1-2. Ye mɛ ayɔ ya, e ngbã lá kwɛ lingɔ na pɛ batisimɔ tɛ e nɛ? Kambisa.

 NGOI gba, mɔ ndo yɔ yada tɛ mɔ bere mɔ ndo mbo ni fãni kɛ̃? Ngoi mɛndɛ̃ uzu ti mɔ diringɔ kaya da ti fãnani ko, mɔ mbo bere mɔ lɛkɛ ni na seni nvɛ̃ni. Kanda se du ya, ali abi gba ta mɔ lɛkɛ bere mɔ ndo kpo ni ma ko, ye mɛ na singɔ nɛ? Nga ma se mɛ mɔ hĩnga na ni, ta na ningangɔ ma ya, bí ná pusiɛrɛ amu yada tɛ mɔ. Ti nɛngɔ ya, da tɛ mɔ du vuruni nga nzɔ̃ni ko, ayɔ ya, mɔ ndo lɛkɛ ni ngoi zu.

² Kwɛ kɔi, ayɔ nga ya, e ndo li ngaso ngoi zu na lo ti bingangɔ li nga na seliye tɛ e. Ti biani, uzu ti e mungɔ batisimɔ ko, e lindó kpengbani ti nɛngɔ ya, ‘e hã bi ti ya mi nga na ti ya nyingɔ ge tɛrɛ e zu e zi.’ (2 Kɔr. 7:1) Kanda na olo, ayɔ ya, e landa wangɔ tɛ toma Polo ti “Ngbangɔ lá kwɛ gbinyangɔ dangɔ bɛ tɛ e, ya ati fãnani.” (Ef. 4:23) Nda mɛ ayɔ ya, e li kpengbani ti lɛkɛngɔ seliye tɛ e nɛ? Na lo mɛ ya, ta na nĩngangɔ ti nɛngɔ ya, bí ná pusiɛrɛ ti lɛ gigi agbɛ̃ e ka lɛ Yehova ma. Ti nɛngɔ ya, ta ni si na e ma, wa e du ngoi zu vuruni ka lɛ Yehova ko, ayɔ ya, e ndo ba bingangɔ li, seliye nga na dangɔ bɛ tɛ e ngoi zu.

3. Lingɔ ya, bingangɔ li ati ti fãnani alengbi na nɛ? (Roma 12:2)

³ Ye mɛ ayɔ ya, e li ti nɛngɔ ya, bingangɔ li tɛ e ati ti fãnani, afa ya, e gbinyangbi ni nɛ? (Di Roma 12:2.) Tɛnɛ ti grɛkɛ mɛ agbinyangbi na “lingɔ ya bingangɔ li ati ti fãnani” ko, alengbi nga ti gbinyangbingɔ ni ya, “lɛkɛngɔ bingangɔ li.” Na lo ni la,  ta ayɔ ya, e ngbã bo lingɔ anzɔ̃ ye ma. Kanda ayɔ ya, e ba kaya bɛ e nga na se du tɛ e, ti nɛngɔ ya, e hũ aye mɛ elengbi ti gbinyangbingɔ ti nɛngɔ ya, e tɔndɔ andia tɛ Yehova se alengbi. Ta ayɔ ya, e li bo ni fãni kɔi ma, kanda ngoi zu.

4. Ngasia la elengbi ti lingɔ ya, ta gigi olo adɔ bingangɔ li tɛ e na nɔ ma nɛ?

⁴ Na ngoi mɛ gbanda e na tingɔ azi ti lengbingɔ ko, e na tingɔ na makoki ti hɛ̃ngɔ Yehova dengɔ bɛ na ya aye zu mɛ e na lingɔ. Kanda uzu ti nɛngɔ ya, ngoi niko alengbi ko, ayɔ ya, e li kpengbani ti hɛ̃ngɔ lo dengɔ bɛ. Ba mangbi mɛ Polo li na popo tɛ lingɔ ya, bingangɔ li tɛ e ati ti fãnani ná hĩngangɔ se bɛ Nzapa kaya mbeti ti Roma 12:2. Na se lɛ ziangɔ ya, dangɔ bɛ ná bingangɔ li ti gigi olo adɔ e na nɔ ko, uzu uzu ayɔ ya e gbɔ li e na ndo se mɛ e ndo zia ya dangɔ bɛ tɛ Nzapa adɔ e na nɔ, kanda ta ti gigi olo ma.

5. Ahũnda mɛ elengbi ti hũndangɔ na tɛrɛ e so fangɔ ya, e ndo hũ ya, bi tɛ Yehova angba dã nɛ? (Ba limɔ.)

⁵ E mu se lɛlo kɔi. Yehova ye ya, e “bata kaya bingangɔ li tɛ e bi tɛ lo.” (2 Pet. 3:12) Hũnda tɛrɛ mɔ na ndo mɛ: ‘Dungɔ lɛ ngɛ̃́ tɛ mbi ndo fa ya, mbi gbɔ̃ nda ni ya, e ti nvɛ̃ni na ndangba bi? Ekateli tɛ mbi na omɛ aba lingɔ kalasi ná kwa ando fa ya, vɔrɔngɔ Yehova adu ye mɛ ngbondoni na ya dungɔ lɛ ngɛ̃́ tɛ mbi? Mbi ndo du na loyengɔ ya, Yehova na kokisangɔ gwɛ̃ tɛ mbi bere mbi ndo du na songɔ bɛ ngoi zu na lo ni?’ Yehova ndo du na dengɔ bɛ nvɛ̃ni na ngoi mɛ lo ndo hũ se mɛ e ndo li kpengbani ti tɔndɔngɔ andia tɛ lo na ya dungɔ lɛ ngɛ̃́ tɛ e.​—Mat. 6:25-27, 33; Fil. 4:12, 13.

6. Ye mɛ ayɔ ya, e ngbã lá kwɛ lingɔ nɛ?

⁶ Ayɔ ya, e ndo ba se ti bingangɔ li tɛ e bi zu, wa e ndo lɛkɛ ni se alengbi. Polo pandó hɛ̃ azi ti Kɔrinto ya: “Ĩ ngbã lá kwɛ tarangɔ tɛrɛ ĩ ti nɛngɔ ya, ĩ hĩnga ya, ĩ na ya loyengɔ; ĩ ndo ba  tɛrɛ ĩ ngoi zu ti nɛngɔ ya, ĩ hĩnga se mɛ ĩ da.” (2 Kɔr. 13:5) Dungɔ ‘na ya loyengɔ’ ando yɔ aye gba, ta angbã bo na ndo gwengɔ bombi ngoi zu, nga na singɔ kwa ti fangɔ tɛnɛ ma. Ni ba nga bingangɔ li tɛ e, gwɛ̃ tɛ e, nga na dangɔ bɛ tɛ e. Na lo ni la, ayɔ ya e ngbã lá kwɛ lingɔ ya, bingangɔ li tɛ e ati fãnani na mandangɔ tɛnɛ tɛ Nzapa, ye mɛ na to ngɔ e ya, e binga li e nga ma se mɛ lo ndo binga na li lo, wa e li zu ti nɛngɔ ya, e hɛ̃ lo dengɔ bɛ.​—1 Kɔr. 2:14-16.

7. Na bangɔ Efɛzɛ 4:31, 32, ye mɛndɛ̃ mɛ ayɔ ya e li nɛ, wa nda mɛ lingɔ ni alengbi ti dungɔ pɛnɔ nɛ?

⁷ Di Efɛzɛ 4:31, 32. Hãngɔ gbinyangbingɔ bingangɔ li tɛ e zingɔ ko, ayɔ nga ya, e “mu fana du.” (Ef. 4:24) Ando yɔ ge ge ge ti nɛngɔ ya, e li ni. Ti biani ko, ando yɔ ngoi nga na ge ge ge ti nɛngɔ ya, e zia aseliye ti siɔni mabere gbengɔ azi kaya e, dungɔ na ngɔnzɔ ti kpengbani nga na gɛ̃ngɔ kula. Nda mɛ lingɔ ni alengbi ti dungɔ kpengbani nɛ? Na lo mɛ ya, ando du pɛnɔ nvɛ̃ni ziangɔ aseliye mɛndɛ̃ ti siɔni mɛ ali ya tɛrɛ e kpengbani. Na ndakisa, Ngbangɔ tɛnɛ ya, azi mɛndɛ̃ ndo “du dã ti mangɔ ngɔnzɔ” wa ta azi mɛndɛ̃ ndo “ninga na nyɛnyingɔ ma.” (Mas. 29:22) Ti nɛngɔ ya, zo zia aseliye ti ngaso ko, na yɔngɔ ya, lo li kpengbani nvɛ̃ni abɛse na pɛ batisimɔ tɛ lo. Zia e ba se lɛlo kɔi.

8-9. Ngasia la se lɛlo tɛ Stephen afa nda mɛ adu ngbondoni ya, e ngbã lá kwɛ lingɔ kpengbani so ziangɔ ngbina du nɛ?

⁸ Ando dundó pɛnɔ ya, Nyita kɔli Stephen agbe ngɔnzɔ tɛ lo. Lo pa ya, “Abɛse na pɛ batisimɔ tɛ mbi ko, ayɔndó ya mbi ngbã lá kwɛ lingɔ kpengbani ti nɛngɔ ya, ta ngɔnzɔ aɔ ndo mbi ma. Na ndakisa, lá kɔi mɛndó e si kwa ti fangɔ tɛnɛ nyɔ da na yɔ da ko, mbi landandó wa nzĩ kɔi mɛndó anzĩ radio kaya kamiɔ̃ tɛ mbi na kpɛ nvɛ̃ni. Na ngoi mɛndó mbi dɛ dã na lo ko, lo zindó radio ni ati tise, wa lo kpɛndó. Na ngoi mɛndó mbi kambisa hɛ̃ ayata mɛndó so ndoko se mɛ mbi diri mbi mu na radio tɛ mbi ko, biazo kɔi mɛ so popo tɛ e ahũndandó mbi ya, ‘Stephen, se du fale ya mɔ gbɔ̃ lo ko, ale ye mɛ mɔ li na lo nɛ?’ Hũnda niko atondó mbi ya, mbi gbɔ̃ li mbi wa, mbi ngbã lá kwɛ lingɔ kpengbani ya, mbi du zo ti siriri.” b

⁹ Nga ma se mɛ se lɛlo tɛ Stephen afa na ni, seliye ti siɔni alengbi ti diringɔ mbala kɔi ka tɛrɛ, abɛse e ndo da bɛ e ya, e nwɔ ni wɛ. Se ni si na mɔ ko, ta mɔ nzɛ̃ ma, wa ta mɔ da nga bɛ mɔ ya, mɔ du siɔ wakristo ma. Abɛse toma Polo ko, lo yendó ya: “Ngoi mɛ mbi ndoye lingɔ nzɔ̃ ye ko, mbi ndo li bo siɔ ye.” (Roma 7:21-23) Na lo mɛ ya, e zu e du azi ti zangangɔ lengbingɔ ko, e ndo tiri to ngoi zu na ambanga aseliye ti siɔni mɛ ando diri ka tɛrɛ e nga ma se mɛ salité ná pusiɛrɛ ndo diri amu yada tɛ e. Ayɔ ya, e ngbã lá kwɛ lingɔ kpengbani ti nɛngɔ ya, e du vuruni. Elengbi ti lingɔ ni ngasia?

10. Ngasia la elengbi ti tiringɔ to na aseliye tɛ e ti siɔni nɛ? (1 Yn. 5:14, 15)

¹⁰ Li sambela hɛ̃ Yehova na lo ti seliye ti siɔni mɛ mɔ ndo tiri to so ziangɔ ni, kpã bɛ mɔ ya, lo na mangɔ sambela tɛ mɔ, wa lo nga na hɛ̃ngɔ mɔ gbinya. (Di 1 Yoanɛ 5:14, 15.) Ti bɛta tɛnɛ ko, ta Yehova na hãngɔ seliye niko na ndenge ti kpɛ̃nɛ ma, kanda lo na hɛ̃ngɔ mɔ ngunu ti nɛngɔ ya, ta seliye niko ako ndo mɔ ma. (1 Pet. 5:10) Kanda li kpale na mangbi na sambela tɛ mɔ, na lingɔ kpengbani ya, ta ngbina du adiri fãni mɛndɛ̃ ka tɛrɛ mɔ. Na ndakisa, du na kpengba lɛ ya, ta mɔ ba avideo, aprɔgramɛ ti televisiɔ̃, bere mɔ di apandɛ mɛ ndo gonda seliye ti siɔni mɛ mɔ ndo tiri to so ziangɔ ni ma. Wa ta mɔ zia ya, bingangɔ li tɛ mɔ  ndo gwe na ndo agwɛ̃ ti bí ma.​—Fil. 4:8; Kɔl. 3:2.

11. Aye mɛ elengbi ti lingɔ ti nɛngɔ ya, e ngbã lá kwɛ mungɔ fãna du nɛ?

¹¹ Abɛse du ya, mɔ ziandó ngbina du tɛ mɔ wɛ ko, adu ngbondoni ya, mɔ mu fãna du. Mɔ lengbi ti lingɔ ni ngasia? Kpã mɔkanɔ ti landangɔ se lɛlo tɛ Yehova na ngoi mɛ mɔ ndo manda aseliye tɛ lo. (Ef. 5:1, 2) Na ndakisa na ngoi mɛ mɔ ndo di apandɛ ti ya Ngbangɔ mɛ ndo kambisa se mɛ Yehova ndo ka lɛlo na ndo siɔ kpale ko, hũnda tɛrɛ mɔ na ndo mɛ, ‘Mbi ndo ka lɛ mbi na ndo siɔ kpale tɛ azi mɛndɛ̃?’ Bere na ngoi mɛ mɔ ndo di pandɛ ti ya Ngbangɔ mɛ ndo kambisa se mɛ Yehova ndo fa bɛ ti vundu na azi mɛndó awa yɛlɛ ko, hũnda tɛrɛ mɔ na ndo mɛ, ‘Mbi ndo kpã tɛrɛ mbi na ndo tɛ ayata mɛ na gwɛ̃ ya aza ala, wa mbi ndo li ye kɔi so zangɔ ala?’ Ngbã lá kwɛ lingɔ ya, bingangɔ li tɛ mɔ ati fãnani na mungɔ fãna du, wa du na yɔngɔrɔ bɛ na ngoi mɛ mɔ ndo li ni.

12. Ngasia la se lɛlo tɛ Stephen afa ngunu mɛ Ngbangɔ na ni ti gbinyangbingɔ dungɔ lɛ ngɛ̃́ tɛ azi nɛ?

¹² Yɛkɛ yɛkɛ Stephen mɛ fale e tɛnɛ tɛnɛ tɛ lo uzu ko, alongandó mungɔ fãna du. Lo tɛnɛ ya: “Bandandó la mbi mu batisimɔ ko, mbi tengbi na akpale gba mɛndó alengbi ti hɛ̃ngɔ mbi ngɔnzɔ ti kpengbani, nga gbɛ̃ngɔ siriri tɛ mbi. Kanda mbi mandandó kpɛngɔ azi zu mɛ ndo gi lége so tongɔ mbi ya, mbi ma ngɔnzɔ, wa mbi ndo li ngandó ya, ta kpale agbangba ati siɔni ma. Azi gba ná ya mbi, ala ndo hɛ̃ndó mbi sia kɔli na ya akpale ti ngaso mɛ mbi bata siriri tɛ mbi. Ni ndo kamwisandó mbi nvɛ̃ni! Kanda ta mbi ndo hɛ̃ tɛrɛ mbi nvɛ̃ni gonda na lo ti gbinyangbingɔ niko mɛ mbi li ma. Kanda ni ndo to mbi ya, mbi ye ya, Ngbangɔ na ngunu ti gbinyangbingɔ dungɔ lɛ ngɛ̃́ tɛ azi.”

13. Ye mɛ na zangɔ e ya e ti na agwɛ̃ ti nzɔ̃ni nɛ? (Galatia 5:16)

¹³ Di Galatia 5:16. Ti nɛngɔ ya, Yehova za e, e nwɔ to mɛ e ndo tiri ti lingɔ aye ti nzɔ̃ni ko, na songo zu lo hɛ̃ e Nyingɔ vurú tɛ lo. Na ngoi mɛ e ndo manda ngbangɔ ko, e ndo zi lége hɛ̃ nyingɔ tɛ Nzapa ya, adɔ e na nɔ. E ndo lua nga Nyingɔ vurú na ngoi mɛ e ndo gwe bombi. Kai elengbi ti lekisangɔ ngoi ndoni kɔi na ayata kɔli na ayata wali mɛ nga ma e, ala ndo li kpengbani ti lingɔ aye mɛ nzɔ̃ni, wa ni ndo sa ngunu bɛ e. (Aeb. 10:24, 25; 13:7) Wa se e yɔ ka ti Yehova na lége ti sambela ya, lo za e, e nwɔ nzɛ̃ngɔ kɔi mɛ e na ni ko, lo lengbi ti hɛ̃ngɔ e ngunu ya, e ngbã lá kwɛ lingɔ kpengbani. Abɛse ngaso ko, ta mandangɔ Ngbangɔ, gwengɔ bombi ngoi zu, ná lingɔ sambela na hãngɔ kaya bɛ e gwɛ̃ ti lingɔ siɔ kpale ma, kanda ni na zangɔ e ya, e du kpengbani wa ta e li aye na landangɔ agwɛ̃ ti mi ma. Nga ma se mɛ Galatia 5:16 tɛnɛ na ni, azi ko la ndo li kpale na landangɔ Nyingɔ ko, ta ala ‘ndo li ye na landangɔ gwɛ̃ ti tɛrɛ la ma.’

14. Nda mɛ ayɔ ya, e ngbã lá kwɛ lingɔ kpengbani ti tingɔ na gwɛ̃ ti lingɔ nzɔ̃ ye nɛ?

¹⁴ Se e banda lingɔ aye mɛ na zangɔ e ya e du na mangbi ti nzɔ̃ni na Yehova ko, adu ngbondoni ya, e landa lingɔ ni wa e du nga na dangɔ bɛ ti nzɔ̃ni. Na lo nɛ? Na lo mɛ ya, ta wa kula tɛ e ndo nzɛ̃ na tiringɔ e na to ma. Wa kula niko adu gwɛ̃ ti lingɔ siɔ kpale mɛ kaya tɛrɛ e. Abɛse na pɛ batisimɔ tɛ e ko, elengbi ti tingɔ na gwɛ̃ ti lingɔ aye ti siɔni mabere, wele ti falanga, nyɔngɔ samba ɔngɔ nyɔ kpɔ ni nga na bangɔ pɔrnɔgrafi. (Ef. 5:3, 4) Nyita kɔli kɔi mɛ palanga tɛnɛ ya: “Ye kɔi mɛndó mbi ndo tiri to na lo ni, adu sepalangɔ na afɔ akɔli. Mbi ndo dandó bɛ mbi ya, ni na wɛngɔ gbanda la kɔi, kanda ni dɛ bo gia mbi  nvɛ̃ni.” Ye mɛ mɔ lengbi ti lingɔ se du ya, gwɛ̃ ti siɔni ndo gia mɔ nɛ?

15. Nda mɛ hĩngangɔ ya, ayata e ti lɛ gigi zu ndo tengbi nga na kpale mɛ aba dungɔ na gwɛ̃ ti siɔni ndo sa ngunu bɛ e nɛ? (Ba limɔ.)

¹⁵ Se du ya, mɔ ndo tiri to na dangɔ bɛ kɔi ti siɔni nvɛ̃ni ko, hĩnga ya, ta mɔ kɔi ma. Ngbangɔ tɛnɛ ya: “Tarangɔ bɛ ko la Satana ndo tara na bɛ ĩ ko, se mɛ nga lo ndo tara na azi zu la.” (1 Kɔr. 10:13a) Ngbangɔ mɛndɛ̃ gbinyangbi vɛrse mɛ ya: “Tara zu mɛ ĩ ndo tengbi na ni ko, ando si nga na azi zu, akɔli nga na awali.” Asundó mbeti mɛ hɛ̃ ayata kɔli ná ayata wali ti Kɔrinto. Atãnga ni ka popo tɛ ala, adundó awa tingɔ kɔmbɛ, azi mɛ ndo bombi tɛrɛ la na afɔ̃ la akɔli bere awali, nga awa nyɔngɔ samba ɔngɔ nyɔ kpɔ ni. (1 Kɔr. 6:9-11) Mɔ da bɛ mɔ ya, na pɛ batisimɔ tɛ la ko, ta ala dirindó ama gwɛ̃ ti aye niko ti siɔni ma? Ta se ni la ma. Ti biani ko, ala dundó azi mɛ ahĩni la na kpɔ̃, abɛse ngaso ko, ala bondó azi ti zangangɔ lengbingɔ. Ni la, ngoi mɛndɛ̃ ala ndo tirindó to na agwɛ̃ tɛ la ti siɔni ngoi zu. Ni lengbi ti sangɔ ngunu bɛ e. Na lo nɛ? Na lo mɛ ya abɛse agwɛ̃ tɛ e ti siɔni adu ti ngasia ko, e hĩnga ya, nyita kɔi nga na gwɛ̃ ti siɔni ti ngaso wa lo ndo tiri to na ni. Ni la elengbi ti ‘dungɔ kpengbani na ya loyengɔ, ta sanga ma, e hĩnga ya, ayata e awakristo mɛ amu lɛ sese zu ko. Ala ndo hũ nga gi tɛrɛ apɛnɔ mɛ e ndo hũ.’​—1 Pet. 5:9.

16. Sɔ̃ mɛ ayɔ ya, e kpɛ ni nɛ, wa n alo nɛ?

¹⁶ Keba ya, ta mɔ ti na ya sɔ̃ ti hũngɔ ya, ta zo kɔi na hĩngangɔ kpengba kpale mɛ mɔ ndo tengbi na ni ma. Dangɔ bɛ ti ngaso alengbi ti tongɔ mɔ ya, mɔ hũ ya, ta ye kɔi alengbi ti onzingɔ kpengba kpale tɛ mɔ ma, wa mɔ hũ nga ya, ta mɔ lengbi ti gbengɔ bɛ mɔ na ya ni ma. Ngbangɔ tɛnɛ tɛnɛ mɛ akɛsɛnɛ na oko. Ni pa ya: “[Nzapa du mbilimbili, ta lo na yengɔ ya,] Satana atara bɛ ĩ, ko tarangɔ bɛ ni aɔ ndo nguru tɛ ĩ ma. Kanda na ngoi ko la se Satana atara bɛ ĩ ko, Nzapa asa nguru bɛ ĩ ya, ĩ gbe bɛ  ĩ, wadila ĩ si kaya ni.” (1 Kɔr. 10:13b) Na lo ni la, abɛse agwɛ̃ ti siɔni mɛ e ndo tiri to na lo ni adu kpengbani ngasia ko, elengbi ti gbengɔ bɛ e na ya ni, wa e ngbã mbilimbili na mbage tɛ Yehova. Na lége ti lisalisi tɛ Yehova ko, elengbi ti gbengɔ bɛ e wa ta e zi lége hɛ̃ agwɛ̃ tɛ e ti siɔni ma.

17. Abɛse du ya, ta mɔ lengbi ti kɛ̃ngɔ dungɔ na agwɛ̃ ti siɔni ma, ye mɛ mɔ lengbi ti dungɔ na ngunu ti lingɔ nɛ?

¹⁷ Ta bɛ mɔ li na kpale mɛ ma: Na lo mɛ ya, mɔ du zo ti zangangɔ lengbingɔ ko, ta mɔ lengbi ti kɛ̃ngɔ ya agwɛ̃ ti siɔni aga kaya bingangɔ li tɛ mɔ ma. Kanda se du ya mɔ ti na gwɛ̃ ti siɔni ko, mɔ na ngunu ti hãngɔ ni mbala kɔi nga ma se mɛndó Yozɛfɛ kpɛ mbala kɔi ka gbɛlɛ ya Potifare. (Eb. 39:12) Ta ayɔ ya, mɔ zi lége hɛ̃ agwɛ̃ tɛ mɔ ti siɔni ya, adɔ mɔ na nɔ ma!

18-19. Ahũnda mɛ elengbi ti hũndangɔ na tɛrɛ e na ngoi mɛ e ndo li kpengbani ti tingɔ na bingangɔ li ti fãnani nɛ?

¹⁸ Nga ma se mɛ e lo ti hũngɔ na ni, lingɔ ya, bingangɔ li tɛ e ati ti fãnani ndo yɔ ya, e li kpengbani ti nɛngɔ ya, bingangɔ li ná dɔngɔ nɔ tɛ e amangbi na dangɔ bɛ tɛ Yehova. Ti nɛngɔ ya, mɔ li ni ko, ndo ba tɛrɛ mɔ ngoi zu na seni wa hũnda tɛrɛ mɔ na ando mɛ: ‘Mbi ndo li akpale na ndenge mɛ ndo fa ya, mbi hĩnga ya, ndangba bi angbã dã? Mbi ndo li kpengbani ti mungɔ du ti fãnani na lége ti aseliye tɛ mbi? Mbi ndo zia ya, Nyingɔ vurú tɛ Yehova aza mbi ti nɛngɔ ya, ta mbi zi lége hɛ̃ agwɛ̃ tɛ mbi ti mi ma?’

¹⁹ Na ngoi mɛ mɔ ndo ba tɛrɛ mɔ ko, ta mɔ gi tingɔ zo ti lengbingɔ ma, kanda sepala na ge ge ge mɛ mɔ ndo li. Se mɔ hũ ya, ayɔ ya mɔ lɛkɛ akpale mɛndɛ̃ ko, ta mɔ nzɛ̃ ma. Na se lɛ nzɛ̃ngɔ ko, landa wangɔ mɛ kaya Filipɛ 3:16: mɛ apa ya, “Lége tɛ Nzapa mɛ ndo e ndo ɔ ti da ngbĩi e si na ni na olo ko, e ngbã bo na ɔngɔ ti da.” Se mɔ li ngaso ko, mɔ lengbi ti yengɔ na bɛ mɔ kɔi ya, Yehova na sulungɔ ge ge ge tɛ mɔ, ti lingɔ ya bingangɔ li tɛ mɔ ati ti fãnani.