu xíniñúʼu ndasaxa̱áyó ki̱ʼva ña̱ kéʼéyó (Efes. 4:24). Ta xíniñúʼu chikaa̱yó ndee̱ ña̱ keʼéyó ña̱yóʼo. Tá kúú, xíniñúʼu chikaa̱níyó ndee̱ ña̱ nasamayó ki̱ʼvi ña̱ íyoyó, ña̱ kue̱ʼe̱níyó, ña̱ kamaní sáa̱yó xíʼin ña̱ ndákaʼányó xa̱ʼa̱ ña̱ ke̱ʼéna xíʼinyó. ¿Nda̱chun kivi ixayo̱ʼvi̱ña xíʼinyó ña̱ keʼéyó ña̱yóʼo? Saáchi sava ña̱yóʼo xa̱a̱ ku̱a̱ʼání tiempo kéʼéyóña. Tu̱ʼun Ndióxi̱ káʼa̱nña xa̱ʼa̱ miíyó na̱ yiví ña̱ kamaní sáa̱yó ta kue̱ʼe̱níyó (Prov. 29:22). Ta ni xa̱a̱ nda̱kuchiyó kivi kixáʼa tukuyó keʼéyó ña̱yóʼo, ña̱kán xíniñúʼu kiʼinníyó kuenta xíʼin ki̱ʼva ña̱ íyoyó. Ná kotoyó ndáaña ndo̱ʼo iin ta̱ hermano.

8, 9. ¿Ndáa ki̱ʼva chíndeétáʼan ña̱ ndo̱ʼo ta̱ Stephen xíʼinyó ña̱ xíniñúʼu chika̱a̱níkayó ndee̱ ña̱ nasamayó ki̱ʼva ña̱ íyoyó?

⁸ Iin ta̱ hermano ta̱ naní Stephen kamaní xi̱sa̱a̱ra, xa̱ʼa̱ ña̱kán xíniñúʼu chikaa̱ra ndee̱ ña̱ va̱ása sa̱a̱ kamara. Ta̱yóʼo káchira: “Ni xa̱a̱ nda̱kuchii̱, xi̱niñúʼu chikaa̱níi̱ ndee̱ ña̱ kǒo keʼíi̱ ña̱yóʼo saáchi kamaní xi̱saíi̱. Tá kúú, iin ki̱vi̱ ni̱xa̱ʼa̱nndi̱ iin ñuu ña̱ va̱ʼa natúʼunndi̱ xíʼin na̱ yiví xa̱ʼa̱ Ndióxi̱, tasaá xi̱nii̱ iin ta̱ kui̱ʼná távára radio ti̱xin carroi̱. Ndeéní xi̱nui̱ ni̱xa̱ʼi̱n sa̱tára. Tá si̱lóʼo tii̱nra, iin kama sa̱kánara radioi̱ nu̱ú ñuʼú ta xi̱nura ku̱a̱ʼa̱nra. Tá na̱túʼi̱n xíʼin na̱ ku̱a̱ʼa̱n xíʼi̱n ndáa ki̱ʼva nda̱kiʼi̱n radioi̱, iin ta̱ hermano ta̱ xa̱a̱ ku̱a̱ʼá ku̱i̱ya̱ ndíkaa̱ ti̱xin ñuu Ndióxi̱ ni̱nda̱ka̱tu̱ʼunra yi̱ʼi̱: ‘¿Ndáaña keʼún tá níkuchiñún tiúnra?’. Xíʼin ña̱ ni̱nda̱ka̱tu̱ʼunra yi̱ʼi̱ ku̱ndaa̱-inii̱ ña̱ xi̱kuma̱níva nasamai̱ ki̱ʼva ña̱ íyoi̱”. b

⁹ Ña̱ ndo̱ʼo ta̱ Stephen náʼa̱ña nu̱úyó ña̱ kivi xa̱a̱yó keʼé tukuyó iin ña̱ʼa ña̱ xa̱a̱ sa̱ndákooyó. Tá ná ndoʼoyó ña̱yóʼo, ná kǒo ndakava-iniyó ta ná kǒo ndakanixi̱níyó ña̱ ni loʼo va̱ása vií kéʼéyó iin ña̱ʼa. Nda̱a̱ ta̱ apóstol Pablo ni̱ka̱ʼa̱nra: “Tá kúni̱i̱ keʼíi̱ ña̱ va̱ʼa, ña̱ va̱ása va̱ʼa kúú ña̱ ndíka̱a̱-inii̱” (Rom. 7:21-23). Xa̱ʼa̱ ña̱ kúúyó na̱ yiví ku̱a̱chi, ndiʼiyó kíxáʼa tukuyó kéʼéyó ña̱ xi̱keʼéyó tá ya̱chi̱ ña̱kán xíniñúʼu chikaa̱yó ndee̱ ña̱ kǒo ndikó tukuyó keʼéyó ña̱yóʼo. ¿Ndáaña chindeétáʼan xíʼinyó?

10. ¿Ndáaña chindeétáʼan xíʼinyó ña̱ kǒo kixáʼa tukuyó keʼéyó táʼan ña̱ xi̱keʼéyó tá ya̱chi̱? (1 Juan 5:14, 15).

¹⁰ Ná ka̱ʼa̱nyó xíʼin Jehová xa̱ʼa̱ ña̱ʼa ña̱ kúni̱yó sandákooyó ta ná kǒo kaka-iniyó ña̱ kuniso̱ʼovara ña̱ ka̱ʼa̱nyó xíʼinra ta chindeétáʼanvara xíʼinyó (kaʼvi 1 Juan 5:14, 15). Kǒo sakútaʼaví Jehová ña̱yóʼo, soo taxira ndee̱ ndaʼa̱yó ña̱ kuchiñuyó ya̱ʼayó nu̱úña (1 Ped. 5:10). ¿Ndáaña xíniñúʼu keʼéyó ña̱ va̱ʼa chindeétáʼan Jehová xíʼinyó? Ná kǒo keʼéyó á kotoyó iin ña̱ʼa ña̱ kivi chindaʼá miíyó ña̱ kixáʼa tukuyó keʼéyó ña̱ xi̱keʼéyó tá ya̱chi̱. Tá kúú, va̱ása kivi kotoyó película, á ña̱ yáʼa nu̱ú tele á ña̱ va̱xi nu̱ú tutu nu̱ú kánitáʼanna, nu̱ú sáa̱na  xíʼin táʼanna á nu̱ú kée ña̱ʼa táʼan ña̱ xi̱keʼéyó tá ya̱chi̱. Ta ná kǒo ndakanixi̱níyó xa̱ʼa̱ ña̱ʼa ña̱ kini (Filip. 4:8; Col. 3:2).

11. ¿Ndáa ki̱ʼva ndakundeéyó ndasaxa̱áyó ki̱ʼva ña̱ kéʼéyó?

¹¹ Sana kǒo kéʼékayó táʼan ña̱ xi̱keʼéyó tá ya̱chi̱, soo xíniñúʼu ndakundeéyó nasamayó ki̱ʼva ña̱ íyoyó. ¿Ndáa ki̱ʼva keʼéyó ña̱yóʼo? Ná chikaa̱yó ndee̱ ña̱ kuxini̱kayó ndáa ki̱ʼva íyo Jehová xíʼin ña̱ va̱ʼa ña̱ kúúmiíra ta ná kundiku̱nyó yichi̱ra (Efes. 5:1, 2). Tá káʼviyó Biblia ta ndáni̱ʼíyó ña̱ káʼa̱n xa̱ʼa̱ ña̱ i̱xakáʼnu-ini Jehová xa̱ʼa̱ iin na̱ yiví, ná nda̱ka̱tu̱ʼunyó miíyó: “¿Á íxakáʼnu-ini yi̱ʼi̱ xa̱ʼa̱ inkana?”. Á tá káʼviyó ña̱ káʼa̱n xa̱ʼa̱ ña̱ kúndáʼvi-ini Jehová xínira na̱ yáʼa nu̱ú tu̱ndóʼo, ná nda̱ka̱tu̱ʼunyó miíyó: “¿Á kúndáʼvi-inii̱ xínii̱ inka na̱ yáʼa nu̱ú tu̱ndóʼo?”. Ta saátu ná ndakundeéyó nasamayó ki̱ʼva ña̱ íyoyó ta kúee ná koo iniyó xíʼin miíyó.

12. ¿Ndáa ki̱ʼva náʼa̱ ña̱ ndo̱ʼo ta̱ Stephen ña̱ íyoníva ndee̱ Biblia ña̱ nasamaña iin na̱ yiví?

¹² Ta̱ Stephen, ta̱ ni̱ka̱ʼa̱nyó xa̱ʼa̱ nu̱ú ña̱ párrafo 8 loʼo tá loʼo ki̱xáʼara kéʼé tukura ña̱ va̱ʼa. Ta̱yóʼo káchira: “Nda̱a̱ tá nda̱kuchii̱ íxayo̱ʼvi̱níña xíʼi̱n ña̱ ka̱ʼnu̱-inii̱ chi kúnii̱ keʼíi̱ ña̱ xi̱keʼíi̱ tá ya̱chi̱. Ña̱ kéʼíi̱ kúú ña̱ ndákiʼi̱n ku̱a̱ʼi̱n saáchi kǒo kúnii̱ kanitáʼi̱n xíʼin inkana á sava yichi̱ va̱ása káʼi̱n nda̱a̱ ni iin ña̱ʼa. Ñá síʼi̱ xíʼin inka na̱ yiví káʼa̱nna xíʼi̱n ña̱ va̱ʼaní íyo ña̱ kéʼíi̱, ta nda̱a̱ miíi̱ ndákanda̱-ini xíʼin ki̱ʼva ña̱ íyoi̱ vitin. Sana kǒo kuchiñuvíi̱ ya̱ʼi̱ nu̱ú ña̱yóʼo soo Biblia kúú ña̱ chi̱ndeétáʼanní xíʼi̱n. Ña̱kán, va̱ása xíka-inii̱ ña̱ íyoníva ndee̱ Biblia ña̱ nasamaña iin na̱ yiví”.

13. ¿Ndáaña chindeétáʼan xíʼinyó ña̱ ndakanixi̱níyó xa̱ʼa̱ ña̱ va̱ʼa? (Gálatas 5:16).

¹³ (Kaʼvi Gálatas 5:16). Jehová va̱ʼaní-inira ta táxira espíritu santo ndaʼa̱yó ña̱ va̱ʼa chindeétáʼanña xíʼinyó ña̱ keʼéyó ña̱ va̱ʼa. Tá káʼviyó tu̱ʼun Ndióxi̱ saá kúú ña̱ táxiyó ña̱ chindeétáʼan espíritu yóʼo xíʼinyó. Ta saátu ndákiʼinyó espíritu santo tá ku̱a̱ʼa̱nyó reunión. Ta kán ku̱a̱ʼá tiempo kítáʼanyó xíʼin na̱ hermanoyó ta saátu na̱yóʼo chíkaa̱na ndee̱ ña̱ keʼéna nina ña̱ va̱ʼa, ta ña̱yóʼo ndásandakúña-iniyó (Heb. 10:24, 25; 13:7). Tá xíʼin ndiʼi níma̱yó káʼa̱nyó xíʼin Jehová, ta xákundáʼviyó nu̱úra ña̱ chindeétáʼanra xíʼinyó ña̱ sandákooyó iin ña̱ʼa, saá taxira espíritu santo ndaʼa̱yó ña̱ chindeétáʼanña xíʼinyó ña̱ kundeé-iniyó. Ña̱yóʼo kǒo kúni̱ kachiña ña̱ sáku̱taʼa Jehová ndiʼi ña̱ va̱ása va̱ʼa ndákanikaxi̱níyó xa̱ʼa̱, soo taxira ndee̱ ndaʼa̱yó ña̱ kǒo keʼé tukuyóña. Nda̱a̱ táki̱ʼva káchi Gálatas 5:16: “Taxindó ná chindeétáʼan ña̱ espíritu santo xíʼinndó tasaá kǒo keʼéndó nda̱a̱ ni iin ña̱ʼa ña̱ kúni̱ ku̱ñundó”.

14. ¿Nda̱chun ndáyáʼviní ña̱ ndakundeéyó ndakanixi̱níyó xa̱ʼa̱ ña̱ va̱ʼa?

¹⁴ Tá xa̱a̱ ki̱xáʼayó viíní kéʼéyó chiñu nu̱ú Ndióxi̱, ná chikaa̱yó ndee̱ ña̱ kǒo sandákooyó ña̱yóʼo ta ná ndakundeéyó ndakanixi̱níyó xa̱ʼa̱ ña̱ va̱ʼa. ¿Nda̱chun? Saáchi na̱ yiví ku̱a̱chi kúúyó, ta iin kama kuití kivi ndakavayó ta keʼéyó ña̱ va̱ása va̱ʼa. Ta ni xa̱a̱ nda̱kuchiyó, sava yichi̱ kivi kutóoyó keʼéyó ña̱ kini, tá kúú ña̱ kusíkíyó xa̱ʼa̱ xu̱ʼún, ña̱ koʼoyó ndixi nda̱a̱ xi̱niyó á ña̱ kotoyó nu̱ú yáʼa na̱ yiví chálá (Efes. 5:3, 4). Iin ta̱ loʼo ta̱ kúú testigo Jehová ni̱ka̱ʼa̱nra ña̱yóʼo: “Iin ña̱ íxayo̱ʼvi̱ní xíʼi̱n kúú ña̱ kútói̱ na̱ ta̱a. Nda̱kanixi̱níi̱ ña̱ loʼo tiempova kundoʼi̱ ña̱yóʼo tasaá ya̱ʼavaña, soo kǒo kívi tavái̱ ña̱yóʼo xi̱níi̱. Ta sava yichi̱ ndákanivaxi̱níi̱ xa̱ʼa̱ña”. ¿Ndáaña chindeétáʼan xíʼinyó ña̱ kundeé-iniyó tá kúni̱níyó keʼéyó iin ña̱ʼa soo iin ña̱ kini kúú ña̱yóʼo?

15. ¿Nda̱chun va̱ʼa kúniyó tá kúnda̱a̱-iniyó ña̱ ndiʼi na̱ yiví yáʼana nu̱ú táʼan tu̱ndóʼo ña̱ yáʼa miíyó nu̱ú? (Koto na̱ʼná).

¹⁵ Tá ndákanixi̱níyó ña̱ kǒo kúchiñukayó  xíʼin iin ña̱ va̱ása va̱ʼa ndíkaa̱ xi̱níyó, ná ndakaʼányó chi va̱ása íyo mitúʼunyó. Biblia káchiña: “Ndiʼi tu̱ndóʼo ña̱ va̱xi nu̱úndó, ndiʼiva na̱ yiví yáʼa nu̱ú ña̱yóʼo” (1 Cor. 10:13a). Nu̱ú inka Biblia siaʼa sa̱ndáya̱ʼana texto yóʼo: “Ndóʼó yáʼandó nu̱ú tu̱ndóʼo ña̱ xa̱a̱ yáʼa ndiʼi na̱ yiví nu̱ú”. Tu̱ʼun yóʼo ni̱ka̱ʼa̱nnaña xíʼin na̱ hermano na̱ xi̱ndoo chí Corinto. Sava na̱yóʼo xi̱kisi̱na xíʼin na̱ kǒo nítindaʼa̱ xíʼinna, na̱ ta̱a xi̱kisi̱na xíʼin na̱ ta̱a ta saátu xi̱xiʼina nda̱a̱ xi̱xinina (1 Cor. 6:9-11). Tá ni̱ya̱ʼa tiempo na̱yóʼo nda̱kuchina, soo, ¿á sa̱ndákoona ña̱ ndakanixi̱nína xa̱ʼa̱ ndiʼi ña̱yóʼo? Sana va̱ásaví. Ña̱ nda̱a̱ ndiʼi na̱yóʼo na̱ ku̱ʼu̱n chí ndiví xi̱kuuna soo na̱ yiví ku̱a̱chiva xi̱kuuna. Xa̱ʼa̱ ña̱kán, sana sava yichi̱ xi̱ndakanivaxi̱nína xa̱ʼa̱ ña̱ kini yóʼo. Ña̱yóʼo sándi̱koña-iniyó, saáchi inka na̱ hermano xa̱a̱ ndóʼona nda̱a̱ táki̱ʼva ndóʼo miíyó soo kúchiñuvana yáʼana nu̱ú ña̱yóʼo. Xa̱ʼa̱ ña̱kán kiviva ndakundeéyó nda̱kú koo iniyó xíʼin Jehová chi kúnda̱a̱-iniyó ña̱ ndiʼi na̱ hermanoyó yáʼana nu̱ú táʼan tu̱ndóʼo ña̱ yáʼa miíyó nu̱ú (1 Ped. 5:9).

16. ¿Ndáaña kúú ña̱ kǒo xíniñúʼu ndakanixi̱níyó, ta nda̱chun?

¹⁶ Ná kǒo ndakanixi̱níyó ña̱ ni iinna kǒo kúnda̱a̱-ini xíʼin ña̱ ndóʼoyó chi su̱ví saá íyoña. Saáchi tá ná kixáʼayó ndakanixi̱níyó ña̱yóʼo, kixáʼayó ka̱ʼa̱nyó ña̱ nda̱a̱ ni iinna kǒo kúchiñu chindeétáʼan xíʼinyó ya̱ʼayó nu̱ú ña̱yóʼo. Soo síínva káʼa̱n Biblia, saáchi ña̱yóʼo káchiña: “Ndióxi̱ nda̱kúní-inira ta va̱ása taxira ya̱ʼandó nu̱ú iin tu̱ndóʼo ña̱ kǒo kundeé-inindó xíʼin. Chi tá ná kixi tu̱ndóʼo nu̱úndó, chindeétáʼanvara xíʼinndó ña̱ va̱ʼa kundeé-inindó ya̱ʼandó nu̱úña” (1 Cor. 10:13b). Xa̱ʼa̱ ña̱kán, ni ndakaniníva xi̱níyó xa̱ʼa̱ ña̱ kini, kuchiñuvayó nda̱kú koo iniyó xíʼin Jehová. Miíra chindeétáʼan xíʼinyó tasaá kǒo keʼéyó ña̱yóʼo.

17. Sana ndakaniva xi̱níyó xa̱ʼa̱ ña̱ va̱ása va̱ʼa, soo, ¿ndáaña kivi keʼéyó?

¹⁷ Ná ndakaʼányó chi na̱ yiví ku̱a̱chi kúúyó ta  ña̱ va̱ása va̱ʼa íyoña iniyó ta kixaa̱va iin tiempo ña̱ ndakanixi̱níyó xa̱ʼa̱ ña̱yóʼo. Soo tá ná kuu ña̱yóʼo ná kǒo xinu̱-iniyó ta keʼéyóña, ná keʼéyó nda̱a̱ táki̱ʼva ke̱ʼé ta̱ José, chi ta̱yóʼo xi̱nura nu̱ú ñá síʼi ta̱ Potifar (Gén. 39:12). Kiviva sa̱ñáyó ndaʼa̱ ña̱ va̱ása va̱ʼa, va̱ása xíniñúʼu keʼévíyóña.

18, 19. ¿Ndáa pregunta chindeétáʼan xíʼinyó ña̱ ndakundeéyó ndasaxa̱áyó ña̱ ndákanixi̱níyó?

¹⁸ Ña̱ va̱ʼa ndasaxa̱áyó ña̱ ndákanixi̱níyó xíniñúʼu ndakundeéyó chika̱a̱yó ndee̱ ña̱ va̱ʼa ndiʼi ña̱ ndákanixi̱níyó xíʼin ña̱ kéʼéyó ná sakúsi̱íña-ini Jehová. Xa̱ʼa̱ ña̱kán xíniñúʼu kotoyó ndáa ki̱ʼva íyoyó ta ndakanixi̱níyó xa̱ʼa̱ ña̱yóʼo: “¿Á náʼi̱ xíʼin ña̱ kéʼíi̱ ña̱ kúnda̱a̱-inii̱ ña̱ xa̱a̱ ku̱nu̱míní kixaa̱ ki̱vi̱ Jehová? ¿Á ndákundeéi̱ násamai̱ ki̱ʼva ña̱ íyoi̱? ¿Á táxii̱ ña̱ chindeétáʼan Jehová xíʼi̱n tasaá kǒo keʼíi̱ ña̱ kunii̱?”.

¹⁹ Tándi̱ʼi nda̱kanixi̱níyó xa̱ʼa̱ ña̱yóʼo, ná kotoyó ndáaña kúú ña̱ va̱ʼa ña̱ xa̱a̱ kéʼéyó ta ná kǒo ndakanixi̱níyó ña̱ kǒo kuchiñuyó keʼéyó ndiʼiña. Tá kíʼinyó kuenta ña̱ xíniñúʼu viíka keʼéyó iin ña̱ʼa, ná kǒo ndakava-iniyó. Va̱ʼaka ná kundiku̱nyó ña̱ káʼa̱n Filipenses 3:16: “Ni nda̱a̱ ndáaka ki̱ʼva kúú ña̱ xu̱xa-iniyó xíʼin tu̱ʼun Ndióxi̱, ná ndakundeéyó viíní kakayó ti̱xin yichi̱ yóʼo”. Tásaá ná keʼéyó, Jehová taxira ku̱a̱ʼání ña̱ va̱ʼa ndaʼa̱yó xa̱ʼa̱ ña̱ chíkaa̱níyó ndee̱ ña̱ ndasaxa̱áyó ña̱ ndákanixi̱níyó.