1, 2. ¿Tlen moneki tikchiuaskej maski yotimoapolaktijkej? Xikyekijto.

 ¿MOJMOSTLA titlachipaua mokalijtik? Xamo ijkuak otichantito mokalijtik sapanoua otikchipa. Pero tla tikneki nochipa kualtsin mamota, moneki mojmostla tikchipauas porque tla amo ijkon tikchiuas, tlali uan tlajsoli san niman momiaktilis.

² Moneki tikmaluiskej ken timokuayejyekouaj uan tlen tikchiuaj. Ijkuak otimoapolaktijkej otimochijchikajkej para tikpatlaskej tlen otikchiuayaj uan ayakmo otikchijkej tlen ‘weletis kijtlakos tokuerpo iwa espíritu’ (2 Cor. 7:1). Pablo okijto moneki mojmostla timochijchikauaskej tikpatlaskej ken timokuayejyekouaj (Efes. 4:23, TNM). ¿Tleka moneki ijkon tikchiuaskej? Porque nochi tlen kiyekana Satanás san niman uelis techijtlakos. Para timomaluiskej uan tikyolpaktiskej Jehová moneki tikmaluiskej tlen timokuayejyekouaj, tlen tikchiuaj uan tlen techyoltilana.

3. ¿Tlen moneki tikchiuaskej para tikpatlaskej ken timokuayejyekouaj? (Romanos 12:2).

³ ¿Tlen moneki tikchiuaskej para tikpatlaskej ken timokuayejyekouaj? (Xiktlajtolti Romanos 12:2). Amo san moneki kuali tikchiuaskej seki tlamantli para kuali tiyetoskej. Moneki tikitaskej tlen tikmachiliaj uan tlen tikchiuaj. Tla tikitaj itlaj amo kuali tikchijtokej, san niman moneki tikpatlaskej para tikchiuaskej tlen Jehová technauatia.  Pero amo kijtosneki tikchiuaskej san se uelta, moneki nochipa ijkon tikchijtoskej.

4. ¿Tlen moneki tikchiuaskej para amo timokuayejyekoskej ken akinmej amo kitekichiuiliaj Jehová?

⁴ Ijkuak ayakmo tiyetoskej titlajtlakolejkej nochipa tikyolpaktiskej Jehová. Pero axkan moneki timochijchikauaskej hasta maajsi non tonal. Pablo okijkuilo itech Romanos 12:2 moneki matikpatlakan ken timokuayejyekouaj uan matikchiuakan tlen kipaktia toTajtsin Dios. Tla timokuayejyekouaj ken Jehová, tikitaskej ken okachi tiktekichiuiliskej uan amo tikchiuaskej nion timokuayejyekoskej ken akinmej amo kitekichiuiliaj.

5. ¿Ken uelis tikmatiskej kox tikneltokaj yitlamis tlen amo kuali? (Xikinmita fotos).

⁵ Jehová kineki matikchixtokan “n tonati non Dios yokitlali” (2 Ped. 3:12). Ikinon matimotlajtlanikan: “¿Nikteititia nikneltoka yitlamis tlen amo kuali? ¿Nikteititia okachi nikpatioita niktekichiuilis Jehová ijkuak nitekipanoua noso ijkuak nimomachtia? ¿Nikneltoka Jehová nechmaluis uan noijki kimaluis nofamilia noso nimotekipachoua uan niktemoua nikpias miak tlamantli?”. ToTajtsin Dios yolpaki ijkuak kita timochijchikauaj tiktekichiuiliaj (Mat. 6:25-27, 33; Filip. 4:12, 13).

6. ¿Tlen moneki tikchiuaskej para kuali timokuayejyekoskej?

⁶ Tla tikitaj amo kuali timokuayejyekoua, san niman matikpatlakan. Pablo okinmilui tokniuan tlen ochantiayaj Corinto: “Nomejwah nomonewiah ximoyejyekokah kox milák nonkipiah tlaneltokálistli” (2 Cor. 13:5). Para titlaneltokaskej amo san moneki timonechikoskej uan titetlapouiskej. Noijki tikteititiaj melauak titlaneltokaj tla kuali timokuayejyekoua, tikitaj tleka tikchiuaj  seki tlamantli uan tlen techyolinia. Ikinon para kuali timokuayejyekoskej moneki mojmostla matiktlajtoltikan Biblia, matimochijchikauakan timokuayejyekoskej ken Jehová uan san niman matikpatlakan tla tikchiuaj itlaj tlen amo kipaktia (1 Cor. 2:14-16).

7. Ijkon ken kijtoua Efesios 4:31, 32, ¿tlen okachi moneki tikchiuaskej uan tleka oui?

⁷ (Xiktlajtolti Efesios 4:31, 32). Amo san moneki tikpatlaskej ken timokuayejyekouaj, noijki moneki ‘timoyolpatlaskeh’ (Efes. 4:24). Ikinon moneki timochijchikauaskej para ayakmo tikchiuaskej tlen otikchiuayaj ijkuak ayamo otimomachtiayaj Biblia. Xamo san niman otikualaniayaj noso amo otitetlapojpoluiayaj. ¿Tleka oui ayakmo tikchiuaskej tlen achto otikchiuayaj? Porque xamo ijkon otimoskaltijkej. Biblia kijtoua kajki akin “san niman kualani” uan akin “nochipa kualani” (Prov. 29:22). Maski yotimoapolaktijkej ok moneki timochijchikauaskej tikchiuaskej tlen Jehová kipaktia. Matikitakan tlen okipanok se tokni.

8, 9. ¿Tlen techmachtia tlen okipanok tokni Stephen?

⁸ Se tokni tlen itoka Stephen sapanoua okualaniaya. Ye okijto: “Maski yonimoapolakti ok moneki nimochijchikauas para amo nikualanis. Se tonal ijkuak otikintlapouiayaj sekimej familias, onikitak se tlakatl okichtek radio tlen okatka ijtik nocarro uan onia para nikitskis. Ijkuak nikitskiskia okikajte radio uan ocholo. Ijkuak onikinmilui tokniuan tlen onechpanok se tokni tlen okipiaya miak xiuitl okitekichiuiliaya Jehová, onechilui: ‘¿Tlen tikchiuiliskia non tlakatl tla tikitskiskia?’. Ijkuak ijkon onechtlajtlani onikitak ok omonekiaya nimochijchikauas para nikchiuas tlen Jehová kineki”. b

⁹ Tlen okipanok Stephen techmachtia maski timochijchikajtokej ayakmo tikchiuaskej tlen amo kuali xamo oksepa ijkon peuas tikchiuaskej. Tla ijkon mitspanotok, amo ximotekipacho nion ximokuayejyeko amo kuali tiktekichiuilia Jehová. Pablo okijto: “Ijkuak nikneki nikchiwas tlan kuali, nikita nin tlanawátili amo kuali kajki noijtik” (Rom. 7:21-23). Tinochtin titlajtlakolejkej ikinon uelis tikchiuaskej uan tikijtoskej seki tlamantli tlen amo kuali non yetoskia ken tlali uan tlajsoli tlen momiaktilia tokalijtik. Ikinon moneki nochipa ‘timoyolpatlaskeh’. ¿Tlen techpaleuis?

10. ¿Tlen moneki tikchiuaskej para tikpatlaskej tlen amo kuali tikchiuaj? (1 Juan 5:14, 15).

¹⁰ Matikiluikan Jehová tlen tiknekij tikpatlaskej uan matikneltokakan ye techkakis uan techpaleuis (xiktlajtolti 1 Juan 5:14, 15). Jehová amo kichiuas se milagro para mapoliui tlen amo kuali tikchiuaj pero techyolchikauas para matitlaxikokan (1 Ped. 5:10). ¿Tlen moneki tikchiuaskej? Amo matikchiuakan seki tlamantli tlen makichiua oksepa matikchiuakan ken akinmej amo kitekichiuiliaj Jehová. Amo matikitakan películas, amo matiktlajtoltikan amochmej nion matikitakan tlen kisa itech televisión tlen kiteititia tlen amo kuali. Noijki matikmaluikan ken timokuayejyekouaj (Filip. 4:8; Col. 3:2).

11. ¿Ken uelis tikpatlaskej ken timokuayejyekouaj uan tikchiuaskej tlen kuali?

¹¹ Maski ayakmo tikchiuaj ken akinmej  amo kitekichiuiliaj Jehová ok moneki timochijchikauaskej para ‘timoyolpatlaskeh’. Ikinon moneki okachi matikixmatikan Jehová uan ijkon uelis tikchiuaskej ken ye (Efes. 5:1, 2). Ijkuak tiktlajtoltiaj Biblia uan tikitaj ken Jehová tetlapojpoluia, matimotlajtlanikan: “¿Nitetlapojpoluia?”. Noso ijkuak timomachtiaj Jehová kinmiknomati akinmej tlajyouiaj, matimotlajtlanikan: “¿Nimotekipachoua ijkuak tokniuan tlajyouiaj uan nikinpaleuia?”. Matimochijchikauakan ‘timoyolpatlaskeh’ uan matikpatlakan ken timokuayejyekouaj. Noijki amo matimoyolkokokan tla amo san niman uelis ijkon tikchiuaskej.

12. Ijkon ken okipanok Stephen, ¿ken techpaleuia Biblia matikpatlakan tonemilis?

¹² Yotikitakej tlen okipanok Stephen itech párrafo 8, ye omochijchika para kipatlas tlen amo kuali okichiuaya. Ye okijto: “Maski yonimoapolakti onikitak oui amo sapanoua nikualanis. Para amo nikualanis, nikisa noso nimoyolseuia tla itlaj nechkualania. Miakej onechiluijkej kuali tlen nikchiua porque ayakmo sapanoua nikualani noijki nosiua ijkon yonechilui uan hasta ne nechtlajtlachialtia. Amo nikijtoua noselti ijkon nikchijtok, nikneltoka Biblia yonechpaleui porque kinpaleuia makipatlakan innemilis akinmej kitlajtoltiaj”.

13. ¿Tlen techpaleuis para amo timokuayejyekoskej tlen amo kuali? (Gálatas 5:16).

¹³ (Xiktlajtolti Gálatas 5:16). Jehová techpaleuia uan techmaka iespíritu santo para amo matikchiuakan tlen amo kuali. Ijkuak tiktlajtoltiaj Biblia tikkauiliaj Jehová matechyekana ika iespíritu santo. Noijki techmaka iespíritu santo ijkuak timonechikouaj. Ijkuak tikatej inmiuan tokniuan timoyolchikauaj porque yejuan noijki mochijchikauaj kitlakamatiskej Jehová (Heb. 10:24, 25; 13:7). Ijkuak tiktlatlaujtiaj Jehová ika nochi toyolo uan tikiluiaj matechpaleui matitlaxikokan, ye technankilis uan techmakas iespíritu santo para matimoyolchikauakan uan ok matitlaxikokan. Xamo amo san niman tikkauaskej tlen amo kuali pero Jehová techpaleuis para amo matitlajtlakolchiuakan. Ijkon ken kijtoua Gálatas 5:16 akinmej moyekanaj ika iespíritu santo “amo nomechyoltilanas [noso nankichiuaskej] tlan amokuali”.

14. ¿Tleka moneki mojmostla timochijchikauaskej para amo timokuayejyekoskej tlen amo kuali?

¹⁴ Maski timomachtiaj Biblia, timonechikouaj uan titetlapouiaj ok moneki mojmostla timochijchikauaskej para nochipa ijkon tikchiuaskej uan timokuayejyekoskej tlen kuali. ¿Tleka moneki ijkon tikchiuaskej? Porque Satanás nochipa techyejyekoua. Maski yotimoapolaktijkej uelis timokuayejyekoskej tikchiuaskej tlen amo kuali ken timauiltiskej para tiktlaniskej tomin, titlauanaskej noso tikitaskej pornografía (Efes. 5:3, 4). Se tokni telpochtli, okijto: “Ualeua nikmachilia nechpaktia oksekimej telpochmej. Onimokuayejyekouaya ayakmo ijkon nimomachiliskia pero ok oui nikita”. ¿Tlen techpaleuis para amo timokuayejyekoskej tlen amo kuali?

15. ¿Tleka techyolchikauaj tikmatiskej tinochtin moneki timochijchikauaskej para amo tikchiuaskej tlen amo kuali? (Xikita foto).

¹⁵ Tla timotekipachouaj porque timokuayejyekouaj itlaj amo kuali, matikilnamikikan  amo tikatej toselti. Biblia kijtoua: “Nochi tlan nomechyoltilana, noiwa mochiwah nochteh n tlaltikpaktlakah” (1 Cor. 10:13a). Okse Biblia ijkin okitlajtolkopkej: “Namejuan namechyejyekouaj ijkon ken oksekimej”. Non okinmiluijkej tokniuan akinmej ochantiayaj Corinto. Sekimej achto oauilnemiayaj, omotlakakopayaj uan otlauanayaj (1 Cor. 6:9-11). ¿Omochijchikajkej para amo mokuayejyekoskej tlen amo kuali satepan ijkuak omoapolaktijkej? Xamo kema omochijchikajkej. Maski nochtin okinpejpenkej yaskej iluikak, ok okatkaj tlajtlakolejkej. Ikinon xamo omochijchikajkej para amo mokuayejyekoskej tlen amo kuali. Non techyolchikauaj porque techmachtia oksekimej tokniuan omochijchikajkej kichiuaskej tlen kuali. Ikinon “nochipa xikneltokakah Dios. Porke ya nonkimatokeh itech nochi n tlaltíkpaktli, oksikimeh nomokniwah tlaneltokakeh tlaijyowijtokeh kemi nomejwah” (1 Ped. 5:9).

16. ¿Tlen amo moneki timokuayejyekoskej uan tleka?

¹⁶ Amo matimokuayejyekokan amikaj kajsikamati tlen techpanoua. Amo matimokajkayauakan. Porque tla ijkon timokuayejyekouaj, uelis tikneltokaskej amo keman tikchiuaskej tlen kuali. Biblia kijtoua: “Dios nochipa kiyekchiwa tlan kijtoa, Ye amo kitekawilis manomechyoltilana okachi tla ayakmó nontlaxikoah. Ye nomechilis kenomi nonmakisaskeh, iwa ijkó nontlaxikoskeh” (1 Cor. 10:13b). Uelis nochipa tiktlakamatiskej Jehová maski oui tikmachiliskej tikchiuaskej tlen kuali. Ye techpaleuis para amo matitlajtlakolchiuakan.

17. ¿Tlen uelis tikchiuaskej maski ualeua timokuayejyekoskej tlen amo kuali?

¹⁷ Matikilnamiktokan titlajtlakolejkej uan xamo ualeua timokuayejyekoskej  tlen amo kuali. Ijkuak ijkon matechpano san niman okse tlamantli matimokuayejyekokan, matikchiuakan ken José, ye ocholo ijkuak isiua Potifar okinekiaya iuan motekas (Gén. 39:12). Amo matikkauakan matechyekana tlen amo kuali.

18, 19. ¿Tlen uelis timotlajtlaniskej para tikpatlaskej ken timokuayejyekouaj?

¹⁸ Moneki timochijchikauaskej para tlen timokuayejyekouaj uan tlen tikchiuaj makiyolpakti Jehová. Ikinon moneki mojmostla matimotlajtlanikan: “¿Tlen nikchiua kiteititia nikneltoka yitlamis nochi tlen amo kuali? ¿Nimochijchikaua para ‘nimoyolpatlas’? ¿Nikkaua iespíritu santo Jehová manechyekana para amo nimokuayejyekos tlen amo kuali?”.

¹⁹ Ijkuak yotimokuayejyekojkej tlen otiknankilijkej, matikitakan tlen kuali tikchiuaj uan amo matimokuayejyekokan san niman nochi kuali tikchiuaskej. Noijki tla tikitaj itlaj amo kuali tikchijtokej, amo matimotekipachokan. Matikchiuakan tlen kijtoua Filipenses 3:16: “Tlan yotikajxilijkeh moneki matimoajsikamatikah iwa nochipa matiyeknemikah ijkó kemi ya tikyekchijtiwitseh”. Tla ijkon tikchiuaj, Jehová techteochiuas porque mojmostla timochijchikaua tikpatlaskej ken timokuayejyekouaj.